-
مهد تمدن گونده‌لییی‌نین تورکجه اوشاق ادبیاتی صفحه‌سی
⭕️Qar qızın nağılı / Səsli nağıllar
⭕️قار قێزێن ناغێلێ❄️☃️ / سسلی ناغێللار
🔷ناغێللار! اۇشا‌قلار و یئنی‌یئتمه‌لر ایچۆن! (آذربایجان تۆرکجه‌سینده جیزگی فیلملر)
@MuncuqAz
/channel/Sancaq_media/5935
⭕️آناسێنێ سئویندیرن قۇش بالاسێ
🔹بیرینجی و ایکینجی بؤلۆم
✍یازیب، سسلندیرین: #عزیز_سلیمانی (آراز)
@MuncuqAz
⭕️علم یاخجی‌دیر یا وار دولت؟
✍یازان: #فاطمه_خوش‌اخلاق
دئمک اوْلار هامێمێز مدرسه زمانی، «علم یاخجی‌دیر یا وار دولت؟» عنوانلی انشا یازمێشێق. اوشاقلارێن چوْخۇ، لاپ ایلین اوّل آخێری کتاب اۆزۆ آچمایانلار دا، معلّمه شیربازلیق اۆچۆن علم یاخجی‌دیر یازاردیلار.
من ده دؤردۆ اوْخویاندا بئله بیر انشا کی، اۆرک سؤزلریم ایدی یازدیم.
🔹علم یاخجی‌دیر یا وار دولت؟
چوْخ دۆشۆندۆم. سؤزۆن دۆزۆ بیلمه‌دیم هانسی یاخجی‌دیر. آنجاق بۇنو بیلیرم کی، «وار ائوی کَرَم ائوی، یوْخ ائوی درد و ورم ائوی‌دیر.» یعنی آتامێن پۇلو اوْلاندا کِیفی ساز اوْلار، آناملا دئییب گولر، بیزیمله گۆل – گۆل اوْینایار. قوْهۇم، قوْنشۇنون آیاغی بیزدن کسیلمز. چوْخلاری بیزیم ائوده کَنگر یئییب، لَنگر سالار. آتامێن پۇلو اوْلاندا کۆچه، باجادا هامی ایکی قات اوْلوب، آتاما سلام وئررلر. مجلسلرده خِیر اوْلا یا شَر، آتامێ لاپ یۇخاری باشدا آغ‌ساققالارێن یانێدا اوْتۇردارلار. آتامین پۇلو اوْلاندا......
اما گاهدان ایشلر یوْلۇندا گئتمیر و آتامین پۇلو اوْلمور.
آتامێن پۇلو اوْلمایاندا قاش – قاباغلی اوْلار. آنام ایله دئییشَر. آنام «یئر برک اوْلسا اؤکوز، اؤکۆزدن بیلر.» دئییب دریندن بیر آه چکر. آتامین پۇلو اوْلمایاندا قاپێمێزێ دؤڲن اوْلماز. قوْهوم، قوْنشۇدان خبر اوْلماز. آنام «باغدا اریک وارایدی سلام‌علیک وارایدی؛ باغدا اریک قۇتاردێ سلام‌علیک قۇتاردێ.» دئییر.
خلاصه من بیلمیرم علم نه‌قدر یاخجی‌دیر، آنجاق پۇل اوْلمایاندا هیچ زاد اوْلمۇر. اؤز آرامێزدا قالسێن دۆنن گئجه آتام منه باشماق آلماسایدی، بوگۇن بۇردا انشا اوْخۇمایاجاقدێم.
سوْن
@MuncuqAz
/channel/Sancaq_media/5655
⭕️تاپماجالار
✍حاضرلایان: #تانسو_خیاوی
آشماز – اۇشماز،
یئره دۆشسه،
بئلی سێنماز.
🔸جواب: یارپاق
اَڲنینده یاشێل دوْنۇ،
دامارلارێ گؤرسه‌نیر.
🔸جواب: یارپاق
اینَـڲیم وار ائشیکده‌دی،
آیی، ایلی ائشیکده‌دی،
ایلده بیر دفعه ساغێلار،
اؤزۆ یئنه ائشیکده‌دی.
🔸جواب: باغ
اۇزانار، ها اۇزانار،
قوْل‌لارێندان بالالار.
