رثاء الاطهار للشاعرة والملا رغد البهادلي

19 October 2026 07:35

فزاعيات حماسيه لوفاة فاطمة الزهراء ع



امگابل احذاها
ونو كل ولدها امگابل احذاها
و حيدر راح حيله و ضال ينعاها


ونو و الونين امگابل الليله
و زينب صارخه نعش امي لتشيله
خلوني اون و النعش انعيله
شلون فرگاها
حاجوني احمله شلون فرگاها


حظنها حسين و الدمعات بعيونه
يخويه امنه مشت والروح محزونه
المات اويا الحنينه هذا خيعونه
كون وياها
يموت الماتت امه كون وياها


الحسن يم راسها ايصيح يايمه
العيشه اخلاف عينج يم حسن ضلمه
شلون اصبر و فگدج گلبي ايلجمه
خالي بلياها
يعميني النزل خالي بلياها


ابو الحسنين يمهم دمعته بعينه
يگلهم بويه حكم هاي الاحنينه
بعد منشوفها ولا ما ترد لينه
حيل چواها
روحي موتها امكم حيل چواها


حظن نعش الزجيه و صاح يازهره
و زينب نادته لا تلجم الكسره
بعدها اتلوع من الباب و العصره
حيل اذاها
يابويه العصرها حيل اذاها


يم حسين حد الموت ما ننساج
نلطملج يزهره و كل عزه ننعاج
شما جار الوكت نطلب عطف يمناج
كلنه بحماها
هاي امنه الحنينه كلنه بحماها



✍🏻 رغد البهادلي
ذمه عدم حذف الاسم

/channel/Ragadalbhadley

رثاء الاطهار للشاعرة والملا رغد البهادلي

18 October 2026 04:59

نعي


راحو الجانو زينة البيت
و بس للمناحه انه ضليت
اوياكم اموت اني تمنيت


ردتكم انه لعوزي و كبرتي
ما حسبت هيجي بكسرتي
ترحون وانه ابقه بنحبتي


الولد يمه يايمه

ردتك لعد الكبر عازه
اتشيل بيديك الجنازه
كسرني الوكت كسرة كزازه


ردت الولد جناز بيه
و هوه اليهم وكت المنيه
و عينه لخياته ربيه


ردتك ولي وخيمه عليهن
هذا الوكت ما رحم بيهن
شمحله الاخو من يحن ليهن


مثلي ترا شبعن مناحه
ولا ضاگن من الوكت راحه
و الكلب بس تدي جراحه


انوب اونن للصغيره
يبنيتي يالفجتج جبيره
واصوابكم ماكو نضيره


كعديت انه يم الترابه
و ادموعي على اصغاري سچابه
ومن ضيم گلبي احجي بعتابه


اطلع بالهدوم وكلساع اشمها
و اعطوركم بالروح اضمها
انه الفاكده وكثران  همها


ملابسكم ييمه هاي امسفطه
خاف بردانين اجيلكم غطه ؟


يمه يالصبيان يمه 😭😭😭



✍🏻رغد البهادلي

/channel/Ragadalbhadley

رثاء الاطهار للشاعرة والملا رغد البهادلي

17 October 2026 02:56

قصيده لعلي الاكبر ع
طور ( مات الولد مات ) للملا كرار الكربلائي
————————————————-

راح الولد راح
راح الولد راح


يايمه من جابوك الي اااه ياعلي بخضابك
لطميت حيل اعله الوجه ما حسبت لغيابك
وياك فارگني الدهر اااه يالولد بمصابك
فگدك يهد حيل
و اصرخ ايا ويل
اتمنيت وياك اندفن اااه يالولد بترابك
راح الولد راح


الفارگها ابنها يا خلگ بس تنتحب كل ساعه
متهيد لا والله ابد تبقه شكثر مرتاعه
اشبع هضم لمن مشه و گلبي جثيره اوجاعه
ويا تمنيت
الموت ياريت
شيعوده ليه امدللي ذاكه الحلوه اطباعه
راح الولد راح


شيعود ابو طول الحلو و اترد عليه ارسومه
ذاخرته للعازه الولد تالي مشه و مندومه
خلاني من بعده اون و اصرخ علي مهضومه
و ادموعي بالعين
من بعد الاحنين
اخلاف عينك ياعلي ضليت اون مالومه
راح الولد راح


