لسان حال مولاتي رمله (س الله ع)مخاطبه ولدها القاسم(ي الله ع)
يا جاسم من فارگتك __ آه يوليدي
بحزاني رحت وعفتك__ آه يوليدي
يبني إشكثر تانيتك ..... سالم ترد ضنيتك
آه يوليدي
............
بيوم الرحت عني وغبت اجهر بالونين
يوليدي ظل دمعي يصب ما فارگ العين
تانيتك إبلهفة دمع كل هاي السنين
سنين الربه وذاك التعب يوليدي چا وين
يا دمك أصبح جنتك __ آه يوليدي
ولصدري آنه احضنتك __ آه يوليدي
يبني بصدرك شميتك ..... سالم ترد ضنيتك
آه يوليدي
.............
يا سلوتي حگه الگلب لمن رحت ذاب
وانته يجاسم من غبت ظل دمعي سچاب
أتنطر لجيتك صرت يم عتبة الباب
متأمله عليه ترد مني الأمل خاب
مطفيه شمعة زفتك __ آه يوليدي
تواسيني ظلت عمتك __ آه يوليدي
يبن الحسن ناديتك ..... سالم ترد ضنيتك
آه يوليدي
..........
چان الأمل سالم ترد يوليدي جسام
كل ساعه احس يبني الگلب يتصوب اسهام
وعيوني من يوم الرحت سهرانه متنام
متلهفات لجيتك يمه احسب ايام
ولكبري جاسم ردتك __ آه يوليدي
وبلوعاتي نادبتك __ آه يوليدي
يا وسفه ما حنيتك ..... سالم ترد ضنيتك
آه يوليدي
............
تدري يجاسم وشكثر حملك تعبني
ردتك سند يوم الكبر يمه تلمني
لو لحظه عن مهدك غبت صوتك ندهني
ليك الگلب قبل الجدم يتعنه يبني
تچوه ليه تأملتك __ آه يوليدي
وعيوني تربي لجيتك __ آه يوليدي
وبمهجتي هزيتك ..... سالم ترد ضنيتك
آه يوليدي
............
شمعاتك بنار الگلب يبني أشعلتهه
جثتك رميه اعله الترب لمن شفتهه
بسدهه ييمه أتمددت روحي أحظنتهه
وي دمعي حنتك يالولد ويلي اعجنتهه
للمصرع يبني اگصدتك __ آه يوليدي
عميه عيوني ولا شفتك __ آه يوليدي
بدمع عيوني ربيتك ..... سالم ترد ضنيتك
آه يوليدي
............
دمعي قبل صوتي اعتله بآه وحزن صاح
يا جاسم امك بالدمع ظلت والنياح
من يوم الطاحت جثتك وهم دمك الساح
عگبك يبنهه اتمرمرت ما شافت افراح
عالغبره ظلت جثتك __ آه يوليدي
بدمعات عيوني اندبتك __ آه يوليدي
تردلي وتنور بيتك ..... سالم ترد ضنيتك
آه يوليدي
محمد الجوراني
ابُذيه ... لسان حال مولاتي ام الخدر (س الله ع).
حزينه وحزني ما يگدر ...... يصفناي
واگلـهـه إبيـش فـكرتي ...... يصفناي
بـرقيـه والشمـر يمهـه ....... يصفناي
يـضـرب حـيــل والـضـربــات بــيــه
محمد الجوراني.
لمولاي مسلم ابن عقيل (س الله ع).
اسم القصيده ... انعادت خيبر .
الكوفه وضواحيهه •••• تشهد عله البيهه
چن خيبر انعادت برضهه ومسلم العاد
°°°°°°°°°°°°°°°°°°°°°°°°°°°°°°
گاع خيبر چنهه صارت وبيهه حيد الما يهاب
علي بشمرة سيفه چنه آخره ويوم الحساب
غيره طگ عرگه بجبينه مناشره خله الرگاب
حته گااع الكوفه صاحت رد علي سيف الصعاب
مسلم ورث عمه •••• غيرته وكل عزمه
اسد من بيت النبوه اعله الظلم هاد
°°°°°°°°°°°°°°°°°°°°°°°°°°°
بقه تاريخ اليسولف زود مسلم عالطغات
أتصور العباس رايد ماي والكوفه الفرات
باسم حيدر همته نادت وسيفه يقره الذاريات
عمري دون حسين أقدمه مسلم وراد الممات
تتصوره الكوفه •••• عباس بطفوفه
هاي الشريعه والگمر متعني للماي
°°°°°°°°°°°°°°°°°°°°°°°°°°°
الكوفه باب عليهه مسلم چف علي الدنيه تشوف
شد حزام الغيره حيله وسيفه صال اعله الألوف
والشمس بالكوفه ظهرت والگمر برض الطفوف
والعساكر كلهه صاحت إدخيل حسبنه ضيوف
يا مسلم ادخيلك •••• خلينه نحچيلك
ما بينه زلمه اليوگف بوجهك يمغوار
لجل نصرة دينه مسلم عالن اليوم انتقام
دخنت سوح الحرايب دنيه تشهد بالضلام
النفس شح بالكوفه عدهم والهوه صار انعدام
گبال سيفه الزلم ضلت حايره وبلا كلام
گلهم اسمعوني •••• أوصيه بعيوني
حسين اخذ مني عهد لازم اوفيه
°°°°°°°°°°°°°°°°°°°°°°°°
ورث غيرة عمه مسلم اتحده بيعه هالسنين
چنه عباس الغيور وصته ام البنين
جيش بسيوفه ورماحه بيه ضلو حايرين
حيف ضده كلهه صارت وهو وحده بلا معين
يسبح نصر دينه •••• والغيره بجبينه
ولكربله أتوجه ينادي حسين لبيك
°°°°°°°°°°°°°°°°°°°°°°°
اصل حيدر بالشجاعه وهو فرع امن الأصول
أسأل التاريخ عنه وعن بطولاته اشيگول
لو وگف برض الحرايب سيوف متهمه وخيول
مثل عمه بالمعارك چالغضب بيهم يصول
والكوفه تتصور •••• رد الوصي حيدر
نفس الشجاعه والبساله ونفس الافعال
°°°°°°°°°°°°°°°°°°°°°°°
محمد الجوراني
لمولاتي ام البنين (س الله ع). مخاطبة حبيبها الحسين.ع. بعد يوم من ذهابه.
اسم القصيده...راح الحبيب....
