Azattyq - Азаттық

09 June 2023 16:37

Абай облысындағы өрт: Қазірге дейін не белгілі?

📌Төтенше жағдай министрлігінің 9 маусым түстен кейінгі мәліметі бойынша, облыстағы өрт қазір 30 мың гектарды шарпыған.

📌Ақорданың телеграм каналы өрттен соң байланыс үзілген 14 орманшының үшеуі қаза тапқанын, 11 орманшы іздестіріліп жатқанын хабарлады.

📌«Қазақстан президенті Қасым-Жомарт Тоқаев төтенше жағдай министрі Юрий Ильин Абай облысына барып, өрт сөндіру бойынша жұмыстарды басқаруды тапсырды» деп жазды Ақорданың телеграм каналы.

📌Облыс орталығы Семейде төтенше жағдай жарияланып, қала әкімдігі Бородулиха ауданында жағдай қиын екені мәлімдеді.
«Каштак және Талица ауылдарына қауіп төніп тұр. Семей қаласына қауіп жоқ. Бірақ жел бағытына қарай өрт басқа жақтарға да жайылуы мүмкін. Барлық қызметтер дайын болу үшін төтенше жағдай жарияланды» деді Семей қаласы әкімдігің баспасөз қызметі.

📌Төтенше жағдай министрі Юрий Ильин бір күннің ішінде өрт аумағы 3 гектардан 100 гектарға бірден өсіп, кейін жайылып кеткенін мәлімдеді. Ильин өрттің тез жайылуы экология министрлігіне қарайтын орман шаруашылығы комитетінің жағдайды дұрыс бағамдауынан болуы мүмкін екенін айтады.
«Бастапқыда өрт шарпыған аумақ дұрыс есептелмей, соның салдарынан өрт сөндіруге қосымша күш уақытында жіберілмеген» деді министр.

📌Экология министрлігі «Семей орманы» мемлекеттік орман табиғи резерваты аумағындағы өрт 8 маусымда шыққанын мәлімдеді. Министрліктің алдын ала дерегі бойынша, өрт шығуына найзағай себеп болуы мүмкін.

📌Облыстағы үш ауылдың тұрғындары үйлерін тастап кеткен, жергілікті билік өрттен қашқан тұрғындардың көбі туыстарында дейді. Бородулиха ауылындағы мектеп пен коллежде эвакуациялық пунктер ашылған.

📌Төтенше жағдай министрлігі қазір өрт сөндіруге 662 адам, 177 техника, 6 тікұшақ жұмылдырылғанын мәлімдеді. Абай облысына Астана қаласы мен Қарағанды облысы төтенше жағдайлар департаменті жеке құрамының 133 адамы мен 48 техникасы, сонымен бірге төрт тікұшақ қосымша жіберілетіні хабарланды.

t.me/azattyq

Azattyq - Азаттық

09 June 2023 16:33

Тоқаевтың төрт жыл бұрынғы қарсыластары қайда жүр?

Төрт жыл бұрынғы сайлауға Қасым-Жомарт Тоқаевтан бөлек тағы алты кандидат түскен. Олар қазір қайда, немен айналысып жүр? Шолып шықтық.

🔗Сілтеме

t.me/azattyq

Azattyq - Азаттық

09 June 2023 14:38

9 маусымдағы маңызды жаңалықтар дайджесі:

📌 Абай облысындағы орман өрті: Семейде төтенше жағдай жарияланды. Үш орманшы қаза болған

📌 Қамаудағы журналист Думан Мұхаммедкәрімге жаңа айып тағылды. Журналистің үйінде тінту жүріп жатыр

📌 Air Astana әуекомпаниясына "нарықтағы үстемдігін асыра пайдаланғаны үшін" айыппұл салынды

📌 Бестөбеде кеншілер наразылық білдіріп жатқанына үш күн болды

📌 Арман Жұмагелдиев Қаңтар оқиғасы кезіндегі "азаптау" бойынша істе жәбірленуші деп танылды

