654
للتواصل والاستفسار حول القصائد عبر الرابط👇👇 @Haammzaa رابط القناة 👇 https://t.me/HamzaAlaraji
(بندريه)
علي علي راح
والدنيه ظلمه صارت ابدونه
*
راح الحنين اوعيني تربيه
ادعي الله كون ابني يخليه
سالم يرد من الميادين
من الغدر چا وين أوديه
علي علي مابيه حيل الفركتك
علي علي من عمري طفو شمعتك
علي علي ظليت اصيحن يالولد
علي علي بالخيمه امك رادتك
ارحم ابحالي يالولد تعال
يذبحوك خافن بويه بالقتال
من العطش كلبك سعر لهيب
ينطفي خافت منك الجمال
يوليدي علي الاكبر
يوليدي علي الاكبر
علي الاكبر
**
علي علي راح
ومن العطش مخطوف كل لونه
عطشان بويه رايح الحيل
خايف عليك اتعبك الخيل
امنين اجيب الماي يبني
من العطش بجدامك تميل
علي علي هم العطش فت كلبي
علي علي ماكمت أوجد دربي
علي علي ادري العطش موهين
علي علي ادعي يحفظك ربي
بالخيمه امك تنتظر علي
تنادي يالاكبر يمه رد الي
خليني اودعك ياضوه النظر
بدونك ييمه ابدنيتي شلي
يوليدي علي الاكبر
يوليدي علي الأكبر
علي الاكبر
**
علي علي راح
وحسين هلت دمعة عيونه
ماترحم ابحالك تره الناس
يوليدي حيلي هده عباس
ارحم ابوك وشوف امك
بالخيمه تلطم ظلت الراس
علي علي وياك تطلع روحي
علي علي كافي عليه جروحي
علي علي كبلك اريدن موتي
علي علي من هسه بادي نوحي
يوليدي أبقه رايح اوحيد
وحزنك يبويه ماظن ايهيد
اتروح مني وينطفي النور
وجهك يبويه هلت العيد
يوليدي علي الاكبر
يوليدي علي الاكبر
علي الاكبر
**
علي علي راح
والمات كبل اوليده خيعونه
يرباي مو هين عليه
يوليدي ربيتك بديه
موهينه يبني كبالي مذبوح
رايح علي وشلون بيه
علي علي رايح اظل الوحدي
علي علي لاناصر الظل عندي
علي علي منهو اليحامي العايله
علي علي من هسه صابو جبدي
ماعدها رحمه والعده هواي
اومنعو علينه شربت الماي
عطشان انه وانته عطشان
وتبجي الاطفال امن العطش هاي
يوليدي علي الاكبر
*
علي علي راح
مذبوح للخيمه يردونه
اليشبه رسول الله بجماله
الله اليعين امه اعله حاله
ومن شافه ظل محتار الحسين
ماظن دمع من دم بجاله
علي علي صاح الحسين اوليدي
علي علي دمـي يبس بـوريـدي
علي علي اشلون اشيلك حيره
علي علي موذر طحت أمنيدي
هدمت حيلي ومابكالي حيل
من ايدي يوكع جسمك امن اشيل
ظهري نكسر يوليدي ياعلي
صار النهار ابعيني جنه ليل
يوليدي علي الاكبر
يوليدي علي الاكبر
علي الاكبر
كلمات حمزه الاعرجي
الدنيه من دونج بعد ماتسوه
والله يمه أوياج جانت حلوه
دهـري طفـه شمعتي
وحشه صارت دنيتي
يمه يمه
****
يمـه من دونج احس أيامي صعـبه
ايعينه الله اليفگد الغالي اعله گلبه
شله بالدنـيه المشـه عـنـه اليحـبـه
الفاگد امه ايعيش كل اسنينه غربه
بغربـه يايمـه اعيش ابـدونج
الدنيه ماتسوه وحك اعيونج
راح أظـل ابـحـيرتي
وحشه صارت دنيتي
يمه يمه
***
يمـه ريت أوياج وافـتني المنـيـه
اونندفـن أثـنينـه حـبـيـبه سـويه
ولااشـوف البـيت خالـي يالزجيه
صعبه ماشوفج ييمه ابكل مسيه
صعبه من دونج أحس أيامي
يمـه مـن رحتي بـدت اللامي
وياج راحـت فرحتي
وحشه صارت دنيتي
يمه يمه
****
وحشة الليل ابغيابج تهدم الحيل
مساهره بدموعي يمه من يجي الليل
أذكر الباب وعصرته اودمعج ايسيل
ومن نخيتي أمن الألم ياحيدرأدخيل
يمــه يــتراوالي لـمن طـحتي
بعبره مخنوكه يفضه صحتي
مالي نهضه ابطيحتي
وحشه صارت دنـيتي
يمه يمه
**
ليش مارحموج يمه الجانوا أصحاب
هجمواعله الدار وانتي ابلايه حجاب
تعمدو كسر الظلع والمحسن أنصاب
دفعوا الباب ابحقد وأنتي وره الباب
الله الاينطي الحرك بابـچ عـمر
بدفعته أسمـع ضلع مـنـچ كسر
ابگلبي خله حسرتي
وحشه صارت دنيتي
يمه يمه
****
الليل مانامه أخلصه ابحسره وادموع
أومن أشوف الباب اذكر گسر الظلوع
گلبي من يوم المـشيتي يمـه مفجوع
واليتـيم اخـلاف أمـه يـبجي ويلـوع
يعينـه الله أبـزغـره ويفارگها أمـه
الدنيه بعيونه يحسها ظلمه ظلمه
ماكو مثل أمصيبتي
وحشه صارت دنيتي
يمه يمه
*
يمه جم موته اموتن برض الطفوف
حسين باجر ينذبح وعيوني أتشوف
والگفلني چن اشوفه ابلايه اجفوف
