1638
هذه القناة تتضمن قصائد واشعار ولائية وحسينية في مدح ورثاء ال البيت الاطهار
https://youtu.be/ixu12NLpgXc?si=o6AaCrhqVlWQINRr
Читать полностью…
لفاني العيد (نعي )
لفه عيدك يگلبي منيلَّك عيد
على حملي يحط الوكت ويزيد
أخذ كلشي من أديه وفرغت الأيد
بالناس التهمني غَرِّب ابعيد
★★★★★
بيه ايلوم اجاني المادره إصار
الچفه ابماي وانا أچفوفي بالنار
يصبرني ويگلي ليش تحتار
بيها الريح تصفر ضلت الدار
★★★★★
اجاني العيد وانا السهم بچلاي
يموصاحب عليمن معتني وجاي
بهيمه اووشلت من جربتي الماي
يلماخذ هلي اشخليت من راي
★★★★★
اجاني العيد وانا ابحال متعوب
من كل صوب عشر اسهام مصيوب
چني للدهر ثارات مطلوب
من العدليين مدري شلون محسوب
★★★★★
بيكم لويرد الوكت يومين
بشوفتكم اريدن تنملي العين
بلياكم اليوم إعدال سنتين
غريب اخلافكم والحال موزين
★★★★★
ادعي لاتمر ياعيد مريت
ولاشفتك ولابالدار مريت
حنظل باللسان وبعد مريت
أعايدمن هلي تحت الوطيه
الشاعر حسن لعيبي الحريشاوي
نعي لفراق الأهل عند قدوم العيد
دار اهلي الگبل چنت اعتنيها
التضوي والفرح لايگ عليها
مشت عنها البدور التضويها
انا بياحال اروحن وأمر بيها
★★★★★
اجاني العيد ياداري الزهيه
گبل. واليوم مهظومه وخليه
انوح الصبح وانحب كل مسيه
على الماتصح منهم بعد جيه
★★★★★
ريت اصغار بيها ماكبرنه
دار البيها. گضينه عمرنه
اهلها مابعد واحد يمرنه
انكسرنه. ولادوه اليجبر كسرنه
★★★★★
يادار النطبها وندگ ياباب
عنها گوطروا للدوم الاحباب
مافاد النحيب ودمع سچاب
اهلها حيف صاروا تحت التراب
★★★★★
يدار البخت وعليها ولمنه
ابونه مابعد بيها ولمنه
يفطر الصخر ويكسره ولمنه
على احباب الصفوا تحت الوطيه
الشاعر حسن لعيبي الحريشاوي
لفراق الاحبة وذكراهم عند قدوم العيد
اجاني العيد واهل العيد غياب
وَدَّاهُم زماني تحت التراب
المشوا درب المنيه وَلأَرَدَّوَا عليه
اجاني العيد واهل العيد غياب
★★★★★
أجانه العيد يا عيد النحبهم صاروا ابعيد
جرح مابيه دوه ايفيد وجرح مايقبل ايهيد
وجرح متعمد ايزيد ويزيد بلوعتي يريد
اجاني العيد ودموعي بالعيون
صاروا بس حلم بِيَّه يمرون
الراحوا من اديه ولاردوا عليه
اجاني العيد واهل العيد غياب
★★★★★
شعنده العيد بالباب واهل العيد غياب
يدري حدر التراب صاروا اغله الاحباب
جمر بالگلب لَهَّاب يزيد ابدمع سچاب
اجاني العيد وانا ابوسط الهموم
عيني تشوفهم ماظن يجي يوم
المثل روحي اليه ولاردوا عليه
اجاني العيد واهل العيد غياب
★★★★★
راحوا عن العيون بدرب مابيه يردون
جرعت اليوم ويهون وگولن باچر شلون
اوياهم اندفن كون الك ياموت ممنون
على اديار الاحبه ياهو دلَّاك
تره الغالين كلهم راحوا وياك
خذتهم هاي هيه ولا ردوا عليه
اجاني العيد واهل العيد غياب
★★★★★
شيسوي اغياب اليدوم سهم بحشاي مسموم
وين انا والهموم وإلي كل هذا مظموم
الچانوا يمي كل يوم صاروا بعد النجوم
الچانولي درع من كل الاصفاح
كشف ظهري ورماني الوكت برماح
شمل چنه سويَّه ولا ردوا عليه
اجاني العيد واهل العيد غياب
★★★★★
درب وحشه خذاني الف طَوَيَّهِ طوانِي
أَيِسْ لاتعاني يگلي ولاتتاني
مالك عمر ثاني وتخلصه بالاماني
امنين الگه كلب ينساهم منين
وصورهم ماليه ابيتي الحياطين
صفت داري خليه ولا ردوا عليه
اجاني العيد واهل العيد غياب
الشاعر حسن لعيبي الحريشاوي'
❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4 سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.