📌 Былтыр қамаудан шыққан белсенді Қайрат Қылышев түрмеге ауыстырылды

t.me/azattyq

Azattyq - Азаттық

09 June 2023 14:00

Семей әкімдігі орман өртіне байланысты қалада төтенше жағдай жариялады

Бұл туралы облыс әкімдігінің баспасөз қызметі хабарлады.

t.me/azattyq

Azattyq - Азаттық

09 June 2023 13:39

Орман өртіне байланысты Семейде төтенше жағдай енгізу ұсынылды

"Семей орманы" мемлекеттік орман табиғи резерваты (Батпаев орман шаруашылығы 66, 67, 55, 42 кварталдарында) аумағында өрттің шығуына байланысты Семей қаласында табиғи сипаттағы жергілікті төтенше жағдай жариялансын" деп жазылған Семей қаласы әкімдігінің хабарламасында.

Абай облысындағы өрт кезінде орман шаруашылығының 14 қызметкерімен байланыс үзілген.

Қазір өрт сөндірумен қатар жоғалған адамдарды іздеу шаралары да жүргізіліп жатыр.

t.me/azattyq

Azattyq - Азаттық

09 June 2023 12:25

🎧 Ашаршылық, соғыс, кәмпескелеу қазақ психикасына қалай әсер етті?

Азаттықтың "Жаншипа" психологиялық подкасының 14-эпизодында Ашаршылық, қуғын-сүргін, кәмпескелеу, соғыс, Совет Одағының саясаты қазақтың санасы мен психологиясына қалай әсер еткенін талқыладық.

Подкасымыздың осыған дейінгі эпизодтарында психологтер "қазақ аштық, соғыс, қиындық көрген халық қой, сол оқиғаның бәрі қоғамның психикасына әсер етіп келе жатыр" дегенді жиі айтты. Сондықтан подкасымыздың бір эпизодын тарихи оқиғалардың қоғам психикасына әсері туралы тақырыпқа арнап отырмыз.

🎙Apple podcasts
🎙Google Podcasts
🎙YouTube
🎙Азаттық сайты

t.me/azattyq

Azattyq - Азаттық

09 June 2023 11:41

Абай облысында орман өртінің ауданы 30 мың гектарға жетті

Бұл туралы төтенше жағдайлар министрлігі хабарлады. Бұған дейін оның ауданы 2 мың гектар деп айтылған.

Жұма күні таңертең министрлік үш аумақта өрт сөндіріліп жатқанын хабарлаған. Түсте олардың саны алтыға жетті.

"Орман шаруашылығы комитетінің ақпаратына сәйкес, өрт ауданы – 30 000 га. Алты тікұшақ тартылды, өрт аумағын аэровизуал тексеру және өрт ошақтарына су ағызу жүзеге асырылып жатыр. Өрт ошақтарына әуеден 55 рет су төгілді, жалпы көлемі 154 тонна болады" деп жазылған министрліктің хабарламасында.

t.me/azattyq

Azattyq - Азаттық

09 June 2023 10:51

Түркіменстанда блогерлерге елін мақтау тапсырылған

Елдің бірқатар аймағында YouTube, TikTok, Instagram секілді әлеуметтік желілердегі танымал блогерлерді полиция тергеуге алып жатыр. Бұл жөнінде Азаттықтың Түркімен қызметі хабарлады.

Оларға Түркіменстан жайында тек мақтаудан тұратын контент түсіру тапсырылған. Керісінше жағдайда қамауға алынасыңдар деп қорқытқан.

Түркіменстанда көптеген жылдан бері Facebook, Twitter және YouTube сияқты әлеуметтік желілер мен тәуелсіз ақпарат құралдарының сайттары бұғатталған. Бірақ жастар VPN сервистерін пайдаланады.

t.me/azattyq

Azattyq - Азаттық

09 June 2023 10:07

🎥 Эфиріміз басталды. Көріп отырсыз ба?

t.me/azattyq

Azattyq - Азаттық

09 June 2023 09:23

"Басын унитазға тықты". Өскеменде тұрғындар жақындары қамауда азапталғанын айтып, наразылық білдірді

Кеше, 8 маусымда өткен митингіде "Бипэк-Авто – Азия-Авто" компаниялар тобының "қаржы жымқыру" ісі бойынша тергеліп жатқан топ-менеджерлерінің туыстары түрмедегі азаптау жөнінде айтты.

