14727
قناه مختصة بالروايات الجديده حلقات فقط سودانيه وعالميه وعربيه لاقتراحاتكم وارائكم التواصل @wessam1412
"أعظمٌ انتقام يُمكن أن تمنحهُ للآخرين هو أن تجعلهُم يتحمّلون مسؤوليّة أفعالهم و أقوالهم ؛ أن تكون قوياً بما يكفي لتُلقي تحيّةَ الوداع ، تاركاً الرّمل الذي رفعوهُ يسقطُ فوق رؤوسِهم أن يشاهدونكَ راحلاً وهم الذين ظنّوا أنّكَ باقٍ لا تغيب "🖤
يتبع......
= يا عُلا نحنا ما صدقنا إنو يونس آخيراً لقى ليهو بت و بدا يفكر في الزواج ، البت دي عجبتو و ريدتو ليها ظاهره فـ قلت أكون وسيط بيناتهم و اختصر عليهم و اسهل على يونس بس البت رفضت !
_ انتوا البت دي بتعرفوها ولا ساي !... عارفين أصلها و فصلها شنو و قبيلتها و وضع أسرتها!
=دي كلها حاجات ما مهمه ، البت عجبت يونس و أنا ذاتي عجبتني
_بس الظاهر انتوا ما عجبتوها
= والله يونس دا ما الزول البترفض ، متأكده لو كان اتقدم لـ بت غيرها كانت حـ توافق و هي مغمضه بس دي ما عارفه ليه رفضتو ! قالت شايله فكرة الزواج دي من بالها بس كلامها دا ما أقنعني
_ يا بت طبيعي تكون شايله فكرة الزواج من بالها لأنو البنات الزيها بقضوا عمرهم كلو يلفوا و يدوروا حولين الشاب المقرشين عشان يلحسوا عقولهم و قروشهم ! البنات ديل ما بعرسوا بعيشوا حياتهم على حق أولاد الناس و كل شهر أو شهرين بتكون مع واحد جديد
= لا لا يا علا ما تظلميها ، مها ما من النوع دا !
_انتِ بس عشان هبله و مسكينه يا حلا عشان كدا بتشوفي كل الناس زيك ، البت دي أنا من شفتها ما ارتحت ليها ، نواياها كانت ظاااهره بس انتوا عاملين فيها عميان!
=يااااخ ما تظلمي بت الناس ساي ، البت دي ما كدا و لو كانت كداا يونس ما كان حـ يفكر فيها
_حبيبه البت دي خادعاك انتِ و خادعه يونس لدرجة انكم ما قادرين تشوفوا حقيقتها !
•"عمو العريس جا "
كان صوت لدن بت حلا لما شافت عمها يونس جا داخل ، طوالي جا شالها بااااسها و سلم على حلا و علا ، علا قالت ليهو بت أخوك عايزاك تعرس بأي طريقه ، قال ليها دا كلام أمها ، حلا قالت ليهو بررري أنا ما قاعده أقول ليها شي !... عاين لـ لدن و قال ليها منو القاعد يقول ليك عمو عريس ؟؟.... أشرت على أمها و قالت ليهو ماما ... حلا ضحكت و قالت ليهو كذااابه بت أخوك دي كذااابه ساي ، علا قالت ليها أصلاً واضح إنو دا كلامك انتِ ما كلام لدن ، المهم يا ود الخطاب الناس دي كلها عايزا تشوفك عريس ، اختار ليك عروس من طرف كدا و أرضي بيها الناس بما إنو بت الناس ديك رفضتك ، قال لي معقوله حياتي الناس دي كلها واقفه على زواجي أنا ! قالت لي شكلو كدا !
حلا قالت ليهو بالمناسبه البت دي من دون البنات أنا حسيتها بتناسبك ، والله رغم إني ما بعرفها شديد بس في ناس بدخلوا القلب من اول مره تشوفهم و تتكلم معاهم ، والله اتمنيت من جوووه قلبي إنو البت دي تكون نصيبك !
قال ليها المهم ياسر قاعد ؟؟ قالت ليهو ايوه جوه .... فـ طوالي ساق بت أخوهو معاهو و دخل جوه لأخوهو ياسر ...
_______
يوم لما جيت من الشغل أول ما وصلت الميتم مشيت حوش الأولاد ، قلت أشوف ناس هيثم ديل من بدوا شغل بقيت ما بشوفهم ، ما لقيت غير سيد ، قال لي ناس هيثم ديل مرات ببيتوا هناك في مكان الشغل ، قلت ليهو اها لقيتو الشغل كيف ؟؟ قال لي متعب لكن على أقولك احسن من قعاد ساي ، قلت ليهو ربنا يوفقكم ، اتكلمت معاهو شويه بعدها مشيت المبنى حقنا ، أول ما وصلت باب الصاله و ختيت رجليني على الباب وقفت مكاني و ما قدرت أتحرك !!
حسيت رجليني بقوا تقال ! حتى لساني كان تقيل ! كنت واقفه بعاين ليهم و أنا بحاول استوعب في الكلام السمعتو !!
بقيت اتذكر اليوم داك و كيف حسيت بالنعاس الشديد فجأه كدا و من دون ما أحس نمت !!
كيف يعني البنات ختوا لي مخدر في العصير !!؟
و منار كمان معاهم !! حتى منار !!
طبعاً اتخلعوا لمن شافوني واقفه و سمعت كل كلامهم !! بعد مسافه إتحركت عليهم لحد ما وصلتهم و وقفت قدامهم ! قلت ليهم دا هظار صح !؟.... أكيد هظار ! كيف يعني تختوا لي منوم ! مجانين انتوا ؟؟ مجانين يا منار صح !؟ ... ياخ ما عارفه !! ما عارفه أقول ليكم شنو !
ليلى قالت لي عايني عشان ما تعملي لينا دراما ساي ، ماف زول غلط عليك ، و الإنعمل دا الصح ، طول عمرك بتخططي و بتنفذي خطط لـ مصلحتك و لمن نحنا كمان عملنا كدا بقى ليك حار !؟
رماح قالت لي صراحة يا مها دا كان أحسن شي نحنا عملناهو ، يعني لـ متين انتِ تاخدي حقنا و تحصلي على العايزاهو و نحنا مربعين يدينا و بنتفرج !!لو ما عملنا كدا و أديناك منوم في اليوم داك كنتِ حـ تجي و تاخدي الشغل الحالياً بقى نصيب منار ، لو ما عملنا كدااا كان في وحده حـ تنظلم بسببك
نور قالت ليها نحنا ما مجبورين نبرر ليها أو نقدم ليها إيضاحات خليها تفهم العايزا تفهمو و أصلاً لو كان حاصل العكس و هي مكانا كانت حـ تعمل أكتر من كدا !
سماح قالت لي الموضوع ما بستاهل الزعل دا كلو ! الحياه كدا يوم ليك و يوم عليك ، بعدين مفروض تفرحي لأنو اختاروا منار صحبتك للشغل دا ، مش كنتِ بتقولي إننا واحد و فرحة وحده فينا فرحتنا كلنا !! طيب دي منار صحبتك مفروض تفرحي ليها برضو !!
#بطل_الحكايه9
مها حولي الزاكي
رجعت الميتم و أنا لسه بفكر في الحصل ، الليل كلو اتقلب و اتخيل شكل حياتي لو ما كنت بت ميتم ، أنا للمره التانيه خسرت بسبب حقيقتي المره ، أول مره حسام و تاني مره يونس !... يونس الما زي أي زول قابلتو في حياتي ، انسان مرتب و فريد من نوعو ، متأكده إنو قادر يسعد أي بت حتكون في حياتو .... طبعاً قصتي مع حسام ليها سنوااات ، من لمن كنت في المتوسط ، كان دائماً شابكني أنا بحبك و شنو ما بعرف لحد ما دخلت الثانوي هو جاري وراي ، شي يقطع طريقي و يقول لي والله أنا بحبك و شي يكتب لي رساله و يخلي واحد من اصحابو أو من صحباتي يجيبها لي ! صحباتي كانوا بتعجبهم حركاتو دي لأنها زي حركات أبطال الأفلام لما البطل يكون جاري ورا حبيبتو ! في الآخر حسام لفت نظري بخفة دمو و رسائلو و كلامو البقول لي ، يمكن حبيتو أكتر من حبو لي و بديت أرسم أحلامي الورديه ، كانوا ساكتين جنب الميتم و ابوهو كان شغال غفير في الميتم ، المهم بقينا نتلاقى طوالي و كل الناس بقت تشوفنا مع بعض ، طبعاً هو كان عارف إني بت ميتم بس الموضوع ما بهمو ، طبعاً هو كان أكبر مني بـ 5 سنوات ، استمرينا في لقاءاتنا و جواباتنا لحد ما أمو عرفت و شافتنا مرتين مع بعض ، اتكلمت معاهو هو و قالت ليهو ابعد من البت دي و هو كلمني بكلام أمو و ما اشتغل بيها ، بقت في حالة جوطه و شكل معاهو على طول لحد ما طلع ليها من البيت و بقى يمشي يبيت في بيت خالو ، في الآخر جاتني أنا لمن كنت يوم راجعه من المدرسه ، شدتني من يدي و قالت لي دايره من ولدي شنو مرازياهو كدا ! طبعاً كنت بعاين ليها بخوف و يدي واجعاني ، قالت لي ما تشوفي ضحكو معاك و حركاتو دي تصدقي ، غااااشيك ساي و بكرا دي بعرس ليهو بت ناس عندها أصل و فصل ، انتِ بت حراااام كمان عندك عين تجري ورا الأولاد و تصدقي كلامهم ! صحي لو ما كنتِ بت حرام ما كان عملتي كدا و ما كان باريتي ليك ولد 24 ساعه لافه معاهو ، حسام دا ولدي أنا و عاجلاً أم آجلاً مصيرو يرجع لي و يسمع كلامي ، هسي انتِ بتصدقي إنو في زول حـ يعرسك و يدخلك بيتو ؟! والله إلا كان مجنون ، أوعك لمن تشوفي ليك ولد ضحك أو اتكلم معاك تقولي خلاااص لأنو ديل أولاد و دي حركاتهم لكن مااااف ولا واحد حـ يعرسك في النهااايه ، و النوريك البونس ما بعرسك ، حسام داير يقضي بيك زمن بس و لما يجي للعرس بعرس بت ناااس ما بت لقيطه !... طبعاً اليوم داك سمعتني فيهو كلام زي السم ، رجعت الميتم و قعدت أبكي لمن صدعت ، حسام لما عرف قال لي ما تشتغلي بيها و أنا معاك و و و بعد 3أيام من كلامو دا اختفى! لمن سألت عنو اصحابو قالوا سافر البلد ، طبعاً زعلت لأنو مشى فجأه كدا و ما كلمني و لقدام فهمت إنو سمع كلام أمو و هرب مني ... بعدها فهمت أكتر إنو فعلاً دي حركات الأولاد ، بجروا ورا البنات قدرتهم و لمن يجي الجد بهربوا ، بعدها قفلت الباب دي و بقيت ما شغاله بأي ولد يلمح لي أو يعترف لي عديل لأني عاااارفه النهايه حتكون شنو ... يمكن يونس هو الإنسان الوحيد الخلاني اتمنى لو كنت بت ناس ، لو ما كنت مجهولة الأبوين !... و أنا بفكر و بتذكر دموعي جات نازله ، المهم تاني يوم حلا اتصلت علي و بعد السلام قالت لي عايزا أعرف إذا ود الخطاب فاتحك في الموضوع ولا لا ؟! عرض عليك الزواج ؟؟ أخدت نفس و قلت ليها ايوه ، يونس ما فيهو ولاااا عيب زول محترم و مالي مركزو بس رفضتو ، قالت لي شنووو ! و ليه يا بت مالك !؟
قلت ليها من البدايه كلمتك ، أنا شايله فكرة الزواج دي من بالي ، سكتت مسافه بعدها قالت لي عشان كدا ود الخطاب ما كان على بعضو ، من أمبارح متضايق و زهجان و لما سألتو ما قال لي شي ، قلت ليها هو ما خسران حاجه ، حواء والده و بكرا يلقى بت بتناسبو ... قالت لي ما عارفه أقول شنو بس ياريتك ما استعجلتي و رفضتي ! قلت ليها رفضت و انتهى الموضوع ، مكالمتنا انتهت على كدا ، كنت في المواصلات و راجعه الميتم ، طبعاً منار نزلت شغل في المول و بقت ما شايفه زول و بقت صحبه شديد مع ليلى ، لما أجي داخله بتكلموا بصوت واطي و بضحكوا بصوت عالي ، طبعاً ما بشتغل بيهم خاااالص ، المهم في اليوم البعدو في المطعم و أثناء ما أنا في المطبخ ، فريال جات داخله و قالت لي زولك جا ، قلت ليها تزاولي من ضلك ان شاء الله يا فريال ، ضحكت و قالت لي شكلو واقع في غرامك ، أصبري هسي حـ يقول نادوها لي ، قلت ليها لو ناداني ما حـ أمشي ليهو ، المهم واصلت شغلي و هو رغم إنو شافني بس ما قال حاجه ، طبعاً المطعم كان شبه فاضي و الدنيا نص نهار ، آخر مره مشيت المطبخ جسار قال لي ودي الطبق دا للطاوله الآخيره على يدك اليمين ، شلت الطبق و لمن طلعت و شفت الطاوله لقيت يونس قاعد فيها ! شكلو غير مكانو لأنو كان قاعد هنا ، طوالي مشيت ليهو و ختيت ليهو طلبو ، قال لي غريبه اليوم !!
الدخلت فيني للحظه دي ما طلعت ، قلت ليها واااي لدن يا حليلها والله ، قلبي وجعني عليها ، قالت لي هسي الحمدلله بقت كويسه ، قلت ليها حـ امُر عليكم في نهاية الدوام و أشوفها ، قالت لي طيب ، قفلت منها و أنا بفكر في لدن الطفله البريئه و العسوله ، مع إني ما بعرفهم شديد بس هي و امها حبيتهم شديد والله ، قلت عشان كدا يونس ليهو أسبوع مختفي و ما جا تاني ، يا حليلو بت أخوهو دي زي ما هي بتحبو شديد هو كمان ظاهر إنو بحبها و متعلق فيها ، المهم لمن خلصت دوامي طوالي مشيت ليهم في البيت ، لقيت معاها أمها و أختها ، ما عارفه ليه بس من جيت علا أخت حلا شاماني و بتعاين لي بنظريات ما تمام كأني عملت ليها حاجه رغم أننا أصلاً ما بنعرف بعض ! ما قدرت أقعد كتير دخلت شفت لدن سلمت و اتطمنت عليها و قلت ليهم حـ أمشي ، حلا نادت راجلها و عرفتنا على بعض ، قالت ليهو دي مها الحكيت ليك عنها و طبعاً أنا استغربت و سألت نفسي حتكون حكت ليهو عني شنو و أصلاً ليه ؟! طبعاً لمن قلت ليهم ماشه حلااا و أمها حلفوا ما أمشي إلا اقعد و انتظر الغدا ، قلت ليهم مره تانيه اتأخرت والله ، طبعاً اخت حلا كانت ساكته ساااي و نظراتها بتقول لي اتخارجي عليك الله ! طبعاً بعد إصرار شديييد مني حتى خلوني أمشي ، حلا قدمتني لحد الباب و كانت شايله بتها ، أول ما فتحنا الباب كدااا يونس جا داخل ، طبعاً الإتنين اتخلعنا ، حسيت إنو لي سنه كااامله ما شفتو ، قعدنا نعاين لبعض للحظات و حلااا متابعه المشهد و بتضحك ، قالت ليهو : اوووو أهلاً بالعريس ! طوالي لدن بتها قالت :"عمو العريس جا " دخل شال لدن و قال لي كيفك ان شاء الله كويسه ؟!
قلت ليهو كويسه الحمدلله ، قال لي رجلي حاره ولا شنو !؟قلت ليهو لالا جيت من قبيل أنا ، فجأه جات علا و قالت ليهو ود الخطاب كيفك و جات سلمت عليهو ، قال ليها كويس الحمدلله ، أنا طوالي قلت لـ حلا مع السلامه و طلعت ، يونس جا لاحقني و قال لي دقيقه ، لمن إتلفت عليهو قال لي خليني أوصلك ، قلت ليهو حـ تقعد كل مره تقول لي طريقنا واحد و توصلني ؟؟! قال لي المره دي عايزا اتكلم معاك في موضوع ضروري ، طبعاً طوااالي قلبي اشتغلت زي الدلوكه و عرفتو عايز يقول شنو ، حلا واقفه جنب الباب مع أختها بتعاين لينا و بتتبسم ، قالت لـ يونس أبدا التجهيزات من هسي ولا أصبر شويه ! عاين ليها و ابتسم و أنا حسيت المطره صبت فيني ، أطرافي بقت بارده و المشي غلبني ، فتح لي باب العربيه و قال لي اتفضلي ، قلت ليهو عندي مشوار لازم أمشيهو ، قال لي ماف مشكله حـ أوصلك لـ وين ما عايزا ، المهم في الآخر ركبت و أنا متوتره ، جا ركب و دور العربيه ، طبعاً حسيت نفسي ما قادره اتنفس و قلبي كل مره بعمل شحححح !
طبعاً من دون ما انتبه رجلي كانت بتهتز و أنا مشربكه أصابعي و مدخلاهم في بعض ... يونس انتبه للحاجه دي ، قال لي خليك عاديه ياخ ما تتوتري 😂
قلت ليهو لا لا ما متوتره ، قال لي الواحد لمن يكون مقلق و متوتر بهز رجلو و بشربك أصابعو ! ... متوتره كدا كأنك عارفاني عايز اتكلم معاك في شنو !!
طبعاً كل ما يقول كلمه بوترني زياده ، قلت في نفسي ليه اتوتر !؟ سؤال و جواب بس ، ماف داعي توتري اللا إرادي دا يحسسو إني خجلانه منو أو منتظره الهو عايز يقولو أو متحمسه ليهو و ميته فيهو !!
بعد مسافه قال لي كل الناس البتعرفني بتعرف اني زول جادي ، ما بحب اللف و الدوران و الطريق الأعوج و الحاجه العايزها بمشي ليها عديل ، ما بعرف اتكلم كتير و ما عايز أطول في الكلام و من الآخر يا بت الحلال أنا عايزك على سنة الله و رسوله ...
مع إني كنت حاسه و عارفه هو عايز يتكلم معاي بخصوص شنو بس اول ما قال لي كدا حسيت نفسي كأني بحلم !! قلبي بقى شغال دق دق و أطرافي إرتعشت !
دخلت في حاله تانيه خالص و هو سايق بهدوء و بعاين لي ، بعد مسافه شجعت نفسي و قللت من التوتر الجواي و رخيت أعصابي ، أخدت نفس عميق و قلت ليهو بس انا ما موافقه !... ما رد علي ... واصلت كلامي و قلت ليهو انت ما فيك عيب و ألف بت تتمناك و متأكده انك قادر تسعد أي وحده حتكون في حياتك و صدقني رفضي ما منقصه ليك ولا خساره ، أنا الخسرانه ، قال لي و انتِ بتحبي تكوني خسرانه ؟؟
قلت ليهو لا بس مرات في مكاسب حـ تخسرك حاجات كتيره و خساره حـ تخليك تكسب كتير ... قال لي ما فهمت ؟؟
قلت ليهو عندي أسبابي ، قال لي في زول في حياتك ؟؟ قلت ليهو لا ، قال لي معناها اتجردي من كل شي و خلي الأسباب عـلى جنب و قـولي لي رايك انتِ بعيداً عن كل الظروف و الأسباب !
قلت ليهو رأيي مبني على اسبابي و ظروفي ، صدقني هي السبب الرئيسي لـ رفضي ، ما انت بس أي زول غيرك كنت حـ أرفضو ، قال لي يعني انتِ شايله فكرة الزواج دي من بالك ؟؟
#بطل_الحكايه8
مها حولي الزاكي
طبعاً البناااات اتخلعوا لمن شافوا القروش مع انها 60ألف بس ، سماح بقت تشيلها و تشتتها في نفسها و تقول ريحتها سمحححه و جديده التقول مطلعنها من البنك هسسسي ، رماح قالت لي بختك والله ، يعني الشهر الجاي تاني حـ تاخدي 120ألف ، وااااي مبالغه ، حظك يا بت ، سناء قالت لي اتخيلي في السنه حيكون عندك كم ! عايزا تعملي بيهم شنو ؟! قلت ليها أول شي حـ أطلع لي جواز سفر ، بعدها حـ افتح حساب للبنك و باقي المخططات خليها للزمن ، كل شي في وقتو حلو ، فدوى قالت لي حظك ضرب والله ، من زماااان جاريه ورا الشغل ، اتمرمطتي كدااا لحد ما في الآخر اشتغلتي شغل سمح الشهر بـ 120ألف !!
مُنى قالت لي و بالنسبه للشغل الجايبو ليك بابا حازم ؟؟ قلت ليها انتوا منو القال ليكم هو جايبو لي أنا ! قال لمن أجي حـ اجيب معاي فرصة عمل ما قال جايبها لـ مها ! ليلى قالت لي يعني حيكون جايبها لمنو مثلاً !! قلت ليها عايني انتِ بالذات أنا ما عايزا معاك أي كلام و وجع راس ، قالت لي ليه بقيت حاساك شااااماني عشان بس شفتي منار أكتر من مره بتتكلم معاي ! قلا ليها و يعني شنو لو اتكلمتو مع بعض ؟؟ المشكله وين يعني ؟بالجد تفكيرك غريب يا ليلى بس بما انك فكرتي كدااا معناها أصلاً انتِ قاااصده تخليني اشوفك بتتكلمي مع منار ، ظناً منك إنو كدا حـ تغيظيني أو تقهريني ، مسكينه والله ، أنا أصلاً ما فااااضيه ليك و ما قايله نفسي شاغله بالك للدرجه دي ! يا زوله استكيني و خليني في حالي ، قالت لي نظام إنو منار ما بتهمك و كدا !؟
طبعاً قالت كدااا قدام منار و عايزا تستفزني عشان أقول ليها ايوه ما بتهمني ، قلت ليها هسي الدخلت دا في دا شنو ؟؟ يعني عشان اتكلمتي معاها عايزاني اتدردق ليك على الأرض ولا شنو ؟!... المهم كلامك دا كلو ما بهمني و ما عايزا ازحم بيهو عقلي .... طبعاً الليله ديك كانت ليلة وداع نهال و مُنى و سجى ، طبعاً سااااهرنا قريب للصباح ، تاني يوم لمن طلعت مشيت الشغل خليتهم برتبوا في حاجاتهم عشان العرسان حـ يجوا العصر ولا المغرب مع بابا حازم عشان يسوقوهن ، المهم مشيت شغلي وصلت سلمت عليهم كلهم و لبست لبس الشغل و بديت طوالي ، أخدت الطلبات و دخلت المطبخ ، شويه كدا جا حذيفه و قال لي فلان طالبك ، قلت ليهو منو ؟؟ قال لي الزبون الغياظ داك ! طبعاً عرفتو يونس ، طلعت ليهو و قلت ليهو نعم ؟ قال لي بجي هنا على طول و لسه ما إتعودتي تقولي لي صباح الخير ؟! قلت ليهو نحنا في مكان عام ما في البيت ! قال لي و المكان العام ما بقولوا فيهو صباح الخير ؟! يعني إلا في البيت ! معناها الله يجيب اليوم الحـ نكون فيهو في البيت عشان تقولي لي صباح الخير !
