Azattyq - Азаттық

18 November 2024 13:42

🔴 Ресей аумағын атқылауға рұқсат беру соғыс майданына қаншалықты ықпал ететіні Украинаға берілген зымырандар санына, оларды қолдану жөніндегі шектеулерге байланысты.

Сол зымырандардың бірі – 300 шақырым радиусты қамтитын ATACMS ракетасы.

❗️ Украинаға ұзақ қашыққа ұшатын өзге де зымырандар берілген. New York Times және Washington Post газеттерінің жазуынша, әзірге тек Курск облысына шабуылдауға рұқсат.

ATACMS туралы көп жазған канадалық әскери сарапшы Колби Бадвардың айтуынша, 2023 жылғы желтоқсанда АҚШ-та ұзақ радиусты қамтитын 2400 зымыран болған және оның жартысының мерзімі өткен.

❗️Бадхвардың мәлімдеуіне қарағанда, былтыр АҚШ қоры 500-ден астам ATACMS ракетасымен толыққан. Бірақ Пентагон Украинаға бұл зымыранды ірі көлемде беруге құлықсыз деді сарапшы.

Ақ үйдің жаңа шешімі соғыс бағытын өзгерте ала ма? Сілтемеден өтіп оқыңыз.

❤️Азаттыққа жазылыңыз

Azattyq - Азаттық

18 November 2024 11:28

💬 Францияның Le Figaro газеті 17 қарашада өз дереккөздеріне сүйеніп, "Франция мен Ұлыбритания да Украинаға SCALP/Storm Shadow зымырандарымен Ресей аумағына шабуыл жасауға рұқсат берді" деп хабарлаған.

Бірақ ертесіне газет сайтынан ол ақпарат алынып тасталды. Le Figaro материалында АҚШ президенті Джо Байден Киевке ATACMS зымыранын қолдануға рұқсат берді деген ақпарат қана қалды.

🇺🇸🇫🇷🇬🇧 Вашингтон, Париж және Лондон "Ресей аумағындағы нысаналарды атқылау" жайлы ақпаратты әзірге ресми растаған жоқ.

Батыс басылымдары сұхбаттасқан адамдар Вашингтонның шешімі Украинадағы соғыс барысын түбегейлі өзгертуге мүмкіндік бермейді деп есептейді. Кейбір шенеунік бұл қадам Ресейді АҚШ пен одақтастарына қарсы соққы беруге итермелеуі мүмкін деп алаңдайды. Өзгелері мұндай қорқынышты "асыра сілтеу" деп санайды.

❤️Азаттыққа жазылыңыз

Azattyq - Азаттық

18 November 2024 09:36

💬 Төрт бала опат болған Астанадағы жеке үйдегі өрт бойынша қылмыстық іс қозғалды

Бұл жөнінде қаланың төтенше жағдайлар департаменті хабарлады. Тергеу қорытындысы тексеру аяқталғаннан кейін айтылады.

🗣 "Төтенше жағдайлар департаментінің анықтау бөлімі "Өрт қауiпсiздiгi талаптарын бұзу" бабы (Қылмыстық кодекстің 292-бабы 3-бөлігі) бойынша қылмыстық іс қозғады" делінген баспасөз хабарламасында.

17 қараша таңертең Астанадағы жеке үйлердің бірінде өрт шығып, 13, 9, 3, 2 жастағы төрт бала көз жұмды.

❤️Азаттыққа жазылыңыз

Azattyq - Азаттық

18 November 2024 08:51

🔴 Әскерде азаматтық борышын өтеп жүргенде жұмбақ жағдайда басынан қатты жараланып, комаға түскен Ербаян Мұхтардың ем-домына халық 140 млн теңге жылу жинап берген. Ұлының аяқтан тік тұрып кетуіне барын салып жүрген әке-шешесі осы қаржыға Ербаянды Түркияға емдетуге алып кетті.

Биыл елдің батыс өңірлерінде болған су тасқынынан зардап шеккен адамдарға қол ұшын беріп, қаржылай көмек жібергендер аз болмады. Ел басына ауыртпалық түскенде жылуды кішігірім қайырымдылық қорлары да, жекелеген адамдар да жинаған.

❗️Ал болашақта мұндай іс-әрекет заңсыз деп бағаланып, айыппұл салуға ілік болуы мүмкін. Өйткені "алаяқтықпен күресуді" алға тартқан өкімет бұл саланы бақылауға алып, заңға тиісті түзетулер енгізуді көздеп отыр.