حبيبي رايح أمس __ وعيني تشوف الشمس
گلت أغمض عيني من ترجعلي أفتحهه
بنور وجهك أرد امسيهه واصبحهه
وعيني تشوف الشمس
____________
گلت أغمض ما اشوفن روحت إضعونك
حته من ترجعلي يبني افتحهه بعيونك
وعيني ما متعوده تنظر غيرك ودونك
چنت وجهك عيد اشوفه والصبح لونك
حبيبي انته الضوه __ بليلي ونهاري سوه
هسه رحت وياك راح النور من دربي
بغربتي واتمنى اشوفك ادعي يا ربي
وعيني تشوف الشمس
_____________
حاولت أغمضهه يبني وما اشوف إوجود
گلت ضلمه الدنيه بيهه النور ما موجود
بس خفت بيمن اشوفك ليه من إتعود
وآنه اتاني إبردتك روحي اطشهه إورود
مفتوحه ضلت ألك __ بدربك نظرهه سلك
بلكي هسه اشوي بعد ويبين الغالي
وآنه أودع ليل غربه إبگعدته گبالي
وعيني تشوف الشمس
بيك يوميه أصبح عيوني يوليدي
انته ابوي وانته امي وابني وعضيدي
وانته كلشي بهالوجود وسبحتي بيدي
كل فريضه يصير اسمك يبني تمجيدي
صومي وقنوتي صرت __ قبلة صلاتي چنت
بسمك اتوضه لصلاتي وربي يقبلهه
ابچي والسجاده يبني بدمعي اسألهه
وعيني تشوف الشمس
_____________
من تشوفك عيني چانت تبقه مفتوحه
لئن وجهك كل سروري لضيه مشبوحه
هسه نورك غاب عنهه بضلمه مجروحه
عذباني بُعدك ودمعاتي مسفوحه
أتمنى ماكو بُعد __ يا اغلى كل الولد
يمته من عيوني چفك يمسح العبره
وآنه اريدن يمي سالم مهجت الزهره
وعيني تشوف الشمس
صرت كل ساعه الوكت عنك اسئلنه
ياوكت يمته يرد الغالي اشوفنه
رايده بچلمة حبيبي حسين اصيحنه
وبالمسه يگلي ييمه وصوته اسمعنه
امنيتي قبل الأجل __ اسمعهه من الأمل
اسمي منتظره واصيحن من معاناتي
يمته أتلگه حبيبي بكل صلاواتي
وعيني تشوف الشمس
_____________
والنظر يبقه اعله دربك والعمر مرهون
غايتي اترد بسلامه وسالمه الضعون
حتلو من غير ولدي كلكم اتردون
أصرخ اولادي اربعتهم فدوه الك يرحون
بس كونك اترد ألي __ يتيمه وانته هلي
اقسم بحبي الك كل همي بس انته
يعني من ترجعلي اگولن دمعي ودعته
وعيني تشوف الشمس
______________
محمد الجوراني
محرم الحرام.
اسم القصيده.. أطبر راسي.
...............
جنوني أله اطبر راسي
.......................
هذا ليل العاشر وجابتني احزان العشگ
عاقل انه كلش ومجنون في حبك صدگ
أركض اعله القامه عاشگ بالعشگ ما أنلحگ
ألك ما أطبرهه هامي راح أفشگهه فشگ
جنوني أله اطبر راسي
.......................
أعتبرهه القامه أيدي وعالصدر أبدي اللطم
صدري هذا بكيفي آنه شرد أسوي إمن أنهضم
شلون أبقي صدري سالم وانته صدرك منهشم
لازم أمن المجلس إمگطع يطلعوني الزلم
جنوني أله اطبر راسي
.......................
هيه قصه قصتك يحسين أتموت قهر
كون أشيل القامه بيدي وأطبر ابوسط النحر
لوّن ما صحتلي قامه أجي وأطبر بالحجر
بخت يرادلهه والله سبب موتي هالشهر
جنوني أله اطبر راسي
هامتي وصدري حبيبي ألك عايفهن وقف
وقامتي عالهامه راح اليوم أزحفهه زحف
أفتح بصدري جروح الخاطرك يحسين ألف
وأبقه ألطملك حبيبي لحد ما دمي يجف
جنوني أله اطبر راسي
.....................
أذكر العباس جرحته السيوف إبحاجبه
طاح وچفوفه گطيعه والعمود أمتعبه
خلي اموتن بالمآتم اني مو فد معجبه
فدوه كل جسمي لحبيبي وللخيم لمسلبه
جنوني أله اطبر راسي
.......................
بليلة العاشر ضلام بلا ضوه موصي الشمع
تختلف عن الليالي يجري دم بيهه ودمع
بيهه صرخة يا حسين وبيهه تهشيم الضلع
وبيهه زينب أمنه خدهه بچف شمرهم منصفع
جنوني أله اطبر راسي
حزني لميته ودموعي وقامتي بليلة جرح
آنه ويه البسمه هاي الليله كلش مو صلح
باچر العاشر وأبو الاكبر حبيبي ينذبح
وبالي يم زينب تشوف الراس مرفوع برمح
جنوني أله اطبر راسي
محمد الجوراني
محرم الحرام ١٩٣٩ هجريه.
قصيدة.. ما أهزك
لمولاي عبد الله الكبير.ع.
،،،،،،،،،،،،
عبد الله يمه المهد ما هزه وألوليك ... خاف السهم يتحرك هواي ويأذيك
يبني امن اهزنك ،، بيدي ألچمنك ،، سهمك أطول منك _ هواي ويأذيك
******
ما اهزك _ ياجرح بي نبله أطول من نظرتك
ما اهزك السهم عمره چبير وزغيره رگبتك
ما اهزك خاف يبني تموت وانه توني جبتك
ما اهزك أن شاء الله يعثر السهم يوليدي بختك
نام اعله صوت امك يعبد الله دللول ... لبنحره نبله شلون يحمل حافر خيول
توك ألي صاير ،، بيك الگلب حاير ،، لو داسك الحافر هواي ويأذيك
******
يبني يبني بس حچي وياك احچي وانته اغفه
يبني يبني سمعك يحب الدللو مني اعرفه
يبني يبني شلون يا شمعة رباب بسهم تطفه
يبني يبني بيك مكسورة ظهر مو مال وگفه
ما بيه عالوگفه وأنه مهدومة الحيل ... هيه المحودب ظهرهه تشبه الليل
عالوگفه ما بيه ،، حته اعله عوچيه ،، الجرح مو شويه هواي ويأذيك
يارباتي صار ست اشهور الولي وعيني عليك
يارباتي گلت تكبر واشد حيلي يالولد بيك
يارباتي اشناگن امتوني تخلي عليهن ايديك
يارباتي هسه ينهدلن لون النبله تاذيك
امتوني ينهدلن عطش وانته الهن الماي...يوليدي ست شهور ماشالنك هواي
مشتاگ الك حضني ،، واغفه عله متني ،، حار الرمل يبني هواي ويأذيك
******
يعبد الله يبني جرحك ما تحمله الزلم الكبار
يعبد الله انته مالت ماي بارد مو سهم حار
يعبد الله كبرو جرحي ييمه بيك الاشرار
يعبد الله خيمتك محترگه وتذب عالمهد نار
لوبالمهد نايم وأشوف النار تدناك... يوليدي اذب روحي عليك احترگ وياك
لو نايم ابمهدك ،، تلگه امك بسدك ،، من ينچوي خدك هواي ويأذيك
سدلي عينك من يجيني الشمر ويطگ لمك إمتون
سدلي عينك أدري بالأطفال من سوطه يخافون
سدلي عينك و ما تركض عالشوك وي اليركضون
سدلي عينك وينك وين الجمر عليه تسحگ شلون
من عندك أكبر يمه ذيچ اختك رقيه ... إتحط رجل ترفع رجل من أثر چويه
الجمر چاويهه ،، ومو مثل رجليهه ،، رجليك ياذيهه هواي ويأذيك
******
لو سبوني شلون اعوفك وانته يالمحتاج حضني
لو سبوني امشي وانه عايفه هنا وصله مني
