https://youtu.be/qX1n0UQGpr4
📜ياسيدي
🎙الملا مرتضى العسكري
✍️حسين سعد البهادلي
هاي صعبه
هواي صعبة
مدللة حيدر واخوها
تنولي والدنيه غربه
هواي صعبه
تمشي وتعوف الحنين
والدرب خوف ونين
وصوت تسمع خويه زينب
خويه زينب
منكسر صوت وحزين
ومختنگ چن بيه سهم لكن تعرفه
ثاري هذا صوت گلبه
خويه زينب صوت گلبه
هواي صعبه
الراسمة صورت جماله
جوه فص البيه تشوف
وعينها شابحه العينه
شلون جسمه من تعوف
وتسمع اصوات الحوافر
وامنية مكسوره خاطر
ما اجنه
ها جزنه
لا اجنه
عشرة خيل اتدوس صدره
اوذرت جسمه السيوف
وتمشي عنه بناگه هزله
هيه لتعوف الهواشم.. ميته عدلة
ياهو اسئلة؟
بله زينب ميته عدله!.. ياهو اسئله!
وتمشي زينب ويه غربه
هواي صعبه
تمشي وتضيع اخوها
تمشي وتنادي اخوها
حسين خويه
حسين خويه
تمشي لاخر نضرة بيها
ومن نضرها ايضيع دربه
هواي صعبه
هوه مو عام اليكبر
لويتعب عام زينب
من ركض ذاك المخيم
بيوم تل الها تحزم
من مشت عنه بهظمهه
كلشي زينب بيها شيب
هواي صعبه
وركضة الخايف عجيبه
الحيل الها منين اجيبه
بلهفه تركض
وخيل تعرض
تركض لجثه سليبه
وتدري بس هيه طبيبة
الحيل الها منين اجيبه
وحيلها يرد بأخوها الشوف طلبه
هواي صعبه
وجانت هوايه جبيره
هاي اخت شيخ العشيره
ياعشيرة هيه هم ضلت عشيره
الينعرف من تالي اسمها
واشرت كلها عليها
هاي زينب
تالي تطلع بس اسيره
ومابقت لا راية عدها ولا عشيره
الضاع بين الناس عرفه
بله ياهو ايزيح تعبه
هواي صعبه
بلحظه يتغير اسمها الهاشميه
صار عالنوگ السبية
هنانه صار اعظم سؤال
شنهي ياعمه السبيه
تكلها عمه
يعني مذبوحه زلمنه
يعني من عفنه خدرنه
يعني لا طلاب عدنه
هيج ياعمه السبيه
هيج ياعمه رقيه
هواي صعبه
يالعقيلة
سفرتچ موت وطويله
الشام ما يرحم اسيرة
اتحضريله يالاميره
هضمة من اخت الهواشم
تتجه ليه ابمساره
اتحضري للوكفه والهم والحجاره
وماتصير هناك چاره
وساعه ساعه
وگفتچ بيه ساعه ساعه
تباوعلكم شبيته ولحد زغاره
هواي صعبه
شلون علويه تطبله
الشام يكره طاري ساده
وليطبله ابلايه اخوته
بيه يموت
عنده عاده
بيه يموت
ومن يموت
مايشيعه والجنازه بلايه صوت
هاي صعبه
هواي صعبه
حسين سعد البهادلي
/channel/Hussein_s_b
(هم فاطمه)
جاء في حديث الكساء.. قال الأمِينُ جبرائِيلَ: يا رَبِّ وَمَن تَحتَ الكِساءِ، فَقالَ عَزَّ وَجَلَّ: هُم أهلُ بَيتِ النُّبُوَّةِ وَمَعدِنُ الرِّسالَةِ،*هُم فاطِمَةُ وَأبُوها وَبَعلُها وَبَنُوها.
يا ربي من تحت الكساء
جبريل يسئل بالسمه
والله اختصر كل الحچي
تحت العَبا هُم فاطمه
هم فاطمه.. رايد يوضحله ويگول
هم فاطمه.. التحت الكساء كلها البتول
هم فاطمه.. لو ما هيه كلشي يزول
ما كان او ما سيكون من نور فاطم انعجن
كلشي انخلق حي وجماد لخاطر عيون ام الحسن
يا فاطمه.. يافاطمه.. لبيكِ يا أم الحسن
___
وفي الحديث القدسي(قال الله تعالى) «يا أحمد لولاك لما خلقت الأفلاك، ولولا علي لما خلقتك،*ولولا فاطمة لما خلقتكما»
كلشي انوجد نعرفله حد
بس فاطمه ابلايه حدود
طٰه وعلي خير البشر
وبفاطمه تم الوجود
هم فاطمه.. الله اليحدث بالسما
هم فاطمه.. للنبي وحيدر مُلهما
هم فاطمه.. لولاها ما خالقكُما
يا رحمة الله اعله الارض وبيها انعرف ربها الرحيم
سُبحان ما صور بها من غيرهُ يخلق عظيم
يافاطمه.. يافاطمه.. لبيكِ يا أم الحسن
____
قال الإمام الحسن العسكري ع : نحن حجج الله على خلقه وجدتنا فاطمة حجة علينا
لا تخلوا من حُجه ابد
ما تستقر هاي الارض
وهية الاميره اعله الحُجج
الها الارض طول ابعرض
هم فاطمه.. نور الامامه انمزج
هم فاطمه.. بيها وبديها أنسج
هم فاطمه.. ياحُجت الله اعله الحُجج
مستودع وسر الاله بيها يجن حتى الجنون
وكل الأئمه بالعُلا ابفاطمه يتوسلون
يافاطمه.. يافاطمه.. لبيكِ يا أم الحسن
____
ورد عن النبي محمد أنه قال: فاطمة بضعة مني، يرضى الله لرضاها، ويغضب لغضبها.