Азаттық тілшісіне жұмыс тобы қарап жатқан өзгерістер мен толықтыруларды оқып-танысудың сәті түсті.

🔗Сілтемеден өтіп оқыңыз

❤️Азаттыққа жазылыңыз

Azattyq - Азаттық

18 November 2024 07:03

⚽️ Футболдан Қазақстан құрамасы Ұлттар лигасының соңғы ойынында Норвегия құрамасынан жеңіліп қалды. Ослода өткен ойында норвегтер 5:0 есебімен жеңіске жетті.

Бірінші тайм 3:0 есебімен аяқталып, Норвегия құрамасы озып шықты. Бұл құраманың танымал ойыншысы, "Алтын допқа" үміткерлердің бірі Эрлинг Холанд осы ойында хет-трик жасады (үш гол соқты), оның екеуін Қазақстан командасының қақпасына матчтың бірінші жартысында салды. Одан бөлек Александер Сёрлот (бірінші таймда) пен Антонио Нуса (екінші таймда) да бір-бір голдан соқты.

Ресейлік бапкер Станислав Черчесов жаттықтыратын Қазақстан құрамасы Ұлттар лигасы дивизионда ойнаған алты матчта бірде-бір гол соқпай, өз қақпасына 15 гол жіберіп алып, 1 ұпаймен соңғы орынды иеленді.

❤️Азаттыққа жазылыңыз

Azattyq - Азаттық

18 November 2024 05:26

💬 Солтүстік Корея Украинаға қарсы соғыс жүргізіп жатқан Ресейге көмектесу үшін 100 мыңға дейін сарбаз жіберуі мүмкін

Бұл туралы Bloomberg агенттігі "Үлкен жиырмалық" (G20) елдеріндегі дереккөздеріне сүйеніп хабарлады. Агенттік сөйлескен дереккөздердің айтуынша, бұл мәлімет – алдын ала есеп бойынша жасалған болжам, ақпарат алда расталса да, 100 мың сарбаз бір уақытта жіберілмейді.

Бұған дейін Украинаның Оңтүстік Кореядағы елшісі Дмитрий Пономаренко "Америка дауысының" Оңтүстік Корея қызметімен сөйлескенде осы шамалас сарбаз саны туралы айтқан. Елші Ресейдің Курск облысындағы Солтүстік Кореяның 15 мың сарбазы ай сайын ауысып отырады деген.

🇷🇺🇰🇵 Жақында Ресей мен Солтүстік Корея екі ел арасындағы жан-жақты стратегиялық серіктестік туралы келісімді ратификациялады. Оған сәйкес, тараптардың біріне қарулы шабуыл жасалған жағдайда екіншісі дереу әскери және өзге де көмек көрсетуге міндетті.

❤️Азаттыққа жазылыңыз

Azattyq - Азаттық

17 November 2024 19:28

❗NYT: Байден Украинаға батыс ракеталарымен Ресей аумағын атуға рұқсат берді

АҚШ президенті Джо Байден Украинаға АTACMS ракеталарымен Ресей аумағына шабуыл жасауға рұқсат берді. Бұл туралы америкалық шенеуніктерге сілтеме жасап, New York Times газеті жазды.

Басылымның дерегінше, Байден Солтүстік Корея әскерилері Ресейге көмекке келген соң осындай шешім қабылдаған.

Газет "Украина әзірге батыс ракеталарымен Курск облысына шабуыл жасай алады, кейін Ресейдің басқа да аймақтарын атуға рұқсат беруі мүмкін" деп жазды.

t.me/azattyq

Azattyq - Азаттық

17 November 2024 13:29

Жетісу облысына танымал 62 жастағы марафоншы Досмұхамед Төлегенов өмірінің 10 жылын төсек тартып өткізген.

Ол 34 жасында жабысқан ауыр дертін белсенді қимылымен жеңген соң спортқа келді. 40 жастан асқанда қадам басып жүруді қайта үйреніп, кейін ондаған шақырымға жүгірген азаматтың қайсарлығын жерлестері үлгі тұтады.

Азаттық радиосы “Спорт: қиындықты жеңген қаһармандар” байқауы аясында Досмұхамед Төлегеновтің өмір жолын баяндайды.

