1561
شبّت اسنيني وكبرت بشوگك اعوام بفضلك انا وكل هلي نتسمه خدام السلام عليك يا ابا عبدالله الخاص @ayadderawy
استشهاد الزهراء ع
من يجي المهدي غداً ينتقم لام الحسن
ما بين الملاين يصلب بيده الثنين
ينتقم لام الحسن
****
ابقائمته الامام اهواي وادم بس كتبها اذياب
من عمق السنين بسيف يحاسبهم گبل الحساب
الجمّع حطب للزهره ايجيبه ايعلگه فوگ الباب
يا أهل الأرض شوفو من ذوله ابتده المصاب
تنجمع كل البشر ايعاينون المنتظر
يطلبهم تره دين يصلب بيده الثنين
ينتقم لام الحسن
****
وي صوت الوحي جبريل المهدي يصيح ومتاني
بچف حيدر تره اتعنيت حان الوعد يالجاني
من صحن النبي المختار ايطلع جثة الثاني
وينادي برفيع الصوت هذا اكثرهم اذاني
گلبي حيل امألمه هذا ضارب فاطمه
بجرحه عايش سنين يصلب بيده الثنين
ينتقم لام الحسن
****
يبدي احسابه غايبنه اهناك بفدك عالشجره
الباگ الگاع من امه بخزرة حيدر ايخزره
بسوط البي وگف عالدار واتكشخ عله الزهره
بنفس السوط ابو صالح يجلد حيل بي ظهره
انه محكمة العدل ها هنا حان القتل
احسابهم حسابين يصلب بيده الثنين
ينتقم لام الحسن
****
ابذاك اليوم كلها شهود باب الدار والمسمار
شبوني يصيح الباب واحرگت الزچيه ابنار
والمسمار تالي يصيح دفعوها علي بصرار
بضلوع ام حسن طبيت وبيها الزهره كلشي انهار
إلنفس منها انگطع وعالارض محسن وگع
ما يكفّن سيفين يصلب بيده الثنين
ينتقم لام الحسن
****
الزهره ابين موت ونار تنخه الوصي ما تگدر
بين ال وإن والشتمات بالمحسن غدت تعثر
مجبور الوصي الكرار عن الزهره يتعذر
حيدر بالوصيه انگاد وتالي چتفوا حيدر
المهدي ثاراته اشكثر ايقدموله يا عذر
حيدر حگه چا وين يصلب بيده الثنين
ينتقم لام الحسن
****
يصلبهم ولكن ثار هذا الما طفت ناره
المهدي يصيح اه يحسين ورايه ايشيلها الثاره
احفاد الهذول اهواي هد كلمن ابّتاره
بيوم العاشر بعاشور جده دمومه تتجاره
بخنجر انحز النحر وصدره بالخيل انكسر
هذا ثار الحسين يصلب بيده الثنين
ينتقم لام الحسن
****
الشاعر اياد الديراوي
استشهاد الرسول (ص)
بويه كل دمعچ عليه لا تهلين
اول اهل البيت للجنه تروحين
ضلعچ بعدي ينصاب ضمي الحيل للباب
يبويه يبويه
****
ادري بويه اموادع الوالد اذيه
وادري تتمنين موتتنه سويه
كلها ايام وتجيني يالزچيه
شلون جيه وشايله انواع الرزيه
هسه لفراگي بچت عينچ يزهره
لكن بيوم التجيني اعليها سطره
يفتت گلبي لصواب ضمي الحيل للباب
يبويه يبويه
****
مو وكتها الونه يالزهره الحبيبه
مو مصيبه افراگي بس بابچ مصيبه
الگال اهجر حظر احچايه عصيبه
مات ابوها فاطمه وهسه غريبه
اي غريبه والصبر يبنيتي لازم
بابچ يحرگه وان موجوده فاطم
ادري وحاسب احساب ضمي الحيل للباب
****
الدنيه مُرّه واجهيها بدمعه مُرّه
چم مصيبه اتلوعچ والباري ادره
بابچ وبسمار والمحسن يزهره
وما يحظرچ حيدر وخانگته عبره
لا تندبينه تره عنده وصيه
بالصبر مچتوف حماي الحميه
تخونه كل الاصحاب ضمي الحيل للباب
يبويه يبويه
****
فوگ گبري فاطمه لا يعلى ونچ
ضمي حيلچ يالعزيزه وهذا حزنچ
هواي منچ دمع يطلب بويه ضلعچ
وتنترس هاي العبايه بفيض دمچ
صرخه من باب السمه راح استمعها
يا محمد فاطمه كسرو ضلعها
وانا بلحدي مرتاب ضمي الحيل للباب
يبويه يبويه
****
صبري ماهو بعيد يافطم لقانه
الله حظرلچ تره اوسع جنانه
انصب الضلعچ عزاء بنفسي انه
المجلسچ حتى العرش يبچي البچانه
السطرتچ والمحسن المذبوح ننعه
وكل نهر بالجنه بويه انترسه دمعه
يخلص هذا المصاب ضمي الحيل للباب
يبويه يبويه
****
الشاعر اياد الديراوي
يا كربله إتعنيت يلله تلگيني
كلّي حزن رديت لازم تعينيني
يارض المصايب وين الحبايب
لازم تعينيني
****
تلگيني بعدها بروحي لوعاتچ
البست تاج الحزن ياكربله بگاعچ
دخلتچ وانا بيه إتشرف اترابچ
واتسبّح بعدها ابسمي انفاسچ
منچ اريد الدين دليني بحبابي
وين الگمر وحسين دوهني إمصابي
اليمچ عفتهم خبريني عنهم
لازم تعينيني
****
اذا دمعه بجفن ياكربله تختل
يذكرونچ فقط والدمعه تبدي اتهل
لان بيچ اوگفت ما يوصلچ كل ذل
وكل لحظه ملايك تصعد وتنزل
ونتي مده الازمان للمؤمن العبره
بيچ انذبح عطشان ابن امي عالغبره
