Telegram-канал ethiopian_orthodox - የኦርቶዶክስ አስተምህሮዎች: Unsorted

የኦርቶዶክስ አስተምህሮዎች

11 November 2025 12:57

✞ንብ ሁኑ ዝንብ አትሁኑ!

አንዳንድ ሰዎች በቤተክርስቲያን ውስጥ በሚመለከቱት ትክክል ያልሆኑ ነገሮች እጅግ ሐፍረት እንደሚሰማቸው በማዘን ይነግሩኛል። ለነዚህ ሰዎች እንዲህ ብዬ እነግራቸዋለሁ:- ዝንብን “እዚህ አካባቢ አበቦች ይታዩሻል” ብላችሁ ጠይቋት።
ዝንቧም “ ስለ አበባዎች አላውቅም። ነገር ግን እዚያ ጋር ትልቅ የቆሻሻ ክምር አለ በዚያ የምትፈልጉትን አይነት የሚሸት ቆሻሻ ታገኛላችሁ” ብላ ትመልስላችኋለች። ካስፈለገ ስለ ቆሻሻው ዝርዝርና በቦታው ስለሚገኝ ንጹህ ያልሆነ ነገር በቂ ማብራሪያ ትሰጣችኋለች። ንብን ደግሞ “በዚህ አካባቢ ንጹሕ ያልሆነ ቆሻሻ ቦታ ታውቂያለሽ” ብላችሁ ብትጠይቋት “ ቆሻሻ? በጭራሽ! እዚህ አካባቢ አይቼም አላውቅም! ይህ ቦታ እጅግ ውብ በሆኑ ቆንጆ መዓዛ ባላቸው አበቦች የተሞላ ነው” ብላ ትመልስላችኋለች። በአትክልት ስፍራውና በሜዳው ስላሉ አበቦች ውበትና ዝርዝርም ትነግራችኋለች። አስተዋላችሁ? ዝንብ የምታውቀው ቆሻሻንና ቆሻሻ ያለበትን ቦታ ነው ንቢቱ ግን ውብ አበቦች እና ሰናይ መዓዛ ያለበትን ቦታ ነው የምታውቀው።
አንዳንድ ሰው እንደ ዝንብ ነው። አንዳንድ ሰው ደግሞ እንደ ንብ። እንደ ዝንብ የሚያስቡት በሁሉም አጋጣሚ የሚያዩት መጥፎውን ሲሆን በመጥፎው ሃሳብም ቀድመው የተሞሉ ናቸው። መልካም ቢኖር እንኳ አይታያቸውም። ንቦቹ ግን በሚመለከቱት ነገር ውስጥ ሁሉ መልካሙን ያያሉ። ስሑት የሆነ እና በጎ ሕሊና የሌለው ሰው ሁሉን ነገር ስሑት አድርጎ ያስባል። ሁሉንም ነገር በመጥፎ መንገድ ይመለከታል። በጎ ሕሊና ያለው ሰው ግን ምንም ዓይነት ነገር ቢመለከት ምንም አይነት ነገር ብትነግሩት መልካምና ቀና ሀሳብን እንደያዘ ይቀጥላል።