طبعاً هنا قلبي حسيتو حـ يطلع من محلو !! اتذكرت كلام حلا و حسيت إنو هو الكلمها و طلب منها تتكلم معاي و إلا كيف عرفت إنو هو بجي المطعم على طول ، اتجاهلت كلامو و قلت ليهو عايز شنو ؟؟
قال لي انتِ عارفه كويس أنا عايز شنو ! قلت ليهو لو سمحت ما تأخرني عن شغلي !
شال المنيو و طلب ، فـ طوالي مشيت و جبت ليهو طلبو بعدها إختفيت من قدامو و ركزت مع شغلي ، بعد مسااافه كدا جات فريال و مدت لي ورقه ، قلت ليهو دي شنو ؟؟ قالت لي من الزبون داك ، قال أوصلها ليك ، لمن شلتها منها قالت لي انتِ بتعرفيهو ؟!... هزيت ليها راسي بس لأني بعرفو بس ما المعرفه الكااافيه ديك ... لمن فتحت الورقه لقيتو كاتب لي :
تظنين أنا الفراش بالخارج جاء لأجل الأزهار التي ترقد على طول الممر ، ولا تدرين أنا الفراش جاء مرفرفاً و مغازلاً لـ عيناك البراقه ، عندما أحادثك أشعر بنسمة حب باردة تحاوط قلبي و تحتضن ألمي ، إن لكلماتك لحن رنان ، حروفك كـ موسيقى ناعمة ، و كلماتك كـالدواء اتعافى بها من كل ما يتعبني♡
طبعاً بقيت اتبسم براااي! ... تاني انتبهت على نفسي و قلت دا كلو سراااب ساي و ما مفروض اعشم في حاجه معروف نهايتها شنو ، طبقت الورقه و دخلتها جوه جيبي ...
نهاية الدوام لمن رجعت الميتم ، لقيتهم جااايطين و بدقوا بالجردل سااااي ، مشيت أخدت لي معاهم صفقه صفقتين بعدها دخلت استحميت و طلعت صليت العصر ، جات سناء داخله و هي شايله كبابي عصير ، شالت كبايه و قالت لي اتفضلي عصير باااارد و سمح ، شلت كباية العصير شربتها و دخلت جوه غرفة النوم اتفقدت ألواني و ورقي عشان مرات مس نادين الشومه لمن تجي داخله غرف نومنا بتشيل حاجاتنا و تجدعها ، كنت بشوف في رسوماتي و طوالي يونس أو ود الخطاب زي ما بقولوا ليهو أو عم لدن زي ما أنا بحب أناديهو ، ابتسمت و طلعت رسالتو القبيل ، رقدت على السرير و بقيت اقرا فيهو ، قريتها 5 مرات و كل مره بحس كأني بقراها لأول مره ، بقيت أردد :
________
طبعاً و أنا في المطعم اتفاجأت تااااني لمن شفت حلااا ، المره دي جات براها و بتها ما معاها ، رحبت بيها و قعدتها في مكان هادي و مناسب ، طبعاً جاتني نهاية الدوام فـ عرفتها جااايه قاصده و لسبب معين ، قالت لي خلصتي صح ؟؟ قلت ليها ايوه ، قالت لي طيب اقعدي عايزا اتكلم معاك ، قلت طيب خليني اضيفك شي ، فعلاً مشيت جبت ضيافه و جيت قعدت قصادها ، قالت لي خليني ادخل ليك في الموضوع توووش و عليك الله ما تقاطعيني ، أنا لمن جيتك المره الفاتت و قعدت أحكي ليك عننا و عن يونس بالتحديد أكيد حسيتي و فهمتي إني عايزا أعرف طبيعة العلاقه البيناتكم ، حـ أقول ليك الكلام دا و أنا مسؤوله عن كل حرف فيهو :
ود الخطاب زول مسؤول و كويس و محترم و ما بتاع لف و دوران ، دائماً بقول البت الحـ تعرسو حظها و ما أكذب عليك كنت متمنيه يعرس أختي علا بس هو يمكن ما شايفها غير أخت بالنسبه ليهو ، المهم ما علينا هو حالياً شكلو بحبك انتِ و عارفه كلامي دا حـ يفاجئك لأنو يونس انسان ما بحب يظهر مشاعرو و ما بقدر يقول لبت بحبك بس أفعالو بتقول كدا ، قبل زمن طويل هو كان حابي وحده مع إنو ما قال لزول بس برانا عرفنا لأنو البت معروفه صحبتنا و قريبة صحباتنا ، المهم بعدها قفل الباب دا و كل ما نجيب ليهو سيرة العرس يتهرب مننا ، والله فقدنا الأمل و كنا تاني ما حـ يعرس بس الحمدلله ظهرتي انتِ و شايفاهو بقى مايل ليك ، مش قاعد يجي هنا على طول ؟؟ صدقيني بجي عشانك ، بفضي نفسو عشانك ، لأن هو زول مشغول 24 ساعه .... طبعاً هي بتتكلم و أنا منططه عيوني و شايفه كلامها دا بعيد شديد ، قالت لي ما عارفه إذا انتِ حاسه بنفس الإحساس تجاه ود الخطاب ولا لا بس صدقيني ما حـ تلقي زول زيو !
قلت ليها يا حلا صدقيني ماف كلام زي دا ، و أنا و يونس لا بنعرف بعض لا في شي بيناتنا ، قالت لي طيب يونس ليه بجي هنا على طول ؟؟ ما تجاوبيني أنا جاوبي نفسك ، يمكن ترددك دا و نفيك لكلامي هو الشي الموقف يونس ، لأني بعرفو هو ما بتاع لف و دوران و بجي بالطريق عديييل ، يمكن هو ما قال ليك شي عشان حس انك ممكن ترفضيهو ، انتِ مخطوبه ولا في زول في حياتك ؟؟
قلت ليها لا ، قالت لي طيب ما حاسه إنو يونس بحبك أو كدا ؟؟! لمن قالت كدا رفعت راسي و عاينت ليها ، قالت لي أنا جايه مخصوص عشان أكون صريحه معاك و عشان أخليك تكوني صريحه معاي ، معقوله ما حاسه إنو مايل ليك ؟!
قلت ليها يا حلا انتِ بتجيبي الكلام دا من وين لأنو.... قاطعتني و قالت لي دا الحاسي بيهو ود الخطاب ، ايوه الكلام دا لازم يتقال بخشمو هو بس يمكن عشان شايفك متردده أو يمكن انتِ ما مدياهو فرصه عشان يقول ليك الجواهو ! .... طبعاً ما عرفت أقول ليها شنو صدمتني بالكلام دا !
قالت لي انتِ مشكلتك شنو ؟ قصدي شنو العائق الواقف بينك و لين ود الخطاب !.... في نفسي قلت ليها عوائق كتيييره و أنا و هو الفرق بيناتنا كبيييير و لو عرفتي حقيقتي ما كنتِ حـ تجي تقعدي القعده دي و تقولي لي الكلام دا !.... قلت ليها أنا ما لي في القصص دي ولا بفكر في الزواج من أساسو ! قالت لي طيب و السبب ؟!... قلت ليها سااااي كدا الفكره دي ما في بالي !
بعدها الإتنين سكتنا ، قالت لي آسفه لو حسيتي إني بتدخل أكتر من اللازم بس والله عشان يونس بستاهل كل خير و عشان ما صدقت لقى ليهو بت و حباها بعد ما كان شايل فكرة الزواج من راسو .... طبعاً طوالي اتذكرت لمن كنا في المواصلات و قريت نصوصو ، يعني زي ما اتوقعت كان حابي بت و بسببها كتب النصوص ديك !... طبعاً الفضول كان كاتلني ، كنت عايزا اعرف كيف انتهت علاقتو بالبت الكان بحبها بس ما قدرت اسألها ، اتونست معاي شويه و قبل ما تمشي انتبهت لتلفوني الكنت خاتاهو على الطاوله ، قالت لي جبتي ليك تلفون ؟! قلت ليها ايوه ، قالت لي طيب أديني رقمك ، فتحت التلفون و أديتها الرقم بعدها ودعتني و مشت ، رجعت قعدت في نفس المكان و بديت افكر في كلامها ، يعني معقوله يونس يكون حباني ؟! بالسرعه دي ؟! طيب على أي أساس يعني ؟! و شنو البخلي واحد برجوازي زيو أنيق و محترم و واضح إنو ليهو مكانه يحب وحده بسيطه زيي !! أنا متأكده لو عرف إني بت مجهولة الأبوين حـ يشيل الفكره دي من راسو خالص و دا احسن شي لينا نحنا الإتنين.... المهم لمن استلمت قروشي في نفس اليوم داك طوالي مشيت أديت جسار قروش التلفون و مشيت ، كان باقي لي 60ألف بعد ما أديت جسار 60ألف ، قلت بكرا أو بعدو حـ اعزم البنات في المطعم ....
________
_المشكله إنو زوجة أخوي استلمت الموضوع دا و مصره تدخل نفسها لأنها ما مصدقه إني بديت أفكر في بت ! هي ما عارفه إنو دي ما أي بت ! ما اتمنيت إنو زوجة اخوي تدخل في الموضوع دا و تبدا تتعاطى مع البت المخادعه ديك ! اتخيل انها اليوم مشت ليها في المطعم و اتكلمت معاها بكل صراحه بخصوص موضوع الزواج و اتصلت كلمتني !
صراحة سعر التلفون كان كويس و مناسب و التلفون حلو و استخدامو خفيف يستاهل أكتر من كدا ، قلت ليهو أنا ما عارفه الراتب كم! قال لي ااا انتِ لسه ما وقعتي العقد ! المهم الراتب 120ألف ، طبعاً نططت عيوني ! بالنسبه لي دا مبلغ كويس شديد ! أول مره في حياتي يكون راتبي قدر دا !! قلت ليهو طيب طيب حـ اشتريهو منك ، شلت منو التلفون و قلت ليهو بكرا ان شاء الله بديك قروشك ، قال لي تمام ، المهم رجعت الميتم و انا مبسوطه شديد و حكيت للبنات اتفاجؤا و انبسطوا معاااي شديييد و شالوا التلفون و بقوا يشوفوا فيهو ، و كل وحده شغاله لي واااي التلفون رهيب ! رماح قالت لي لاااازم تعزينا عزه تماااام ، قلت ليها أكيد ، حـ اعزمكم في المطعم ، قالت لي يا سلاااام ياريت والله ، طبعاً كلهم أيدوا الفكره دي و حبوها ، ليلى قالت لي و اها بت تاخدي راتبك حـ تخلي الشغل دا ولا كيف عشان جايك واحد غيرو و براتب احسن منو!☺️
سماح قالت لي صحييي بابا حازم قال لقى ليك شغل في مول ! قلت ليها هو ما قال لقاهو لي ، قال حـ يجي و معاهو فرصة عمل و عرض زواج ، ليلى قالت لي معروف لـ منو ماف وحده غيرك هنا عايزا تشتغل ، قلت ليها عايني عليك الله أنا ما فاضيه لكلامك المسيخ و الفارغ دا ، المهم لفيت الميتم افتش لي في شريحه ، سألت بكري لو عندو شرحتين قال لي عندي واااحده بس ، فجأه اتذكرت المخزن ، مشيت دخلتو و بقيت افتش لأني متأكده قبل كدا شفت فيهو شريحتين ، قعدت أفتش كدا لحد ما فتحت درج وسخان و مكسور كدا و لقيت فيهو شريحه ! طبعاً المخزن دا بلقى فيهو معظم الحاجات العايزاها ، مرات بلقى فيهو ورق فـ بشيلو و برسم فيهو ، المهم شلت الشريحه و طلعت و دخلتها في التلفون ، عرفت الرقم و طلعت حولت فيهو رصيد و جيت نشطت و عملت لي حساب جديد في الفيس و الواتس ، البنات جوا اتلموا فيني و قالوا لي عايزين نشوف معاك ، أديتهم التلفون فـ بقوا مره يلعبوا بيهو و مره يشوفوا فيديوهات التيك توك ، سجى قالت لي شغلك دا سمح والله ! رماح قالت ليها اهاااا عايزا تزوغي من العرس ؟! قالت ليها لا لا بس شغلها عجبني و الراتب سمح شديد ، ما معروف يمكن بعد العرس اشتغل ، أكون ضربت عصفورين بحجر واحد ، عرس و شغل ، فدوى قالت أنا شبه بديت أغير رأيي ، من قبيل فكرة الشغل دي بقت لافه لي في راسي ، قلت ليهم طواالي كلموا بابا حازم ، والله حـ يلقى ليكم شغل أو اطلعوا معاي أفتش ليكم ، و لو سمعتهم في المطعم قالوا عايزين يوظفوا ناس جداد حـ ارشحكم ليهم 😍
المهم نهاية اليوم مشيت حوش الأولاد ، لقيت مصطفى بلعب مع الشفع ، جا هيثم و قال لي قالوا جبتي ليك تلفون ! قلت ليهو فعلاً تلفون مستعمل لكن ماشي حالو ، قال لي المهم تلفون و قعد يسألني عن سعرو و جبتو من وين ، المهم حكيت ليهو بعدها قلت ليهو شفت الشغل دا سمح كيف !؟ والله لو لقيت طريقه تشتغلوا بيها معاي في المطعم طوااالي بكلمكم ، قال لي باباك حازم قال لقى لينا شغل ، قلت ليهو بالجد !! وين ؟؟ قال لي في المصانع ، الأفران ، الدكاكين ، كل واحد يشوف البناسبو عشان يشتغل فيهو ، قلت ليهو حلووو احسن من القعاد الساي ، قال لي احسن ذاتو عشان الواحد يتفكفك من المكان دا ، قلت ليهو لسه قدامك سنه عشان تطلع من هنا ، ان شاء الله لمن عمرك يبقى 18 تكون قدرت تكون نفسك .... طبعاً هنا الأولاد لو ما تمت كفالتهم مسموح ليهم يقعدوا في الدار لحد عمر 18 بعدها بمشوا من هنا و كل واحد بشق طريقو براهو ، عشان كدا بابا حازم بحاول يساعدهم و يشغلهم عشان لمن يطلعوا من هنا يكون عندهم مصدر دخل ، أما البنات ما عندهم عمر معين عشان يمشوا فيهو من الدار ، هنا البكبروا و ما بتجي أسره عشان تتكفل بيهم ، يا يعرسوا و يمشوا مع أزواجهم يا يشتغل و يكونوا نفسهم و بعدها يمشوا من الدار ، كتير بنات من زماااان اشتغلوا و مشوا من هنا ، و كتير منهم اختاروا العرس و برضو مشوا من هنا ، في البدايات كانوا بتواصلوا معانا و بورونا أخبارهم بس بعدها التواصل إنقطع ...
تاني يوم جهزت نفسي و مشيت شغلي
_______
_ أنا ما حاقده عليها ولا حاسداها بس ما معقوله البحصل دا يا بنات !! ليه دائماً هي بتاخد حقها و حق غيرها ! لمن تقول لـ بابا حازم عايزا شغل طوالي بفتش ليها و لو قالت ليهو عايزا عريس طوالي بجيبو ليها !! و نحنا طيب اللينا سنين منتظرين نعرس أو نشتغل و نطلع من السجن دا !! ليه هي دائماً بتحصل على العايزاهو و نحنا لا !!
• لا لا ما تكذبي و تبالغي يا نور ، انتِ متين قلتي عايزا تشتغلي ؟؟ منو هنا فيكم يوم قالت عايزا تشتغل ؟ مش كلنا هنا عايزين نعرس و خلاص !
= كلام نور صح يا مُنى ، نحنا حتى لو قلنا عايزين نشتغل بابا حازم ما حـ يشتغل بينا ، ما عارفه ليه هو بفضلها علينا ، للآن ما قادره أعرف المميزها شنو هي ! ولا أحسن مننا في شنو !....
ليهو مالو تاني ؟؟
قال لي قال دا ما طلبو و أنا متأكد انو دا كان طلبو !! قلت ليهو طيب خلي حاتم يمشي ليهو ، نادينا حاتم و حكينا ليهو و قلنا ليهو أمشي حل لينا الموضوع دا ، مشى و جا راجع و قال لي أمشي ليهو 🙂
قلت ليهو نعم ؟؟
قال لي الزبون الكريه دا قال عايزك تجيهو !
حذيفه قال خلاص حقو الشغالين في المطعم ديل كلهم يقلبوهم بنااات عشان الشغل يمشي تمام ، خليت البعمل فيهو و طلعت ليهو ، لمن وصلت طاولتو ، قلت ليهو في شنو يا عم لدن لا عاجبك العجب لا الصيام في رجب !!
قال لي أنا المفروض اسأل السؤال دا ! يعني ليه العنصريه دي مش كلنا بندفع ! قلت ليهو خييير دي عنصرية شنو الحصلت معاك ؟!
قال لي قاعد هنا من قبيل كأني مزهريه و انتوا مركزين على زباين معينين !
قلت ليهو طيب عايز شنو ؟؟!
قال لي ما معقوله معاكم !!
قلت ليهو فهمنا عايز شنو ؟!
شال المنيو و قال لي ساعديني في الإختيار ، محتار و ما عارف أطلب شنو ، قلت ليهو معناها شبعان و الأفضل تمشي البيت و تنوم ، قال لي اقول ليك محتار و ما عارف أطلب شنو تقولي لي شبعان ؟؟ قلت ليهو ايوه لأن الجعان دا بطلب أي شي بطلع في وشو عشان يسد جوعو و خلاص ، ناولني المنيو و قال لي اطلبي لي على ذوقك ، قلت ليهو صدقني لو أنا طلبت ليك حـ تضطر تبيع كليتك أو عربيتك عشان تسدد الحساب ، ضحك و قال لي ماف مشكله ، قلت ليهو تمام ... هو قايلني بهظر و أنا كنت جاده عشان تاني لو شافني جيت ماره بـ جنبو ساي يغير الشارع حقو ، رجعت المنيو و قلت ليهو هسسي طلبك حيكون جاااهز و حـ اجيبو ليك بـنفسي ، قال لي تمام ♡
مشيت المطبخ و قلت ليهم أرح أرح يا شباب ، عندنا أكتر من 15 طلب لطاوله واحده مفروض يجهزوا بعد دقايق معدوده ...
طلعت و مشيت قلت ليهو بعد شويه طلبك حيكون جاهز ... عشان ما يقعد ينبح فينا ... قبل ما أمشي أشوف زباين غيرو نفس الشباب القبيل نادوني ، لمن مشيت ليهم القال ليك اسمك منو مد لي تلفونو ، ضيقت عيوني و عاينت ليهو بغضب كدا !! ضحك و قال لي اتطمني ما عايز اقول ليك أكتبي لي رقمك ، شوفي دا تطبيق تبع إكسسوارات و حاجات البحبوها البنات دي ، خطيبتي زعلانه مني و عايز اشتري ليها حاجه أفرحها بيها بس ما بفهم في حاجات البنات دي ، فـ عايزك تساعديني و تختاري لي الهدايا الحـ أقدمها ليها 😅
قلت ليهو وووب يعني بعد قلة الأدب دي كلها خاطب !! صحي عين الراجل ما بملاها إلا التراب ، أصحابو قعدوا يضحكوا ، شلت منو التلفون و أي حاجه عجبتني أو حسيتها راقيه عملت ليها شراء ، قلت ليهو اخترت 4 حاجات ازيدهم ولا كفايه ، قال لي اختاري ليك حاجه منهم ، رجعت ليهو التلفون و قلت ليهو مشكور ، اشتري لـ خطيبتك بس و أبقى عليها عشره ، قال لي شكراً ، قلت ليهو عفوا و إتحركت من جنبهم و قبل ما أمشي أي مكان تاااااني جاني صوت يونس و هو بقول لي لو سمحتي !!
قربت أفقد أعصابي و اتزهج فيهو و اقول ليهو كرهتني حياتي ، لمن مشيت ليهو قال لي طلبي وين ؟؟ قلت ليهو مدخلاهو في جيبي ، قال لي نعم ؟؟؟
أخدت نفس و هديت نفسي و قلت ليهو بكل هدوء السيد الخطاب ، عم لدن المحترم طلبك هسي حيكون عندك ، اصبر بس !!...لمن كنت حـ أمشي من جنبو ، قال لي بالمناسبه ، لمن إتلفت عليهو قال لي انتِ الشباب ديلك بقولوا ليك شنو كل دقيقتين بتمشي ليهم ؟؟
قلت ليهو بقولوا لي أمشي شيلي ليك سكين و أقطعي بيها شريانك عشان ترتاحي من زبون كدا كلامو كتير و دمو تقيل ....
سكت ما قال لي حاجه ، طوالي مشيت و جبت ليهو أول طلب إخترتو ليهو ، قال لي ذوقك في الأكل حلو ، قلت ليهو لسه ما شفت حاجه ! رفع لي حاجبو و عاين لي بإستغراب ابتسمت ليهو بس و مشيت جبت ليهو الطلب التاني ، قلت ليهو في دا برضو ذوقي حلو ... مشيت منو و جيت شايله اتنين و وراي حذيفه و سالم كل واحد شايل اتنين ، طبعاً يونس بقى يعاين لينا ساي !