🔸جواب: آغاجلار
اۇزۇن اۇزۇن اۇزانار،
آل یاشێلا بوْیانار.
قیرمیزیدان دوْن گییَر،
عرش اۆزۆنه اۇزانار.
🔸جواب: آغاج
یاغیش یاغاندا،
چیمَر، یۇیۇنار.
یازدا گئیینَر،
قێشدا سوْیۇنار.
🔸جواب: آغاج
قات قالاسێ،
جان پیالاسێ.
اۇچدۇ آناسێ،
قالدی بالاسێ.
🔸جواب: سامان – بۇغدا
عزیزیم قارا نه‌دیر؟
قاش اۆسته قارا نه‌دیر؟
گؤنۆ گؤڲ، اَت قیرمیزی،
سۆمۆڲۆ قارا نه‌دیر؟
🔸جواب: قارپیز
هانسێ توْپ هوْپپانمیر؟
🔸جواب: قار توْپۇ
هانسێ باغدا اۆزۆم یئتیشمَز؟
🔸جواب: آیاق‌قابی باغێندا
ان گؤزل قوْخان فیل هانسێ‌دێر؟
🔸جواب: قَرنفیل (میخک گۆلۆ)
هانسێ یازێ سیلینمَز؟
🔸جواب: آلێن یازێسێ!
هانسێ قابا سۇ قوْیۇلماز؟
🔸جواب: آیاق‌قابی
@MuncuqAz
/channel/Sancaq_media/5933
⭕️آناسێنێ سئویندیرن قۇش بالاسێ
✍یازان: #عزیز_سلیمانی (آراز)
ایکینجی بؤلۆم
دیلینه گتیرمه‌دی، دئدی «بیردن یوْلداشیم اینجییَر.»
بیرآز ناراحات اوْلۇب، بیر داش اۆستۆنده اوْتۇردۇ. داها آتا آناسی اوْنا چوْخ باش چکمیردیلر. اؤزۆ تاپیب، اؤزۆ یئییردی. آنجاق بیردن دوْنۇخۇب قالدی. باغا بیر ائونه یوْل گلیب، قۇش‌بالا یوْلداشینی ناراحات گؤردۆ. «بالا ندن ناراحاتسان؟» - دئدی. قۇش‌بالا دوْلۇب، بیرآز دا بوْزاریب «واللّه یوْلداش سنه گوْره دئمیرم، آنجاق اۆرڲینه آلما، من هله بیر یاش اوْلمامیشام. من هئچ نه بیلمیرم. تجربه‌م آزدیر، من نئچه یاشایارام گؤره‌سن؟!» - دئدی.
باغا «آی بالا سن بیر قۇشسان، من بیر باغا، سن هاوالاردا اۇچۇرسان، من یئرده ایمَکله‌ییرم. اوْندا من ناراحات اوْلۇم نَدن اۇچا بیلمیرم!» - دئدی.
سوْنرا آرتیردی، «هئچ دئمیرسن سنی آنان بئله گؤرسه دیغلایار. دۇر آیاغا، دۇر الینی الی‌نین اۆسته قوْیما!» آنجاق قۇش‌بالاسی یئنه کۆسڲۆن ایدی. باغا اوْنو تئز تئز دیندیردی، بیر یارپاق اوْنا یارپیز گتیردی. «دۇر آیاغا! گؤره‌سن نه یئییبسن حالین قاریشیب؟» - دئدی.
اوْدا بیر هؤرۆمچک اۇدمۇشدۇ. دئمه زَهری اوْنو بئله‌جه یاوالادیب! باغا تئز بیر یارپاق دا آغزینا کهلیک‌اوْتۇ قوْیدو، «دۇر داها ساغالدین.» - دئدی.
دوْغرۇداندا قۇش‌بالاسی ساغالمیشدی. داشین اۆستۆندن یئره قوْنۇب، تئز بیر سیلکینیب، یئری ائشَنه‌کلییب، بیر سوْخۇلجان تاپیب آغزینا آتدی. سوْنرا بیردن بئینینه بیر شیء ایلدیریم کیمی شاخیدی. اۆز تۇتۇب باغایا «آ یوْلداش! ایسته‌ییرم آنامی سئویندیرم.» - دئییب، اۇچدۇ اوْخۇیا اوْخۇیا گئتدی.
