رِوايات سُودانية🪐🤎!)"

23 May 2025 08:18

لو قامو جابو الاسلحة المحرمة
القال عليها الراسو زي المنقة المأكولة.
قام بتاع جابوها هي والكمياوي د ذاتو
وسيطان من بتاعت الجعلين ديل

وقامو ع الامارات دي رجموها، وبعدها قبلو ع امريكا ذاتها قبل تفهم شي، كلو ف يوم واحد

رِوايات سُودانية🪐🤎!)"

22 May 2025 20:47

" قُل للبحارِ وإن طالت عواصفها
إنِّي لِحُلمي واصلٌ رغم الصعاب

فأنَا السفينةُ والبحَّارُ والعصفُ
وأنَا الحقيقةُ مطلعِي موتُ السراب🖤🖤🖤.

#مُورفينا

رِوايات سُودانية🪐🤎!)"

22 May 2025 20:33

لكنّ الشِّعر سيمرُّ أمامنا كرجلٍ غريب
كأنه لم يضمَّنا لصدره من قبل
لم يقطف من قلوبنا وردةَ الحزن الأخيرة
ولم يطلقِ الرصاصَ على غيومِ كآبتنا
سيبتسمُ ابتسامةً باهتةً ويجرُّ أحرُفهُ بعيداً ثم يمضي.

رِوايات سُودانية🪐🤎!)"

22 May 2025 20:22

الآن تمزِّقين آخرَ دفترٍ من دفاترِ الحُبِّ بيدٍ من حديد.
وعندما تجهضينَ آخرَ أغنيةٍ جارحةٍ من رحمك
انفخي آهاتِك الحزينةَ في ناي الوداع
عانقي الريح …
وقبِّلي القمر !
سيغسلُ بضيائه نجماتِ روحك الباهتة
سترقصين حول خصرِ الأرض وتبهجين الكون
بنورك الجديد ،
كما لم ترقصي من قبل.

رِوايات سُودانية🪐🤎!)"

22 May 2025 19:36

اغتسلي جيداً بوهجِ الصباح 
ستخرجُ من جلدكِ رائحةُ أحبائكِ القُدامى.
مِلحٌ نرشُّه فوق الجرحِ المفتوح كي لا ننسى.

رِوايات سُودانية🪐🤎!)"

22 May 2025 18:54

__"بتجي تقعد على السرير التاني قصادها" وهي بتضحك" طبعا ما عاوزة اصدمك لكن نفس الشي اصلي ما شكرتك لي قصي ههه ويومها كنت متضايقة منكم ضيق لدرجة سويت مشكلة مع قصي بسببكم وياها منها شميتك ب الله واحد كدا ساي
لكن هسي جد يا سهاد لما قربت منك مع اننا لسه ما اتعارفنا كدا بس انتي طلعتي ظريفة وتتحبي امكن انطباعك الاول عن اني اتساخفت اني ما بنكر انا عصبية لحظات وكتير بستعجل ورد فعلي ما ظريف بكون بس هسي الحمدلله بقيت اضبط نفسي وزي ما بقولو الواحد بتعلم ما بفضل زي ما هو .. زمان وهسي ما واحد
**انا كمان عرفته ان نظرتي ليك كانت غلط وصحي الحياة مواقف والحب بجي بعد العداوة انا هسي ما لقيت زول غيرك دا خلاني احترمك واحبك شديد وربنا يديم المودة دي ،، عارفة انا ما عندي صاحبات ولا معارف عشان كدا حزرة في البعرفهم ولي فترة طويلة شديد حياتي اتحصرت في بيت وياهو احمد بس لا بطلع لا بدخل دا الخلاني محصورة في دائرة ضيقة لدرجة اقلمت نفسي عليها وبقى زي عندي رهاب اجتماعي من الناس او التعرف عليهم.
__صدقيني كلو بعدي ودي كلها اختبارات وامتحانات من ربنا عشان يقويك ويخليك تعرفي تعتمدي على نفسك وربنا عارف انك بتقدري بس انتي اثقي بنفسك وامكاناتك وما عيب تبدي من الصفر بس اهم شي تبدي صاح وما تخافي يا ستي انا حقيف معاك لما تمسكي الدرب قوي .
"فجأة قامت على وصال وحضنتها عليها قوي "
**ما عاوزة ابكي بس تصدقي انا مبسوطة شديد بكلامك دا
__سمح اوعديني انك حا تكوني متفائلة كدا
**وعد خلاص ارح معاي عشان انا عاوزة اطلع هدوم احمد اتصدق بيهم
__اصلا ما حخليك براك وتلملمي هدومك وتجيبيهم هنا لما ربنا يسهلها عليك وقصي حا يطلع عشان يشوف ليه مخزن للعفش بتاعكم عشان ما يتجدع ساي انا ماشة اسوي ليه الشاي وبجي عليك نفطر ونتجهز سريع لانو الهادي قال جاي حا نستغلو يوصلنا "بتبتسم ليها"
اذا داخلة الحمام اول ما تطلعي هدا جمب الغرفة

" بتطلع وتقفل الباب"

#في_المطبخ

__عرفتك ما حتنتظرني اجي اسوي ليك الشاي
**شفتك اتاخرتي وانا لازم اطلع
_اقعد على الصفرة سمح "كبيت شاي حب"
**لسه يادوب ختيت اللبن

"بتفتح التلاجة بتطلع جبنة وفطاير ، عاوز زيتون؟!
**لالا سوي لي بيض مع الجبنة
سهاد لقيتيها كيف ؟!
__كويسة احسن كتير من امس كلمتها حمشي معاها وانك حتشوف موضوع مخزن للعفش
" شالت كم بيضة بتفقع في الكورة بالمعلقة رشت حبة ملح وبتضرب "
**تمام وقت كلمتيها ، عايزة الصراحة ما كنت متوقع انك تتصرفي تصرف كدا
__والسبب؟!
**ما عارف بس اتوقعته ترجحي موضوع السفر
__على فكرة انا ما ناسياه عشان ما تقول استسلمته للبحصل حوالينا ويمنعنا نسافر ونستمتع ولسه مصرة اننا لازم نسافر في اليومين ديل جد نحن بحاجة نبعد شوية يا قصي ..
**كنت خايف تنشغلي بموضوع سهاد وتبطلي السفر بعد حفزتيني ليه وكمان لما قلتي موضوع محل عمتك ..
__قلت ليك للمعلومية بس ههه لكن ما معناه ناسية لالا حبيبي بالعكس انا خلاص طاقتي صفر وعاوزة اجددها واغير جو واعيش حياتي واتبسط
**هانت يا حبي معناها رتبي لينا شنطتنا خليها جاهزة عشان لحظة تهف لينا نسافر طوالي كان بكرا دي اصلا الا نفاجئ السفر كدا
"تشش صوت البيض في الطوة " ههههه نداهمو طوالي شكلنا حنشرد ونخلي المشاكل والهموم الما عاوزة تسيبنا دي
**اي والله
دا الهادي بتصل شكلو جا بره
__كويس شوفو احشي ليك ولا تدخلو اخت ليكم عديل
**لالا احشي ساندوتشات وكبي ليه شاي
__اي اكيد طيب خلاص اطلع ليه خمسة دقايق وبجهزو

"بعاين لتلفونو طلع من المطبخ رفع راسو فجأة بقول"

#سهاد

صباح الخير

"بتردد وصوت براحة"

ــــ صباح النور

"بترجع على الغرفة تاني ماسكة القميص في يدها"

على الخير والمحبة نلتقي✎﹏﹏﹏﹏﹏﹏﹏﹏﹏

#مندرين
#سحر_سمير
#فاطمة_قسم الله

رِوايات سُودانية🪐🤎!)"

22 May 2025 18:54

قصي : اي بره في العربية مع سهاد جبناها معانا يا امي الليلة تبيت هنا للصباح بس
فوزية : تبيت وين؟! لالا البت دي ولا يوم ما بتقعدو معاي انت زاتك كيف تتصرف من راسك وتجيبها معاك هنا؟!!
قصي : امي امي اقول ليك وقعت من طولها وجبناها المستشفى نمش ونخليها كيف براها وبعدين ما قلت حا تقعد معاك الا بس باقي الليلة دي لحدي الصباح
فوزية : اسمع هنا يا قصي البت دي بلا وانا قلبي ما مطمن ليها ومن وراها ما بجي خير ولا شي رجعوها بيتها هسي دي ويادار ما دخلك شر
__يا امي العني الشيطان بس باقي الليل دا تقعد معاك اكسبي اجر فيها
**لالا اصلا البوديكم بيتها شنو دي قلة ادب جديدة زاتا وما صاح رجال تمشو ليها براكم عندي معاكم كلام تاني انت واخوك ، مش الباب دا قفلناه وانتهينا ، وفلان داك وينو " مروة مربعة يديها وواقفة" جادع مرتو المفروض يكون معاها في وضع زي دا وحايم يودي ويجيب في بنات الناس
قصي : امي دا كلام شنو البتقولي فيه دا
فوزية : ما كلام ولا شي تمشو هسي دي تودوها بيتها وتجو راجعين تتلمو في بطن بيوتكم مع نسوانكم ومن هنا ولي الليلة ما اسمعك ولا الهادي مشيتو للبت دي او جبتو سيرتا على لسانكم..
مروة : الهادي وينو يا قصي؟!
قصي : "بضيق واضح " طلع فوق "برجع اطلع من الباب"
"كرب بفتح باب العربية بنادي وصال بمسكها من يدها وبزح بيها على جهة الشجر بتاع البيت
قصي : وصال انا محرج شديد امي مصممة شديد اننا نرجع سهاد هسي بيتا وقالت ما بتقعد معاها ولا دقيقة
وصال : كيف يعني؟! لي رد الفعل الغريب دا من خالتي الحصل شنو؟! كان تقول ليها للصباح بس
قصي : كلمتك قبل نجي هنا انا عارف امي وقت تصنف زول ويطلع من راسها تاني كان بقى شنو داك ما بتريدو ولا بتقبل عليه امي صعبة يا وصال بس قبيل طاوعتك ساي وقلت نجرب مالو
وصال : لا اله الا الله
قصي : ماف حل غير نوديها الشقق الفندقية زي ما قلت ليك
وصال : لا وانا قلت لا حا نسوقها معانا بيتنا والصباح رباح
قصي : انتي بتقولي في شنو؟! لالا طبعا
وصال : قصي ما عندنا حل غير كدا شايف كيف حالتها الجسدية والنفسية ما تمام معقول الوقت متأخر شديد اسمعني بس نسوقها بيتنا وللصباح ربنا يرتبها من عندو
قصي : طيب يا وصال طيب ارح اركبي
✎﹏﹏﹏﹏﹏﹏﹏﹏﹏﹏﹏﹏﹏﹏
وصال بتقول :
" طول الشارع كان في هدوء في العربية وسهاد الحسيتها عاوزة تقول حاجة بس فضلت السكوت وانتكت على جهة الباب وكم مرة حسيتها بتشهق زي بتبكي...
انا استغربته شديد رد فعل خالتي فوزية ومهما كان غيرت رايها عنها فجأة لمجرد موقفين حصلو دا ما بخلينا نكون بالقسوة دي تجاه زول يتيم وفقد اعز شخص ليه ..
فكرته لحظتها اخش اتكلم مع خالتي بس كمان خفته الامور تتفاقم خصوصا خالتي حا تكون متضايقة انا عارفاها وكلامي معاها في وقتها ما بكون فيه فايدة غير اعمل مشكلة وخلاص فقلته لبكرا لما الاقيها اصحح ليها مفهوم امكن يكون غلط..
ما بقول اني ختيت نفسي محل سهاد بس صراحة قلبي وجعني عليها وانا شايفةضعفها واضح من ملامح وشها لا ضهر ولا سند يقيف معاها وهي في اشد الحوجة .. انا ما بقدر ابقى بنفس السوء واتخلى عن اي انسان يصادفني في ظروف كدا ناهيك ان سهاد عندي معرفة بيها ولو كانت سطحية.
سمعت صوت قصي بقول لي
وصال وصال انزلو وصلنا سهاد دي نايمة؟!
وصال : شكلها " سهاد سهاد اصحي وصلنا البيت انتظرنا قصي فتح الباب ودخل العربية ونزلنا متقدمين على الباب جوه
سهاد بتتلفت حواليها بتعاين
الدنيا كانت فاضية وصانة ومضلمة الا من صوت الحشرات
"كررب بفتح الباب بقول ليها اتفضلي خشي

سهاد :
بقولو كل بيت عندو ريحة مميزة
قلته
بسم الله كان مقابلي طوالي عيني وقعت على تربيزة بالابيض من تلاتة ادراج عليها فوطة صغيرة من فوقها مختوته فواحة دائرية عندها راس طويل جواها اعواد بخور صندل
ايوة ريحة صندل هي الشميتها اول ما دخلته وعيني وقعت على تلاتة صور بالتدريج فيها المعوزات معلقة على الحائط..

وصال : تعالي خشي من هنا " بتدخلها غرفة مفرشة ومرتبة بسريرين وفيهم دولاب بضلفتين واحدة فيها مرايا من فوق لتحت ..
ارتاحي هنا هسي برجع ليك بتطلع وبتقفل الباب"
وقفته وعيوني بقت حوالين الغرفة المنظمة ونضيفة شديد ،، وعلى الستائر الستان باللون البنفسج الهادي قعدته على الكنبة عاينته جهت الجداعة المختوته مرسوم عليها قلب في الوسط بالبنفسج ..انتبهت اني خاشة بشبشبي وواطية على الفرشة طلعتو بإنزعاج ومشيت على السرير رقدته اتحسسته الملاية غفيت بعدها من تعبي.
✎﹏﹏﹏﹏﹏﹏﹏﹏﹏﹏﹏﹏﹏﹏

#اصبحنا_بي_الله
"كركبة في المطبخ "

_بسم الله مصطفى خلعتني بتسوي في شنو ؟!
*في قهوة
_طيب كان تصحيني وبتشرب قهوة من الصباح ساي لشنو اقيف اسوي الشاي واعمل كيكة نشربو بيها سوا

رِوايات سُودانية🪐🤎!)"