التواصل مع @ahmed_alziwar0
قناة خاصة بتلحين القصائد
/channel/+PZwpTt2HLXcvUQZh
------------------------------------------------------
مناجاة
أشوجد ربي اليعوفك
شضاع منه إلي لگاك
ربي سامح گلب غافل
تاه بالدنيا وجفاك
أرحم العبد اللئيم
ياعليم وياحكيم
نظره منك ياكريم
★★★★★
وين اروحن من زماني
البيده حظرلي الذنوب
ونفس أماره تطيعه
شوكت ياربي اتوب
انكشف سري يم عدوي
وانت ستار العيوب
ضاگت الدنيا عليه
منهو يكشفها الكروب
ارحم العبد الذليل
كل وكت صبره قليل
نظره منك ياكريم
★★★★★
نفسي والدنيا عليه
ياهو الي بهذا الزمان
الناس چنها جحور افاعي
ويمها ادور عن أمان
وانا من اذنوبي منك
وين اروحن يامكان
وبدرب مجهول امشي
نور مابيه وضمان
ارحم العبد الغريب
المااله غيرك قريب
نظره منك ياكريم
★★★★★
وين من دنيا غريبه
ارتحل يارب واروح
اسهام إلها بصدري طاحت
التلوح وماتلوح
الگيته للشمات صاحب
الچنت لأجله انوح
مَلَّت الروح التجارب
مالي للصدمات روح
ارحم العبد الوحيد
غير عظفك مايريد
نظره منك ياكريم
★★★★★
أرحم الحاير بأمره
غير نظره مايريد
على كلشي ربي قادر
وكلشي عنك موبعيد
يلي دومك مني اقرب
انت من حبل الوريد
مايموت الامل عندي
برحمتك دومه جديد
ارحم العبد الضعيف
الصار للحسره حليف
نظره منك ياكريم
★★★★★
الماعرف سحرك ونورك
اعرفت تاليته يحيير
الماعرف لذة وجودك
للجهل تابع وأسير
حبك احساس ومعارف
جنه وانسام وعبير
من العدم للعدم عمره
صار اليشوفك أخير
ارحم العبد الفقير
الحاير بيوم المصير
نظره منك ياكريم
الشاعر حسن لعيبي الحريشاوي
ياإله العالمين
القادر الغفار يارب ياحكيم
الماجد الواحد الباسط والرحيم
ياإله العالمين
★★★★★
يلي ماتحتار حتى تستشير
ولا ابحاجة راي ماعندك وزير
قَدرَّت كلشي بحكمتك ياقدير
مومثل كلشي وأبد مالك نظير
الرافع الخافض الرزاق الحميد
الاول الآخر الرحمن المجيد
ياإله العالمين
★★★★★
يلي مايحويك ياربي مكان
ياعظيم الشان حَيَّرت البيان
انته قبل الزمن يارب الزمان
حبك النعمه ومفاتيح الجنان
الوارث المنان يارب يامجيب
ياحسيب وياعليم ويارقيب
يا إله العالمين
★★★★★
ارحم الماعنده قدره ياقدير
وفق الصار وبدونك مايصبر
قدمتني وچنت بلوادم آخير
فهمتني درب كل باطل گصير
ياحفيظ وياجليل وياشكور
ياودود ويالطيف وياغفور
يا إله العالمين
★★★★★
ارحم المحتار ماعنده جواب
ارحم العاصي اذا صار الحساب
الچان ميهزه بيان ولاخطاب
اليهاب الناس منك مايهاب
يامعيد ويارشيد وياعظيم
الحافظ الجبار يارب ياعليم
يا إله العالمين
★★★★★
الراحه مالي بيها حظ ولا نصيب
بين كل الناس من دونك غريب
اي قريب بلايه قربك موقريب
ياحبيب المصطفى الهادي الحبيب
ياعزيز وياسميع ويابصير
ياقديم وياشهيد وياقدير
ياإله العالمين
الشاعر حسن لعيبي الحريشاوي
قصيدة وعظية (وزن تجليبة)
العمر مثل الحلم ياريتك تعرفه
لتضَيَّعَه بندم وتگول ياوسفه
★★★★★
مهله بالعمر ماطول گدامك
شِدلَّها الحيازم دنيا واحزامك
لاتلفي المنية وتحصد ايامك