من بیر اَچجی بالایدیم
مێندار تۆکۆم تؤکۆلدۆ
یئکه‌لدیم پرواز اوْلدۇم
یۇردۇم یۇوام سؤکۆلدۆ
«قانادلاندیم اۇچماغا»
گؤڲدن جۇمدۇ اؤترگی
قوْندۇم یئرده گیزلندیم
ایلان سۆزۆلدۆ گلدی
نم‌نم یئییب دیرچه‌لدیم
جیپ جیپ جیپ جیپ اۇچدۇم من
گؤردۆم کی قیرغی گلیر
لاپ سرعتله قاچدیم من
ایستیرم سئویندیرم
آناملا آتامی من
بیرجه چریککه تاپسام
وئریب دییَرم هِللن
جیپ جیپ جیپ جیپ چریککه
دایان دیلیمی دیشله
شوْبه شوْبه اوْینایاق
گؤزۆنۆ یۇم گؤرۆشده
اوْردان اوْرا قاچیردی، بۇردان بۇرا اۇچۇردۇ! ایسته‌ییردی لاپ یئکه چریککه تاپسین. چریککه ده گیزلَنیب، گؤزۆنه گؤرۆکمۆردۆ. سوْنرا ایسته‌دی بیر یئکه سوْخۇلجان تۇتسۇن! آختاردی بیر بالاجاسینی تۇتدۇ. یوْلدا گتیرنده آجیخدی دییه، اوْنۇ دا اؤزۆ اۇددۇ. یئنیدن قاییدیب بیر بیزوْبۇرنۇ* تۇتدۇ. اوْدا دیمدیڲینی دیشله‌دی دییه اوْنو دا گتیرنده آجیغا اؤزۆ یئدی. سوْنرا «آناما سۇ آپاریم.» - دئدی.
زینه بۇلاقدان سۇ گؤتۆردۆ. گئدنده یوْلدا ایستی‌لَدی دییه سۇیۇ دا اؤزۆ ایچدی. یئنه ناراحات اوْلدو، گلدی همان داشین اۆسته قوْنۇب، قیزاریب بوْزاردی. باغا گلیب یوْلداشینی دیله تۇتدۇ. اوْلاجاغی سوْرۇشدۇ. قۇش‌بالا دا باشینا گله‌نی دئدی. سوْنرا باغا گۆلۆب گۆلۆب، «آی باشی خِیرلی! سنین آتا آنان اؤزلری چوْخ زرنگ اوْوچۇدۇلار، یوْخسا سنی نئجه یۇمۇرتادان چیخارتدیلار؟ نئجه گؤزلرین یۇمۇلۇ اوْلارکن بئجردیلر؟ دۇر دۇر آیاغا، خَلقی اؤزۆنه گۆلدۆرمه! اوْنلارا سنین تکجه گۆلۆشۆن لازمدیر. اوْنلار نئچه دَنه ده سنین کیمی بالا بؤیۆدوۆبلر. دۇر گئت اوْنلارلا خوْش بئش ائله، اۆزلرینه گۆل، قوْی سنه باخیب فرحلَنسینلر.» - دئدی.
قۇش‌بالا باغا ایله ساغ‌اوْللاشیب، تئزجه اوْخۇیا اوْخۇیا یوْلا دۆشدۆ.
من بیر اَچجی بالایدیم
مێندار تۆکۆم تؤکۆلدۆ
یئکه‌لدیم پرواز اوْلدۇم
یۇردۇم یۇوام سؤکۆلدۆ
«قانادلاندیم اۇچماغا»
گؤڲدن جۇمدۇ اؤترگی
قوْندۇم یئرده گیزلندیم
ایلان لامَصّب گلدی
نم‌نم یئییب دیرچه‌لدیم
جیپ جیپ جیپ جیپ اۇچدۇم من
گؤردۆم کی قیرغی گلیر
لاپ یئیین قاچدیم من
گۆلۆب سئویندیره‌جم
آتاملا آنامی من
اوْنلار خوْش اۆز ایسترلر
یوْخسا نئیلیر اوْنلار دَن
۱۴۰۲/۵/۱۰
🔹آچیقلاما؛
بیزوْبۇرنۇ: (Bizoburnu) تۆرک دیلینده بیر بؤجک آدیدیر – آبدُزدَک
#سون
@MuncuqAz
/channel/Sancaq_media/5928