وحدي اجيتچ لو عاتبيتچ
لازم تعينيني
****
ما تنسين ظحكه الچانت بعيناي
هسه عيون كلها دموع اجت وياي
مهيوبه چنت ويايه كل ولياي
أصبح تالي ياوسفه ذهيلة راي
ياذكره من عاشور ياكربله انساها
سيوف ودمه ونحور بعيوني الگاها
حيلي فگدته والونه سكته
لازم تعينيني
****
لتظمينه عني گبر ابو اليمه
قِيَم سوالچ حسيني بنزف دمه
عينيني اريد اترابه اشتمه
وعسن روحي تروح او اندفن يمه
للطف يخويه جيت دم هلت عيوني
مو مثل ما طبيت چنتو تباروني
الگبره لفينه بيوم اربعينه
لازم تعينيني
****
اشوفن بس نهر ما شوفن اكفيلي
عجب ياكربله عن هايه احچيلي
چان بچفه من نهره يفيّلي
ورغم ما صار ظلت عينه تربيلي
هذا ابو النوماس هم شافته عيونچ
وين اندفن عباس ما كفته طفوفچ
بجروحي ونه دليني عنه
لازم تعينيني
****
الشاعر اياد الديراوي
https://youtu.be/EDjkNTs4m28?is=4fqcK3AT-QCQ81Aj
Читать полностью…
استشهاد الامام الحسن المجتبى ع
انه الحسن يا هالناس يشبهني بس العباس
بالسيف الي احچايه من احمل الرايه
يشبهني بس العباس
****
بالكرم ادري اتوزع عليكم صيتي
حيدر ابويه اشتطلع اذن تربيتي
ليش (الجمل) محد يسولف بيها
انه الگلبت الأول ابتاليها
ويه الدلال المعركه چافيها
للدله مو بس النار يجدح بديه الفقار
حيدر علي اويايه من احمل الرايه
يشبهني بس العباس
****
بثْلث حرايب راية ابويه ابايدي
وانه اصرخ اكثر يالله الكتايب زيدي
البصره فلا تنسه ابد قتالي
بعده عليها منرسم خيالي
رمحي ابشمسها الهل وكت يلالي
بالبصره سألو اشسويت بآل الزبير اشخليت
چان النصر غايه من احمل الرايه
يشبهني بس العباس
****
ثاني حروبي بيها انكتب عنواني
الشام وزلمها فنها إذا تنساني
وكت الزعل سألو عَلَي صفيني
باليمنه وحدي والدي امخليني
عل مهره يم عدواني تضحك عيني
حيدر يعاين مناك ويگلي يبني حياك
وسط الحرب آيه من احمل الرايه
يشبهني بس العباس
****
بين آل اميه ميداني كله ابكيفي
الشارد ميدري صار اتجاها السيفي
من كل كتر موت انه أطلع ليهم
مهله يشمون الهوه مَنطيهم
وي سيفي عزرائيل يحصد بيهم
كلها اتجاهي الدروب ايلاگوني صارو كل صوب
اتفنن ابهايه من احمل الرايه
يشبهني بس العباس
****
انه المنيه بسيفي صور ميعادي
الحمله الاخيره بالنهروان امجادي
تاريخي خله ايسولف البطوله
اشمحلاته سيفي اعله الكفر نزوله
اكتاب الله احنه انرفعه لا مو ذوله
للخرجو انطيت ادروس اگطع واردّن بالروس
سيفي عِله إفيايه من احمل الرايه
يشبهني بس العباس
****
اليسألني رايد خل يستمع للآتي
من زغري آني لابس هذن ريشاتي
ابدم الزلم وسط الحرب صابغهن
بس الكفل إختي كفو صار الهن
باچر عضيدي اعله النهر يلبسهن
يصرخ غداً بالخيمات انطاني الحسن هالريشات
هوه اليدگ ثايه من احمل الرايه
يشبهني بس العباس
****
الشاعر اياد الديراوي
https://youtu.be/70n5l3TAVes?is=2PLoxNkZziTzvGLa
Читать полностью…
الامام السجاد ع
للزمن حكايه انتصرت السبايه
اختمنه ثورة حسين بالعصا وعبايه
****
احنه لِكسرنه الظلم لا ما كسرنه
بعده مرفوع ويرف عالي علمنه
ظنو إهمه الفازو بذبحة زلمنه
ما درونه ننتصر من ننطي دمنه
آنه والعقيله اصرخنه عالهزيله
نهدم آل اميه بالعصا وعبايه
****
الله ما بين الأهل وزّع رسايل
جنوده مو لازم تحارب بالبواسل
آنه دور حسين اخذته وبالمقابل
عمّتي زينب خذت دور ابو فاضل
آنه الي الرساله وعمّتي الكفاله
الله قرر انفوز بالعصا وعبايه
****
عالرماح الروس ويانه ومشينه
ثوره عدنه وبالحبال امچتفينه
ادخلنه لبن ازياد واخزرناها عينه
احنه احد من كل صوارمهم حَچِينه
صاحت الاميره دولتك گصيره
نكتب احنه تاريخ بالعصا وعبايه
****
بالسبي سوط اليجينه ما نرده
ابيا محمد يا علي صرنه نصده
الضحى بالعباس وحسين اشيهده
لو الف منه يزيد احنه النبدّه
خيرة الله احنه ياهو بالله گدنه
عدنه عزم ابو حسين بالعصا وعبايه
****
ايزيد عنده جنود وآنه عندي چلمه
بالقصر خطبه نطيت وباد عزمه
الهادي جدي گتله جدك شنهو اسمه
الزهره امي وهو ياهي بالله إمه
طينتي أمينه وطينته لعينه
كل شرفنه مرسوم بالعصا وعبايه
****
يوم عاشر اي صحيح اكبر رزيه