قدر هلموت واجب مايجي صدفه
★★★★★
حط الله بيانه ونصب دستوره
فوزك من تعاند روح مغروره
باچر للبشر ماتبقه بس صوره
تلوم النار بالك يلصرت سعفه
★★★★★
ياغافل أخذ من المشوا عبره
تره الدنيا گصيره والعمر مره
لوصحره صرت متفيدك المطره
اليزرع شوك حتماً ينجرح چفه
★★★★★
شتضيَّع بعد يلعمرك امضيَّعَه
متجيب اليروح الحسره والدمعه
من الريح احذر والعمر شمعه
لاتطفه والك عدوان تتشفه
★★★★★
للدنيا تريد من الله متمني
صالح بيها اعمل ربي رجعني
(كلا ) يگول ربك لاتخاطبني
فرصه وضيعتها حسبتك كلفه
★★★★★
ياراي اليفيد ومابعد چاره
شتجاوب الباري وعذر تختاره
وره الدنيا مشيت ونفس اماره
شيفيد النظر من شمعتك تطفه
الشاعر حسن لعيبي الحريشاوي
{ ارحم ابحال الغريب}
أداء : احمد عزيز
كلمات : حسن لعيبي الحريشاوي
لوداع شهر رمضان المبارك
وداعاً ياشهر مومثل الشهور
بالرحمه علينه أيامك أَدْوُرَْ
شهر رمضان خيرات
وللصايم مَسرَّات
بالرحمه علينه أيامك أَدْوُرَْ
★★★★★
نودعك بالدمع ياشهر رمضان
نعيش بدونك بلوعات وأحزان
مثل عاشگ يفارگ اغله خلَّان
شهر نعمه ومحبه وشهر غفران
شهر رمضان ياخير
مثلك شهر ميصير
بالرحمه علينه أيامك أَدْوُرَْ
★★★★★
صرت معشوگ عدنه واغله الأحباب
نود للدوم يمنه اتحط الأرچاب
للجنه طريق وللكرم باب
خافن من تجي تلگانه غيَّاب
رحت موچنه بحماك
خذيت گلوبنه وياك
بالرحمه علينه أيامك أَدْوُرَْ
★★★★★
يلحبك فخر يملك الوجدان
رحيلك موسهل ياشهر رمضان
شهر البيك انزل ربنا قرآن
يريد الناس كلها اتعيش خوَّان
تريد اتروح واتغيب
يشهر النور والطيب
بالرحمه علينه أيامك أَدْوُرَْ
★★★★★
اجعلني بهلشهر ياربي مرحوم
ولاخسران من الخير محروم
يلفارض علينه نعمة الصوم
ابد هيهات مترد بشر مهموم
شهر رمضان لوراح
شلون الگلب يرتاح
بالرحمه علينه أيامك أَدْوُرَْ
★★★★★
شوصف جنتك ياشهر محتار
بفضل رحمان طول الوكت غَفَّار
يادرع السلامه ودافع النار
جميلك ماتوصفه احروف وأشعار
نتاني أيام وأيام
تجي ياشهر الصيام
بالرحمه علينه أيامك أَدْوُرَْ
الشاعر حسن لعيبي الحريشاوي
أجاني العيد وايامه على الباب
شافاني بهظم ويريد الاسباب
السنه الفاتت يگلي عندك احباب
ماكو هلسنه چاليش غياب
بگيت بعبرتي من حر الصواب
شگلَّه والدمع نارين سچاب
أگله احبابي يامن تطلب إجواب
احباب الروح صاروا تحت التراب
الشاعر حسن لعيبي الحريشاوي
https://youtu.be/fxRiAAsL-24?si=TDVDREPaNavvd6N-
Читать полностью…
نعي لسان حال العقيلة زينب لاستشهاد أمير المؤمنين علي عليه السلام
ملا ابودريد الشبكي
الشاعر حسن لعيبي الحريشاوي
https://youtu.be/4xTPm08_wyw?si=7RXGFSAMJWeNwfV8
Читать полностью…
لفقد امير المؤمنين علي عليه السلام
شلون فگدك يبوالطيبه بشهر خير الباري يرهم
انته نور النبي الهادي وباب علمه البيه توسم
التين والزيتون حيدر خير من ناده وتكلم
ياقطب كل المعارف بكل علم شخصك تقدم
من الله يملك حرف آصف وانته عندك اسمه الاعظم
الصفا والركن انته والسقايه وماي زمزم