لو سبوني ألمن احچيهه بعد چلمة اليبني
لو سبوني ردتك انته تمنع إسياط التطگني
الشمرلو ماشاف زلمه ويالنساوين ... يتمرجل عليهن يضل يوليدي كل حين
عالفرگه ما أگدر ،، يوليدي من انجر ،، أتغطه من الحر _ هواي ويأذيك
***************
محمد الجوراني
يالعمرك محرم * يالعينك تصب دم
كافي إشوي تبسم ____________ حبيبي
••••••••••••••••••••••••••••••••••••••••••
يالحمره عينك من كثر ما تنتحب وتنوح
تبسم ولو مره أخاف عيونك انته اتروح
جامد عله وجناتك الدم بس بلايه اجروح
يالمحزن اعله الهشمته الخيل وبقه مفتوح
صدر الهشمته الخيل * بيد منك الحيل
ونك شيب الليل ______________ حبيبي
••••••••••••••••••••••••••••••••••••••••••••
بجيك يعذب الأمهات الفاكدات اولاد
خلص دمعهن وانته دمعك من تون يزداد
يالعايشه إبذاكرتك الطبت عله ابن زياد
يوميه عمرك عاشر وما تبتسم بعياد
إبمولد جدك حسين * تلطم انته عالعين
ما بين الحرمين _____________ حبيبي
•••••••••••••••••••••••••••••••••••••••••••••
حته إبمنامك هم تون هآيه لون اتنام
ما يغفه ادري اليحتركله بيوت واخيام
ومو بس خيم محتركه ألك مولاي الاجدام
من إلي ركضت عالجمر ما بين الازلآم
يا عمتك رقيه * من طلعت سبيه
إمبجيه الغاضريه ____________ حبيبي
آنه ادري باليبجي تره هم يسكت ويرتاح
وانته أضن من تتعب أنوبه تصيح اصياح
من عدنه يمكن لو نسمعك تطلع الأرواح
يبو الراس الأبيض إهدء رمش عينك طاح
حته رمشك احمر * حزنه اعله ابو الاكبر
كاعد مدري تفتر _____________ حبيبي
•••••••••••••••••••••••••••••••••••••••••••••••
سبحانه صدرك سيدي إشكد لاطم انته عليه
يالتستحي إمن حسين صدرك سالم إتخليه
يمكن ضلوعك انته كلهن كسرتهن ليه
الزهره تشيلك مغمي ابكل مجلس اطب بيه
الناعي حسينك يصيح * وانته أتسمعه وإطيح
دم مو دمعك يسيح _____________حبيبي
••••••••••••••••••••••••••••••••••••••••••••••••
دخيلك حبيبي شويه خفف من بجيك الهواي
خايف عليك وآنه محتاجك يضي عيناي
من تشرب إميه تغمض رآيدك مولاي
يالمهدي خاطر ما تشوف المنذبح بالماي
خاف أتشاهد إنحور * كبالك سيدي إدور
وسنتك كلهه عاشور _____________ حبيبي
••••••••••••••••••••••••••••••••••••••••••••••••••••
الشاعر: محمد الجوراني
حافيه طَلِعوني -------- عالجَمر رَكِضونِي
آه ... آه ... مِن أنْچِوي -------- آه
________________________________
گاعده إبفي خيمتي ،، ويمي زينب عمتي،، وچانت الترچيه يابويه بأذاني
غفلّه لن وشفته چف ،، يم أذن بنتك وگف ،، باگ كل احلام هاي اذني بثواني
بويه من جراهه بيده جر عمر بنتك سوه
إركضت صوبك وأنته وينك گمت أدورك بالهوه
يا نسمه التمرني -------- هم تچويهه أذني
آه ... آه ... بذني الألم -------- آه
__________________________________
الحافر إبصدرك يرض ،، وآنه تعبني الركض ،، وركضتي يحسين مو ركضة چبيره
ترفه اديه يانفل ،، وينهن وين الحبل ،، الحبل مال اكبار وچفوفي زغيره
آهي تطلع واليطلعهه يبويه يا ألم
مدري من اجروح أيدي مدري من چوي الجدَم
مچويه إبجمرهم -------- ولا آني إبعمرهم
آه ... آه ... آه يالحرگ -------- آه
(( ١ ))
بين سوط وبين نار ،، وانه ام إجدَام الزغار ،، والجمر يعرف عدوه اليجي يدوسه
التنظرب ألمن تروح ،، بس لبوهه وعنده روح ،، وآنه ابويه حتى مالحگت ابوسه
آنه متعوده أبوسنك واشمك بالنحر
وين صدر الأغفه چنت اعليه شو هسه إنحفر
بخيول آل اميه -------- برض الغاضريه
آه ... آه ... من إنسحگ -------- آه
___________________________________
آه يادرب السبي ،، والتراب أعله العبي ،، تره علوياتك أچم مره طاحن
من على ظهر الهزل ،، النوگ داست چم طفل ،، ومنه چم إيتيمه مدري وين ضاعن
عني ضاعن وآنه عنهن بويه بالهيمه ضعت
وعمتي أدور عليه الظهر بالبر من سرت
ياريت من لگتني -------- ماي وشربتني
آه ... آه ... من العطش -------- آه
(( ٢ ))
بالسبي أشتم جرح ،، شفت راس أعله الرمح ،، إعليه ينظر چنه يابويه يعرفني
امركز أعليه إشكثر ،، وخايفه آنه امن الشمر ،، الراس يهتز من يطگ السوط متني
ردت أشوف الراس گاصدني أليه غايته
مچاني بدلته وبقه إيدور عليه إبلهفته
حسيت إبنظرته -------- ثاري آنه بنته
آه ... آه ... ياوآلدي -------- آه
________________________________
الشاعر ،، محمد الجوراني
(( ٣ ))
صَوتُ العاشقين....إنا للحُسين
لا تخلي ابالك انغوف الحُسَين
ما نريد انصير من النادمين
صوت من ثغر الضمائر عاشگين
أورثنه هذا العشگ من ام البنين
مالٌ وبنون...إنا للحُسين
بالگلب حبه سمه وهوه الهلال
هذا حبنه أله من چنه جهال
لا فتة حب مانعوفه لا محال
ولا تطول بعد ويانه الجدال
في الحُب خالدين....إنا للحُسين
بحالك انته واحنه خلنه بهالجنون
وشيضرك أله من تبچي العيون
احنه ما نملك حلال ولا بنون
احنه مُلك حسين مالكهه الضنون
واليه راجعون....إنا للحُسين
شيعة الكرار واحدنه عنيد
صحنه غير حسين منحب ونريد
ندري تحرگ بيك چلمة ياشهيد
لئن خالد هوه لا ذكر اليزيد
ذِكرُ الطاهرين.... إنا للحُسين
شلون نتخله احنه عن وجه النهار
نفرض انعوفه يحل بينه الدمار
لاتهددنه ابفتوتك وإنفجار
ما نعوفه خذنه بس هذا القرار
نحنُ المؤمنين.. . إنا للحُسين
امن الزغر حبه رضعنه مو حليب
حسين هوه الدين كله والحبيب
حته من حبل الوريد النه قريب
عله حبه العجب صاح اشگد عجيب
أصلَ كُلَ دين....إنا للحُسين
أختم وياك الحديث ابهل كلام
شلون اعوف النور وامشي لظلام
يا ابو اليمه ألك منه السلام
علينه غير حسين ميصير الامام
خِتامي كلمتين....إنا للحُسين
الشاعر ** محمد الجوراني
شفتك،، ما معقوله انته ابحالك اشصاير
شفتك،، گلي خويه وين الاصبع العاشر
لا اصبعك لا خاتمك.......ولا كتر ضل ما يألمك
ابحالك اشصاير
.................