"2021 жылы 25 қаңтарда оларды (Шығыс Қазақстанда "Бипэк-Авто – Азия-Авто" компаниялар тобының "қаржы жымқыру" ісі бойынша тергелген сегіз топ-менеджері – ред.) басына қап кигізіп, Семейден Астанаға жеткізді. Астанадағы №12 тергеу изоляторына алып барды. Онда басынан, аяқ-қолынан ұрған. Бастарын унитазға батырған. Таңғы сағат 6-дан түнгі сағат 2-ге дейін бір сызықтың бойында тұруға мәжбүрлеген" деді іс бойынша күдікке ілінген менеджерлердің бірі Игорь Потаповтың әйелі Надежда Потапова.

Толығырақ оқу үшін сілтемеге өтіңіз.

t.me/azattyq

Azattyq - Азаттық

09 June 2023 08:29

Америкалық отбасы асырап алған қазақ ет жақындарын іздейді

22 жыл бұрын америкалық отбасы асырап алған Сардар есімді қазақ баласы өзінің қаны бір жақындарын іздеп, Қазақстанға келді. Ол өзінің Қазақстаннан екенін бала кезінен білгенін, туыстарын табуды мақсат еткенін айтады. Сардар Тараздағы бөбектер үйінен және қалалық архивтен мәлімет іздеп, анасы болуы мүмкін үш әйелді анықтаған. Бірақ олар Сардардың анасы болмай шыққан. Қазір ол АҚШ-қа қайтып кетті. Бірақ жергілікті журналистің және заңгердің көмегімен іздеуді жалғастырып жатыр.

Видео: “Мигрант Медиа”

Azattyq - Азаттық

09 June 2023 07:38

Зерттеу: Шойгудың ұлы мобилизация басталардан бірнеше күн бұрын Ресейден кетіп қалған

Алексей Навальныйдың командасы Ресей қорғаныс министрі Сергей Шойгудың некесіз туған ұлы, 22 жастағы Данила Шебунов туралы зерттеу жариялады. Онда министрдің ұлы Мәскеу орталығындағы екі кеңсені жалға беруден "миллион рубль" пайда табатыны жазылған.

Зерттеу авторларының жазуынша, Шойгудың ұлы былтыр қыркүйекте Владимир Путин мобилизация жарияламай тұрып бірнеше күн бұрын Ресейден Түркияға кетіп қалған.

Толығырақ білу үшін сілтемеге өтіңіз.

t.me/azattyq

Azattyq - Азаттық

09 June 2023 06:59

Жаңаөзендік мұнайшылар Астанаға баруға дайындалып жатыр

"Өзенмұнайгаз" компаниясы алдында ереуілге шығып тұрған "БерӘлі Маңғыстау Company" кәсіпорнының бұрынғы жұмысшылары билік және "ҚазМұнайГаз" өкілдерімен арада болған келіссөз сәтсіз аяқталғанын хабарлады.

Мұнайшылар "құрал-жабдығы жаңартылмаған, жұмысшыларының құқығы қорғалмаған, заңға бағынбайтын мекемелерден жұмыс ұсынып, алдарқатқысы келеді, біз оған келіспейміз" деп мәлімдеді.

Бір күн бұрын жергілікті БАҚ Маңғыстау облысының әкімі Нұрлан Ноғаев Жаңаөзенде сәуірдің басынан бері ереуілдетіп тұрған "БерӘлі Маңғыстау Company" кәсіпорнының бұрынғы жұмысшыларымен кездескенін хабарлаған еді. Бұл кездесуге "ҚазМұнайГаз" бен "Өзенмұнайгаз" басшылары да қатысқан.

Интернетте кездесу туралы жарияланған видеода мұнайшылар бірыңғай жалақы төлеу жүйесі бар мекемеден жұмыс талап етіп тұрғаны байқалады. Олар билік пен мұнай-газ саласындағы компания өкілдерінің жауабына қанағаттанбай, "келесі аялдамамыз – Астана" деп тарқасады.

t.me/azattyq

Azattyq - Азаттық

09 June 2023 06:18

Бестөбеде наразылық жалғасып жатыр

Ақмола облысы Бестөбе ауылының тұрғындары екі түн қатарынан жергілікті кеніш мәселесін шешуді талап етіп тұр. Жұрт ауылдағы мәдениет үйінің алдына жиналған.