جم اخو باجر أليه اتگطعه السيوف
ولاخيم تبقـه تـشوف اعـيوني
والعدو ابصوطه يورم امتوني
وأنسبي اخلاف اخوتي
وحشـه صارت دنـيتي
يمه يمه
***
گلمات سيد حـمـزه الاعرجي
(مولاتي زينب لفقد ابيها علي ع)
شور. كعديه
ياويلي من راح الأبو حالي تغير لونه
والدنيه بعيوني صفت ظلمه بضياع اعيونه
بفراكه جدامي انرسم ذاكه السبي والغربه
خيمتنه طاحت ونتهت ضاع العمر من دونه
ويلي راح الحنان ابغيبته
ويلي وعليه سالت دمعته
ويلي يبجي اعله حال ابنيته
علي بويه علي بويه
****
تمنيت يشفه امن الجرح ويرد ابونه البيته
ياربي شافي والدي وايتام له امتانيته
جرحه البراسه صعب مايشفه من اصوابه
تبجي اليتامه الفاكده لحيدر علي وحنيته
رايح والمات مايرجع بعد
رايح والي اليتامه مايرد
رايح كلبي على افراكه انمرد
علي بويه علي بويه
****
تمنيت يابويه حلم اكعد وافز من حلمي
فرحه تصير امن العمر اكعد وشوفك يمي
مابيه حيل اعله اليتم يكتل يبويه اغيابك
وبروحتك صار الكلب يابس يبويه ابدمي
ريته يابويه ماطال العمر
ريته ولا اسمع بهذا الخبر
ريته ولاشوف راسك ينطبر
علي بويه علي بويه
**** *
الدنيه من دونك بعد يابويه لا ماتسوه
والعيشه المابيها ابوه خلاف الأبو موحلوه
بيتك يبويه من رحت موحش صفه من دونك
خالي مكانك يالجنت من شوفتك اتروه
بويه اشتاك اظل الشوفتك
بويه ارحم گلبها ابنيتك
بويه راسي تشيبه امصيبتك
علي بويه علي بويه
****
أنشلت ايده الصوبك يوجع يبويه اصوابك
مو راسك أبسيف انطبر طبرو أگلوب أحبابك
ظجت عليك اهل السمه واهل الارض مفجوعه
وكل الايتامه ابغيبتك تبجي وتون يم بابك
جرحك منه فلا شفنه صبح
جرحك خله ابكلبنه جم جرح
جرحك يابويه راواني الذبح
علي بويه علي بويه
**
حمزه الاعرجي
نزال
زينب اتصيح يعباس يراعي المرجله
خويـه وياك أجـينـه يـبن عـقـد الوله
( يبوفاظل دخيلك)
*~**
منـته عباس جبتنه يخويه أمن الوطن
وأحنه بحمـاك أجـينـه يحمـاي الظـعن
گلهه أوياك يـگافـل يـبوالـغيـره أجـن
اوبيدك أيرف لوانـه اوظعـنـه گـافله
( يبوفاظل دخيلك )
~
منته بيدك جبتني اوتنصب خيمـتي
وانته أوياي يعباس يگافـل طلعـتي
اوبيدك أنتـه يخويـه تـنـزل نـاگـتي
إنـه زينـب يعـباس أجـيـت امدللـه
( يبوفاظل دخيلك )
~*
واعدتنـه يخويه وأجيت اعله الوعد
ترضه زينب وحيده وتظل ابلايه احد
يابو فاظل بدونك احس گلبي انمرد
وهاي الأطفال عطاشه اوتنادي معوله
( يبوفاظل دخيلك )
~
هجمة الخيل علينه فرد هجمـه الزلم
وأنه اصيحـن يـعـباس يشـيال الـعلم
هجمة الناس يخويه وتشب نار الخيم
منهواليه عكبكم يحامـي العايلـه
( يبوفاظل دخيلك )
~*
ذبحوا حـسين يريتك تعاين منظره
داسة الخيل يويلي ظلوعه امگسره
وعلى صدره يعباس شمر حز منحره
دولبتني يخويه مصايب كربله
( يبوفاظل دخيلك )
**~*
راس الحسين يعباس بگه بيد الشمر
وانته نايـم يگـافـل تظـل فـوك النـهر
وداسة الخيل ظلوعه وظلع منه انگسر
وأنه عاين يخويه أودموعي هامله
( يبوفاظل دخيلك )
***
گلمات
سيد حـمـزه الاعرجـي
نزال
يامحرم يامحرم بيك راحو اخوتي
***
يامحرم من يهل أهلالك
عميه ريت ولاتشوفه عيني
ميته ريت ولا يمرني العاشر
ولا أذاك اليوم السابيني
يامحرم يامحرم مامثلهه امصيبتي
يامحرم يامحرم بيك راحو اخوتي
***
كربله بهلالك عيوني تشوف
وترسم اهوايه صور جدامي
مااشوف اهلال يتراوالي نار
ابيوم شبو بيها نار اخيامي
يامحرم يامحرم حركو عليّ خيمتي
يامحرم يامحرم بيك راحو اخوتي
*
لا تذكرني بعد مابيه روح
روح ماعندي منهد خواني
هوه المن عايش اليفكد عزيز
وحزني من كد البجي ملاني
يامحرم يامحرم لسه تسعر جمرتي
يامحرم يامحرم بيك راحو اخوتي
**
من وكع عباس فوك المشرعه
للخيم حسين رد محني الظهر
راح حيل حسين ياويلي عليه
طاح كلبي من شفت جدمه عثر
يامحرم يامحرم هلت اعليه دمعتي
يامحرم يامحرم بيك راحو اخوتي
****
لاتهل ماريد عيني تشوفك
كلبي مايتحمل اهوايه انجرح
حسين شفت الوادم التمت عليه
هوسه صارت من رفع راسه الرمح