اااخ شكثر فگد الضنه ما ينحمل تدرونه
ضليت اصيحن يا شبابه الرايح و محزونه
فوگ الترابه ابني شفته و امسبلات امتونه
اموذر على الگاع
يا حلو الاطباع
يا نار فگدك ياعلي حدر الضلع چانونه
راح الولد راح


ما تنطفي نار البزر وسط الگلب تجّويني
يايمه يالاكبر صحت ردتك انه اتباريني
ما حسبت هيج اضل لوحيدتي اتخليني
الرايدته عكاز
و بالموت جناز
خلاني بالهم و الهضم و افراگه امأذيني
راح الولد راح


يالعمرك ابعمر الورد اااه يالولد شو رايح
الموت لمك ياعلي يالعترابه طايح
جا شلي ابعمري بعد دمك نضرته سايح
مو زينه الاگبور
يالجنك ازهور
ناطور ردتك للكبر لو حيلي مني رايح
راح الولد راح

------------------------------------------------------
*تمت بأقلام خادمات اهل البيت ع*
*✍ آلــشــاعرة 🎤 والملا رغــد البهادلي*
✍آلــشــاعرة رغــد ام وسام الفرطوسية*
ذمة عدم حذف الاسم وغير مبرئ الذمة كل من ياخذ من الكلام وينسبه له
/channel/Omwiessam

رثاء الاطهار للشاعرة والملا رغد البهادلي

17 October 2026 02:47

هوسه جنوبيه للبنيه



شلون ابساع يمه فارگيتينه
و اخياتج يگولن راحت الزينه
بعد شيعودها و ترجع ليالينه
و شيعود السمر ذاك ومحاجينه



