Telegram-канал rwayatsudan - رِوايات سُودانية🪐🤎!)": Unsorted

رِوايات سُودانية🪐🤎!)"

21 February 2025 05:13

تعمُّد الغياب بيلغي قُدسية العلاقات"))

غاية الطُمأنينة في الحُب والعلاقات عِموماً إنو الطرف التاني ما يعودك على غيابه!

نحن بننتمي للبنحبهم وبنطمئن بوجودهم حوالينا وما بنتمنى غيابهم عننا بأي شكل من الاشكال!

ما لم يكون الغياب دا ليه أسبابه المُقنِعة واللي بتكون غصب عنك!

وعلى قدر المحبة بتحاول تتجاوز وتتخطى أساليب الغياب المُفاجئة لأنك ما بتحب تخلي الطرف التاني لتساؤلاته ولخوفه وقلقه المُستمر عليك!

صحبتي بداية الحرب وفي أحلك وأمَّر الظروف المرّت عليها وهي في أسوأ حالاتها كانت بتتواصل معاي ولو لوهلة وتطمني!
عندها كُل الأسباب الكافية إنها تغيب، حالتها النفسية السيئة، خوفها، الرعب اللي كان مالي منطقتهم وحتى سوء الشبكة كلهم ما منعوها تختفي وتعمتد الغياب!

على مدار سنة ونُص كاملة ما سمعت صوتها، ما إتكلمنا ساعات زي زمان ولا فضفضنا بس كانت بتفتح الشات وترسل لي ولو رسالة وحدة بداية ونهاية كُل يوم وكانت كفيلة تخلي بالي مُرتاح!

لأنها عارفة غيابها حيأثر علي وحأقلق جداً عليها ..
إتغلبَت على الظروف بسبب محبتها الكبيرة لي!

مع إنو أسباب زي دي أو حتى الأسباب المَرضية أو غيرها نحن بنتقبلها بكل رحابة صدر وبنقابلها بلهفة وكمية أسئلة بنطرحها عليهم بحنية!

يعني مُمكن نقول :
غياب أسبابه مغفورة بكل محبة!

بس في ناس حتى وهم في أحسن حالاتهم بيتعمدو الغياب!
وكُل واحد بيشوف ليه حُجة كدا ويقول ليك خُت لي العُذر وشنو!

واللي بيقول ليك غيب وإختبر قيمتك وهكذا خُرافات بيخدعك، لأن عُمرو الغياب ما كان بيترجم كقيمة للمحبة!

الغياب المتعمد بيخلي العلاقة باهتة وسوداوية ومليانة شكوك وأسئلة وخالية من كُل درجات الأمان!

إنت بتغيب عني بمزاجك وإختيارك ما حأكون مُتطمنة ليك أبداً وحأتوقع غيابك عني في كُل لحظة ومن غير مُبررات!

بالنسبة لي الشخص البيغيب عنك كُل فترة والتانية دا بيقول ليك بكل سهولة " وجودك ما بيهمني علشان اكون حاضر في تفاصيلك دي، فكل ما ألقى فُرصة عادي أغيب ما مُهم رأيك أو حيحصل ليك شنو"

بتختار تغيب لإنو الشخص القدامك ما بيهمك بأي شكل!
ما بتهمك راحة بالهُ!
ما بتهمك تفاصيله!
ما بيهمك إنو تكون معاه وتقاسمه خوفه ولحظاته السيئة!
ما بيهمك تكون شريك الرِحلة ليه بكل بساطة!
حتقول لي ياخي أحيانا الإنسان بيحس إنو حتى نفسو ما قادر يتقبلها وما قادر يتواجد في حياة غيرو وبينسحب علشان يقعد مع نفسو شوية!

بس الطبيعي نِحن وحتى في الحالات الزي دي بنهرب من نفسنا ونمشي للبيحبونا ..

بِيطبطبو علينا وبنتدواى بمحبتهم دي اصلاً!

حتى في أسوأ حالاتي كْنت بلجأ لصديقتي المقربة وما بختار لُعبة الغميضة دي وشوفوني أنا مُختفية وأنا الدُنيا جاية علي وأسيب كُل حاجة فجأة وأخليها في حالة لا يُرثى ليها!

على الأقل ممكن أرسل ليها" انا ما كويسة"
على أسوأ الفروض مثلاً !
"حأغيب لكم يوم ما تقلقي علي"
"انا كويسة بس ما قادرة أتكلم ولا اعمل اي حاجة مُمكن تدعي لي لحدي ما اخلص الفترة دي وأرجع ليك"

دي كُلها عِبارات "تطمين"!
ما إخترت نفسي وبس، إخترت أطمنها!
وياهو بِنعدي كُل حاجة سوا!

لو كُل حاجة بتحصل لينا بنقابلها بالغياب وهجران الأحبة يبقى مافي داعي لوجودهم أصلاً!

اللي عايزك ما بيختبر صبرك بغيابه كُل شوية عنك ويتحجج بظروف واهية!

اللي عايزك بالجد وبتهمه بياخدك معاه في كُل حالاته وبيخلي خِيار إنو يغيب عنك آخر حاجة مُمكن تحصل!

بطلو تختو أعذار لغياب ناس من حياتكم هُم ذات نفسهم ما عارفنها!

لإنهم بإختصار ما عندهم أي أسباب!
فخلوهم على راحتهم!

اللي بيختار يغيب عنك ساي كدا، ما تخليه يجي يلقاك منتظرو كل مرة!

لأنو واضح مستغني عنك!

#وأخيراً ..

‏لا شيء يُثبت بالدليل القاطع أن إنسانًا يحبك بصدق غير أن يفزعه الغياب ❤️♡
#ضُحى_فضل_السيد.
#lol