يامحرم يامحرم ظلمه صارت دنيتي
يامحرم يامحرم بيك راحو اخوتي
*
بيك اشوف اطفال عطشانه تنوح
والخيم مشتعله ومراكض خيول
وانه وحدي عالجره ماظلي حيل
ياشهر من هل المصايب شرد اكول
يامحرم يامحرم مامثلهه قصتي
يامهرم يامحرم بيك راحو اخوتي
*
كلمات سيد حمزه الاعرجي
باقي ايام عاشور اويجينه
وايهل بالسمه اهلاله علينه
وينه اليخدم حسين
واتـهل دمعـة الـعين
ويواسي الزجيه ابدمع عينه
**
كربت يالخـدم ايام الـجروح
وهنياله اليواسي الزهره بالنوح
باجـر الحبيب حـسين مذبوح
وزينب تنسبي الياديره أتروح
باجـر لو يهل شهر المصيبه
بالطف العقيله اتظل غريبه
محتاره بله امعين
واتهل دمعة العين
*
باقـي ايام ويهل ويلي عاشور
حضرو يالخدم الايامه الصدور
تره الـزهـره عليكم باجـر أدور
بالمجلس تجيك ابظلع مكسور
عـالمظلوم باجـر لاتقصرون
موش ادموع ذبو ذبو العيون
وياهم أمقصريين
واتهل دمعة العين
**
محرم يختلف عن باقي الايام
نتنطـر يجينـه واللـه كــل عام
هوايه اشتاكة الجيتك الخدام
بيك الخدمه حلوه وترفع الهام
تـحظر فاطمـه ابكل عـزيه
تنحب عالغريب اوعالسبيه
تحظر كل عزه وين
واتهل دمعـة العين
*
محرم مـن تـهل يابـو المصايب
يجي المهدي العزانه وگلبه ذايب
أبعينـه ينـظر اويوكف يراقـب
وكلهه اتصيح يحسين المواكب
يومك مامثيله سيدي يوم
بسمك نطبر الهامه يمظلوم
يعله اعليك الونين
واتهل دمعة العين
****
حـسين ابياذنب هشمـوا صـدره
وليش امن الگفه ايكطعون نحره
شبيهه الناس ماواحـد يـنصره
محرم هم صدك زينب تـنظره
هم شافت اخوهه ام الاحزان
مارحموابحاله ومات عطشان
كصدت للمياديين
واتهل دمعة العين
***
كلمات
سيدحمزه الاعرجي
نزال
الوداع الوداع ياحيدر
////////
الليله أنودع علي والينه
لاجن مصابه يظل ياذينه
كل يتيم الليله الله ايعينه
على مصابه كلمن اتهل عينه
والي اليتامه ماتم صيامه
ايتامه تدعي يكوم ابسلامه
/////////
رحمة الله رايح أيفكدونه
الجان تحرسهه اليتامه اعيونه
اليطعم الجوعان من ماعونه
ليش دين الله العده ايغدرونه
راسه تصوب بالدم تخضب
ايتامه ظلت بغيابه تنحب
/////////
ظلت الايتام تبجي ابابه
وينعه ظل ابكل مسه محرابه
علي فكده يصعب اعله احبابه
نعلت الله على كلمن صابه
هاي المصيبه والله عجيبه
شيبك يحيدر بالدم خظيبه
/////////
زينب الليله تغير لونهه
حين شافت طبرتك بعيونهه
ياعلي آيكون الله أبعونهه
كوم وانشد عالعقيله اشلونهه
والله هظيمه تصبح يتيمه
صاحت يبويه عليه انته خيمه
/////////
وداعت الله وادعو الغالي
علي راح وظل مكانه خالي
صاحو الايتام صوت العالي
منو مثلك ياعلي ايصح والي
رايح ولينه ماظن يجينه
ماعدنه غيرك ارحم بجينه
////////
كلمات سيد حمزه الاعرجي
شور
وفاة السيده زينب ع
دموعي ظلت هامله
ولا خبر من كربله
ادعي من الله واشوف اخواني يلفون
وينه اليوصل الخبر
للحسين وللكمر
تنتظركم عالدرب لسه تره ام عون
تمنيت وناديت وتتلفت اعيوني
ياريت اشتاكيت يخواني تلفوني
بالغربه حياتي لوصارت وفاتي
جفنوني بعباتي غريبه
اتمنه اخوتي يمي ويحله موتي
ويسمونه صوتي ونحيبه
(انه زينب غريبه)
**
صعبه اموت ابغربتي
وحشه من دون اخوتي
صعبه من دون الاهل وبلايه جناز
عيوني ظلت عالدرب
وينسمع نبضه الكلب
هيجي من كثر اشتياقه ايشوف الاعزار
يحسين والعين مابيهه تعوفك
من يوم لليوم مشتاكه تشوفك
عذبني غيابك موهين مصابك
ياخويه وخضابك مصيبه
لو ماجيت اعذرك عظم الله أجرك
اذكر خويه نحرك وخضيبه
( انه زينب غريبه)
***
عيوني ظل بيها الرسم
صورتك وابكل حلم
عالرمح والدم صابغ كل لكيتك
عيوني عذبهه السهر
تغفه وتفز ابنحر
راح اموت ولسه ظال بآل اخيتك
بلاروح وبالنوح من دونك حياتي
بلاحيل وياويل اليومك حد وفاتي
يومك مانسيته والكافل اخيته
تمنيت انه جيته بحنيني
ماتسمح ظروفه مشتاكه أشوفه
المكطوعه جفوفه يجيني
(انه زينب غريبه)
**
يابوفاظل ادري بيك
خـويـه ماهنـه أديك
خاف اجرحك لوصحت وينك يعباس
ابعازت الخـوه اليمـوت
ومن اخوتي ماكو صوت
اسمع اصوات الشماته اوغربه هل ناس