شيعودح بعد يالفارگيتيني

تعالي ابساع يمه سمعي اونيني

دلالي يون جا ما سمعتيني

صار صدك يمه يابعد عيني

بعدني ابعازتج ردتج تباريني


*( شيعوده .. ياطولج ليه )*
*( ماذيني .. يبنيتي افراكج )*


✍🏻رغد البهادلي
/channel/Ragadalbhadley

رثاء الاطهار للشاعرة والملا رغد البهادلي

16 October 2026 01:17

اريد الصبر منج يامولاتي يالحنينه 😭

رثاء الاطهار للشاعرة والملا رغد البهادلي

16 October 2026 00:43

يالاصغار يمه ما تردون
گلبي خلص و اتهل الاعيون
ردتكم انه بحظني تنامون


شعاجبكم ييمه من الاگبور
و البيت يوحشني ومهجور
يا ناركم يصغاري اتفور


براس الگلب ونات ضلت
وامكم بعدكم حيل تعبت
روحي گبلكم كون طلعت


والله وعلي مشتاكه لبني
و بتي مسره المرمرتني
جرعه وما موت ياوسفه بعدني


تعالو و نشدو عليه
ما كلتو امنه تضل خطيه
بعدكم ييمه شلون بيه


يبو طول الحلو حسوني يمه


غير اليروح البزر منها
اتموت والله اخيرلها
عمت عين روحي تجر ونها


ردتك ولي بالبيت يبني
تالي الزمن منك حرمني
ويلاه ويلاه ويلاه


انوب وني اعله الصغيره مسره ييمه


يمه ردتج انه لساعات موتي
اتونين و اتحشمين اخوتي
واتصيحين يمه يا بلوتي


جا منهو ليه يالصغيره
يا فجتج كلش جبيره
ضليت ادك وشلون حيره


والله ترا مشبعت منكم
للضيم والعازه ردتكم
انه بدموع عيني كبرتكم


راح الخلك و الحيل رايح
و ثوب العليه بس شرايح


ما لايگلكم نوم الاتراب
رحموني يمه گلبي انعاب
اعاتب منو ويفيد الاعتاب


رغد البهادلي


/channel/Ragadalbhadley

رثاء الاطهار للشاعرة والملا رغد البهادلي

04 October 2026 09:40

ردولي يمه انعاب كلبي
و تعبوني ييمه فوك تعبي
شلي بحياتي اه يربي

رثاء الاطهار للشاعرة والملا رغد البهادلي

04 October 2026 09:36

يمه تعالو ورحمو حالي
شفت الجهال و طار بالي
شلكم بالكبر يايمه تالي

رثاء الاطهار للشاعرة والملا رغد البهادلي

04 October 2026 09:33

مدارسكم ييمه داوموها
و امكم تعالو و صابحوها
يصغارها لا تخلوها

رثاء الاطهار للشاعرة والملا رغد البهادلي

02 October 2026 15:42

حالة انسانية
تكفلنا بها لمساعدة الشاعرة رغد البهادلي على معيشتها وبناتها وايجارها خادمة الحسين ويتيمة الابوين والها حق علينا نعينها بمبلغ يسد حاجتها وتكمل مسيرها بالحياة لأنها لاتمتلك معين يساعدها ولا راتب نشاركها بمصابها بفقد ابنها وبنتها ومواساة لها حتى لو 10 الالف او 25 كل وحده وتنطي التكدر عليه وميضيع عند الله صدقة جارية جعلوها ملاياتنا العزيزات

التحب تتبرع الها ترسل المبلغ عبر الماستر

2598821375

اختكم الشاعرة ام علي الاماره

رثاء الاطهار للشاعرة والملا رغد البهادلي

01 October 2026 23:15

متابعين قناة الشاعرة رغد لاتقصرون بالدعاء للشاعرة رغد بتها حالتها خطره وابنها مات ادعولها بالصبر

رثاء الاطهار للشاعرة والملا رغد البهادلي

23 September 2026 14:56

مكتبة دار الدعاء للنشر والتوزيع
محافظة البصرة العشار شارع المطاعم
نرجوا منكم نشر رابط القناة لتعم الفائدة للجميع

/channel/dahadert

/channel/dahadert

رثاء الاطهار للشاعرة والملا رغد البهادلي

16 September 2026 14:07

*(بسم الله الرحمن الرحيم)*


انا لله وانا اليه راجعون

اتقدم بالتعازي والمواساة الى الأخت العزيزه والشاعره الملا ام جعفر بوفاة ابنها وبهذا المصاب الجلل سأكون شريكتها في المصاب وادعو من الله ان يرحم المغفور لهُ بواسع رحمته والصبر والسلوان لذويه وبالاخص الى والدته الشاعره العلويه ام جعفر الموسوي



_ الشاعره رغد البهادلي

رثاء الاطهار للشاعرة والملا رغد البهادلي

15 September 2026 17:54

نرجو صلاة الوحشه هاي الليله

رثاء الاطهار للشاعرة والملا رغد البهادلي

12 August 2026 05:35

أنتي ملايه ؟؟🎤🎤🎤
تعالي وياي لقناة الشاعرة العلويه أم اياد الموسوي
صاحبة ديوان زينب والمحراب وعدة دواووين
اشتركو عبر الرابط 👇🏻👇🏻👇🏻

https://t.me/joinchat/-h0l4_B6FIg2ZjYy

رثاء الاطهار للشاعرة والملا رغد البهادلي

18 October 2026 19:28

قصيده لوفاة فاطمة الزهراء ع


يالشلت النعش ريض    خلي امي اودعها
بعدني مشبعت منها اريد اعتب و اسمّعها
اگلها  ليش  عفتيني
صغيره بعوز تدريني
دخيلك ياعلي ارحمني البين اهروشي گطعها


يابويه النعش خليه ساعه و خلي احاجيها
اگلها ليش عفتيني بنتج من يباريها
مو تدرين يايمه البت امها التشكيها
لو مرني الهضم و الضيم وين اهمومي اوديها
يايمه الهضم جتال
و بس فگدج چوه الدلال
بعد لو حن دليلي اعليج المحنه شلون ارجعها


ييمه الفرگه خاف اتطول ومااحمل افراگيه
ماكو وما يصح مثلج يالكلج محنيه
حنان الام منو مثله حگها اتنوح الابنيه
اااخ من الوكت يمه خذاج بغير وعديه
خذج مني الوكت شبساع
بعدها ما شفت الاضلاع
بذني ونة الزهره من الضلع يوجعها