ختوهم و مشوا جابو باقي الأطباق و عم لدن بقى يتلفت زي المروحه ، ما هو بس كل الفي المطعم بقو مركزين معاهو لأنو قاعد براهو و طالب أكل قدر دا !!
كان باقي آخر طبقين من الـ 17 طبق شلتهم و مشيت ختيتهم ليهو على الطاوله ، قلت ليهو بالله ذوقي كيف ؟؟ قال لي حلو و عمل نفسو مشغول مع الأكل و كل الأطباق دي ما محيراهو ، قلت ليهو اها واجعاك أي وحده ؟؟
قال لي نعم ؟؟
قلت ليهو الواجعاك ياتا ؟ كليتك اليمين ولا اليسار ؟؟
افتكرتو حـ يتضايق بعد العملتو دا كلو بس المستفز قعد يضحك !! طبعاً لمن حيرني !
قال لي قلبي بس المتعبني ، أبيعو ليك ؟
طبعاً طبعاً حسيت بغرابه !! و قلبي اشتغل زي الدلوكه ! قعدت و قلت ليهو انت شكلك وقعت و ضربت راسك و عقلك حصل ليهو شي !!
قال لي لا وقعت و ضربت قلبي و حصل ليهو أشياء ما شي واحد !!♡
يتبع.......
=حـ تعمل لي شنو يا صديق ، حـ تطلع مسدس و ترصصني ولا حـ تتصارع معاي و تكسر أسناني !!
_ما بعيده والله ، هي جاسوسه و أكيد مدربه و بتعرف تتصرف و عادي تقتل ، بتقدر تعمل حاجات كتيره بس أنا ثراحة ما خايف عليك من الناحيه دي 😅
=اها خايف علي من ياتو ناحيه ؟؟
_... احم خايفك تحبها جد جد و ساعتها حـ تتورط ورطه كبيره !
= عليك الله دا شنو الكلام الفارغ البتقول فيهو دا يا صديق !! مستحيل تكون جادي !
_ كل الجد والله ، ما ملاحظ انك من يوم عرفت إنو البت دي جاسوسه و ظهرت في وشها أكتر من مره ما بطلت كلام عنها ! من يوم بدا الموضوع دا و انت ما عندك سيره غيرها !
=ياخ انت متخلف يا صديق ! بتكلم عنها ما حباً فيها بس انا متفاجئ فيها رغم إني عارف إنو المظاهر خداعه ، ما بعرفها قبل كدا والله بس انت لو شفتها من اول مره حـ تحسها بت بريئه و ما ليها في الكلام دا كلو ! كل مره أكون معاها بحس نفسي متضايق و مخنوق ، عندها قدره هااايله على التمثيل و النفاق ! عامله نفسها بت تقيله و مسكينه و بسيطه و ما شغاله بي و مفتكره إني شغال بيها و جاري وراها ! ممثله شاطره !
_ ما هي لو ما اتصرفت كدا كيف حـ تنجح مخططها و كيف حيكون اسمها جاسوسه !
=المهم ما علينا أنا طالع
_ انتظرني ، أنا كمان طالع
________
طبعاً في الميتم بدينا نعمل حفلات زي ندق بالجرادل و نقعد نغني و عملنا لـ سجى و نهال و مُنى حفلة حنه بس بـ جردل ، طبعاً نهال و مُنى ذاااتهم اختاروهم في الأسبوع دا ، سجى مفروض تمشي قبليهم بس ما عارفه المأخر العريس شنو ، المهم حنناهم برااانا ، طبعاً كل وحده عريسها جاب ليها كل إحتياجاتها من مرطبات لـ علب مكياج لـ غيرهم رسلهم مع بابا حازم ، طبعاً البنات قعدوا يهبشوا ليهم في حاجاتها و هم شغالين ليهم وااااي رهيبات بالجد ، حظظظكم يا سجى و نهال ، طبعاً أنا بمشي الشغل و بجي راجعه بلقاهم ساكتين عشان مس نادين منعتهم فأول ما أجي أنا بقولوا لي عليك الله اتكلمي لينا مع مس نادين و خليها تخلينا ناخد راحتنا ! طبعاً أنا ولاااا بشتغل بيها بدق بالجردل بأعلى صوت و لمن تجي تهرشنا و ترجع تااااني بدق ، بتعبها جنس تعب عشان كدا لما أنا اكون موجوده هي بتصدع عديل و بتغضب و بتضايق عارفاني بعمل ليها موضوع طوييييل لو غلطت علي أو حاولت تمنعنا ، طبعاً للوقت داك أنا و منار ما كنا بنتكلم مع بعض ، شايفاها صاحبت ليلى و بقوا يتهامسوا مع بعض ، طبعاً ولا شغاله بيهم ، بمشي شغلي و لمن أجي راجعه بجيب ليهم معاي أكل من هناك ، رماح قالت لي والله شغلك دا فادنا شديد و خلانا ناكل أكل سمح ، سماح قالت لي عليك الله كتري لينا من شيبس البطاطس حبيتها والله ، قلت ليها حااااضر ، ليلى قالت ليهم هو وينو الأكل الفرحان بيهو دا ؟! قولوا بسم الله كدي شوفوا انتوا كم في الميتم دا و الشي البتجيبوا ليكم دي بروح في غشمكم سااااي ، المعده ما بحصلها ! طبعاً هي بتقول كداا عشان تغيظني و تقهرني ، ولااا فتحت خشمي معاها ، قلت ليهم كالعاده مره حـ اجيب للأولاد و مره ليكم انتوا و مره للشفع يضوقوا بيها ألسنتهم ، على الأقل يكونوا ضااااقوا و عرفوا حاجه جديده 😏
المهم يوم في المطعم بعد خلصت دوامي و كنت حـ أمشي جات فريال و قالت لي في وحده قالت عايزاك ! بإستغراب قلت ليها أنا ؟! قالت لي ايوه طالباك بالإسم اظنها بتعرفك ! طبعاً أنا استغربت و طوالي طلعت و بقيت أعاين في الطاولات لحد ما شفتها ! كانت رافعه لي يدها و هي مبتسمه ، مشيت ليها سلمت عليها و على بتها العسل ، قالت لي ان شاء الله ما أكون عطلتك عن شغلك ، قلت ليها لا أصلاً دوامي خلص ، قالت لي خلاص اقعدي معانا ، قعدت و شلت بتها و بُستها لأنها عسووووله و ريحتها حلوووه و لبستها ذاتا حلوه زيها ، قالت لي ها أخبارك شنو ، قلت ليها كويسه الحمدلله ، قالت لي طبعاً ناس أمي طلعوا و لقيت نفسي قاعده براي فـ قلت أسوق بتي و نطلع نتفسح ، طولنا ما طلعنا فـ طوالي المطعم دا خطر على بالي و اتذكرتك ... طبعاً جابوا ليها طلبها و قعدت تتونس معاي و تحكي لي عن أسرتهم ، عرفت منها إنو راجلها يلي هو أخو يونس برا السودان و إنو اهل يونس متوفين ما عندو غير أخوين اتنين ، ياسر و يامن ، و ياسر دا هو راجلها ، و إنهم بقولوا لـ يونس ود الخطاب أو خطاب عشان هو بشبه جدو شديد ، طبعاً أنا استغربت ليها هي بتحكي لي التفاصيل دي كلها ، و المشكله إنو معظم كلامها عن يونس ، لمن شافتني متحيره ، قالت لي أكيد انتي عارفه الحاجات دي كلها ، يونس حيكون حكى ليك !
طبعاً هنا أنا فهمت إنو هي جايه عشان تعرف أنا علاقتي شنو بـ يونس !... قلت ليها لا والله ما حكي لي و أصلاً نحنا ما بنعرف بعض ! قالت لي شنووو ! كيف يعني ما بتعرفوا بعض ! قلت ليها والله جد ، قبل كدا اتلاقينا زي 4 صدف في أماكن مختلفه و لمن بتك ضاعت و لقيتينا جنب باب المطعم ديك يمكن كانت الصدفه الخامسه ، لا بعرفو لا بعرفني !
مديت ليهو قروشي مع قروشها و لمن إتلفت شفتها طوالي عرفتها ! هي ذاتها عرفتني! قالت لي مش انتِ البت اللقيتي لدن لمن كانت ضايعه ! هزيت ليها راسي ، سلمت علي و قالت لي ساكنه هنا ولا شنو ؟! قلت ليها لا بس شغاله في مطعم بعيد شويه عن هنا ، قالت لي المطعم اللقيتكم واقفين جنبو ؟! قلت ليها ايوه ، شالت حاجه و طلعنا سوا من البقاله و كانت شايله بتها ، قالت لي شوفيها عليك الله تبكي كيف من قبيل عشان بس اشتري ليها مصاصه و بسكويت ! قلت ليها دا حال الشفع ، قالت لي لا لا بتي دي مدلعه و قليلة أدب ، ضحكت و قلت ليها بكرا تكبر و تعقل ، قالت لي الله يكبرها ! قالت لي أنا اسمي حلا ، انتِ اسمك منو ؟ قلت ليها مها ، قالت لي اتشرفنا يا مها ...طبعاً بنتكلم و نحنا ماشين ، قالت لي دا بيتي اتفضلي معاي ، قلت ليها لا لا أنا راجيني مشوار طويل لأمدرمان ، قالت لي اتفضلي اشربي ليك مويه ساي ، البيت قريب و ما تخافي ماف زول ، قلت ليها لا لا والله ما خايفه ، قالت لي خلاص اتفضلي معاي ، طبعاً تاني ما قدرت أقول ليها لا ، دخلت معاها بيتها و ضيفتني ، شويه كدا سمعنا صوت الجرس ، مشت فتحتو و بقيت سامعاها بتقول انتوا يا أمي مشيتوا وين ، مشيت ليكم في البيت بس ما لقيتكم ، و صوت وحده قالت ليها : مشينا لـ بتول قالوا اخوها اتوفى في البلد ، طبعاً من كلامهم عرفت إنو دي أمها و لمن جوا داخلين كانت معاهم بت كدا ، سلموا علي و حلا طوالي عرفتنا على بعض و حكت ليهم عني فـ شكروني ، المراه أمها و اسمها شاهيناز و البت أختها و اسمها علا و عرفت انهم ساكنين قريب منها و إنو لمن بتها ضاعت منها مشوا لناس قرايبهم بعيدين شويه عنهم وبتها طلعت و ضاعت ، المهم بعد الضيافه و الونسه تاني سمعنا صوت الجرس ، علا قالت أكيد دا يونس و مشت فتحت هي و جات داخله و معاها يونس ، طبعاً أنا قلبي عمل شححح و هو اتفاجأ لمن شافني !
حلا قالت ليهو من عاينت ليها كدااا معناها اتذكرتها ! قال ليها ايوه ، سلم علينا من بعيد و دخل جوه ، قلت ليهم أنا حـ أمشي بعد دا ، طبعاً قالوا إلا اقعد اتغدا معاهم ، قلت ليهم اتأخرت والله و لازم أمشي ، في النهايه اقتنعوا و حلا قدمتني لحد الباب ، أول ما طلعت كداا يونس جا طالع ، حلا قالت ليهو ماشي وين الغدا ! قال ليها متغدي ، أنا أول ما كنت حـ اتحرك قال لي حـ أوصلك ، مرت أخوهو طوالي رفعت ليهو حاجبها و ضيقت ليهو عيونها بس هو ما عاين ليها ، قلت ليهو لا لا ماف داعي بمشي بالمواصلات و مسافاتي ذاتا بعيده ، قال لي أصلاً أنا ماشي أمدرمان فـ طريقنا واحد ، حلا قالت ليهو و انت من وين عرفت إنو هي ساكنه أمدرمان ! قالت كدا و ضحكت و سكتت لمن عاين ليها ، اتحرك فتح لي باب العربيه فما عرفت أعمل شنو و مرت أخوهو واقفه بتعاين لينا ! بتردد ركبت ، و هو جا ركب و طوالي دور عربيتو !
"إذا أردت أن تُشعِر أحدهم بالأمان ، احتوي قلبه
فاحتواء القلب هو أول درجات الأمان .." 🥀🦋
يتبع....
بعد مسافه قلت ليها : لمن قعدت اراجع نفسي و اعرف المزعلك شنو ما أكذب حكاية العريس دي خطرت على بالي بس قلت لا لا منار مستحيل تكون زعلانه للسبب دا ، ما عشان أنا صحبتك ، عشان الموضوع ما بزعل أساساً !!
إنفعلت و قالت لي ما حـ يزعلك انتِ لكن حـ يزعلني أنا ، و انتِ طبيعي ما تزعلي لأنك ما عايزاهو بس انا !؟؟
ليلى قالت لي راعي لمشاعرها شويه ، و أي وحده محلها كانت حـ تزعل ، فدوى قالت ليها زعلنا و رضينا في نفس اليوم لأنو زي ما قالت مها الموضوع ما بزعل ! يعني إذا ما اختاروا منار فـ اختارو غيرها و المره الجايه ممكن يختاروها هي و نحنا لا و هكذا و بعدين الجد شنو يعني ما كل مرهـ بختاروا وحده أو اتنين و منار ما حصل زعلت !!
ليلى قالت ليهم المره دي غير لأنو ولد الناس لمح ليها و عديل قال ليها حـ أعرسك ، يعني بعد خلاها تعشم و تتأمل يجي يقول عايز مها ؟؟
وقفت على حيلي و قلت ليها طيب انا ذنبي شنو ؟؟ قلت ليهو إختارني ؟ و بعدين أنا رفضتو و دا المهم ، ما عارفه لو وافقت كنتوا حـ تعملوا شنو !!
منار قالت لي أصلاً الطلعك شنو ؟؟ مش قلتي الحاجات دي كلها ما راكبه راسك و ما بتنفع معاك ؟ قلت ليها بابا حازم نادانا ، قالت لي يا سلااااام يعني لو كان ما طلعتي بابا حازم كان حـ يجي و يجرك من شعرك ؟!
منى قالت ليها حتى لو ما طلعت الولد شافها و عارف شكلها و كان حـ يرفضكم كلكم و يقول إنها ما معاكم ، يعني كدا كدا كانت حـ تطلع ، ليلى قالت لي الله أعلم عملتي ليهو شنو لمن إتلاقيتي معاه في حوش الأولاد ، قلت ليها ما تتجاوزي حدودك و دي حركاتك انتِ ما أنا لأنو..... منار قاطعتني و قالت لي انتِ ذاتك ما هينه ، لو ما وريتي كل الناس انك قويه و واثقه من نفسك و عملتي ليك حركات و حاولتي تبهري الزول القدامك ما بترتاحي !
قلت ليها يعني دا سر الوصفه السحريه ؟؟ طيب اعملي كدا المره الجايه عشان يختاروك ، قلت كدا و إتحركت من جنبها و كنت حـ أطلع بس وقفتني جملة : أنا ما وحده حاقده و خسيسه زيك !
ما عاينت ليها ! إتحركت و مشيت و أنا قلبي بعتصر من شدة الألم ، لو زول تاني اتجاهلني و قال عني كدا معليش بس دي منار صحبتي !! منار الدائماً بنخطط سوا ، بنمشي و نجي سوا ، بنضحك و بنزعل سوا ، الدائماً بشكي ليها و بتشكي لي هسي غلبها تجي تواجهني و تقول لي زعلانه منك لا و فوق دا كلو تقول عني حاقده و خسيسه !
ما حـ أقول بعد الموقف دا قررت أقطع علاقتي بيها لأني ما الإنسانه البتهون عليها العشره ولا الإنسانه البتحب الخصام ، أنا عارفه انها دي فتره وحـ تعدي و بكرا كل زعلنا من بعض حـ يروح ، بس خالص ما بحب استعجل و أنهي علاقتي بزول بسبب موقف واحد خاصة لو كان بينا مواقف و ذكريات بتشفع ليهو و غير كدا نحنا عايشين في نفس المكان و بنمر بنفس الظروف و بنشوف بعض 24 ساعه فـ صعب إنو علاقتنا تنقطع على الآخر ....
المهم تاني يوم كان يوم الثلاثاء ، مشيت شغلي و جيت قبل جية بابا حازم ، أصلاً هو بجي الساعه 3 و نص و مرات 4 ، المره دي لما جا ما جاب معاهو أي عريس فـ البنات زهجوا زياده ، خليتو بعد يرتاح شويه بعدها مشيت ليهو في مكتبو ، كان معاهو الراجل الجا معاهو الأسبوع الفات ، أستاذ أنور ، أول ما شافني قال اووو البت المشاغبه ، عاين لبابا حازم و قال ليهو الظاهر انها جايه تشكي ليك ، قلت ليهو لا لا والله ما جايه اشكي ، بابا حازم قال لي اقعدي طيب ، قعدت و قلت ليهو صراحة أنا يوم السبت طلعت و لقيت شغل في مطعم و بديت اشتغل !... قال لي نعم !! شغل شنو و وين و متين الكلام دا ؟! قلت ليهو مطعم في الرياض و لقيت الشغل عن طريق الفيس ، قال لي و ليه ما كلمتيني ! قلت ليهو كنت منتظراك تجي عشان أكلمك و ياهو كلمتك !... طبعاً أنا كنت مستغربه في ردة فعلو دي ! مفروض يفرح لي زي كل مره !! الراجل المعاهو قال لي حازم اتضايق عشان كان مفكر يلقى ليك شغل أحسن من دا ، بس خلاص دامك اتوظفتي فـ واصلي شغلك و بالتوفيق ليك ، هنا بابا حازم عاين ليهو و رجع عاين لي ، قلت ليهو والله الشغل دا حلو و أنا مبسوطه بيهو ! قال لي تمام ! قلت ليهو يعني أنا عملت حاجه غلط يا بابا حازم ؟! مش انت بتنبسط لما وحده فينا تشتغل أو تعمل حاجه هي بتحبها ؟! قال لي ايوه و أنا ما زعلان بس اتوقعتك تكلميني قبل ما تبدي شغل ! كان ممكن تتصلي علي ! قربت أقول ليهو تلفوني اتسرق يوم داك لمن طلعنا بليل و نطينا بالسور بس سكته ! المهم في الآخر فرح لي و قال لي موفقه يا زوله ، فتح الدرج و طلع منو قروش قال لي مشي بيها حالك ، الراجل المعاهو ذاااتو أداني قروش ، أول شي عملتو مشيت رجعت لـ بكري قروشو ، قال لي ما قايلك حـ ترجعيها بالسرعه دي ، قلت ليهو عاااد أنا انت عشان اتماطل في سداد الدين ! قال لي خلاص خلاص يا زوله اتخارجي !
______
مشهد آخر :
_ الله يرضى عليك يا ولدي و يفتحها عليك محل ما تقبل ، ربنا يجزيك خير الجزاء و يحفظك و يطول في عمرك و يسعدك في الدارين ....
تاني يوم إتدينت قروش من بكري للمواصلات ، قال لي ما تتعودي على الأبتزاز ، قلت ليهو والله دا ما ابتزاز و قروشك دي حـ ارجعها ليك ، و بعدين نااااسي انك كنت بتدين مني !؟ قال لي خلاص اتخارجي عليك الله قبل ما مس نادين تشوفنا ، قلت ليهو بعد دا حـ أطلع قدامها عاااادي إذا بابا حازم ما عندو مانع اننا نطلع و نشتغل هي منو عشان تمنعنا ، قال لي عايني أنا الفتحت ليك الباب و لو شافتنا هسي حـ تعرف إني قاعد افتح ليك الباب و ممكن تتسبب في طردي ! قلت ليهو خلاص يا زول تاني ح اكلمها و أطلع قداااام عيونها ، المهم طلعت ركبت مواصلاتي و مشيت المطعم الكان في الرياض ، مع إنو بعيد من امدرمان بس مبسوطه إنو بشتغل حتى لو الشغل دا في نهاااية العالم ، لمن وصلت دخلت بالباب الخلفي ، في ممر بجي بمكتب المدير و المطبخ و مخزن صغير و حمامات ، دخلت صبحت على ناس المطبخ بعدها مشيت بدلت ملابسي و طلعت باشرت شغلي بأخد الطلبات ، بعد شويه كدا و أثناء ما أنا ماشه على المطبخ جاني صوت بقول لو سمحتي !... لما إتلفت لقيتو يونس !! مشيت ليهو و قلت ليهو ايوه ! قال لي صباح الخير كيفك ؟؟
قلت ليهو كويسه الحمدلله ، قال لي طالب من قبيل و لسه طلبي ما وصلني ! قلت ليهو حـ اشوفو ليك كنت طالب شنو انت ؟! فجأه جا حاتم زميلي في الشغل و خت ليهو طلبو و قال ليهو آسف على التأخير و مشى و أنا أول ما كنت حـ أمشي قال لي ثواني ثواني ماشه وين !! إتلفت عليهو و أنا مستغربه ! قال لي آسف على اليوم داك ما شكرتك بالطريقه المناسبه ، كنت متضايق و زهجان و البت لما ضاعت وترتني زياده ، قلت ليهو عادي ولا يهمك و طوالي مشيت ، بعدها بقيت مواصله شغلي و هو لسه قاعد و كل مره يعاين لي ! بنظراتو دي على قدر ما كنت محترماهو و شايفاهو شخصيه و عاجبني على قدر ما احتقرتو لأنو متزوج فكيف نفسو تسمح ليهو يعاين لوحده غير مرتو !
بعد مسافه كدا ناداني تاني و طلب نسكافيه ، لما جبتو ليهو ابتسم و قال لي تسلم يدك ، ما رديت عليهو ، لمن كنت حـ أمشي قال لي خليتي الرسم ولا لسه بترسمي ؟! قلت ليهو لمن أكون فاضيه ، قال لي أما أنا حاولت أدخل الألوان على لوحاتي ، ثواني ، طلع تلفونو و وراني لوحات ملونه ليهو ، قلت ليهو حلوات ! عاين لي في عيوني و قال لي ليه حاسي انك متضايقه ؟؟! ... إذا عطلتك عن شغلك فـ آسف بتقدري تمشي ، أخدت نفس و قلت ليهو أنا بحب الصراحه لكن ما بصارح أي زول ، انت عشان أنا في البدايه أخدت انطباع كويس عنك حـ أصارحك ! ليه مراقبني بنظراتك ! ليه بتعمل كدا و انت معرس و عندك بت كمان و يمكن في غيرها !!؟
قال لي نعممم !! دا منو دا المتزوج و عندو بت !
قلت ليهو انت !