22 May 2025 18:54

الهادي : تطمن عليها في الوقت دا؟!
قصي : الهادي مالك ياخ خوفتني ارح ارح
"مع وصلتهم الباب صوت رجة وكلام طالع ببره"
قصي طق طق بدق في الباب
سهاد سهاد
سهاد : انتي واحدة مريضة واحدة مجنونة ما عارفة اقول ليك حاجة غير ربنا يشفيك يا منيرة "بتدفرها وبتجري تفتح الباب على صوت قصي وهي مخلوعة وبتبكي"
قصي بقول:
وانا شايف منظر سهاد قدامي بالمنظر دا وشها مجروح وخايفة كأنها بتستنجد بي نزلت نظري وقلت ليها انستري
"بتزح من قدامي بتلفح الطرحة تلبسها"

واقفين في مدخل الباب نظري مشى تجاه الكانت واقفة مربعة يدينها بتعاين تجاهنا بنظرة أقل ما يقال عنها مرعبة ما عرفت ليها تفسير..
نهرتها لما نطت
في شنو؟! انتي منو؟! مالك عليها
الهادي : قصي انا شايف نضرب للشرطة دا تهجم واضح عاين شكل سهاد عامل كيف خلينا نوديها المستشفى وشها بكب دم
قصي بتلفت عليها
وهي بتمش اقرب كرسي بتقعد بتنهار بالبكى
انا عاوزة أحمد
يارب يارب منك الصبر

"بجيها صوت بإستفزاز"
__ههه شايفة ما بتضيعي زمنك كلو كلو بتبكي تاني وتنادي في أحمد لشنو؟! بتستعطفيهم عليك؟! مثلي مثلي يختي الزيك اصلا متعودة .

قصي بديها نهرة تانية وعينو بتقع في عينها
يابت اي كنتي انتي منو تعالي اطلعي بره واوعى اشوف وشك دا قدامنا تاني ..
"متقدمة عليه وبتعاين جوه عينو ما كسرت عينها منو"
ما تكورك اصلا جيت لقرصة اضان ليها وكفاية عليها هسي بس لما يمشو ضيوفك يا سهاد بجيك ما اتضيفته انا وجني وجن اجيك وما تجيبي لي ولا كباية موية ساي عيب عيب منك. على العموم الواجب تعرفينا معليش الوقت ما مناسب انا منيرة بت خالة سهاد دي.

سهاد بتقوم عليها بتدفرها وبعصبية
اطلعي اطلعي

الهادي : اقيفي هنا
منيرة : نعم؟!
"بعاين لي سهاد"
اذا عاوزة نتصل بالشرطة يا سهاد نمشي نسوي ليها محضر وما حا تقدر ترفع عينها عليك من تاني اصلا
قصي : ارح ارح اطلعي يا سهاد لازم نوديك المستشفى اول وتاني بنتصرف معاها يا الهادي
سهاد : لا يا الهادي شرطة شنو ؟! انا كويسة ما لدرجة مستشفى وبتاع "بترجع تقعد وخاته يدها على راسها"
منيرة : سامع؟! سلام يا سهاد "بتطلع "
قصي : دي منو؟! بت خالتك بجد "بعاين تجاه سهاد الما بترد"
الهادي : خلينا نمشي يا قصي اطلع دخولنا ووجودنا هنا براه غلط ، سهاد حنمشي نحن
قصي : سهاد انتي كويسة حا تكوني كويسة ؟!
سهاد : كويسة "بتقوم بإنهاك واضح" شكرا ليكم ما قصرتو
"بطلعو ومع وجرت قصي عشان يقفل الباب بسمعو ربب صوت وقعة ...
✎﹏﹏﹏﹏﹏﹏﹏﹏﹏﹏﹏﹏﹏﹏
الساعة 12 نص الليل
#المستشفى
وصال بتقول :
قلبي اكلني لما قصي إتأخر وضربت ليه كم مرة ما برد الى لما جاني اتصالو فتحت الخط سرعة جاني صوتو بقول :
جاي عليك اسوقك من البيت البسي ليك عباية سرعة سهاد دي في المستشفى..

#غرفة2
سرير بالرمادي متوسط الغرفة الهادئة والباردة نسبياً ريحة معطر ورد خفيفة ودولاب على الركن مفرد من ضلفة واحدة وجمبو درج صغير وتربيزة باللون البيجي بعجلات وكنبة على الجهة التانية قريب للسرير..
خشيت بهدوء شايفاها راقدة مغطية للنص بعاين للدرب المركب ليها في يدها .. عاينت لي وشها ودموعها جارية من شافتني شالت الطرحة وختتها فيه..
قعدت جمبها ولقيت نفسي بتكلم معاها:
الف لا بأس عليك طمنيني عليك كيفك هسي؟!
" بصوت مرهق وتقيل من بكى"
الحمدلله رب العالمين
ختيت يدي على ضهر يدها من فوق
الحمدلله الدكتور قال دا ارهاق وضعف في الجسم انتي ما قاعدة تاكلي وتنومي يا سهاد صاح..
__ الزي حالي دي تفتكري يجيها نفس تاكل ولا راحة بال عشان تنوم.. انا براي براي عارفة الكلمة دي معناها شنو يا وصال واقفة خايفة وقاعدة خايفة اقل كركبة بترعبني واقل حركة بتدخلني في حسابات ما يعلم بيها الا الله .
** طيب ممكن تشيلي الطرحة دي من وشك وتعايني لي ، نحن كلنا جمبك ومعاك يا سهاد انتي ما براك
"بتزحها براحة بتقول لي:
انا إشتقت شديد لي أحمد
اشتقت للصباح بصوتو كان ببدا بيه ..
اشتقت للنهار البجمعني بيه
اشتقت لقعدة الصينية
اشتقت للقعدة ساي جمبو حتى لو ساكت مني
اشتقت لتفاصيلو
قلبو وحضنو وكل شي فيه..
اشتقت لشعور الأمان انا من يوم احمد مات عايشة في خوف ورعب
محتاجة ليه شديد شوقي ليه ما بتوصف يا وصال
" بأسف واضح"
__ ربنا يجعلو من الآمنين المطمئنين في جنات النعيم
احكي ابكي اشكي ما عيب ولا حرام يا سهاد بس ما تكتمي جواك "بتعاين لوشها المخربش ومجرح"
التراكمات الكتيرة دي حا تضرك انتي .. انتي قوية لانك لحدي اللحظة صابرة ومحتسبة انا عارفة الحصل ليك دا ما حاجة ساهلة ولا هينة ولا حقدر اخفف عنك بمجرد كلام ولا حقدر احس بالنار الجواك بس دي يدي " بتضغط على يدها" حتكون ماسكاك لحدي ما تشدي حيلك وتتعافي .
"بتعاين لي بسكات"
انا قصي حكى لي الحصل هسي بره ، البت الإتهجمت عليك الليلة دي هي نفسها الجات يوم الوفاة؟!
"بتهز ليها راسها وبتتلفت بجمبة"

رِوايات سُودانية🪐🤎!)"

22 May 2025 18:54

سهاد : خليها على الله قلت ليك ، انا بعد ربنا ثم المرحوم ما عندي زول ! انا ما عندي زول و حتى قعاد م حيخلوني اقعد حتى لو سيد البيت خلاني !!
الهادي : هما منو ؟
سهاد : ما موضوعنا دا يا الهادي ! خليها على الله ! هو قال يفضو ليهو البيت متين بالضبط ؟
الهادي ( عاين لي قصي ) !!!
قصي : خلال اليومين ديل قال !
سهاد : تمام … لو سمحت ممكن تمشوا ؟
الهادي : اكيد اسفين … عن ازنك

سهاد : يا الهادي ممكن طلب ؟
الهادي : قولي
سهاد : عايزة رطل لبن ، و الزمن اتاخر علي …
الهادي : ابشري ناقصك شي تاني ؟
سهاد : لا شكراً

قصي : امشي العربية استناني انا بتناولو من الدكان دا و بحصلك !
الهادي : تمام .. ( مشى على العربية ) !!!

#سهاد بتقول :

في كل مرة كنت بحس فيها بي حوجة تجاه زول ، قلبي بوجعني
ما قادرة اتنازل عن موقفي و عن وجعي الما داير يخف من علي ! كمية قهر و غبينه ماليه قلبي و مالية روحي !
حاسه ان الناس دي كلها عايشه حياتها عادي الا انا ! الا انا فيني نقص و عندي مساحة انكسار ما ظنيت انها تتملي ….
في الحقيقه انا محتاجة للناس ، محتاجة لي زول بس ينطق اسمي و يحسسني بالأمان ، يحسسني اني ما براي في الدنيا دي ، نفسي في زول ينتشلني من الضياع و التوهان الاتملكني … خايفه اجن ….
رغم ضيقي من قصي و اهلو الا انهم لمن طلو علي انا شوية ارتحته
انا ما كنت محتاجة رطل اللبن ، انا كنت بس محتاجة مدة وجودهم تطول لاني خايفه شديد و انا براي -
فضلت واقفه ورا الباب منتظرة يخبطو علي الباب يناولني اللبن .. و اتمنيت اللحظة دي تطول عشان احساس الامان ما يروح مني … مجرد ما الباب خبط ، بكل لهفة فتحت الباب و مديت يدي … و لسه عايزة اقول شكراً !
فجأة لقيت يد دفرتني لي جوا و مسكتني من رقبتي شديد و ضغط على القصبة الفي حلقي لمن اتخنقته و لذاني لي جواا و رد الباب بي رجلو !!!
و صرختة 💥…….

يتبع …..

العقرب الذي لَدَغكَ في يومٍ من الأيام ، لن يغيّره الزّمان كي يُصبح حمامةَ سَلام ."

#استككانة🌚🌚 ..

#فاطمة_قسم_الله
#سحر_سمير

رِوايات سُودانية🪐🤎!)"

22 May 2025 18:54

قصي : احمد كان حاكي لي انه ما عندها غير وحدة قريبتا اتربت معاهم اظن او حاجة زي كدا و في مشاكل شديدة بينهم لدرجة ان احمد لمن كان بيكون معاي بيخاف يخليها براها كتير ! تتذكري يوم الكافيه داك اول مرة اتلاقيتو ؟
كان قاصد يعرفك بيها و قالها لي عديل ( سهاد ماعندها زول غيري )
عرفتي لشنو انا التأنيب مطلع عيني يا وصال ؟
و هسي بالواضح طردتنا قالت ما عايزة تشوف زول مننا !

وصال : الله يارب … دا امتحان شنو ياربي ! غايتو الله يعفي لينا حقها ! يعني فوق لي دا يتيمة !! بس يا قصي يوم العزا جات وحدة تشبها تحس دمهم واحد ! و اتكلمت معاها بي اسلوب سخيف شديد
قدام الناس - ديك تحس بيها شرانيه كدا م زي سهاد في حاجة فهمته ؟
قصي " بي ضيق " : طيب كلامك دا خلاني استحضر احمد دا كان عندو كلام عايز يقولو لي ياهو منو و اتوفى ! و كان في حالة ضيق غريبه ! بس لو ما القدر اقول ياريتني ما خليتو و مشيت للسلم !

وصال : ربنا يرحمو و يحسن إليه !! قصي رايك شنو نمشي نعمل فحوصات و نتطمن و نشوف حالتك بقت كيف ؟ بس ما هنا ! في سفرتنا !!
قصي : حاضر بس اديني شوية وقت نحل المشاكل دي !!

#جانب_رزان

" خاته السماعات في اضنيها و قاعده في العربية برا "
" كو كو كو " في الشباك من برا -

" طلعت السماعات و عاينت ليهو بي استغراب ، نزلت القزاز "
رزة : اهلاً !!!
سراج : و سهلاً - قاعده في العربيه لشنو ؟
رزة : منتظرة امي !!
سراج : انزلي انزلي امك امشي انتظريها جوا ! من متين بتتصرفي كدا انتي ؟؟ ولا دا الطبيعي حقك !! افتحي الباب دا و انزلي استنيها جوا !!
رزة : ما نازلة انا ! مشكلتك شنو انت ؟؟؟
سراج : مشكلتي للاسف م لقيت اثبات لصحة الكلام الحا اقولو لاني رجعت للحساب الفيهو صورك لقيتو اتقفل !
مشكلتي صورك الفظيعه المنتشرة و الفيديوهات و الدعس ! كل الفترة دي انا بحاول اقنع في نفسي انه لا دي ما انتي !!! كل مرة اشوفك فيها بتذكر الصور و بستنكر ان دي انتي … مش هي دي النظرات الفسرتيها غلط ؟؟؟

رزة " ختت يدها في خشمها بي صدمة لمن بقت ترجف " :
يعني ما وصال القالت ليك الكلام دا ؟؟؟
سراج : تصدقي ان وصال ابت تجيب لي سيرة بالموضوع و اسي انا ياداب عرفت منك ان وصال عارفه و عندها خبر و كدا اكدتي لي ان شكوكي صح ! اتوقعتك تنكري !!؟
رزة ( بدت تنهار و تبكي ) : عشان كدا انا م استاهل الحب منك صح ؟
سراج : انتي اختي قبل الموضوع دا و بعده ! و قبل حنين و بعد حنين انتي ما اكتر من اختي عشان ما ترمي اللوم على حاجات م ليها دخل !!