بدمعات وآهات وانه اويه المنيه
يحباب ماطاب جرح الغاظريه
يجرحني فكدهم مو بيدي وعفتهم
عالغبره شفتهم رميه
عليهم لسه نوحي وماتشفه جروحي
شفتي ها يروحي اذيه
(انه زينب غريبه)
****
يخوتي وينه الدلال
لسه آثار الحبال
ولسه اثار الحرك باقي اعله اديه
من حرك ذيج الخيام
يجرح ابكلبي الكلام
ميته ريت ولا شفت ذيج الرزيه
انذال بحبال جتفوهن اديه
موطيف ياحيف برض الغاظريه
ياغربه العشتهه وبعيوني شفتهه
ابهل ساعه ردتهه اويلي
من انده يخوتي وماسمعونه صوتي
تمنيتك يموتي تجيلي
(انه زينب غريبه)
**
كلمات سيد حمزه الاعرجي
(نزال او شور)
سبوني وانه علويه
واخوتي مااجـو ليه
وحيده بالغرب عافوني
*#####
انـه زيـنب بالخدر معروفه
ياوسافه انسبي ومجتوفه
والگفلني مگطعات اجفوفه
راح كفالي اوبعد مـاشوفه
گفيلي مادره بـيه
يويلي وشجره عليه
وحيده حايره بظعوني
****
من اجيت الكربله ويه اخوتي
امدلله وشمحله بيهـم هيبتي
مـادريـت ابتالي تغـدر دنيتي
يبجي كلمن لـو يعاين حالتي
مصيبه منهه ماصارت
هظيمه زينب احتارت
وحيده امدلله جابوني
****
انـه زينب بـت علي عقـد الوله
شخلت ابحالي مصـيـبة كـربله
عيوني شافت كل اخوتي مچتله
وحـايـره ظلـيت بـين الـعايله
خيمنه مابكـت خيمه
وزلمنه مذبحه ابهيمه
وحيده والدمع بعيوني
****
جرحي البكلبي على خواني كلف
مثل نحر حسين ابواليمه نزحف
وجهت وجهي الى صوب النجف
صحت بويه ترضه زينب تنجتف
نخيتك بـويـه تلفيني
يريتك ياضوه عيني
وحيده والعده اتولوني
**
بطيحة اخواني بكيت امحيره
صعبه ماعدهه ولي اتظل المره
ميته ريت ولاشفت هذا الجره
على ناكه هـزله امشي اميسره
يتامه منهـو يحميها
علامه امن الظرب بيها
وحيده والعده يسبوني
*"""""****
كلمات سيد حمزه الاعرجي
نزال
خـويـه يـاعباس نـور عـيوني عيوني
ليش وحدي بالغرب عفتوني عفتوني
*
وين وعدك يبوفاضل وينه
مـانريـد الماي بس رد لينه
عـالدرب تـتنطرك اسكـينه
جم طفل عنك يجي ينشدوني
**
خلاف عينك راح اظل محتاره
خويـه أجيتك والدمع يتجاره
حايـره ظليـت شنهـو الـجاره
والعده عگبك تـره يـسبـوني
***
انـه زيـنـب يـاگـمر حاجـيـني
ليش واحدي ابغربتي اتخليني
گـوم خويـه وللـوطـن وديـني
صعبـه بـين اجـناب اتـخلوني
***
زيـنب انـه ام الخـدر معـروفه
ياوسافـه انـسبـي ومـجـتـوفه
اخلاف عينك راح اطب الكوفه
عليك خويه اشلون لونشدوني
****
هـذا حال اخـتك تـظل ابحيره
من عكب عينك تطب جم ديره
كــوم يـاعـباس يابــو الــغـيره
والعده ياخـويــه مارحموني
***
ياكـمـر ريـتـك تـعايـن لـيـه
كربلـه لاحـيل خـلـت بــيــه
كوم شوف اختك مشت مسبيه
السوط ورم متني وايشتموني
****
يادهر أشويـه ارحم حالي
حايـره ظلـيت وابـلا والي
عـالنهـر نـايـم بگـه گـفالي
وهاي زركه امن الصياط امتوني
**
كلمات سيدحمزه الاعرجي
نزال
فاطمه الزهره كل عزه تحظره
تجري دمع العين تجري دمع العين
---------------؛؛؛؛؛؛؛؛؛؛؛؛-------------
وين ماوين اتحظر وابكل عزيه
مجلس المظلوم متعوفه الزجيه
تصيح اه يحسـين وابونه خفيه
تبجي لمصيبة ابنهه ابكل مسيه
بالعزه تحظر فاطمه وحيدر
تجري دمع العين تجري دمع العين
*""""""*****
فاطمه تحظر ومنهه الظلع مكسور
عدهه كل هاي السنين الزهره عاشور
تصيح واويلي على ابني المات منحور
وينه اليواسي بدموعه وكلبه مچمور
باالعزه دايم الفاطمه خادم
تجري دمع العين تجري دمع العين
*""""****
واللـه هنياله اليواسيهه ابـدموعه
وينـه لينادي يبواليمه ابـخشوعه
بالعـزه مــن الـطـم يـهشم ظلوعه
خلي روحك بالبواچي مثل طوعه
منهـه أتـعلم بالبجي أتألم
تجري دمع العين تجري دمع العين
*""""*****
على مسلم طوعه ماعافت حزنهه
اتـبرت ابـيوم المصيبه مــن ابـنهه
تـذكر حـسين ويهيج ابعالي ونهه
موتهه من المصايب طوعه ظنهه
ويلي عالغدروا واحده عافوا
تجري دمع العين تجري دمع العين
"""""***
باالبـواچي أتعلم امــن ام البنين
من ابـن حذلم اجـه ينعه أبونين
منه سمعت منكطع نحر الحسين
ابهل خبر لطمت وجهـه باالأدين