قعد يضحك و قال لي يا زوله أنا سنقل لكن ما بائس ، لدن بت أخوي و بالتالي أمها زوجة أخوي ، فهمتي !.... طبعاً حسيت بإحراااج ، يعني كأني كنت زعلانه أو بعاتب فيهو عشان متزوج ، خجلت شديد من نفسي و اتمنيت أختفي من قدامو ، أول ما إتحركت كدااا سمعتو قال لي ليه حاسي إنك انبسطتي لمن عرفتي إني ما متزوج !
طبعاً قلبي اشتغل زي الدلوكه ! إتلفت عليهو و قلت ليهو نعم ؟؟ يعني أنا حـ استفيد شنو لو انت طلعت متزوج أو لا ؟!
قال لي غيتو أنا حسيت كدا !
قلت ليهو ما أي شي بنحسو معناها حقيقه ، قال لي أنا إحساسي ما بغلط !
قلت ليهو للأسف غلط ، و بعدين انت على أي أساس بتقول كلامك دا !! ما معقوله تلقى ليك وحده تمسكها و تقول ليها أنا حاسي انك انبسطتي لمن عرفتي إني ما متزوج ! قال لي لكن انتِ ما أي وحده ! نحنا إتلاقينا قبل كدا 4 مرات ، و على فكره مره واحده بس كافيه في انها تخليك تسألي نفسك هل هو متزوج ولا لا !😎
قلت ليهو ما شاء الله واثق شديد في روحك ! قال لي بينك و بين نفسك كدااا معقوله ما سألتيها سؤال زي دا !؟ قلت ليهو أنا ما فاضيه عشان اسأل نفسي اسئله زي دي و بعدين انت ما اول واحد أنا أشوفو ، عارف إني ساكنه امدرمان و بركب أكتر من مواصلات!؟ فـ إتخيل معاي كمية الناس و الوجوه الأنا بشوفها يومياً ، معقوله اي زول أشوفو أقعد اسأل نفسي إذا متزوج أو لا و بعدين أنا مالي و مالو !
قال لي لكن انتِ ما بتشوفي يونس في وجوه كل الناس عشان تسألي نفسك السؤال دا ! قلت ليهو غيتو الله يديني ثقتك دي ، الله يديني ليها !! روحك عاجباك شديد ، ابتسم و قال لي بمزح معاك ،حبيت اتغالظ عليك ، قلت ليهو ايوه لاااازم تكون مزحه لأنو استحاله تكون حقيقه ، قال لي شنو الإستحاله تكون حقيقه ؟؟ قلت ليهو نرجستك دي و باقي كلامك داك لأنو.... فجأه سمعت : احم احم و حسيت إنو في زول واقف وراي ، يونس ذاتو كان بعاين وراي فـ إتلفت عشان أشوف دا منو !!
"أنتمي للّسماء، والأشجار، والمنازل القديمة، وڪل الأشياء التي تجلب الهدوء والسَّكِينة"
يتبع.....
بعدها قعد يتكلم لي عن المطعم و وراني مفروض اشتغل شنو و أصلاً أنا عارفه إني حـ اشتغل ويتر ، لمن خلص قال لي ها تحبي تبدي من متين ؟؟ قلت ليهو من اللحظه دي ، قال لي حمااس شديد ! بعدها عمل مكالمه و في لحظات كل الشغالين في المطعم جوهو في المكتب ، عرفهم بي و عرفني بيهم و بعدها قال لي بتقدري تمشي و تباشري شغلك بعد دا !
طبعاً اشتغلت بكل حماس و كنت باخد الطلبات و انا مبتسمه وفرحانه ، حبيت الشغل من أول مره و حبيت كل الموظفين الشغالين في المطعم لأنهم لطيفين و ظريفين ، طبعاً كنت منتظره متييين ينتهي دوامي و أرجع الميتم و أكلم البنات بالحصل معاي ، أكيد حـ يتفاجؤا و يفرحوا ، المهم نهاية اليوم و أنا طالعه ماشه على المواصلات لمحت طفله صغيره يمكن عمرها 4 أو 5 سنوات ، كانت واقفه جنب عمود بتبكي و بتتلفت و قدامها ظلط ، ما كان معاها زول و خفتها تمشي على الزلط ، مشيت ليها و شلتها و بقيت أحاول أسكتها ، قلت ليها ماما وين ؟؟ وينا أمك ؟؟... ما اتكلمت كانت تبكي بس ، بقيت أتلفت ما شايفه زول كدا ظاهر إنو بعرفها ، صراحة ما عرفت اعمل شنو و البت حالفه ما تسكت ، في الآخر قررت أمشي بيها المطعم اشربها و أأكلها لو جعانه بعدها أشوف حـ اعمل شنو ، مشيت و أول ما وصلت بابا المطعم جاني صوت بقول : لدن !!
أول ما إتلفت شفت نفس الشاب ! يونس و للمره الرابعه ! البت طوالي رفعت ليهو يدينها و بقت تقول بابا ! جا شالها بلهفه مني و ضماها عليهو و خوفو و قلقو عليها كانوا ظاهرين في عيونو ، طبعاً أنا اتفاجأت لمن الطفله قالت ليهو بابا ! يعني طلع متزوج و عندو بت كمان !!
قلت ليهو لمحتها من بعيد براها و بتبكي مشيت ليها شلتها و جبتها معاي هنا بما اني بشتغل في المطعم دا عشان.... سكته لمن هو إتلفت علي و أداني نظره كدا لمن حيرتني ! نظره مليانه ضيق و غضب ! بس فجأه كدا غير نظرتو و قال لي شكراً ليك ، طبعاً أنا شكيت و قلت معقوله ما يكون عرفني ! قبل كدا إتلاقينا 3 مرات و تعاملو و طريقة كلامو في المرات الفاتت بتختلف عن المره دي !! قلت ليهو ما عارفه بس حاسه انك فاهم غلط ، صدقني البت دي أنا لقيتها تبكي و لمن جبتها معاي صدقني نية كانت سليمه و كنت عايزا اسأل واحد من ناس المطعم عشان نعرف دي بت منو و أهلها وين !! قال لي ايوه مصدقك أنا ، فجأه جااا صوت تاااني بقول لدن !! لدن حبيبتي !! فجأه ظهرت بت كدااا حلاااتها عيونها كانت مليانه دموع شالت الطفله من أبوها و قعدت تبوس فيها و تقول ليها مشيتي وين انتِ قطعتي قلبي عليك يا بتي !... طبعاً بعد كلامها دا فهمت انها أم البت و مرت يونس !
يونس قال ليها الجابك شنو مش قلت ليك خليها أنا بفتشها و بجيبها ، قالت ليهو ما قدرت أقعد ، بتي ضايعه كيف عايزني أقعد و استنى !! قال ليها تمام اتحركوا قدامي ، العربيه واقفه هناك ، طبعاً البت ياداب انتبهت لي ، فطوالي يونس حكى ليها الحصل بإيجاز ، قالت لي شكراً ليك ، هزيت ليها راسي بس و بعدها هم مشوا و أنا واقفه بعاين ليهم لحد ما إختفوا من قدامي ، قلت في نفسي أصلاً راجل زيو استحاله يكون أعزب لا خاطب لا متزوج !
المهم ركبت مواصلاتي و رجعت الميتم و انا شايله معاي علبة حلاوه ، من دخلت كدا على البنات قعدت أزغرد رغم إني ما بعرف و قلت ليهم وااااي يا بنات ما حـ تصدقوا الحصل معاي شنو ، كلهم بصوت وااااحد قالوا لي شنووو ! قلت ليهم لقيت شغل في مطعم و اتوظفت و بديت من اليوم ، طبعاً فرحوا و قعدوا يباركوا لي إلا ليلى قالت لي بكرا بطردوك ، ياتو يوم انتِ استمريتي في شغل ؟؟ قلت ليها مع ذلك أحسن منك ما قاعده سااااي كدا لا عندي أحلام لا طموح ، انتِ لا لامه مع ناس العرس ، لا لامه مع الناس العايزا تشتغل ، انتِ بس عايزا تقعدي كدا عاااله على الناس و مفسده لـ فرحتهم و ناجاحاتهم ، رماح قالت لي هوووس ما تقوموا هسي تتشكلوا فينا ! عاملات زي الضرات كما اتناقرتوا مع بعض ما بترتاحوا !!
خليتهم و بقيت أفتش على منار لحد ما لقيتها قاعده جوه في غرفة النوم ، مديت ليهم علبة الحلاوه و أنا مبتسمه و قلت ليها لقيت شغل يا منار و اتخيلي اشتغلت طوالي في نفس اليوم ! الحمدلله بالجد ما قادره أصدق ، شالت حلاوه و قالت لي مبروك ، هنا إبتسامتي إتلاشت ، قفلة علبة الحلاوه و قعدت جنبها و قلت ليها منار في شنو ؟؟ مالك انتِ ليك كم يوم كدا ما على بعضك و ما حابه تتكلمي مع زول !؟ من متين نحنا بندس من بعض ؟ من متين وحده فينا بتكون مبسوطه و التانيه زعلانه ؟ هسي أنا مش قاعده أجي و أحكي ليك أي حاجه تحصل معاي !؟ ليه انتِ ما عايزا تحكي لي !؟ الإتغير شنو ؟ قالت لي ياااخ ماف حاجه و طوالي قامت و طلعت برا و خلتني ما فاهمه شي !!
كنت عايزا ابتسم ليهو بس صرة وش بابا حازم و جديتو خلتني احترم نفسي و ما انطق حرف ، كان بهز في قلمو و بعاين لي بغضب ، بعد لحظات قال لي الكلام دا حقيقه ؟؟.... لمن اتكلم معاك ما تسكتي ، قولي لي حقيقه ولا لا ؟؟... مس نادين قالت ليهو والله حقيـ..... بابا حازم قاطعها و قال ليها خليها تجاوب هي لأنو سؤالي موجه ليها هي ، هزيت ليهو راسي بس ، قال لي ما عارف اقول ليك شنو!! انتِ بالذات يا مها أنا ما متوقع منك حاجات زي دي !! ليه بتعملي كدا؟؟ ايوه عارف إنو نحنا ما نقدر نلبي ليكم احتياجاتكم و نحقق ليكم رغباتكم كلها بس ما لدرجة انك تسرقي !... قلت ليهو بس دي ما اسمها سرقه ، بشيل من مس نادين شوية قروش عشان أشتري بيها حاجه للبنات زي ظرف عصير مثلاً أو شيبس أو حلويات حاجات قزقزه يعني ، قال لي بنبهره : أي حاجه بتتأخد من ورا صاحبها و بدون إذنو فإسمها سرقه ، قلت ليهو لو جيت و طلبت منها ما كانت حـ تديني ! قال لي شوفي ما عايز أي تصرفات زي دي تكرر تاني فاهمه ولا لا !... طبعاً كلامو زعلني ، و ابتسامة و نظرة مس نادين البتدل على شماتتها زعلتني زياده ، الراجل قال ليهو براحه عليها يا حازم البت لسه صغيره ، طبعاً طوااالي طلعت من المكتب من دون ما استأذن منو ، عارفه حركتي ما ظريفه بس زعلت ، لو أي زول تاني اتكلم معاي بالطريقة دي كنت حـ أرد عليهو رد قاسي أو اتجاهل كلامو و ما يهمني بس بابا حازم شخص استثنائي بالنسبه لي ، هو الشخص الوحيد الما بحب صورتي تبهت قدامو و ما بحب أشوفو بنظر لي بنظرات مليانه زعل و غضب و خذلان!
مشيت المبنى حقنا و منو دخلت غرفتنا حقت النوم بدون ما اتكلم مع زول ، طبعاً الغرفه مليانه سرير مرصوصه زي العنبر ، جات سماح قعدت جنبي و قالت لي خير في شنو مالك جايه داخله كدا ؟؟
قلت ليها ولا شي ، قالت مس نادين شاكلتك ولا شنو ! قلت ليها سماح ماف شي زهجانه و عايزا أقعد براي ، قالت لي خلاااص على كيفك يا زوله ، قالت كدا و طلعت و كنت متأكده انها حـ تكلم البنات و متأكده إنو منار حـ تجيني عشان تعرف الحاصل علي شنو بس ما جات !!
المهم بعد شويه كدا سمعت صوت بابا حازم من برا الصاله بسأل البنات عني فـ قالوا ليهو قاعده في غرفة النوم ديك ، فـ طوالي بقى ينادي علي ، طبعاً لمن طلعت ليهو الزعل كان باين علي ، قال لي تعالي و طوالي اتحرك قدامي ، لمن طلعنا برا المبنى قال لي هسي مفروض أنا الأزعل منك ولا انتِ التزعلي مني ؟!... ما رديت عليهو ، قال لي هسي بينك و بين نفسك كدا شايفه إنو عمايلك دي صاح ولا غلط ؟! خلاص أنسينا من دا ما عايزك تزعلي نفسك ساي و أنا لمن اتكلمت معاك بحده اتكلمت كدا لأني بالجد زعلت منك ، حالتي شايفك أعقل و أصدق وحده في الدار تقومي تخذليني و تعملي تصرفات زي دي ! المهم ما علينا متأكد انك ما حـ تعيديها تاني و ما عايزك تظني إنو غضبي و زعلي منكم معناها إني بكره واحد فيكم أو عايز أشاكلو بأي طريقه ، زي ما بقولها ليك كل مره انتوا هنا زي أولادي و أنا أبوكم فـ طبيعي لمن يجي زول و يشكي للأب واحد من أولادو ردة فعلو تكون نفس ردة فعلي و يمكن اسوأ ! قلت ليهو ما قاصده أزعلك مني ... قال لي عارف و أصلاً أنا ما بزعل منك لكن انتِ بتزعلي مني !! قلت ليهو ما زعلانه ، قال لي بعد دا كلووو ما زعلانه !😂
المهم اتكلم معاي شويه و راضاني و قبل ما يمشي قلت ليهو بابا حازم لسه ما لقيت لي شغل ؟! قال لي لسه والله بحاول ألقى ليك شغل كويس انتِ بس أصبري ، قلت ليهو أنا مليت و زهجت من القعاد الساي ، قال لي بكرا تشتغلي و تنضغطي و تشتاقي للقعاد الساي ، قلت ليهو مستحيييل والله ما بحب العطاله ، ضحك و مشى بس قال لي قريباً حـ ألقى ليك شغل ، دخلت جوه للبنات و أنا مبتسمه فـ لقيتهم بعاينوا لي بنظرات غريبه كدا ، قلت ليهم و أنا بضحك خير مالكم ؟! ليلى قالت لي بابا حازم ناداك ليه ؟! قلت ليها استحاله ما تكوني جيتي و اتنصتي علينا و رجعتي كلمتي البنات ! طوالي لوت لي خشمها ! سناء قالت أنا نفسي أعرف يا مها ليه بابا حازم بفضلك علينا و لو زعلتي منو بجي يراضيك ! قلت ليها ماف أي تفضيل و انتوا ما حصل راضاكم لأنكم ما حصل زعلتوا منو ! رماح قالت لي مها بكل صراحه كدا انتِ ما شايفه إنو بابا حازم دا بفضلك علينا و خاتيك في كفه و نحنا في كفه ؟ قلت ليها لا ! كلنا واحد عندو ! ليلى قالت لي طبيعي تقولي كدا ، بصراحه أكتر في شي بينك و بينو ولا شنو !؟.... طبعاً لمن قالت كدا كل البنات إتخلعوا و إتلفتوا عليها و أنا حسيت الدم دا بغلي في شراييني ، مشيت ليها وقفت قصادها و رفعت ليها أصبعي و قلت ليها حاجات وسخه زي دي موجوده في مخك المعفنه دا ، صحي الوسخان بشم العفانه في الحوليهو ، بابا حازم دا في مقام أبوي ، أبونا كلنا و لو في مكانه أرفع من مكانة الأب فحتكون من نصيبو هو لأنو القدمو لينا أهلنا الحقيقين ما قدموهو لينا ، طبيعي وحده حاقده و حاسده و انانيه زيك ما تقدر تستحمل تعامل تلقائي و عفوي بين الناس ، مستحيل تقدري تشوفي الناس مبسوطه و
طبعاً حسيتها حتموت من شدة الضحك ، أنا ذاتي كنت عايزا اضحك بس مسكت نفسي ، قلت ليها الله يسامحك يا مس نادين ، قالت لي اتخارجي منها ، والله لو صحيت تاني و لقيتكم لسه قاعدين في الصاله حـ انومكم برا في الحوش و في عز البرد دا برد الينشفكم وحده وحده ....
إتحركت من جنب غرفتها و هي قفلت الباب بس ما نزلت تحت ، انتظرت زي 10 دقايق كدا بعدها مشيت دقيت ليها الباب بس ما فتحت ، ضربتو شديد بس برضو ما فتحت ، حركت المقبض بس شكلها قفلتو من جوه ، ضحكت و مشيت نزلت تحت و أنا بضحك ، قلت ليهم حان وقت الإحتفااااال 💃🎊🎉
منى قالت لي دقيقه أنا ما فاهمه شي ! قلت لـ رماح ما حكيتي ليهم !؟ قالت لي سمح الكلام من خشم سيدو ، قلت ليهم 10 جات و 11 قربت خلونا نستمتع بباقي الليل دا قبل ما تطلع لينا مصيبه جديده و بكرا بفهمكم الحصل ....
المهم جبنا مكسراتنا و شاي اللبن و الفشار و باقي العصير ، طبعاً ما كبيتو كلو في الجك عشااان عاااارفه الشومه ديك حـ تجي تشيلو ، فتحت التلفزيون و طفيت الضو و إتلمينا كلنا و قعدنا على الأرض و جبنا mbc2 ، سناء مشت جابت لينا أغطيه و جات عشان البرد ، فجأه كدا إتلفت و قلت ليهم يا بنات ! منار وين ؟؟
يتبع......
لمن جابت لي سيرة منار طوالي عاينت ليها ، كانت سااااكته و خشمها بالغلط ما فكتو !!
قلت ليهم أنا ما مزعلني انكم ختيتو لو منوم ، لو الموضوع بالجد بستاهل كنتوا تختوا لي سم عديل ماف أي مشكله ، ياخ أنا من البدايه قلت ليكم بابا حازم ما جايب الشغل دا لي أنا ، أي وحده فيكم لو كان مشت و قالت ليهو عايزا الوظيفه دي كان أداها ليها!!
سناء قالت لي اقسم بالله سمعت بأضاني دي بابا حازم لما قال لـ مس نادين إنو الوظيفه دي جايبها ليك انتِ بالتحديد!
قلت ليها ما كنت عارفه المعلومه دي و أصلاً أنا على كل حال كنت حـ اقول ليهو ما عايزاها لأنو انتوا بديتو تقكروا تشتغلو ، كنت حـ اتنازل و اخليها لوحده منكم من دون أي كلام كتير !
فدوى قالت لي إذًا الموضوع منتهي و تاااني ماف حاجه بتزعل ، كلنا واحد زي ما انتِ بتقولي و فرحة منار فرحتنا كلنا وأكيييد انتِ فرحانه بيها...
ليلى قالت ليها تفرح ولا لا ما بهمنا شديد ، المهم انها ما تعمل لينا دراما و تقعد تقول غشيتوني و بتاع ، لو بالجد انتِ ما كنتِ انانيه و لو بالجد البنات ديل ما كانوا متغايظين منك و كاتمين جواهم و صابرين على البحصل ما كان اتفقوا عليك .... دائماً بتتكلمي عن الصداقه و المحبه و بتدي محاضرات و انتِ لا بتعرفي صداقه لا بتعرفي محبه ، وحده أنانيه عامله فيها قلبها أبيض ، و خبيثه عامله ظريفه ! و على فكره دا ما رأيي فيك براي ، دا رأي كل البنات فيك ، أنا أصلاً من زماااان عارفاك كويس و عارفه انك بتظهري عكس الجواك ، يعني منافقه من الدرجه الأولى ، بس المساكين ديل كانوا مخدوعين فيك و مصدقين انك الفتاة الشجاعه القويه بطلة الدار ! ببساطه لأنك كنتِ بتتهوري و تعملي خطط هم لو كانوا اجتهدوا شويه و خلوا الخوف كانوا عملوا أحسن منها و ما كان شافوك حاجه وااو ! و انتِ استغليتي الحاجه دي و بقيتي تتحشري في أي حاجه و كلو عشان تثبتي انك ذكيه و بطله !....
ما قلت ليها حاجه ، لا هي لا وحده من البنات ، شلت نفسي و دخلت جوه ، ماف وحده جات لاحقاني ! اتوقعت إنو تكون فيهم واحده على الأقل ما عاجبها الكلام القالتو ليلى عني ، بس الظاهر إنو كلهم عاجبهم الإنقال لي و متفقين عليهو !!
بس فهمت و شبه اقتنعت إنو الواحد مهما كان بتصرف بـ سجيه و حُسن نيه في ناس حـ تقول إنو دي تصرفات مدروسه و مخطط لها مسبقاً ! و إنو الواحد مهما كان قلبو صافي و بحب للغير البحبو لنفسو في ناس حـ تشوفو منافق و متصنع، و إنو مهما كانت نيتك سليمه ،و قلبك نضيف برضو حـ ينقال إنو نيتك سوداء ،و انك مهووس بحب العظمه و الظهور ،و انك بتعمل كدا عشان تظهر بشكل رهيب و ينقال عليك بطل !
و الأسوأ إنو الكلام دا ينقال من ناس قريبه منك !!
طول اليوم ما إتكلمت مع وحده فيهم ، لا لمتهم لا عاتبتهم سكت و خليتهم ....
في نفس اليوم دا طلعت الحوش برا عشان أشوف رسيل ، من جيت ما شفتها ، فتشتها بس ما لقيتها ، مصطفى ذاتو ما لقيتو ، لقيت بكري جنب مكتب بابا حازم ، قلت ليهو بكري ما شفت مصطفى و رسيل ؟؟
عاين لي كدااا بعدها قال لي مصطفى دا شوفيهو ورا المبنى هناك و رسيل دي ... جات أسره و ساقتها .... طبعاً حسيت الدنيا لافه بي ! قلت ليهو كيف يعني و متين الكلام دا ! قال لي كدا عديل ! قال كدا و مشى ! بقيت ماشه على المبنى حقنا و أنا ما مصدقه السمعتو ، جاني مصطفى جاري و قال لي مها رسيل ساقوها ، من قبيل منتظرك تجي عشان أقول ليك ! هزيت ليهو راسي بس و دخلت جوه ، قعدت بس و أنا مهمومه ! يعني فجأه كدا كل الناس بدت تختفي ! أمشي و أجي ألقى رسيل ماف و يمكن تاني ما أشوفها للأبد !... فجأه حسيت بـ يد بتتخت على كتفي ، لما إتلفت لقيتها فدوى ، قالت لي عرفتي إنو ساقوا رسيل من هنا ؟؟ قلت ليها ليه ما عملتوا حاجه ؟ ليه خليتوهم يسوقوها ؟!