#جانب
قصي - #مكالمة

قصي : يا اخينا ما تصعبا على نفسك و علينا ! انت البرضيك شنو انا حعملو !
__ و انا كلامي معاك واضح ! انا داير بيتي يفضى ! حقي و لا ما حقي !
قصي : لا حقك بس كمان في ظروف انت عندك علم بيها ! كان زعلان من تأخير الايجار انا بزيدك و بعتذر ليك و كان داير زيادة م عندي مشكلة !
__ و انا ما داير الكلام البتقول فوقو دا !
قصي : تمام البيت حا يفضى ! بس سؤال انت عندك راي في الموضوع دا و ليك اسباب ! ممكن تقول الحقيقه ؟؟
__ اسبابي اني داير البيت !
قصي : مصمم ! اوكي تمام ، مجرد ما يفضى حا اديك خبر !!
__ تمام [ طق - قفل الخط ] !!

( بعد المكالمة )
وصال : اها قال شنو ؟؟؟
قصي : مصمم ! و ما داير يتفاهم و كلامو حار !!
وصال : و العمل ؟؟
قصي : تمشي معاي ؟ اقعدي معاها و شوفي الحاصل احتمال خاته مكان تمشي عليهو !!
وصال : بس يا قصي انا عايزة امشي لي عمتي لو متذكر المحل حقنا داك شايفاها قامت عليهو تاني و كانت عايزاني ! و غير كدا انا م شايفه انه لازم نمشي ليها اسي ولا رايك شنو . يعني نديها كم يوم تقعد مع نفسها و تشوف حساباتها ؟
قصي : بالعكس مافي زمن للبتقولي فيهو دا ! و لازم تعرف يا وصال !!
وصال : طيب ممكن نخلي بكرة ؟
قصي : وصال انا خايف الراجل دا يمشي ليها و يطلعا من البيت
ما ضامنو والله ! الموضوع معقد زي الواصلو كلام الزول دا - عشان لو عندها زول تمشي عليهو ولا عندها فهم يا وصال اريح ضميري دا !
وصال : داير الجد انا زاتي ضميري مأنبني و كاتماها عشان انت ما تتاأثر !

قصي : يا الله يا وصال ….. طيب خليني اشوف الهادي ، و لا امشي عليهو عديل ، كدا كدا امي عايزاني اوديها البيت … انتي حتعملي شنو عشان اكون فاهم ؟
وصال : حا اتابع معاك بالتلفون و عندي غسيل في الغساله من بدري و بعدها حطلع على عمتي !
قصي : طيب ما تتعبي نفسك !!
وصال : عملت المرهم قبيل ؟ و اخدت الحبة ؟
قصي : ايوا م تشيلي هم !

#جانب_سهاد
" كو كو … صوت الباب "

سهاد " بي خنقة من ورا الباب " : منو ؟
__ انا سلاف ! بس معاي مصطفى !

رِوايات سُودانية🪐🤎!)"

22 May 2025 18:54

#مندرين
بقلم فاطمة قسم الله و سحر سمير
-٢١-

أنّ تكون الايام حَنينة على قلبي يارب 🤍!

#مندرين21

حنين : مالكم ؟؟

سراج " عاين لي وصال " : وصال ! وصال ….
حنين : هيييي وصال !!! يا بت …..

وصال " بي خلعه " : نعم ! نعم ؟؟؟ في شنو ؟
سراج : سرحتي وين !
وصال : اا لالا مافي حاجة بس بفكر في موضوع السفر و قصي اتأخر كمان !
حنين : والله بختك يا قصي المهم ! انا ماشه بعد دا " مسكت التلفون " حا اتصل بي ابوي ولا الهادي
وصال : انا م حصل سمعتك ماشة بيت ناس قصي و لا سمعتك كنتي هناك و لا اي شي ! ما بتمشي صح ؟
حنين " ابتسمت و هزت راسها " : ايوا - عارفه انتي بحكم امي المرة التانيه وكدا شويه الموضوع حساس رغم ان ماحصل امي منعتني لكن انا براي بس ،.. ااا صراحة ما عارفه خصوصا ان قصي بحسو م كان متقبلني يعني المهم التفاصيل الصغيرة ديك م بتتفهم لكن بتتحس فهمتي ؟؟؟

وصال : ايوااا فهمته فهمته …. " دا صوت عربية قصي "
" دقايق و جو داخلين "
قصي : السلام عليكم - ماشاءالله جلسه في الحرم
وصال " بي استغراب " : خالتو فوزية !! " قامت وقفت مشت عليها " تعالي تعالي اتفضلي ! ( بتعاين ليهم و مركزة في ملامح قصي الكئيبه )
سراج و حنين : و عليكم السلام !
سراج : عوافي ! فيك شي ؟؟؟
قصي : لالا الحمدلله
وصال : في شنو مالكم ؟ حاصل شنو ؟؟ في شنو يا خالتو فوزية ؟
فوزية " بي ضيق " : ما كلمتوني بالمرحوم دا اتوفى كيف و سوقتوني على ملا وشي و قاعدة و قايمة مع البت اها فهمت قعادي دا زاتو غلط في حين اني ما عندي اي خبر عن احمد دا مات هنا في بيتكم دا !؟
وصال : صحي انتو ما وريتوها ؟؟ بتذكر هي انهارت شديد مع الخبر و ما بتذكر سألت ، طيب الحصل شنو بالضبط ؟؟
قصي : الحمدلله على كل حال " عاين لي سراج " انت م غريب البيت بيتك ! انا داخل اريح رجولي شويه !
سراج : لالا صاحب بيت انا ي زول ، ولا يهمك انا زاتي كنت طالع
وصال " قامت " : تعال خليني اساعدك !
قصي " وهو بيقوم " : خليك خليك يا وصال انا كويس …
حنين : ربنا يلطف والله و يبعد عنكم كل شر يارب " عاينت لي فوزية " خالتي ما تضايقي نفسك اكيد كلام قالتو وقت زعل ساي و بعدين لسه مصدومة الظاهر !
فوزية : ربنا يتولاها ، عملنا العلينا يا بتي يعلم الله جوانا نضيف انا عن نفسي جيت بغلاوة المرحوم على ولدي و ما عندي نية كعبه ابداً تجاها البنيه ! ولا حتى عندي خبر بموضوع الكهرباء يشهد الله زي زيهاا !!

وصال : يا حليلها والله ، والله تحنن والله كل ما اتذكر بكاها داك انا بحس الدنيا ضلمت في وشي ! انا لازم امشي ليها
فوزية : لالالا حتسمعك كلام ما حبابو ! اتخيلي قالت لينا تقتلوا القتيل و تمشو في جنازتو !
حنين : لا حول ولاقوة الا بالله العلي العظيم !
وصال : رحمتك يارب !! عايني اكيد الكلام وصل ليها بي اسلوب م ياهو ! يعني الجاب السيرة شنو ؟
فوزية : اخوات المرحوم !
وصال : الله المستعان يا خالتي ، الله المستعان !! و هسي خليتوها معاها منو ؟
فوزية : الله و رقبتها !

سراج : ربنا يكون في العون ، انا بمشي يا وصال بعد دا عندي شغل
وصال : طيب خلي بالك من نفسك !
"عاين لي حنين " : اوصلك ولا كيف ؟
حنين : ما عارفه - عاين لالا حا اشوف ابوي ولا الهادي , ازنكم دقايق (شالت تلفونها و طلعت على الحوش )
وصال : خالتي قومي طلعي توبك دا و ادخلي جوا ارتاحي مسافة اخت ليكم الغداء !
فوزية : هو في نفس يا بتي لي حاجة ! الحمدلله بس
وصال : معليش / حقك علي انا
فوزية : زنبك شنو انتي !! عايني قومي شوفي قصي دا متضايق شديد !
وصال " هي بتقوم " : حاضر !

#الحوش

حنين ( خاته التلفون في اضانها و بتعاين لي سراج الكان طالع و جا ماري بي قدامها ) : و هسي هي كيف قالو ؟؟ اجيك ؟
سراج " بيأشر ليها بي يده انه في شنو حاصل "
حنين " عملت ليهو اصبر بي يدها " : طيب تمام يا الهادي - سلام سلام - ابقى طمني
سراج : قفلتي الخط ؟
حنين : ايوة
سراج : في شنو ؟
حنين : مافي شي بس مروة في المستشفى تعبت شوية
سراج : سلامتها و هسي كيف قال ؟ تحبي نمشي ليهم ؟؟
حنين : لالا قال مخرجنهم ما عندهم قعاد
سراج : طيب يا بت الحلال خليني اوصلك والله ما حا اكلك !
حنين : و القاليك حتاكلني منو ؟ كدي امشي انت انا بتصرف كان في اي حاجة بكلمك ، شوف شغلك انت !!
سراج : حنين !! انا بحب بحة صوتك دي شديد بالمناسبه !
حنين : احم - طيب تمام شكراً اتخارج
سراج " بضحك " : عايني ما شايفك غير لي والله عشان كدا شيلي افكارك دي من راسك تمام ؟؟ لا الناس لا المجتمع حيفيدك ، انتي الحتعيشي معاي و ادرى بي عنهم ! فا اعقلي لانه عقل بتعريفه ما عندك !

رِوايات سُودانية🪐🤎!)"

22 May 2025 18:54

قصي " ماشي راجع على الباب "
فوزية : قصي ! تعال راجع ما تمشي ! خليها !!!
قصي : يا امي لكن …
فوزية : ما لكن ولا حاجة - تعال اركب وديني البيت !
قصي " ركب العربية جمبها و قاليها " : امي انتي مش قلتي عندك نية تسوقيها عندك ؟
فوزية : غيرت رأي !!
قصي : ليه طيب ؟؟
فوزية : البت دي الظاهر عندها مشاكل يا قصي يا ولدي لانه اخوان احمد ديل اتصرفو معاها تصرف غريب و مافي اي مبرر غير انه في شي في البت دي !! و موضوع الكهرباء دا قالتو ليها واحدة من اخوات المرحوم ، معنى كدا صادقين في كلامهم ! دا غير انه البت الجات اتهجمت عليها بالكلام ساعة العزاء دا اصلو م كلام ساي القالتو ليها دا ! الكلام دا وراهو ضل ! لي هسي بتذكر لمن قالت ليها انتي اي زول تتلمي عليه يموت !!!
مافي مبرر يا ولدي للكراهيه ! و مان في مشاكل قديمة ، الزمن بينسي و انا بقيت مقلقه منها ما بقدر ادخل نفسي في دوامة معاها جوا بيتي !!

قصي : عادي يا امي يمكن سوء تفاهم
فوزية : سوء تفاهم و لا غيرو انا ما ناقصه اجيب لي قلق في نص بيتي
خلي تمشي تشوف اهلها بي وين !

#جانب_قريب !

مصطفى ( واقف على حيلو ) : سلاف !! سلاف !!
__ ايوا ايوا …
مصطفى: ممكن دقايق ؟ ولا مشغوله ؟
__ " فاتحه الابتوب و قاعدة في نص السرير " : اي دقيقه يا مصطفى !
مصطفى : طيب
__ " رفعت راسها " تعال ادخل واقف هناك لشنو !
مصطفى : طيب عايني بعد تخلصي ناديني ما اللخمك ساي
__ لالا تعال تعال " زحت الابتوب بعيد عنها " تعال
مصطفى " دخل و قعد في كرسي التسريحه حقها "
__ احكي لي حاصل شنو ؟
مصطفى : شوفي سلاف انا راسي شاطب شديدد يعني حاسي ان حياتي فجأة وقفت يعني بفهم ما قادر اعمل حاجة او اخد قرار في شي ! لا بخصوص شغلي و لا بخصوص حياتي الخاصه ، رغم انه من لمن سافرت هنا من العيد كنت مقرر اصفي و اجي استقر هنا جمبكم انتي و امي ، لانه انتي مصيرو راجلك يجي حتى لو اجازة و امي حتفضل في بيتنا قاعده براها !
__ بس يا مصطفى انت شغلك دا ممتاز فرصة اي شاب يتمناها ! يعني اها بعد تصفي و تقعد هنا ! هل معقول انك حتلقى لنفسك الشغل البعادل شغلك البرا ؟
و بعدين يا مصطفى انا اختك اكبر منك يعني عارفه الحياة دي اكتر منك ! عشان كدا اسمع كلامي و ما حتخسر حاجة لأني غير مصلحتك انا ما عايزة حاجة ! انت ما كنت كدا في حاجة مقلقه عليك و اظن بعد دا واضحة لينا و كلنا عارفنها كويس ! و عارفه ان صدمتك في سهاد م مرقت لحد اسي و انا متفهمة احساسك و موقفك
بس كنصيحة مني حاول تفصل بين المواضيع و ياريت ياريت تخت شغلك و مستقبلك و حياتك دي بعيد عن اي موضوع تاني مهما كان مطلع عينك ! " سكتت شويه اخدت نفس و قالت ليهو "
مصطفى يا حبيبي انت لسه شاب و الحياة قدامك و الحياة بتدينا فرص و بتختنا في اختبارات دايماً و الشاطر هو البستفيد منها !!

مصطفى : عشان كدا يا سلاف من اول مرة حسيت فيها ان سهاد دي هي الفرصة اللي ما نفسي اضيعها عشان كدا كنت مصمم بيني و بين نفسي لازم اصلها ، يا سلاف انا ممكن اشتغل و يبقى وضعي في التوب ، لكن الفايدة شنو لمن يكون مافي زول قريب مني يشاركني حياتي دي ؟ زول يكسر لي الروتين ، زول يكون خاص بي ! يعني اسافر و اشتغل و اجي اشوفكم في الاجازات هل حا افضل طول عمري كدا ؟ برضو دا م موضوعي يا سلاف ..
__ موضوعك انا عارفاهو لكن احكي !
مصطفى : طيب اعمل شنو ؟
__ في شنو ؟
مصطفى : اسي مش قلتي عارفاهو ؟
__ ايوا يعني عارفه سهاد بس حدد !!
مصطفى : بتوافقو ؟
__ " جرت نفس " : ما تريقة بس الخوفة يكون عندها شافع كمان ما جايبين خبرو !
مصطفى : مافي حاجة بتوحي بي كدا و انتي ادرى مني كمان !
__ يعني كان في حاجة بتوحي لينا انها متزوجة مثلاً ؟
مصطفى : طيب ما علينا لو ما عندها شفع الراي شنو ؟
__ ما عارفه لكن انا عشان اختك حا اكون عايزة ليك الاحسن ، يعني ليه مثلاً م تشوف ليك بت صغيرونه و حلوة و جامعيه كدا و آنسة و ما عندها تجربة زواج قبلك ، يعني م عارفه انت فاهمني ولا لا بس كمان انا دا م معناهو ان سهاد كعبه ولا بلمح لي شي والله !
مصطفى : انا فاهمك بس انا م بنظر ليها كدا
يعني بت صغيرة و لا كبيرة ، سهاد اي انا م عارف عمرها لكن واضح صغيرة يا سلاف يعني ما شايف فيها حاجة كونها مرت بي تجربه ! اي نعم فكرة انها متزوجة صدمتني لكن كمان ربنا قفل باب و فتح باب تاني - انا م بتفرق معاي التفاصيل دي !! انا فعلاً رايدها و رايدها شديد كمان !!

