64545
قناة لنشر كتاباتي في مختلف المجالات
كلاكيت مرة رقم عشرومية نفس السؤال ونفس الإجابة.
⬅️ هو الدولار الجمركي مش زاد؟ يبقي كده سعر السلع يزيد صح؟ التكلفة هتزيد عليه دلوقتي صح ولا لأ؛ اعترف يا بن سامي يا أحمد موسي (اه والله اتقالي أحمد موسي 😂).
*️⃣ يا جدعان من ناحية التكلفة هتزيد فهي هتزيد؛ بس التكلفة الحالية مهياش العامل الوحيد؛ المهم المنافسة ازاي في المجال دا؛ دخول البضايع الجديدة سهل ولا صعب... تاجر شاري ب 70 واتجمرك ب 50 ممكن يضطر يبيع بخسارة عشان المنافس بتاع مكانش عنده بضاعه وراح اشتري ب 50 واتجمرك ب 50 فهيبيع ارخص منه؛ فالحل التاجر دا يبيع بخسارة عشان يعرف يشتري بضايع تاني ويستمر والا يقعد جنب بضاعته لغاية ما الدولار يجيب 70 تاني بقي.
*️⃣ مجال مفيهوش منافسه او صعب اصلا تجيب سلعه؛ محدش هيروح يستورد صفقة ثلاجات ولا شحنة عربيات... دول عادي يقدروا يستمروا شوية بالغالي لغاية ما بعضهم يخلص ويروح يشتري وينافسهم فيجبروا ع النزول.
*️⃣ الدولة بقي عندها خدمات زي البنزين والكهرباء والغاز والسولار والأدوية وبعض السلع الاستراتيجية؛ دي كانت بتيجي ب دولار ب 30 وتتجمرك ب 30 هتبقي 50 و 50 يعني زيادة 60% في التكلفة... السلع دي هتخضع لقرار سيادي... ممكن الدولة تقرر تتحمل فارق التكلفة وتموله من خدمة دين... ممكن تقرر تمرر جزء من الزيادة وممكن تمررها كلها...
*️⃣ مستبعد ان يحصل تمرير لكامل التكلفة عشان التضخم هيضرب وهما صدعونا كلام خيالي ان هدفهم محاربة التضخم 😂 وأنا هعمل نفسي مصدق دا وهقول إنهم مش هيمرروا الزيادات دي عشان التضخم 😁.
*️⃣ فالموضوع أكبر من التكلفة اللحظية كام؛ التكلفة هتزيد عالتجار في الشحنات الحالية قولاً واحداً؛ كان شاري بضاعة ب 60 او 65 او 70 او 75 ويتجمرك ب 31 وفجأة الجمارك بقت 50 يعني تكلفة الشحنة القادمة للتاجر أغلى من المتوقع؛ لكن لكن لكن... في منافس ليك رايح يشتري ب 50 ويتجمرك ب 50... هااا هتقعد جنب بضاعتك؟؟
*️⃣ وملحوظة التاجر مش خسران؛ في مغالطة كبيرة شغالة وهي؛ يعني اشتري ب 70 وابيع ب 60 حتي واخسر 10؟.. لا انتا غلطان ومش عاوز أقول مدلس وكذاب... انتا شاري ب 1 دولار وبايع ب 1.2 دولار يعني كسبان عالدولار يعني هتقدر تستورد كمية أكبر... مينفعش مستورد يفكر بالجنية عشان هو مش بيستورد بالجنية... انتا بتستورد بالدولار فبتسعر بالدولار؛ كان الدولار ب 30 كان ب 50 كان ب 100 انا ببيع السلعة دي ب 1 دولار ب 2 دولار احسبوا الدولار بكام وادوني فلوسي.
*️⃣ طبعاً كلامي هنا عن المستورد او الايد الأولى اللي فوق؛ لكن تاخده وتروح لصاحب كشك ولا سوبر ماركت تقوله رخص الأسعار فانتا كده بتستهبل... هو ملوش فيه... اللي فوق هيزود فهو هيزود وراه؛ فوق هيقلل السعر فهو هيقلل وراه... البياع اللي انتا بتتعامل معاه ملوش ذنب تقوله الدولار والجمارك ووو... هو بيتعامل مع مورد أكبر منه والمورد بيتعامل مع الموزع الأساسي والموزع مع المستورد... اللعبة من فوق لتحت؛ من الكبير للصغير... بس انتا مش هتتكلم غير علي بتاع الخضار وبتاع الفراخ عشان دول قدامك.
*️⃣ اه ملحوظة أخيرة؛ مفيش حاجة اسمها الدولة سايبه المستورد يرفع السعر ليه؛ مفيش طريقة تجبره؛ هتعمل تسعيره جبرية لكل السلع في مصر يعني؟ ترجع للعهد الناصري اللي السلع يتقال سعرها في الراديو؛ ودا السعر في الأرض لو لقيت السلعة أصلاً... ونقف طابور عالجمعية عشان نجيب فرخة بالسعر بتاع الحكومة الوهمي دا ونقول 100-100 ولا فراخ الجمعية ونلبس كلنا نفس البدلة الصيفي النص كم في الشغل ونفس بيجاما البيت وكده... الدول ليها اليات لظبط الأسعار والسوق لكن مش من بينها انها تروح للتاجر تقوله رخص السعر انتا كسبان كثير.
*️⃣ طبعاً هحتاج أوضح إن الدول مش يتتدخل في السلع الغير أساسية؛ لكن الأساسية (زيت سكر دقيق أرز أدوية وغيرهم) الدول أحياناً بتدخل وممكن تظبط الأسعار بآليات معينة... ولو الدولة حبت تعمل تسعير كويس بتعمله بس دا بيكون بطريقة معينة زي تحديد المدخلات ودعمها؛ مهو عشان تتحكم في سعر البيع وتسعره يبقي لازم تتحكم في المدخلات؛ تديله أسعار خامات بسعر محدد وكهرباء وغاز ومياه ونقل وتخزين وشحن ووو... لكن تقول هحدد سعر البيع ومش هتدخل في المدخلات؛ السلع هتختفي وأصحاب المصانع هيقفلوها او هيقللوا الإنتاج لتقليل الخساير او هيقولك المصنع مغلق للصيانة 😁.
صباح البوست وجمعة مباركة عليكم
دا بقي اللي هو حرفيا اسمه جشع التجار
رغم اني بحارب الكلمة دي بمفهومها الشعبي اللي هو الناس بتتعامل ان التاجر مفروض جمعية خيرية
لكن لو حصلت زيادة زي كده بعد التعويم والتدبير فدا هو حرفيا توصيف جشع التجار
مفروض الاسعار تعمل ثبات لكام اسبوع ثم تبدأ رحلة الهبوط
ودا المتوسط العام؛ في سلع بسرعة هبطت بالفعل وفي سلع خلال اسابيع وسلع تانية خلال شهور زي ما قولت في الايف إمبارح.
لكن زيادة وكمان 45% ليييه؛ هنستعبط 🤔🤔🤔
حتي الادوية فدي لازم تاخد قرار وزاري عشان تزيد لانها بتتعامل بالرسمي اه لكن + قرار تسعير وزاري
تعالوا نطلع لايف الساعة 6 وربع ع اليوتيوب ونقعد نص ساعة نرغي شوية
وهشوف ازاي اخليه برضك مسجل (اول مرة لايف عاليوتيوب في حياتي 😂)
عشان اللي ميلحقش فعادي يلاقيه موجود
اللينك اهو
https://www.youtube.com/live/dcU_uekUrA0?si=QjTp0kzMMa0UGmEC
معلش شوية غرور معلش وهنقل البرنامج ال 10 خطوات اللي قولت عليه في البوست السابق ؛ هنقل رقم 2 كده (الحكومة هتتوصل لاتفاق مع صندوق النقد الدولي وتستغل نزول الدولار وتعمل التعويم.) اييييه دنيا... الوحيدة اللي قلشت هي ان الكروت كانت اخر خطوة بس فتحوها دلوقتي عشان العامل النفسي وعشان الدولار في الكروت عليه 10% رسوم تدبير... حد يعمل مينشن لصديقنا مدير البنك بتاع التعليقات اللي قال مش هيحصل تعويم خليه يقلب كلامه ويحدثنا عن اهمية هذه الخطوة 😂😂😂
Читать полностью…
اقتراح للبنك المركزي يساعده في إدارة التعويم
طلع قرار زيادة 50% او 75% في ليميت مشتريات الدولية للكريديت كارد
القرار دا هيسمع شعبياً انه الحق ياض الراجل معاه فلوس وبيفكها اهو... فدا يساهم في الحرب النفسية اللي هي من اهم أدوات التعويم لمكافحة الدولرة.