بويه ما غفت بليل و الانفاس تلجمها
وي امي اون بهداي و طول الليل اضل يمها
يوجعها الظلع و اتصيح يابويه بحزن همها
عمت عيني على الزهره ما گدريت اطيبنها
ما صح الدوه لمي
حگي من البجي اعمي
الدنيا بدونها مره و بعدها الروح تفجعها


باجر من اضل وحدي و اشوفن كل هلي نومه
و بعيني عزيز امي اشوفه فايضه ادمومه
ولا خيمه تضل ليه و حرمهم طاره الحومه
جا ياهو التشاركني بضيم الگلب و اهمومه
اصيحن يمه لحگيلي
عزيزج عالثره شيلي
و من اعيوني اني اوياج نغسله بفيض مدمعها


الليله الهضم غاطيني اجيت و طالبه الزهره
اريدن من الحنينه كون تنظرلي فرد نظره
هاضمني الفگد و الضيم غاطيني فرد مره
نخيت و دمعتي بعيني و امشي زينب الحره
اريدن جبرتي الليله
و ضيمي هيه التشيله
الدنيا حيل اذتني و اعزازي شيرجعها


✍🏻 رغد البهادلي
ذمه عدم حذف الاسم

/channel/Ragadalbhadley

رثاء الاطهار للشاعرة والملا رغد البهادلي

17 October 2026 02:57

شلك ابنوم المگبره
يايمه يامدلولي


يايمه شلك بالگبر
و اتعوفني بهذا العمر
ردت تجيتي بالكبر
لمن تطيح احمولي


ردتك ييمه ابكبرتي
و ردتك تشيل اجنازتي
هسه عفتني ابمحنتي
و خياتك ايتچولي


ياثمر گلبي وكل هلي
محد يگلي ادللي
و الدمع من عيني ايهلي
لفگدك يضل مهمولي


مستعجل انته عاللحد
اااحاه يافگد الولد
يمرد دليلي و الجبد
و يحني غيابك طولي


لجسام اون ممنونه
و هذا العزا اتقبلونه
بجاه البقت محزونه
و بالمحشر اتحضرولي

✍🏻 رغد البهادلي

/channel/Ragadalbhadley

رثاء الاطهار للشاعرة والملا رغد البهادلي

17 October 2026 02:56

شلج بالتراب الحار
يالبعدج اصغيرونه


اسم الله اعليج يايمه
الترابه وجهج اتضمه
و فگدج للگلب هضمه
وروحي تضل محزونه


يالفگدج جوه كلبي
راح الربه وكل تعبي
اصيحن اااه ياربي
من رحتي يمزيونه


يمه امعجله رحتي
ومن هالدنيه ما شفتي
يمه گلبي اشلعتي
شفت طولج يدفنونه


راحت ثمر دلالي
و بس النوح يحلالي
وين انطي الوجه تالي
و بذكراج هضمونه


صغيرونه وشلج بالموت
يمه ما الج كل صوت
عفتي امج تون بسكوت
و طول العمر محزونه


اريد الطم لبت حسين
صغيرونه و لحگها البين
من ونت شلون اونين
و نيرانها چانونه


✍🏻 رغد البهادلي

/channel/Ragadalbhadley

رثاء الاطهار للشاعرة والملا رغد البهادلي

17 October 2026 02:44

دنياي كلش تعبتني
فرهدت بزري وضيعتني
ومن المحنه احرمتني


مهضومه ما هودت ساعه
و دلالي ما بطل نواعه
محد تون يمي بفجاعه


راحو اصغاري و جوو گلبي
و راح الربه و ضيعت تعبي
ياهو اليه ااااه يربي


ااااخ الوكت فرهدلي الاصغار
وامساهره ليلي و الانهار
تمنيت احلم بالذي صار


كلساع اكولي شلون ولدي
بديرت غرب محد العندي
ياناس جرح الگلب يدي


شلونكم جوه الترابه يايمه


يم گبوركم گعديت يمه
ما حصلت بس المغمه


گعدولي يمه كافي النوم
خربت معانيكم و الارسوم
افراكم حملني اهموم


والله تعبت ومالي والي
رحموني كافي شلون تالي