فجأه جات ليلى ناطه و قالت لي نعمل شنو و لـ شنو أساساً ؟! انتِ قاعده في دار أو ميتم و دا الطبيعي البحصل ، بطلي أنانيه عليك الله ، عايزا البت تقعد هنا لمتين ؟؟ عايزاها تكبر و تبقى زينا منتظره يجي عريس أو وظيفه ما مضمونه تطلعها من هنا ؟؟
جايبه الأنانية و الحقد دا من وين انتِ ؟ و بعدين انتِ مالك و مالها أمها ولا أختها ولا قريبتها عشان كل مره تمنعي الناس يتكفلوا بيها !! الحمدلله انك ما كنتِ موجوده و إلا كان مستقبل البت دي ضاع بسببك ، كل مره لمن كان يجي زول أو أسره عشان يتكفلوا بيها كنتِ بتعملي خطط و مصايب عشان تمنعيهم يسوقوها ، ماف زول واقف عائق في مستقبل البت الصغيره دي غيرك ، ليه عايزاها تعيش بنفس طريقتك و أسلوبك ، انتِ منو أساساً عشان تتحكمي في مستقبل البت ! الحمدلله انك ما كنتِ موجوده !
سناء قالت لي صح كلام ليلى ، ردة فعلك ماف ليها أي داعي ، كلنا عارفين إنو دا البحصل و كلنا حـ يجي يوم و نفترق ، فـ شي غير منطقي كونك تحاولي تضيعي مستقبل طفل أو طفله عشان بس بتحبيهو !!
طبعاً ما قلت ليهم شي ، دخلت جوه غرفة النوم و طلعت ألواني و أوراقي و بديت أرسم و أنا قلبي واجعني شديد ...
قلت ليهو شنو الغريب ؟؟
قال لي كنت بوصي ينادوك لي و بعد تحانيس بتجيني طالعه و اليوم من دون ما اقول اسمك حتى براك جيتي ، قلت ليهو لا لا والله ، كل الحكايه إني ما كنت عارفه إنو الطلب دا ليك انت ، قال لي بمعنى انك لو كنتِ عارفه ما كان جبتيهو لي ؟!! قلت ليهو لا ، قال لي معناها كنتِ حـ تجيبيهو لي و من دون ما أطلب منك !! عظيم والله....
طبعاً جهجهني و بقيت ما عارفه أقول ليهو شنو !!
فجأه تلفونو رن ، كان مختوت على الطاوله و الإسم الشفتو كان "ليان " كنت حـ أمشي بس قبل ما يرد قال لي ثواني ما تمشي ، قلت دا تاني عايز يقول شنو كمان !!
فتح الخط و بقى يتكلم مع البت ، قال ليها لا لا ما نسيتو ... يا ليان في شنو ليه بقيتي بتتحسسي أكتر من اللازم !!
طبعاً أنا في نفسي قلت كمان دي منو ، مش قال زول اتجاهو واحد و حلا تشيل و تشكر فيهو !!
طبعاً قعد يتكلم مع البت مسافه و لمن قفل منها ، قال لي الأكله دي فيها توم ؟؟
طبعاً اتغظت غيييظ !! معقوله موقفني دقيقه كامله بس عشان يسألني إذا الأكل فيهو توم ولا لا ؟؟
قلت ليهو فيهو سم يا ود الخطاب ، فيهو سم ، ضحك و قال لي سؤالي ما بزعل للدرجه دي !! قلت ليهو من قبيل موقفني عشان تسألني السؤال دا !! قال لي يعني كنتِ خاته سؤال أو موضوع معين في بالك ؟؟... رفض و رفضتيني تاني حيكون في شنو يعني ؟؟ 😂
قلت ليهو لو سألتني قبل ما ترد على التلفون كان جاوبتك و مشيت أشوف شغلي ، قال لي هسي جاوبيني و أمشي شوفي شغلك ، طوالي اتحركت عشان أمشي ، قال لي ثواني ثواني ، لمن إتلفت عليهو قال لي قلتي الأكل فيهو سم و صراحة بقيت اتوقع أي شي منك فـ ممكن تشيلي منو ، يعني بس عشان اتطمن !؟
كنت عايزا انفعل فيهو بس قلت مدام هو عايز يتماسخ أنا كمان بتماسخ معاهو ، قلت ليهو طيب ، قعدت و شلت لقمه و قلت ليهو ثواني ما اتأكدت ، شلت اللقمه التانيه و قلت ليهو في طعم غريب ، في اللقمه التالته قلت ليهو في طعم توم كدا ، بقيت كل ما أشيل لقمه أعلق ليهو لحد ما كملت الطبق كلو ، في آخر لقمه قلت ليهو فعلاً كلامك صح و شكك طلع في محلو ، الأكل دا فيهو سم ، غيتو الله ستر عليك ....
قال لي رفضتيني و كمان عايزا تسمميني ؟😂
قلت ليهو عليك الله يا خطاب اسمم فيك شنو !! بس كما استفزيتني ما بترتاح ، قال لي الإستفزاز دا حقك انتِ بالإضافه للئامه كمان ، قلت ليهو الحمدلله إني ما وافقت عليك ، شايف شايف كيف بتنتقدني ؟! مدام ما واثق فيني للدرجه دي ليه اتقدمت لي !؟ قال لي قلت يمكن تتغيري بعد الزواج ، لو كان وافقتي كنت حـ اعمل ليك أكبر عرس و كل النفسك فيهو بس راحت عليك ، بس شكلك حابه ليك ولد وزير أو رئيس في البلد دي 😂
قلت ليهو كل الكلام القلناهو آخر مره شكلك عملت ليهو Delete ! قال لي لا متذكر بس قدر ما حاولت أفكر و اتوقع أسبابك شنو ما قدرت !
قلت ليهو واضح إنو في زول الرفض فااارق معاهو مع إنو قال عادي و حصل خير ، قال لي والله انتِ و قعد يضحك ، قال لي على فكره أنا بس بحاول أديك فرصه تانيه عشان ما تضيعي أحسن راجل في العالم ، قلت ليهو إغراءات جد ، قال لي زيدي على الإغراءات دي إنو كل تفاصيل العرس و ترتيباتو كانت حتكون من إختيارك انتِ ، ضحكت و قلت ليهو حننتني يا ود الخطاب فـ لو وافقت عليك حيكون عندي طلبات و شروووط ، قال لي عايزا المريخ ولا المشترى ؟؟ قلت ليهو كمان ما للدرجه دي ، قال لي أنا متوقع منك المستحيل بس كدي أسمع شروطك دي 😂
قلت ليهو :
أريدُ القصر من مرمر
وبابُ الدار من جوهر
وعِطر لم تلامسه
نساء الروم أو قيصر
وحراسٌ و جارية
و سور حوله عسكر
قال لي شبيك لبيك مصباح علاء الدين بين يديك !!... دي شنو الشروط التعجيزيه دي .... مها اقول ليك حاجه ، أمشي امشي و شوفي شغلك ، ضحكت و قلت ليهو أصلاً ماشه ....
______
_ يونس ...دقيقه ما تمشي
قفلت الباب و جاتو طالعه
= ايوه ؟
_ صراحة أنا حابه اعتذر منك على الطريقه البقيت اعاملك بيها ، ياريت ما تزعل مني
= لا ياخ ماف أي زعل ، أحياناً الواحد براااهو بتجيهو زهجه كدا فما بكون طايق زول ... عاذرك أنا
_ لو زول غيرك ما كان اتفهمني... و لو زول غيرك ما كنت حـ ابرر ليهو
= والله أنا ما بتحتاجي تبرري ليك ، عاذرك في كل الأحوال
_ اهاا ما قلت لي العرس متين ؟؟
= عرس ؟؟ عرس منو ؟؟
_ آخر مره سمعتك انت و أمي بتتكلموا عن العرس و كدا فـ فهمت انك نويت العرس و كلمتها
=لا لا ماف كلام زي دا ، هو فعلاً نحنا اتكلمنا عن الزواج و أمك قالت لي ما ناوي تعرس فـ قلت ليها في الوقت الحالي لا
_عاد أمي الأيام دي ما عندها سيره غير العرس ، اظنها عايزا تعرس 🤣😂
= و مالو لو عايزا طواالي نعرس ليها ، لسه شباب
_ شباب شنو أمي دي بعد دا تعرس لـ روحا ولا لـ بتها
=ماف مشكله عرسو الإتنين
_سمح 😂
_____
_ و انتِ يا حلا مالك و مالهم ؟ بت الناس قالت ما عايزاهو انتِ ليه حاشره نفسك و عايزا تعرسي ليهم بالغصب !
قلت ليهو ايوه ، شايله فكرة الزواج و العلاقات عموماً ، قال لي ما بتحبي تحسي نفسك مقيده أو ملتزمه !؟؟
قلت ليهو شبه كدا ، قال لي عندي حل و هو الخطوبه ، فـي فترتها اختبري نفسك و شوفي إذا بتقدري تلتزمي و تكملي معاي ولا لا ، و إذا حسيتي إنو علاقتنا حـ تخنقك أو تقيدك و انك ما شايفه نفسك معاي ساعتها حـ يحصل العايزاه ، المهم انك ما ترفضي ساي من دون ما تجربي ، قلت ليهو ياريت لو الموضوع بالبساطه دي ، قال لي غير الأسباب الإنذكرت دي في غيرهم ؟؟
سكت ما رديت عليهو و في نفسي كنت بقول ليهو لو عرفت حقيقتي يا يونس تاني سااااي كدا ما حـ تعاين لي ، ياريت ياريت يا يونس لو كان عرفتني في مكان تاني ، مكان ما ينقال لي فيهو مجهولة الأبوين ، مكان يكون عندي فيهو أم و أب و أسره ، ياريت و ياريت و ياريت 💔
قال لي شوفي أنا من نوع الناس الما بصر على حاجه إلا لو كنت بالجد باقي عليها و مصر اتقبلها بكل عيوبها و نواقصها و على فكره كلنا عندنا عيوب .... من خلال كلامك فهمت إنو انتِ ما رافضاني عشان ما عايزاني ، انتِ رافضه لأنو في أسباب يمكن انتِ شايفاها قويه و سبب كافي عشان ترفضيني ، بالنسبه لي ماف سبب أو ظرف بقدر يقيف في وجه اتنين عايزين بعض .... أحكي سامعك أنا !!
للحظات لساني إتحرك و قربت أحكي ليهو بس وعيت على نفسي و قلت ليهو أسبابي خاصه و ما حابه أشاركها مع زول ، قال لي أسبابك دي عندها فتره معينه حـ تختفي و تتلاشى فيها و لا حـ تقضي عمرك كلو ترفضي في الناس الحـ يتقدمو ليك بسببها ؟؟
قلت ليهو آسفه يا يونس بس انا ما موافقه و دا آخر كلام عندي ... لمن رفعت راسي و عاينت ليهو لقيتو بعاين قدامو و سايق بنفس الهدوء ، قلت ليهو صدقني انت ما فيك عيب ، ضحك و قال لي خلاص فهمت 😂
أظنك قايلاني حـ أبكي أو اتضايق منك عشان رفضتي صح ؟؟ هزيت ليهو راسي بس ، قال لي مع إنو شاكوش حار و أنا ما متعود ينقال لي لا بس معليش حـ أبلعها ، و الله لا جاب الزعل ، من حقك ترفضي و أنا ما من حقي اضغط عليك أو ازعل منك عشان رفضتي ، مش بقولو النهايات أخلاق ؟؟ مع إنو نحنا ما بدينا عشان ننتهي بس برضو حصل خير و رفضك لي ما معناه إني حـ أحقد عليك أو ألومك...
طبعاً دي كانت أول مره أشوف فيهو الجانب دا !! ايوه بهرني بس ما لدرجة اني أتراجع لأنو الموضوع ما بيدي ، يونس طلع عكس الظاهر عليهو ، طلع زول محترم أكتر و فاهم و واعي و متفهم ، بالجد أنا الخسرانه ، أنا الخسرانه يا يونس ما انت 💔
بعد مسافه قال لي مشوارك كان على وين عشان أوصلك ؟؟ قلت ليهو خليهو ما مهم ... ابتسم و قال لي أصلاً ما كان في مشوار دي كانت حُجه منك عشان تتهربي من الموضوع القده في النهايه دا ، سكت ما قلت حاجه ... قال لي تمام حـ اوصلك البيت بعد دا ، قلت ليهو لا لا ماف داعي بمشي براي بس وصلني المحطه !! قال لي جملة "لا لا ماف داعي بمشي براي " دي أنا حفظتها حفظ شدة ما بتقوليها كتير ، قلت ليهو رجاءً وصلني لحد المحطه بس ، قال لي ما تخافي ما حـ أوصلك لحد البيت ، قلت ليهو يونس لحد محطة المواصلات ! عاين لي و قال لي تمام ، طبعاً في شوية دموع كانت في عيونو عشان كدا ما عايزاهو يوصلني ، خايفه ابكي قدامو ، المهم وصلني المحطه و وقف معاي لحد ما ركبت و طبعاً دفع القروش هو !!
تكلت راسي على شباك العربيه و بقيت أفكر في تفاصيل الحصل و كلام يونس ما فارق عقلي !
يعني سبحان الله شوف الحياة دي بتلعب معاي كيف !... واجهتني مشاكل كتيره و عشت أصعب الأيام و الفترات ، وقعت و قمت براي ، اتجاوزت قدرتي و كل اختبار ختتني فيهو الحياة حتى لو ما اتوفقت و نجحت فيهو كنت باخدو كـ درس و بتعلم منو ، يعني الحياة أدتني كل الأسباب البتخليني انكسر و اتحطم بس كنت بصارعها و دائماً بقيف على حيلي ، رغم كل المأساة و العنصريه و الظلم و القهر الممكن يعيشو أي شخص مجهول الأبوين أو لقيط أنا ما حصل لعنت حظي و ما حصل استنكرت و قلت ليه يحصل معاي كدا ، ليه لمن انخلق في الدنيا دي انخلق مجهولة الأبوين ! رضيت بالهم و الهم ما راضي بي ، اتقبلت واقعي و ما كان فارق معاي إذا كنت بت حـرام أو حلال أو لقيطه بس اليوم ، اليوم لأول مره أتمنى إنو لو كان عندي أهل ... أهل يقدر أي زول يجي لحد عندهم و يطلبني منهم ، أهل ما يـخلوني أعاني في الحياة دي ، أهل يهتمو بدراستي و مـستقبلي ، أهـل يخافوا علي و يحموني حتى من نسمة الهواء ، ياريتني ما كنت مجهولة أبوين ، ياريت أهلي فكروا و لو دقيقه قبل ما يغلطوا و أكون أنا ناتج الغلطه دي و اتعاقب بسببهم و أقضي عمري كلو ادفع ثمن غلطه أنا كنت ضمن نتائجها ما ضمن أسبابها 💔
"شعور مؤلم عندما تغيب رغبتك في شرح ما يحدث بداخلك رغم ضجيجه، صامت وعاجز تمامًا، بركان من الغضب يحدث بداخلك وأنت في قمة هدوئك "
يتبع.......
"قد تظنين أنا الفراش بالخارج جاء لأجل الأزهار التي ترقد على طول الممر ، ولا تدرين أنا الفراش جاء مرفرفاً و مغازلاً لـ عيناك البراقه ، عندما أحادثك أشعر بنسمة حب باردة تحاوط قلبي و تحتضن ألمي ، إن لكلماتك لحن رنان ، حروفك كـ موسيقى ناعمة ، و كلماتك كـالدواء اتعافى بها من كل ما يتعبني♡"
_____
_ والله يا ولدي أنا كان بديت أشكر فيك من اليوم للسنه الجايه ما بوفيك حقك ، وقفتك معانا القريب ما وقفها ، لا قصرت مني لا من أولادي و لـ بتي ليان دي شغلتها لي الله يبارك فيك و يكتر من أمثالك ، أنا ما قادره أجازيك والله و ما قادره أقدم ليك شي غير إني أدعي ليك ...
قال ليها دعواتك دي براها بتكفيني والله يا خالتي و بعدين ما معقوله كل مره تقعدي تشكري فيني كدا و تحسسيني إني متفضل عليك !... قالت ليهو و انت كدا ، قال ليها لا لا ماف داعي لـ دا كلو و أنا ما عملت إلا الواجب و الحاجه البتريحني
_ ربنا يريحك في الدنيا و الآخرة .... دخل يدك يا ولدي و قول بسم الله و أبدا آكل
قال ليها الجماعه ديل مشوا وين ما عايزين يتغدو ولا شنو ؟؟
قالت ليهو طلعوا يلعبوا في الشارع لكن ليان قاعده .... ليان يا ليان !! يا بت !!
بعد مسافه ليان جاتهم داخله و قالت ليها ايوه يا أمي !
أمها قالت ليها كدي أول شي سلمي على يونس دا ! مالك يا بت عايزا تتعولقي كمان !
بدون نفس قالت ليهو كيف تمام !... قال ليها تمام ، أمها قالت ليها انتِ اليوم ما نصيحه ولا شنو يا بتي دا سلام شنو البايخ دا ؟!... يونس قال ليها خليها على راحتها يا خالتي!
_ غسلي يدك و تعالي اتغدي .... قالت ليها ما عايزا يا أمي و طوالي طلعت و مشت !
_ البت دي حيرتني !! ما عارفه الصابها شنو فجأه كدا ! معليش أمسحها لي في وشي يا ولدي !
قال ليها لا لا ما حصل شي يا خالتي ، بكون في شي مضايقها !
قعد اتغدا معاها و شرب الشاي و اتونس بعدها استأذن عشان يمشي ، قال ليها خليك قاعده ، أول ما طلع لمح ليان في الحوش ، ماسكه الخرطوش بترش في الحوش و هي زعلانه ، مشى وقف جنبها و قال ليها خير !!
ما ردت عليهو ، قال ليها أنا والله ما بعرف أحنس ولا عندي أخلاق لـ القصص دي كلها و ما بعرف أخمن سبب زعل الزول القدامي ، ليك فتره بتتعاملي معاي بالطريقه دي و أنا خالص ما متذكر إني غلطت عليك !!
إتلفتت عليهو و قالت ليهو تتذكر ليه و عشان شنو ؟؟
قال ليها طيب قولي لي انتِ ، غلطت عليك متين و في شنو ؟؟
= لو مهتم كان عرفت
قال ليها يا ليان تعاليني من الآخر !
= ماف شي و دا الآخر الجيتك بيهو ...
قال ليها على راحتك و طوالي فتح الباب و طلع ، قبل ما يركب عربيتو جات لاحقاهو و هي عيونها مليانه دموع ، قالت ليهو انت انسان بارد و سخيف و قلبك حجر و عديم إحساس .... لمن إتلفت عليها لقاها بتمسح في دموعها !!
أول ما فتح خشمو عشان يتكلم معاها دخلت و قفلت الباب بقوهـ !!
_______
لما صحيت من النوم لقيت في هدوء حاصل ، تلفوني كان جنبي ، شلت و عاينت للساعه لقيتها 7م ، قمت مخلوعه و قلت كيف أنا نمت و كمان للزمن دا !! طلعت برا لقيت البنات قاعدين في الحوش و بتونسوا ، قلت ليهم بنااات الحصل شنو! رماح قالت لي ولا شي ، مُنى و سجى و نهال مشوا و منار لقوا ليها شغل !
قلت ليهم شنوووو ! واااي يعني مشوا من دون ما أودعهم ! ليه ما صحيتوني يااااخ !
ليلى قالت لي لو بالجد بهموك و عايزا تودعيهم ما كان نمتي ! قلت ليها ما عارفه نمت كيف ! كنت جايه أقعد معاكم برا فجأه نمت و صحيت لقيت الدنيا بقت ليل ! سماح قالت لي بابا حازم كالعاده سأل عنك و قلنا ليهو نايمه ، قلت ليها كيف هو كويس عشان قالوا عيان ، قالت لي كويس زي الحصان ، ليلى قالت لي ياااا مها ما عايزا تباركي لـ منار ولا شنو ؟! إتلفت على منار و قلت ليها مبروك عليك الشغل ، ليلى قالت لي و أزيدك من الشعر بيت ، هي ما بس حـ تشتغل لا و كماااان حـ تعرس ، يعني حظظظ و ضرب !
قلت ليها والله !
قالت لي اييييوه لأنو الحـ يعرسها دا المول حق أهلو و هو ذاااتو جا مع بابا حازم و لما هي قالت لبابا حازم انها عايزا الشغل طوالي وافق و الولد لما شااافها قال عايزها ، قلت ليها حلووو طيب !
طبعاً بعد دا كلو منار ما جات أتكلمت معاي ، كانت رااافعه راسها فوق و شايفه نفسها و طبيعي لأنها بارت ليلى ، حسستني كأنو أنا عدوتها و عايزا تنتصر علي !... طبعاً أنا الزعلني في القصه دي كلها إنو مُنى و سجى و نهال مشوا من دون ما أودعهم ، يا حليلهم والله ، ما معروف حـ نتلاقى تاني متين في الدنيا الواسعه و الفراااقه دي !💔
المهم بعد أسبوووع من الكلام دا يوم و أنا في المطعم اتصل علي رقم غريب ، لما رديت اكتشفت انها حلا ، سلمت عليها و سألتها عن أحوالها و هي كمان سألتني عن حالي و شغلي ، بعدها قالت لي لدن دي تعبت و رقدناها في المستشفى ، قلت ليها لا ياخ عندها شنو ؟! قالت لي إلتهاب بس هسي بقت كويسه و أبوها ذاتو جا من السفر ، ما شفتيني اتبشتنت و خفت عليها قدر شنو ، والله الخوفه
=طيب انت هسي حـ تعمل شنو يا ود الخطاب !؟ الموضوع دا كل ما ليهو ماشي يتعقد زياده و زي ما قلت ليك في شي ما واضح !