Azattyq - Азаттық

17 November 2024 09:46

Бүгін таңертең Астанада екі қабатты жеке тұрғын үй өртеніп, соның салдарынан төрт бала мерт болды деп хабарлады жергілікті төтенше жағдай департаменті.

“Құтқарушылар хабарлама келіп түскеннен кейін 6 минутта жеткенде ашық жанып жатқанын байқаған. Өрт 500 шаршы метр алаңда оқшауланып, толығымен сөндірілді. Өрт салдарынан 2011, 2015, 2021 және 2022 жылы туған төрт бала қаза болды” деп жазылған хабарламада.

Аталған екі қабатты үйде екі отбасы тұрған. Өрттің себебі анықталып жатыр. Сот-медициналық сараптама тағайындалған. Қаза болған балалардың жақындарына психолог және өзге де мамандар көмектесіп жатыр.

Azattyq - Азаттық

17 November 2024 06:37

Ресейлік "Газпром" корпорациясы 16 қарашада Австрияның энергетикалық OMV кәсіпорнына газ тасымалдауды тоқтатты деп хабарлады Австрия канцлері Карл Нехаммер.

Бұған 2022 жылғы бизнес-дау түрткі болған. Нехаммер жуырда "ел өзін бопсалауға жол бермейді" деп мәлімдеген.

2022 жылы Ресей Украинаға басып кірген шақта Австрияға Ресей газы үзіліспен жеткізіле бастаған. Ресейлік компания мұны техникалық қиындықтармен түсіндірген, ал Батыс елдері мұны "бопсалау құралы" деп атаған.

OMV компаниясы Халықаралық сауда палатасына ресейлік "Газпромның" үстінен шағым түсіріп, палата жауапкер компанияны 243 млн еуро көлемінде өтемақы төлеуге міндеттеген. "Неміс толқынының" жазуынша, осы қаражатты OMV қазіргі келісімшарт арқылы жасалып жатқан төлемнен ұстап қалмақшы болған.

Бұған дейін OMV өкілдері Ресей газынан бас тартып, Италия, Германия және Нидерландыдан газ тасымалдай алатынын мәлімдеген. "Неміс толқынының" жазуынша, Австрияны 2040 жылға дейін Ресейден едәуір газ алуға міндеттейтін қазіргі келісімді бұзу үшін Австрия осы сәтті ұтымды пайдаланған болуы мүмкін.

t.me/azattyq

Azattyq - Азаттық

16 November 2024 13:26

Грузияда парламент сайлауының қорытындысы бекітілген отырыс кезінде орталық сайлау комиссиясының (ОСК) жетекшісі Георгий Каландаришвилиге партия өкілі бояу шашып жіберді.

Грузияның орталық сайлау комиссиясы 26 қазанда өткен парламент сайлауының қорытындысын бекіткен. Оған сәйкес, биліктің басқару партиясы "Грузин арманы" сайлаушылардың 54 пайыз дауысына ие болып, жеңіске жеткен. Осылайша парламенттегі 150 орынның 89-ын иеленген.

"Өзгерістер үшін коалициясы" – 19, "Бірыңғай ұлттық қозғалыс" – 16, "Қуатты Грузия" – 14, "Грузия үшін" 12 депутаттық мандатқа ие болды.

Комиссияның қорытынды отырысы кезінде ОСК төрағасы Георгий Каландаришвили мен оппозициялық "Бірыңғай ұлттық қозғалыс" партиясының өкілі Давид Киртадзе дауласып қалды.

Киртадзе отырыс кезінде сөз алған, алайда регламентте көрсетілген уақыт аяқталғаннан кейін Каландаришвили микрофонды өшіріп тастаған. Дау әбден өршіген кезде Киртадзе Каландаришвилиге қара түсті бояу шашып жіберді. Комиссия отырысында үзіліс жарияланды.

t.me/azattyq

Azattyq - Азаттық

16 November 2024 08:30

Егемендік эйфориясы. Назарбаевты қолдаған журналистер құрылтайы / Азаттық толқынында

Советтік Қазақстандағы журналистер одағының соңғы құрылтайында президенттікке кандидат Нұрсұлтан Назарбаевты қолдаған үндеу қабылданды. Жиын кезіндегі қоғамдық ахуал қандай еді? Сол құрылтайға қатысқан журналиcтің бүгінгі көзқарасы қандай?