هواي متغير تره....ما چنت هيچ انته خويه ما عرفتك
سنين عشناهه سوه....مو غريب اعليه اخوي وآنه اختك
حافظه شكلك عدل....وين چا ذيچ السماحه الي بضحكتك
خمس اصابع يمنتك....اربعه ذن بعد اصبع من يمنتك
خويه،، بالخاتم اتصدق وآلدي اذكر
خويه،، وانته اتصدقت يبن امي بالخنصر
حيدر وآلدي علمك......ولا كتر ضل ما يألمك
ابحالك اشصاير
..................
صدرك اشبي منحفر....خويه چن خسفات خيل اعليه اضنن
اي حوافرهن شفت....امكسرات ضلوع يعني حيل دبچن
اسمان كلهن يالاخو...عله صدرك گامن ابواهس يلعبن
هنه ياخويه تره....ألزينب امن الضيم غايتهن يموتن
داسن،، نو بس اغله صدرك داسن بصدري
داسن،، بحافرهن طلع خويه عمرك وعمري
آه يالحافر الهشمك.........ولا كتر ضل ما يألمك
ابحالك اشصاير
..................
شفتك ابروحك تجر....تزحف أعله الگاع خويه وليش مسرع
امتلفك الدم والرمل....وليش تتلفت اشوفك شنو مضيع
شنو الغايه ابزحفتك....اضن جاي إدور انته عله الاصبع
ردت ادورنه ألك....بس خفت من خيلهم يحسين تخرع
حيره،، من اطلع ادوره انته ما ترضه
حيره،، الكافل خفت ينشاف اله عرضه
عرضك گوم الي حشمك.....ولا كتر ضل ما يألمك
ابحالك اشصاير
.................
هذا عود انته صدگ....حيرتني خويه هاي اشصاير بيك
صرت اداوي ياجرح....اذا هنه هواي حيل وكلهه تاذيك
عندي بس دم المتن....عله جروحك راح اخليه وبي اداويك
او من ارد الخيمتي....شراح اگللهه رقيه التنشد عليك
گلي،، امسافر اگلهه وما ترد لينه
گلي،، لو اگللهه ذبحوه التريدينه
ذاك انته سيف امجسمك.......ولا كتر ضل ما يألمك
ابحالك اشصاير
.................
انته مو هچي چنت....راسك ابجسمك تره من رحت عني
هسه من شفتك صحت....انته اخوي حسين والله فاجأتني
وين چا ذاك الجسم....خطوط حمره بي اشوفن شنهي ذني
وشنو هذا المنكسر....داخل ابگلبك سهم خلاك محني
طالع،، يحسين اشوفه امن الظهر سهمك
طالع،، براس السهم گلبك وبي دمك
انخلط وي دم جاسمك....... ولا كتر ضل ما يألمك
ابحالك اشصاير
.................
امنين ما اصدلك أنه....امجرح ومن كل كتر هاليجري دمك
جرح متغطي ابجرح....أتعب امن اريد اعدهه جروح جسمك
لحظة اموادع ردت....انته تحظني آنه اخاف امنين الزمك
تشوغ روحي والگلب....لو صحت آه يمي وآنه الي الچمك
چا ليش،، جرحك من الزمه يلچم الثاني
چا ليش،، الموت الخذاك وآنه خلاني
حته يطگني ضالمك....... ولا كتر ضل ما يألمك
ابحالك اشصاير
.................
گوم خويه امن الشمس....حسين چا ليش انته نايم جوه هالحر
جيتك آنه امن الخيم....ركض ردت اشكيلك وجدمي ايتعثر
تنهض ويايه ردت....سوه اندور اطفالنه التاهو ابهالبر
ادري ما تگدر ابد....خويه اعذرك لئن انته كلك احمر
ادري،، گطرة دم ابجسمك خويه ما ضلت
ادري،، سيوف وخيل اميه عليك هالصلت
كل جسمك ادري يلچمك...... ولا كتر ضل ما يألمك
ابحالك اشصاير
.................
الشاعر :: محمد الجوراني
للانصار .... موقف حُسيني وانحسم
عد عيناك.... أستعرضو يم الخيم
ياحسين
...........
هوسة حبيب الشيخ ،،،، والرايه شيبه
گال الحبيب ايريد ،،،، يفدي حبيبه
أستعرض حبيب وهوس اگبال المخيم
گال ارد الاگي الله وصابغ شيبتي الدم
آنه رايدهه الحرب .... وهيه هم اتريدني
حچايه عندي من أطب .... حسين بس يفيدني
وبحبيب .... لحسينه شيگول الدم
عد عيناك .... أستعرضو يم الخيم
ياحسين
.........
عابس نظرهه ابعيد ،،،، من شگ قميصه
گال النفس لحسين ،،،، كلش رخيصه
كون آنه اموتن واحيه وارجع هم اموتن
ومن حيدره متعلم انه شلون اصولن
ريت ربي من اموت .... كون لا مو يومي
حته لطف من اعود .... هم اشگ اهدومي
خاطر گال ..... بجنوني افهم الما فهم
عد عيناك .... أستعرضو يم الخيم
ياحسين
.....
بشري زينب صاح ،،،، ابنص العراضه
اسود نعرفه جون ،،،، بگلبه بياضه
سور أعله خيمتكم يحره جسمي الاسود
تسحگني خيل ومن ضلوع حسيني انعد
اسهام تصبغ چثتي .... من دمائي الحمره
حته حر لا مو عبد .... اتصدلي عين الزهره
احمر صار .... بنزفه وجراحه من هجم
عد عيناك .... أستعرضو يم الخيم
ياحسين
......
هوس اجه ابن القين ،،،، الحومه آنه اهلهه
گال امن اخوزر عين ،،،، الجيوش اذلهه
روحي ألك مو ايدي يابو اليمه امدهه
آنه زهيرك والاكضهه ما اهدهه
آنه ما عندي كلف..... كلشي لجلك يسهل
خلهم يضمو الرگب.... سيفي هوه يندل
بيدك راح.... اصبح درع سيف وسهم
عد عيناك... أستعرضو يم الخيم
ياحسين
........
ها خوتي صاح هناه ،،،، الحر الرياحي
لنصرة ابو السجاد ،،،، شمحله جراحي
گله الحُسين أنته كما سمتكَ امك
بالجنه انته يمي ياحر وانه يمك
گله يابو اليمه اجيت.... طالب المرضاتك
عفو منك انه اريد .... ورأفه من نظراتك
والحر ذاك.... احضه برضاته والنَعم
عد عيناك... أستعرضو يم الخيم
ياحسين
.......
هوسوا انصار حسين ،،،، بالحومه هوسه
رباط هوستهم چان ،،،، العسكر ندوسه
سبعين همه لاچن الواحد منيه
بالذر اضن دربهم حماي الحميه
سبعين ضد سبعين الف.... عزريل بيهم حاير
عزريل ما لحگ يلم ... عاف نص الباچر
ملك الموت... تعبان من گد ما هو لم
عد عيناك... أستعرضو يم الخيم
ياحسين.
......
الشاعر..... محمد الجوراني .
محرم الحرام ١٩٣٩ هجري
اسم القصيده.. دافع ما هجم
دافع ما هجم .... ولا واحد سلم
من ابو فاضل
................