وكانت إذا دخلت عليه قام إليها فأخذ بيدها وقبلها وأجلسها في مجلسه،
چان النبي بيها يگول
امي وبضعتي اصبحت
وما يرضى الله اعله الخلق
الا اذا هيه رضت
هم فاطمه.. كل نور الها ينتسب
هم فاطمه.. المعصوم منها وينحسب
هم فاطمه.. الله يحب كلمن تحب
يا أم ابوها وعصمته وكل الفضل الها يدوم
ولمن تگصده فاطمه چان النبي بكبره يگوم
يافاطمه.. يافاطمه.. لبيكِ يا أم الحسن
____
وقالت فاطمة(عليها السلام): أنا الشجرة التي تخرج أُكلها
وتعني الحسن والحسين عليهم السلام
فالسلام عليك يا ممتحنة امتحنك الذي خلقك قبل أن يخلقك وكنت لما امتحنك صابرة".
عله وسبب واصل اي جذر
الها يعود وكل عظيم
باچر يصير ابما تشاء
هيه السراط المستقيم
هم فاطمه.. انطاها الحُسين اويه الحسن
هم فاطمه.. بضعتها اسياد الزمن
هم فاطمه.. بيها امتحن كُل مُمتحن
يا شجرة الجنه التي يؤتي اُكولها كُل حين
لو عشتي اكثر فاطمه ثمرج فقط مثل الحسين
يافاطمه.. يافاطمه.. لبيكِ يا أم الحسن
_
حسين سعد البهادلي
/channel/Hussein_s_b
(خلو ابن عمي)
مابين حايط والضلع
ومابين بسمار ودفع
أبفاطمه اكثر وجع
وأكثر اله صبت دمع
شنهي الي هاظم فاطمه
وشبيها تهتز السمه
رفعت اديها للعرش
وجفوفها مخضبه دمه
حيطان دار الزهره ارتفعت
والسمه جنها اعله الارض وگعت
طلعت تگاود روحها گوه
مفزوعه فاطم ساعة الطلعت
خلو ابن عمي
لو ادعي ربي
وصرخ يلاهي
واشكيله وضعي
وخسفها بيكم
هاي الوطيه
وتدرونه ربي
يغضب اليه
تصيح خلو ابن عمي حيدر
____
رجليها چم خطوه مشن
تتوجه ابجتف الحسن
تتبع اثار العلي
مايمشي لضلوعه انحن
وبسوط ردلها الدعي
يضرب اميره وبت نبي
دار الزمن وي فاطمه
ويگلها دارچ أَرجِعي
ومن سطرته بنت الهدى طاحت
يا بويه ادركني بهظم صاحت
عد العرب ما ضلت اي شيمه
وناح الحجر من فاطمه ناحت
حيدر سمعها
وفزت حميته
وگلبه تفطر
تجتفه وصيته
لولا الوصيه
چا يمحي الكون
ولا يسلم احد
من اليحرگون
تصيح خلو ابن عمي حيدر
____
وسلمان يا فاطم يگول
آمرني حيدر يالبتول
لدارچ ادخلي ابلا دعاء
خايف على الدنيا تزول
الله لدعائچ يستجيب
وبالارض غيض الله يصيب
چان النبي رحمه وهدى
لا تُهلكي قوم الحبيب
لو ما أمر حيدر ولا ردت
وايديها بتراب الثرى خطت
مكسورت الخاطر على الكرار
ومحنيه، ضلع الي انكسر لزمت
وحتى نفسها
يلچم ضلعهه
بس حيدره چان
اكثر فجعهه
بردتها للدار
تشكي لأبوها
عن زمرت الگوم
العگبه أذوها
تصيح خلو ابن عمي حيدر
____
أذوها فاطم بالعصر
ودخان خانگها وكسر
بسمار ما يرحم لفه
لا طفل يرحم لا صدر
جانت فقط حيدر تريد
بس علي مگيود وبعيد
ومظهومه تعتب ماشفت
ياباب طاح ابني شهيد
وشكد مصايب لمت العصره
ذبلت ونحلت ما چن الزهره
فضه اسنديني من تريد اتگوم
ناح العرش لمصابهه ابكبره
رادت وليها
ومارادت البيت
وضل ينعى فاطم
كل سادت البيت
ضلت بالمها
مطروحه بالدار
يا ربي اصلي
العذبها بالنار
تصيح خلو ابن عمي حيدر
____
حسين سعد البهادلي
/channel/Hussein_s_b
صيحة العطش
وشحة النعش
وليلة احدعش.. مصايب عجيبه
غربة الزغار
ودنيه كلها نار
وماكو الها دار... فواطم غريبه
وتطلع علويه بحيره مدري الوين
ادور تتعب وادور وين حسين
دخان وهيمه وضلمه شلون اتشوف
وضاع الشوف اوي اخوتها وعميه العين
طلعت يخوها الخفيتوا بأثرها
وتعوف الخيام عگب في خدرها
الماشافت اجناب تگرب يسرها
___
جانت التريد
عنها مو بعيد
بس درب يريد.. قوى وحيل
تگطع الدرب
عالحرم صعب
ونضرت الغرب.. وركض خيل
تركض لو عالتل تصعد حيره ام عون