سمعت اخباره وظلت ابداره
تجري دمع العين تجري دمع العين
*""""""*****
كلمات سيد حمزه الاعرجي
ام البنين ع وشهر المحرم
ياشهر المصاب جاوين الاحباب
ظليت اناطر كل وكت ودموعي بالعين
بيك انـه ياشهر الحزن ودعت الحسين
*****
ياشهر عاشور بيك اعظم مصيبه
گلبي ينحب لسه وينوح الحبيبه
والجرح مايشفـه للغايب طـبيبه
الـراح مني ياشهـر أمنين أجـيبه
اتمنيت أشوفه مابيه اعوفه
مشتاگه حيل الشوفته وبگلبي نارين
بيك انه ياشهرالحزن ودعت الحسين
*****
انــه ام الاربعـه السابـيني دهـري
راحو احبابي وعليهم دمعي يجري
صبري گالو وانه ماينفعني صبري
ياشهر ماريده عگب حسين عمري
شلون آصبر اشلون العني يبعدون
وحشه الديار ألي مشوا عنها بعيدين
بيك انه ياشهرالحزن ودعت الحسين
*****
بيك ياشهر الحزن بـس المصايب
هلالك يـذكرني بضعون الحبايب
سافرو عني وانه ظل گلبي ذايب
ماخذوني وللظعن عيني تـراقب
سافر ظعنهم وانـه أنظرلهم
أمودع الله بس گلت يل عني ماشين
بيك انه ياشهر الحزن ودعت الحسين
******
اربعـه أبنيني مشوا گلهم سويه
أتمنـه واياهـم رحـت للغاضـريه
انـه واولادي فده الروح الزجيه
وياهم اتمنيت بس ماصح بديه
مجروحه ظليت ظل خالي البيت
أحبابي راحو مادريت ابهل سفر وين
بيك انه ياشهر الحزن ودعت الحسين
*****
حسين راح وراحت اويا الاماني
جنت اناطر جيته بس ماأجاني
من سمعت ابحالته ميته عساني
كل وگت نوحي المصابه يازماني
انصب عزيـه اعله أبن الزجيه
انصب عـزه لمصيبته كل هاي السنين
بيك انه ياشهر الحزن ودعت الحسين
*****
ياشهـر حــسين عـذبـني مـصابـه
ماشفـت راحــه ولامـره ابـغـيابـه
ولن ابن حذلم سمعته وگلبي صابه
منذبح حــسين مـرمـي عـالترابـه
شيصبر الـروح محبوبي مذبوح
لحسين اظل طول العمر مابطل الونين
بيك انـه ياشهر الحزن ودعت الحسين
****
گلمات سيد حـمزه الأعرجي
نزال
ويلاه يعاشور ويلاه يعاشور
ويلاه يعاشور واويلاه
******
من هل اهلاله زينب ياحاله
بدمعه هماله وتفرك بديهه
ذكرت المهه وطيحة علمهه
هلالك هظمهه شمسوي بيهه
لا تهل ريتك علينه ياشهـر عـاشـور
ويلي من عشرت محرم بيها كطع نحور
زينب اتظل اعله اهلها والكلب مجمور
بكربله جم غالي عافت ونطفه جم نور
شافت مصايب والمن تعاتب
غياب الحبايب سكنوا بالكبور
*******
الفاكد خوانه يعيش ابحزانه
شيطفي نيرانه حزنه مايهده
أنـه الغريبه شفت المصيبه
الراح اشيجيبه ماي اوتبده
ياشهر بيك المصايب واجرت بينه
راح ابواليمه وخيمنه طاحت اعلينه
وعالنهر طاح الكفلني وغمضت عينه
بكربله كطعوا يساره وكطعو ايمينه
طاح الكفلنه كافل ضعنه
منه انحرمنه وظل گلبي مكسور
****
هلالك اشوفه واذكر طفوفه
گلبي اعله خوفه ويسعر دليلي
سهمك رماني ودهري سباني
وليه ولاني ومانمته ليلي
ميته ريت اويه اخوتي ولا ابقه بحزاني
ياشهر عاشور راحوا كلهم اخواني
مارحم حالي زماني هوايه اذاني
من عكب ذاك الخدر مسبيه وداني
ادعي ابسكوتي تمنيته موتي
راحو اخوتي ابعيني انطفه انور
****
ريتك ولاجيت بدموعي ناديت
وشعندي خليت ياشهر المصاب
المن بعد جاي وشعندك اوياي
راحولي اهواي من عندي احباب
ماشفت راحه ابحياتي امن الزغر لليوم
ياشهر من المصايب كلبي ظل ملجوم
ياشهر عاشور بيك حسين ظل مظلوم
ظل ثلث تيام اخويه امن العذب محروم
عالغبره شفته مرميه جثته
موبيدي عفته ياويلي منحور
*****
كلمات سيد حمزه الاعرجي
بويه وينك
يالخذت روحي ومشيت
بويه وينك
هوايـه بفراكك بـچيت
ياضوه العين بويه يحسين
بويه وينك
******
بويـه انـه ابنيتك
عليه صعبه غيبتك
ليش عني اتروح وانه ابقه وحيده
اتسافر الديرة غرب
وانه اظل ابلا گلب
أدري بويه أبسفرتك گلش بعيده
خذت كل أهلي ورحت
اومابگت يمي أخت
والأجل ياساعه أشوفه أيمدلي ايده
امن المرض جسمي نحل
صعبه اعيش ابلا أهل
والمفارك دمعـه ابـداً مايفـيده
بويه فركاك
بعيني راوانـي الاجل
بويه فركاك
وياك احس راح الامل
ياضوه العين بويه يحسين
بويه وينك
*********
وين يابويه رحت
ليش عني سافرت
ليش عفتوني وحيده افرك بديه
بروحتك گلبي انمرد