9 маусымға қараған түні ғимарат алдында жарық сөніп, тұрғындар түні бойы шам жағып отыруға мәжбүр болған. Жұма күні таңертең ғимарат маңында полиция күзеті күшейген. Мәдениет үйі маңына бес полиция көлігі мен шағын автобус қойылған.

Жиналғандар арасында жұмыссыз бос тұрып қалған "Алтыналмас" компаниясының кеншілері бар, олар кеніш мәселесі шешілгенге дейін мәдениет үйінде қалатынын айтты. Тұрғындар ауылдағы шахтаны іске қосып, одан жерасты суын сорғызуды және ауыл маңындағы кен байыту фабрикасын өзге жаққа көшіруді талап етіп тұр.

Бестөбеде өндірісті іске қосу мәселесі екі жыл бойы шешімін таппай келеді. Биыл ақпан айында Қазақстан президенті Қасым-Жомарт Тоқаев шахта мәселесін шешуге тапсырма берген.

t.me/azattyq

Azattyq - Азаттық

09 June 2023 04:54

Былтыр қамаудан шыққан белсенді Қайрат Қылышев түрмеге ауыстырылды. Бұл жөнінде белсендінің әйелі Жанар Сарықұлова хабарлады

“8 маусымда шешім шығарып, “пробацияны бұзды” деген айыппен сот залынан Қаскелеңнің изоляторына қамады” деді әйелі Азаттыққа.

Оның сөзінше, күйеуі түрмеге қамайтындай ереже бұзбаған. Бірақ сотта ол “екі рет ереже бұзғаны” айтылған. Жанар Сарықұлованың сөзінше, белсенді қалған 1,5 жыл жазасын түрмеде өтейді.

Белсенді Қайрат Қылышев 2021 жылы 11 қазанда "тыйым салынған ұйым жұмысын ұйымдастырды және араласты" деген айыппен (405-бап, 1,2 бөлімдері) 5 жылға бас бостандығынан айырылған. Былтыр көктемде сот оның қалған жазасын шартты жазаға ауыстыру туралы өтінішін орындап, белсенді қамаудан шыққан еді.

t.me/azattyq

Azattyq - Азаттық

09 June 2023 16:35

Сыбайлас жемқорлыққа қарсы іс-қимыл агенттігі бұрынғы депутат Нұржан Әлтаев 135 мың доллар көлемінде пара алды деп күдікке ілінгенін хабарлады.

Агенттік «Әлтаев 2018-2019 жылдары еңбек және халықты әлеуметтік қорғау вице-министрі болып тұрғанда «Атамекен» ұлттық палатасының басшысы Абылай Мырзахметовтен ай сайын 5 мың доллар алып отырған. Бұл пара «Еңбек» бағдарламасымен мемлекеттік тапсырыс алуға негіз болған» деп күдіктенеді.

Әлтаев осы аптаның басында қамауға алынған.

t.me/azattyq

Azattyq - Азаттық

09 June 2023 15:29

Тоқаевтың 4 жылы - AzatNews | 9.06.23

📌 Қамаудағы журналист, белсенді Думан Мұхаммедкәрімнің үйін полиция тінтті және өзіне жаңа айып тағылғаны хабарланды. Адвокатының сөзінше, айып қуғындағы банкир Мұхтар Әблязовпен болған сұхбатқа байланысты.

📌 8 маусым күні ұсталған "Алға, Қазақстан!" тіркелмеген оппозициялық партиясының белсенділері полиция күш көрсеткенін айтады. Кейбірінің қол-аяғы көгерген. Астана полициясы Азаттыққа жауап бермеді.

📌 Қасым-Жомарт Тоқаевтың президент болып сайланғалы төрт жыл. Елдің саяси ахуалы, экономикасы жақсарды ма? Не өзгерді?