__ و انا علي انصحك ما اجبرك ، و في النهايه اي قرار حتاخدو انا واجبي ادعمك و اكون جمبك و انظر للامور بي نظرتك طالما مافيها اي ضرر ليك ! بس كنصيحة تانيه و مهمة شديد ، طالما مصمم على سهاد يبقى الواجب تنتظر لسه لانه ياداب طلعت من الحبس و ما فات كتير على وفاة زوجها !
مصطى " قام حب على راسها " : يديمك لي يارب - بما انك جمبها و عينك عليها ، لمن تشوفي الوقت مناسب نبهيني ! حا امشي على امي اشوف رايها -
__ ربنا يسعدك يارب -

#بيت_وصال

رِوايات سُودانية🪐🤎!)"

22 May 2025 18:54

حنين " بتعاين ليهو لمن فات ، رجعت عاينت لي وصال " : انتو متفقين يا وصال ؟؟؟
وصال : عبيطه انتي ؟ نتفق على شنوو ؟
حنين : عايني م تزعلي مني لكن بس استغربت جيتو علشان كدا خصوصاً ان قبلها كنا ماسكين السيرة يعني بس !!
وصال : صدقيني صدفة والله و حتى كان عايز يرجع لمن شافك انا منعتو ! المهم يا حنونه حاولي تكوني طبيعيه في النهايه انتو ما اعداء ! سواء ربنا جعل بينكم قسمة او لا ! م تخلطي الامور بي بعض !

حنين : عايني وصال ، هو ما بالمعنى دا ! بس اكيد في حاجز خفيف
فاهمه ؟ كل الفكرة بحس بي توتر كدا في الجو ! يعني احساس ربكة كدا فاهمه ؟ و بعدين انا المخوفني اكتر عشان اكون واضحة معاك ! هو اني خايفه اخسر سراج !
يعني انه نخش في علاقه و تفشل او ارفض و اخسر وجودو نهائياً فهمتي قصدي ؟؟

" جاها صوتو وهو واقف ناصية المدخل حق الهول القاعدين فيه " __ لانك عبيطة ! مافي زول بكون عينو لي سعادتو و بمشي لي قساه !
مليون في المية خاته كلام الناس في راسك ، كضابة لو قلتي غير كدا ، و كضابة لو قلتي انك حاسه بي فرق العمر دا مني ! و لو شايفاني ما مسؤل او عقلي صغير و ما قادر اتماشى معاك كمان وريني ! مافي حاجة تزعل بالمناسبه و لا انا عندي استعداد اخسرك يا حنين !!

حنين " بي توتر ملحوظ بتطقطق في اصابعيها "

وصال " شالت تلفونها من التربيزة و قامت " :
تعالو اقعدو اتفاهمو و اتكلمو زي العالم و الناس ، انا جمبكم بس عايزة اتصل على قصي !
حنين : ماشه وين ؟
وصال " بتضغط اتصال " : جايه

سراج : اصلاً حنتكلم حنتكلم … ( رجع المطبخ داخل ) !

وصال #مكالمة

#بيت_عثمان

وداد : يعني هو جاك المحل ؟
عثمان : لا ما جاني ولا شفت وشو - جابو لي خبرو ناس جماعتي
وداد : سمح مالو ما جا علينا و لا خلاص نسانا ؟
عثمان : مصيرو يرجع ، طالما معتمد على نفسو كدا دابي اقدر اقوليك طردتك ليهو كانت صح ! همي كان ما يتلما ليهو على ناس ما ياهم !
وداد : لكن قلبي ماكلني عليهو يا عثمان ، ما بعرفو انا الولد دا طالع على منو !
عثمان : ربنا يهديو - انا بقوم على مكية دي عيانه كان اوديها دكتورة و لا حاجة !
وداد ( بي تقلة كدا ) : مكية ! الله يشفيها
عثمان : كتر خيرك ( لبس السديري و قام ) .. ودعتك الله
وداد : ابقى طمنا
عثمان " و هو متحرك " : ان شاءالله - ( بعد مشى رجع اتلفت عليها )
بيان وين ؟ من جيت م لمحتها ؟؟
وداد : مرقت عند جيرانا رسلتها انا !
عثمان : تمام - " مشى "

#جانب_سهاد

سهاد " قامت ناطه " : خالتي تلفونك بضرب
فوزية ( قاعدة و بالها مشغول م منتبهه لي كلام سهاد ) !
سهاد " اتناولت التلفون من التربيزة " : خالتي ! في مكالمة داخله بس تلفونك حيقفل كهرباء ! خالتي .." اتلفتت عليها "
فوزية : جيبي
سهاد : حيقفل كهرباء لكن ، دقيقه … ( وصلت الشاحن ) زي شاحني
لو حتردي تعالي جمبو السلك قصير !
فوزيه : منو البضرب
سهاد : ما عارفه الشاشه ضلمت ، فصلت المكالمة - بضرب تاني دي وصال !
فوزية : افتحي لي الصوت ! ردي
سهاد " فتحت الصوت و ختت التلفون و مشت تلم في صينية الشاي من التربيزة ودتها المطبخ " !
فوزية " قعدت جمب التلفون " : وصال ! الووو

#المكالمة
وصال : خالتي ! كيفك ؟
__حمدلله يا بتي ، كيفك انتي كويسه ؟
وصال : الحمدلله بخير ! صوتك بعيد شويه !!
__ بتكلم بالسماعه البرا يمكن عشان في الشاحن عشان كدا يمكن " علت صوتها " اها كدا كيف ؟
وصال : كويس ما مشكلة، خالتي عايزة اسألك قصي وين ؟ لانه بتصل ما بيرد علي مقلقه شديد !
__ بكون ما سامع التلفون ، مشى يجيب لينا طلبات اسي بجي بكلمو لو ما رجع ليك !
وصال : استغفرالله العظيم يارب ! ما عارفه انا حنفضل لمتين في الحالة دي ! قصي حرفياً بقى ما واعي لي حاجة في حياته غير وفاة احمد والحصل ! ما عارفه اعمل شنو يا خالتي !
__ اصبري عليهو يا وصال يا بتي حنعمل شنو انا زاتي حالو ما عاجبني و ( شافت سهاد جات من المطبخ ) المهم كيفكم انتو ؟

وصال : الحمدلله على كل حال ! فكرت في موضوع سفرنا
لازم قصي يبعد شوية و نغير جو من الحاصل دا ! من وقت ال… #قاطعتا
__ اااا وصال دقايق و برجع ليك بس التلفون يشحن شويه
( و لسه بتعاين لي سهاد )
وصال : طيب تمام م تنسي تنبهي قصي يكلمني ضروري !
__ اا تمام تمام … ( طق قفلت سرعه و بتعاين لي سهاد اللي بتضاير من فراغ ) - قالت ليها : سهاد يا بتي
سهاد ( بي صوت مخنوق و شبه م طالع ) : نعم !
__ انا الليله لازم امشي بيتي ! قعدت الكتير بعد دا الرجعه لي بيتي واجبة ! اا انتي كان قلتي عندك خالتك و لا عمتك ولا شنو كدا !!
سهاد " بي استغراب و استنكار " : اممم ااي مالهم ؟
__ ( بي تراجع ملحوظ ) و لا خلاص !!
سهاد : ممكن تدقي على قصي ! انا غالبني انتظر اكتر !

" صوت الباب خبط "
سهاد " جرت فتحت الباب بدون تردد " !!

فوزية : منو ؟
سهاد : قق قصي !
فوزية " صلحت توبا و جات عليهو " ! : قصي ؟

رِوايات سُودانية🪐🤎!)"

22 May 2025 18:54

روايات سحر سمير:
#مندرين
بقلم سحر سمير وفاطمة قسم الله
-٢٠-
ناس المجان الحُنان 🌙🤍

البيُوْت التِي لَا تكُونِين فِيهَا، تَضيِّقُ بـِ جُدرانها المُوحِّشة. الثِياب التِي تَرتدين سِواها، تَئنُ مِن البَرد. وَالكلِمَات التِي لَا تقولينها تتجَّمعُ مِثل الأرامل حَول ضَريحِ اللُغة. يَنبغِي أَنْ تَغيبي لكِي تفضحنِي وَحشتِي. يَنبغي أَنْ يَضمّكِ شَخصٌ سِواي لـِ تدركي كم أُحبُّكِ !.
___

"التقبُل" خدعة جزئيًا
___
#مندرين20

خالتي ما قصرت مني عدتني زي بتها واحد وجمايلها في راسي فوق ما عارفة اسدها ليها كيف بس انا ح الم عفشي وحاجاتي و أفتش لي سكن تاني وشبه عرفته حمشي وين وربنا كريم علي...

#فوزية
اسمعي كلامي يا سهاد ، انا عندي رأي !!

قصي :خلي رأيك دا بعدين انا عايز امشي ، كلميها تكتب لي رقم سيد البيت دا في ورقةً ولا حاجة

فوزية : طيب طيب ! اكتبي ي سهاد ي بتي

سهاد "مشت تفتش حوليها " : طيب
عاين يا قصي يا ولدي مسافة تكتب ليك الرقم ! انا راي البت دي تجي تقعد معاي بس !
قصي : نتكلم بعدين في الموضوع دا ، خليني بس امشي و اجي !

سهاد( كانت سامعه الكلام غابت كم دقيقه وجات ، ادت الرقم لي خالة فوزية و قالت ليهو ) : معليش كتبتو ليك في منديل م لقيت حاجة اقطع لي منها ورقة !

قصي : م مشكلة ، جيبيها يا امي !

" جوطة حريم في الشارع ، قريب من محل قصي واقف "

— عليكي الله فكيني من نصايحك دي ، لومي نفسك براك انا ما تسمعيني كلامك دا ! احمد لو مات من ورا ضغطك ليه في مكالمتك دا موضوعك انتي و قضاء ربنا ! المهم دا حقنا ! قبل تغطس و م نعرف ليها درب !
** اقيفي هنااا ! البتعملي فيهو دا م صح ، الرحمة حلوة !
( بتجرها من يدها ) ، خلينا نرجع !
__ ( لمحت قصي من ضهرو واقف ) : اها جابت ليها رجال و قلة ادب اخوك لسه تربتو ما نشفت !؟ اقسم بالله ما اخليها ، كفاية سكتوني ايام الوفاة ! اصلاً القرف الفيهو دا كلو من وراها !! ( مشت عليهو )
** لا حول ولا قوة الا بالله ( جات لحقتها ) يا ناديه دقيقه !!

__ " بصوت عالي " : يا الاسمك سهااااد …
( قصي اتلفت عليهم بي استغراب )

فوزية " مدت راسها برا " : دا شنو ؟
اخت احمد الصغيرة ( وقفت عاينت ليهم ) : اها قصي !
قصي ( زح بعيد من الباب ) : مرحب ! في حاجة ؟؟؟
اخت احمد الكبيرة : ااا لالا مافي حاجة !
قصي : انا حا امشي يا امي زي م وريتك لو إتذكرتي حاجة كلميني
فوزيه ( هزت راسها بالموافقه و عينها عليهم ) : اهلاً و سهلاً اتفضلو !
" دخلوا "

سهاد ( بي استغراب بتعاين ليهم ) : اهلين كيفكم ؟
__ كيفنا ؟ كدي كيفنا خليهو انتي كيفك كيف ؟ مبسوطة بعد احمد مات و امي م راضيه عليهو ؟ اسمعي كلامي !! عايني م تردي ، صوتك دا لمن اسمعو بطني بتطم ! انحنا جينا هنا عايزين حق اخونا ! وينو الدهب الكان جايبو ليك ؟؟

فوزية ( بي همس ) : يا عيب الشوم ، اذا ديل اخوات المرحوم ، طيب البتشبه سهاد ديك منو ! ليه كلهم معادنها كدا !!
سهاد " ساكتة "
** قومي خلينا نمشي انتي ما شايفه حالتها عليكي الله ما عايزين مشاكل ( بتجرجر فيها )
__ انا ما ماشه امشي انتي !
سهاد " قامت وقفت على حيلها " : بعد تطلعو اقفلو الباب وراكم .. " ومشت " !
__ " وقفت على حيلها " : هي هي انتي !! انا مش بتكلم معاك ؟
سهاد : وطي صوتك انا ما طرشه ! و تانياً طول ما انتي بتهرجي و بترفعي في صوتك كدا ما حتلقى معاي سكة تمام ؟
__ ايوا كدا اظهري على حقيقتك !
سهاد : حقيقتي انتي م بتعرفيها ! الربيت عليهو نفسي حاجة و العلمتني ليهو الدنيا حاجة دنيا ! و انتي البتختاري العايزة تشوفي مني شنو !
__ " جات عليها مسكتا من كتفها " : احسن ليك تتكلمي بي ادب
ولا خلاص مات احمد و شلتي قناعك من وشك ! نوعك السهتان دا بنعرفو كويس ! و بالمناسبه احمد كان ناوي يطلقك و يعرس الدايرنها احنا ! لكن تقولي شنو ! امر الله

اختها " بي تحذير و ضيق " : ما تكذبي في اخوك حرام عليكي هو متوفي استغلي اي شي الا النقطه دي ! و بعدين انا الكنت بتكلم معاه انتي م سمعتي حاجة م تتكلمي ساي ، انا الضغطت عليه يطلقا لو داير رضانا و بعدها حصل موضوع الكهرباء دا اثناء مكالمتي ! ما تقولي كلام ساي و يلا خلينا نمشي !