لله كلشي انطينه حتى اختي رقيه
بالثريه احنه وخصمنه بالوطيه
وين آل المصطفى أوين آل اميه
فزنه بالبدايه وفزنه بالنهايه
كلشي هسه مكشوف بالعصا وعبايه
****
الشاعر اياد الديراوي
السلامُ عله الحرگو خيمها
السلامُ عله الذبحو زلمها
السلامُ على ام الخدر
****
السلامُ عل بچت والدمعه حمره
هاي اخوها ال ابو فاضل كسر ظهره
گد سهام حسين بالطف الها عثره
وين ما تمشي جدمها يدوس جمره
السلامُ عله الدمعه الغريبه
السلامُ عله ام عون الحبيبه
السلامُ على ام الخدر
****
السلامُ عل متن ذاك التورم
وين تشرد وحترگ كل المخيم
وحشه كل الناس ذيچه لا مترحم
الرضيع وما سلم چا هيه تسلم
السلامُ عله المحد رحمها
السلامُ عله الفايض المها
السلامُ على ام الخدر
****
السلامُ عل مشت صوب الشريعه
اتخبر العباس رادت بالفجيعه
شافته وضاگت عله الحره الوسيعه
فوگ صدره الجود وچفوفه گطيعه
السلام عله الكافل اخوها
السلام عله البيه افجعوها
السلام على ام الخدر
****
السلامُ عل اخوها مگطعينه
بالحوافر جسمه ويلي مطشرينه
الغالي راسه اعله الرماح امعلگينه
لو معطره چان ما عرفته وينه
السلامُ عله الفجعو گلبها
السلامُ عله التايه دربها
السلامُ على ام الخدر
****
السلامُ عللي صعدت عالهزايل
وسفه ما صعدها بچفوفه ابو فاضل
عثرت وهجمو يشمتون العواذل
سمعوها زينب انتي بلايه كافل
السلامُ عله الحملت حچيهم
السلامُ عله الصبرت عليهم
السلامُ على ام الخدر
****
السلامُ عللي كعدت بالخرايب
لا سگف لا دنيه ظل بيها سحايب
ايوگفوها وسفه تالي بنص اجانب
وين زينب والدواوين ومصايب
السلامُ عله الوگفت اسيره
السلامُ عله الحسره الچبيره
السلامُ على ام الخدر
****
الشاعر اياد الديراوي
شور
ليلة الوحشه
عينوني يخواني عينوني يخواني
****
شوفوني ... انه الاخت لمدلله ... شوفوني
بعيوني .. طب الرماد امن الخيم .. بعيوني
صعدوني .. يهل الشيم فوگ الهزل .. صعدوني
گومو يالاخوان نظرو اعله حالي
الما بان الي اخيال مسبيه تالي
عينوني يخواني عينوني يخواني
****
حرگوها .. حتى العبي ويه الخيم .. حرگوها
ترضوها .. حفاي نمشي اعله الجمر .. ترضوها
عينوها .. الورم متنها امن الضرب .. عينوها
التمت علي ناس انطي الوجه وين
وينك يعباس وينك يالحسين
عينوني يخواني عينوني يخواني
****
يا شيمه .. گلولي وين انطي الوجه .. يا شيمه
يا خيمه .. بيها انستر من الشمر .. يا خيمه
بس هيمه .. وين اشرد بهاي الحرم .. بس هيمه
وين المفر وين هدوها الخيول
تسحگ بالاطفال وعليهم اتجول
عينوني يخواني عينوني يخواني
****
جابونه .. غصبن علينه للجثث .. جابونه
خلونه .. نبچي وندگ اعله الوجه .. خلونه
راوونه .. فوگ الرمل كلكم وذر .. راوونه
والله تمنيت بعيوني ما شوف
واحد بلا راس واحد بلا چفوف
عينوني يخواني عينوني يخواني
****
يخواني .. كلمن يمر يضحك عَلَي .. يخواني
جراني .. امن چفوفي بحبال الشمر .. جراني
اذاني .. يتمرجل ويشتم علي .. اذاني
تاليها للشام والحيره حيره
وسط الخرايب اگعد اسيره
عينوني يخواني عينوني يخواني
****
الشاعر اياد الديراوي
نزله
ليلة الوداع
خيماتچ ياهو اليوصلها
بعد اعيوني عباس الها
****
بعده ما مات يزينب ابونه حيدره
باچر ايعيد اخونه ملاحم خيبره
من وكت باچر انشوفه يوم الاخره
طفه عباس يگلبه يزينب مگبره
هاي اعدانه كلها ايذلها
بعد اعيوني عباس الها
خيماتچ ياهو اليوصلها
بعد اعيوني عباس الها
****
الرايه من هسه بچفوفه خويه هوست
الغيره لو طگ عرجها احسبيها گضت
كربله ازغيره وي طويت الثامه انطوت
شافِته المشرعه يالعقيله وهلهلت
صاحت واتدور كافلها
بعد اعيوني عباس الها
خيماتچ ياهو اليوصلها
بعد اعيوني عباس الها
****
ذوله سبعين الف لا يغرچ هل عدد
هذا ابو فاضل ابسيفه للحومه استعد
لو نزل ليهم ايگلهم انطوني بعد
ياهو ليرده لو صاح يبو الحمله مدد
ينزل عزريل ايچملها
بعد اعيوني عباس الها
خيماتچ ياهو اليوصلها
بعد اعيوني عباس الها
****
لا تحَسبين حِمل جوده عباس الگمر
لسه ما صارت وآنه شفت اروع صور
من رگبته يكظه وايجيب النه النهر
يعني ماكو عطش لا علينه اي خطر
وارياجچ راح ايبللها
بعد اعيوني عباس الها
خيماتچ ياهو الوصلها