_ما دي المشكله ! ما قادر اكتشف الشي الما واضح دا و ما قادر اتراجع بعد ما البت اقتحمت حياتي و دخلت بيت أخوي و صاحبت مرتو !
= يونس سلمها الإستخبارات و انهي الموضوع دا !
_ما بالبساطه دي ، زي ما قلت ليك لو ما شفت الزعيم دا بعيون جوه السجن ما بقدر أنهي اللعبه الهم بدوها دي !
=طيب و هسي حـ تعمل شنو ؟؟!
_ رغم انها للآن عامله نفسها تقيله و ما شغاله بالموضوع إلا اني حـ أسرع اللعبه
=كيف ؟؟؟
يتبع.......
أي حاجه مها مها ! و هي شدة ما أنانيه ما حصل فكرت فينا و اتكلمت مع بابا حازم بخصوصنا ، ما بهمها غير نفسها ، كنا لمن نمليها كلام و نقول ليها قوليهو لـ بابا حازم نيابة عنا كانت بتقول لينا لا لا هو ما حـ يوافق و لمن تكون عايزا منو شي تجري ليهو في مكتبو و تقنعو بالمستحيل ، لنفسها بتعرف كيف تحنسو و تقنعو و لينا نحنا ما بتقدر تتكلم معاهو !
°و الزمن كلو شابكانا بلقى ليكم شغل ، لو لقيت طريقه حـ اشغلكم معاي التقول المطعم دا حق أبوها ، مستهبله و كذااابه ساي ، هي لو عليها ماف زول غيرها يتقدم !
• والله انتوا المستهبلات و كلكن كنت عايزا العرس ، بس لمن شفتن التلفون الجابتو و الراتب الحـ تاخدوا مسكتكم الغيييره ، دا حسد بس منكم ما اكتر ناسين العملتو ليكم !
_ انتِ يا مُنى لو البت دي ماسكه عليك ذله أو دافعه ليك قروش عشان تدافعي عنها كدا قولي لينا عشان نعذرك !
** كمان حتى حقنا في التعبير عايزا تحرمينا منو يا منى !؟ انتِ نااااسيه يوم قلتي عايزا تشتغلي و كلمتيها عشان تكلم ليك بابا حازم عملت شنو ؟؟ ما كلمتو و طنشت كلاااامك و لسه انتِ بتدافعي عنها ! عليك الله يا مُنى جاوبي بصدق البحصل دا ظلم ولا ما ظلم ؟
_ ظلم لكن...
** ماف حاجه إسمها لكن ، لازم نتحرك بعد دا ، كفايه سكوت ، هي هسي شغاله و تاني عايزا يجيب ليها شغل ؟؟ خلينا نحنا الأولاد طيب ليه ما جاب الشغل دا لواحد فيهم ؟؟ ليه يجيب ليهم شغل في المصانع و الدكاكين و هي يجيب ليها شغل في مول ؟!لازم نمشي كلنا كدا لـ بابا حازم نقيف قدامو و نسألو ليه بفضلها علينا !
// قايلنوا حـ يسمع منكم !؟ ئهه هو ما بسمع غير كلام الأنانيه ديك ! كأنها عندها ريموت و بتتحكم فيهو
:: "ما عندها ريموت بتتحكم فيهو بيهو لكن عندها مخ بتعرف تشغلو "
فجأه كل البنات إتلفتوا على مصدر الصوت عشان يعرفوا منو القال الجمله دي فـ لقوها ليلى ، جات داخله و قالت ليهم ايييوه هي بتشغل مخها و بتعرف تحنك و تقنع الزول القدامها ما زيكم انتوا الكلمتين ورا بعض ما بتعرفوا تقولوها قدام بابا حازم ... قعادكم هنا و شكيتكم ما حـ يفيدوكم بشي ، انتوا هنا تتشكوا و هي هناك بتخطط ، دائماً سابقاكم بخطوات !
_ المشكله اننا ما عارفين نعمل شنو !
::" دي مشكلتكم ... دائماً ما عارفين تعملوا شنو !!... عاينوا من الآخر كدا عايزين تتصرفوا و تاخدوا حقكم و لا عايزين تتنازلوا ليها !
= ما عايزين نتنازل يا ليلى لكن الحل شنو !؟ يعني نمشي لـ بابا حازم و نعترض ؟؟
::" أنا حـ أقول ليكم الحل بس بشرط إنو كلكم تكونوا موافقين !
كل البنات بقوا يعاينوا لبعض و بعدها كل وحده بقت تقول أنا موافقه ، أنا موافقه ، ما عدا وحده بس ، لمن إتلفتوا عليها كانت ساكته ساي و أصلاً هي من قبيل ما فتحت خشمها ، رماح قالت ليهم أعذروها يا بنات دي ضلها و ساعدها الأيمن ، يا حليلها قايله مها معتبراها صحبتها المقربه عشان كدا ما عايزا تكون معانا ، ليلى قالت ليها ما قايلاك جبانه للدرجه دي يا منار ! انتِ اكتر وحده كنتِ زعلانه و متضايقه بسبب الموضوع دا و امبارح كنتِ بتشكي لي ! فـ شنو الغيرك و خلاك تتراجعي !... بس ما تقولي لي عشان صحبتك و بتاع !! ياخ إذا هي ما مديه أي أهميه للصحبه دي و ما بهمها غير نفسها انتِ مالك متعبه نفسك و مضايقاها عشانها !هسي انتِ من متين زعلانه منها ، جات راضتك ولا قالت ليك معليش ! ما صدقت اتخلصت منك!.... وحده من البنات قالت ليهم خلوها دي ضل سااااي و وحده جبانه ما بتعرف غير تشكي و تبكي ... بقوا يحرضوها و يقولوا عليها خوافه و جبانه و ما عندك شخصيه ، لحد ما في الآخر قالت ليهم لو سمحتوا أسكتوا و خلوني أخطط على راحتي !... كلهم قعدوا يعاينوا ليها ، قالت ليهم ما تستغربوا ، إذا هي ما عامله لي حساب و ما مديه أهميه لـ صداقتنا فـ ليه انا أديها أهميه !!... ليلى قالت ليها ايييوه دا الكلام التمام و ما تتعبي نفسك و تخططي ، عندي خطه بسيطه و زاااابطه ...
____
مشهد آخر :
_ ود الخطاب اسألك سؤال ؟ بس رجاءً خليك صريح معاي
= لا ما تسأليني
_ البت ديك البتشتغل في المطعم انت بتعرفها؟
= لا
_ طيب عاجباك ؟
= أقول ليك ما بعرفها تقولي لي عاجباك !
_كذااااب والله ، كل يوم بتمشي ليها في المطعم كمان قول دا كذب
=... انتِ مراقباني ولا شنو ؟؟
_لا بس أخت صحبتي شغاله هناك و قالت بتشوفك كتييير بتجي المطعم و بتتكلم مع البت ديك ...
=غيتو انتوا البنات ديل جنكم شمارات !
_عارفاك ما بتحب زول يتدخل في خصوصياتك ، بس أنا حاسه البت دي عاجباك و عشان عارفاك ما بتعرف تتعامل مع البنات خايفاها تطير منك ، أنا ذاتي البت عجبتني و بما اني في مقام أختك عايزا امسك الموضوع دا لحد ما تعرسها
=عليك الله يا حلا بدري على الكلام دا
_معناها البت عاجباك ... طيب هي رايها شنو ؟؟ غيتو ما ظنيتها ترفضك... أخيراً حـ يجي اليوم المنتظر و نشوفك عريس يا ود الخطاب ..
=يا حلا ما...
_حـ ابدا تجهيزات من هسي يلاااا سلام ....
#بطل_الحكايه7
مها حولي الزاكي
طبعاً بقيت أعاين ليهو و أنا متفاجئه ! قلت ليهو لا لا أكيد انت فيك شي ! عقلك ما تمام !... قال لي هسي كلامي دا فيهو شنو غلط ؟!
قلت ليهو عن إذنك وراي شغل ، خليتو قاعد و مشيت واصلت شغلي .... لمن دخلت المطبخ لقيت سالم و حذيفه بتكلمو عنو ، قالو لي زولك دا الليله حـ ياكل الأكل دا كلو كيف ؟ قلت ليهم دي شنو زولك دي !؟ سالم قال دا شكلو بياكلو بـ عيونو !! ماف زول طبيعي بطلب أكل قدر دا ! قلت ليهم ما عندنا بيهو شغله المهم حـ يدفع الحساب كلو....
المهم بعدها واصلت شغلي ، بعد حكاية ساعه كدا لمن طلعت و عاينت لـ الطاوله الكان موجود فيها يونس لقيتو ماف و الأطباق زي ما هي ، شكلو أكل صنف واحد بس ، ناديت حذيفه و قلت ليهو الزبون الكان قاعد في الطاوله ديك دفع الحساب ؟؟ قال لي ايوه دفعو و بـ زياده كمان !! الراجل دا شكلو حيران و ما عارف يعمل شنو في قروشو دي عشان كدا شغال إسراف سااااي ، في سري قلت ليهو عااااد لو ما خلى كل الناس تعرف إنو برجوازي ما برتاح !.... طبعاً دي ذكرني لما لاقيتو في السوق ، يعني إذا هو برجوازي غني و عندو عربيه فـ شنو البخليهو يركب مواصلات ! قلت عادي يمكن كان في عطل في عربيتو أو يمكن حب يجرب المواصلات دي عامله كيف ! عاد هو بكون من الله خلقو ما ركب مواصلات !
المهم و نحنا في المطبخ جسار كان بتكلم مع سالم و حذيفه و قال ليهم عايز أبيع تلفوني ، سالم قال ليهو معقوله ضاقت عليك للدرجه دي ! قال ليهو لا بس عايز اغير تلفوني ، ابيع دا و اتم الناقص و أشتري تلفون جديد !
فجأه كدا جسار قال لي انتِ يا مها اشتريتي ليك تلفون ولا لسه ؟! قلت ليهو لسه والله ، قال لي رايك شنو أبيع ليك تلفوني دا ، كويس و استعمالو خفيف ، قلت ليهو والله لو عندي قروش كنت اشتريتو منك طوالي ، قال لي يا زوله ماف مشكله جيبي العندك بس ، ضحكت و قلت ليهو اقسم بالله مفلسه ، قال لي خلاص شيليهو و لمن تاخدي مرتبك أديني حقي ، قلت ليهو أنا ما معروف حـ أواصل في الشغل دا ولا لا ، الشهر دا عشان اثبت فيهو نفسي و خلاااص انتهى باقي تقيم المدير لـ شغلي ، لو وافق اشتغل معاكم بشتري منك و إذا لا فـ خلاص خيرها في غيرها ، فريال قالت لي لا ياخ كيف يعني تشتغلي شهر كامل من دون مقابل ! قلت ليها أنا الطلبت كدا من المدير عشان يخليني اشتغل و أثبت ليهو نفسي ، جسار قال لي لو طردتك كلناااا حـ نعمل وقفه احتجاجيه قدام باب مكتبو ، حذيفه قال ليهو عشان ننطرد معاها صح ، وحده اسمها ود قالت لي غيتو مجتبى صعب لكن لو شغلك عجبو ما بطردك ، هو زول حقاااني و ما بحب يظلم زول .... فجأه جانا صوت بقول خير يا شباب مناسبة الإجتماع شنو ؟؟
حذيفه قال ليهو ولا شي ، معظم الهنا ديل خلص دوامهم عشان كدا بتونسوا ، هز ليهو راسو و قال الباقين يمشوا على شغلهم ، عاين لي و قال لي ألحقيني في المكتب ، مشى و مشيت وراهو ، لمن وصلنا المكتب قال لي تقريباً الشهر خلص ولا لسه باقي عليهو شويه ما متأكد بس المرتبات حـ تنزل بكرا ، بما انك زوله نشيطه و شغلك كويس و عندك أسلوب في التعامل فـ تستاهلي تشتغلي معانا ، طبعاً لمن قال لي كدااا فرحت ! قلت ليهو يعني قدرت أقنعك ؟! قال لي ايوه و بالمناسبه حـ تاخدي راتب الشهر دا ، قلت ليهو بس أنا قلت ليك حـ اشتغل مجان ، قال لي و أنا ما بتذكر إني قلت ليك اشتغلي مجان ! قلت ليهو لكن.... قال لي عشان بعدين تقولي صاحب المطعم ظالم و ما أداني حقي ! قلت ليهو لا لااا مستحيل أقول كدا والله ، لمن عاينت ليهو لقيتو ما جادي في كلامو و كان بهظرر لمن قال لي :"عشان بعدين تقولي صاحب المطعم ظالم " طبعاً ما كنت قادره أعبر عن سعادتي ، قلت ليهو شكراً شكرررراً ليك ! قال لي أمشي لـ مالك وقع معاهو العقد و أديهو رقم حسابك و باقي التفاصيل عشان يدخلهم في السستم و ينزل ليك راتبك ... طبعاً هنا سكت و ما عرفت أقول ليهو شنو ، هزيت ليهو راسي بس و طلعت لقيت فريال و جسار في وشي ، قالوا لي خير ؟ فـ حكيت ليهم قالوا لي والله دا خبر طيب حلووو شديد و أهلاً وسهلاً بيك مره تانيه! المهم هم مشوا و أنا تااااني رجعت لمكتب المدير ، شربكت أصابعي و قلت ليهو ممكن آخد القروش كاش ! قال لي ماف مشكله ، بكرا تعالي لـ مالك و أخديهم و أنا أديتو خبر ، قلت ليهو تماااام و طلعت منو و أنا عاااايز اطير من الفرح ، آخيراً حـ اقبض راتب ، المهم قبل ما أطلع جسار جا و مد لي تلفونو ، قال لي اووول ما تستلمي راتبك تدفعي لي فاااهمه ولا لا ؟! قلت ليهو يعني مُصر تشيلني تلفونك دا بالغصب !😂 قال لي يعني ما عايزاهو ! خلاص يا زوله ، قلت ليهو لا لا عايزاهو لكن كدي قول لي بكم حـ تبيعو لي ؟! قال لي خاتي ليهو 65ألف ، بس حـ ابيعو ليك بـ 60ألف ....
قالت لي اتلاقيتو 5 مرات خلاص كدا بتكونوا عرفتو بعض ، لدرجة إنو هو عارف انك ساكنه امدرمان ! قلت ليها لأنو لمن اتلاقينا تاني مره ركبنا المواصلات سوا و كنا ماشين نفس الحته !... سكتت مسااافه بعدها قالت لي يعني انتِ ما حبيبتو !!
طبعاً لما قالت كدا قلبي عمل شححح ، قلت ليها لا لا ماف كلام زي دا !!
المهم بعدها بقينا نتونس عادي بس حسيتها لسه كانت شاكه و عايزا تتأكد ، طبعاً لدن كانت مشااااغبه شديد و كمان بتونس فينا ، والله ضحكتني جنس ضحك و خلتني أحبها زياده ، حلا قالت لي ما تشوفيها كدا البت دي مسلطه و فصيحها لو جيتي البيت و سمعتي ونستها مع خالتها تقولي زول كبير ، قلت ليها ما شاء الله عليها ذكيه بتفهم بسرعه ربنا يحفظها ليك ، المهم بعدها هي قالت حـ يمشوا بعد دا ، قالت لي أديني رقمك ، قلت ليها والله تلفوني انسرق و لسه ما اشتريت تلفون ، قالت لي لا ياخ ربنا يعوضك ، المهم طلعنا سوا و بعدها كل وحده مشت على طريق ... طبعاً لمن رجعت الميتم كلام حلا ما فارق عقلي ، الليل كلو بفكر في جملة : "يعني انتِ ما حبيبتو " كمان اتذكرت يونس و جياتو الكتيره للمطعم ، لو ما جا الصباح بجي بعد الضهر المهم قبل دوامي يخلص ، ما بنكر إنو في شي بدا يتكون جواي بسبب كلامو و تصرفاتو دي و كمان ما بنكر إني حاسه إنو هو مهتم بي !... للحظات ابتسمت بس بعدها لمن اتذكرت الواقع ، واقعي و حقيقة المره نفضت الأفكار دي من راسي ، قلت احلامي ساي يا مها الأحلام ما بقروش بس ما تعشمي ، يونس معجب و الإعجاب ما بدوم و لو عرف حقيقتي تاني المطعم دا ما بخت رجلو فيهو ، أصلاً أنا ما متأمله ولا عشمانه في زول و أصلاً الباب دا أنا قفلتو من زمااان....
المهم تاني يوم أثناء ما أنا باخد في الطلبات يونس جا داخل ، أصلاً كل ما يجي يناديني و يخلينا أنا تحديداً أخد طلبو ، أول ما قعد و شافني رفع لي يدو ، فأشرت لـ حذيفه عشان يمشي ليهو و فعلاً حذيفه مشى ليهو و داك عاين لي بضيق ! المهم كان في شلة أولاد نادوني عشان آخد طلباتهم لمن مشيت ليهم و أخدت الطلب ، واحد منهم قال لي انتِ اسمك منو يا عسل ؟؟ ما رديت عليهو بس قلت ليهم عايزين شي تاني ؟ المعاهو قالوا لي لا و كانو بضحكوا على صاحبهم عشان حسوا إني أحرجتو ، سمعتو قال ليهم قايله نفسها شنو الزفته الرخيصه دي ! إتحركت كدا من جنبهم و تاني رجعت ليهم ، عاينت للشاب القال لي اسمك منو و قلت ليهو ما قاصده أحرجك ولا قاصده أخلي اصحابك يضحكوا عليك ، ما عارفه الهدف شنو من سؤالك دا بس انا موجوده هنا عشان اشتغل شغلي و بس بدون ما زول يضايقني و اضطر أحرجو ، لو أختك كانت مكاني و في واحد قال ليها اسمك منو يا عسل ردة فعلك حتكون شنو ؟؟ خاصة إذا كان الزول دا نظراتو ما تمام !؟
يعني أنا بس عايزا افهم ليه انتوا بتحتقروا البنات البشتغلوا !؟ ليه بتقولوا بما إنها طلعت من بيتهم عشان تشتغل معناها بقت متاحه للجميع !! بقت مجبوره تسكت على التحرش و ترد على اسئلتكم البايخه دي و ترضى بالأسلوب القذر تبعكم دا ! انتوا عارفين إنو بسببكم في أسر كتيره حارمه بناتها من الشغل ! عارفين بسببكم إنو الواحده لو المغرب أذن ليها برا البيت بتموت من الخوف و أهلها كلهم بكونوا واقفين على رِجل وحده ؟! خليك من دا انتوا عندكم أخوات ولا لا ؟؟ بترضوا ليهم حاجه زي دي ؟؟ طيب لمن يطلعوا و يتأخروا بتخافوا عليهم ولا لا ؟؟؟ أكيييد حـ تخافوا لأنكم عارفين إنو نفس العمايل البتعملوها لبنات الناس في غيركم كتيير بعملها ! ...ما بخطر على بالكم إنو البتعملوا لبنات الناس ممكن يتعمل لأخت واحد فيكم !!
اففف أنا بتكلم مع منو ، المهم طول ما أنا ما سألتكم و ما اتمايعت ليكم تحترموا نفسكم ، مفهوم ! ....
طوالي مشيت خليتهم و قبل ما أدخل المطبخ لاقيت أستاذ مجتبى في وشي ، قال لي خير مالم معاك الشباب ديل ؟! قلت ليهو ماف شي ، موضوع بسيط و حليتو ، بعدها هو مشى و انا دخلت المطبخ و لمن جهز الطلب شلتو بنفسي و وديتو للشباب ، قلت أشوفهم حـ يسألوني تاني ولا لا ، ختيتو ليهم و هم ساكتين ، السألني أول حاجه قال لي : يا بت الناس العفو و العافيه و ما كنت قاصد اضايقك ، قلت ليهو حصل خير ، كان ممكن عادي اتجاهل سؤالك و أمشي بس السبب الخلاني ارجع و أرد عليك هو إنو واضح عليكم انكم أولاد أسر و ناس فـ ليه يطلع منكم تصرف غير محترم زي دا !! قال لي المهم آسف مره تانيه ، هزيت ليهو راسي بس و مشيت و قبل ما أصل المطبخ جاني صوت يونس و هو بقول ما معقوله معاكم !!
لمن إتلفت عليهو لقيت الطلب لسه ما وصلو ، دخلت المطبخ و قلت لـ حذيفه صاحب الطاوله ديك ليه ما جهزتو ليهو طلبو !! قال لي ياخ الراجل دا حيرني ! لمن مشيت ليهو عشان أشوفو عايز شنو قال لي خليني اختار على راحتي و ياداب طلب قبل شويه !! قلت ليهو طيب لو جهز أمشي وديهو ليهو عشان ما يعمل لينا موضوع ، فعلاً حذيفه شال الطلب و طلع بيهو من المطبخ ، بعد شويه جا راجع بيهو تاني و هو متضايق ! قال ياخ حريقه في الزباين الزي الكائن دا !! قلت
#بطل_الحكايه6
مها حولي الزاكي
طبعاً في العربيه كنت متوتره و حاسه بإحساس ما عادي ! قال لي الجابك هنا شنو ؟!...قصدي عندك أهل هنا ؟! قلت ليهو لا ، خلص دوامي فـ حبيت أطلع و أحوم شويه و بالصدفه لاقيت حلا في الدكان فـ عرفتني و أصرت علي أدخل معاها بيتها ، قال لي دوامك بنتهي كم انتِ ؟؟ قلت ليهو 3 قال لي ما متأخر ؟؟ بتدوامي من الصباح صح ؟؟ قلت ليهو ايوه بس مبسوطه بالشغل و ما عندي مانع لو كان دوامي أطول ، قال لي بالمناسبه ان شاء الله مديرك ما يكون عمل ليك مشكله بسبب اليوم داك لما كنتِ واقفه تتكلمي معاي ! قلت ليهو ما عمل مشكله بس نبهني .. انت كيف عرفت إنو دا المدير ؟! قال لي واضح عليهو.... قال لي بالمناسبه ما حكيتي لي شي عنك ! قلت ليهو ماف شي ينحكي يعني ما بعرف شي غير اسمك و غير انك ساكنه امدرمان ! قلت ليهو ماف شي عشان أحكيهو ! عاين لي و رجع ركز مع سواقتو ، فجأه تلفونو رن ، ما رد عليهو لمن تاااني رن ، رد و قال ايوه !.... أديني ليها ، طبعاً لمن قعد يتكلم فهمت إنو الإتصلت دي حلا و أدتو يتكلم مع بت أخوهو ، كان بقول ليها أنا مشيت بعيد ، بجيك بكرا بطلي بكى ! ... أظن بتها بكت و قالت عايزا عمها عشان كدا حلا اتصلت عليهو ، قال ليها حبيبة عمو ، والله حـ أجي اسوقك معاي ، خلاااص حـ اجيك بعدين ، خلى البكى الكتير و اسمعي الكلام.... لمن خلص قلت ليهو بت أخوك ظاهر انها متعلقه فيك شديد ، قال لي فعلاً و بعدها غير الموضوع ، اتكلمنا شويه بعدها الإتنين سكتنا و مشوارنا كان طويل ، لمن وصلنا قلت ليهو نزلني جنب الفرن ، قال لي لو وصلتك للبيت أهلك حـ يعملوا ليك مشكله ؟! قلت ليهو ايوه عشان كدا الأفضل تنزلني هنا ... نزلت و قلت ليهو شكراً يا عم لدن ! طبعاً غلبني أقول ليهو شكراً يا يونس مع إنو كان ممكن أكتفي بكلمة "شكراً " بس حسيتها بسيطه و ناشفه المهم شكرتو و مشى ، مشيت الميتم و أنا بفكر هو عمل كدا ليه ؟! ليه بعاين لي بالنظرات ديك و ليه بتصرف معاي كدا كأنو بنعرف بعض أو بنحب بعض !! عموماً مهما كان الفي بالو ما حـ يمشي لقدام ، لا هو بشبهني لا أنا بشبهو ، نحنا الإتنين مختلفين إختلاف كبير و الفرق بيناتنا شاسع ....