سهاد " بي عدم تصديق " :
كهرباء شنو ؟ " عاينت لي فوزيه " !
__ " بتحاكي نبرة صوتها بأستفزاز " : كهرباء شنو ! حتكون كهرباء شنو مثلاً !
سهاد " جرتا جهة الباب " : امشي اطلعي برا لانه انا ما ناقصاك
اختها " محصلاها " : اطلعي خلينا نمشي !
__ على فكرة دا بيت اخوي !!
سهاد : كاااااان !
__صبرك يا سهاد !( اختها جرتا و مشو )

سهاد : استغفرالله العظيم و أتوب اليه !!

رِوايات سُودانية🪐🤎!)"

20 May 2025 18:03

ناس الولايات جزاكم الله خير
انتو ف ولاياتكم، ونحن في دولتنا.

ومن حسي خراب وش.
شوفو لبكم جامعات ومستشفيات
وبزنسات ف بلدكم.

ناس الإيجارات والمليار واتنين
وكل شهر بتضاعفو...

انتو ب الذات، بنحرس ليكم شفعنا ف
الظلط قبل تدخلو يرموكم ب حجار.

رِوايات سُودانية🪐🤎!)"

22 May 2025 20:49

"يلِيقُ بِي أن أكُون ابنةَ الحِبر، سواءٌ بالراء أو بدُونها" 🖤.

#مُورفينا

رِوايات سُودانية🪐🤎!)"

22 May 2025 20:40

غداً سننفضُ التراب عن ذاكرتنا
ُوربما نرتجفُ حين يسألوننا
أيها التُعساءْ : هل تتذكرون أسماء عشيقاتكم؟!
سيكونُ أحدُنا خجِلاً عندما ينظُرُ إلى صفحته الفارغة
لأنّه لم يقترف قبلةً ولا عناقاً
ستقرعُ الأجراس، ونرتِّلُ ما تيسَّرَ من الندم
ستتفتَّحُ الأزهارُ على حقول اللافندر
ويُلقى القبضُ علينا مرةً أخرى.

رِوايات سُودانية🪐🤎!)"

22 May 2025 20:28

غداً عندما نلتقي كلٌ يحمِلُ أثقالَه
سنقفُ في طابورٍ طويل
سنلقي قصائدنا المرصَّعة بالخوف والدموع
ستهمسين بأذني : هل بإمكان القصيدةِ أن تمحو الذنوب ؟!
وهل ستقودنا الملحمةُ إلى الفراديس ؟!.

رِوايات سُودانية🪐🤎!)"

22 May 2025 20:17

  الذئابُ تنسى كثيراً
ولذا تمشِّطُ حقولَ الجسد مرَّتين دون أن تنتبه 
ودون أن تنظرَ إلى وداعةِ العينين الدامعتين 
   أو إلى حبَّةِ التوتِ التي تنزف 
ولا إلى حقول اللافندر التي يطاردها الزبول.

رِوايات سُودانية🪐🤎!)"

22 May 2025 19:09

عندما تُعيدين ارتِداء الفَضِيلة
وبداية ترتيب ملامِحكِ مِن جَديد
وأنتِ تلعقينَ جرحكِ كالذئبة الهرمة 
وتنظِّفين فمَكَ من شفاهِ الفامبيرز 
اتركي ندباتِ قلبك مكشوفةً
سيذوُّبها أسيدُ النسيان 
حطِّمي مرآةَ الوجوهِ الآثمة
واهبطي من قطارِ القسوة  ،
لملمي رمادَ حبِّك القديمِ في زجاجة
لترميها في قاع البحر.

رِوايات سُودانية🪐🤎!)"

22 May 2025 18:54

*لالا ما عايز انا زاتي طالع عندي مشوار شغل مهم لازم اسويه
_مصطفى شكلك ما عاجبني ما اتعودت عليك بالهدوء دا
*مالي يابت هدا قدامك كويس ما فيني شي
_عاين عشان اقصر عليك انا عارفة ان بالك مشغول بسهاد وامس ما نمته جاتني صحية زي الساعة تلاتة وشايفاك طلعته للحوش
*ما عارف يا سلاف انا سهاد بقت شاغلة بالي شديد ما بكذب عليك ورايدا والله ما قادر اصبر.
_امي قالت متخوفة و الموضوع دا ما فيه لعب تاني وانت عارف اسرتنا كويسة العرس المجهجه ما بنريدو ياهو تعرس ليك بت ناس تحيا وتموت معاها
*يعني انا كان ما واثق في القلتو حا افتح معاك موضوع العرس تاني يا سلاف ومن سهاد بالتحديد .. شوفي كل الحصل دا لخير من اول ما شفتها وسفري تاني وطلعت متزوجة ووفاة زوجها ورجوعي نهائي من الاغتراب دي كلها حاجات خلتني انتبه ان البت دي هي قسمتي..
_عديلة يا مصطفى مع اني قلت ليك نصبر عليها شوية بس شايفاك مستعجل وكان سمعت كلامي أخير
*لالا خير البر عاجله لأسباب كتيرة
_"بتلكزو بضحكة" والله كبرته يا مصطفى وبقيت تاخد قرارك براك يا اخوي وعشان قلقل امس بالليل دا انا للضهر كدا بمش ليها في البيت اطمن عليها واشوفها
*"ببتسم" والله انتي احلى اخت في الدنيا دي ، انا قررت اتكلم معاها اول وبجيها بالباب عديل
_ شايفة برضو كدا عشان تحسم موضوعك واذا عاوزني اكلمها انا ما عندي مشكلة
*خليها تجي مني انا اول وانتو تاني تممو الباقي
_هههه قلت لي واثق شديد سمح اها غيرت رايك تقعد تشرب معاي الشاي والكيكة وتمشي مشوارك تاني
*غيرتو ساي واها دي قعده كمان يلا اسرعي وراي شغل
_شوووف الود هي ها على فكرة انا الكبيرة ما تنسى بالله
*منو البصدق عايني لي كدا طول بعرض والدقن والهيبة دي ساي وانتي كلك اقل من 160 "بضحك"
_سجمك
*الله مالك عليك الله ما سمح ؟!
_النصيحة داير الحق سماحة فايته الحد غبيانة زاتا الما بتوافق عليك
*"بضحك" مبسوط "منتبه في تلفونو"
✎﹏﹏﹏﹏﹏﹏﹏﹏﹏﹏﹏﹏﹏﹏

"طالع من الحمام بنشف في شعرو بالبشكير ووصال قاعدة في التوليت ماسكة الاستشوار "
*اهاانت حا تطلع ولا كيف؟!
_ايوة ماشي اتفق مع بتاع مخزن للعفش بتاع سهاد عشان الراجل الفقر دا ما يعمل اجراء ما ياهو نلقاه جدع ليها حاجاتها بره الشارع اصلا الزي ديل تتوقعي منهم اي تصرف
*على قولك والله طيب معناها انا حا امشي معاها بيتها تلملم هدومها وحاجاتها واساعدها فيهم تدخلهم في شنط
_"صوت تلفونو" دا الهادي "برد" ايوة يا الهادي الحمدلله اصبحنا كويسين ، اي جبناها البيت معانا ، تقريبا هسي نايمة ما مشت عليها وصال ، اها جايينا يعني لا تمام كدا .. وامك ما هدت شوية
ياخي ياخي خلاص بعد نتلاقى يلا سلام.
الهادي حا يمر علينا خلاص بخليه يوصلكم البيت وينتظركم لما تنتهو يجيبكم
_خلي يودينا بس ما ظريفة نعطلو بإنتظارنا
*صحي زكرتيني نسيت اكلمك ان مروة دي اجهضت والله في بالي كان وتاني الامور جاطتت وكل شي جا كدا
_معقول لكن يا قصي كيف ما تكلمني بحاجة مهمة زي دي طيب انا امس كنت نزلته اها حا تقول علي شنو هسي؟! جد بالغته بالغت شديد والله
*حقك علي حبيبي"ببوسها في راسها" ما تشيلي هم بكلمها انك ما عارفة امشي ليها المساء بعدين كفري ليها.
_غايتو ختيتني في موقف بايخ ، اي لازم ان شاءالله كدي ننتهي اول من موضوع سهاد دا
"انا ماشة اشوفها اسوي ليك ساندوتش خفيف مع عصير او شاي؟!
*عصير حبيبي
" بتطلع"
"دق باب خفيف وكرب بتخش عليها"
__سهاد صاحية؟!
"بتقوم تقعد"
**صاحية يا وصال
__"بتعاين لكباية العصير والساندوتشات المغطية جمبها في التربيزة والقميص المختوت مطبق طرف السرير" امس رجعت بالليل لقيتك نمتي ما حبيت اصحيك قلته بتصحي تبدلي هدومك وتشربي بس شايفة العصير والاكل في محلهم كدا ما ينفع يا سهاد لكن خافي على نفسك حبة واهتمي بصحتك دي الله بسألك منها..
**معليش يا وصال تعبتكم معاي بس انا لازم امشي هسي بيتي واشوف البي والعلي تاني وسيد البيت عاوزة الاقيه
__اسمعي يا سهاد اول موضوع سيد البيت دا ولا تفكري تلاقيه دا واحد ما عندو اصل قصي اتواصل معاه وما اتفاهم حتى ولا قدر الظروف الانتي فيها وقال كلام ما ظريف خالص وما بعيد يسمعك كلام كعب ، تانيا حمشي معاك لاني مستحيل اخليك تطلعي من باب بيتي براك حتقعي في الشارع ما شفتي وشك دا مخطوف كيف انتي ما قادرة تقيفي عديل وكان بتسمعي كلامي خليك ارتاحي انتي اديني مفتاح بيتك وانا ليك يا ستي بلملم ليك حاجاتك كلها
**ما عارفة اقول ليك شنو يا وصال بس وقفتك معاي دي ما حا انساها ليك نهائي ،، القريب ما عملها معاي "بتضحك"
__مالك بتضحكي؟!
**ابدا اتزكرت اول يوم اتلاقينا داك وعدم استلطافي ليك وانتي كمان نفس الشي سبحان الله زي الامس كل التفاصيل هسي جات في بالي وانتي قاعدة قدامي وبنتكلم وقتها ، جد ما بكذب عليك لو قلت ليك ان اول انطباع لي عنك ما كان ظريف حسيتك شايفة روحك كدا وما لطيفة خالص حتى قلت لي احمد انك ثقيلة وما تستاهلي يكون قصي حبيبك "بتضحك"

رِوايات سُودانية🪐🤎!)"

22 May 2025 18:54

" طق طق الباب بدق بتخش علينا الممرضة البتقول كل الفحوصات نضيفة الا من ضعف الدم والارهاق والارق السبب ليها اغماء وان الدكتور ح يمر على سهاد اتكتب ليها خروج ماف داعي لقعادها"

#من_جانب_تاني

__سلافة ارح نحن دقينا كم مرة واتصلتي عليها معناها مافي
**اجي دا كلام شنو ؟! انا قلبي ما مطمن يا مصطفى حا تكون مشت وين يعني؟! انا نبهت عليها تجي تنوم معاي معقول نايمة؟!
مستحيل ما تصحى بصوت الدق وصوت التلفون
__الوقت بعد نص الليل احتمال لما مشينا منها جوها اهلها ساقوها
**اهلها؟! اهل شنو هو نحن طول لحظة العزاء ماف زول جاها وقف معاها ما عارفة لكن اقلاها ترسل لي مسج توريني غايتو الله يجيب العواقب سليمة خلينا نمشي
"مصطفى بعاين لجهة الباب من تاني وبطلع ورا اختو"

#المستشفى
بره المستشفى قريب للعربية وصال ساندة سهاد وقصي شايل كيس في يدو متقدم عليهم والهادي بتكلم بالتلفون لقدام شوية...
قصي : حمدالله على السلامة "بمد الكيس ل وصال " دا فيه عصير "برجع بفتح باب العربية وصال بتدخلها وبتطلع قزازة عصير تديها ليها وبتقفل الباب بتعاين لقصي"
"بتكلم معاها ويتقدمو لي قدام من العربية"
قصي : انا استفسرت من شقق العماد السكنية دي وحجزت ليها عندهم ح ننزلها هناك لما ربنا يسهل
وصال : دا كلام شنو يا قصي معقول نختها في شقة براها ونمشي عادي كدا والبت ما قادرة تسند نفسها وطالعة من مستشفى هسي افرض حصلت ليها حاجة ساي لالا ما ينفع ما للدرجة دي نكون قليلين اصل ولا قلبي بطاوعني اسويها وارجع اخت راسي دي وانوم .
قصي : كويس شوري علي اعمل شنو وانا اسويه لاني راسي ضارب جد وما لقيت حل اتصرف بيه غير كدا
وصال : نوديها عند خالتو هسي تصبح معاها الواطه ولي بكرا نتصرف على الاقل بنكون مطمنين
قصي : حل معقول لكن ما بكذب عليك خايف من رد فعل امي
وصال : لالا ما تخاف خالتو بتريد سهاد وكانت قاعدة معاها بس سوء فهم حصل ليها خلاها تقول كلامها داك
قصي : ريحتيني بفكرتك دي الله يريحك دنيا واخرة يا قلبي " بقرب منها ببوسها في راسها وهي بتضحك" سهاد بتعاين ليهم من ورا قزاز العربية المظلل ما نزلت عينها..
"الهادي جاي عليهم بضيق واضح على وشو"
الهادي : ارحكم امي ومروة الاتنين صاحيات والحال ما بسر
قصي : لي في شنو؟!
الهادي : ربك يعين ، حا نودي سهاد البيت اول وبوصلكم تاني
قصي : لا سهاد بحالتها دي حا انزلها مع امي وللصباح بنشوف بعد داك
الهادي بعاين ليه بعدم اقتناع سمح اركبو اركبو