🔗КӨРУ

t.me/azattyq

Azattyq - Азаттық

09 June 2023 14:15

Абай облысында байланыс үзілген 14 орманшының үшеуі қаза болған, қалған 11 адамды іздеу жұмыстары жалғасып жатыр. Бұл жөнінде Ақорда хабарлады

Үкімет пен Абай облысы әкімдігіне қаза болғандардың отбасыларына қажетті көмек көрсету тапсырылған.

t.me/azattyq

Azattyq - Азаттық

09 June 2023 13:51

Қамаудағы журналист Думан Мұхаммедкәрімнің үйінде тінту жүріп жатыр. Ақпаратты адвокат Ғалым Нұрпейісов журналист Данияр Молдабековке растаған.

Адвокаттың айтуынша, тінту “экстремизмді қаржыландыру” (258-бап) бойынша қозғалған қылмыстық іс негізінде жүргізіліп жатыр. Адвокаттың айтуынша, Думан Мұхаммедкәрім “қорғалуға құқығы бар” куәгер болса да, іс жүзінде жағдай басқаша болып отыр.

Билікті қатаң сынап жүрген журналиске бұған дейін “тыйым салынған ұйымның ісіне араласу” бабынан бөлек (405-бап), “экстремизмді қаржыландыру” (258-бап) бойынша да іс қозғалғаны белгілі болған еді.

t.me/azattyq

Azattyq - Азаттық

09 June 2023 12:55

Арман Жұмагелдиев Қаңтар оқиғасы кезіндегі "азаптау" ісі бойынша жәбірленуші деп танылды

Жұмагелдиевтің адвокаты Олег Черновтың мәліметінше, Арман Жұмагелдиев ("Дикий Арман" деген лақап атпен де мәлім – ред.) Қылмыстық кодекстің 146-бабы ("азаптау") бойынша жәбірленуші деп танылған.

Orda.kz-ке сұхбат берген Олег Черновтың айтуынша, іс бойынша күдіктілер – Алматы полиция департаментінің қызметкерлері.

Адвокаттың мәліметінше, азаптау бойынша тергеуді бастауға 2022 жылғы 7 қаңтарда "Ритц Карлтон" қонақүйінің қауіпсіздік қызметі түсірген Жұмагелдиевті ұстау видеосы себеп болған. Черновтың сөзінше, видеода арнайы жасақ Жұмагелдиевті қатыгездікпен ұрып-соғып жатқаны көрсетілген.

Іс бойынша сотқа дейінгі тергеп-тексеруді сыбайлас жемқорлыққа қарсы қызмет жүргізеді.

37 жастағы Арман Жұмагелдиев былтыр 7 қаңтарда қамауға алынған. Оған "заңсыз қару сақтады", "жаппай тәртіпсіздік ұйымдастырды", "ұйымдасқан қылмыстық топ құрып, басшылық етті" және "қарақшылықпен шұғылданды" деген айыптар тағылған. Жұмагелдиев бұл айыптарды мойындамайды.

t.me/azattyq

Azattyq - Азаттық

09 June 2023 11:48

Тоқаевтың президенттігіне төрт жыл. Елде не болды?

Тура төрт жыл бұрын, 2019 жылы 9 маусымда Қасым-Жомарт Тоқаев кезектен тыс президент сайлауында жеңді деп жарияланып, ресми түрде мемлекет басшысы ретіндегі қызметін бастаған. Сол төрт жыл ішінде Тоқаев қандай ісімен есте қалды? Шолып шықтық.

t.me/azattyq

Azattyq - Азаттық

09 June 2023 11:21

"Балапаным, кешір. Кеудемде жаным болса, сені ақтап шығам". Марқұм ұлы сотталған әкенің шері

21 жастағы Думан Әкімбекұлы Қаңтар оқиғасы кезінде Алматыда оққа ұшқан. Полиция басқармасының тұсынан атылған оқ кеудесін тесіп өткен. Жігіттің қазасы бойынша қозғалған іс тергелместен жабылды. Ал марқұмның өзін биыл мамырда сот екі бап бойынша кінәлі деп тауып, шартты түрде соттады.