ابو فاضل_ ما هاجم تره دافع والله لو هجم يمحي نهر والفوگه
عله الشاطي_ ما جرد ابد سيفه طيح وادم بخزره غدت مسحوگه
بصدر العسكر خلاهه أيده ودفع
زلمه اعله زلمه من الدفعه وگع
كلما تشتد يتقدم بس ما رجع
دافع عالنفس .... والطف انترس
بجثث عدوانه
...................
اليجي بيده_ ما يخلص بعد منه يعصره اعله النهر عصره يطلع روحه
ولا شافو_ لازم بيده بتاره بطراگه عله الشاطي زلم مذبوحه
هذا الصاح عليه وطايح من صيحته
وخازر ذاك بعينه ومات بخزرته
گاشع جلد الگاع عباس بهيبته
المابيه كل أثر .... بيه خزرة گمر
وتيه ادروبه
تره الحومه_ صارت سبحه بيمينه عالشاطي يفر بيهه يريد بكيفه
ينظروله_ جيش ابوحده مصطف برگاب الاجو يمه يحد بسيفه
برگبة نشميهم عباس لسيفه حد
رد باوعله وشافه يرادله بعد
سيفه چبير وينحد بأكثر عدد
كل رگبه التطگ .... من گد الرشگ
الگمر وآليهم
.......................
لجل زينب_ الشاطي ومايه وجروفه جابه وتحت رجليهه وبشري يگلهه
تره آنه_ من چنت بظهر حيدر خيبر بسمي يگلبهه. علي ويعدلهه
من إطلبتي حسبالي ردتي الشمس
سهله الماي وأترسلچ جودي ترس
الشاطي لو شافاني يجري بالعكس
خويه ادللي .... وگولي يا علي
الماي اجيبنه
.......................
النهر ملكه_ عباس آمر وناهي وبكيفه الحرب صارت صدگ تحلاله
أله كلشي_ شيخ ومالك الحومه والطف صبح ديوانه ونفسهم ماله
أنفاسهم بيد الشيخ إبكيفه بقت
ياهي اليآخذهه وياهي العنهه جزت
وبيهن وحدهن من شافنه إطلعت
زحفن للگبر .... بس كلهن صفر
الخوف كاتلهن
.................
تره الشارد_ بس يخزره بعيونه فوگ الشارد يوگعه يسحگه إبمهره
العلم بيده_ رفرف مرجله وغيره لم يَكُن له كفواً أحد والزهره
قل هو العباسُ وحده بالحرب
لم يولد مثله مرتجل من يطب
الحومه شوكت ماشاء يگلبهه گلب
شيخ المرجله .... مالك كربله
اسمه اخو زينب
محمد الجوراني
مقدمة عزاء اليوم السابع لمولاي ابي الفضل العباس (س الله ع).
اسم القصيده... العطش .
ماي __ عمي العطش ياذينه عمي
"""""""""""""""""""""""""""""""""""""
طلعو اطفال الفواطم وگفو اباب الخيم
صاحو بلوعة ضماهم ماي يا راعي الشيم
والعطش ياعمي يلچم چنه گلب وبي سهم
بالگمر رفت شوارب بشرو رف بيده العلم
صاح __ سهل الطلب واليوم انفذه
""""""""""""""""""""""""""""""""""
زينب اباب المخيم نادته يا كافلي
خويه أطفالك تريد الماي گلهه ادللي
شال فقاره بيمينه وصاح هذا اليوم ألي
وصارت اجيوش الشريعه بين عباس وعلي
وين __ تشرد بعد والغيره اجتهم
حسين ينظر ابو فاضل جيش للحومه نزل
سيوف وارماح وخناجر عالعده چفه حمل
توه اجه لماي الشريعه الجيش كله عليه سأل
هذا عباس الاجانه لو علي خير العمل
زود __ حيدر علي غيرته وعزمه
"""""""""""""""""""""""""""""
شال متنه الجود حين السمع من زينب خبر
گلوب عطشانه وتتاني الماي من جود الگمر
ناده مو بس ماي اجيبه الماي وياه النهر
لجوده سهم البين رايح وصده بصبي النظر
عين __ صارت درع أجل العطاشه
محمد الجوراني
لمولاي ابي الفضل العباس (س الله ع).
اسم القصيده.. رجفة ماي.
رجف ماي النهر وينادي ياحيره
هاي الغيره اجت لو صاحب الغيره
من شاهد لواك ** صاح آنه بحماك
صاحب الغيره
-----------------
رغم حراسه خايف من الاثنين
لئن يدري الحرس ما بيهم الزين
اجيت وهالحرس حارت تفر وين
عباس انته اجيته لو ابو حسين
شاف الرايه تخفگ نصرة الدين
صاح اليوم موتي ابصوت الونين
النهر من شافك أنته يا ابو فاضل
چن گام وهتف بحمايتك داخل
نهض خوف واجاك ** صاح آنه بحماك
صاحب الغيره
اجيت الغيره غيضك بيهه معروف
جبت بيهه المنايه لذيچ الصفوف
عزرائيل لو سيفك بالچفوف
يصيح النهر سيفك سيد السيوف
عليهم صرت موت بگاع الطفوف
والميدان چن طبيت اله ضيوف
بالميدان ضيف وتاكل وتشرب
رعد سيفك منيه بدمهم اتخضب
كل واحد دناك ** صاح آنه بحماك
صاحب الغيره
------------------------------------
يصيح بأخو زينب والله محتار
يشوف السيف بيدك مدري إعصار
بي سجيل مدري الويل والنار
هيبه من محمد عزم كرار
دگ جرس المنايه وألعلن انذار
أضن يوم القيامه اليوم چن صار
مغوار المنايه وسيفك بأيدك
حومه وبيهه شده اليوم وتريدك
من جيتك قراك ** صاح آنه بحماك
صاحب الغيره
من شافك اجيت إيحشم الناس
تعالو وينه بيكم يرد عباس
يعرفك زود غيره وانته نوماس
الوگف گدام مهرك راسه ينداس
عزمك للبطوله بجيش ينقاس
والحشمهه خافت ضمت الراس
من يگدر عليك وانته ابن حيدر
وانته الجاي ناويهه ترد خيبر
أضن ظعنك نخاك ** صاح آنه بحماك
صاحب الغيره
-------------------------------------
اذا زينب نختك وانته وفاي
يعني اليوم مترد اله بالماي
من گتلهه ارد والماي وياي
جودي اعله المتن والعيله بحماي
زينب بيك صاحت أگر عيناي
شهم والدنيه تعرف شيمتك هاي
نظالك من علي ومن عنده إعلومك
فارس يا ابو فاضل انته من يومك
چف يومي وراك ** صاح آنه بحماك
صاحب الغيره
سمع سيفك يهلهل حز الرگاب
ونظر متشابگه الروس ويالتراب
چن بالدنيه صاير يوم الحساب
اجاك بدمعته وچن فاگد احباب
يگلك تره ما بيه اجمل امصاب
ومن جودك يبو فاضل بده جواب
اريدن ماي يوصل خيمة الحره
بقت عيله بضماهه الماي تنتظره
عبد الله برجاك ** صاح آنه بحماك
صاحب الغيره
------------------
محمد الجوراني
محرم الحرام ١٩٣٩ هجريه
اسم القصيده ... يا جدتي.
لدفن جسد مولاي الحسين.ص. لسان حال مولاي زين العابدين.ص.
يا جدتي هاي إشجابچ لطفوف
يا جدتي وخدچ بي أثر چفوف
وينه حيلچ والضلع ينزف دمه .... إلدفن ابوي حسين اجيتي فاطمه
يا جدتي
.........