بعد عيوني عباس الها
****
نظري يازينب اهناكه صوب الميسره
مو حرس ذوله لا والزچيه وحيدره
اربع آلاف يتانونه سبع الگنطره
كظو إلسيف ابو فاضل اهناكه سره
والروس اتحزم يفصلها
بعد اعيوني عباس الها
خيماتچ ياهو اليوصلها
بعد اعيوني عباس الها
****
ابحضنه عباس يزينب بده ايلم الهوه
كلشي يوگف غدا ما يرف غير اللوه
عنده نيه واعرفنه كافلنه اشنوه
امن الخريطه حلف اله امسح نينوى
وإباسمه ايريد ايبدلها
بعد اعيوني عباس الها
خيماتچ ياهو الوصلها
بعد اعيوني عباس الها
****
الشاعر اياد الديراوي
نزله
ليلة الوداع لحن ( سمعي يامي فاطمه)
شلــون ما هل الدمع صعبه يافرگة هلي
آنه وين انطي الوجه عيلتــي من تنولي
آنه زينب بت علي ... اصبر شلون
****
من زغر مدمع اصبه شگد تعذب هالگلب
آنه بت حامي الحميه وضعي تدرونه صعب
والله صعبه يا اخوتي من تعيفوني ابغرب
شلون اصابر وآنه باچر انظر الكم عالترب
فوگ همي إشچم جرح والجرح يچويني
لا عمر يـــرحـــم بعد لا هلي إتواسيني
دهري بيه ما نصف ... اصبر شلون
****
ليل الموادع اريدك تبقى بس ماكو صبح
هذي اخر ليله الهم آنه احمل يا جرح
أبتدي بيمن اودع يا صبر بعد اليصح
آ يعبدلله يغالي ابنبله باچر تنذبح
ليش طفل البالمهد باچر إيفطمونه
والدمــع خلّه يهل حالي لتلومونه
آنه ليلي لو خلص ... اصبر شلون
****
تودع الحره العقيله ظلت بنوح ودمع
واختفت ونتها زينب والمصايب تنجمع
القاسم اتحنيله چفه لو تطفيله الشمع
لو علي الاكبر تودعه اتشوفه باچر ينصرع
عمه جاسم منحرك بالدمه ايحنونه
وانته مثله يا علي راسك ايگطعونه
باچر ابطف كربله ... اصبر شلون
****
راحت الكافل ضعنـــها اتگابلت يمه إبـــألم
انته بس هالليله خويه تحرس النه هالخيم
انته يـــــاعباس بـــاچر تطفه عينك بالسهم
ينگطــــــع چفك يغالي ومنك ايطيح العلم
منهو يكفلنـــي بعد منهو يحمي اعيالي
بعدك آنه ابياوضع صدلي وارحم حالي
من تطيح اعله النهر ... اصبر شلون
****
ظلت اتحاچـــي گلبها يـــــاگلب شيصبرك
من اجــــت يـــم ابو اليمه اتگله الله ايآجرك
شلون اشوفـك واليرفسك يگعد يحز منحرك
سهم المثلث اشوفه من تطلعه إمن اضهرك
خويه انته اعله الرمح راسك ايرفعونه
واحنه چن فوگ الـهزل باچر ايطلعونه
تنذبح وآنه انسبي ... اصبر شلون
****
الشاعر اياد الديراوي
https://youtu.be/bQszFTJrduo?is=VgUW74iIM0nF1kU9
Читать полностью…
آنه شيعي والله خالقني حسيني
****
أحمِد الله بالمجالس عمري كله
هل فخر آنه المماتي راح احمِله
العاذل اليتعنّه چلمه أرد أگله
بالذهب عشگي الحسيني ما ابدله
دنيتي هوّه الحُسين وهوّه ديني
****
ابعالم الذر آنه مو هسه خِدَمته
گبل لا امي شفتها حسين شفته
والله كل خادم تره يآخذ رِتِبته
عمري يطْول آنه لو صدري لطمته
تاجي يكبر ويه دمعاتي او ونيني
****
انطوني واحد مثلي هالدنيا تِهابه
اليخدم حسين بصدق يبقى ابشبابه
من اعيشن دور عابس الگه بابه
معجزات السبعه ما توصل ترابه
منهو بالله اليگدر ايبدل يقيني
****
للعشيره البيها ما اگول انتمائي
حسين شيخ الدنيا وانطيته ولائي
إرتجيته ودمعتي تعلن رجائي
ابدفتره يكتبني حر وكربلائي
تسوى كلشي عندي لو صافح يميني
****
الله بين الناس وزعها نِعِمته
الدوّر الأموال تبقى الحد دفنته
آنه مطلب چان عندي والطلبته
انطيني من حسين ربي بس خدمته
حسيني باچر بالگبر هوّه اليجيني
****
بالطفوف إدروس عايشها بحياتي
بين حق او باطل اتخير مماتي
بيوم عاشر ياخلگ شفته نجاتي
الخدمه ما تكمل تره اله ابصلاتي
من اتبعه حسين ما ضيّع سنيني
****
الشاعر اياد الديراوي
القاسم ع
وصيتي هايه يا عمي مصيري كاتِبه عودي
ارخصني يبو السجاد اطب الحومتي ابزودي
****
الهلاهل ما اريدنها اريدن رنت الصارم
اريد الحنه بدمومي الشمع خل ينفع الوادم
بارينه يبو السجاد لعيونك خلق جاسم
اريد أجيال تقراني وتفهم هذا مقصودي
****
غريب انته يبو اليمه عنك حاشه اتخله
اليموت ابين چفينك روحه اللي تظل عدله
والما يعتني اينصرك يعيش الدنيا بالذله
وآنه ابين هاي وهاي وضح يحسين مجهودي
****
العقل مو بالعمر ينقاس المواقف هيه تتسيد
الالف سبعين كلها اكبار لچنها امن الحقيقه ابعد