لكن فعليا انتا مش هتدفع دولار زيادة لانه الدولار زاد 50% والبنوك معظمها حاسب الليميت بالجنية 😂😂
فتبقي سمعت في السوق ان معاك فلوس وبتبعزق؛ وفي نفس الوقت مطلعتش فلوس زيادة 😂
بعد عودة الفيسبوك
انتم متخيلين لو الفيسبوك مرجعش؛ او بلاش فيسبوك
تخيلوا كده وقت زي أيام الثورة بدون انترنت؛ أو أيام انقطاع الكابلات البحرية من 15 سنة كده
يااااه؛ في ناس مش هتبقي عارفة تعمل إيه في يومها؛ فجأة هتلاقي فراغ مهول هيحصلها ووقت مش عارفة توديه فين
طبعاً في ناس زي حالاتي مش هتلاقي تاكل؛ حرفياً لإن شغلي أونلاين 😂؛ فدا مجرد تخيل بس تخيل.
والله تعبت اوضح ان دي من مبادئ الاقتصاد الطبيعية واللي بيحصل في مصر طبيعي جداً مهواش مختلف؛ بس الناس حاسه ان مصر حالة مخضوضة بسبب قناعتنا ك مصريين اننا مختلفين مع ان الف باد اقتصاد هي nobody is different... القواعد بتمشي علي الجميع... شوية وقت ومجهود بس
Читать полностью…
الإنهيار اللي حصل إمبارح والنهاردة في الدولار الفعلي والرقمي ودولار الصاغة والمؤشرات كلها
تخلينا نتوقع بكره سهم CIB هياخد في إيده البورصة ويغطس 😂
ويخلينا نقول يا تري يا هل تري ايه هيحصل بكره في الأخضر الرسمي 🤔
يا خبر النهاردة بفلوس بكره يبقي بفلوس أكثر برضك؛ مفيش ببلاش خلاص 😂😂😂
دليل بن سامي لتوقع أسعار أي سلعة في السوق مستقبلاً 😁😁
*️⃣إمتي الأسعار هترخص؟ هو التاجر اللي اشتري بضاعة وسعرها ب 60-70-75 ممكن يبيعها بخسارة ويرخص؟؟؟
*️⃣ دا السؤال اللي تقريبا من الكبير للصغير في مصر بيتكلموا فيه؛ تليفزيونات وقهاوي ومذيعين ومسئولين وغير مسئولين كله... وأنا نفسي جالي السؤال دا عشروميت مرة 😁. فتعالوا نجاوب السؤال دا سوا أووو زي ما متعودين نفكر في الأسعار والتجار والدنيا شغالة إزاي.
⬅️⬅️⬅️ في البداية تعالوا نتفق علي 3 نقاط أساسية بدونهم يبقي بنضحك على نفسنا.
1️⃣ سعر الدولار يستقر؛ عارف بوستات بتاعة هو ليه التجار يسمعوا السعر طلع يزودوا الاسعار؛ لكن ينزل مش بينزلوا... نفس الناس دي تلاقيها حاطه بوستات برضك تقولك دا نزول وهمي وخداع وكام يوم وهيطلع تاني... طيب حضرتك نفسك مقتنع إنه هيطلع تاني يبقي ايه 🤔🤔... العقل الجمعي والشعبي في مصر بقي مقتنع إن الدولار صاعد؛ شعب وتجار وكله وإلا ليه الناس شايلة دولار/ذهب ومباعتوش وتخلصت منه طالما شايفاه نازل؟ مهو لو مقتنع إنه نازل يبقي هتحفظ بحاجة هتنهار ليه؟ هو انتا مش تخلصت من الجنية عشان شايفه بينهار؟ يبقي مفروض دلوقتي تتخلص من الدولار طالما مقتنع انه نازل ومكمل نزول والتجار ليه مش مقتنعين بدا 😂😂... نتكلم جد بقي... استمرار الدولار في النزول او الاستقرار مثلاً ب 50 هيخلي التجار تقتنع وتنزل الأسعار مهو خلاط بيطمن انه هيعرف يجيب بالسعر دا... ونقطة يعرف يجيب دي تودينا لرقم 2.
2️⃣ يكون متوفر... ايوا الدولار ب 50 و 49 و 48 يا سيدي بس فين؛ يعني من شهر كنت تقول 70 بس نوعاً ما متوفر؛ عاوز تلم 100 ألف هتعرف؛ مليون دولار هتتعب بس هتلم... لكن دلوقتي ب 50؛ ماشي فين؟ البنك مش بيوفر للمستوردين؛ والسوق السوداء مقتولة بسبب القبضة الأمنية فمفيش تداول للدولار فعلياً بالبلد ودا من أسباب الهبوط لإن الناس مش لاقيه مشتريين؛ كله خايف يلبس 7 سنين 😂... فتوفر الدولار مهم؛ ومقصدش سوق سودا... البنك يا سيدي لو دبر للمستوردين ب 55 حتي فالأسعار هتنزل.
3️⃣ميحصلش تغيرات جانبية؛ سعر السلع بيأثر عليه الدولار دا صحيح؛ بس برضك بيأثر عليه سعر البنزين والسولار والغاز والضرايب والجمارك والرواتب والتأمينات والفساد والرشاوي وسعر الشحن الدولي ورسوم التأمين والموانئ والاجراءات الحكومية وو... فلازم البنود دي تستقر... متقوليش نزلت لك التكلفة عالقطعة 10 جنية بس البنود الثانية زادت فزودت التكلفة 12 جنية يلا بقي رخص الأسعار 😂😂 لا حضرتك هتزيد 2 جنية 😁
⬅️⬅️⬅️ دلوقتي هنفترض ان الدولار مستقر ب 50 ونازل ومتوفر بسهولة ومفيش أي تغيير في البنود الجانبية ونكمل البوست سوى
⬅️⬅️⬅️ تعالوا نقسم السلع في البلد ل 3 أقسام أساسية ونشوف ايه هيحصل في أسعارها؛ ولاحظ بس المسميات اللي هقولها دي من اختراعي؛ مش علمية يعني لكن توصيفية.