🎧Азаттық сайты
🎧Youtube
🎧Apple podcasts

t.me/azattyq

Azattyq - Азаттық

16 November 2024 05:39

Украина президенті Владимир Зеленский украиналық "Суспільнe" телеарнасына берген сұхбатында АҚШ-тың жаңадан сайланған президенті Дональд Трамп жетекшілік ететін болашақ әкімшілік тұсында "соғыс тезірек аяқталады" деп мәлімдеді.

"Біз үшін әділет өте маңызды, бізге таңылған әділетсіздік үшін ең қымбаттарымыздан айырылғандай сезімде қалмас үшін. Соғыс аяқталады, бірақ нақты күні белгісіз. Әрине, енді Ақ үйді басқаратын бұл команданың саясаты тұсында соғыс тезірек аяқталады. Бұл олардың көзқарасы, қоғамға берген уәдесі және олар үшін де бұл өте маңызды" деді Зеленский "Суспільнe" арнасына.

"Трамп Киевтен Ресеймен келіссөзге қатысуды талап етті ме?" деген сұраққа Зеленский "Украинаның тәуелсіз мемлекет" екенін атап өтті.

t.me/azattyq

Azattyq - Азаттық

15 November 2024 13:38

🔴 "Шалақазақша" сөйлейтін қазақ киносы

Қазақстанда қазақша киноиндустрияда серпін байқалады, қазақ тілінде түрлі талғамға сай туынды көп шығып жатыр. Бірақ қазақстандық кино шынымен қазақша сөйлей ме? Таза қазақша емес, көбіне "шалақазақша" сөйлейді. 2012-2023 жылдары жарық көрген 380 отандық фильмді талдап, осындай тұжырым жасадық.

Толығырақ оқыңыз

Azattyq - Азаттық

15 November 2024 12:36

Келіссөз жақындаған сайын Ресей мен Украина белсенділігін күшейтіп жатыр. Бұдан не шығады?

Мәскеу жаздың ортасынан бері 1100 шақырымға ұласқан майдан шебінде Украина күштерін қажытып келеді. Оңтүстікте Угледар мен Покровскіде, солтүстікте Часов Яр мен Купянск маңында, өз аумағы Курск облысында украин әскеріне үлкен күшпен шабуылдап отыр. Ресейдің Курск облысындағы біраз жерді Украина тамызда тұтқиылдан шабуыл жасап, басып алған.

Мәскеу Солтүстік Кореядан 12 мың жауынгер алдырып, оларды Ресейдің батысындағы әскер қатарына қосты. АҚШ пен Украинаның өкілетті тұлғалары мұны украин әскерін Ресей территориясынан толық шығаруға талпыныс деп бағалайды.

"Бәріміз білеміз, майданымыз күйреді десем, әскери құпия ашқандай болмаймын", – деді Украина генерал-майор Дмитрий Марченко 29 қазандағы күтпеген жерден жасалған мәлімдемесінде. Ол кейін отставкаға кететінін айтқанда көбі мұны генералды ашық пікірі үшін жазалау деп түсінді.

🔗Толығырақ оқыңыз

Azattyq - Азаттық

18 November 2024 11:48

🗣 Түркия президенті Режеп Ердоған Украинадағы соғысқа байланысты жоспар дайындады, оны 18 қарашада Рио-де-Жанейродағы G20 саммитінде таныстыруды жоспарлап отыр

Bloomberg агенттігі дереккөздеріне сүйеніп осылай деп хабарлады. Агенттік сөйлескен адамдардың айтуынша, Ердоған Украина президенті Владимир Зеленскийге НАТО-ға қосылуды "Путинге жеңілдік ретінде" кем дегенде 10 жылға кейінге шегеруді ұсынып көрмек. Бұдан бөлек, Донбасстың шығысында демилитаризацияланған аймақ құрып, ол жерге "қосымша кепілдік ретінде" халықаралық әскер қоюды ұсынбақ.

🇹🇷 Түрік шенеуніктері агенттікке мұндай ұсынысты қабылдау Украинаға қиын болады деген, бірақ олар мұны "ең шынайы тәсіл" деп санайды.

Bloomberg бұл ұсыныс Украинаның кейбір одақтасына ұнауы мүмкін, олар Киевтің НАТО-ға қосылуы Кремльмен тікелей қақтығысқа әкеледі деп алаңдайды деп жазды.

❌ Украина мен Ресей президенттері Ердоған ұсынысын айтқалы отырған G20 саммитіне қатыспайды.