ياعلي العروة الوثقى الي تمسك بيها يسلم
ياعلي درع التحصن بيك يخلص من جهنم
جنه لونيران باچر حبك وبغضك تقسم
انفجع دين الله بغيابك والهدى ركنه تهدم
والشهر مفجوع بعدك صار عيد العتره مآتم
الشاعر حسن لعيبي الحريشاوي
مواويل وابوذيات بطاقات للعيد
تحيه من الگلب تحمل معاني
اخصك بافضل وأجمل تهاني
سعيد ويوم تحقيق الاماني
بنعيم وخير كون ورفاهيه
جميل العيد بس ايصير أجمل
بوجودك ياصديقي وبعد يكمل
ارسلت اول. تحيه الك. وأول
تهاني العيد يلغالي عليه
اخط واكتب الك اجمل عباره
اسمك نور يحتل. الصداره
سعيده ايامك وعيدك أبشاره
بمسره ادعيلك ودنيا. زهيه
وحگ الرحمته سبقت وعيده
يشرفني كلام ارسل. وعيده
واگول العيد هو انته وعيده
بوجودك ينحسب عيدين إليه
نسولف عن كرم شخصك وجودك
يسگاي الوفه بچفك وجودك
العيد أجمل تعطر من وجودك
تهانينا يابو الذات الوفيه
عيد مبارك عليك وعلينه
بذكرك بلقمم صرنه وعلينه
وحگ ربنا ومحمدنه وعلينه
ندعي بخير الك صبح ومسيه
الشاعر حسن لعيبي الحريشاوي
دار اهلي الگبل چنت اعتنيها
سيد عماد الحسيني
الشاعر حسن لعيبي الحريشاوي
نعي حزين
اداء القارئ والناعي عصام المحمداوي
كلمات الموفق حسن لعيبي الحريشاوي
لوداع شهر رمضان المبارك
امودع الله ياشهر ربنا الكريم
ياشهر احسان من ربنا الرحيم
جرح الموادع علينا شگد أليم
عنا يلسديت بيبان الجحيم
★★★★★
شلون اودعك مايساعدني الكلام
ياشهر رحمه وكرامات . وسلام
ياشهر نور انجله بيك الظلام
ياشهر تسبيح للناس وقيام
★★★★★
شلون اودعك ياشهر نور على نور
ياشهر رمضان ياتاج الشهور
ياشهر فوز وختاماتك سرور
ياشهر غفران من ربنا الغفور
★★★★★
امودع الله ياشهر مالك مثيل
انته رحمه وخير من ربنا الجليل
ياتمام الغانمه واقرب . سبيل
ياشهر توبه وجنان وسلسبيل
★★★★★
امودع الله ياشهر خير وأمان
شلون اودعك چلمه صعبه على اللسان
خلصت ايامك مضت من الزمان
مثل گلب الوالده اليمطر حنان
الشاعر حسن لعيبي الحريشاوي
اجاني العيد واهلي مااجوني
ابعيد الدرب چنهم لو نسوني
بطريج الموسهل شو تيهوني
(خلص مايهن راحن اعيوني)
وحيد الدار ماواحد يجيني
بالمناطر بگت هماله عيني
ايطَيَّح اجبال علراحوا حنيني
(هذا انا وبعد زايد ونيني )
هذا انا ونيني يزيد ويزيد
على الراحوا بعد ماريد كل عيد
الماوياه هله دنياه شتفيد
شريچيين الگلب مو صاروا ابعييد
اجاني العيد بالوحشه يغالين
بعدكم وين اروحن يادرب وين
العين بلاضواها شتنفع العين
بعدكم يااحبابي الحال موزين
الشاعر حسن لعيبي الحريشاوي
اسمعهم يگولون 💔اجه العيد ويبشرون 😢
شاعر اهل البيت حسن لعيبي الحريشاوي
الرادود ....كرار الطائي
أجه العيد
أسمعهم يگولون. أجه العيد ويبشرون
بلوعاتي يزيدون. عن ياعيد يحچون
على ناري .يحطَّون . نيران. ويچملون
ولابالحال يدرون. أبوي وسلوتي شلون
وسط اللحد مدفون. يربي منك العون
بعيني موحش الكون حزين وذابل اللون
الليل امذبل الجفون. وجمر هماله العيون
الشاعر حسن لعيبي الحريشاوي
مناجاة
ارحمني يارحمان