صحيح ازغير أنه يحسين لچن بيك الگلب ينشد
عله اتراب التدوس اعليه شرف ينحطن اخدودي
****
اذا طفي شرب دمي معنها انتصرت اوياك
واذا گلبي عطش يحسين تگلي فاطمه حياك
واذا راسي ترفعه ارماح معناها فزت برضاك
وسام التضحيه شديت يبو اليمه عله ازنودي
****
گبلك ريت عشره اخيول يسحگن سيدي صدري
وگبل نحرك خناجر موت كون ايباتن ابنحري
السهم كون ابدليلي يفوت وسحبه من خرز ظهري
وعد منطيك آ يحسين وابد ما اخلف اوعودي
****
الشاعر اياد الديراوي
ابو ذيه
ابصمت لحسين من زغري بهاماي
اليخدمه اواياي اشيلنه بهاماي
هاي العين منذوره بهاماي
تبچي اعله الذبيح ابن الزچيه
****
الشاعر اياد الديراوي
استشهاد الرسول ص
ادري ابدليلك مجروح هل الترب فوگي وروح
يا بالحسن لا تحتار ساعه ويشب باب الدار
هل الترب فوگي وروح
****
روحي عدله واستمع وناتك
الفاطمه ظمهن علي آهاتك
يا علي گوم اعله حيلك وانفظ اتراب الدفن
لا يون گلبك عليه لم حسن كونك تون
الگال تهجر يا محمد فاطمه ايگلها (وإن)
يم الگبر يابو حسين ما تنفع ادموع العين
گومي بده ايلم النار ساعه ويشب باب الدار
هل الترب فوگي وروح
****
يمي لا تحني الظهر يا بالحسن
فگدي يا حيدر بدايات المحن
يا جبل واكبر اعرفك يا علي حان الصبر
منكسر ظهرك اشوفه فاجئتني ابهل امر
إلحگ الزهره يحيدر ماهي لحظه وتنسطر
ليش اعله وجهك مگلوب عزمك يحيدر مطلوب
بالشده انته الكرار ساعه ويشب باب الدار
هل الترب فوگي وروح
****
ابدارك إبقه ولا تخالط إمتي
دورك انته تلتزم بوصيتي
اشما يصير ابدارك اصبر السيف بالك يعتلي
مثل ما وصيتك انه الزهره عدها اوصيه الي
من يكسرونه ضلعها ما تندبك ياعلي
بسمك اذا صاحت صوت بچفوفك الإمه اتموت
انطيتك يحيدر اسرار ساعه ويشب باب الدار
هل الترب فوگي وروح
****
الونة ام حسين ادري تنفجع
الزهره تحتاجك لمن ينطر ضلع
من تصيح الزهره ضلعي يا علي صب دمعتك
ابنيتي يم الباب توگع احظر الها ابلهفتك
والجنين اتشوفه طايح يالولي يم عتبتك
ابطيحتها اريدك موجود بدمعاتك اجرح الخدود
تلگه اثر للمسمار ساعه ويشب باب الدار
هل الترب فوگي وروح
****
ويه حزنك تحزن الليله السمه
بالظلام ادفن يحيدر فاطمه
يا علي اخفي گبرها خلها تبقه ابلا گبر
انه والكسرو ضلعها نختصم يوم الحشر
السللبوك امن الخلافه يعتنولي ابيا عذر
هالدنيا حسبوها اتدوم الظالم يلاگي المظلوم
نتلاگه يم الجبار ساعه ويشب باب الدار
هل الترب فوگي وروح
****
الشاعر اياد الديراوي
استشهاد الرسول ص
( عگيلي )
گومك شبو نار ابابك
گومك شبو نار ابابك
****
من غمْضت عينك يالهادي
طاحت هاي الامه بوادي
بس حيدر للحگ اينادي
انكشفت يالمختار اصحابك
****
نهجك بابو العتره اتغير
الباطل فوگ الحگ اتصدر
الگلك تهجر وسفه اتبختر
وما ناشف لساته اترابك
****
بعدك صار ايحقق طيفه
ظل ايشرّع وسفه بكيفه
لجل السلطه جرد سيفه
حيف ارخيص ابعينه امصابك
****
قرآنك چان الهم غصه
يدرون الكرار اموصه
يالهادي اغتنموها الفرصه
التمو كلهم يم اعتابك
****
هجموا ياويلي اعله البضعه
واحد گال الباب اندفعه
وگال الثاني الباب انقلعه
ما تدري اشسوو بحبابك
****
آسف باب الزهره اتكسر
وبنيران الگوم اتوجر
خد فاطم بصواب اتفطر
بانت غايتهم بغيابك
****
فجعو بنتك يابو العتره
ابسمار انطر ضلع الزهره
وطاح المحسن فوگ الغبره
يشبه ويلي اصوابه اصوابك
****
انبث اخبار احنه ونتأسف
حيدر يابو الزهره اتچتف
ضيم الشافه ما يتوصف
اتعذب يالمختار اكتابك
****
الشاعر اياد الديراوي
الأربعين
ما بين الگبور حيل إبچي ياعين
آه اعله عباس وآه اعله الحسين
****
يعين ابچي عسن بيچ اجبر الخاطر
شفت خوّاني آخر مره بالعاشر
بهذاك اليوم ريته منعمي الناظر
اهنانه حسين اخويه انداس بالحافر
اذكرها لخيول سحگنه مرتين
آه اعله عباس وآه اعله الحسين
****
الدرب للشام احسّب ليش ما ميته
مصاب المحد يشوفه أنه الشفته
حدر خنجر إخوي حسين ودعته
عله صدره الگعد ظل يشتم اسمعته
اندهته يذباح حقدك وصل وين
آه اعله عباس وآه اعله الحسين
****
سياط الورّمن عل الهزّل متوني
ولا هميت كل اعداي يدروني
نسوني بكربله اويه اخواني ذبحوني
