Telegram-канал abbotrr - روايات صنعانية 📚😍: Unsorted

روايات صنعانية 📚😍

10 February 2024 19:04

بارتـات يومنـا قراءه ممتعه 👆🏻😍

روايات صنعانية 📚😍

10 February 2024 19:03

ِ

تـــــوأم أغـــــراب 2

البارت 112

للكاتبـــــة: أميـــــرة اليـــــــــمن
ـــــــــــــــــــــــــــــــــــــــــــــــــــــــــــــــ

تقدم. منه صقر وهو مبتسم؛ ابقاااك ياحيااا الله من جاناااا

ميس لفت ودخلت لابيتهم مدعممه لهم الاثنين

تنهد صقر ونظره لها.. ونزل قيس سلم عليه وهو يتكلم: مبروووك قالوا خطبت

صقر بتلبك: هههه الله يبارك فيك ايوة

قيس: ضخم الله يهنيك تستاهل كل خير

صقر لف بنظراته لابيت ميس وهمس بصوت سمعه قيس: كل خير مع ميس مش غيرها

قيس ابتسم على جنب وتكلم: وايحين العرس.. اكيد. انا معزوم

صقر بسره وبضحكه قهر؛ اكيد انت الاول.. العرس كنت اشتي نهاية الشهر بس رفضوا قالوا مابش وقت اقل شي سته شهور

قيس: حقهم والله.. يلا انا استئذنك

صقر: وييين ضيفنا ي رجال

قيس وهو يطلع السيارة: غير مره.. خاطرك

صقر: في امان الله....!!!

.

.

وقف بسيارته قدام بيت عماد وترجل منها وتوجه للبيت دق الباب وفتح له اخو عماد ودخله للمجلس لوما يداعي عماد اللي دخل بعد دقايق للديوان وهو بالعكاز ورجل واحده

بسره قيس بألم ووقف سلم عليه وهو يتكلم: ياهلا ب البطل كيف انت

عماد: حياك الحمدلله وانت

قيس وهو يجلس وعماد جنبه: نحمدالله.. كيف ايامك وين مقضيها

مدد رجله المقطوعه وكشر بوجع وهو يرد: هانا في هذه الدنياء

قيس: بتوجعك

لف له عماد وضحك بهدوء: تعودنا على وجع اكبر يا قيس فما بالك بهذه

قيس: كيف لوما حصل هذا احكي لي

عماد: ههههه كنت واثق ان فضولك عيديك لاعندي.. عارف لككك ههههه

قيس: ههههههه لا والله جيت اطمن عليك.. ومنها نتجابر.. هاه كيف لوما آسروك

عماد بتنهيده ونظره لقدام وكأن كل شيء حصل امامه الان: كانت الجبهه والعه والعه قوي يا قيس. والطيران حقهم بيضرب من كل بقعة.. انا كنت ساعي بالذخيرة اوصلها للمجاهدين اللي بالطرف الثاني.. مادريت الا برصاصة اخترقت رجلي وخلتني ارتجم للقاع ولاعاد قدرت اتحرك.. المجاهدين اللي كنت خاطي لهم بالذخيرة قصفهم الطيران والجو امتلى غبار خلاص ولاعاد تقدر تبسر شي.. حاولت اقوم وازحف لا بقعة ثانية ماقدرت رجلي خدرت كل جسمي يالله والوجع دمي كان يسيل والرصاصة مستقرة داخلها.. جلست بقعتي. وبعد دقايق ما ابسر لك الا الجنود السعوديين وقفوا فوق راسي واسلحتهم موجه لي

قيس بخفوت: ومن هانا أسروك

عماد: بالضبط شلوني اسير معاهم.. كنت ساني انهم بايعملونا مثل ما بنعاملهم بس طلعوا انذال.. انذال قوي يا قيس الله لاحطك بين ايديهم

قيس: ما فعلوا بك

اشر بوجع لرجله وتكلم: بسبب اهمالهم وعدم اهتمامهم بالجرحى اللي بيأسروهم.. اضطريت لقطع رجلي لأنها خاست وانتهت.. الرصاصة جلست فيها ثلاثة ايام.. كان اصيح واجنن من الوجع ولاحد عبرني او اكترثوا لاحد. هناك كلااااب كلاب لابعد. حد.. والله لو كنا يهود ما يعاملونا هكذا...

قيس: خسيسين.. عليهم غضب الله لو بس يبسروا كيف بنعامل آسراهم

عماد: هههه ما يوصلوا لمستوانا ما يوصلوه يا قيس لو مهما فعلوا

قيس: اكيد. احنا شعب اليمن اللي قال فيه النبي صلوات الله عليه وعلى آله.. اتاكم اهل اليمن أرق قلوب وألين أفئدة. الايمان يمان والحكمة يمانيةة.. النبي.. قال اللهم بارك في يمنا وشامنا.. وقالوا له ونجد.. فرد عليهم.. من هنا قرن الشيطان.. فلا تقارنا بهم يا عماد.. قد النبي وضح بنفسه من احنا ومن هم..

عماد؛ اي والله ونعم باليمن وباهلها رجال وابطال والنعم فينا...

.

.

صباح ثاني يوم..!!!

رفعت الطرحه فول راسها بعدما تلثمت وفتحت باب الشارع وخرجت. غلقته من خارج ولفت لبيت صقر اللي قدامهم وبسرت صقر خارج وشكله مستعجل ومتجه لسيارته داعته بصوتها: صقــــر

فز لصوتها ولف لها بسرعه اشرت له بمعنى تعال وتقدم منها بسرعه

وقف قدامها وهي مدت يدها تصافحه وهي تتكلم ببسمه: مبروككك الخطوبة ولو متأخرة ههه

شد على يدها بعدما خابت آماله في اللي عتقول ورد يقهرها: الله يبارك فيش شكرآ

فكت يده من يده وتكلمت: هال تناسب لك والله ماشاءالله طاسه ولقت غطاها هههه

رفع حاجبه بقهر ورد: والله هالة تسواهن كلهن وان شاءالله الخير فيها بعدما ما لقيناه في غيرها

ميس بزنط: تسواهن كلهن.. بس ما تسوى ميس ركز.. هي وين وانا وووين انا.. ميس.. عارف ايش يعني ميس... يعني الحلا والدلع والرقة والطول والعيون والشعر وكل حاجة زينة فيني ماني مثل غيري ولا الغير مثلي يا صقر.. على العموم قبل عرسك اتمنى هديك لي تكون ورقة طلاقي.. لأنو مش حالي ندخل للمحاكم يا ولد عمي وصاحب ابي.. خاطرك. اعطته ظهرها وهو يبسرها بنظرات قهر من كلامها القوي. ضحك بسخرية وهمس لنفسه: ما كنت ظني يا صقر انها داعتك تعتذر منك او تبكي عندك وتعاتبك ليش تزوجت.. غبي وعتصل طول عمرك.. غبي... وجه نظراته له وبسرها خاطية بكل زنط وغرور ما يليق الا بها همس بعشق وقهر بنفس الوقت؛ فعلآ هي الفارقة وغيرهن كلهن..!!!
.

.