_______
_ و هسي ناوي تعمل شنو يعني ؟؟
=ولا شي ، عايز اعمل الهم عايزنوا و أوهمهم إني بلعت الطُعم و أشوف نهايتهم!
_لا لا يا ود الخطاب ، في حاجه ما واضحه !
=أنا كمان حاسي كدا بس ما قادر أعرف الغلط وين !
_ دقيقه خلينا نفكر وحده وحده ، هم مرسلين ليك جاسوسه و دي معلومه صحيحه و عرفنا هي منو و فعلاً هي اتحركت و بدت تنفذ مخططها بس ليه هي بتمشي دار إيمان ؟!! ايوه هي كبرت و اتربت هناك بس بما انها حالياً موكله بمهمه و بقت تابعه للجماعه ديلك فـ شنو البخليها تمشي الدار ! يعني استحاله يكونوا أغبياء للدرجه دي ! مستحيل ما يخطو في بالهم احتمال انك تشك فيها و تتبعها و تحاول تعرف هي ساكنه وين ! يعني معقوله ما خطر على بالهم انو انت لو شفتها واقفه جنب دار إيمان ساااي حـ تكتشف اللعبه !
= دا المحيرني يا صديق !.... ما قادر أفهم هم مخططين لشنو بس الحاجه المتأكد منها إنو البت دي جاسوسه !
_ أنا شايف إنو الأفضل انك تبلغ عنها و تخلي الإستخبارات تشوف شغلها معاها ، امبارح تم إلقاء القبض على 3 أشخاص تابعين للتنظيم دال ، و حالياً بيتم إستجوابهم ، بلغ عن البت عشان يتم استجوابها
= ما بقدر اتراجع يا صديق ، في البدايه افتكرت إنو الموضوع دا بخصني أنا و بس و راح عن بالي إنو هم ممكن يدخلوا أهلي في القصه دي ! يوم شفت بت أخوي معاها عرفت خطورة الموضوع و خطورة البت دي ، لا و كمان مشت ليهم في البيت !
_عشان كدا قلت ليك سلم البت الإستخبارات ، و صدقني حـ يخلوها تعترف بأي وسيله
= حـ أسلمها بس ما هسي ، أول ما اتأكد إنو الزعيم مرمي في السجن هي كمان حـ تتسجن زيو ، بس هسي طول ما الزعيم دا حُر و هي بتشتغل لصالحو ما بقدر اخاطر و اخليهم يعرفوا إني كاشفهم عشان ما يستخدموا طريقه تانيه عشان يهددوني أو يضروني بيها
_ وجهة نظر برضو ، بس زي ما عارف واحد زي الزعيم دا صعب يتمسك بسهوله ، إذا الموضوع دا أخد زمن طويل انت قادر تتساير مع البت دي و توهمها انك حابيها ؟!
= ما عارف ما عارف يا صديق ، أفكاري جايطه شديد بس الأكيد إني ما بقدر انسحب هسي !
_الموضوع دا بحير والله يا يونس ! في شي مبهم فـ اعمل حسابك و خليك حذر بالذات من البت دي !
= دي عباره عن أداة بتتحرك حسب مخططات و أوامر معينه ، هي ما بتغلبني و ما تخاف ما حـ تقدر تعمل لي حاجه و هي بت ، أنا بس عايز أبعد أهلي كل البعد عن الموضوع دا !
_ ما تستخف بيها و تنسى إنو الأداة مهما كان حجمها صغير بتجرح أو تطعن !
= آمين جمعاً يا رب ، والله خالتي دعواتك دي براها كفايه
_ سمح اقعد خليني اعمل ليك كباية شاي مالك وقفت !
= لا لا مستعجل و الشاي دا ذاتو أنا ما عليهو بالحيل
_ خلاص بعمل ليك جبنه أو عصير
= مره تانيه يا خالتي ، مستعجل والله
_ سمح ربنا يفتحها عليك و يوفقك
ودعها و طلع من بيتها ، لبس نظارتو و أول ما وصل عربيتو و كان حـ يفتح الباب جاهو صوت بقول :
_ يونس !
قلع النظاره و قال ليها ايوه ، جاتو لحد عندو و قالت ليهو ممكن تبطل البتعمل فيهو دا ؟؟ العملتو لينا ما شويه ، لحد هنا و كفايه يا يونس ما عايزاك تكلف نفسك معانا !!
= خلاص خلصتي كلامك !؟
_ يونس أنا والله خجلانه منك و خاشه في ضفوري ! ياخ انت ليه كدا ! ندمتني على إني جيت يوم و شكيت ليك !
= عايني أنا ما عملت كدا من باب الشفقه أو عشان انتِ شكيتي لي ، عملت كدا لأني عايز أعمل كدا و بعدين الحاجات دي جبتها لـ خالتي انتِ اطلعي من الموضوع دا عشان ما تتحسسي ساي !
_ أنا و أمي و أخواني مهما حاولنا نجازيك و نوفيك حقك ما بنقدر يا يونس ... حاسه اني حـ أبكي والله
= يا ليان انتِ اليوم مالك متحسسه أكتر من اللازم !؟
عاين لـ ساعة يدو و قال ليها أنا اتأخرت يلا مع السلامه ... أول ما فتح الباب و ركب و كان حـ يمشي قالت ليهو يونس !!
قال ليها ايوه !!... قالت ليهو انت بطيبتك و شهامتك و أسلوبك قدرت تاخد مكانه في قلوبنا كلنا ، أمي بتحبك شديد و بتدعي ليك على طول ، والله بتحبك زي حبها لينا و أكتر ..... و نحنا كمان نفس الشي بنحبك !.... قال ليها ايوه خالتي ما بتقصر والله ، ربنا يديها الصحه و العافيه و أنا كمان خاتيها في خانة الأم والله .... يلا خشي جوه و ساعديها ، قالت ليهو حاضر .... هو دور عربيتو و مشى و هي واقفه بتعاين لحد ما عربية يونس اختفت من قدامها .....
_____
خلصت دوامي و قبل ما أطلع سمعت جسار بتكلم بتلفون و كان بقول ياخ اتصرفوا ! ما بقدر اخلي شغلي و اشيل أكل و اجيبوا ليكم لحد البيت ! براكم عارفين طبع المدير ! ياخ 4 بنات واحده فيكم قادره تطبخ ماف!... أمي خليها عيانه ما بتقدر لكن انتوا ، يا زوله اتصرفوا و اشتروا ليكم أي شي ... كيف يعني ما عندكم قروش ..اخخخخ أنا منكم خلاص أقفلي أشوف حـ اعمل شنو ، لمن قفل فريال قالت ليهو دي اختك ولا شنو ؟! قال ليها منو غيرها ! اتشكلت مع أخواتي و كل وحده حالفه ما تعمل الغدا ، قاعدين جعانين و ماف وحده فيهم عايزا تقوم تدخل المطبخ ، عشان كدا اتصلت علي و قالت لي تعال راجع البيت و جيب لينا معاك حاجه نتغدا بيها ! قالت ليهو لو ما التوصيل طلع كان ممكن تخليهو يوصل ليهم حاجه ، قال ليها هسي مجبور أشيل ليهم شي و أرجع البيت تاني ، ما عارف مجتبى حـ يسمح لي ولا لا خاصة إني ياداب نزلت بعد ما أخدت إجازه شهر ! خجلان أمشي ليهو تاني و اقول ليهو راجع البيت ! و ما شايفها ظريفه اقول لواحد من الشباب خلي شغلك و هاك وصل لي الأكل دا للبيت ! قلت ليهو انت بيتكم وين ؟! قال لي هنا في الرياض ، قلت ليهو معناها قريب ، قال لي لا بعيد بمواصلات ، قلت ليهو طيب وصفو لي أنا حـ أمشي ، قال لي لا لا ماااف داعي والله !! قلت ليهو أنا أصلاً طالعه من هنا و ماشه ألف شويه و اتفسح ، و فعلاً أنا كنت مقرره أطلع و ألف شويه و بعدها أرجع الدار ، قال لي طيب لو ما فيها تعب ليك و مشكوووره والله ، المهم جهز ليهم أكل و ختاهو في علب و دخلو في كيس ، قال لي طلعي تلفونك عشان اديك رقم وحده من أخواتي ، قلت ليهو وييين أنا تلفوني اتسرق والله إلا تتصل على اختك و تكلمها إني جايه ، قال لي الله يعوضك طيب حـ اتصل أكلمها ! مد لي الكيس و معاهو قروش قال لي للمواصلات ، قلت ليهو معاااي ، قال لي يا زوله قولي خير و امسكيهم! قلت ليهو والله العظيم معاي ، لم قروشك دي عليك ، شلت الكيس و مشيت طوالي ، ركبت مواصلات وحده و لمن زلت بقيت اسأل عن البيت لحد ما لقيتو و أصلاً كان بارز و واضح ، وقفت جنب الباب و دقيتو ، بعد شويه كدا جات وحده فتحت لي ، سلمت عليها و قلت ليها جسار رسل ليكم ديل ، شالتهم مني و قالت لي إتفضلي ، قلت ليها لا لا ماشه و طوالي مشيت ، بقيت لافه بعاين للناس و للحياة العايشنها ، حسيت انهم أحرار و حياتهم حلوه شديد عكس حياتنا نحنا ، بالجد اتمنيت اعيش حياة نفس حياتهم دي ، المهم في الآخر لمن تعبت و قررت أرجع جيت ماره بقاله و شفت كراتين الشيبس فـ قلت حـ اشتري ، دخلت سألت عن سعرو و قلت ليهو أديني 4 من شيبس البطاطس الحجم الكبير ، قلت أضوق البنات معاي ، أداني ليهم في كيس ، أثناء ما أنا بفتح في شنطتي عشان أطلع ليهو القروش ، جاني صوت طفله بتبكي و صوت وحده قالت : عوض عليك الله أديني بسكويت و مصاصه البت دي عذبتني و جننتني ! ضحك و قال ليها بت وحده و ليها حق تدلع ، قالت ليهو غلبتني عديل ...
#بطل_الحكايه5
مها حولي الزاكي
لما إتلفت وراي شفت مجتبى المدير ! قال لي انتِ يا مها جايه هنا تشتغلي ولا تتونسي ؟! قلت ليهو ما كدا بس.... قال على شغلك !
طوالي مشيت و انا بنبذ في نفسي ، يعني ما معقوله من تاني يوم لي أعمل مخالفه و أخلي المدير ينبهني ! ياخ كلو بسبب الإسمو يونس دا ! لااا كلو بسببي انا لأني أديتو فرصه و قعدت آخد و أدي معاهو في الكلام !
امبارح القريبه دي كنت بقول للمدير أديني فرصه و ما حـ تندم و شنو ما بعرف و قعدت اتكلم ليهو بكل ثقه و اليوم مضيعه قريب النص ساعه في الكلام الفارغ !!
المهم واصلت شغلي و كنت حريصه إنو ما أغلط تاني و ما اضيع زمن ، طبعاً دوامي من الساعه 7_3 المهم لما خلص الدوام مشيت بدلت ملابسي و شلت شنطتي و مشيت مكتب المدير ، ضربت الباب و دخلت لمن أخدت إذن الدخول ، لقيت معاهو واحد من الموظفين ، قلت ليهم السلام عليكم ، قالوا لي و عليكم السلام و طوالي الولد المعاهو طلع ، قلت ليهو جيت عشان اعتذر بسبب الحصل قبيل ، صدقني أنا ما مهمله و لا بحب اضيع زمن و الحصل ما حـ يتكرر تاني ، قال لي حالياً انتِ في مرحلة إثبات النفس و لحد ما فترتك تنتهي أنا ما حـ أقول ليك أي شي ، لما ينتهي الشهر بعدها حـ اقول ليك إذا بتقدري تواصلي معانا أو لا .... طبعاً كلامو ما طمني خالص ! قلت ليهو أستاذ مجتبى أنا بالجد آسفه!! هز لي راسو بس ، طلعت منو و أنا حاسه بالإحباط ! لحد ما وصلت الميتم هونت على نفسي و قلت الحصل ما حـ يتكرر تاني و لحد ما ينتهي الشهر حأكون قدرت أثبت نفسي لأستاذ مجتبى ، طبعاً جبت للبنات معاي حاجات بسيطه زي الخواتم و السلاسل و الباندات و الحاجات دي ، وزعتها عليهم و رغم بساطتها فرحوا بيها و شكروني ، ليلى الشومه ذاتا جبت ليها مرآيه عشان هي بتحب نفسها و مهووسه بجمالها ، قالت لي لقيتيها بـ 100 جنيه صح ، و الحاجات ديل كلهم ما أظن فايتات الألف لأنهم من أماكن رخيصه ، قلت ليها يا سلاااام محسساني انك قاعده تشتري من مول !! رماح قالت ليها مها بالجد ما قصرت يا ليلى ، حتى انتِ اشترت ليك فماف داعي لكلامك دا!
المهم منار كانت قاعده جوه في غرفة النوم ، مشيت ليها و قعدت جنبها ، كانت حـ تقوم و تمشي بس منعتها ، مسكتها من يدها و قعدتها ، قلت ليها انتِ عارفه كويس إني ما بحب الخصام ، و ما بحب أزعل زول مني أو أجرحو ، بالذات لو كان الزول دا قريب مني ، إذا في حاجه في الدنيا دي اسمها لوم أو عتاب و صريخ و شكل و ضرب فـ ليه الواحد يختار يسكت و يحير الطرف التاني ؟؟
غلطت عليك تعالي قولي لي ، عملت تصرف ضايقك واجهيني ، زعلتك عاتبيني بس ما تسكتي و تدخليني في متاهه ، أنا بعد ما اتأكدت انك ما زعلانه من زول غيري بقيت كل مره اسأل نفسي أنا عملت ليها شنو !! كل مره براجع نفسي و تصرفاتي عشان اتذكر أنا عملت شنو يضايقك و يزعلك مني بس ما اتذكرت ولا موقف ممكن يكون السبب في زعلك مني !
سكتت ما قالت حاجه ، قلت ليها ما تسكتي ، السكات دا أسلوب واحد جبان عارف إنو ما ليهو حق يزعل بس عايز يزعل و خلاص !
هنا رفعت راسها و عاينت لي ، فكت يدها مني و قالت لي أنا ما جبانه و لا مشتهيه الزعل عشان أعمل نفسي زعلانه ، طبيعي تشوفي زعلي دا ما حقيقه لأنك مفتكره كل الناس ممثلين زيك و بحبو يتصنعو و يعملو دراما !
طبعاً كلامها صدمني ! قلت ليها لو ما عارفه نفسي كنت زعلت بسبب كلامك دا بس الحمدلله واثقه شديد في نفسي و عارفه أنا شنو ، وقفت على حيلها و قالت لي بالله ؟؟
طيب عارفه انك وحده حاقده ولا لا ؟
عارفه انك وحده أنانيه و ما بتحبي غير نفسك ولا لا ؟
عارفه انك ما بتتمني الخير لـ غيرك و لو عليك ماف زول يتقدم شبر ولا لا ؟
طبعاً على حس صوتها البنات جو و إتلموا !
قلت ليها الكلام دا عني أنا يا منار !!؟
قالت لي في زول أناني هنا غيرك !؟... رماح قالت ليها بسم الله يا منار ! في شنو مالك يا بت ؟
سماح قالت صمت دهراً و نطق كفراً !
قلت ليهم خلوها تواصل كلامها و ياريت بعد ما تخلصي الإتهامات الباطله دي كلها تقولي سبب زعلك ، فدوى قالت ليها عيب يا منار ما كان تقولي كدا ، ليلى جات و قالت ليهم هييي هييي شنو متلمين في البت دي كلكم ؟؟ مالكم عليها قايلنها براها ولا شنو ؟
قلت ليها نحنا ما قاعدين نلعب كوره عشان تجي تقولي لينا قايلنها براها ، أنا سألتها سؤال و منتظره إجابتها و لو ما عايزا تقولي قدامهم يا منار و مُفضله إنو الكلام يكون بيني و بينك من دون أي تدخل ما عندي مانع ... طبعاً ما قالت حاجه ...
سناء قالت ليها انتِ زعلانه بسبب العريس الطار منك و قال عايز مها ولا شنو ؟
طبعاً هنا رفعت راسي و بقيت أعاين لـ منار و منتظراها تقول حاجه بس خشمها ما فتحتو !!
المهم مع العصريه لمن خلصت رسم طلعت الحوش برا ، مشيت لـ ناس رسيل ، لقيتهم بلعبو عِده عِده ، قالوا لي تعالي ألعبي معانا ، قلت ليهم طواااالي و قعدت ألعب مع البنات الصغار ، بعدها شفت الأولاد جابو ليهم كوره و بلعبوا في الحوش ، مشيت ليهم و قلت لـ مصطفى انت إياك تلعب لأنو رجلك لسه ما بقت كويسه ، قال لي بابا حازم قال لي رجلك كويسه ، قلت ليهو يا كذاااب بابا حازم جاك متين ؟؟ قال لي في نفس اليوم الوقعت فيهو بليل و كان عايز يوديني الدكتور بس الأولاد قالوا ليهو دا رضخ ما كسر ، لمس رجلي و قال لي صح رجلك كويسه ...قلت ليهو بابا حازم كتر خيرو والله ، بخاف علينا كلنا ، قال لي أحسن من المره الشومه ديك ، قلت ليهو أصلاً ماف مجال للمقارنه !
طبعاً ناس هيثم بدو لعب ، قلت ليهم لعبوني معاكم ، عاينوا لبعض و قالوا لي شايفه ليك بت هنا ؟؟ قلت ليهم ايييوه ، أنا ! هيثم قال لي عليك الله اتخارجي لينا من هنا و خلينا نلعب ! قلت ليهو بس قول انك خايف اني أغلبكم ! قال لي ما تضحكيني عليك الله ! سيد قال ليهو خلاص خليها تلعب يا هيثم ! قلت ليهم لعبوني في الفريق الضد هيثم ، قال لي أصلاً مستحيل ألعب معاك في نفس الفريق ، قلت ليهو تماااام يلا نلعب ، المهم بدينا لعب و أنا هدفي أخسر هيثم !
المره الأولى و التانيه هم جابو فينا 2 قون بس بعدها اتغيرت الموازين ، ياخ بقينا ما بنديهم نفس ، الطريقه البستخدمها في الكوره هي إني أتعب خصمي بعدها أسجل قوووون و دا الخلانا نفوز عليهم ، طبعاً هيثم قرب يبكي ، و أنا عاد لمن أقوم على المكاوه كعبه شديد ، سيد قال لي خلاص يا مها خلي المكاوه و أصلاً دا حال الكوره و أي لعبه غيرها ، فيها فريق فائز و فريق خاسر ، قلت ليهو و هيثم حظو خلاهو يكون في الفريق الخسران و قعدت اضحك عليهو بشماته ، هيثم زعل جد جد و مشى ، لمن حسيت إني بالغت و كترت المحلبيه مشيت ليهو و قلت ليهو كنت بهظر معاك ، ما رد علي ، قلت ليهو نفسنتك بقت أكعب من نفسنة البنات ! أجي من متين بتزعل مني قدر دا !؟
قال لي ياخ قفلي مني ، قلت ليهو شفت مزمل إتشنقل كيف لمن كان عايز يجيب قون ؟😂🤣 إلا لحقتو و غطيتو و سترت عليهو عشان انتو ما تشوفوهو .... طبعاً قعد يضحك ، قال لي طلعتي خاينه ، معقوله تضحكي على واحد كان في فريقك !؟🤣 قلت ليهو كاااان و بعدين دي لعبه و بعد تخلص كلنا بنرجع زي ما كنا من دون أحزاب و تفرقه ، قال لي والله تكتلي الكتيل و تمشي في جنازتو ، قلت ليهو كدا معناها صاااافيه لبن ، قال لي مجبور أعمل شنو ! قلت ليهو المهم أنا ماشه ، اتحركت كدا و تاني جيتو راجعه ، قال لي بس ما تكوني وقعتي في غرامي و القعده معاي عجبتك !!؟
قلت ليهو هوي يا شافع أحسن تحترم نفسك ! ... عايزا اسألك انت لسه بتشرب سجاير ؟؟....