موتوني ولكن عاشن عيوني
يم طول الارماح ودعت السنين
آه اعله عباس وآه اعله الحسين
****
وحگ عباس جرح البيه ما يشفه
الشوفت كافلي يا عين الي لهفه
عفته اعله النهر والراس بي خسفه
لجل اضماي ابو فاضل وگع چفه
يم النهر طاح مگطوعه چفين
آه اعله عباس وآه اعله الحسين
****
من الخيمه للشط ويلي چم عثره
هاي آثاري يا عيني عله الغبره
جبتله اليوم اخوي دموع بس حمره
اريد الطم وادگ الراس يم گبره
بعينه السهم نام آلامه للحين
آه اعله عباس وآه اعله الحسين
****
اريد انثر عليه اتراب أهالينه
واشكي اشسوه لخواني الدهر بينه
الزلم طول الوكت تتفرج اعلينه
وهذا اليوم دون ارقيه ردينه
ادفناها بالشام كون احنه ميتين
آه اعله عباس وآه اعله الحسين
****
الشاعر اياد الديراوي
https://youtu.be/qNyGMT199gA?is=hZ_WakgB12ZGhv2T
Читать полностью…
استشهاد الامام الحسن المجتبى ع
يم الحسن حيدر حظر وإم الحسن
التمو هله بس للاسف لمة محن
نوح يم بابه . نوح لحبابه . نوح لمصابه نوح
****
حين انسمّت الچبده وگبل لا يلفظ انفاسه
الحسن شاف الزچيه تنوح وتلطم لنها يم راسه
وعلي متعني بالطبره الالم ينشاف باحساسه
نظرله وصاح يوليدي وعله اجبينه علي باسه
دمعة ابو والام بدن يتگابلن
التمو هله بس للاسف لمة محن
نوح يم بابه . نوح لحبابه . نوح لمصابه نوح
****
اجته ابيا وضع امه مكسور الضلع بعده
نست الام سطرتها وتنوح المجتبى وچبده
آآ يوليدي يالمظلوم شده امصيبتك شده
تفطر گلبي يا يمه جرحك هذا شيضمده
ابعيني ولا يحلى تره غير الشجن
التمو هله بس للاسف لمة محن
نوح يم بابه . نوح لحبابه . نوح لمصابه نوح
****
الزهره حضنت الحره الله ايصبرچ اتگلها
امصاب الحسن هد حيلچ چا كربله اشيحملها
زينب من حزنها اتميل والزهره تعدلها
ضمي الحيل لخيامچ اهناك الشمر يشعلها
مسحي الدمع لسه تره عندچ وطن
التمو هله بس للاسف لمة محن
نوح يم بابه . نوح لحبابه . نوح لمصابه نوح
****
انفاس المنيه اتلوح ينظرونه الاهل صعبه
تغيرت حيدر الوانه عله اوليده انفطر گلبه
بيده ايغمض اعيونه ودمع احمر عليه صبه
الحسن مظلوم صاح ابصوت بيش الوادم اتطلبه
من البچي حيدر علي اعيونه انعمن
التمو هله بس للاسف لمة محن
نوح يم بابه . نوح لحبابه . نوح لمصابه نوح
****
عاين حيدر اعله حسين شاف دموعه هماله
شد حيلك يبو اليمه حالك اشد من حاله
الحسن ساعه وتدفنونه اخوتك كلهم ابجاله
وحدك انته بطفوفك وتهد اعليك خياله
بالحافر اضلوعك غدا يتكسرن
التمو هله بس للاسف لمة محن
نوح يم بابه . نوح لحبابه . نوح لمصابه نوح
****
التمو عالحسن كلهم الهواشم كلها مفجوعه
ابو محمد گضه نحبه المصابه الصرخه مسموعه
ذاك ايصيح يوليدي وذاك اليذرف ادموعه
فقط الحسين والزهره كلمن لازم اضلوعه
كل واحد ابجرحه حچه آخ الزمن
التمو هله بس للاسف لمة محن
نوح يم بابه . نوح لحبابه . نوح لمصابه نوح
****
الشاعر اياد الديراوي
استشهاد الامام الحسن المجتبى ع
آنه فاطمه البضعه
ادور للحسن دمعه
شو محد عليه ينعه .. ابو القاسم
وسفه بالسنه مره
الشيعي ايدگ اله صدره
لازم كل وكت ذكره .. ابو القاسم
****
اعاتبكم يشيعه وگلبي مجروح
دمع عيني تبدّه
بصفر سابع تراها امصيبته تلوح
ياهو الحرگه عنده
مو لازم يطيح الحسن مذبوح
وجب كلنه نسنده
يستاهل عليه الوادم اتنوح
تگطع إبني چبده
نِعاشر لازم امصابه
ادور دمعة احبابه
يوجع گلبي إصوابه .. ابو القاسم
****
لساها يشيعه حمره هالعين
ما عايزها مدمع
ولدي اعزاز ما فرق بالاثنين
الهم آنه اجزع
صح امصابه اعظم ابني الحسين
بطفوفه تگطع
بس ابني الحسن مظلوم للحين
قلّه الونه اسمع
صح ما سالت دمومه
ومحد سلب اهدومه
بس سل الگلب يومه .. ابو القاسم
****
تراه اليوگع بنص داره مسموم
ياشيعه مصيبه
العاشت يمه وي عدوانه إتحوم
معناها غريبه
ابو محمد وحگ ضلوعي مظلوم
بس هذا نصيبه
الغابت عنه كلهن ذني العلوم
خل يبدي بنحيبه
الغايب هالحزن عنه
اريد اسمع اله ونه
والله يدخلك الجنه .. ابو القاسم
****
احظر كل عزيه وضلعي مكسور
ومحسن بين اديه
الكل مجلس اجي مو فقط عاشور
تره اچبيره القضيه
ليش الدمعه كلها الكربله تفور
صح زينب سبيه