#جانب_تاني

__هسي انا غلطه في شنو يا خالتي "بتقش في دموعه" الصاح والواجب شنو؟! يقعد جمب مرتو الاجهضت وتعبانة دي ولا يجري لواحدة ما بتربطنا بيها اي علاقة لا وكمان موديها المستشفى ومنتظرها لما خرجوها ولا فكر يرفع تلفونو يطمن على الهبلة المرمية جوه دي
**لالا يا مروة ما تقولي كدا كدي استهدي بالله اول اقعدي اقعدي هسي بجو وبنفهم منهم الموضوع كلو
__قال وصال معاهم زاتهم اتخيلي يا خالتي ولا كلفت نفسها ساي ترفع التلفون تقول لي سلامتك يا مروة وجرت لي سهاد الغريبة
**معليش يا بتي بتكون ما عارفة سمح النصبر لما يجو ونشوف حد الموضوع دا وين؟! لازم يتحسم الليلة دي ولا البت دي حا تجرجرنا لموضوع كل يوم وتقلقل منامنا دا .. بعد قلته تبقى لي بت تونسني واونسها لكن الله دا بجعل الاسباب يكشف بيها حقيقة الناس
__خالتي انا من لحظتها قلت ليك وما سمعتي لي ، معقول ماف زول من اهلها ساي جا يسوقها ولا يشقر عليها ؟! الموضوع دا براه يشكك في حاجة ؟! والبت القلتي في لحظة الوفا جات تفلت في الكلام واخوات احمد تاني اها ديل كلهم غلطانين عليها وهي المظلومة منهم؟! مستحيل انسان يجي عليك ساي يا خالتي
انا شايفة تتكلمي مع الهادي وقصي ينفضو يدهم منها عملو الواجب وزيادة ما قصرو والله ولا حاجة .
والهادي بالذات بقى موضوع سهاد دا شاغلو اكتر من اللازم وانا ما عاجبني اهتمامو دا
فوزية "بتعاين ليها" : لي في شنو؟!
مروة : "دا كلو لاني قلت ليه بتسكت وتقطع الكلام " سيرة ونستو كلها بقت سهاد وانها حا تتعايش براها كيف التقول اختو ولا من باقي اهلنا وكان قلت ليه ما لينا دعوة بيها بطلعني طوالي انا كعبة لا مرة لا اتنين نقاشنا في الموضوع دا عشان تعرفي بس البت دي دخلت حياتنا وحا تشوفي يا خالتي .

"فوزية سهمت لبعيد و بقو خاتات يديهم ومنتظرات جية ناس قصي تحت في البيت "

"ساعة زمن عدت وصوت كركبة الباب بتاع الشارع بفتح "

قصي : دقايق اشوف امي ي وصال خليكم هنا عشان ما تتخلع فجأة تشوفنا قدامها والهادي بنزل بطلع بالسلم فوق
"كرب كرب قصي بخش
" بلقي امو ومروة في الصالة قاعدات"
قصي : السلام عليكم
فوزية : حمدالله على السلامة "بتعاين جهة الباب" وينا مرتك؟ ما قالت معاكم؟!

رِوايات سُودانية🪐🤎!)"

22 May 2025 18:54

#مندرين
بقلم سحر سمير و فاطمة قسم الله
-٢٢-
{ناس المجان بنحب نشاغلكم بيها😘💛}

ماف حد بشوف غلطو..
الناس مابتنتبه وهي بتضغطك بس بتنتبه لما تتغير معاهم، مابتنتبه انو بتجرحك ، بس بتنتبه انك عصبي،
مابتنتبه لما تقلل من قيمتك ، بس بتنتبه اذا انت ما اهتميت، ماف حد بينتبه كيف بئذي ال حواليه ، بينتبه بس كيف بيتأذى.

#حسّوا الاحساس نعمة🤎

#مندرين22

مجرد ما الباب خبط ، بكل لهفة فتحت الباب و مديت يدي … و لسه عايزة اقول شكراً !
فجأة لقيت يد دفرتني لي جوا و مسكتني من رقبتي شديد و ضغط على القصبة الفي حلقي لمن اتخنقته و لذاني لي جواا
و رد الباب بي رجلو !!!

و صرختة 💥…….

إستوعبته بعد ثانية وانا بعاين ليها بعيون منططه ورعب دخلتو فيني للحظة..
"دفرتها بقوتي وما قدرت أمسك نفسي تاني وانا بطلع كل الغبن الجواي تجاها"
__منيرة ياخ انا سويت ليك شنو؟! لي الغل والحقد دا كلو تجاهي؟! وانا مرمدة ومرزوعة في بيتكم ما ريحتيني وهسي بقى ماف إختلاف كتير بعد فقدت الإنسان الكان مصدر حماية لي .. اها بعد أحمد فات من الدنيا دي تاني مالك بي؟!
فضل لي شنو تحسديني فيه؟!
كان سألتك الجابك لي شنو متهجمة علي مالك في بيتي؟!
** عاوزة اتفشه فيك يا سهاد لسه غبينتي فيك ما انتهت
المفروض تموتي انتي ما هو المسكين ما عندو زنب ياهو اصلا الطيب بفوت وبقعد الكعب.
__"بحرقة بتضرب على رجولها" ياريت ياريت لو انا كنت ارتحت من خلقتك دي ، اهون لي الموت وما اشوفك ، في حياتي ما لاقاني زول في قلبو كل الحقد والغل دا انتي لمتين تنضفي قلبك تجاهي يا منيرة لمتين؟!
** يوم البشوفك شايلنك جنازة قدامي قلبي ببقى نضيف وبرتاح
__يا اعوذ بالله منك اعوووذ بالله ، انتي عارفة طول ما انتي بسواد النية دي طول ما حياتك سوودا كدا ما بتقدري تشوفي اتنين مبسوطين تقولي ليهم ربنا يسعدكم ، ما بتقدري تركزي في حياتك وغيرك مبسوط وعايش..
عارفة اتطلقتي لي عشان عايشة في حياة غيرك أكتر من حياتك
كان اهتميتي بأمرك ما كنتي لافة كدا لا شغل لا مشغلة من يا بيت لمني يا بيت فكني انتي حياتك كدا عاجباك؟!
كدي وريني مرتاحة كدا؟!
عليك الله اطلعي من حياتي وانا العملتي فيني زمان عفيتك لله والرسول ...
** هههه حبيبتي زمان قلت ليك انا حقيقتك السودا الداساها ، دور البراءة العايشاه قدام الناس دا يا ماما ما علي مشكلتك دمك معاي وااااحد اتقبلي حقيقة اني بت خالتك ياهو نفس السوء فيني فيك وإن كان إنتي فايتاني درجات .. كان مثلتي على الناس ديل كلهم مصيرك في يوم تتكشفي يا سهاد..
"بتقرب عليها بزعل"
__قلتي لي بت خالتي !! هو انتي وخالتي قدمتو لي شنو في الدنيا دي غير الزلة والمهانة في زول بسوي في لحمو ودمو كدا .. على العموم اصلا الزول الحاسد وكعب بشوف الناس ديل كلهم زيو
زمان انا عاملة حساب لأحمد لاني محترماه وما عاوزة اظهر قدامو قليلة اصل لانو ما يستاهل كدا ساكتة وماسكة خشمي علي بس هسي احمد وفات و...
"بتصفق طق طق طق"
**تصدقي خفت منك يا سهاد والله وبقى ليك لسان وصوت تردي بيهم الله يرحم زمن كتلة الحيل ورجفة الصوت والدميعات الترب ترب تنزليها عشان تراضينا..الله يرحم نحنحة الصوت "بتحاكيها" خالتي انا هدومي اتقطعت لو تديني قطعة او اتنين من منيرة استر بيهم نفسي تحبي ازكرك اكتر..
فووووقي فوووقي عمرك ما حا تبقي زول في نظري عمرك ما حا تبقي فايتاني شبر ياكي بت شارع والمرمي الله ما بترفع
"بكوراك"
__منيرة " وطاخ ادتها كف لما لفتتها بجمبة" انا بت امي وابوي ربوني احسن تربية بس القدر الرماني فيكم واريت لو رماني في الشارع كان أخير لي..
اسمعي هنا" رافعة ليها اصبعها" سكته ليك بما فيه الكفاية اطلعي بره دي المرة الكم اطردك انتي كان عندك كرامة ما بتوريني وشك دا تاني..
"قبل تقول كلمة تاني"
**"طق بترد ليها الكف بقوة لما سهاد تترتح لي ورا"
يدك دي تاني كان رفعتيها علي ح اكسرها ووقت مديتيها هسي معناها الا بقرصة اضان عشان ما تكرريها تاني
"بتجي عليها وبتتناولها من شعرا بتنزل فيها ضرب بقوة طالعة عليها وشك العاجبك دا حشوهو ليك فاهمة"
مع صوت صراخ سهاد وهي بتحاول تدفرها عنها تاخد نفسها..
__انتي جنيتي وشي لا يا منيرة حتقتليني نفسي كتم زحي مني زحي مني

#بره_في_الشارع

"الهادي بنزل من العربية وعينو على مدخل ناس أحمد الشاف بت خشت منو ولسه ما طلعت بعاين على جهة قصي الجاي وشايل كيس في يدو"
الهادي : قصي كويس جيت انا شفته بت دخلت على مدخل ناس سهاد دا قبل شوية
قصي : بت؟!
الهادي : اي هو في زول ساكن تاني في البناية دي غير أحمد؟!
قصي : ما اظن متزكر احمد كان بقول لي البناية فاضية ولا كان بكون متطمن وقت يخليها براها ارح ارح ندخل ليها اللبن ، امكن واحدة من اخوات احمد جات تطمن عليها

رِوايات سُودانية🪐🤎!)"

22 May 2025 18:54

سهاد " عدلت طرحتا و فتحت الباب " : تعالي اتفضلو ..
مصطفى : سهاد كيفك ؟
سهاد : الحمدلله في نعمة يا مصطفى شكراً - حمدالله على السلامة كمان -
مصطفى : اييك الله يسلمك ، رجعت من بدري انا
سهاد : ايوا لالا حمدالله على السلامة … اتفضل
مصطفى : لالا جيت اسلم بس ! محتاجة مني حاجة ؟
سهاد : عايزة سلامتك
مصطفى : الله يسلمك … " مشى "

سلاف " دخلت و ردو الباب وراهم " : يدك سخنه و انتي بتسلمي علي ! حاسه بي شي ؟؟؟
سهاد : اي في نار مولعه في قلبي جواااا
سلاف : سهاد ! بالحاله دي الحياة حتبقى عليك صعبه ! كلامي دا ممكن تشوفي قاسي ! لكن حاولي تتخلصي من حاجات احمد كان ملابس و لا غيرو ! طلعيها لله .. عارفه كلامي دا حار عليكي بس لازم تعملي كدا !!
سهاد : بالسهولة دي !؟ انتي بتتكلمي عن حب و عشرة
دا الانسان الوحيد العاملني كأني انسانه و عمل لي بيت و حياة و رحمني من الكنت فيهو ! انتي ما عارفه حاجة يا سلاف م عارفه حاجة يا اختي !
سلاف : انا فعلاً ما عارفه حاجة يا سهاد لدرجة ان عندك راجل دي زاتا انا عرفتها في وفاتو !! المهم هسي لازم تبقى قوية و تقومي تستوعبي الحاصل دا و تأسسي حياتك بدل تضيعي الوقت في البكا ! ضيعي في التفكير في انك حتتصرفي كيف و من وين !
سهاد : الكلام ساهل ! يا سلاف …. للاسف انا ما قادرة و ما عارفه اتقبل الوضع دا …. صعب صعب شديد !
سلاف : فكري في كلامي كويس لانه في نهاية المطاف مرجعك ليهو !! " قامت وقفت على حيلها " انا بمشي !
" بتتلفت " صحي !! وينا خالتو فوزيه ؟؟؟

سهاد : ما تجيبي لي سيرتهم يا سلاف …
سلاف : ليه في شنو ؟
سهاد " بدت تبكي " : انا من الصدمة م كنت عرفت احمد اتوفى كيف
المهم عرفت انه مات بي كهرباء ياهو اصلا غايتو الشغل دا ! و كان في بيتهم ،عشان كدا بيتطاقشوا فيني زي العايزين يبردو ضميرهم !!!
انا فقدت احمد بي سببهم انتي متخيلة ؟؟
سلاف : لا حول ولا قوة الا بالله العلي العظيم - النصيب بس ربنا جعلهم سبب بس م اكتر .. يعني هسي هي مشت عشان كدا ؟؟؟
سهاد : انا قلت ليها تمشي م دايراهم ! لان م حقدر اشوفهم غير هم السبب - هما ما عارفين انا حيحصل فيني شنو بعد احمد ! انا حا ارجع لي نقطه الصفر !!

" سلاف تلفونها بيرن "
سلاف : اسمعي ، حتجي تبيتي معاي الليله تمام ؟؟ انا مضطرة اطلع اسي لانه مرتضى راجلي بيتصل لو لقاني برا حيعمل لي موضوع ، لازم ارجع البيت - اللبسي و تعالي محصلاني ….

سهاد : ححاول ….
سلاف " مشت فتحت باب الشارع " : م تحاولي يا سهاد تعالي "
سهاد : ان شاءالله !