تركض هيمه ولو تصعد ناس اعيون
صاحت ياخويه ادركني ومات الصوت
ولو ترجع نار بخيمه هاي شلون
احتارت نضرها عليمن تديره
وياهو التندهه وضحايا العشيره
الما الها فزاع تَصبح اسيره
____
خويه ياحُسين
وجهي بله وين
امشي يالحنين.. تحاجي اخوه
شافت الرمح
وبتده الجرح
وتدري الصبح.. تماشي عدوها
طول ياليل اتكله وارحم حال
الماعدهن ضلت خيمه وفوك ارمال
الصبح الميتين اخوتها من تنشاف
تمشي بناگه ومن تمشي بجفها احبال
ستر بضلامك وخيمنه عبينه
وخل نمشي ياليل نروح الولينه
بيه ضايع الشوف ونضيع ابمشينه
____
باچر الضياع
ونضرة الوداع
للدرب متاع.. ابمشي النوك
يعوفن الدخيل
وماكو بس عليل
والدرب طويل.. ابتده ابسوك
باجر لا خدر ورايه لا عباس
بدرب ايتيه الجماله وغربه الناس
يدعن الله بجف كافل يحدي النوك
حسين يندهن والرمح يهزه الراس
ضاعن بنات الرساله وسبوهن
من في خدرهن يماشن عدوهن
وليه الفواطم يهاشم ولوهن
______
لا رايه ولا عباس راعي الخدر وطلابه
وينوحن من عل النوك آه يحسين ومصابه
عافن واليهن هيج طايح والدم خضابه
ومسلب والحدايه همه الجانو سلابه
ويعلى النوح ويتعتمد حاديهن كلما سكتن
يرفع رمح الواليهن كلساع ويمهن جابه
ماتن حسره بلهفتهن امن يشوفن راس الغالي
عرفن ضاعن ويندهن راسه ابابه ويا بابه
_____
حسين سعد البهادلي
/channel/Hussein_s_b
https://youtu.be/CJ-5LWD-ZWQ
📜رحم الله من نادى ياحسين
🎙ملا خالد الفيصل
✍️حسين سعد البهادلي
(زماني الأولي)
ابناگتي واذكر زماني الاولي
رايتي وخدري واخوتي تبره الي
چان الي كلمه وأمر
وچان الي كافل خدر
___
هسه اصبحت ذكرى وحلم ايامي وي اخواني
ابلا راية صرت ولا اخو ونار احرگت صيواني
ما طالعه لباب الخيم دهري بغرب لا گاني
وخاتم اليه بيه عرف ابچف العدو بچاني
ما لايك اعله اچفوفه
وگلبي رجف من خوفه.... هل خاتم اخذوه
وحيل اخنگتني العبره
اي هذا لَبن الزهره...... من ايده سلبوه
يعني اذا جف من نهبهم ما سلم
شحالي من امشي غريبه ابلا علم
امشي مئموره بأمر
وچان الي كافل خدر
___
الغروب چلچل عالحرم بالحومه يا كافلنه
سبحه وتطشرنه بهظم فرينه كلنه وضعنه
والخيل تركض واحنه هم والطاح ما عبرنه
ندريها عادتهن سحك يعني الوگع سحكنه
ندافع شيدفعها
هل خيل شيرجعها.... مرعوبه الزغار
نركض الشوك وهيمه
نرجع لهب بالخيمه..... وتتبعنه النار
يالمشيتو وما دريتو بالجره
بهيمه تركض تالي عدكم چم مره
گمنه نسحك بالجمر
وچان الي كافل خدر
___
مشونه عنكم بالغصب والدرب ما نندله
عالناگه يالكافل حرت چن حيرتي العلتله
علويه انه وبت نبي وكلساع خويه اتعله
والسوط اهون ينحمل بس النضر شيحمله
شافوا خدور الساده
والسبي لا مو عاده.... اعله الفواطم
والمتن خويه اتچوه
بالسوط من اتلوه...... ترضى الهواشم
وحيره حرت اعله الزغار امن العدو
وهايه ما صارت گبل مالي اخو
اليمشي كلساعه ايعثر
وچان الي كافل خدر
___
شدونه جف خويه اعله جف ياهو اندهه ويلحگنه
الحبال خشنه تضل تگص عالنوگ كل ما ملنه
هيمه ودعينه الله بأخو يلحگ يرجع ضعنه
وحادينه ما گلبه رحم كلساع ديره يمرنه
بالكوفه مر اضعوني
وگل للذي شافوني..... جبنه اسيره
ومن حشمت يالكافل
عرفوني يابو فاضل..... زينب لاميره
يهدم ابروحي لنضر لينه وفطن
الضحكه جهر ومو خفيه اعله الضعن
انضر الضحكه انكسر
وچان الي كافل خدر
______
غرب زماني الاولي وراح الدلال وعفته
فوگ النهر طاح وطحت عيني العمى ولا شفته
عباس ما بيهم عرف المثلك يفارگ اخته؟
رد حشمك كل الضعن بأسمك ندب يالجبته