فاطمه تعبتي روحچ من اجيتي
لهسه اشوف الضلع ينزف ما شفيتي
العين حمره ودوه چنچ ما لگيتي
شفتي جسم حسين ولظهرچ حنيتي
يا فاطمه انتي مكسورة ضلع
يا فاطمه يلچمچ اخاف الدمع
من اجيتي الضلع بيدچ لازمه .... إلدفن ابوي حسين اجيتي فاطمه
يا جدتي
.........
وينچ وين التعب انتي ضريره
يمه مو مثل القبل چنتي بصيره
هنانه دارت معركه كلش چبيره
من وراهه حسين شلته انه بحصيره
بيدي شلت جسمه إمسوينه إرب
بيدي شلت يمه أجساد بلا رگب
جسمه شوفي شلون جاي ألملمه .... إلدفن ابوي حسين اجيتي فاطمه
يا جدتي
.........
آنه اجيت أدفنهم أعزاز العليه
قبل لا اجيهم تره دافن رقيه
يمه ما خلتلي حيل الغاضريه
هذا دم حسين هالتارس لديه
دم النحر من الگفه منگطع
دم النحر يمه غسلته بدمع
ضلوع صدر حسين كلهه إمهشمه .... إلدفن ابوي حسين اجيتي فاطمه
يا جدتي
........
بكل كتر هنانه دافن شاب ألنه
هذا گبر اخوي الاكبر ورده چنه
وجاسم ابذاك الكتر بدوله حنه
والرضيع السهم ما وخرته منه
نحره ترف خاف إمن أجر السهم
نحره ترف يگعد لو يحس بالألم
هذا عبد الله وأبوي وجاسمه .... إلدفن ابوي حسين اجيتي فاطمه
يا جدتي
..........
حاير آنه يمه ابوي امنين اشيله
جروح كله حسين وجروحه طويله
يا جرح لبجسمه اشوفه آنه انحنيله
هنه ذني الموتن حيل العقيله
فوگ الالف يا يمه ما تنحسب
فوگ الالف جرح بجرح منحجب
منين ما اشيله ييمه ألچمه .... إلدفن ابوي حسين اجيتي فاطمه
يا جدتي
.........
أركض أفزع لاچن أتوگعني علتي
يمه بالطف تره خانت بيه صحتي
وبعباتي گمت منهم أحمي أختي
الشمر شفته بسوطه طگ امتون عمتي
من الوجع زينب ركضت لنهر
من الوجع إتگوم ونوبات أتعثر
متون زينب يمه زرگه إمورمه .... إلدفن ابوي حسين اجيتي فاطمه
يا جدتي
.........
محمد الجوراني
محرم الحرام ١٩٣٩ هجري
قصيدة.... يامحرم.
لسان حال مولاتي زينب.ع. مخاطبة هلال محرم.
يامحرم __ جبت وياك الحزن
يامحرم __ لسه يألمني المتن
..............
الصار بيه كله منك يوم يسري
بذاك درب ألي مشيته دمي يجري
أمشي واتوچه واحط ايدي اعله ظهري
وحته ما خلصانه منك وأنه بگبري
ليلك انته __ هالسنه عليه شيجن
يامحرم __ لسه يألمني المتن
...............
يالخذت من عندي احبابي وعفتني
وياهم إبعز چنت وانته الغربتني
يوم عاشر تذكر اللون اعله متني
ياشهر شتريد لشام إلحگتني
چن هلالك __ لحزني اشوفنه يحن
يامحرم __ لسه يألمني المتن
بين خواني چنت وذيچ عزتي
چانو يگلولي زينب أمنه انتي
عشت وي عباس ما گلالي يختي
من اصيحله يگلي ها مهجتي
لون عايش __ يعوفك اتهل ما أضن
يامحرم __ لسه يألمني المتن
.............
خيالي بيك انته صبح لزلم عرضه
وتدري كلش زين ابو فاضل ميرضه
او سهم قسوتك بيه إبعينه امضه
لوّن هد عليك جيب الي يكضه
لئن منه __ انته ما ماخذ إذن
يامحرم __ لسه يألمني المتن
ليش ياعاشور هچي أتسوي بيه
آنه شمسويه وتجرحلي أديه
لهسه يلچم متني أسم الغاضريه
مو وراي اذكرهه من لاذت رقيه
من ضربهم __ إبمتني عنهه اشگف واون
يامحرم __ لسه يألمني المتن
..............
تذكر الديوان ذاك ألي دخلته
ما نسيت يزيد لسه ولا چلمته
گلهم العباس هيه هايه اخته
وراس اخوي اعله الرمح نزلت دمعته
إلوجه أنظر __ شاربه اهتز والجفن
يامحرم __ لسه يألمني المتن
...................
محمد الجوراني
ام البنين .... المجرحه
عليه قريت... الفاتحه
............
آنه ام حسين ذاك الراسه صله أعله الرمح
عدله واقره الفاتحه عليه يشيعه ابحس جرح
اهدنا الحرگه يربي والدمع عالمنذبح
بم ابو فاضل اتوسل لله يوميه الصبح
ادعي ودموع.... سافحه
عليه قريت..... الفاتحه
........
يلي تبچون أعله ابني حسين وتلطمون اله
وكل سنه بالعاشر اتسمعون قصة مقتله
هاي عود انتم ولا شي شفتو من طف كربله
بس ابشرو علي ابصفه امحضرلكم منزله
بوب الجنان... امفتحه
عليه قريت.... الفاتحه
..........
گلوبكم من خيم زينب نار متروسه وجمر
ما تملون المآتم بيهه خلصتو العمر
ألكم اقره عله روحي الفاتحه تسهيل امر
وادعي من الله يوفقكم تلطمون الصدر
ودمع العزاء .... لا تمسحه
عليه قريت.... الفاتحه
.........
والمجالسكم اجيكم آنه والزهره سوه
الفاتحه اقريناهه و تلاثه قرينه القل هوه
ليش ام الحسن تأمركم تطفون الضوه
لئن زينب حاظره وخافن يشاهدهه الهوه
زلمه ويشوف.... المستحه
عليه قريت.... الفاتحه
........
وداعت ابني حسين ادعي ألكم انتو الرافضه
يلي قدمتو شباب وصختو لجل المرتضه
من تطب فاطمه عليكم يعني گولو الله رضه
ولو يفوت المجلس اعليكم تقيمونه قضه
مجلسكم اكيد... نيته صالحه
.........
وصيه عندي والوصيه اتگول كالاتي تره
جتكم المشايه هله هله شيعة حيدره
لآل طه يهالوادم بهل الدرب ردت مره
بيدهه راس ابو اليمه وراس سبع الگنطره
والنساوين.... عدهن نايحه
عليه قريت... الفاتحه
........
حسين ابني جننتكم آنه ادري امحبته
يالرفعتو راس عرش الله وسمائه بخدمته
المشي عدكم صار عاده وتنتظركم حظرته
حزم آل سعود حته زغيركم ما منعته
ويه المسير......عشره مالحه
عليه قريت.... الفاتحه
الشاعر... محمد الجوراني .