رب الانس والجان
ياصاحب الاحسان
ارحمني ياربي
★★★★★
شمااعتني الدربك وإجي وفقني
ومن رحمتك مولاي لاتحرمني
ولوملت عن درب العدل رجعني
ومن دنية خداعة ظمير احرسني
خليني ياقيوم
بلطفك اعيشن دوم
وادعي النعيم يدوم
ارحمني ياربي
★★★★★
بلارحمتك عمري ضياع وغربه
ودرب السهل خطواته كلش صعبه
متريد تعبي ولا عذابي اتحبه
ياصاحب التستاهل انته الصحبه
ياخالق الاصباح
بذكره الگلب يرتاح
حسره العمر لوراح
ارحمني ياربي
★★★★★
اتبع نهج ال النبي كل عمري
وادفع وساوس گاصدات الفكري
ابمعروفك اعمل واليقين بصدري
اترك الباطل مايهدم صبري
ياربي ياغفار
ابعدني عن النار
بحق طه والكرار
ارحمني ياربي
★★★★★
اجعلني على نهج النبي وآثاره
ودَليَّها روحي لاتضل محتاره
حتى ولا اتبع نفس أماره
ومجهول دربي المااشوف اخطاره
ياربي ياوهاب
الغافر التواب
بآل النبي الاطياب
ارحمني ياربي
★★★★★
من الجراير والذنوب ابعدني
ومن كل بعيد اعليك لتقربني
حاير بأمري وادري ماتتركني
ومثل الخلگ هيهات ماتخذلني
ارحمني ياقهار
من ظالم وغدار
ياربي ياغفار
ارحمني ياربي
الشاعر حسن لعيبي الحريشاوي
لفراق الاپ
حال الدهر بينك وبيني
مشتاگلك ياماي عيني
يابويه عذب روحي الفراگ
خلصان گلبي من ونيني
★★★★★
الشوفتك يابويه حنيت
ولگعدتك يمنور البيت
اتحسر عليها شكثر ضليت
من الصبر ياغالي مليت
يوم الغبت حاضر نحيبي
موشيباني گبل شيبي
للدوم چويات البلظلوع
لحد المنية ماتجيني
★★★★★
بويه الفرح مبعد عليه
يوم الرحت مايمر بيه
راح الدلال بغير جَيَّه
چن ماي وتبده من اديه
بعد الوكت شيسوي حملات
تولاني من كل صوب لچمات
مدري الوكت من حالي شيريد
بكل تايهه ضيع اسنيني
★★★★★
من الموت لويرضه اشتريتك
وبالروح بويه بدليتك
چم مره احس بيك ولگيتك
مثل الحمامه فوگ بيتك
هذا عملها وياي دنياي
مدري طبعها شلون وياي
انطتني عود من الوكت سيف
بس شدت ايساري ويميني
★★★★★
بحومة الدنيا الروح صارت
وطيحة بيارغ غصب طاحت
شوف النوايب جيش غارت
استوحدتني وعلي دارت
اتفرهد شبابي يبوالغيره
صدمات ساعه وساعه حيره
ياخذله وصله من الگلب صار
كل يوم بغيابك يجيني
الشاعر حسن لعيبي الحريشاوي
https://youtu.be/vOFEvuePN74?si=YaRRQ9iU1jTLVndr
==========================
اول هاشمية كلمات الشاعر حسن لعيبي الحريشاوي أداء الرادود حسن البحراني
أجه العيد
أسمعهم يگولون. أجه العيد ويبشرون
بلوعاتي يزيدون. عن ياعيد يحچون
على ناري .يحطَّون . نيران. ويچملون
ولابالحال يدرون. أبوي وسلوتي شلون
وسط اللحد مدفون. يربي منك العون
بعيني موحش الكون حزين وذابل اللون
الليل امذبل الجفون. وجمر هماله العيون
الشاعر حسن لعيبي الحريشاوي
في وداع شهر رمضان المبارك
آخر الأيام من شهر الفضيله
ربي أقبل مني اعمالي القليله
ابواب خيرك ماتسدها
وارفع أيدي وماتردها
ربي أقبل مني اعمالي القليله
★★★★★★
بالحديث القدسي بالقول الاكيد
گلت يارحمن يارب ياحميد
انطي عبدي ومايهمني شماأزيد
نظره منك غير نظره ماأريد
نظره يارب البريه.