عيني يصب مدمعها
يا خارجيه اسمعها..... من عالمحامل
عباسنه جاوينه
يردلي ويرد چفينه... والرايه شايل
تالي گالو يا غربيه وانتهت
والغريبه ياهو الها لو بچت
شيباني هل يسر
وچان الي كافل خدر
___
حسين سعد البهادلي
/channel/Hussein_s_b
(أي واكربلآه)
فرع جرحك الربيته عالآه.. وحرگه وي خيمهم
ضعن الله غريب بديرة الموت.. وهم عطشن حرمهم
الدمعه ذمه ابرگبت شكو عين.. ما تبچي لعطشهم
الماي التارس الكون
انمنع منهم يشربون
وسدوها الشريعه
اسياد السماوات
ما يروون هيهات
بيا دين وشريعه
بشمس وشح الفياي.. ومامش ماي.. بصيوان الهواشم
وطايح راعي الجود.. وماموجود.. عم لهل الفواطم
ــــــــــــــــــــــــــــــــ أي واكربلآه
انسى كل عمر فات ابتدي دموع.. طيح اعله المخيم
انهضم وي كل طفل لو صاح مهضوم.. الغوث ادركني ياعم
عقيدة نوحك اصل وجوهر الروح.. لو دمعك صبح دم
على ضعن الاجه براي
وبيه عباس حداي
وزينب بيه اميره
وبيه ايلوذ الدخيل
وجان يطوف جبريل
على الشيخ العشيره
بلحضه والزمن دار.. بيه اشصار.. انذبحت زلمهم
بهيمه فرت ام عون.. هاي شلون.. واحترگت خيمهم
ـــــــــــــــــــــــــــــــ أي واكربلآه
ازرع موقف ايخضر جرح بيه.. مايرتاح ساعه
بطريق البيه يبرد ما أله امچان.. وبس دمعك متاعه
دگ باب الخيم شايل حزن عام.. ارحمه من ضياعه
ابچي العلرمل طاح
وصبح ميدان الرماح
بشمس ذيچ الصحاري
وسمع صيحات الاطفال
وتبعهم شاف خيال
وفرو بالبراري
گام وعالوجه طاح.. وزينب صاح.. ياخويه ادركيهم
لمي البيه بقت روح.. والمجروح.. ذابحني بچيهم
ـــــــــــــــــــــــــــــ أي واكربلآه
باچر ينذبح كل صبح والليل.. أيعيش بالف ليله
ضعن مو بس عليل بچفه الحبال.. بچف مية عليله
لاعدهم عشيره لا اهل ليش.. وعلى الشاطي كفيله
بعد يا دنيا لتريد
سبو نسوانه ليزيد
ضعن بيت الرساله
طلع بيك نيشان
للما عدها خوان
انسبت عگب الكفاله
عيش ابحالة الموت.. وبكل صوت.. اصرخ يا غريبه
دنيا ابلايه الحسين.. تخلص وين.. بكل ديره مصيبه
ـــــــــــــــــــــــــــــ أي واكربلآه
حسين سعد البهادلي
1444هــ
/channel/Hussein_s_b
(اجيت امن النهر)
توني اجيت امن النهر
بس النهر اذاني
يازينب وكلشي انتهه
واشتم حرگ صيواني
وتوسطت بين العده
شيسوي الضل وحده
وانضره على الغبره وشفت
الميتين كلها اخواني
ياخويه قلت حيلتي
هناك وتغير لوني
سبعين الف البكربله
شافوا دمع بعيوني
مو خوف دمعي من نزل
بس كافلچ بچاني
يدري امن اجيله منكسر
گطع جفوفه بكل كتر
خاف اعثر بجف بالمشي
يتچيلي چفه الثاني
راح الستر
ياجف اشيله اتحيرت
وما اكدر اثكيل اشكثر
مدري اني ظهري المنكسر
ومابيه اشيل ارداني
عباس كتله امن وصلت
خليني اشيلك للخيم
واصفن واكله ياخيم
هوه اليضل بلا اخو
شيَحسب اتضله خيم
وكتله يخويه لا تهم
مستقبل الخيمه جمر
الما فوگهه ايرفرف علم
يمه اوصلت
توني انه اريدن احضنه
وبعينه يعرضلي السهم
وستوحدوني بوكفتي
ويأشر اعليه العدو
هذا البقه ماله اخو
ذبحوه الماعنده اخو
يا ضيعتي من غمضت
ليحامي اضعوني منو
عباس مثلك وين اكو
واخر حچي منه اسمعت
يحسين زينب والخيم
ابخير كتله
بس طحت
ومدري اشلت من عنده ماادري اشلت
كلشي عفت
يم النهر كلشي عفت
جفوفي تخط فوك الترب
رديت ومتيه الدرب
وكوه الچ خويه اوصلت
طول الدرب
تتشمت بحالي الغرب
وشلون اسكتها التصب
طول الدرب
حسين شبقه عنده بعد كلشي يضيج بعينه
من طاح عامود الخيم تبقى بضماها سكينه
وراح احچي الج يم الخدر