❤️Азаттыққа жазылыңыз

Azattyq - Азаттық

18 November 2024 10:34

💬 Шығыс Қазақстан облысының орталығы Өскемен қаласында өткен демалыс күндері 14 мыңнан астам пәтер мен 300-ден аса кеңсе бір күн жылусыз отыруға мәжбүр болды

"Шығыс жылу" кәсіпорны 16 қараша түс кезінде болған "ақау" алдымен кешке дейін, кейін түнде қалпына келтіріледі деп хабарлағанымен, жөндеу 17 қараша түстен кейін бір-ақ аяқталды.

🔸 Қала тұрғындары Instagram әлеуметтік желісіндегі жергілікті танымал парақшаларда ыстық су мен жылу болмай, баспанасы азынап кеткенін айтып шағынды. Кейбірі кішкентай балалары барын айтып алаңдаған. Өскеменде түнде ауа температурасы -5 градусқа дейін төмендеді.

🔸 Шығыс Қазақстан облысы әкімінің орынбасары Бақытжан Баяхметовтің айтуынша, қаладағы құбыр желісінің бірнеше ықшамауданына жылу жеткізетін тармағы жарылған.

ШҚО энергетика және тұрғын үй-коммуналдық шаруашылық басқармасы биыл облыс жылыту маусымына дайын деп хабарлаған. 2 қазанда баспасөз мәслихатын өткізген басқарма басшысы Нұрлан Рамазанов "биыл облыста 68 шақырым жылу желісі жөнделді, бұл жұмыс қыста үйлер жылумен қамтамасыз етіледі деп сенуге мүмкіндік береді" деген.

❤️Азаттыққа жазылыңыз

Azattyq - Азаттық

18 November 2024 09:16

🗣 Қостанай облысында төрт адам газдан уланып қаза болды

Бұл туралы жергілікті "ТобылИнфо" сайты хабарлады. Басылымның ақпаратынша, 8, 3, 2 жасар үш бала және олардың 67 жастағы атасы опат болған. Қайғылы оқиға 17 қарашада 13.00 шамасында Амангелді ауданы Тасты ауылдық округіндегі Қарынсалды ауылында болған.

Балалардың әкесі мен анасы және олардың 4 жасар тағы бір ұлы Арқалық қаласындағы ауруханаға жатқызылған.

Балалардың әкесі жергілікті мектепте өрт сөндіруші болып жұмыс істеген.

❤️Азаттыққа жазылыңыз

Azattyq - Азаттық

18 November 2024 08:02

🗣 Тбилисиде Грузия парламенті ғимараты жанында оппозициялық партиялар мен үкіметтік емес ұйымдар 26 қазандағы парламент сайлауындағы бұрмалауға наразылық білдіріп, "Өз дауысыңды қайтар!" деген тақырыпта акция өткізді

Парламент маңына жиналғандар дауыс беру құпиясы бұзылғанына назар аударды. Сайлау учаскелерінде азаматтарға арнайы қалам берілген. Қалам ізі бюллетеннің арт жағынан көрінген. Кез келген адам, соның ішінде билік партиясының бақылаушылары сайлаушының кімге дауыс бергенін байқап, анықтай алған деп айтылды.

Билікті сынайтындардың сөзінше, биліктегі партия жалдаған адамдар сайлаушыларға хабарласып, қоқан-лоқы жасаған. Ұйымдастырушылар сайлаушыларға пара беру оқиғалары болғанын айтып берді.

Грузия премьер-министрі Ираклий Кобахидзе жаңадан сайланған парламенттің алғашқы отырысы "сырттан басқарылатын күштер қарсылығына қарамастан" 25 қарашада өтеді деп мәлімдеді.

❤️Азаттыққа жазылыңыз

Azattyq - Азаттық

18 November 2024 06:09

🗣 Ливанның "Хезболла" радикал тобында бұқаралық ақпарат құралдарымен байланысқа жауапты Мұхаммед Афиф Израиль армиясының Бейрут қаласына жасаған шабуылынан қаза тапты

Бұл туралы Ливанның Al-Mayadeen арнасы хабарлады. Reuters агенттігі сұхбаттасқан адамдар Израильден шабуыл туралы ескерту келген жоқ деп мәлімдеді.