ياعلي محتاجتك ■■■ ضمني جوه اعبايتك
ضمني جواهه يحيدر من عيون الناس
□□□□□□□□□□□□□□□□□□□□□□□□□
بويه ما اطلع لون ما ضاع من عندي الخدر
علي حشمتك تعال وجيب بجفوفك ستر
حبال خشنه جتفتني وحيل صاحبهه يجر
راح اموتن ياعلي هلكد يطك بيه الشمر
حيل متني ينظرب ■■■ ياعلي موقف صعب
آنه أول تالي اوكف وحدي بين ارجاس
□□□□□□□□□□□□□□□□□□□□□□□□□
بين خواني جنت يابويه ما شافولي ضل
الشمر من عباس خايف بعده صار المرتجل
صرت اميلن وي ضربته ومنكسر كلبه النذل
ناده حان السبي جيبو الزينب احبال وهزل
وجلمته بويه مشت ■■■ أنظر الهزل اجت
أنظر الهزل واجرن كوه بالانفاس
جان صيواني يبويه هسه صيواني احترك
اطلعت ابن امي اشوفه صدره بالخيل انسحك
الشمل جانت لمته حلوه بنار عن بعضه افترك
ياعلي وذباح اخوتي اجه اتوله بيه طك
كتله ارجع ما رجع ■■■ ايسوي روحه ما سمع
سمع بس من كتله ماعندك حيه واحساس
□□□□□□□□□□□□□□□□□□□□□□□□□
استوحدتني اسياطهم وامتوني بالسوط ارتجن
حرت عن متني اوخر السوط لو عن الضعن
مره اصيحن علي وينك مره وينك يالحسن
جروح متني حجن بويه مدري المتون الحجن
جفوفي مربوطه بحبل ■■■ تحت سوطه اليمته اضل
اتزيد ضرباته عليه لو صحت عباس
اوكفت عالتل حشمتهم بعد ما ظلي ولي
حسين كتله إن جان عايش كوم ادرك بت علي
شفته كام وعله وجه طاح بس ما رد الي
للخيم رجعي يكلي وحفظي يازينب هلي
بويه ركزت النظر ■■■ حسين ثاري بلا نحر
وسكنه يمه اتكله بويه ياهو حز الراس
□□□□□□□□□□□□□□□□□□□□□□□
علي بيني وبين اخوتي يوم الموادع جره
حسين جثه ودعتله وبعد ضيعة خنصره
وعالنهر ودعت خدري جفوف سبع الكنطره
واعكدت راية الغيره وكتله خويه اميسره
الكمر ما قصر حشه ■■■ وياي راسه هم مشه
عالرمح وعيونه ماغمضن علي حراس
لسبي رحت وكضيت الدرب ياحيدر ونين
الصعبه مجلسهم أدخله آنه وين وهوه وين
صاح زينب أرد اشوفنهه ولذت منطيته عين
لجن بويه شفته بالعصه يطك ثغر الحسين
ياعلي كوه اطلعت ■■■ عله أضراسه خفت
شفته كسرهن وصدره بالطفوف انداس
□□□□□□□□□□□□□□□□□□□□□□□□□
الشاعر
محمد الجوراني
كلشي ما بيه عليك _ وألف طبره انته بيك
بغير راسي بأربعينك كون اجيك
""""""""""""""""""""""""""""""""""""""""""
كلشي ما بيه عليك وصدري سالم
وانته جوه خيولهم عالترب نايم
كون امي ألك اتقدمني جاسم
كون اجيك ابلا نفَس / وحافر ابضلعي رفَس / وصدري بسهام انترَس ** وأوصل ألك بدماي
آنه ما بيه جرح _ وانته بالطف منذبح
بغير راسي بأربعينك كون اجيك
"""""""""""""""""""""""""""""""""""""""""""
آنه چا محد رفسني وضرب اختي
ولا شمروني ابحجر صوب جبهتي
ولا مسلوبه التراچي امن أذن بنتي
ولا طلعت من خيم / ولا جمر چاوي الجدم / بنتي ما بيهه ألم ** ومتوفرلهه الماي
وبنتك ابهيمه وضمه _ والمتون امورمه
بغير راسي بأربعينك كون اجيك
"""""""""""""""""""""""""""""""""""""""""""
بأخو ما مفجوع مثلك دمعي يجري
لا رحت لنهر گتله طاح عمري
ولا رجعت إلخيمة أختي محني ظهري
ابمشيتي ما منكسر / وأخت مالي تنتظر / امتانيه حامي الخدر ** يرجع كمرهه وياي
آنه ما عندي گمر _ عفته طايح عالنهر
بغير راسي بأربعينك كون اجيك
آنه ما عندي خيام احترگت ابنار
ولا حوافر خيل اكو داست عله ازغار
في غنه من هذا كله وأمتلك دار
عيلتي آنه امأمنه / ألهه ما واحد دنه / ولا فگدت امن الضنه ** كلهم هذوله حذاي
أبن ما عندي عليل _ ولا اخت طلعت ابليل
بغير راسي بأربعينك كون اجيك
""""""""""""""""""""""""""""""""""""""""""""""
تره ما مسموم اخوي وبعده ما مات
ولا اموصي أبنه بيه بالملمات
آنه ما عندي ابن اخو طفوله شمعات
ولا دمه ابصدري بعد / ولَحترگ لبني مهد / تلولي رباب ابلا ولد ** عبد الله احچي وياي
ول ا وگعلي حر زهير _ ولا حبيب ولا برير
بغير راسي بأربعينك كون اجيك
"""""""""""""""""""""""""""""""""""""""""""
امنيلي مهر وتقدمه أختي أليه
ولا بنحري قبلتني امن الزچيه
وحته ما مگصوص خنصر من أديه
مثلك آنه ما صرت / لا گمت لا هم طحت / من شنو عالتل شفت ** جابت لخوهه افياي
ول ا چتفو اهلي بحبال _ ولا أختي بين الرجال
بغير راسي بأربعينك كون اجيك
هسه شي رايده ولَتخليني يائس
نظره من عيونك أتسويني عابس
ادعيلي كون عليك اموتن بالمجالس
روحي إلسبيلك هايمه / هيچ ابعزاك الخاتمه / وحاظره أمك فاطمه ** يابختي آنه بهاي
خاطر المهدي يصيح _ مات في حب الذبيح
بغير راسي بأربعينك كون اجيك
"""""""""""""""""""""""""""""""""""""""""
الشاعر/ محمد الجوراني
العلي السجاد أخذني ......... يشوگي ولا تردني
يريته إيصير عمري دمعه يبچوهه ابقيعه
_______________________________
عمري إيصير دمعه أتمنه تنزل هم عله خدود
وشرط يبچيني محزن عله حسين وگلبه ممرود
شايل صدره حزن الغاضريه وذيچ الورود
أريد ابخده أصيرن دمعه تتنطر الموعود
مثل دمع اليتامه ......... إنمله آه وملامه
من فگدو أبوهم حيدر وعطفه وربيعه
________________________________
مثل دمع انتظار إسكينه يرجع عمهه عباس
ومثل عمتهه زينب حزن شدت معصب الراس
وجرح زينب نزف منه يتامه يلچم احساس
أصير اخيام ريت وعنهه أحجب نظرة الناس
الگمر ضحه ابحياته ......... ولا نظرة شماته
وجفن عيونه سور الحره تشهدله الشريعه
________________________________
يشوگي يم حبيبي ودني ياريت المسيه
أريد ابمتنه أعد جروحه من اسياط اميه
البقيع وگاعه أترسه من دموع الغاضريه
وأون ون اليتامه يَمه من ماتت رقيه