لمته لديارك تـرد
ادعي ربي الجيتك ابكل مسيه
هوايه ظليت انتظر
مانفع بيه الصبر
لو لفاني الموت بويه منهو اليه
بويه كل ليله ابحلم
يمي اشوفك مبتسم
كبالي كاعد بويه واعيونك عليه
وعله صدرك
تضمني وابحظنك انام
وعله صدرك
اويحلـه وايـاك الـكـلام
ياضوه العين بويه يحسين
بويه وينك
*******
عندي الك بويه حجي
لمته اشوفنك تجي
ارد اسولفلك على الصار اوجرالي
الليل مانامه گمت
عليك يابويه خفت
وصورتك مافارت لحضه خيالي
شافت اعيوني صور
بيكم أيمر الخطر
خايفـه عليكم ولا مرتاح بالي
كمت اشوفك بالحلم
راس ماكو بس جسم
كمت اشوفك بويه وابكل الليالي
وحشة الليل
صعبه وعليه تـمر
وحشة الليل
حيل أذاني السهر
ياضوه العين بويه يحسين
بويه وينك
*******
فوك كل هاي العلل
دمعي مامره نزل
قدر هذا وربي هوه الي يشافي
امن البجي عيني انعمت
بويه من يوم الرحت
امن السفر يابويه ارجع كافي كافي
بويه حيل اتعذبت
رحت عني وطولت
خلاف نورك بويه نور البيت طافي
بيت خالي امن الأهل
وحته عبدالله الطفل
من خذو من يمي شفته ابعيني غافي
شفته نايم
عـني عبدالله رحل
شفته نايم
من مشه ويه الاهل
ياضوه العين بويه يحسين
بويه وينك
***
لمته اشوفنك ترد
وازرع ابدربك ورد
عليك بويه امن النده يبست لهاتي
دياركم وحشه اصبحت
جنهه شمعه ونطفت
البيهه عشت اوياكم أشمحله حياتي
حلوه واياگم هلي
همي بيكم ينجلي
ربي يحفظكم آلي أدعـي ابصلاتي
عيوني تعبها الدرب
الگم اشتاك الگلب
ياهلي مشتاگه ظليت الخواتي
عيوني عالباب
بويه يوميه انتظر
عيوني عالباب
اومالفه منكم خبر
ياضوه العين بويه يحسين
بويه وينك
******
كلمات سيد حمزه الاعرجي
(بندريه)
بويه وينك. احظر بكربله
شوف الحسين. مذبحه صحابه وهله
بويه بويه ياعلي
ترضه زينب تنولي
احظر احظر ياعلي يابويه
****
بهل مصايب. كلبي ذايب
وحايره ابين الغرب
علي بويه . منهو اليه
والدمع مني يصب
ترضه زينب حايره المدلله
عمله عملتهه مصيبة كربله
كل اهلهه مذبحه فوك الفله
وحايره ظلت وحيده ابعايله
ريتك وياي. وتنظر الفاجعه
ياعلي هاي. والجثث متكطعه
مابكالي من هلي
ترضه زينب تنولي
احظر احظر ياعلي يابويه
****
شكد صعب. هل درب
كل اخوتي امجتله
وين اروح. والجروح
بيه كلهه امحمله
جروح اخوتي بالكلب متوجره
امن الخيم ليهسه ناري مسعره
حسين طاح اومنه حزو منحره
وبـوفاظل بيـه اويلي مـادره
هجمت عداي. وحركو علينه الخيم
ها يرواي. انهض وشيل العلم
وينك انته كافلي
ترضه زينب تنولي
احظر احظر ياعلي يابويه
***
بهل حزن. ابقه اون
وحالي مثله ماجره
تحيرت. من طحت
وناري بيه اموجره
حايره مابين جم طفله وطفل
يسرونه وجتفونه بالحبل
زينب انه ونوخو ليه الهزل
من عكب خواني ماظل كل امل
انه ياناس. انه ام الخدر
طاح عباس. وشعمل بيه الدهر
وصوتي بالهم يعتلي
ترضه زينب تنولي
احظر احظر ياعلي يابويه
*
انه زينب كلبي شيب
عني راحو اخوتي
وين اروحن بويه اصيحن
وتجري ظلت دمعتي
بويه وين انطي الوجي متحيره
زينب انه الويه اخوتي امخدره
هسه وين وكبل جنت امدلله
وسفه مجتوفه واروح اميسره
ويه ظلام الذبحو بسهم الطفل
امشي للشام مجتفه وفوك الهزل
حزن كلبي يمتلي
ترضه زينب تنولي
احظر احظر ياعلي يابويه
كلمات
سيد حمزه الاعرجي
(زينب وامها الزهراء ع ) نزال
هاييمه
هاييمـه اشلونج
هاييمه
شو تـغير لـونج
يايمه يازهراء
-----------؛؛؛؛؛؛---------
يمه اشوفج لازمـه ظلعج تـونـين
ريت ظلعي الينكسر ياأم الحسين
ليش تجري دموعج وليه تنظرين
خاف يمه ابهل مسه عني تروحين
هاييمه
وين اروح ابدونج
هاييمه
شـو تـغير لـونـج
**
يمه من كسرالظلع ماشفتي راحه
الليل متنامينه ليش الحد صباحه
بالدمع والحسره تكظينه اونياحه
ظلعج المكسـور ماطابت جراحه
هاييمه
وايدج اعله امتونج
هاييمه
شـو تـغير لـونج
****
ريت ظلعي الينكسر من دفعت الباب
ولااشوفن صدرج امن العصره ينعاب
يمـه من امصيبتج گلبي تره أنصاب
دمج الينزف اشوفه اوجرحه ماطاب
هاييمه
حمره ليش اعيونج
هاييمه
شـو تـغير لـونج
***
الله لايرحم الطفه من حياتي اشموعي