چلمه بوسط وجداني
اتمنى عندي بالخيم
عباس واحد ثاني
يازينب وكلشي انتهه
واشتم حرگ صيواني
____
حسين سعد البهادلي
1444هـ
/channel/Hussein_s_b
https://youtu.be/U0ZeqJBhqyc
📜هواي صعبة
🎙سيد سلام الحسيني
✍️حسين سعد البهادلي
بچيني.. بكل لحضه اسمك من يمر
خليني.. بدمعي الك اگضي العمر
ربيني.. لمصابك افگد كل صبر
يا سيدي شضل بالعمر ما فاني
وبس جرحك الضل ماكو واحد ثاني
عايش على امصابك وعالدمعه اعليك
وصار الرمح عايش وسط وجداني
حُسين احرگني بدمعاتي وخل نارك تصب
حلات الهايم لو يصبح كل دربه صعب
بلايه اجروح ولا غربه مايتسمى حُب
حُسين انطيني شما تَكرم لوعات وألم
اريد اعميها كل عين الما شافت سهم
واذا ماصبت من تسمع طاحلك خيم
____
اجرحني.. باليوجعك كون انجرح
اذبحني.. واصبح اسير المنذبح
افضحني.. بالحب حلاته الينفضح
ما افقه وادري شكثر اليحبون
وشكد سمعت هواي من اليحجون
لچن اجيت وچفي دك بهل باب
من باب عالم عبدك الهايم جون
انفتن بعيونك مو حگه لو هام ويجن
وأنه هم طيرك ما ارتاح اله ابفي غصن
يشجرة فَيّ الباري اعلينه وليها احن
شوكت اخدملك من كلبي واصبحلك اسير
وقدر النعمه المنطيني أسمي اخدم امير
شكو عالي تحت اجدامه وبس هوه الچبير
_
يا ديني.. اصل العقيده من صرت
تكويني.. لمصيبتك اتكونت
توديني.. لمجلس عزاء كل ما حرت
يا سيدي كلما ضعت تنطيني
دمعة وصل والگاك مالك عيني
منك والك كلشي رماد ابلياك
ومن الضمه متفطر وترويني
يهل شاريني وما اندل وابحث عالوصل
وانه الما اسوه ومثمني أبنبلة طفل
حُسين اعصمني عن دربك ما رايد ازل
شريد اوفيلك يا خيمه لخاطر انوجد
عجب تاخذني دنياي وعنك ابتعد
ولا تعرض وسط اعيون منطي اغله الولد
____
غربني.. وبجروحك ارسملي وطن
أسرني.. بنضراتك الفاگد ضعن
اخلقني.. طين ودمع ابچي المشن
چايمتى احسك واستمع لونينك
من ضعنك ايدور وتدور بعينك
ومن تسمع بزينب تنادي يحسين
ادركني وانته اعله الثره امسلبينك
عشت يا حاله من توكف ماتكدر تطيح
وتصيح ارقيه وتذبحك بسمك من تصيح
وتأشر بيدك وتگلها يابويه ذبيح
بعد يادنيه انهم بيها ونسمع بالجره
بضعن خدر الله بالهيمه فرت چم مره
عسى اباب الخيمه انذر ونداس اوي الثره
___
يا روحي.. وشگد احاچيچ واعيد
اجروحي.. ابديها من جده وجديد
اونوحي.. لا ابطله ساعه واهيد
ياروحي محبوبچ غريب وعطشان
بالهيمه ثلث ايام مرمي وعريان
وضعنه مشه عنه وحداه الذباح
شحاله الضعن لو يمشي من دون اخوان
مشه بس راس ويتلفت من تمشي الهزل
ويحز بگلبه مو بيدين اطفاله الحبل
ويصب من نحره دمع احمر مو عينه تهل
بعد ما حشمچ ياروحي ابچي الكربله
على السطان الدامي الكلشي ما ضل اله
العقيده بنوحچ والخدمه والدمعه أله
____
حسين سعد البهادلي
/channel/Hussein_s_b
(حگي اتفاخر)
حگي اتفاخر أنه العندي گمر
كلها دونه ودون الحسين اعتله
شما افرزن بالسوالف والسطور
الگه عباس احتوه كل كربله
الضارب والراهب سجدت اعله اجفوفه تربة نينوه
الكافل والشايل بخت الحسين اعله متنه يرف لوه
خلها تتفاخر الساده شما تريد
گمر هاشم غير عم الساده
ريشه من عده تساوت بالالوف
وحدر جدمه ركعها القاده
لروحي اصيحن ونعم يم البنبن
ابنچ الدنيا تريد امراده
_____
ياهو مثله كاشف الكرب وضمه
وبسمه تتنخه الفواطم تندبه
علك مشدود اعله زنده ياحسين
وحي ابو فاضل تنادي زينبه
البدويه وعلويه ثنينه انادي يحي الله الگمر
من عطشو وتنخو موش جربه شال جرفين النهر
النهر خابط جان مايه مو زلال
وصار صافي من وصل ليه الگمر