تنظر بلطفك عليه
ربي أقبل مني اعمالي القليله
★★★★★★
ذنوبي ذلتني يبو الرحمه وجيت
لان غيرك الها غافر. مالگيت
منهو يجبر كسري ربي لودعيت
ولومشيت بغير دربك لومشيت
أَخْرَّت عني عذابك
وماتسد أبوجهي بابك
ربي أقبل مني اعمالي القليله
★★★★★★
جيت يارحمان بالشهر الفضيل
أطلب الغفران والصفح الجميل
اهواي تنطي لو أجيتك بالقليل
خوفي شهر الخير لوشد الرحيل
موحشه ترجع ايامي
وأووعد واخلف كلامي
ربي أقبل مني اعمالي القليله
★★★★★★
انا مو. أول بشر عاصي وجفاك
ومانسيته ويامه متعمد نساك
يلي ايدك تنطي دوم تگلي هاك
جيت. غارگ بالندم اطلب رضاك
خوفي لاحاصل اسنيني
كتابي ما اشوفه بيميني
ربي أقبل مني اعمالي القليله
★★★★★★
مَيَّزيت الشهر عن كل الشهور
شگد معاني يحمل أبطَيَّاتَه نور
وأثر يترك بالجوارح والشعور
خوفي عبره ماخذت بس الغرور
بآخره أَتنَوَّر حياتي
هاي اول أمنياتي
ربي أقبل مني اعمالي القليله
الشاعر حسن لعيبي الحريشاوي
https://youtu.be/dnIorAFSzHQ?si=bGoK3kBzXRZ8jNzo
Читать полностью…
https://youtu.be/2_nBmuoO31U?si=XWIr-kwuw-lcaZn8
Читать полностью…
لسان حال العقيلة زينب بعد استشهاده أمير المؤمنين علي عليه السلام تصلح نعي او منبرية (وزن نصاري )
گضينه وي الابو أيام حلوات
ماتت من ابونه ياخلگ مات
★★★★★
تگول الناس يوم العيد گرَّبْ
وانا النيران وسط احشاي تلهب
ياهو الكال اجاچ العيد زينب
بعد مايمر بيه العيد هيهات
★★★★★
يوم الواحد وعشرين أجاني
اخذ مني الابو وَهَدَّمَ أركاني
گبله الموت ياريته لفاني
ولايگضي العمر للموت حسرات
★★★★★
فراگك ياعلي شمسوي بيه
ريته لا أجه ولا مر عليه
مايرتاح گلبي للمنيه
بعد مايحمل من الدهر صدمات
★★★★★
يساعة كدر ذيچ الماردتها
اجتني وشوف بعيوني شفتها
حرب ضدي النوايب حَضْرتَّها
عساكرها عليه تشن غارات
★★★★★
ابراحه لاتبشرني يدهري
بعد الراح ماينراد عمري
گلبي من المناطرخسف صدري
وتِصَدَّع من كثر ماشاف لچمات
الشاعر حسن لعيبي الحريشاوي
ميمر
لاستشهاد أمير المؤمنين علي عليه السلام
الشاعر حسن لعيبي الحريشاوي