Қазірге дейін елдің бірнеше өңірінде оққа ұшқан кемі 11 адамға айыптау үкімі шыққан. Жұрт бұл процестерді "Аруақтар соты" деп атайды. Олардың жақындары үкімді өзгертуге тырысып жүр. Думанның әкесі Әкімбек Қалыбеков те марқұм ұлын ақтап шығуға күш салмақ.

Азаттық тілшісі Мәншүк Асаутайдың сюжетін мына сілтеме арқылы көре аласыз.

t.me/azattyq

Azattyq - Азаттық

09 June 2023 10:18

Қамаудағы журналист Думан Мұхаммедкәрімге жаңа айып тағылды

Бұл туралы 9 маусымда Азаттыққа журналистің адвокаты Ғалым Нұрпейісов хабарлады. Айтуынша, Думан Мұхамедкәрімге "террористiк немесе экстремистiк әрекетті қаржыландыру және терроризмге не экстремизмге өзге де дем берушілік" (Қылмыстық кодекстің 258-бабы) бабы бойынша айып тағылған.

"Бізде жаңа ғана 258-бап бойынша қозғалған іс аясында жауап алынды. Думан қорғануға құқығы бар куә ретінде сұрақтарға жауап берді. Іс Әблязовпен болған сұхбатқа қатысты. Өзге ақпарат айта алмаймын" деді адвокат Ғалым Нұрпейісов.

Думан Мұхаммедкәрім 28 мамырда "бейбіт жиын өткізу тәртібін бұзды" деген айыппен 25 тәулікке қамалған. Изоляторда сот шешіміне қарсылық білдіріп, аштық жариялаған.

"10 күннен бері тек су ішіп жатыр. Бүгін жауап алуға келгенде екінші қабатқа әрең көтерілді. Өте әлсіз. Арықтап кеткен. Күші жоқ" деді адвокат.

t.me/azattyq

Azattyq - Азаттық

09 June 2023 09:46

⚡️ AzattyqLIVE: Тоқаевтың төрт жылы. Қаңтар қырғыны, қымбатшылық, сайлаулар мен уәделер...

Бүгін – 9 маусымда, Азаттықтың Алматы студиясында сағат 14:00-де AzattyqLIVE тікелей эфирі өтеді.

Осыдан төрт жыл бұрын Қазақстанда президент сайлауы болған. Сол кезде ресми мәлімет бойынша 71 пайызға жуық дауыспен Назарбаевтың мұрагері Қасым-Жомарт Тоқаев жеңіске жетті.

Соңғы төрт жылда Тоқаев билігі не істеді? Халық тұрмысы өзгерді ме? «Жаңа, әділетті Қазақстан құрамыз» деген президент уәдесі қаншалықты іске асты? Қаңтар қырғынының шындығы ашылды ма? Сыртқы саясаттағы проблемалар қандай?

Осы және өзге сауалдарға шолу жасап, жауап беруге студияға саясаттанушы Шалқар Нұрсейіт келеді. Тікелей эфирді Азаттықтың әлеуметтік желідегі парақтарынан көріп, сұрақ қоюға болады 👇🏻

🔗Сілтеме

t.me/azattyq

Azattyq - Азаттық

09 June 2023 08:42

Астанада митингіге шықпақ болған белсендіні полиция ұстап әкетті

9 маусымда "Алға, Қазақстан" оппозициялық партиясын құру жөніндегі бастама топ өкілі Венера Жанбаева әлеуметтік желіде тікелей эфирге шығып, митингіге шығатынын айтқан. Белсенді үйінің алдында өзін жай киімдегі адамдар жеке көлікпен күтіп отырғанын видеоға түсірген.

Видеода белсендінің артынан ер адамдар қуып бара жатқаны байқалады. Видео сол жерден үзіледі. #БелсенділерЭкстремистЕмес тобы белсенді ұсталғанын хабарлады.

Венера Жанбаева видеода өзін кеше, 8 маусымда полицейлер жұмысынан алып кеткенін айтады.

Астанада халықаралық форум өтіп жатқан тұста полиция кешеден бері Алматы мен Астанада белсенділерді ұстай бастаған. Құқық қорғаушылардың айтуынша, 8 маусымда екі қалада кемінде 14 адам ұсталған. Ақпаратқа қарағанда, белсенділерді полиция үш сағаттан артық уақыт "заңсыз ұстап", хаттама толтырмай, кешке қарай босатқан.