Афиф "Хезболлаға" 30 жылдан астам уақыт жетекшілік еткен Хасан Насралланың баспасөз бойынша кеңесшісі болған. Насралла 27 қазанда Израильдің Дахиядағы "Хезболла" кеңсесіне жасаған шабуылынан қаза тапқан.

❤️Азаттыққа жазылыңыз

Azattyq - Азаттық

17 November 2024 19:54

⚡️ "Украина Батыс ракеталарымен жақын күндері Ресей аумағына шабуыл жасауды жоспарлайды" деп жазды Reuters агенттігі.

Агенттік Ақ үйден бұған қатысты ресми мәлімдеме ала алмаған. Вашингтон да, Мәскеу де, Киев те әзірге Батыс басылымдарының ақпаратына қатысты ештеңе айтпады.

t.me/azattyq

Azattyq - Азаттық

17 November 2024 14:19

Үндістан алысқа ұшатын алғашқы гипердыбыстық ракетасын сынақтан сәтті өткізгенін хабарлады.

Бұл жөнінде жексенбі күні қорғаныс министрі Раджнат Сингх мәлімдеді. Сынақ сенбі күні Үнді түбегінің шығыс жағалауындағы аралда орналасқан Абдул Калам полигонында өткен.

Сыналған ракета түрлі қаруларды алып жүре алады және 1500 шақырымға дейін ұшады. Ол дыбыс жылдамдығынан бес есе жылдам ұшады деп айтылады.

Осылайша Үндістан ең озық қаруы бар әлемдегі санаулы елдердің қатарына қосылды. Қазіргі кезде гипердыбыстық қару АҚШ, Ресей, Қытайда бар. Гипердыбыстық ракеталары барын Иран, Солтүстік Корея және йемендік хуситтер мәлімдегенмен аталған ракета түрі ол елдердің әскерінің қару-жарақ қатарына енді ме, жоқ па, ол жағы белгісіз.

t.me/azattyq

Azattyq - Азаттық

17 November 2024 12:28

"Қазір құм мен тас қана жатыр" Каспийдің тартылуы Түркіменстандағы жалғыз жағажай курортқа қалай әсер етті?

Түркіменстанның теңіз жағасындағы қымбат курорты жазғы демалысқа қажеттің бәрін ұсынады. Тек теңіз ғана жоқ. Ұзақ жылдардан бері Каспийдің су деңгейі төмендеп келеді. Бұл әлемдегі оқшау мемлекеттің беткеұстар туристік орнын теңізсіз қалдырды.

🔗Оқу

t.me/azattyq

Azattyq - Азаттық

17 November 2024 06:59

Ақмола облысында бұрынғы мешіт ғимаратында газ жарылып, үш адам қаза болды. 16 адам қалалық ауруханаға әкетілген. Төтенше оқиға ғимаратта ас беріп жатқан кезде болған.

Бұл жөнінде облыстық төтенше жағдай департаментіне сүйенген жергілікті ақпарат агенттіктері хабарлады.

Облыстық төтенше жағдай департаментінің мәліметінше, құтқарушылар алты газ баллонын алып шыққан, барлығы жеті баллон болған.

Қорғалжын ауданы Сабынды ауылында болған төтенше оқиғаның салдарынан 1978 жылғы ер адам, 1983 жылғы әйел адам, 2012 жылғы бала қаза болған.

“Қазіргі кезде құтқарушылар үйіндіні аршып жатыр” деп хабарлады ТЖД. Жарылыстың себебі анықталып жатыр.

Azattyq - Азаттық

17 November 2024 05:49

Солтүстік Корея Ресейге өздігінен жүретін 50 зеңбірек (М1978 "Коксан") пен 20 шақты дүркіндете ататын жүйе жеткізген болуы мүмкін.

Бұл жөнінде Украина барлау қызметінің есебіне сүйенген Financial Times басылымы жазды.

САУ М1978 жүйесінің Ресейдегі темір жол платформаларында тұрған суреті бейсенбі күні желіде тарады, сурет қашан түсірілгені белгісіз. Бұған дейін Ресейге шетелден мұндай қару түрі жеткізілетіні айтылмаған.

"Коксан" Иранға Иран-Ирак соғысы кезінде жеткізілген. 170мм калибрлі қондырғы қарапайым снарядтарды 40 шақырым жердегі нысанға тигізе алады, ал реактивті снарядтарды 60 шақырымға дейін жеткізе алады. Солтүстік Корея да, Иран да Украинаға қарсы соғыста Ресейге оқ-дәрі жеткізіп жатыр.