خلها ترد ذيج الليالي

مالومه و عماني افراگ بزري 😭😭


الله يعين امكم يالاشباب
شحال ليلى ورمله و ارباب
من ضيعنهم فوگ الاتراب


انوب اون لولاد الحسين
و انعه وانوح و تدمع العين
من صاح يولادي يحلوين


يمممممه
ثاري البزر ماكو اعز منه
و افراگهم كلش اتعبنه
يجوي الگلب نيران چنه


الله يعينج يالعقيله
لمن فگدتيهم بليله
و ضيمج جثير ومن يشيله


عفتي الولد لحسين رحتي
اتدورين اخوج احذاه گعدتي
من شفتيه يزينب شنهو گلتي


الليله طالبتج يحره
اريد الصبر منج و نظره
خلص گلبي وداعة الزهره


✍🏻رغد البهادلي

/channel/Ragadalbhadley

رثاء الاطهار للشاعرة والملا رغد البهادلي

16 October 2026 01:15

فزاعيه لفاطمة الزهراء ع
......


الونة اتلوگلج بت سيد الكون
عليج الناس حزنانة ويونون


الونة اتلوگلج يالزهره هاليوم
اريد انعه لمصابج گلبي مهضوم
يالزهره دخيلج شيلي الاهموم
( ماذينه .. يالزهره امصابج )


نون اعليج يم حسينه كلنه
وي زينب ندگ ونصيح يمنه
اويلي اعليج يالكلج محنه
( مهضومه .. شلتي من اديارج )


احزام ايلوگلج واندگ على الهام
وي زينب ندك و انعين الايتام
وابو الحسنين جفنه الليله ما نام
( و ينعاها .. يازهره ايصيح )


حگ الفارگ اينوح و يدگ حيل
و يضيك الخلگ منه و يركد الحيل
و وكته بس ونين ايخلصه واعويل
( تچوينه .. يانار الفرگه )


✍🏻رغد البهادلي
/channel/Ragadalbhadley

رثاء الاطهار للشاعرة والملا رغد البهادلي

05 October 2026 18:51

ييمه الليالي صارن هواي
حرمتوني المنام و شربة الماي
و من البجي هالطفت عيناي


محد مثل ضيمي يالاصغار
عفتوني وحيده و ناطره انطار
اكولن تجوني و تنطفي النار


يا ناركم يمه لهيبه
و كلبي ما يحمل مصيبه
ضليت لوحيدي غريبه


غريبه وجاراتي غرايب
ومالي بهل نزله حبايب
بس انتو و اسكنتو الترايب


تدروني مريضه شلون بيه
من الضيم مالي قابليه
جا هيج فريتو من اديه


فريتو مني فرة الطير
لالي ولي ولاعندي اجبير
گطّع دليلي افراك الاصغْير


ردتكم للعازه تچيه
من اكبر بس انتو اليه
رحتو يمن سوده عليه


رحتو ييمه شلون روحه
و الفارك ضناه تنسحن روحه
وكلبي بعد ثگلن جروحه


اشم بالملابس وانعه كلساع
مالوم الامضيعه اصغار بالگاع
والله اشتريكم كون تنباع


والله اشتريكم بعيوني الاثنين
وحتى الروح اسومنها يحلوين
ياكون ميته و انتو عدلين


✍🏻رغد البهادلي

رثاء الاطهار للشاعرة والملا رغد البهادلي

04 October 2026 09:39

وين انطي وجهي من مشيتو
ياحلوين مني اتفرهديتو
كون ميته و انتو البقيتو

رثاء الاطهار للشاعرة والملا رغد البهادلي

04 October 2026 09:35

ملابسكم ييمه حضرتها
و عيوني يويلادي نشفتها
جيف اوجوهكم ماني شفتها

رثاء الاطهار للشاعرة والملا رغد البهادلي

02 October 2026 23:14

قران بصوت المنشاوي

نسأل الله تعالى ان يعطيها القوة والصبر اكثر ويبرد كلبها الشاعرة رغد البهادلي
ويجعل هذا الاختبار دخولها للجنه 🤲🏻🤲🏻