1️⃣السلع الحرة المرنة: ودي نوع سلع غير استراتيجية وملهاش كبير يعني قوي؛ دلوقتي تخيل معايا تاجر بيبيع لاب توب سعره عالمي 1000 دولار ومسعره على 75 يعني عارضه في مصر ب 75 ألف جنية... هو بقي مقرر مش هينزل وهيستني دورة الفلوس... قشطة تمام هييجي تاجر تاني منافس يجيب نفس الاب توب ويقولك هعرضه علي 55 ألف ما انا بشتري الدولار ب 50... فالثاني يبيع؛ ويشتري جديد ويبيع ويشتري ويبيع... والأول قاعد جنب الاب توب بتاعه منتظر يبيعه... غصب عن الأول هيروح منزل السعر ويبيع بخسارة اول مرة عشان يعرف يدور شغله وإلا هيقعد جنب بضاعته. فالنوع اللي بسميه (حرة مرنة) أسعاره هتنزل هتنزل بلا نقاش. أما يعني ايه حرة مرنة فهتفهمها من رقم 2
2️⃣السلع المحتكرة: دي بقي نوعية سلع تانية ليها كبير؛ في النقطة رقم 1 كان التاجر قاعد جنب بضاعته ومنافس قاعد يشتري ويبيع... لكن في حالتنا هنا الوضع مختلف... السلعة دي محتكرة يعني ليها كبير؛ سواء واحد أو مجموعة... يعني مش هيخش حد يروح يجيب ويضربهم في السوق فيجبرهم ينزلوا السعر... النوع دا هيفضل يبيع بالغالي ولما يبيع بضاعته ويروح يشتري جديد هيبقي في الجديد بقي يخفض السعر... واه هيخفض السعر؛ لان مفيش تاجر اصلا بيحب السعر العالي لإنه بيقلل الربح... الناس فاهمه غلط بتحسبها انه شاري ب 50 وبايع ب 100 يبقي كسبان 50 يعني 100%... لا حضرتك التاجر مش بيحسبها بالحته؛ هو بيقول بكسب 50 وببيع 100 يعني بكسب 5000... فلو السعر قل وبقي مكسب 30 هبيع 200 يعني هكسب 6000 يبقي انخفاض السعر وزيادة المبيعات أحسن...
✳️ فالنوع المحتكر بقي هيثبت الأسعار ويبيع بتسعيره العالي 70 و 75 وبعدين يجيب شحنة يبيعها ب 65 وبعدين شحنة 60 ثم 55 ثم 50... طيب ليه مينزلش من 75 ل 50... الاجابة سهلة؛ عشان مجرد تنزيل السعر ل 65 هيزود البيع ؛ فليه ينزل مرة واحدة ل 50 ويفقد اللي مستعدين يشتروا ب 65 😁 نبيع لهم وننزل للي عاوزين 60 ثم 55 ثم 50... هو فاتح بيزنس مش جمعية خيرية...
الرئيس أكد النهاردة وصول جزء من الفلوس المتفق عليها وقال إن الباقي هيوصل يوم الجمعة
✳️ مفيش توضيح كام وصل وكام هييجي الجمعة بس مش فارقه؛ مفروض الاتفاق إن هييجي 10 مليار دولار الأسبوع دا وهيتم تحويل 5 اضافي من ديون مصر للإمارات الي جنية مصري بسعر البنك
✳️ فيا تري يا هل ترى الإمارات هتغير بكره 15 مليار دولار بسعر البنك ال 30.85 ولا السعر الرسمي هيتغير 🤔 الله أعلم بس ممكن يكون دا (دعم الأشقاء ) اللي اتقال عليه وهو إنهم هيغيروا فلوسهم عالسعر بتاع البنك.
في تحديث نزل عالبوست السابق للي مش واضحة معاه الصورة
Читать полностью…
*️⃣ وأنا صغير كنت بتضايق قوي؛ هو ليه بابا مش بيلاعبني وأحضان وتلزيق كده زي بعض الأقارب؛ دا أنا عندي صور لعيد ميلادي بنفخ الشمع فيزق وشي ألبس التورته؛ والدي عنيف هههههههههه بس لما كبرت عرفت إنه كان صح؛ لو كنت كبرت وأنا عيل بلعب مكنتش قرأت واتعلمت.
*️⃣ لولا اللي هو عمله مكانش زماني بكتب؛ مكانش زماني بقرأ بنهم وأبحث عن مواضيع غريبة ومختلفة؛ شئت أم أبيت بس اللي بيعمله أهلنا فينا بنحصده لما نكبر؛ الله يرحمك يا والدي فات 18 سنة ولسه فاكر اليوم اللي أختي الصغيرة صحتني من النوم ألحق يا محمد اصحي بابا مات؛ تقريباً كانت محاولة من إيناس أختي إنها تقتلني بالأزمة القلبية بس فشلت... حد يصحي حد كده في الدنيا.
*️⃣أسف للإطاله؛ كنت داخل أكتب سطرين بس ولقيت نفسي كتبت كل دا... البوست دا كله اتكتب من مرة واحدة في أقل من ساعة يمكن عشان بكتب من قلبي ومن الذاكرة؛ مواقف كثير كتبتها وأنا بفتكرها وأبتسم وأدمع في نفس الوقت... ياااه عالذكريات... يا ترى البطريق أرسلان ابني واخته الكبيرة لولي هيفتكروني كده؛ مظنش الصراحة.. الأجيال الجديدة غير القديمة؛ دول أجيال التربية الإيجابية الحديثة؛ وكمان إحنا مش أهلنا. هو أنا أقدر أجبر عيالي علي كوباية لبن يومية مثلاً 🤔
أسألكم الدعاء له بالرحمة
انا جالي عشروميت مرة من صحابي والتعليقات والرسايل نفس السؤال وهو (يا بن سامي في رأيك المرة دي جد ولا تهويش)... صراحة كنت برد علي صحابي بس عشان بخاف؛ لكن هقول علني الرد.
1️⃣ بصوا منطقياً بكل الحسابات العقلية الموضوع جد المرة دي مش تهويش؛ مش ممكن يطلع رئيس وزراء دولة يقولك الدولة الثانية اللي ليها عندنا 11 مليار دي مش هتاخدهم 😁 وميكونوش متفقين؛ لو حصلت تبقي انتا في عالم سمسم.
2️⃣ الجانب الإماراتي نفسه طلع بيان يوضح فيه تفاصيل كثير وقال بالفعل إن في 35 مليار دولار فالموضوع تصريح من الطرفين.
3️⃣ السوق السوداء مشلولة؛ القبضة الأمنية الرهيبة ماسكه السوق؛ أنا وانتا وكل الكوكب عارف إن المركزي كان بيشتري من السوق عشان يسدد القروض؛ واحنا مش عارفين دا عشان احنا عفاريت شطار؛ لا خالص لكن عشان رئيس الجمهورية قال دا مرة بنفسه... فدلوقتي كمائن في كل مكان فالسوق السوداء مشلولة؛ فكده مفيش حركة... التهويش كان ايه فكر كده معايا؟ كان تخوف الناس فتروح تبيع فرجالة الدولة يلموا لها الدولار بالرخيص... لكن دلوقتي هما قافلين السوق السوداء ضبة ومفتاح؛ دا لو واحد مسافر ممكن يخاف كمين يقبض عليه عشان معاه دولار 😂... فكده لو حد هيلم للمركزي مش هيعرف... فمعنى دا إن البلد قالت اقفل لي السوق دا مش عاوزينه خلاص... يبقي كده في مصدر تاني للفلوس خلاص ومش عاوزين اللي بننزل نجمعهم دول.
4️⃣ المدة الزمنية قصيرة؛ يعني قايلين هيوصل 10 خلال أسبوع؛ فصعب قوي تكون عامل خطة وهتتكشف خلال أسبوع لما متطلعش تقول الفلوس وصلت أو ميظهرش أي بوادر في أي مجال ظهور الدولار... يعني عاوز تكذب يبقي بتعلن عن خطة ومتزنقش نفسك في مواعيد... الصفقة دي غير معروف مساحتها ولا شكل البيع ولا المشروع ولا طريقة التنفيذ ولا القوانين ولا أي ابن لذينا غير ان في فلوس مبلغ كذا خلال مدة كذا... كان سهل يتشال التوقيت؛ مجاتش عليه يعني ومحدش هيستغرب مهي كل التفاصيل مجهولة 😁.
بس يا سيدي واظن زهقتكم بوستات متتالية بس الرسايل كثير ومش هقدر اواصل الرد الفردي.
طيب نشيل الرأي الشخصى جنب ونتخيل سوا ايه السيناريو اللي مفروض بقي مصر هتمشي عليه خلال الشهور القادمة؛ وهكتبه مفروض بالترتيب... وكلامي هنا هو التخيل من وجهة نظر الدولة (مرة كده أبقي كيوت).