كل مسيه على افراگج يمه تجري ادموعي
ريت يمه ابدال ظلعج كسروهه اظلوعي
رحتي عني وانه اصيحن هايروحي لوعي
هاييمه
يكون الله ابـعـونج
هاييمه
شـو تـغـير لــونــج
**
يمه من يوم المشيتي وانه اظل ياحاله
باجر ايدور الزمان اعلينه تـبدي افـعاله
جم مصيبه اتمر عليه وعيني بس هماله
وانـظـر اخواني رميـه وتـهجـم الـخياله
هاييمه
ابكربله ايفجعونج
هاييمه
شـو تـغـير لـونـج
**
گلمات
سيد حـمزه الاعرجــي
نزال
الوداع الوداع ياحيدر
الوداع الوداع ياحيدر
////////
الليله أنودع علي والينه
لاجن مصابه يظل ياذينه
كل يتيم الليله الله ايعينه
على مصابه كلمن اتهل عينه
والي اليتامه *ماتم صيامه
ايتامه تدعي* يكوم ابسلامه
/////////
رحمة الله رايح أيفكدونه
الجان تحرسهه اليتامه اعيونه
اليطعم الجوعان من ماعونه
ليش دين الله العده ايغدرونه
راسه تصوب *بالدم تخضب
ايتامه ظلت* بغيابه تنحب
/////////
ظلت الايتام تبجي ابابه
وينعه ظل ابكل مسه محرابه
علي فكده يصعب اعله احبابه
نعلت الله على كلمن صابه
هاي المصيبه* والله عجيبه
شيبك يحيدر* بالدم خظيبه
/////////
زينب الليله تغير لونهه
حين شافت طبرتك بعيونهه
ياعلي آيكون الله أبعونهه
كوم وانشد عالعقيله اشلونهه
والله هظيمه* تصبح يتيمه
صاحت يبويه *عليه انته خيمه
/////////
وداعت الله وادعو الغالي
علي راح وظل مكانه خالي
صاحو الايتام صوت العالي
منو مثلك ياعلي ايصح والي
رايح ولينه* ماظن يجينه
ماعدنه غيرك *ارحم بجينه
////////
كلمات سيد حمزه الاعرجي
نزال
خويه ياغيرة علي يبوفاضل
منتـه گـتلي ادللي يبوفاضل
يبوفاضل يبوفاضل
****
امن الوطن وياك اجيت امدلله
يبوفاضل وانته تـحدي القافله
ليش وحدي تالي اظل ابكربله
وصرت انـه اتكفل ابهل عايله
حالي من دونك صعب
راح اظل بـين الغرب
بعد ماعندي آمل
يبوفاضل
*
يابوفاضل من رحت صوب النهر
جم طفل عطشان جيتك ينتظر
بالخـيم وگلـوبهه الـتسعر جـمر
اتصيح ياعمي اوتهل دمع النظر
خويه من يوم الرحت
والله خويـه اتحيرت
فركتك ماتنحمل
يبوفاضل
**
من شفت حسين وحـده مـن رجع
محني ظهره وكلبي حسيته انفجع
گتله ياخويه اشجرالك هل وضـع
گـلـي يازيـنـب ابــوفـاضـل وگــع
طـاح حـيلي ونهدم
طـاح عامـود الخيم
ريته وافاني الاجل
يبوفاضل
*
يابوفـاضل دارت عليـنـه العـده
وظل ابوالـيمـه أخـوك الوحـده
ابغيبتك يابو الوفه اعلينه أسده
هذا يومك حـان خويـه موعده
كوم خويه امن النهر
هـذا يـومـك ياگـمر
خويه ياريتك عدل
يبوفاضل
**
حسين وحده وماله واحد ينصره
وكـل اهـل بـيتـه رمـيــه عالـثره
بالغدر طاح ابواليمه اعله الـثره
والشمـر شـفـتـه يـحـز ابـمنحره
ريـت تـنظـر حالـته
الـخيل لـمن داسته
حايره ودمعي يهل
يبوفاضل
**
من طحت وياك احس طاح الكلب
ياگـفيلـي راح اظـل بــين الـغرب
حالي ياعباس مـن دونـك صعب
ترضه بصياط العده خويه انظرب
هـجمت علينـه الـزلم
وحركوا علينه الخيم
كوم يا أبن الفحل
يبوفاضل
**
الناس ماعدهـه رحـم ياباالفضل
يضرب أمتوني بـل صياط الـنذل
ماسلم مـن الظرب حـتـه الـطفل
للسبـي حـضراو ياخـويـه الهـزل
الكون بعيوني انـطفه
اجفوف اديه امجتفه
يسروني عالهزل
يبوفاضل
***
گلمات سيد حمزه الأعرجي
(زينب والهلال)
من هل الهلال ظل دمعي همال
شفته وتغيرلوني ريته العمه بعيوني
ظل دمعي همال
-----------؛؛؛؛؛؛؛؛؛؛؛؛؛؛-----------
ياريته عاشور الحزن لابين آنه اهلاله
ولاشوفه ابنص السمه وعيني بدمع تبراله
گلبي كسرته ابطلعتك وأنظر الك ياحاله
أتصور الصار أوسده ومن هجمة الخياله
من شافته العين بي راح الحسين
وراح الگفلهاظعوني ريته العمه بعيوني
ظل دمعي همال
--------------؛؛؛؛؛؛؛؛؛؛؛------------
لارحمه عندك ياشهر اشويه أرحم حالي
شعندك بعد عندي وانه الفاكده جم غالي
ياريته يلفيني العمه ولاشوفك أنته كبالي
اشلون أشوفك من تهل اوبيك انمرد دلالي
جرحك فلا طاب ياشهر المصاب
شنسه العده اليسبوني ريته العمه بعيوني
ظل دمعي همال
--------------؛؛؛؛؛؛؛؛؛؛؛؛؛---------------