وبدل اچم لون وزرگ حيل صار
حين چف الساقي بجرفه سطر
مو عطيه لو تصدق عالكفيل
جربتله غطاها كوه عالنهر
______
اللواء الضارب وعضد الحسين
وسورة الجربة اعله متنه نازله
ربي سبحانك الصورت الكفيل
چفه چم معصوم شاله وقبله
الفارس والدايس عالزلم والگاطع اچم گنطره
بعلومه ورسومه لوطب ابفقاره يرهب حيدره
يالمشيم امه ورافعلي راس
گالو ابنچ چان سور اعله الخيم
عفيه اسمع عنه گدام الحسين
مو يسبگه حتى يتلگه السهم
حرمه ماعطشت وخير الماي چان
بوكت مابمتونه يرف العلم
_______
عمه الحمزه ايتصيد بالأسود
والگمر يتصيد بروس الزلم
زلمه لو كلنه بعد منعد وراه
علي ماخلف ابد غير الشهم
اي چفه وتعرفه چف علي الوادم البيهم حاصد
الغاطي دم واليسلم منه ايحسبونه زلمه الشارد
كفو يالگالبها يمنه اعله اليسار
والشريعه بروسهم غطها
صنطه صارت ابره ذبها تضل ترن
شكد شوارب عالنهر داسها
حط چفوفه بالشريعه وشال ماي
ونكت من چفه العذب ذلاها
______
هلا بالگاطع اچفوفه اعله الفرات
وطاح واگف زلمه بيه اتباها
كلشي هين عنده لو سالم اخوه
بحيث ماهم حتى عينه انطاها
لا ماهم لو يسلم مخيم حسين وخدرها الحره
مايگدر وتعذر يرد لخيامه العقيله اتنطره
كلشي طاح اوياه ماضل شي وراه
احسين وخيامه وگرب ليهم عدو
وزينبه تشوف انكسر ظهر الحسين
احتار من عگبه بعد ما ضله اخوه
ونعم مارد سالم شكد زود بيه
گبل اخوه اتوذر ويسوه الكفو
____
حسين سعد البهادلي
/channel/Hussein_s_b
#في احدى اليالي جاء أمير المؤمنين عند قبر فاطمة الزهراء عليها السلام وخاطبها قائلاً..
هذا حاله اليدفن احباب
بتراب دافن روحه ابو تراب
يا فاطمة
___
عگب ألوداع ابهل مسيه بين اديه
اتراب الگبور
رحتي شبساع ونگضه الحيل وضل يجي الليل
وعلي مكسور
بعد مابيه أبوداعچ امشي خطوات
وحين غمتضتي جفونچ علي هم مات
ويانحيبي الضل يفطر بالسماوات
يافاطمه.. وياچ هم اخذيني
يافاطمه.. وحدي آنه لتخليني
يافاطمه.. مشتاگلچ حاچيني.. يافاطمه
موضلعچ آنه الگلبي انصاب
بتراب دافن روحه ابو تراب
__
كسرت العود انكسر ظهري واخ صبري
مابقه اعليچ
نرجع اردود اوياي تمشين يم الحسين
انطيني ايديچ
گبل ماصارت اجي اتوچه اعله حيطان
ولو ردت اتعنى الچ يسندني سلمان
بخيط يتعثر علي قالع البيبان
يافاطمه.. فراگچ حنالي اچتافي
يافطمه.. وصرت امن اجيلچ حافي
يافاطمه.. بيتچ ابدونچ طافي.. يافاطمه
كل ليله اموت امن انضر الباب
بتراب دافن روحه ابو تراب
_
يازهرتي العمره الچ چان صار دفان
أبجروحه
وهم سمعتي ابمره جناز راح بَعزاز
ودفن روحه
الدنيا ضاگت من نزلتي وسط لحدچ
يا وجه الله بتُراب يبات خدچ
يومها اتمنيت موتي وابقى يمچ
يافاطمه.. القرآن دافن سوره
يافاطمه.. بآياتها المكسوره
يافاطمه.. جن دافن المعموره.. يافاطمه
والعيش بعدچ لا حله وطاب
بتراب دافن روحه ابو تراب
__
بعد شتشوف اكثر العين من ترحلين
منهو عندي
دمعتي اطوف اعله گبرچ وانتي وحدچ
وآنه وحدي
الچان بس اسمه يهز الكون ينهاب
هسه يهتز كله لو ينضر على الباب
اشد من الموت اصيحن فگد الحباب
يافاطمه.. ياهو اليعيش ابدونچ
يافاطمه.. اطفالچ ايريدونچ
يافاطمه.. صلِّى علي اعله اعيونچ.. يافاطمه
يحنيني لو طكني الهوه الهاب
بتراب دافن روحه ابو تراب
_
وهاي كل يوم امنمشي متعوب يثگل الثوب
اعليه ونحب
شكثر مهضوم امن اوصل الدار ادري وحتار
اتاني زينب
ادموعها اتفسر الهظم تنضر اليه
وتنكسر من تنشد اشلون الزجيه
وآنه ادري البيها من الوجع بيه
يافاطمه.. حيدر أنه اتعرفيني