1️⃣ السوق السوداء هتخاف وتنزل زي ما بيحصل دلوقتي.
2️⃣ الحكومة هتتوصل لاتفاق مع صندوق النقد الدولي وتستغل نزول الدولار وتعمل التعويم.
3️⃣ مع وصول ال 10 مليار دولار الدفعة الاولي يتم توزيعها ما بين بضايع في الموانئ متكدسة وبين شركات البترول ومستلزمات انتاج (تدبير يعني) ودا بعد التعويم بالسعر اللي هيكون وقتها.
3️⃣ ايوا 3 تاني عشان مفروض بالتزامن مع التعويم يعني المركزي يرفع الفايدة كمان مرة؛ وممكن ينزل شهادة استثنائية 30% أو 35% للي عنده مدخرات دولار وهيبدلها في البنك ل جنية (بسعر التعويم وموجودة من قبل القرار).
4️⃣ مصر هتتوصل لاتفاقية مع الاتحاد الأوروبي بخصوص ال 10 مليار يورو وشكل وصولهم والمشاريع اللي هيخشوا فيهم ودا هيعمل ثقل إضافي للاقتصاد.
5️⃣المؤسسات الدولية تحبنا بقي وتقول كده الالتزامات اللي عليكم بتقل والدنيا فل؛ وتحسن التصنيف الائتماني لمصر ونرجع تاني لملعب ال B وان كان في اخره عالباب.
6️⃣دا هيفتح لمصر باب الاقتراض بالسندات وهنقترض 5 او 6 مليار قبل نهاية السنة الحالية.
7️⃣ مصر هتتوصل اتفاقيات إقليمية زي ان الكويت تأجل ال 4 مليار دولار بتوعها؛ والبنوك المحلية هتأجل ال 7 مليار دولار بتوعهم؛ قدا هيخفف الضغط أكثر.
8️⃣في نفس الوقت ممكن الدولة تبيع بعض الأصول والشركات الاخرى وتدخل لها 4 او 5 مليار دولار كمان؛ وتشوف مؤسسات دولية زي البنك الدولي وبنوك افريقية وأسيوية وبنك البريكس وناخد لنا 5 كمان.
9️⃣ التدفقات العالية دي هتعمل ثبات هتشجع المصريين في الخارج الي إعادة التحويلات للبنوك ودا هيساعد البنوك في حل عجر صافي الأصول
🔟 البنوك تبدأ في فتح الليميت للكروت زي ما كانت؛ هي علي مدي الشهور السابقة هتبدأ تفك الكيس شوية؛ لكن مع وصولنا للخطوة 10 خلاص تفكها.
*️⃣ بس خلاص وصلنا نهاية 2024 و هتبقي 2025 زيها وممكن 2026... وبعد 2026 ملناش دعوة باللي هيحصل عشان البوست يفضل جميل كده 😂😂
⬅️⬅️ ملحوظة
دا الترتيب المنطقي والمفروض؛ اختلاف نقطة هيبوظ الباقي؛ يعني موصلتش لاتفاق مع الصندوق يبقي مش هيتحسن تصنيفك؛ معملتش تعويم وأصريت تكمل البنك ب 31 فمش هتفتح الكروت ولا هتقدر تدبر للجميع بالسعر دا ولو الحكومة مدتش فلوس للاستيراد والشركات البترول فدا هيعمل مشكلة وهكذا... عشان محدش يقول بن سامي قال... بن سامي بيتخيل انه اعلامي مصري وطالع يقولكم الخطة النظرية؛ ايه هيتم معرفش بس يا رب اللي فوق يتم.
يعني نقعد منتظرين بيان مجلس الوزراء ساعتين وفي الاخر يطلع زي الصورة كده
محدش يقولي يعني اتقال ايه؛ هو زي الصورة كده 😁
وعلي صعيد اخر؛ يقال الحكومة قررت ايقاف تخفيف الاحمال في رمضان عشان نعرف نشوف المسلسلات اللي اتصرف عليها مليارات دي 😂😂 ونبقي نعوض القطع دا بعد رمضان ان شاء الله
إمبارح كتبت هنا في تليجرام قولت البنوك مفروض تعمل حركة صايعة هدفها نفسي وهي إنها تقول هنزود الليميت؛ دي تسمع في البلد ان خلاص البنوك معاها دولار ولا يهمها. فدا ينفع في الحرب النفسية ضد السوق السوداء والناس تقول البنوك خلاص لعبت معاهم 😁.
✳️ لكن فعليا البنوك معظمها حاطط الليميت بالجنية؛ فلما يزود الليميت بالجنية هيرجع للي كان عليه؛ وكمان البنك مستفيد لان الدولار ابو 50 جنية هيبيعه ب 55 في الكروت 😂.
✳️ بعد نشر البوست لقيت خبر المركزي قال للبنوك افتحوا للناس تاخد نفسها في الكروت 😂😂😂
✳️ والنهاردة بنك CIB اعلن زيادة الليميت؛ ونشوف مع بعض كده
⬅️⬅️ سابقاً
1️⃣ فئة برايم 2000 جنية بدون سفر يعني 59 دولار و 15 الف في السفر يعني 441 دولار
2️⃣ فئة بلس 4500 جنية بدون سفر يعني 132 دولار و 30 ألف في السفر يعني 882 دولار
⬅️⬅️ حالياً
1️⃣ فئة برايم 3500 جنية بدون سفر يعني 64 دولار (زاد 5 دولار) و في السفر 25 ألف جنية يعني 454 دولار (زاد 14 دولار)
2️⃣ فئة بلس 7500 جنية بدون سفر 136 دولار (زاد 4 دولار) وفي السفر بقي 50 ألف يعني 909 دولار (زاد 27 دولار)
✳️ مش محتاج أقارن باقي الفئات البنكية؛ دا البرايفت نفسهم (اللي رصيدهم لا يقل عن 20 مليون جنية) كانت كروتهم في السفر 100 ألف جنية (2941 دولار) بقت 175 الف (3181 دولار) يعني زودوهم 240 دولار مرة واحدة 😁😁
✳️ أصحابي المقربين بيقولوا لي إنتا جاسوس للبنوك 😂 ؛ لكني بقولهم إن الموضوع بسيط؛ العقليات عندنا من العصر البنكي الحجري 😁 محفوظة قوي ولو ركزت شوية هتعرف تفكيرهم ماشي إزاي وهتعرف ترسم لهم الخطوات في المجال البنكي؛ الموضوع أبسط ما تتخيلوا يا جدعان 😂 مفيش ب ربع جنية إبداع يعني
في انتظار باقي البنوك 😂😂
ملحوظة
الكريديت كارد بس؛ الديبيت مش شغال؛ ومش متوقع يشتغل قبل شهرين ثلاثة عالأقل صراحة كتقدير شخصي.