بس الحسن عاش ومات مغدور
جرحه اشكبره بيه
يالرايد تواسيني
بالآهات عزيني
صيح وحيل بچيني .. ابو القاسم
****
يشيعه الحسن بالطف چان موجود
عاش بروح ولده
روحه اتنقلت ما بين الحيود
ثوره اوليدي عنده
وي عباس صاب الهامه عامود
وگطعو منه زنده
السهم طره وگع مچفي من الجود
وجاس الرمل خده
حاضر چان بالعاشر
تخوصر ما اله ناصر
صدره اتهشم بحافر .. ابو القاسم
****
حگي من اناشدكم يالحباب
بي لوعه خطابي
جمره البيه مو من حرگت الباب
ما اذاني بابي
الحسن يهضمني گبره بعلو التراب
هذا اكبر عذابي
كون بكل مسيه الدمع سچاب
عينوني بمصابي
واسو فاطمه الزهره
بالونات والعبره
مخفي اويه الترب گبره .. ابو القاسم
****
الشاعر اياد الديراوي
عظيمه بت علي عظيمه بت علي
****
آنه إختك زينب آنه بت علي
عالهزيله يالگمر راح انتقم
ابطيحتك عباس ضنوني اطيح
امچتفه وذليت ياخويه الزلم
أنه السيف ما شلته شلت هيبة علي
يشوفوك بخْيالي منو اليوصل الي
متهم غربتي تذبح دمعتي
اشما مسني السوط تكبر قدرتي
عظيمه بت علي عظيمه بت علي
****
آنه حرمه بس چلمتي اتهز جبال
علمتني يالگمر ما انكسر
مثل ما شهدتلك ارگاب الرجال
الكوفه شهدت آنه هديت القصر
يعباس وعيونك حميت العايله
اخيتك معروفه ابچلمتي المرجله
آنه العقيله بس عندي شيله
الكوفه وزلمها صارت ذليله
عظيمه بت علي عظيمه بت علي
****
ان چان واصلك خبر عن الخيام
اي يخويه احترگت ودست الجمر
احلف ابراسك يبو الغيره مشيت
ما عثرت ورايتي چان الصبر
حشه النار تچويني چويت آنه الدرب
يكفال تدريني ربيت اعله الصعب
بارد جمرهم احتارو بأمرهم
مني يعباس شردت زلمهم
عظيمه بت علي عظيمه بت علي
****
ابگطعت چفوفك يبو فاضل بچيت
طاح وياهن يعباس الدلال
ادري صوتي اتسمعه خويه من اصيح
هاي مو صدفه اعله چفيني الحبال
اواسيك بجروحي النصر يطلب دمه
ولا يكفي دمعي الوضع تتفهمه
عفته دلالي العينك يغالي
بهذا مصابي نلت المعالي
عظيمه بت علي عظيمه بت علي
****
باليسر راسك يماشيني واشوف
ايميل يا عباس خويه اشما ملت
من دخلنه الشام ظل رمحك يفور
نزف نحرك بالخرابه امن اگعدت
يعباس ليهمك تصدرت القمم
يزيد وطغيانه يبو الغيره انهدم
گعدت خرايب سوت عجايب
انتصرت يخويه ام المصايب
عظيمه بت علي عظيمه بت علي
****
الشاعر اياد الديراوي
https://youtu.be/x5bf3tAXsCA?is=ny-LRY7Cl1QcCm6t
Читать полностью…
موشح
ويه نحرك سولفت وابچينه
وعالرمح راسك يدور ابعينه
****
الآه البصدري وحگ طولك جمر
امنين اباوعلك يخويه ابيا كتر
بمنحرك يحسين شمسوي الشمر
بعده فوگك خويه طبع ايدينه
****
شلون بعده ابصدري ينبض هالگلب
عالرمل دمك يبو اليمه يصب
وجسمك امچفن اشوفنه ابترب
للحوافر ملعب امسوينه
****
امنين اشبگك يالاخو ما تنشبگ
عالظهر صدرك اشوفه منطبگ
يعني بيك الخيل شبعانه سحگ
الخرز ظهرك گلبك اموصلينه
****
خويه جبت الماي ارويلك ضمه
امنين اشربك والثغر كله دمه
صحت صيحت موت يمه فاطمه
لحگي لحسينچ تره امگطعينه
****
حگه دم يحسين لو صب الجفن
وحگي يم ذباحك اتصارخ و اون
شوفتك نستني لسعات المتن
اسياط خويه متني امشبعينه
****
استوحدوك ادري برماح وبالحجر
ومن حقدهم ادري گطعولك نحر
الخنصر اشمعناها يا خويه انبتر
ومدري وين بكربله امضيعينه
****
هذا راسك خويه يفتر عالرمح
خويه حافر تارك بگصتك جرح
شيبك املطخ دمه من الذبح
چن قميصك راسك امسوينه
****
الشاعر اياد الديراوي
https://youtu.be/OvI7qHo2x-M?is=OJDLLMN0M8pyZle9
Читать полностью…
القاسم ع
ما بين العيون كل عمري ضميتك
اعذرني جسام للحومه زفيتك
خل تهمل العين ظل وحده الحسين
****
انتظرت سنين يكبر يالولد عودك
ضيم الدنيا صابرته على مودك
وصلنه الطف ييمه وبانت احدودك
عرس لو موت يبني الجنه مردودك
ظمهن يجسام واخفيهن آهاتك
إم آنه والروح تچويها نظراتك
يمه الربه دين ظل وحده الحسين
****
يريد الدنيا ادري كلمن ابعمرك
زغير وما تعرفه اشظاملك دهرك
اذا عفت الشموع وحزمت صبرك
يم حسين باچر ينصب گبرك
يوليدي لشموع ساعه ونطفيها
والحنه ايام هالغبره تخفيها
مينفعك البين ظل وحده الحسين
****
اشما عاين عليك اگليبي يتگطع
شباب وما يلوگ الشوفتك مصرع