وأطلع دمعة العين ......... وأسمع ام البنين
وتساعدني إعله جزعي وتهمل الدمعه سريعه
وأشرح للبقيع إبدمعي وأذكر ما جراله
علته إمن الطفوف ودمعه بعيونه حلاله
واصيح هناك ريت الموت اخذ عمري ابداله
وعلي السجاد باقي خيمه ليتامه وعياله
يشوگي إبدمعي اطوفه ........ أون وابچي الطفوفه
وصدر حسين متهشم عليه وسد رضيعه
_________________________________
روحي بعيني دمعه إتصير وابچيهه إعله بابه
اهناك امن اشم احزان عماته ابترابه
ومن ابعيد اصيحن آه يحسين ومصابه
وأحس وياي صاحت ياعلي حتى الخرابه
حسبي الله أعله زمره ......... أجت هدمتله گبره
بعد امصايب حسين البقيع اعظم فجيعه
__________________________________
أظم ابصدري وني لو أجاني الليل يَمه
صوت الليل مسموع آنه ما أگدر أكلمه
خاف إمن ارد أونن لو أسولف تسمع امه
بطاري الغاضريه أدري ضلع الزهره ألچمه
وأگل لليل لتون .......... تلچم ضلع محسن
ولا تذكر سبي زينب قرب گبر الوديعه
بحزن البيه أبچي حيل وأسأل عن الحسين
واذكر يَمه جاسم والرضيع إبدمعة العين
ومن قبر الامام الباقر اسمع صوت الونين
حين الگتله خبرني على فاگد الچفين
والصادق سمعته ........ آه ياعمي ونته
وگال ابذكر عمي احيو مجالسنه يشيعه
______________________________
الحقير ،، محمد الجوراني
عاشر محرم رتل ،،،،، يالمهدي عمتك عالتل
عمه تعال النار
إشگد چوتلنه ازغار
تعال
______
عمه عالتل واگفه وهذا المچان يكون
البي نتلاگه واجيك آنه بزراگ امتون
اترابه گامت واحنه عدنه اطفال يختنگون
انوبه يشتمون دخان وعلي يموتون
بهايه وگفتي ردتك ،،،،، تجي وتساعد عمتك
لچوي برجلي آثار
إشگد چوتلنه ازغار
تعال
_____
١__
الناس تقرالك ندبتك بالجُمع وهواي
وآنه وحدي اقره عجلي تلم وياي
ازغار من جوه الحوافر سحگتهه اعداي
لو تجي أتسوي ابعباتك عله حسين افياي
فييله عمه امن الحر ،،،،، عالرمح وجه اتغير
جو الغاضريه حار
إشگد چوتلنه ازغار
تعال
_____
٢
آنه اريدنك تجيني احنه بس نسوان
بعمر جاسم كون اشوفك مهدي مو كبران
آنه ادري الصار بيه يشيب الرضعان
انته لو شايب تجيني شلون بالنيران
ياهو اليطفي الخيام ،،،،، وياهو اليلم الايتام
يلما تحب الاعذار
إشگد چوتلنه ازغار
تعال
_____
٣
واگفتلك عله التله لا يجينه الليل
خاف منشوفه ونطلعه المنسحگ بالخيل
اطفالنه هوايه يمهدي وبيه ما ضل حيل
متوني ذني وذني أديه عمه دم اتسيل
شلون آنه المهم شلون ،،،،، ومن حيلي ميتات امتون
ويمتوني عدهم ثار
إشگد چوتلنه ازغار
تعال
_____
٤
يله هسه خل ندور عله كلمن ضاع
حافي لا تمشي تره متروسه نار الگاع
قبل ميصير المسه تلگاهم انته بساع
وآنه مناكه اروحن الم لحسين اضلاع
طشر اعضامه الحافر ،،،،، صدره يم ظهره صاير
ضلوعه صفت طشار
إشگد چوتلنه ازغار
تعال
____
٥
الناس لا ما تدري چانت عد علي ابنيات
الما ينشافن هذن بين الزلم طالعات
عمه علوياتكم هجن تره حافيات
وعدنه چم إيتيمه مدري وينهن ضايعات
وحده منهن شفتهه ،،،،، مجروره ترچيتهه
ما ادري بيهه اشصار
إشگد چوتلنه ازغار
تعال
_____
٦
أركض ويركض ورايه الشمر بين ارجاس
الرايه عندك وآنه عمتك صيرلي العباس
جيبلي الخيمه عباتك ستري من الناس
طاح بناي الخيام وچفه عالشط انداس
تره من طاح الكفال ،،،،، زينب انشافلهه خيال
وكتي عليه اندار
إشگد چوتلنه ازغار
تعال
______
الخادم
محمد الجوراني
٧
عباس .. هذا اليوم ألي ،،،،،،،، عباس .. گل ألبت علي
بيه الخدر مرتجي
الماي أجيبه وأجي
عباس .. گل ألبت علي
****************************
آنه ابو فاضل يزينب وانتي تدرين
يازلم تمنعني عنه والزلم وين
ياهو يدنه يمي وآنه ابن ابو حسين
وآنه بيدي علي يختي سلم البين
عباس .. حيدر لو حمل ،،،،،،،، عباس .. بيميني الاجل
بسيفي ألوح النجم
و المعركه للزلم
عباس .. گل ألبت علي
****************************
آنه علمت المنايه بأخذ الاعمار
الموت طالب چان عندي وآنه الاختار
بسيفي من اضربلي واحد بضربتي حار
موسه بسمي نخه لمن شگ الابحار
عباس .. موسه دعوته ،،،،،،،، عباس .. من هد افعته
بسمي نخه وانتصر
يازينب آنه الگمر
عباس .. گل ألبت علي
****************************
(١)
خويه زينب راح اشوف الحومه شتريد
چني احسهه تريد بيهه حيد ابن حيد
ويدي خاطرهه يزينب خيبره اتعيد
الموت يازينب رفيجي ابدرب البعيد
عباس .. يم الشط وگف ،،،،،،،، عباس .. وبجوده غرف
الجود أعله ظهري انفرش
يسموني ساقي العطش
عباس .. گل ألبت علي
****************************
بيده جر سيد الصوارم طلگ اگراب
سيف لو ملك المنايه الوگع ارگاب
چف علي العباس حيله والزلم باب
ماخطه من دفع سيفه بيهم إصواب
عباس .. عجبه للعجب ،،،،،،،، عباس .. بيهم ماتعب
بي زينب إتنومست
والحرب ألي لو بدت
عباس .. گل ألبت علي
****************************
(٢)
خويه زينب هم سمعتي الشمس تلاح
وآنه شمس الغيره والحَر يختي الاسلام
صوت واحد من اصيحن توگع ارواح
إله اخلي الموت يصرخ رايد ارتاح
عباس .. جيش الوحده ،،،،،،،، عباس .. بسم الله بده
مني يزينب عهد
إله اركع العدد
عباس .. گل ألبت علي
****************************
من وكت صاحت عساكر جاينه الليل
والعجب كلمن رگبته بالهوه اتميل
نظرة العباس رسلت طير ابابيل
رمه بيهه النار مدري حجر سجيل
عباس .. لو حامي الحمه ،،،،،،،، عباس .. نار ابصارمه
بس وحده همه إشكثر
وياهو اليلاگي النصر
عباس .. گل ألبت علي
****************************
(٣)
الشاعر ،، محمد الجوراني