البث المباشر للي محضروش ومدته ساعة بس اتكلمت فيه عن الدولار والسوق السوداء والأسعار هترخص إمتي والسلع والاجهزة والذهب والعقارات وكل حاجة
هو نصه الاسئلة بتتكرر وبعيد الإجابات؛ بقول إفرض مكانش حاضر من الأول؛ فمش لازم تشوفوه كله منعاً للملل 😁😁
https://www.youtube.com/live/dcU_uekUrA0?si=o5q5uc4ugiwWV3d7
منهم 300 الف طن بصورة عاجلة؛ عشان تعرف فال 300 الف دي يعني استهلاك مصر في شهر؛ دا خبر كويس وايجابي ويعني طرح الكمية دي دفعة واحدة في السوق ان سعر السكر هيستقر وهيبقي متاح؛ اكنك زودت شهر بس في يوم... دي نوعية الاخبار اللي تعمل مردود سريع (لما تتنفذ مش بس تعلن)
Читать полностью…
تيجوا النهاردة اخر اليوم اطلع لايف نرغي في التعويم
يكون اليوم خلص والبنوك قفلت
لسه معرفش يومي هيمشي ازاي بس بفكر استثناء اعمل لايف كده نرغي بجد
بعيد عن والمؤامرات وكده... يعني يوم 23 فبراير نزلت بوست قولت دول ال 10 خطوات اللي هيحصلوا... احنا كده وصلنا الخطوة 3 هنتكلم في الباقي
دا البوست القديم
/channel/BnSamyPosts/1091
وقولوا لي لو فعلا ظبط معايا الوقت تحبوا الايف الساعة كام؟ 6 او 7 مثلا؟ ويكون علي اليوتيوب ولا فيسبوك ولا برنامج ايه (انا مليش في الايف والفيديو لاني بتاع كتابة فمحتاج نصايح)
يعني اقعد اكتب بوست كبير شحط محط
اشرح فيه الدولار ليه نزل من 73 ل 53
وليه طلع من 53 ل 63
ثم ليه هبط من 63 ل 42
وليه طلع ل 48 في 3 ايام
وبقول فيه ان في 3 خيارات اما الاول اجراءات وتعويم خلال ايام
او الثاني مش هنعمل شيء وهنلبس 50 ثم 55 ثم 60
وقبل ما ادوس نشر
الدولة تعلن رفع الفايدة 6% والتعويم
وراح البوست مش هنشره 😂😂😂
يا ظلمة
البلد كلها كانت متوقعة تعويم النهاردة لأسباب كثير زي ان الفلوس وصلت (ال 10 مليار دولار) وطلعت مصطفي كمان حول فلوس وغيرها
*️⃣ فبدأ من ليلة الخميس عملية تخلص عنيفة من الدولار؛ السعر نزل من 50 يوم الخميس ل 42 و 41 كمان صباح اليوم الأحد... كله بيقول التعويم النهاردة.
*️⃣ حتى أنا كتبت وقولت سهم CIB هينهار (شكلي وحش قوي لما محصلش الانهيار 😂😂).
*️⃣ بعدين بدأ اليوم؛ البورصة صعدت عاادي وسهم CIB نزل 2% بس ودا كلام فارغ لان كده الدولار في السهم (شهادة الايداع الدولية) متسعر حوالي 54+ جنية مقابل مفروض الدولار بالسوق ب 42 جنية..
*️⃣ فضل السوق منتظر منتظر؛ ومع نهاية يوم العمل بالبنوك الناس قالت يبقي شكلها مفيهاش تعويم؛ إنذار كاذب إنذار كاذب؛ يلا كله يلم عزاله
*️⃣ فالناس رفعت سعر الدولار فالدولار طلع 42 ثم 43 ثم 44 دلوقتي والدولار الرقمي رايح ل 45 وطالعين...
*️⃣ المشكلة ان الأسواق شغالة بما يعرف بالنبوءة ذاتيه التحقق؛ يعني الخوف من الهبوط بيخلي الناس ترمي بسرعة خوفاً من المزيد من الخساير... بيع ب 45 قبل ما يبقي ب 43... فالناس كلها تبيع فيبقي ب 43 فناس أكثر تخاف تقولك الحق بيع ب 43 قبل ما يبقي ب 41 فيحصل دا بالفعل وهكذا
*️⃣ والعكس برضك في الصعود برضك هيؤدي لمزيد من الصعود خوفاً من فوات الفرصة... اشتري ب 42 قبل ما يبقي ب 44؛ فيطلع بسبب الشرا ل 44؛ اشتري ب 44 قبل ما نشوفه ب 47 وهكذا.
*️⃣ دا باختصار هو سبب صعود وهبوط الدولار اخر 5 شهور؛ بعد تجاوز الدولار ال 40 جنية فخلاص الموضوع بقي مشاعر شعبية مش وضع اقتصادي؛ هااا شايفينه هيجيب 50؛ خلاص جابها؛ متوقعين 60؟ جابها؛ متوقعين 70 🤔 تم... ايه دا خايفين من راس الحكمة وشكله هيقع ل 60 و 55؛ عنيا حصل ووقع... طيب شكلها فنكوش يبقي الحق اشتري قبل ما يكسر ال 60 صاعد... تم وحصل... الحق دا طلع في فلوس بجد وشكلهم هيعملوا تعويم الحق بيع؛ هوبا يقع... شكله مفيش تعويم الحق اشتري قبل ما يطلع؛ فيطلع...
*️⃣ بس يا سيدي وأخواتنا بتوع الاقتصاد السلوكي قاعدين تلاقيهم فطسانين من الضحك وهما شايفين اول صفحة في أي كتاب عندهم بتحصل في الحرف في السوق المصري وفينا 😭😭.
*️⃣ في وسط الفوضي ولعب العيال دا مفروض الناس تاخد قرارات مصيرية؛ تشتري السلعة ولا استني هترخص ولا هتنقص وتزيد... تشتري الذهب ولا تبيعه... تتوسع في اشغالك ولا تنكمش وتقفل؛ تشتري عقار ولا تستني... مفروض ناخد قرارات في الحضانة الاقتصادية دي 😔😔.
*️⃣ لله الأمر من قبل ومن بعد وكان الله في عون كل واحد عاوز يخطط لبكره في حياته أو شغله في مصر 😔😔😔
من الأمور اللي هتأثر بشكل حاسم في سرعة تحسن الأسعار في السوق هي دخول البضايع المتراكمة في الموانئ؛ بضايع قيمتها الحقيقية تتجاوز ال 300 مليار جنية واقفة... دا هيحل كثير من غلاء الأسعار
✳️ في سلع كثير غليت مش عشان الدولار؛ لكن عشان مفيييش؛ ناقصة في السوق... اه ارتفاع الأسعار يخلي الطلب يقل للنص مثلا لكن السلعة بقت معروضة الربع؛ فبقي الموضوع أشبه بمزاد عليها... عندك سلعة كان بيكون متوفر منها 400 ل 400 زبون بقي متوفر منها 100؛ مزاااد بقي ومهما لعبت في تكلفتها مش هيتغير حاجة؛ خلاص هي خرجت بره معادلة التسعير ودخلت مزاد...
✳️ تخيل كده عندك طن حديد وسعره 60 الف؛ جالك 2 زباين كل واحد عاوز طن؛ الاول قالك خد 60 وهاته فالثاني قالك لا خد مني 65 واديني انا؛ فالأول قال لالا خد مني 70 الف وهاته ليا؛ فالثاني يقول لا 75 مني... فالاول ينسحب فتبيع للثاني ب 75 ألف...
✳️ ييجي حد قاعد عالانتريه يقول التاجر دا جشع مفروض يبيع الطن دا ب 60 ألف؛ ايوا يبيعه لمين فيهم؟ يعمل قرعة ويختار؟؟؟ عارف امتي هيبيع ب 60 الف؟ لما يبقي عنده 2 طن؛ فهيدي كل واحد الطن اللي هو عاوزه ب 60 ألف... لكن طول ما معندوش غير طن واحد فخلاص انسي ال 60 الف دي... سعر الطن هيبقي هو اقصي سعر يقدر اي واحد من الإثنين يدفعه.
✳️ زي الدكتور اللي بيخلي الفيزيتا ب 2000 جنية؛ الناس تقول جشع؛ هو هيكشف علي 10 اشخاص بس في اليوم وبالفعل بييجي له 10 زباين كل واحد يدفع 2000 يعني 20 ألف ... خليه بقي طيب وهيقول لا هخلي الفيزيتا ب 200 بس... بقي ييجي له 100 مريض؛ لكنه برضك هيكشف علي 10 بس؛ يعني برضك هيعالج 10 بشر بس؛ تخفيض السعر مخلاش ناس أكثر تتعالج لإنه في النهاية عنده سعة قصوي وهي 10 بس... الاختلاف الوحيد ان الأول كان بيروح وهو معالج 10 أرواح وفي جيبه 20 ألف جنية؛ بقي دلوقتي برضك عالج 10 أرواح لكن اخد 2000 بس...