#الشارع - العربية

قصي : ربنا يعوضكم ان شاءالله ..
الهادي : سلامة مروة عندي بالدنيا ، م مشكلة كلو من الله خير !
قصي : ابتسم ! ربنا يحفظكم !
الهادي : يعني اسي ما احاول اتصل على الراجل دا ؟
قصي : ما بنصحك والله لانه انت دمك حار و براك زهجان فا ما حتستحملوا ، اسلوبو بايخ شديد !
الهادي : دي عوجة شنو دي ! طيب رايك شنو لو نطلع ليها مبلغ تدبر بيهو نفسها هي بي طريقتا ؟
قصي : انت بتتكلم كيف يا الهادي ! الشغله م مخارجة ! الزولة دي امانة ! و انا اكتر واحد عارف ان الزولة دي م ليها غير المرحوم و ياما وصى عليها و حتى لو ما وصى انا ما بقدر اخليها مجهجهه !
الهادي : خلاص طيب حنعمل شنو طيب امك كمان ابتا عديل و كدا ووب و كدا وووبين ! ياخ عليك الله انزل من العربية دي خلينا نتكلم معاها عديل انا ما عندي اخلاق للافتراضات دي و بكرة وراي دوام و جوطة !! انزل انزل ……
قصي : يا الهادي دقيقه الزولة دي قالت م دايرة تشوف زول مننا !
الهادي : اللهم يطولك يا روح ، طيب انحنا جاين هنا نعمل شنو ؟؟
قصي : انت الليله الكلام معاك صعب ! م مشكلة طيب خلينا ننزل و امرنا على الله ….
الهادي ( لمح الباب فتح ) : في وحدة طالعه من عندها !
( نزلو من العربية و مشو على الباب )
قصي : جيتنا دي غلط لكن نعمل شنو ! الله يهديك يا وصال لو كان جيتي معانا مالو !
الهادي : اصلاً غلط - م عارف زاتو اتصرف كيف ! نتكلم من ورا الباب ولا كيف ؟
قصي : ايوا ايوا …
( وقف عند الباب و خبط بعد ما قفلتو ورا سلاف ) …

سهاد ( من ورا الباب ) : منو ؟؟
الهادي : الهادي و قصي يا اختنا ! كيف الحال طيبه ؟
سهاد : ايوا يا الهادي خير !!
الهادي : خير !! المهم انتي معاك خبر الراجل سيد البيت دا قال يفضو ليهو البيت صح ؟
سهاد " بي خنقه " : ايواا
الهادي : تمام انتي ناوية شنو في الحالة دي ؟
سهاد : ربك كريم
الهادي : و نعم بالله ما اختلفنا بس نورينا ، انتي عارفه ان المرحوم زول اخونا و انتي اختنا و ما بنرضى ليك غير الخير ! فا لو سمحتي لو عندك فهم في باقيه عليهو طمنينا !!

رِوايات سُودانية🪐🤎!)"

22 May 2025 18:54

حنين : انا ما عندي عقل ؟
سراج : يعني انا العندي مثلاً ! لو عندي عقل حا احبك انتي مثلاً
حنين : بالله !! طيب سراج اتخارج من قدام وشي ! والله افلقك بحاجة !
سراج " فك الضحكة " : والله انتي بتدوري بي سرعه ههههههه اسف اسف بهظر معاك والله - المهم نتكلم جد شويه ! هو سؤال واحد ! دايراني و لا لا ؟؟
حنين : ابيت
سراج : لا جد كدا !
حنين : ابيت قلت ليك
سراج : حنيييين !!! دايراني واا لالا !!
حنين : دايراك !

سراج " ابتسم شديد و فتح الباب طلع "
حنين : مجنون هههه ( رفعت تلفونها قدام عيونها و ضغطت اتصال )
ايوا ابوي .. الووو …

#جانب_امال

امال : انتي يا زينب التردد دا متأكده كتبتيهو لي صح ؟
زينب : ااي متأكدة ! انتي بس ما تهبشي خلي واحد من الاولاد يجي يكتبو ليك !
امال : اها يلا اسمعيني ! رايك شنو نمشي على ام حنين دي ؟
زينب : اجي !!! مشينا ليها يا امال هي ما ردت الزيارة اسي لينا كم ؟
هي ما بتجي لي زول لكن !
امال : عشان خاطر بتها دي يا زينب !
زينب : بتها مافيها كلمة لكن انحنا اسي فوقا هي ما بتمش للناس !
امال : ياخ والله مسكينه يا زينب
زينب : امال انتي بتتكلمي كيف و اسي القاليك ما مسكينه منو ! كان في مشي خلينا نمشي على مرة المرحوم صاحب قصي دي وحاة الله البت دي م مرقت من بالي كلو كلو ! قاطعه قلبي عليها !
امال : اي والله تقطع القلب يا زينب ! قصي كمان حالتو تحنن وصال قالت لي ما بلوم الا في روحو الليله و النهار و هو لسه ما خلص علاجو و الضيق دا عادي يخلي ينتكس لو ما واصل في الجلسات و الله اعلم !
زينب : دي إرادة ربنا كان في بيت قصي و لا اي بت تاني مكتوبة ليهو الموت دا اجل ! كلنا جنائز مؤجلة يا اختي نسأل الله حسن الخاتمة بس !
امال : اي والله لكن العقل في اللحظات دي ما بستوعب الكلام دا
ياهو نسأل الله حسن الخاتمة !!

#الغرفة
#جانب_وصال !

قصي " عاين لي وصال " : تعالي حبيبي
وصال "مشت عليهو بي لهفه " : انت كويس ؟
قصي : الحمدلله كويس !؟ لونك مخطوف كدا ليه ؟ مقلقه ؟؟
وصال : مقلقه عليك ، كل شي جايط حولينا
قصي : حقك علي انا مقلق بيك شديد طول الوقت ، الحاصل علينا دا كلو ما خططنا ليهو ولا كان في حساباتنا في يوم من الايام ، ما كنت مخطط غير لي فرحك و لي راحتك ! بالجد يا وصال م كنت متمني تعيش معاي الاضطرابات دي كلها و الدوامة الحاصله دي !
وصال : بس انا لسة عشمانة في ايامنا الجاية تكون كلها فرح و سعادة يا قصي !! العايشنو و البنمر بيهو دا انا عندي استعداد استحملو بس بي شرط ! ما يمسك اذى !! ما دايرة اشوف فيك مكروه بعد الشر !!

قصي : الشر بعادك عني يا عمري ! الشر يجي علي يوم م اشوف وشك الحلو دا قدام عيوني ….
وصال : يخليك لي يارب …احكي لي بتفكر في شنو اسي شاغل بالك بعيد عن الكلام القالتو ليكم سهاد دي !!
قصي " عدل رقدتو " : سيد البيت ! شلت رقمو و ضربت ليهو عشان اشوف حيشيل قروش الايجار كيف ! لقيتو بيقول انا داير البيت خلال اليومين ديل !
وصال : الله اكبر ! طيب ما حاولت تشرح ليهو الظروف ولا تقنعو ؟
قصي : ما عارف يا وصال لكن كان متعصب شديد لدرجة ما كان بيسمعني انا بقول في شنو ، كان بس هدفو يوصل لي كلامو بي اي شكل ! في حين ان قبلها لمن مشيت لي امي و سهاد ما قالو لي حاجة غير ان سيد البت عايز ايجارو بتاع شهرين يعني م قالو لي قال يفضو البيت ، معنى كدا قرارو دا جديد بعد ما فات منهم قرر ، انا كنت ناوي ادفع ليهو حق خمسه شهور لقدام عشان م يخبط عليها الباب تاني قريب و يكون تواصلو معاي ! حتى قلت في نفسي يمكن عايز زيادة في الايجار عشان كدا قرر يفضو ليهو البيت ! لكن م اتفاهم معاي والله يا وصال شي غريب ! و ما منطقي …

وصال : لا حول ولاقوة الا بالله العلي العظيم !
م عارفه يا قصي يا حبيبي لكن جاني احساس كدا غريب و انت بتحكي ، يعني مفروض الراجل يراعي وفاة زوجها ! م عارفه لكن في حاجات غريبه م ليها تفسير بتحصل !
قصي : الاغرب من كدا اخوات احمد بدل يبقو ليها ضماد للجرح بقو ليها شطة في جرح حسب كلام امي ! انتي عارفه امي بعد قررت تسوقها معاها البيت دا حتى قبل تعرف بموضوع المؤجر ، بعدين لقيت امي لاوزت و قلقت منها و عديل قالت لي م بضمنها بسبب جية اخوات المرحوم و اظن عندها كم رأي تاني !
وصال : حاجة ! غريبه طيب و هسي الحيحصل شنو ؟

قصي : مفروض نشوف ليها بيت تاني ودي عارفه صعبة لانه براها
يعني كان زول وافق يأجر ليها ، كمان م معروف الجيران حيتعاملو كيف ! يعني م عارف يا وصال
وصال : لالالا صعب م قادرة اتخيل انا شايفه انك تتكلم مع الراجل تاني و تقنعو بزيادة ايجار ! و تقعد بس لانه الجيران امان و عندها زولة صحبتها بتجيها و عارفنها يعني امان ليها اكتر !! بس السؤال المهم اهلها وين ؟

رِوايات سُودانية🪐🤎!)"

22 May 2025 18:54

وصال : والله زي البينكم تار ! في شنو انتو مالكم ؟؟
حنين : مافي حاجة يا بت بسم الله ! انتي مقلقه مالك ؟
وصال : ما عارفه يا حنين انا بالي دا بقى فيهو شنو غير اخوك ؟
حنين : هو زاتو ما عارفه بيفكر كيف بس الواحد ما داير يتكلم عشان م يبقى كعب !
سراج : وصال ! معليش للمقاطعه بس في حاجة شاغله بالي !
وصال : غير حنين ؟
حنين " بي توتر و خجل انا قايمة اجيب مويه "
وصال : هههه يا بت تعالي والله بهظر معاكم ياخ
سراج : ما ناكر
وصال : طيب تعالي الموية جمبي بي جاي !
حنين : انا عايزة من جوا
وصال : هبلة هههههه
" حنين مشت على المطبخ "

وصال : كنت عايز تقول شنو انت ؟
سراج : تلفون رزان معاكي ليه ؟
وصال " بي استيعاب سكتت مسافه حتى رد " : ليه ؟
سراج : انا البسألك ليه ؟
وصال : كان في موضوع كدا و انا شلتو منها طول شديد بس ليه السوال قصدي ؟ ولا عرفت كيف اصلاً ؟
سراج : السبب الخلاكي شلتي منها شنو ؟
وصال : سراج ما لازم تعرف دا موضوع بيني و بينها انت قول لي بيهمك في شنو الموضوع دا ؟
سراج : انتي عارفة انا قبل اجي عرسك بفترة قليله كنت شايف حساب بأسم رزة و فيهو صور كعبه عديل و كا زول بفهم في برامج الفوتوشوب الصور دي حقيقيه و ابداً ما مفبركة - و قبلها كان في برنامج فيهو فهم الدعس و كانت مدعوسة بي صور و مقاطع فيديو !
و انا وقتها ما دققت شديد لانه البلاوي دي بتلاقينا كتير
بس الملامح م كانت غريبه علي لاني كنت مطول م شفتها دا غير انه الصور بي زوايا مختلفه و من غير طرحة ! فاهمة انتي ؟؟
و ما كنت داير اظلما و مشكك اذا هي و لا لا لدرجة بقعد اعاين فيها شديد في كل مرة اشوفها ! لحد م حصل كلام بيني و بينها و قالت انه تلفونها معاك و ما قالت السبب و انا اصلاً كنت شاكي !!

وصال " سكتت ، و ما اتكلمت نهائي "

حنين : مالكم ؟؟؟

#المستشفى

__ " بتاخد في نفسها يا الله " اسمع كلامي !
الهادي : بعدين يا مروة اسي اخدي راحتك
__ لا ما بعدين يا الهادي اسي دا
الهادي : اسي شنو يا مروة انتي يا الله بتاخدي في النفس
__ مافي وقت انسب من الوقت دا ! يا الهادي انا قررت
الهادي : استغفرالله العظيم ! مصممة يعني ؟
__ ايوا
الهادي : طيب قولي
__ انت لازم تتزوج !

" الهادي قام وقف على حيلو مصدوم "
الهادي : قلتي شنو ؟
__ قلت ليك تعرس ! يا الهادي دا الجنى الكم اجهضو ؟
و دا حق من حقوقك ، لا دا ابسط حقوقك .. انت عارف انحنا لينا كم متزوجين و العرسو معانا اسي اولادهم بقو قدر كيف ؟؟
الهادي : و بعدين ؟
__ ولا قبلين و ابداً ما تراعي لي انا م عندي مشكله ، لان تقبلي بالبحصل دا ما ليها معنى غير الانانيه ! ربنا ما كاتب لي انا ابقى ام اسوي شنو ؟
الهادي : تمام
__ تمام شنو ؟
الهادي : موافق اعرس !!!

#في_جانب
!
__ انت داير شنو بالضبط كدا ؟؟
** دايرك
__ لو الجيران شافوك حتجيب لي مشاكل ، انا ما ناقصه مشاكل
عليك الله امشي من هنا !
** ما بعد ما تديني رأي !
__ تمام حنتكلم لكن ما هسي
** البمنعك شنو اسي السبب الكان مانعك اهو راح
حالياً ما عندك حجة !
__ تمام حنتكلم بس ما هنا
** وين ؟؟
__ ياخ هففففف ممكن تمشي عليك الله امشي
** تمام !

يتبع …..

#استككانة🧸~

#سحر_سمير
#فاطمة_قسم_الله

رِوايات سُودانية🪐🤎!)"