يافاطمه.. بس شيبي واصل عيني
يافاطمه.. من احچي اتسمعني.. يافاطمه
كل امنياتي اسمع اجواب
بتراب دافن روحه ابو تراب
_
حسين سعد البهادلي
/channel/Hussein_s_b
https://youtu.be/as2EH_HN6HU
مصايب عجيه
🎙ملا حسن الحدادي
✍️حسين سعد البهادلي
(الغوث)
خويه الزمن بينه اندار
وناديت من گلبي احتار
الغوث الغوث.. خلصنا من النار
_____
خلصنه من نار الخيم
احترگن يشيال العلم
اتشوفهن صارن رماد
لو ماشفت من السهم
دخانهن خانگ ضوه
عن عيني وهب الهوه
توني استدليت وشفت
نار وزلم بس نينوه
يا كاشِفَ الْبَلايا
يا مُنْتَهَى الرَّجايا
يا سامِعَ الشَّكايا
النار اعله طول الميدان
والحرگ لاح النسوان
الغوث الغوث.. خلصنا من النار
____
مديته چف گلبي الك
وضل يدعي ويتوسلك
تگعد تلم هاي الحرم
بالبيده فرت واسئلك
هوه الركض بس للزلم
ومحتاره اركض لو ألم
يامن يجير الينتخي
ادركني مابيهم شهم
يا عُدَّت الغرائب
يا عونَ في النوائب
يا غوثَ في المصائب
تصبح خبر ماضي وكان
الماعدها بالهيمه اخوان
الغوث الغوث.. خلصنا من النار
___
ما حملك اكثر بعد
وعن دربك الجدم ابتعد
جف اعله جف شدو حبل
وللهزله ضعنك استعد
صوت الهظم بسمك ندب
وياخويه بالخيل انحجب
ندري اليفارگ عزته
من التعب يمشي لتعب
يا صادِقَ الوعودِ
يا مُوفِيَ العهودِ
يا رمزَ للصمودِ
ندعي النفس بيك ايعود
وبجفك ايخضر جود
الغوث الغوث.. خلصنا من النار
_____
راعي الهزل لمن حده
ما ضل امل بين العده
واتئمل ارجع بس شفت
جفوفك يخوي اموسده
غرگانه الجفون بدمع
ومتنه مثل موت الشمع
بسكته على اظهور الهزل
نخاف البچي لا ينسمع
يا مُطْلقَ الأسارى
يا مُنقذَ الحيارى
أن الزمان جارا
وشفنه اللوه بيد اجناب
بعد الضعن ما ينهاب
الغوث الغوث.. خلصنا من النار
______
حسين سعد البهادلي
1444هــ
/channel/Hussein_s_b
(آه يوليدي)
آه يوليدي.. شسوت بأمك مصايب كربله
آه يوليدي.. عگب فيك ما اضل مدلله
______
يالرحت للماي بس ماي السراب
يمه سهمك نابت بگلب الرباب
يبني نشاب الاجه ريت اعمى كون
ويخطي نحرك يلولد وبنحري صاب
امن ايدي ليد حسين سرت امن الخيم
وچان عطشان اعله نحرك چم سهم
واني ادري الراح يتخطى اعله موت
آه يعزي ومن رحت عزي انهدم
آه يوليدي.. شلت ايده ولا يذبحك حرمله
آه يوليدي.. عگب فيك ما اضل مدلله
____
يبني اطيحن عالمهد ورجع افز
ادري خالي بس گلب امك يهز
يبني عاده ومتني متعود عليك
وعاده اگول اوليدي نايم لا يفز
ريت اداويك ويصح ليك الدوه
يبني يالمفطوم حتى امن الهوه
چلمه اليمه ردت اسمعها عاد
وضاعت اليمه اسلبتها نينوه
آه يوليدي.. ماكو ابعيني مثل رسمك حله
آه يوليوي.. عگب فيك ما اضل امدلله
__
الله لا ينطيه يا يمه الضمه
عطشاك ونحرك ايروي السمه
عميه ريت اعيوني كون ولا اشوف
من وريدك جيتني مخضب دمه
ما صرت دون البعمرك يبني شاب
برد حضني يالنمت فوك التراب
يبني واليفرغ حضنها المن تعيش
شاب گلبي اعليك مو بس رمشي شاب
آه يوليدي.. رخصت عمري وبس عمرك غله
آه يوليدي.. عگب فيك ما اضل مدلله
_____
ياهو ينشدي اگله الولد نام
وصرت اسكت ياهو يحچي بالخيام
هيج شادهني يعبدالله عليك
وكلشي يوجعني بغيابك كلشي گام
صرت بيني وبين روحي اعليك اصيح
وهيج امك گامت تگوم وتطيح
وگلت باچر تكبر وتجوتي اتصير
وباچر اعله ارماح اشوفنك ذبيح
آه يوليدي.. گطعيت انياط كل العايله
آه يوليدي.. عگب فيك ما اضل امدلله
__
ساعت حصت النار يصبح هل مهد
شلون ما ناغيك لا لولي بعد
بيا علي ويا علي ست اشهر كضيت