Azattyq - Азаттық

16 November 2024 11:51

Украинаның Днепропетровск облысы Кривой Рог қаласында орыс жазушылары Александр Пушкин мен Михаил Лермонтов ескерткіштері бұзылды.

Бұл жөнінде "Первый Криворожский" және "На часi" жазды.

Олардың мәліметінше, отарсыздандыру туралы заң аясында ескерткіштер алынған. Бұған дейін қалада совет жазушысы Максим Горькийдің ескерткіші алынып тасталған.

t.me/azattyq

Azattyq - Азаттық

16 November 2024 06:52

🗣Қаржы мониторинг агенттігі Перизат Қайраттың “тағы бір жымқыру” бойынша күдікке ілінгенін хабарлады

Ведомствоның болжамынша, бір жыл бұрын ол "Палестина халқына көмек ретінде жиналған 200 млн теңге қаражатты жымқырған". Су тасқынына жиналған қаражат сияқты оны да Перизат Қайрат "жылжымайтын мүлік, көлік және қымбат заттарға жұмсаған".

Сенбі күні Астана соты Перизат Қайратты екі айға қамауға рұқсат берген.

Azattyq - Азаттық

15 November 2024 15:51

❗Шольц пен Путин телефонмен сөйлесті

Германия канцлері Олаф Шольц бүгін, 15 қарашада Путинмен телефонмен сөйлесіп, Украинамен "әділдік және мығым бейбітшілік үшін" келіссөзге шақырған. Бұған қоса, ол Германияға көмектесуді жалғастыра беретінін мәлімдеген. Бұл туралы Германия үкіметі хабарлады.

Германия канцлері Ресейдің Украинаға басқыншылығын сынап, Путинді әскерін шығаруға шақырған. Шольц Путинге қоңырау шалардың алдында Украина президенті Владимир Зеленскиймен сөйлескен және Путинмен әңгімеден соң Зеленскиймен қайта тілдеспек.

Кремль әзірге Путин мен Шольцтың сөйлескені жайлы ештеңе айтпады.Германия канцлері Путинмен соңғы рет 2022 жылы 2 желтоқсанда сөйлескен еді. Ол соғыс алдында Мәскеуге келіп, Путинді соғыс бастамауға көндіруге де тырысқан.

Azattyq - Азаттық

15 November 2024 13:01

Екібастұзда ГРЭС-1 жылу орталығының бір блогының жұмысы тоқтатылды

“Самұрық-Энерго” компаниясының баспасөз қызметінің хабарлауынша, тексеру кезінде №1 мұржадан тозаң шығып жатқаны анықталған. Соның себебін анықтау мақсатында энергоблок өшірілген. Түпкілікті қорытындысы тексеріс нәтижесінен кейін анықталатыны айтылды.

Дегенмен компания блоктың істен шығуы электр энергияны өндіруге қаншалықты әсер етіп жатқанын нақтыламаған. Жергілікті БАҚ-тың хабарлауынща, станцияда бұған дейін 8 блок істеген.

Осыған дейін “Письма президенту” телеграм-арнасы Екібастұз тұрғындары жіберген видеоға сүйене отырып, ГРЭС-1 жылу орталығы мұржасының ішкі бөлігі құлағанын жазған еді.

Azattyq - Азаттық

15 November 2024 11:40

Мәжілістің бұрынғы депутаты Асқар Садықовқа қатысты сотқа дейінгі тергеу тіркелген жоқ

Ішкі істер министрлігі “Власть” басылымына жіберген жазбаша жауабында осылай деп мәлімдеген.

Бұған дейін “Ақ жол” және оның төрағасы Азат Перуашев Садықовты билік өкілетін асыра пайдаланды және “әдепсіздік жасады” деп айыптаған. Мәжіліске “Ақ жол” атынан сайланған Асқар Садықовты 29 тамызда орталық сайлау комиссиясы депутат мандатынан айырған. Перуашевтің сөзінше, партияға парламент қызметкерінен Садықовқа қатысты бірнеше шағым түскен.

Ал қыркүйекте Садықов видеомәлімдеме жасап, тағылған айыптарды жоққа шығарған. "Перуашев даулы мәлімдемесімен орынбасарына байланысты жемқорлыққа қатысты істен халық назарын аударғысы келеді" деген еді.