22 May 2025 18:54

قصي " مستغرب وهو بناولها الاكياس " : في حاجة ؟؟
سهاد ( بي تسرع ) : ايوا ! بس ممكن بعد ازنك تدخل ؟؟
قصي ( بي استغراب و عدم تقبل ) : ادخل ! معليش بس ادخل ليه في شنو ! " عاين لي امه " : في شنو يا امي مالكم !؟ اخوات احمد قالو شي و لا عملو شي ؟؟
سهاد : قصي معليش اتفضل و خلي الباب فاتح عادي " دخلت اتقدمت قدامه ، ختت الاكياس في اقرب تربيزة "
فوزيه : تعال ادخل " دخلت و جا وراها "

قصي " دخل بالطرف ، طلع تلفونو من جيبو و بقى مركز فيهو " : انا حا اطلع دقايق و برجع حا اعمل مكالمة !
سهاد : معليش ما حأخرك كلها دقايق
قصي : معليش لازم اتصل على زوجتي
سهاد : ما حأخرك
قصي : معليش الثانيه بتفرق معاي ، برجع ليها و بجي دقايق !!
فوزية : دقت علي كانت مقلقه انت م رديت و نبهت علي اكلمك انا اتلهيت مع موضوع سهاد دا !
قصي " بي تركيز في التلفون و هو بيختو على اضانو و طالع على الباب " : ما مشكلة يا امي التلفون لقيتو صامت .. الووو ايوا حبيبي !
سهاد : !!!!!!!!!! ( قعدت بي ضيق بي طرف الكرسي )

( قصي غاب شوية و جا راجع داخل بعد خبط الباب اللي اصلاً كان فاتح )
قصي : ايوا كدا معاكي اتفضلي !
سهاد ( بدون مقدمات ) : احمد مات كيف ؟؟
قصي ( بي خنقة و توتر و عبرة و ضيق ملحوظ و سكوت لمدة ) : كهرباء !
سهاد " وقفت على حيلها لا إرادياً " : كهرباء !! يعني كلامهم صح !!!
و الكهرباء دي كيف و وين ؟؟ مش كان معاك على حد علمي ؟
قصي " بي تأنيب شديد " : احمد مات في بيتي
عندي مشكلة قديمة في صندوق الكهرباء كان اتناقشنا فيها و ما اهتمينا بيها كان بحكم ان رأيه طالما الكهرباء واصلة البيت كله ! م كان شايفه مشكله ! بعدها الكهرباء رجعت فصلت يوم جاني و دقيت عليهو و اصريت عليه و استعجلتو يجيني ! بعدها طلعت على جاري عشان اجيب منه سلم خشب و خليت احمد بيتكلم تلفون معاكي اظن و مشيت ، لمن جيت راجع لقيت امر الله حصل !!

فوزية : لا إله الا الله - سيدنا محمد رسول الله ( بتعاين لي سهاد )
سهاد ( فجأة فكت ضحكة بصوت علي ، بقت تضحك لحد ما اتحول لي بكاء و نواح بي حس عالي و تهز في روحها يمين و شمال )

يعني مات متكهرب صح !! يعني كلام اختو صح !!! يعني مات بسببك انت و في بيتك انت و انا آخر من يعلم !! يعني وجودكم جمبي طول فترة الوفاة لحد طلوعي من الحبس دا كلو بدافع التكفير و المضاراة و التأنيب مش كدا ( بتبكي ) بتبردوها على روحكم ! بالواضح كدا تقتلو القتيل و تمشو في جنازتو صح ؟
انت عارف انت عملت فيني انا شنو ؟
انت خليتني مقطوعه من شجرة اكتر حرفياً لا تالي لا والي بقيت الله و رقبتي في الدنيا دي ! عارف يعني شنو ؟ يعني بسببك انا بقيت براي ، فقدت راجلي و اخوي و صحبي و حبيبي و دنيتي كلها ! اقول يا منو لمن امرض ؟ اقول يا منو لمن اتعب ؟ اقول يا منو لمن تجير بي الدنيا ؟ اقبل وين لمن تضيق بي الدنيا ؟ هاه اقول يا منوو لمن اعمل اكله حلوة ؟؟ اقول يا منو لمن وااااااي واااااي وااااااي
اسوي شنوو انا اسي ؟ انا عايشه ليه عايشه ليه ( بقت تخبط في روحها كفوف ) واااااشقاك يا سهاد ، يا وجع قلبك يا حراق روحك - يا حراق روحك يا سهاد يا وجع قلبك اااااااه يا الله … ااااه يا يمة اااااه من نار فراقو يا يمة … اااه من عذاب الدنيا و وجع الدنياااا ….

خلاص راح - راح الوفي ، راح السند راح عمود بيتي - خلاص بيتي اتهدااا - راح الغالي رااااح يا ريتني ما سألتك و لا عرفته مات كيف المسكين واااااي يا حراق الروح واااي وااااي يا ريتني ما خليتو طلع يومها يا ريتني كان مسكتو و قعدتو في البيت واااااي يا امي واااي وجع قلبي …
" عاينت لي قصي الكان مكسور مدنقر راسو و بدعك في عيونو "
امشي اطلع براااااا يا قصي ، اطلع براا الله لا غز فيك بركة امشي اطلع برااا ….. " عاينت لي فوزية الكانت مغطية عيونها بالتوب و متألمة " قالت ليها : معليش ممكن تمشي ؟ انا ما عايزة اشوف زول فيكم هنا !!!
( فوزية جات عليها تطبطب ، زحت من تحت يدها )
سهاد : ما تلمسيني ما تهبشيني .. اطلعي برااا

فوزية ( بي انكسار شالت حاجاتها و عدلت توبا و مشت على الباب )

قصي : اوكي حا امشي و حا اسوق امي ! بس انا دقيت على سيد البيت و قال ما داير الايجار بس ، قال داير يفضي البيت خلال اليومين ديل !
فوزية ( وقفت عاينت لي قصي شديد و كملت طلعت برا ) !

سهاد " بي صدمة متدارية ورا دموعها " : ما شغلتك بالموضوع دا ! امشو شوفو حياتكم وين - امشو امشواااا …
قصي : سهاد ! استهدي بالله

فوزية ( بي حزم ) : قصي !! تعال لو سمحته !
قصي " عاين ليها و مشى عليها "
سهاد ( طاااخ رزعت الباب وراهم و بقت تصرخ و تبكي و صوتها واصلهم برا )

رِوايات سُودانية🪐🤎!)"

22 May 2025 18:54

فوزية : حسبي الله لا خجل لا حياء !! قبل البنات ديل يجو انا كنت ناوية اسألك من اهل المرحوم من ايام العزاء م شفنا فيهم زول جا شقر عليكي لكن اسي بقت واضحة !
سهاد " لذت الباب و عاينت ليها بي تساؤل مصغرة عيونا " : كهرباء شنو البتتكلمو عنها ديل ؟
فوزية : ديل دايرات يهيجوك و يضايقوك ساي يا سهاد يا بتي
سهاد : لا انا ما حاسه كدا ! ( فجأة بي انفعال و استيعاب ) قصي .. قصي وين ؟ مش كان واقف برا ؟؟؟ ناديهو يا خالتي ! ولا دقيقه حنادي انا ( جرت فتحت الباب و مدت راسها بتتلفتت ) !
فوزية : سهاد بسم الله يا بتي ! تعالي ادخلي و اقفلي الباب ، قصي مشى لمن ديل جو ! حيجيب حاجات و جاي !
سهاد : معليش يا خالتي دقي عليهو خلي يجي لو سمحتي انا لازم افهم في شنو خصوصا اني لحد اسي م كانت عندي الشجاعه اعرف حصل شنو لي احمد طول الفترة دي
اصلاً لحد اسي انا ما قادرة استوعب فكرة موتو لدرجة اني م قادرة اتكلم حتى في تفاصيل " بتنهار بالبكى " !

فوزيه : استهدي بالله … يا الله يارب .. طيب هو اسي حايجي ما مشى بعيد و بعدين انا قلته ليكي ما تصدقي كلام الطير ديل يا بتي !

#جانب_وصال !

وصال : كم معلقه سكر ؟
حنين : معلقة واحدة !
وصال : اها قلتي لي ما حتمشي معاي بيتنا يعني ؟ ما عارفه لكن انا ضد القاعدة تعملي فيهو دا !
حنين : ما حتفهميني يا وصال ، والله صدقيني الموضوع دا صعب ، صعب شديد عارفه احساس أحلاهما مُر ! يعني مترتبه عليهو حاجات كتيرة شديد فهمتي علي ؟
وصال : انا ما بعرف لكن نظرتي مختلفه و م ليها علاقه بي حبي ليك و لا عشان هو اخوي و لا عشان انتي اخت راجلي ، الشغله دي تقبل بس و في النهاية لازم تعملي حاجة تكوني مقتنعه بيها مليون في المية بس اهم شي م تخسرو بعض و اهم شي ما تتأثري بي اي كلام !
حنين : قصدك كلام منو بالضبط ؟
وصال : بصورة عامة
حنين : امممم ، المهم مبسوطة انا ، قصي ليهو فترة مواصلني علاقتنا ماشة تبقى ظريفه ! و الهادي اصلاً م مقصر و مروة كمان طوالي معاي في الواتساب لكن جنها تعلق لي على الاستوري اي حالة و لا صورة اختها تنط لي ! واقفه لي على الهبشة تشيل و تلمح نظام ماف زول في حياتك معقوله هههههه لكن والله هي عسل
وصال : مروة ههههه زولة الله انا بس شفتي بتعجبني اللدغه العندها دي ، طيبانه شديد والله ، النوع دا م تخافي منو عفوية ساي و دايرة ليكي الخير !
حنين : اي والله ربنا يفرح قلبها ! .. اها وريني ناوية تعملي شنو الفترة الجايه ، قصي و الحمدلله نقدر نقول اتحسن شديد !
وصال : م اتحسن يا حنين ، نقوم من حاجة نقع في حاجة حرفياً .. نفسيتو كعبه شديد من وفاة احمد دي ! دايرة الجد انا زاتي مصدومة لي هسي لدرجة الحوش داك قفلتو بقيت م بقدر امشي عليه ، صابرة رجالة مني ساي عشان قصي ما يتأثر !

حنين : ربنا يرحمو والله ، اصحاب ي وصال التجاوز صعب والله الله يكون في عونكم ! مع الوقت نفسيتو بتتصلح بس حاولو ابعدو شويه سافرو غيرو جو ..
وصال : فعلاً ساعية للموضوع دا شديد و الليلة ناوية اتكلم معاه ، قصي لازم يبعد فترة من هنا لازم لازم !
و اصلاً كنا مسافرين بس ياهو الحمدلله على قضاء الله و قدره .. مشيل نفسو الذنب و الغريبه مرتو لي هسي م عارفه مات كيف اظن ما قادرة تستوعب و لا تتكلم ، الدخلت فيها م مرقت تاني لي هسي !

حنين : هي دا امر ربنا ! قصي سبب م اكتر و بعدين م تدي فرصة يرتبط بالموضوع دا كتير حاولي تخلي يبعد من اي حاجة ليها علاقه بالموضوع دا !
وصال : ماقادرة انا زاتي حاسه بالذنب !
حنين : طيب يا وصال خلا ليها اولاد ؟
وصال : هئه ما والد منها ، اسي فضلت الله و رقبتها !! و شكلو عندها مشاكل مع الحوليها و امورها ملخبطه شويه ، والله اعلم !
حنين : يا حليلها والله …

" الباب خبط "

حنين : منتظرة زول ؟
وصال " بتلبس توبا " : لالا الا كان ناس بيتنا ! دقيقه حفتح الباب !
حنين " بتشيل كوبايتا من الصينيه " : سمح !

وصال " جمب الباب " : سراج ! تعال ادخل ادخل !!!
حنين " سمعت الاسم اتشرقت و بدت تقح و تخبط في صدرها ، و اتلفتت عليهم ، قامت وقفت بتعاين ليهم و بتقح " !
وصال : اشربي موية يا بت
سراج " بي استغراب " : حنين ؟؟!!! ادخل و لا امشي ؟
وصال : عوير انت ! تمشي ليه ادخل ادخل …
سراج " داخل و عينو عليها بي توتر " : بتشربو في شنو ، كمان بي قعدتكم و صينيتكم ماشاءالله … حنين كيفك ؟

حنين " بتعاين لي وصال بي تعجب " : اهلين سراج ، حمدلله كيفك انت ؟
سراج : حمدلله في نعمة والله !
وصال : نسكافيه ! اسوي ليك ؟
حنين : خلي بسوي انا !
سراج : لالا تعالي اقعدي ! بسوي انا براي
وصال : قوم طيب - شيل اللبن من التلاجة
سراج " بخت المفاتيح من يده في الكنبة و بمشي "

رِوايات سُودانية🪐🤎!)"

22 May 2025 18:54

وعلى الخير والمحبة نلتقي✎﹏﹏﹏﹏﹏﹏﹏﹏﹏

[شحتفة تخمين فى الحلقات البعد الجاية ]

"واقفة مربعة يديها بتعاين ليه"

ـــ انت لو عاوز تسديني معروف اقبل بشروطي
** ال هي؟!
ـــ نعقد صفقة؟!
** صفقة؟!
ـــ ايوة تتزوجني!!

#مندرين
#سحر_سمير
#فاطمة_قسم_الله

رِوايات سُودانية🪐🤎!)"

20 May 2025 18:01

"الخرطوم حرة...
وصوت الرصاص
صار نشيداً للنصر:(!•"

في عتمة الليل، بزغ فجرٌ من دمٍ
‏وسُمِعَ التكبير من قلبِ الألم
عادت الخرطوم حرة،
شامخة كالجبل
تُصافح نيلها،
وتغسل وجع الزمن!
هنا سقط القيد... وارتفع الوطن

‏لا تسأل كيف انتصرنا!
ففي صدور الرجالِ وقود المعركة.
وفي دعاء الأمهات سرّ الكفنِ!!:).
يا من راهنتم على انكسارنا
خسِرتم
فالخُرطوم لا تموووووووت!!!

وإن انحنَت ،
فإنما هذا  لتنهض من جديد!)

هُنا..
هُنا.. كتب الأبطال بالرصاصِ بيانهم!❤️❤️.