✳️ بالمناسبة عارف امتي تقول على الدكتور دا جشع؟ لما يكون يقدر يكشف علي 15 لكنه بيخلي الفيزيتا ب 2000 فييجي له 10 زباين ويقعد فاضي؛ لكن لو نزلها ل 1500 هييجي له ال 15 المطلوبين؛ يبقي هو هنا جشع لانه رافض يقلل السعر وعنده سعة استقبال وبيضيعها... يعني أكن التاجر عنده 2 طن حديد وقرر يخفي طن منهم ويخلي المعروض 1 طن بس عشان يحصل المزاد عليه ويبيعه بالغالي... هنا بس اسمه جشع.
✳️ فدخول ال 300+ مليار جنية بضايع للسوق هيزود المعروض؛ هتلاقي السلعة عند فلان وعلان وترتان... هيبقي في شوية تنافسية فدي تسبب انخفاض السعر... لإن ببساطة التاجر هيبيع بأقصي سعر يلاقي زبون ليه... فكل ما تنقص السلعة تلقائي تغلي؛ وفر السلع هتقل الأسعار.
✳️ لكن طول ما البضايع ناقصة في البلد؛ ابقي قابلني
3️⃣ النوع الثالث السلع ذات الدورة الانتاجية وبها عجز... تعالوا نفكر في مجال ليكن اللحوم والدواجن... حصلت كارثة في الشهور السابقة وهي نقص الأعلاف؛ نتيجة نقص الأعلاف في مربيين كثير خرجوا من السوق وتخلصوا من إنتاجهم... دلوقتي نفترض العلف توفر وبسعر كويس فهل دا هيخفض السعر؟ الإجابة هي لا...
✳️ المشكلة هي إن الإنتاج 100 وفي 200 زبون؛ هخفض السعر هيفضل انتاجي 100 والزباين هيبقوا 250 فمش هعرف أبيع غير ال 100 اللي عندي... فالتاجر أو هنا نقول المربي هيعمل حاجتين؛ هيستفيد من انخفاض سعر التكلفة لتعويض خساير سابقة وتحقيق ربح يعوضه... ويبدأ يربي جيل أكبر بقي... فلو قولنا وفرنا حالا العلف بسعر كويس وكثير؛ حالاً النهاردة 1 مارس؛ هل الأسعار هترخص؛ الإجابة لا... لما المربيين يوسعوا التربية بالاعلاف المتوفرة؛ الدواجن أمرها بسيط يعني 40-50 يوم هتلاقي الدورة الجديدة دخلت السوق والأسعار هديت... لكن هتبقي مشكلتك في الثروة الحيوانية؛ الابقار و الجواميس دول اللي خسرته واتذبح منهم تعويضه محتاج فترة طويلة؛ فبعد شهور وربما سنة هتلاقي تحسن (متنساش ال 3 شروط بداية البوست يستمروا سنة)
⬅️⬅️⬅️ في البوست دا عملت لك دليل تعرف تفكر فيه بمستقبل السلع؛ النقاط ال 3 الشروط بداية البوست شوف ايه وضعهم؛ بعد كده بص عالسلعة وفكر دي مرنة وفي تنافسية فيها ولا محتكرة ولا ليها دورة إنتاجية وعجر في السوق... فتقدر تعرف بكره والاسابيع والشهور القادمة سعر السلعة دي هيحصل فيه ايه.
مفاجأة البوست موجود صوت بعد غياب كبير سنتين
بودكاست جوجل
https://bit.ly/49vIhrK
وبودكاست سبوتيفاي
https://bit.ly/3V6CJ2q
وقريباً هفكر في موضوع بودكاست أبل عشان دا ب 10 دولار 😂
في 3 نوعيات للبنوك في مصر في التعامل فتح حسابات بغير العملة المصرية؛ يعني عندك حساب مصري عادي بس تقوله عاوز افتح حساب دولار استرليني يورو ريال دوهم الخ الخ
1️⃣ بنوك بدون ما تروح؛ من الابلكيشن بضغطه واحدة تفتح حساب بعملة ثانية... من البنوك دي QNB
2️⃣ بنوك تروحلها تقولها عاوز افتح حساب بعملة ثانية؛ من الفرع الموظف ياخد بطاقتك وفي اقل من 3 دقايق يقولك الحساب اتفتح؛ ومن البنوك دي HSBC و EG Bank مثلاً
3️⃣ بنوك تروحلها يفتح معاك تحقيق؛ حساب مش بالمصري ليه؛ هييجي لك فلوس منين؛ وعاوزين اثبات وعقد مع شركة أجنبية او صور اقامة وأوراق قرايبك اللي بره دول ووو... وهنا طبعاً البنوك الحكومية وبنك اسكندرية وغيرهم.
أنا مقتنع إن رأس الحكمة هيطلع لها قوانين خاصة لإدارتها لإن موضوع التقدم والاستثمار الأجنبي مش بس فكرة تبني قصور؛ رأس الحكمة هتبقي Free Zone يعني بيتم استهداف تيجي شركات أجنبية تفتح فيها... فتخيل الشركات الأجنبية وموظفيها تيجي تتعامل مع البنوك المصرية والجهات الحكومية المصرية 😂😂... مستحيل؛ وبرضك مستحيل يتم تطوير الجهات الحكومية والبنكية المصرية لإنك بكده هتطور حياة المصريين؛ فالحل إن رأس الحكمة في يوم ما يطلع لها قانون خاص لإدارتها بحيث يتم تسهيل حياة الأجانب ورجال الأعمال والمستثمرين فيها من أجل إنجاح المشروع وحلم 8 مليون سائح إضافي والشركات الأجنبية وكده.
لا الصعود المتواصل طبيعي ولا النزول الغشيم طبيعي؛ دا إن دل على شيء فإنما يدل على إن في اندفاع عاطفي قوي في السوق
✳️ الصعود الطبيعي مثلا ان لو سلعة ب 100 تطلع ل 120 وبعدين يحصل جنبي ارباح وبيع فتنزل ل 110 وبعدين تطلع ل 130 وتنزل ل 122 مثلاً وبعدين تطلع ل 150 وتنزل ل 135 وهكذا والمثل في الهبوط
✳️ لكن اللي بيحصل في الأسواق في مصر يعني إنه اندفاع عاطفي ومضاربات؛ ايه دا طااالع خش اشتري بغباوة؛ اييييه دا نازل يالهوي بيييع بييييع.
✳️ فالجميل ان الناس الطايرة دي بتتخزوق دلوقتي وتخسر وتطلع من السوق خلي الوضع يبقي شوية طبيعي؛ شوية عالأقل يعني.
نزول البورصة إمبارح شيء طبيعي جداً لإنها كانت زايدة بسبب الدولار برضك؛ فطبيعي تعمل تصحيح معاه..
*️⃣ بص يا سيدي تخيل معايا كده شركة قيمتها 30 مليون جنية وعدد اسهمها مليون يعني السهم ب 30 جنية؛ والدولار ب 30 جنية... هوبا الدولار بقي 50 جنية؛ فهنا السهم بيطلع عشان يبقي ب 50 جنية زي الدولار؛ ولو مطلعش تبقي الشركة معروضة للبيع اقل من قيمتها... فالاسهم في البورصة المصرية خلال اخر 6 شهور شهدت صعود 50-100% فهل مثلاً أرباحها زادت كده؟ لا طبعاً دا عشان الدولار زاد من 42 ل 72... يبقي سعر السهم في مثالنا يطلع ل 70 جنية.
*️⃣ دلوقتي بقي هيحصل تصحيح؛ الدولار بيتراجع يبقي ايه؟ السهم هينزل ل 50 زي الدولار كده...
*️⃣ فاللي مستغرب ازاي بينهار أو اللي شوفتهم كاتبين ان الصفقة فنكوش بدليل انهيار البورصة؛ دول مش فاهم بيفكروا إزاي؛ دا لو منهارتش البورصة وفضلت الأسهم متقيمة كإن الدولار ب 70 يبقي في حاجة غلط مش العكس.