رثاء الاطهار للشاعرة والملا رغد البهادلي

02 October 2026 12:11

انا لله وانا اليه راجعون
توفت بتها مسرة اليوم الصبح چانت حالتها خطره وماتت

الله يصبرها ويقويها على فكدهم يعينچ الله اخيتنا رغد البهادلي مصابچ مفجع عيوني
تمسح على كلبچ الزهراء خيتي 🤲🏻😭😭😭😭

رثاء الاطهار للشاعرة والملا رغد البهادلي

01 October 2026 23:15

كل نفس ذائقة الموت

انا لله وانا اليه راجعون

اعزي الشاعرة رغد البهادلي بوفاة ولدها حسين الذي يبلغ من العمر 9 سنوات الذي وافاه الأجل بحادث مؤسف يجرح القلب
اللهم يصبرها على فقده الولد الوحيد الها عالبنات
ونسألكم الدعاء لأبنتها مسرة حالتها خطرة بالمستشفى 💔😭
مصيبة حلت عليها اسأل الله ان يصبرها من صبر رمله وليلى وزينب ع

اختكم الشاعرة ام علي الإماره

رثاء الاطهار للشاعرة والملا رغد البهادلي

16 September 2026 14:22

اللهم صل على محمد وال بيت محمد وعجل فرجهم الشريف ياالله 🤲
🌺 قصيده للشاب ( للقاسم ع ) 🌺
اهدي ثوابها الى روح المرحوم الشاب ( سيد جعفر الكديماوي ) ابن العلويه ام جعفر الموسوي
————————————-———

الامضيعه الولد الله اليصبرها
مهدومه تضل مكسور خاطرها
دوم اتون ترا و تعمه نواضرها


*يا يمه شلت و العين تعميها*
*روحي فرگتك يالولد تگضيها*


تعمه اعيونها امك يبني يمحسر
ردلي ابساع يمه لفرگتك مگدر
روحي ما تهيد و بيش تتصبر
و هاي اثيابك اااه يبني اصد ليها


اشم بهدومك اه يالولد مهضومه
عفتني ابعازتك و الروح ملجومه
ردلي اشبيك يبني و عوف هالنومه
جا ياهو يضل لمك يباريها


گوم ابساع يبني و انته باريني
لا ترحل ييمه ولا تخليني
ثجيله فرگتك والله بعد عيني
خذاك الموت مني صعبه احجيها


ازفك للمكابر يابعد عمري
و ريت الحفر گبرك هم حفر گبري
خذت حيلي ييمه و انكسر ظهري
و اشوف ارسومك التربان غاطيها

—————————————————
لخادمة اهل البيت ع ✍️الشاعره 🎤والملا رغد البهادلي
ذمة عدم حذف الاسم وغير مبرئ الذمة كل من ياخذ من الكلام وينسبه له
/channel/Ragadalbhadley

رثاء الاطهار للشاعرة والملا رغد البهادلي

16 September 2026 13:57

#مطبعة_المهيمن

للمصداقية والعمل المتقن

قناة لنشر دواووين الشاعرات لكل اصدار جديد ينزل بالفناة ان شاء الله
نطلب منكم الأشتراك ليصل لكم كولشي جديد
لدينا توصيل لجميع محافظات العراق التواصل عبر رقم المكتبة

07707983011
07801182354

الأشتراك بالقناة من هنا ⬇️⬇️

/channel/lMuhaimin

رثاء الاطهار للشاعرة والملا رغد البهادلي

15 September 2026 17:50

بسم الله الرحمن الرحيم

ببالغ الحزن والاسى تلقيت خبر وفاة الشاب ( سيد جعفر الكديماوي ) ابن الاخت الشاعره العلويه ام جعفر الموسوي

رثاء الاطهار للشاعرة والملا رغد البهادلي

09 August 2026 08:02

قصائد حزينة ومنوعة تجدوها بقناة الشاعرة المتألقة العلوية فضيلة هاشم الموسوي
بحثت عن رابط قناتها وحصلته وكلت انزله الكم حتى تشتركون بقناتها وتستفادون

اشتركي ولاتترددين من الرابط

👇🏻👇🏻👇🏻

/channel/dmoh91

/channel/dmoh91