قال لي لا اتطورت و بقيت اتعاطى ، قلت ليهو ياخ أنا ما بهظر معاك ! قال لي ايييوه لسه بشرب سجاير! اها مالك ؟؟
جيتو قريب و قلت ليهو كـ نصيحه من أخت لأخوها الصغير بطل البتعمل فيهو دا يا هيثم و أمشي عديل ، انت ياداب في عز شبابك و فرع محلب ني زي ما بقولو فـ ليه تمسك الدرب دا ؟؟ مالك انت يا ود أمي عايز تدمر نفسك من هسي ؟؟
قال لي أصلاً هي كدا كدا متدمره ، قلت ليهو إذاً خليها تدمر براها ، قال لي أصلك ما بتطمني 😂
قلت ليهو خليت الشغل في الورشه ؟؟
قال لي بقى ما جايب حقو و المنافسين كتار و القروش حبه و التعامل كعب ، قلت ليهو عصفور في اليد خير من 10 في الشجره ! قال لي فات الآوان ، خليت الورشه قبل اسبوعين ، قلت ليهو واااي انا منك ! ياخ أنا لو كنت ولد زيك كان اتصرفت و عملت أشياء ما شي واحد ! الأولاد فرصهم في الشغل أكتر من فرص البنات حتى لو الكان الشغل متعب ، انتوا ماف حاجه حـ تخوفكم على نفسكم ، لو اشتغلتو بليل او النهار ما حـ يفرق معاكم ، ما حـ تلقوا إستغلال و مضايقات في الشغل زي البحصل مع البنات ! هسي معظم البنات الهنا الموقفهم و المخوفهم من الشغل شنو !؟ ما ياها المضايقات و الحركات القذره البتحصل ليهم في شغلهم ! كونك ولد دي حاجه براها تخليك تقيف على رجلينك و تصنع نفسك ، صدقني العقبات و المصاعب البتلاقيكم انتوا الأولاد ما أكتر و أكعب من البتلاقي البنات ، انت ولد فـ قول الحمدلله و شد حيلك شويه يا هيثم !
قال لي عشان شنو و منو ؟؟
قلت ليهو عشان نفسك ! و لو عايز ليك هدف أصحابك و باقي الناس الهنا ديل معتبرهم أسرتك ولا لا ؟؟ ما بستاهلو انك تشد حيلك و تصنع و تطور نفسك و تفيدها و تفيدهم !؟
قال لي يااااخ كلامك كتير و كلو مستحيل ، قلت ليهو لا مستحيل تحت الشمس ، قال لي نحنا حالياً قاعدين في ضل ، قلت ليهو وااااي أنا منك يا هيثم ، المهم فكر في كلامي دا كويس ، قلت كدا و مشيت خليتو.....
بتحب بعض ، نعمل شنو يعني إذا انتِ وحده فهمها كلو ماشي شمال و ما بتشوف الناس إلا من زاويه وحده !!.... يعني إذا انتِ كدا و بتمشي أمورك بالطريقه دي قايله كل الناس حتكون دنيئه و منحطه زيك !!
طبعاً قلت كلاميي دا بغضب و بنبره عاليه و الصاله رغم إنها كانت ملياااانه بنات بس ما كان في صوت مسموع غير صوتي و صوت المروحه ، بعد خلصت أديتها نظره كداا و مشيت خليتها و أنا متضايقه شديد بسبب كلامها دا ! كيف تفكير كدا فيني و في بابا حازم ! دا كلام ما بدخل الرأس ذاتو ! كيف نفسها سمحت ليها تقول كلام زي دا و بالجراءه دي !!
المهم بعد يومين اتذكرت واحد اسمو مجدي ، كان بنزل بوستات توظيف في الفيس فـ قبل ما تلفوني ينسرق كان طلبت منو إنو يشوف لي شغل ، فـ جاني بعد يوم و قال لي في مطعم اسمو(..) عايز اتنين ويتر بنات و اتنين أولاد للنظافه فـ حـ اشوفهم لو وظفوا ناس ولا لسه ، قلت ليهو تمام بس للأسف تلفوني إنسرق قبل ما يصلني رد منو ، فـ قلت أحسن أمشي أشوف المطعم و اتأكد بما اني عارفه اسمو و موقعو ، المهم تاااني يوم طوالي جهزت نفسي و إنسحبت براااحه و مشيت لـ بكري و قلت ليهو أفتح لي الباب ، طبعاً شاااميني شمه الكلب بس ما بقدر يعمل لي شي عشان ما أفضحو ، أكيد ليلى ورتو إني عااارفه بالشي البيناتهم ، المهم بكل هدوء فتح لي الباب و قال لي لو مس نادين عرفت انك طلعتي ياريت ما تجيبي ليها سيرتي قلت ليهو أصلاً مستحيل أقول انك فتحت لي الباب و إلا منو الحـ يفتحو لي تاني !
المهم طلعت و مشيت و أنا بدعي إنو اتوظف بأي طريقه في المطعم داك ، شلت معاي شهادة الميلاد و الرقم الوطني بس لا عندي شهاده جامعيه لا شهادة ثانويه ، طبعاً كل الفي الميتم هنا عندهم شهادات ميلاد و أرقام وطنية ، أسامي أهلنا الفيهم غير حقيقيه ، إدارة الدار و بالتعاون مع السجل المدني و الجهات المعنية هم الإختاروا لينا الأسامي دي و كانوا حريصين يدونا أسامي أهل نادره عشان ما يكون في تطابق كبير بين أسامي أسرنا المزيفه و أسامي أسر تانيه حقيقيه ، طبعاً شهادات الميلاد تقديريه ، المهم لمن وصلت المطعم و دخلت مشيت للكاشير و سألتو عن مدير المطعم ، قال لي منو انتِ و عايزا منو شنو ؟؟ قلت ليهو عايزا اشتغل هنا ، قال لي اتأخرتي شديييد الشواغر كلها اتملت و تم توظيف 4 أنفار ، قلت ليهو انت بس وريني المدير وين ! رجاءً خليني أقابلو ! قال لي تمام عايني الباب داك لزيهو و أدخلي ، طبعاً كان باب جنب مطبخ المطعم داخل في زاويه ، ضربت الباب ضربه خفيفه و دخلت لمن سمعت صوت قال : اتفضل ، طبعاً أنا كنت متخيلاهو راجل كبير بما إنو صاحب المطعم بس طلع ولد شاب كدا ! قلت ليهو السلا عليكم ، بعد رد علي السلام و قال لي اتفضلي قعدت و قلت ليهو انت المدير صح ؟؟ قال لي شايفه شنو ! قلت ليهو لا بس عشان كنت متخيله المدير حيكون راجل كبير في السن ، ابتسم و قال لي يعني المدير دا إلا يكون راجل كبير ! هزيت ليهو راسي بس بمعنى لا ، طبعاً طلع راقي و عندو ذوق طلب لي مويه و عصير ، قلت ليهو حـ ادخل ليك في الموضوع ، بتعرف واحد اسمو مجدي ؟؟! قال لي مجدي محمود ولا منو ؟؟ قلت ليهو لا مجدي الجزولي ، قال لي ياهو مجدي محمود الجزولي ، دا البساعد الناس و بوفر ليهم وظائف ، قلت ليهو ايوه كان منزل بوست عن المطعم حقك و.......الخ و عشان تلفوني اتسرق ما قدرت أتواصل معاهو و أعرف الحصل فـ جيت بنفسي ، قال لي والله نحنا الشواغر كلها إتملت ، قلت ليهو ما حـ تخسر حاجه لو أضفت نفر واحد ، أنا محتاجه شديد للشغل دا ، قال لي طيب انتِ حصل قبل كدا اشتغلتي في مطعم أو فندق ؟! قلت ليهو لا بس اشتغلت في مكتبتين ، و اشتغلت مسجله في مركز صحي ، و اشتغلت في السوق ببيع حاجات بسيطه ، بس صدقني بعرف اشتغل أي شي و ما حـ تندم لو وظفتني ، قال لي طيب درستي شنو ؟؟طلعت ليهو الرقم الوطني و شهادة الميلاد و قلت ليهو صراااحة صراااحة غير الأوراق دي ما عندي شي و عارفاها ما بتأكلني عيش ، أنا ما واصلت تعليمي بس بعرف اتصرف و أتقن و أجيد أي شغل أمسكو ، ضحك و قال لي والله ما عارف اقول ليك شنو !!مشكلتك مشكله يا بت الحلال !!
قلت ليهو انت بس جربني و ما حـ تخسر حاجه صدقني ، و لو عايز ممكن اشتغل شهر من دون مرتب عشان أثبت ليك جدارتي ، قال لي ما لكن انتِ أكيد محتاجه القروش دي ! قلت ليهو ايوه محتاجاها بس ما عندي مانع اتنازل عنها عشان أقنعك بجدارتي !رجااااءً وافق و صدقني ما حـ تندم و لو يوم شفت مني تصرف غلط بتقدر تطردني طوالي من دون ما تديني ولا قرش!
سكت مسافه و قعد يعاين لي و أنا بعاين ليهو بكل ثقه بعدها قال لي تمام ، طبعاً فرحت فرح شديييد ، أخيراً بعد محاولات كتيره في إني ألقى شغل أخيراً لقيتو و اتوظفت ، بتمنى المره دي ما تحصل معاي أي مشكله تخليني أنطرد أو أخلي الشغل ، قلت ليهو بالجد شكراً كتيييير ليك ! قال لي ما تشكريني بس اشتغلي كويس ...
#بطل_الحكايه4
مها حولي الزاكي
قالوا لي ما عارفنها والله ، دخلت غرفة النوم لقيتها ماف ، لما طلعت برا لقيتها قاعده في الحوش بتعاين للسماء ، وصلتها و ختيت يديني على أكتافها ، إتلفتت علي مخلوعه ، قلت ليها دي أنا ، قاعده هنا براك ليه ؟! قالت لي ساي ، قلت ليها لا لا أكيد في شي ، قالت لي بزهج ماف أي شي و طوالي وقفت على حيلها و دخلت جوه ! في البدايه استغربت بس تاني قلت يمكن حكاية العرس دي مزعلاها و عامله ليها عقده نفسيه ! لمن دخلت جوه ما لقيتها قاعده في الصاله مع البنات ، دخلت جوه غرفة النوم اتغطت و إتلفتت على الحيطه ، ناديتها و قلت ليها أحكي لي يا منار مالك بس ما ردت علي فـ خليتها و قلت حـ اسألها و افهم منها الحاصل لمن تروق شويه ، رجعت للبنات عشان نكمل سهرتنا بس بالي كان مشغول بـ منار ، ما بحب أشوفها زعلانه ، ما بحب أشوف أي بت من بنات الميتم زعلانه أو مهمومه ، لو علي أسعدهم كلهم و أخلي الضحكه ما تفارق وشوشهم ، تاني يوم لاقيت مس نادين في الحوش ، طبعاً للحظات خفت انها تكون شكّت إنو في منوم في العصير ، قالت لي عصيرك الأمبارح سممممح خلاص ، ليه ما جيتي شلتي الجك 😏
قلت ليها خليتو ليك عشان تاني لمن أعمل عصير حـ أجي انقص ليك منو ، قالت لي النص بالنص ، قلت ليها أكيد تااااني كل ما أعمل عصير صدقيني ما حـ انساك ، قلت كدااا و دخلت جوه و أنا بضحك عليها ، سناء قالت لي مهاااوي تعالي هنا و قولي لينا امبارح عملتي شنو لـ مس نادين ؟؟... قلت ليها ولااا شي ، ليلى قالت لي كيف يعني ولاااا شي و انتِ و رماح كنتوا بتعاينوا لبعض و تضحكوا ؟! عملتوا شنو قولوا ؟!... طبعاً كويس إني أمبارح ما حكيت ليهم إنو أنا و رماح لما مشينا البقاله غشينا معانا الصيدليه و اشترينا منوم و عملت منو في العصير ، طبعاً من صحينا مشيت نبهت رماح و قلت ليها ما تحكي لأي زول بالحصل أمبارح ، قالت لي مستحيل اتكلم لأني اتورطت معاك و لو مس نادين عرفت إنو كان في منوم في العصير حـ تضبحنا و لو بابا حازم عرف ما حـ يحصل خير لأنو عملتنا دي بطاله شديد و ما سبقنا عليها زول !... طبعاً أنا اتطمنت من ناحيتها لأنها بتخااااف و مستحيل تحكي لزول بس كنت حابه اتأكد.... طبعاً ليلى كانت شاكه إنو في شي بس ما قدرت تعرف ، المهم بعد الفطور بكري الشوم جا و قال لي أستاذ حازم بناديك ، طبعاً استغربت و قلت ليهو غريبه بابا حازم الجابو شنو و هو كان هنا أمبارح و مفروض ما يجي إلا الثلاثاء الجايه !
المهم لمن مشيت ليهو في مكتبو لقيت معاهو مس نادين و واحد كدا من مدراء الدار ، قلت ليهم السلام عليكم و أنا بعاين لـ مس نادين ، ردوا لي السلام ، بابا حازم قال لي أول أمبارح انتِ كنتِ وين ؟!
طبعاً هنا فهمت إنو مس نادين حكت ليهو ! المره دي هي المشت و شكتني و قبل ما اتعشى بيها اتغدت بي ، عشان كدااا أول امبارح ما عاقبتنا و قالت لينا ادخلوا جوه ! بتردد قلت ليهو طلعت ساي كدا ، قال لي مشيتي وين و متين و استأذنتي من منو ؟!
هنا سكت سااااي ، قال لي بتكلم معاك أنا ما تسكتي قولي لي مشيتي وين !
قلت ليهو ما مشيت مكان محدد لفيت قريب من هنا و جيت راجعه ، قال لي الفتح ليك الباب منو و استأذنتي من منو ؟!... طبعاً ديك كانت أول مره يتكلم معاي بنبره حاده ، قلت ليهو ما استأذنت من زول ، نطيت بالباب و جيت راجعه بنفس الطريقة ! قال لي ما عارف أقول شنو والله!! إذا انتِ البت بتنطي بالحيط و الأبواب الأولاد الهنا و الحراميه يعملوا شنو ! الراجل المعاهو ضحك و قال لي انتِ شكلك مشاغبه ! بابا حازم قال ليهو مشاغبه شديد و متهوره كمان ! مس نادين قالت ليهو مشكلتها عنيده و ما بتسمع الكلام و قدامك حـ اقولها ليك أكتر من مره عاقبتها و أكتر من مره شاكلتها بسبب تصرفاتها دي بس كأني بنفخ في قربه مقدوده ! و طبعاً دي ما أول مره ، مها دي ياما عملت مصايب ، شي نطيط بالحيط و شي سرقة قروش و شي كسر أقفال و سرقة مفاتيح و فوقها كذب و دراما ! والله البت دي أنا مهما اتكلمت ليك عنها يا أستاذ حازم ما حـ تصدقني عشان وش البراءه الهي مركباهو دا !... طبعاً أنا بقيت اعاين ليها بغييظ وترتني و شرت غسيلي كلو قدام بابا حازم و الراجل المعاهو ! رغم إني اتوترت بس حاولت أكون ثابته ... طبعاً هي بتتكلم و بابا حازم بعاين لي كأنو بقول لي معقوله الكلام دا كلو عنك !!
لمن مس نادين سكتت الـ 6 عيون كلها اتوجهت علي ! طبعاً ما قدرت أنكر و أكذب ، مس نادين ما حصل شكتني لبابا حازم و يمكن دي أول مره يسمع عني كلام زي دا ! حصلت لحظات صمت كسرها صوت ضحكة الراجل القاعد جنب بابا حازم ، قال لي معقوله انتِ بتعملي الحاجات دي كلها ! مس نادين قالت ليهو و أفظع من كدا يا أستاذ أنور ! البت غلبتني والله و لو ما كدا ما كان جيت و شكيتها و مشكلتها بعد دا كلو خاته اللوم علي أنا و شايفاني ظالماها و عايزا اسيطر عليها ، هسي بت بتعمل عمايل زي دي في زول بقدر يسيطر عليها ! الرااجل تاااني ضحك و قال لي عندك مستقبل مشرق في عالم الإجرام ، طبعاً
ساعتها حـ تقولي شنو لـ بابا حازم ، قالت لي حيييا أنا منكم ! ياهو الفضل أجي و احجزكم ! أول ما مس نادين مشت مع سناء أنا طوالي دخلت غرفتها و بقيت أفتش على المفاتيح بسرعه ، طبعاً بفتش و بعاين في الباب ، رفعت اللحاف لقيت مفاتيح ، مشيت بيهم على الدولاب ، فتحتو و فتشتو ضلفه ضلفه بس ما لقيت أي مفتاح !! برضو فتحت الأدراج و قلبتها فوقاني تحتاني بس ما لقيت شي !! غضبت غضب ! رجعت لـ ورا و قلت الشومه دي داسه المفاتيح وين ! طبعاً مع رجعتي دي ضربت الدرج و فوقو كان في مزهريه و مع ضربتي إهتزت و مالت بالجنبه و كانت حـ تقع بس إستعجلت و مسكتها و عدلتها و مع عدلتي ليها دي سمعت صوت مفاتيح جواها !! طوالي زحيت الورود الصناعيه الفيها و قربت أزغرد لمن لقيت المفاتيح !.... شلتهم و شلت شويه من القروش اللقيتهم في الدولاب ، رجعت كل حاجه لـ مكانها و رتبت الغرفه و بقيت مارقه ، طبعاً ما نزلت تحت إلا لمن شفتها جات راجعه و دخلت غرفتها ، لمن جيت نازله البنات كانو بعاينوا لي ومنتظرني أبشرهم ، رفعت ليهم المفاتيح و قلت ليهم نجحناااا ، قعدوا يصرخو قلت ليهم هسسس هسي حـ تجينا راجعه ، طبعاً دي كلها كانت خُطه مني ، خليت فدوى و منى يمثلوا إنهم اتشاكلوا شُكله كبيره ، ليلى قالت لي قفلت منكم التلفزيون و ريحتكم و قالت ماف وحده تفتحو ، يعني عملتو خطه عشان تجيبو المفاتيح بس قفلو منكم التلفزيون 🤣🤣
قلت ليها قفلتو بـ مفتاح ! أكيد ما حـ نسمع كلامها و حـ نفتحو !
رماح قالت لي لكن يا مها هي شددت و نبهت علينا و قالت ماف وحده تفتح التلفزيون و قالت لينا لو جيت فجأه كدا و لقيتكم صاحين و التلفزيون فاتح حـ تتعاقبو كلكم و قالت التلفزيون حدو الساعه 9:30 بعدها يتقفل طوالي !!
سكت مسافه بعدها قلت ليهم حـ نعمل العايزنو ، اتهورت و من دون ما اتأكد جريت ليلى على جنب كدا و قلت ليها على فكره أنا عارفه ليه بكري بخليك تدخلي و تطلعي على كيفك من دون ما زول يشوفك ، عارفه البير و غطاها ، طبعاً إتخلعت و ملامح وشها اتغيرت ، عاينت حولينها و قالت لي بتقولي في شنو انتِ !؟ إبتسمت و قلت ليها أنا ماف حاجه بتفوت علي في الميتم دا ، و عشان اختصر ليك يا تساعديني يا تساعديني لأنو لو قلتي لا حـ أختك في راسي و أفضح الداساهو لـلكل ، فكت يدها مني و قالت لي بطلي هبل ، قلت ليها كويس ، أمشي نومي هسي عشان بكرا يومك حيكون طويل و مليان عقوبات و تحقيقات مع مس نادين ، غمضت عيونها بغضب و قالت لي قولي عايزا شنو !؟
طبعاً كدا ياداب أثبتت لي إنو فعلاً في شي بينها و بين بكري الحارس ! قلت ليها عايزا أمشي البقاله ، كلمي بكري يخليني أطلع ، قالت لي فترتي من النط ؟! ما كنتِ عامله فيها سبايدرمان !! قلت ليها بما إنو لقيت طريقه ساهله و مختصره ليه أتعب نفسي و أقعد انطط بالباب !!
المهم مشيت فتحت المطبخ و شفت الحاجات الناقصه ، قلت للبنات ماشه البقاله و جايه ، رماح قالت لي حـ أمشي معاك ، قلت للباقين اعملوا الشاي و باقي الحاجات الموجوده و اعملو حسابكم نادين ما تشوفكم لحد ما أرجع ....
المهم ليلى مشت كلمت لينا بكري و هو زي الشاطر فتح لينا الباب ، مشينا و جينا ، لقينا البنات جهزوا نص الحاجات ، عملت عصير شلتو و قعدت بيهو في الصاله ، فجأه مس نادين جات نازله و البنات خافوا و اتكبكبوا ! جات وقفت قصادي و قالت لي دا شنووو دا !!؟ قلت ليها عصير 💁
نططت عيونها و قالت المطبخ !! المفاتيح !!؟
طوالي جرت على المطبخ و لقتو مقفول ، جرت غرفتها و لقت المفاتيح موجوده ، جات نازله و قالت جبتو العصير دا من وين ؟؟
قلت ليهو عملتو أنا , و العصير ما إلا يتعمل في المطبخ ، قلنا نتونس و نشرب عصير ، قالت لي تشربوا السم ان شاء الله جيبي الجك دا ، طبعاً شالتو و شالت معاهو الكبايه و مشت بيهم غرفتها ، البنات بقوا يعاينو لـ بعض و هم ما فاهمين حاجه ، لمن رماح جات نازله من فوق قعدنا نضحك و ديل ما فاهمين شي ، سناء قالت أنا زهجت و فترت لو كان مشينا و نمنا نوم ينفعنا كان أحسن ، قلت ليها حـ تفوتك حلااااة سهره ، قالت لي انتِ بتحلمي يا مها !؟
قلت ليها لا ، ثواني بس ...
قمت من مكاني و مشيت فوق لـ غرفة مس نادين ، دقيت ليها الباب شديد ، جات فتحتو بزهج و قالت لي أكسريهو عليك الله أكسريهو !! شوفي انتِ و المعاك ، والله تجو تاني و تضربوا لي الباب دا إلا أسود عيشتكم ، قلت ليها آسفه بس عايزا العصير ! أنا خلطتو من قبيييل و جهزتو عشان نشربو زي الزمن دا و بمزاج ، المنقا دي نحنا دقينا ليها شير عشان نجيبها و نخلطها ، عشان كدا ممكن أدخل أشيلو ؟! ضيقت عيونها و قالت لي متين طلعتو من هنا و مشيتو جبتو المنقا دي !؟ قلت ليها رسلنا بكري الصباح ، دخلت جوه و جات راجعه و هي شايله الجك ، قالت لي شربت نص و باقي لي نص الله يقدرني عليهو ، كبت منو في كبايه و شربتو قدامي و قالت لي حق الناس دا سمح سمااااحه و قعدت تضحك ، قالت لي تعالي الصباح عشان تشيلي الجك ... و هو فاضي ....