*️⃣ طبعاً كلامنا هنا لا يسري علي قطاع العقاري اللي شهد صعود صاروخي إمبارح هيكمل النهاردة طبعاً... والفترة القادمة طبيعي القطاعات المرتبطة بالصفقة هتصعد؛ والباقي ربنا معاه بقي.
وصباح الفل
زي النهاردة من 18 سنة والدي توفى؛ عشان كده من الصبح بحاول أكتب أي بوست جديد أو افنش أي بوست قديم من الدرافت ومش عارف؛ مش حابب يوم 25 فبراير ينزل فيه بوستات عادية حتى لو في الظروف دي.
*️⃣علاقتي بوالدي مكانتش علاقة بتاعة الطفل اللي بيجري على ابوه لما يروح يحضنه؛ لا خالص كنا بنخاف ونستخبي... بس بابا معايا أنا تحديداً هو سبب كل شيء بقيته.
*️⃣قبل عيد ميلادي ال 8 بابا اشتري لي أول مجلة؛ هو كان عارف إني بعرف اقرأ وبقى يشتري لي مجلات أسبوعية؛ وبعدها بقى يخليني أقرأ الجرايد وانا عندي 9 سنين.
*️⃣لما بقول أقرأ الجرنال فدا مش نظام القراية الحالية بتاعة العناوين؛ لا دا بابا كان بيرجع يسألني هو مبارك زار دولة ايه أقوله فرنسا طيب ورئيس فرنسا اسمه ايه ووو. وكان يجيب اطلس العالم واحفظ الدول والعواصم والأنهار. كان عندنا أطلس ضخم كده طباعة القوات المسلحة.
*️⃣بل في فترات كان يقولي هو الوزير الفلاني يقرب ايه للوزير العلاني؟ أقوله معرفش فيقولي يبقى مقرأتش الجرنال كويس أقوله لا قريته فيقولي لا؛ فأنا ك طفل أقوله طيب فين دا مفيش؛ فيقولي افتح صفحة الوفيات وشوف الخبر دا؛ فلان الفلاني يعزي في وفاة كذا والدة الوزير الفلاني وعمة الوزير العلاني. هااا شوفت بقى إنك مقرأتش الجرنال يا محمد صح... أقوله يعني صفحة الوفيات أقراها؟ قالي طبعاً دي تعرفك الصلات والقرابات والعلاقات بين الناس الكبار في الدولة.
*️⃣بعدين بدأ يديني مصروفي وهو 25 قرش يومي والجمعة إجازة مفيش مصروف ؛ فكنت باخد 150 قرش في الأسبوع بروح اشتري ميكي يوم الخميس ب 125 قرش؛ ولما بابا عرف إني بصرف كل مصروفي عشان اشتري ميكي فزود لي المصروف ل 50 قرش فبقيت اشتري ميكي وحاجة ثانية تكون سمير تكون علاء الدين الخ الخ.
*️⃣كبرت شوية ومصروفي بقى 5 جنية فبقيت بشتري كتب مهرجان القراءة للجميع اللي كان الحسنة الوحيدة لسوزان مبارك. وبعدين كبرت أكثر فزود المصروف ل 10 جنية فبقيت اشتري مجلات الكومبيوتر زي لغة العصر وكده.
*️⃣كان دائماً ياخدني معاه خروجاته مع أصحابه فألاقيهم قاعدين يتكلموا في مواضيع كبيرة مش فاهمها فأقعد ساكت؛ ثاني يوم أروح لبتاع الجرايد اللي بقى حافظني طبعاً أقوله في عندك حاجة في الموضوع الفلاني (اللي بابا وأصحابه كانوا بيتكلموا فيه) وأجيب الكتاب دا واقراه وابقى جاهز للخروجة القادمة عشان أبهرهم إزاي أنا فاهم...
*️⃣يتقابلوا بالفعل وهوبااا الاقيهم بيتكلموا في موضوع تاني فبرضك بعدها أروح لبتاع الجرايد وأجيب كتاب في الموضوع دا وهكذا... وللأسف لغاية ما توفي معرفتش مرة أنتصر عليهم عمالين يغيروا مواضيع الغلسين 😭😭.
*️⃣أروح مع بابا نشتري مثلاً من محل بتاع فول وطعمية أو حتى بتاع خضار ف واحنا ماشيين يسألني في موضوع ما اقوله معرفوش؛ فيقولي بتاع الفول كان فارش جرنال قدامه وهو بيحضر لنا الحاجة وكان دا العنوان؛ اتعلم عينك تلقط أي كلام؛ بصراحة لغاية اليوم لو روحت عند بتاع خضار عيني بتلقط الجرايد المفروشة تاريخها امتى والمواضيع لا إرادياً؛ نفس الفكرة وأنا سايق أقرى كل اليفط.
*️⃣وسنة 1999 قرر يشتري لي كومبيوتر وبعتني اتعلم الويندوز والورد والإكسل... معلش عارف حد هيقول ويندوز ايه بس... حضرتكم دا من ربع قرن فات؛ دا ويندوز 1998.
*️⃣ويوم الجمعة يناديني نطلع البلكونة ونلعب شطرنج ودائماً يغلبني؛ عمري ما عرفت أنتصر عليه أبداً ولا ماتش في حياتي؛ مبيفوتش خالص ليا عشان روحي المعنوية... هو كان ملوش في حوارات الروح المعنوية وجو الفرافير بتوع التربية الإيجابية والتحفيز... التحفيز عندنا كان بالجزمة قولاً وفعلاً .
*️⃣هي دي ذكرياتي عن بابا؛ معنديش ذكريات إني خارج اتفسح مع بابا وماسك ايدي ولا نلعب كورة سوى (أصلاً أنا عيل تخين من يوم ما اتولدت ومليش في الفرهدة وكنت بقضي الإجازة قراءة ومش بروح ألعب واتنطط؛ دا عاوز لياقي وأنا معنديش منها دي)...
*️⃣بابا كان بيهتم بصحتنا؛ كل يوم كل يوم طول ال 365 يوم في السنة لازم كل واحد فينا أنا وأخواتي نشرب ماج لبن سخن ومعلقتين عسل ومعلقة زيت حبة البركة؛ مفيش يوم يعدي ومفيش فرصة تقول لا؛ اللي يقول لا يتضرب علقة؛ بجد مش تهويش؛ قولت لكم بابا ملوش في التهويش؛ والعلقة يعني علقة يعني ممكن بجد تتضرب عشان مشربتش كوباية لبن... تتهزق ويتزعق لك عشان بقت 8 الصبح وانتا نايم أي يوم في ال 365 يوم في السنة؛ اه حتى في الصيف تصحي بدري.. لازم الأطفال تنام بالليل وتصحي مع بداية اليوم.
*️⃣يعني لو هفتكر خروجة فسحة مع بابا فهي كانت إنه ياخدني المسمط؛ اه بجد ياخدني المسمط وأنا عيل 10 سنين وأكل كوارع ولحمة راس ولسان؛ دي من أكثر الفسح المحببة لقلبي (بقولكم عيل تخين من يومي فهتكون ايه فسحته ليا يعني يوديني الجيم مثلاً؛ الراجل اكتشف حبي للأكل برضك).
بغض النظر عن الوضع الاقتصادي بس هو ليه الناس مش مستوعبة إن عادي اللي شاري دولار ممكن يخسر؛ عادي يعني؛ هو في وهم حصل حصل في عقولنا ان في حاجة اسمها الحفاظ علي قيمة الفلوس. وسيبك من الحاضر وهكلمك في الماضي.