بعيني تكبر وين رايح يالولد
وخاف اروح وما احصلك طبيب
الجرحك الماله ضماد ولا يطيب
آه يا اول ولد وشكد عزيز
حالت النسوان مثلك ما تجيب
آه يوليدي.. الما حضه السانك بگطره اتبلله
آه يوليدي.. عگب فيك ما اضل مدلله
__
حتى ما لحگت تكبر لا مشيت
بسرعه اجيت ومني ابسرعه مشيت
احلم بساعت التلزم چف ابوك
وتمشي. مو للموت يالضلعي حنيت
شلون لو عنك مشيت ابهازله
وانته عالتربان تبقى بكربله
شلون بشلون امشي جسم ابلايه روح
ريت اضل يمك وبيك امعلعله
آه يوليدي.. عاجر ابدونك تسير القافله
آه يوليدي.. عگب فيك مااضل امدلله
______
حسين سعد البهادلي
1444هـــ
/channel/Hussein_s_b
السلامُ على وارثِ الانبياء
السلامُ على خَلَفِ الاوصياء
كلُ نبيًّ إجتباهُ الله
اعطاكَ ربُك كُل ما اعطاه.. ياحُسين
____
امن اول مابده التكوين اسمك الله گال حسين
ومنه استنبطك منه اصبحت كلهن خصالك
محد الله بيك ايقيس من يوم امتنع ابليس
ربك صورك من نوره وتمم كمالك
ولجلك يوم التحاكم چي انت بصلب (ادم)
وچا غافر اله من ما سجد لو بس بچالك
وانته بالمهد بعدك اتعلمت ابعلم جدك
مواريث الرسل والانبياء من فَي وصالك
يا من هو وجهٌ لمن سواه
اعطاكَ ربُك كُل ما اعطاه... ياحُسين
____
(اسحاق) انته وهبه سواك هيج انته الاله انطاك
رحمه اعله الارض يا نعمة الباري علينه
لدينك چم بلد عابر (هود) بضعنك امسافر
تصلح دينك ابدمك وجيت بهل ضعينه
بجيتك للخلق ناصح تخطب بيها واتسامح
يالجنك (شُعيب) وحجيك اُنزل بيه سكينه
ثابت للهُدى امناطر ومنا اعله الاذى صابر
(ايوب) الصبر جسدته بل زدت ابسنينه
أنت الذي جاهدت في مرضاه
اعطاك ربُك كُل ما اعطاه... ياحُسين
____
(هارون) ومعينه(الياس) وانته العون الك عباس
جاي ابحكمتك وبعصمتك تكمل رساله
وشيخ المرسلين احذاك (نوحك) چن حبيب اوياك
وما واحد هلك لو يتبع من صَحبه واله
بضعنك واهلك اتجاهد اترد كلمن كفر عابد
(يعقوب) الحزين ابحزنك ال الله بجلاله
(ذوالكفل) ابذكائك هام سويت الصدك بحكام
ميزت الحلال امن الحرام ابكل مقاله
والانبيا سَيّرتَها لله
اعطاكَ ربُك كُل ما اعطاه..ياحُسين
__
(موسى) وكلمة الرحمٰن بحچيك منشرح قرآن
مو عصه ابيمنك لا كتاب الله تكلم
واهب(لليسع) ذكره وامك فاطمه الزهره
عرفوك وعجب للجاهدك من ما تندم
وانت ولا تهم بيهم (ابراهيم) وظهر ليهم
واكبر طاغيه بيهم صنم بيدك تهدم
(يعزير) النصر ربه وربه مهد الدربه
وكل جيل السبق والي تبع منك تعلم
(يونس) نجا بسمِكَ مُذ ناجاه
اعطاكَ ربُك كُل ما اعطاه... ياحُسين
____
ما شافو حِسن ربك گوم الگصدت الحربك
(يايوسف) جمال الله انتمت ليك المناير
طحت وطاحت الاكوان يمبچي الانس والجان
يا مالك (سُليمان) المُلك ادوسك حوافر
بضلعك تكسر امن تجيس وما صار الجرى (الادريس)
جسمك ما رُفع فوك السمه وجرحك يكابر
وراسك عالرمح يعلى يقره المصحف ويتلى
(يحيى) جسدك راسه انرفع ابلا ضماير
ناديتَ (وا مُحمداً) جداه
اعطاكَ ربُك كُل ما اعطاه.. ياحُسين
____
وانت الاقرب لعرشه محد شيع لنعشه
(صالح) مو اجل ولجله اصبحت مثل القيامه
نفديه ابذبح اعظم (اسماعيل) وصبح مُرحم
هوه انت ذبيح الله وذكر الله ابكلامه
(ياعيسى) وترد الروح رد لطفالك الي اتنوح
راحت بالسبي اتحشم تردلها بسلامه
حيره البيها تدري اتزود ها يملينه( لداوود)
اطفالك بالحديد امگيده هاي اليتامه
من مِثلُكَ جار الزمان آذاه
اعطاكَ ربُك كُل ما اعطاه.. ياحُسين
___
حسين سعد البهادلي
1444هـ
/channel/Hussein_s_b