صرت اتخير ابين الوفه ومدمع
فدوه الفاطمه بالحومه تتبضع
من گلبي هالصوت بس فاطمه اتفهمه
فدوه هل اولاد لتراب ابو اليمه
الدم يجري صوبين ظل وحده الحسين
****
لتفكر ييمه ابحالي والخيمه
ميهمني السبي والركضه بالهيمه
ما نسوى ترانه اگبال هالشيمه
گبل امك وجب الحسين تقديمه
انته حدر خيل روحك تخليها
وانه عله النوگ زينب اواسيها
طب للميادين ظل وحده الحسين
****
تعال اوياي يبني وعاين اللوعه
تره العمك هذن لسيوف مرفوعه
بهذاك الصوب عشره خيول مجموعه
بس ايطيح عمك تسحگ ضلوعه
ها يمه جسام شتفسر المنظر
ما تنصر حسين يبن الحسن تگدر؟
وين الدرب وين ظل وحده الحسين
****
يالله اوليدي حط سيفك عله متونك
ابد ماريد يبني اتدير بعيونك
واذا سبعين الف يمه يلاگونك
ابسبيل حسين خليهم يذبحونك
لتاني السيوف انته اعتني ليها
وابنحرك اتنام يوليدي خليها
تفزعله هالحين ظل وحده الحسين
****
الشاعر اياد الديراوي
نعي
الليله العاشره
اودعكم يخوتي شلون تردون
الليله اوياكم وباچر تموتون
وبعدكم راح تتورم هل امتون
ويحرگون الخيم والنومه بالبر
****
دليلي شلون يحمل هالفجيعه
يعباس امن اشوفك عالشريعه
السهم بالعين وچفوفك گطيعه
يا خويه اعله فگدك والله مگدر
****
عسن لا نعطش اولا نطلب الماي
تره امن الشوگ تعمه اعليك عيناي
أنه بشوفك يخويه يرتوي اضماي
الشمر عباس ذاك ابسوطه يفتر
****
يخويه حسين يا راعي العشيره
بعد عينك يطلعوني اسيره
ومن ديره اطبن لعد ديره
واگبال اليذبحك باچر اعثر
****
ضمني حسين يالغالي اعله صدرك
وابوسك خويه خليني اعله نحرك
ذبيح اعله الوطيه شلون انظرك
للحافر يخويه اتصير معبر
****
الشاعر اياد الديراوي
https://youtu.be/rgJE1OQn7FM?is=gd3UWB7ODO2_SBOQ
Читать полностью…
( هالله هالله حسين وينه بالسيوف امگطعينه )
طلعت امن الخيمه زينب ويلي عالحره السبيه
هذا اخوي حسين مرمي يا خلگ فوگ الوطيه
صعدت الخيل اعله صدره لحگي يالزهره الزچيه
منهشم ضلعه ييمه والقميص امسلبينه
( هالله هالله حسين وينه بالسيوف امگطعينه )
ضامي يُمه حسين لاچن بعد يا ماي اليفيده
فوگ صدره الشمر گاعد يگطع ابخنجر وريده
ابو فاضل مين اجيبه المشرعه يُمه بعيده
بلا چفوف اعله الشريعه وانطفت بالسهم عينه
( هالله هالله حسين وينه بالسيوف امگطعينه )
اوليدچ الغالي يزهره فايض اعله الغبره دمه
من كثر سحگ الحوافر صار من كل صوب جسمه
جيته محترگه العبايه بيش حاچيني المّه
حضّرو نوگ السبايه ابسرعه يُمه انلم ولينه
( هالله هالله حسين وينه بالسيوف امگطعينه )
اگبال عيني الشمر يُمه راسه فوگ الرمح شاله
ابراس اخوي حسين احيرن لو اروح احمي ابعياله
سوطه ملفوف اعله متني والشتم هسه حلاله
فرت النسوان ويلي وما رحم حتى بچينه
( هالله هالله حسين وينه بالسيوف امگطعينه )
****
الشاعر اياد الديراوي
مقدمه للعباس ع
شمتت الناس وينه عباس
يصرخ حسين وينه عباس
****
اليطيح بشده ينطر فزعة اخوانه
تركضله تشيل آلامه واحزانه
المثل حسين ابد متكسره عدوانه
ابو فاضل عزيز وهدّه بمچانه
فگد الاعزاز يخنگ انفاس
يصرخ حسين وينه عباس
****
اليفگدله اخو هالدنيا متلمه
شلون اخوان عباس او ابو اليمه
آخر مره راد ايودعه وايشمه
يحضنه شلون حاجز لن وگف سهمه
ابوسط العيون كونه ينباس
يصرخ حسين وينه عباس
****
اهواي ادموع طاحن واليعد وينه
طاح حسين اكثر من دمع عينه
مو بس يبچي عالعباس ابو سكينه
ذب اعمامته وذب روحه وسنينه
الگلبه محروگ يلطم الراس
يصرخ حسين وينه عباس
****
وصل للشط عجيبه اتحيرت بأمره
لا روح البقتله ومنكسر ظهره
العثره اعله الگمر تنعد بألف عثره
چا چم مره ابو اليمه انخسف صدره
كلشي بي مات بس الاحساس
يصرخ حسين وينه عباس
****
تحزّم لنه ابو اليمه گبل الوداع
جِزه العباس خطوات اوحسبته ضاع
يفتر مدري شنهي ايلگط امن الگاع
شال اچفوف، عليهن طبرتين اوساع
الرايه والجود ذني مقياس
يصرخ حسين وينه عباس
****
گعد يم راسه والگعده تطلع الروح
صوته امن البواچي اعله الگمر مبحوح
الدمع خلص بدت عينه تصب جروح
شلون اتصير مذبوح اويون مذبوح
ساعه بالخيل صدره ينداس
يصرخ حسين وينه عباس
****
الشاعر اياد الديراوي