አንድ ጊዜ የሆነ የከፍተኛ ትምህርት ተማሪ ወደኔ በዓት መጣና በበሩ ላይ ባለው የመጥሪያ ብረት አንኳኳ። በወቅቱ በርግጥ ብዙ ደብዳቤዎችን እያነበብኩ ቢሆንም ምን እንደፈለገ ወጥቼ ለማየት ወሰንኩ። “ ምን ፈለግክ የኔልጅ?” አልኩት። “ የአባ ፓይሲዮስ በዓት ነው?” ሲል ጠየቀኝ። አክሎም “አባ ፓይሲዮስን ላገኛቸው እፈልጋለሁ” አለኝ። “በርግጥ የአባ ፓይሲዮስ በዓት ነው ነገር ግን አባ ፓይሲዮስ ሲጋራ ሊገዛ ወጥቷል” ስል መለስኩለት። “ የሆነ ሰው ሊረዱ ነው የሄዱት በርግጠኝነት” ሲል መለሰልኝ። “አይ ለራሱ ነው የሚገዛው ሲጋራውን” አልኩት። “የነበረውን በሙሉ አጭሶ ጨርሷቸዋል። ሲጋራ በጣም ነው የሚወደው። እኔን እዚህ ብቻዬን ትቶኝ ነው የሄደው መቼ እንደሚመለስ እንኳን አላውቅም። የሚቆይ ከሆነ እኔ ራሱ ጥዬ መሄዴ ነው” አልኩት። የተማሪው ዐይን እንባን አቅርሮ ውስጣዊ ስሜቱን አሳበቀበት። ነገር ግን አሁንም በበጎ ሕሊና እና በቀና ሀሳብ “አባ ፓይሲዮስን እንደኔ ያለነው ነን ያሰቃየናቸው” ሲለኝ “ ቆይ ለምን ልታገኘው ፈለግህ” አልኩት “ቡራኬ ልቀበል ነው” አለኝ “ አንተ ሞኝ ከእርሱ ምን አይነት ቡራኬ ነው የምትጠብቀው ለራሱ የተታለለ ሞኝ ነውኮ! እኔ በደንብ አውቀዋለሁ። በርሱ ውስጥ ምንም ጸጋ እግዚአብሔር የለም። ይመለሳል ብለህ እሱን በመጠበቅ ጊዜህን አታባክን ጠጥቶም ሊሆን ይችላል የሚመጣው በጣም ጠጪም ነው በዛ ላይ” አልኩት። ይህንን ሁሉ እየነገርኩት ሁሉ ያ ወጣት ልጅ አሁንም መልካም ማሰቡንና በጎ ሕሊናውን አልጣለም። በመጨረሻም “ ይኸውልህ እኔ እስኪመጣ ጥቂት እጠብቀዋለሁ ምን ልንገርልህ ንገረኝና ሂድ” ስለው “ የምሰጣቸው ደብዳቤ አለ በዚያም ላይ ሲመጡ ቡራኬ ተቀብዬ ነው የምሄደው” ብሎ ከነገርኩት ከዚህ ሁሉ ቆሻሻ ውስጥ መልካም ነገር ብቻ እንዴት እንዳየ ተመለከታችሁ? ምንም ያህል መጥፎ ነገር ብነግረው በመልካም ሀሳብ ነበር የሚወስዳቸው። ስለ ሲጋራ እንኳ እየነገርኩት አይኑ እንባ አቅርሮ “የሆነ ሰው ሊረዱ ሄደው ነው” ብሎ ያስብ ነበር። ብዙ የተማሩና ታላላቅ ነገሮችን ያነበቡ ሰዎች እንኳ የዚህን ወጣት ተማሪ ያህል በጎ ሕሊና የላቸውም። መልካም ሀሳቡን በመጥፎ ስታጠፉበት ደግሞ ሌላ በጎ ሀሳብ ይፈጥርና በዚያም ተመስርቶ በጎ ድምዳሜ ላይ ይደርሳል። በርሱ በጣም ተደነቅሁ እንዲህ ያለ ነገር ሳይ የመጀመሪያዬ ነው።

ንብ እንሁን ዝንብ አንሁን!

ቤተ ክርስቲያን የኖህ መርከብ ናት በውስጧ ርግብም እባብም አለ። ቀና ልቡና ከሌለን እንዴት ከእባብ ጋር አብረን እናገለግላለን ብለን ከመርከቧ ይውረዱልን የሚል ትንቅንቅ ውስጥ መግባታችን አይቀርም። እንደ ዝንብ ካየን ብዙ መጥፎ ነገሮች ከፊት ለፊታችን ተደቅነው ቤተ እግዚአብሔር መመላለስ ሁሉ ልንጠላ እንችላለን። ቅዱስ ዮሐንስ አፈወርቅ እንደሚለው ወደ ኖህ መርከብ የገባ እባብ ሲወጣም እባብ ነው። ወደ ቤተክርስቲያን የገባ የእባብ ልብ ያለው ሰው ግን ሲወጣ ተለውጦ የጠቦት ልብ ይኖረዋል። ወደ ኖህ መርከብ የገባ ቀበሮ ከመርከቡ ሲወጣም ቀበሮ ነው። ቤተክርስቲያን የገባ የቀበሮ ልብ ያለው ሰው ግን ሲወጣ የበጎች ልብ ይዞ ነው የሚወጣው። ምናልባት እነዚህ ቀበሮዎችና እባቦች ቤተክርስቲያን ገብተው ያልተቀየሩት እኛ የሚቀይር ማንነት ስለሌለን ይሆናል። እግዚኣብሔር የነርሱን ድክመት ያሳየን እንድንጸልይላቸው ይሆናል።

ንብ እንሁን ዝንብ አንሁን!

ልቡናችን ካልነጻ መልካሙን እንኳ ብናይ አንዳች ክፉ ማግኘታችን አይቀርም። ምን የተቀደሰ ቦታ ብንቆም እንደደመና ከከበቡን ቅዱሳን ይልቅ ደካሞች ላይ ዐይናችን መሄዱ አይቀርም። እንደ ዝንብ ካየን ቆሻሻው ዙርያችን ሞልቷል። ዐይናችን ይቀየር ዘንድ ልባችን ይነጻ ዘንድ ከምንወቅሳቸውና ነውር ነቀፋ ከምናወጣላቸው በላይ እኛ የጌታችን ይቅርታ እና መሐሪነት የሚያስፈልገን ደካሞች ልንሆን እንችላለን። በነገር ሁሉ መልካሙን እንፈልግ። በቆሻሻ መሀል አበቦችን እንፈልግ። በበጎ ሕሊና በፊታችን እንደ ደመና የከበቡንን የጸኑትን ቅዱሳን በማሰብ በፊታችን ያለውን ሩጫ እንሩጥ!

ንብ እንሁን ዝንብ አንሁን!

(ከአባ ፓይሲዮስ መንፈሳዊ ምክር ሦሥተኛ መጽሐፍ የተገኘ)

@Ethiopian_Orthodox
@Ethiopian_Orthodox