⬅️ هو اللي معاه جنية مش خسر بشكل رهيب في 2016 و 2017؛ وخسر برضك في 2022 و 2023؟
⬅️ طيب هو اللي معاه دولار مش خسر من 2017 ل 2021؛ قعد 5 سنين سعر السلع بيزيد وسعر دولاره ثابت بل بيقل كمان كل سنة؟
⬅️ طيب سيبك من مصر؛ هو مش اللي شاري ذهب عالميا في 2011-2012 فضل خسران لغاية 2020 والكورونا لما الذهب رجع تاني لمستوياته؟
⬅️ وحتي اللي فتح شركة واشتغل في مصر 2022 و 2023 مش ممكن يكون خسر وبقساوة.
⬅️ حتي اللي بيشتري عقارات فنظرياً مش بيخسر لكن لو فكرت بنفس منطق اللي فوق فالعقارات بتزيد سنين وتثبت كام سنة ثم تزيد تاني وتثبت كام سنة وهكذا؛ في سنوات الثبات هو خسران مش كسبان.
*️⃣ اللي اقصده بس وعاوز البوست يتفهم صح؛ ان مفيش حاجة اسمها حد بيكسب دايما او يخسر دايماً؛ عالاقل عالمدي القصير وشبه المتوسط (لغاية 3 سنين) لكن لما تفكر بشكل أكبر؛ مستوي 5 و 10 سنين فبيظهر مين بيكسب ومين بيخسر ومين مش فارقه قوي.
*️⃣ بس كده بوست صغير وسريع وحابب الفكرة اللي أقصدها تتفهم؛ خد الفكرة ومتقولش يعني هو قصده الدولار بيترنح وهيوزعوه في منافذ التموين والجو دا... ولا إن الذهب مش عارف إيه ولا إن بكره هيزيدوا تاني... أنا بشرح فكرة عامة بغض النظر ايه الواقع. وهحاول أكتب كذا بوست بالمعني دا قريب يعني دردشة حول فكرة ما بغض النظر عن الواقع ايه.
هيدخل 24 مليار دولار والامارات هتتنازل عن 11 مليار بتوعها
طيب كده الكروت هتفتح تاني؟ اصل زمااان المركزي طلع قال ان في اساءة استخدام للكروت؛ ايام لما كل الكروت بتسحب بدون ليميت؛ وقال ان في يوم وصل السحب ل 55 مليون دولار 😂 مقابل 10 مليون دولار المتوسط المعتاد لاستخدام الكروت
طيب ايه بقي الكروت تفتح والدولار يبقي ب 40 جنية مثلا والاستيراد يشتغل والمصانع تدور وتحيا مصر والاسعار ترخص ووولا ايه 🤔🤔
نقول يا رب ونصدق ونعيش نفسنا في معضلة السد وخلاص بقي
ملحوظة
محبتش اقول المايه تكذب الغطاس عشان الجنية بتاعنا عنده مشاكل مع العوم 😁😁
قلش رخيص
نهاية 2022 كتبت بوست بعنوان "الرداءة" وكانت من أكثر البوستات مشاركة وتفاعل عالفيسبوك تجاوز 1300 مشاركة مباشرة غير اللي أخدوه كوبي ونشروه... البوست دا كان قبل اللي حصل في 2023 وكنت بحكي فيه إن الوضع الاقتصادي هيجبرنا على الرداءة وتقليل الجودة في كل شيء مش بس الأكل والشرب.
*️⃣من قبل كتابتي للبوست دا والكونسبت دا في بالي... لكن برضك أنا في شق تاني وهي الفرصة - فكل مشكلة هي في الأساس فرصة- فمن هنا كنت بدأت تجارب وتفكير في مشروع تاني... وبعدين جت سنة 2023 اللي كان تأثيرها قاسي جداً على شغلي "دكان تك" ومن هنا حسم الأمر إن المشروع الثاني يظهر للوجود...
*️⃣النهاردة جه اليوم اللي أعلن إطلاق تجريبي لموقع تاني وهو Rebuy-Box ... فكرته باختصار هي المرتجعات... اللي بيبيع أونلاين وخاصة مع أمازون عنده مأساة اسمها المرتجعات؛ العميل يشتري منتج وثاني يوم أو بعد أسبوع أو ساعات شهر يرجع له ويشتري غيره وغيره؛ بل إن البعض كان بيعمل قنوات مراجعة منتجات على حس أمازون يشتري ويعمل unBoxing وبعدين يرجع المنتج؛ بجد بيحصل دا.
⬅️ موقع Rebuy-Box هيكون دا دوره يعيد بيع المرتجعات عبر تجميعها من دكان تك و تجار آخرين ثم نقوم بعمل فحص للمنتج ومنحه تصنيف وبيعه بخصم مقارنة بالسعر الأصلي.
1️⃣تصنيف A ودا معناه ممتاز؛ المنتج دا شبه جديد؛ يعني منتج عميل فتح العلبة وبعدين معجبوش رجعه أو ربما استخدمه يوم والأداء مكانش اللي في باله أو حتى رجع في كلامه... التصنيف دا بياخد خصم مش كبير مقارنة بالأصلي لإنه فعلياً منتج شبه جديد.
2️⃣تصنيف B ودا معناه جيد؛ وهنا المنتج دا العميل استخدمه كام يوم أو العلبة بتاعته في حالة سيئة؛ لكن المنتج نفسه يعمل بكفاءة 100% مقارنة بالمنتج الأصلي... التصنيف بياخد خصم متوسط 20-30%
3️⃣تصنيف C ودا معناه مقبول؛ التصنيف دا يعني المنتج في حالة استخدام واضحة ومكثفة أي يعتبر مستعمل؛ أو حتى منتج جديد كلياً بس فيه خلل زي مثلاً سماعة بلوتوث EarBuds لكن في سماعة من الإثنين مش شغالة أو Hub فيه بورت مش شغال والباقي شغال... المنتجات دي بتاخد خصم كبير بيوصل ل 50% في بعض الأحيان.
*️⃣في البداية الموقع متخصص في اكسسوارات الإلكترونيات لكن تدريجي هيتاح فيه إن شاء الله منتجات أخرى غير الإكسسوارات
*️⃣الموقع لسه في المرحلة التجريبية وهيضاف المزيد من المنتجات قريب جداً 🔜؛ الموضوع بياخد وقت لإن مفيش منتج بيتعرض غير لما يتم فحصه فعلياً وليس ظاهرياً فقط بحيث نضمن الكفاءة وبعدين ندخل مرحلة التسعير اللي هي بتتغير كل يوم أصلاً في مجالنا بسبب الأوضاع الاقتصادية.
*️⃣الميزة في موقع ReBuy-Box هي حرية الإرجاع؛ يعني أي مكان في مجال الإلكترونيات هتلاقيه متضرر جداً من موضوع المرتجع لإن دا بيقلل قيمة المنتج... لكن ReBuy-Box الموضوع عااادي لإن أصلاً العلبة مفتوحة من البداية فعااادي اشتري ورجع براحتك ومش هتتكلف غير مصاريف الشحن
*️⃣الفارق الأساسي بين ReBuy-Box وبين إنك تشتري من OLX هو إنك بتتعامل مع شركة؛ مكان موجود هتقدر تروحله وترجع له المنتج وهتاخد ضمان معاه أقل شيء 3 شهور... لكن Olx هتقابل حد في مترو ومع السلامة لو طلع في مشكلة بخ خلاص.
*️⃣نوعية المنتجات وتوفرها هي أكبر تحدي عندنا؛ لما تكون شغال في منتجات جديدة سهل اللي يخلص هتروح للمستورد أو الوكيل وتجيب منه؛ لكن في الأوبن بوكس فالمصدر مش متجدد بنفس السهولة؛ لكن التحدي دا عندنا خطة كبيرة ليه إن شاء الله.
⬅️⬅️ بدعوكم لزيارة الموقع ولو في أي ملاحظات اكتبوها في التعليقات أو ابعتوا لهم في الموقع مباشرة أو الواتس.
رابط الموقع
https://www.rebuy-box.com/
لينك الصفحة
https://web.facebook.com/RebuyBox/
واتس آب الصفحة
https://wa.me/+201555550247