Полиция әзірге ұсталғандарға қатысты түсініктеме бермеді.

t.me/azattyq

Azattyq - Азаттық

09 June 2023 08:06

Абай облысында орман өртіне байланысты үш ауылдың тұрғындары үйлерін тастап кетті

Облыстық әкімдік баспасөз қызметінің хабарлауынша, Успенское, Поднебесное және Барышевка ауылдарының тұрғындары баспаналарын тастап кетуге мәжбүр болған. Олар қазір туыстарын сағалап отыр.

9 маусымға қараған түні Бородулиха ауылындағы мектеп пен колледжден эвакуациялық пункттер ұйымдастырылған. Өртті сөндіруге шамамен өртпен күрес қызметінің жеке құрамының 300 өкілі, 70 шақты техника, үш тікұшақ жұмылдырылғаны айтылады.

t.me/azattyq

Azattyq - Азаттық

09 June 2023 07:20

Бестөбеде полиция мәдениет үйі алдында тұрған халықтан тарауды талап еткен

Алайда тұрғындар наразылығын жалғастырып жатыр.

t.me/azattyq

Azattyq - Азаттық

09 June 2023 06:35

WSJ: Қытай АҚШ-ты бақылау үшін Кубадан құпия база ашпақ

Қытай Кубада АҚШ-ты бақылауға мүмкіндік беретін құпия база ашады. Бұл туралы The Wall Street Journal (WSJ) басылымы дереккөзіне сілтеме жасап хабарлады.

Ақпаратқа қарағанда, Пекин мұндай нысанын Кубада орналастыру үшін Гаванаға бірнеше миллиард доллар береді. База радиолокациялық бақылаумен шұғылданып, түрлі байланыс каналдары, оның ішінде спутник арқылы жүргізілетін сөйлесулерді ұғуға лайықталған.

Дереккөз мәліметінше, Қытай нысаны АҚШ-тың Флорида штатынан 160 шақырым қашықтықта жайғасып, ол жақтағы америкалық әскери базаларға және кемелердің қозғалысын бақылауға да мүмкіндік береді.

t.me/azattyq

Azattyq - Азаттық

09 June 2023 05:53

Тоқаевтың төрт жылы: сынағандарды қудалау, адам құқықтарын таптау, оппозициясыз сайлау, іргесі сөгілмеген авторитаризм

Бүгін – Қасым-Жомарт Тоқаев алғаш рет президент сайлауына түсіп, жеңіп шыққан күн. Елді 30 жылдай басқарған Нұрсұлтан Назарбаев 2019 жылғы наурызда кенет биліктен кеткен соң президенттікке келген ол осы күні сайлауға түсіп, жеңіп шыққан. Төрт жылда не өзгерді? Шолып шығайық.

🔗Сілтеме

t.me/azattyq

Azattyq - Азаттық

09 June 2023 04:31

Құқық қорғаушы Бақытжан Төреғожина 8 маусымда ұсталған белсенділердің тізімін жариялады.

Ондағы мәліметке қарағанда, Алматыда 5 адам: Әсет Әбішев, Бибігүл Иманғалиева, Күміс Құлманова, Бауыржан Ахмедов, Сағадат Тәукебаева, Астанада 9 адам: Сейілхан Түсбеков, Мереке Нұғыманов, Эльвира Бекзадина, Венера Жанбаева, Ғалия Тамабаева, Әлішер Әбірахмонов, Бейбіт Тұрсынов, Әсел Оңланбекқызы, Мұратхан Мерон ұсталған.

Бұған дейін бірқатар белсенділер Астана халықаралық форумына орайластырып, саяси тұтқындарды босатуды, оның арасында Марат Жыланбаевты да босатуды талап етіп, митинг өткізетінін мәлімдеген. Олар осылайша шетелдік саясаткерлер мен дипломаттардың назарын Қазақстандағы адам құқығы ахуалына аудартқысы келген.

Алайда олар бейсенбі күні таңертеңнен бері ұстала бастаған.

t.me/azattyq