شذكر مصايب كربله وجرح الگلب شيظمده
ماتطفه نار امصيبتي ولاگلبي حزنه يهده
أذكر اخويه الي وگع ولا ناصر الظل عنده
نايم بگه أبحر الشمس فوك الترب ظل خده
راح الاخو الجان وينادي عطشان
بي العده فجعوني ريته العمه بعيوني
ظل دمعي همال
--------------؛؛؛؛؛؛؛؛؛؛---------------
هلالك يشهر النايبه وسط الگلب ظل جرحه
وعليه يومك من يهل ياريـته ماهل صبحه
أتذكر العاشر أظل بي انذبح چم ذبحه
شحال اليظل ابغربته طير اوتكسر جنحه
أتـذكر أيـام يسبوني ظلام
فوك الظرب شتموني ريته العمه بعيوني
ظل دمعي همال
--------------؛؛؛؛؛؛؛؛------------
ماانسه أيام السبي مـاانسه ذيچ الأيام
وامتوني زرگه امن الظرب ماعدهـه رحمه الظلام
وبالكوفه چم شامت شفت وأصعب بعد جرح الشام
ياشهر بيك اشگد شفت اولاهده جفني اولانام
بيك الگلب شاب جرحه فلا طاب
إم الخدر عرفوني ريته العمه بعيوني
ظل دمعي همال
---------------------؛؛؛؛؛؛؛؛؛--------------------
من المصايب شيبت وعمري كظيته ابلوعه
من صغري وياي الحزن بكل العمر مفجوعه
مايشفـه جرح امصيبتي ولاجفني مل ادموعه
أتمنيته وافاني الأجل عمري انطفة أشموعه
كل عمري أحزان ريت الأجل حان
اتمنه أخوتي يدفنوني ريته العمه بعيوني
ظل دمعي همال
--------------؛؛؛؛؛؛؛؛؛--------------
گلمات سيد حمزه الأعـرجي
نزال
باقي أيام المحرم والحزن يبدي
احظر اوياي المأتم يمه يالمهدي
بكل عزاء أنه الزجيه
انعـه ودموعي جريه
----------------؛؛؛؛؛------------
باقي أيام اويهل شهر النوايب
يمه يالمهدي المحرم گلبي ذايب
عظم الله أجرك ابهاي المصايب
من يعينك عالمصيبه وانته غايب
من يهل عاشور وتعاين على هلاله
بي الحسين وتسحكه عشره خياله
يامصاب الغاضريه
انعه ودموعي جريه
------------؛؛؛؛؛؛؛؛؛؛؛؛؛----------
يعينك الله من يهل عاشور شهره
ينفجع گلبك ييمه أومن يصبره
يرسم ابعينك صور يالمهدي كثره
وانه يايمه يعيد الظلعي كسره
اذكر ظلوع ابني يمه وانسه أظلوعي
واذكر ادموع العقيله وانسه ادموعي
الشافت اخوتهه رميه
انعـه ودموعي جريه
----------------؛؛؛؛؛؛---------------
مـن يهل اذكر ييمه ليلة العاشر
شخله بحسين العطش وبحالته صاير
للخيم ينظر ابـعينـه وماأله ناصـر
وزينب اتعاين لخوهه تكسر الخاطر
دارو اعله حسين اخوهه وزينب اتشوفه
شحالهه التنظر اخوهه الوادم اتطوفه
دارو اعليه ال اميه
انعه ودموعي جريه
----------------؛؛؛؛؛؛--------------
وينه اليواسيني وينه وتهمل ادموعه
على اولادي ابكل زمن ابقه انه مفجوعه
من شفت حسين أويلي مهشمه ظلوعه
وعالنهر عباس طاح جفوفه مگطوعه
چني أتصور على التـل واكفـه زيـنب
تصيح ياخويه واخوهه عالثره مخضب
جثته ظلت رميه
انعه ودموعي جريه
---------------؛؛؛؛؛؛؛--------------
بالمجالس يمه احظر هذا طبعي
بالعزه اعله الباب اگعد وجري دمعي
ابجي عالمظلوم وانسه حته ظلعي
من يصيح حسين بالمجلس الينعي
أويا أصيح أبصوت بس محد يسمعوني
الطم اظلوعي على أبني والطم عيوني
والطم بثنين أديه
انعه ودموعي جريه
--------------؛؛؛؛؛؛؛---------------
گـلمات
سيد حــمزه الاعــرجي
شور كعديه او مقدمة مجلس
مولاي مولاي: ياحسين
****
يحسين اعله حبك دوم
باقي وماعفت دربك
لأن ادري العمر ميفيد
ومايسوه بله حبك
الدنيه وكلشي يامولاي
خالقهه الك ربك
وبابك للخدم مفتوح
حنين واعرف ابگلبك
خليني اضل ابخدمتك
وتعايش اويه امصيبتك
ويه اليخدمونك صدك
وماانطرد من رحمتك
مولاي مولاي : ياحـسـين
***
اتمنه اشكثر مولاي اريد اويه اليخدمونك
أحلفك بأمك الزهره عليه نظره بعيونك
من دونك اصيرن وين اتيهن والله من دونك
ارزقني الدمع والنوح وعيش امصيبة اظعونك
غيرك فلا يحله العشك
خليني احبك من صدك
من امك كاتلني الخجل
بمجلسك خليني احترك
مولاي مولاي: ياحسين----
**
من دونك اروحن وين خلافك كلشي مااسوه
بس اليخدمك مولاي حياته ايحس صدك حلوه
اليخدمك ينوصف عطشان وكلبه ابمجلسك يروه
العالم كله والموجود
كلنه أنروح الك فدوه
من فدوه اروح الخدمتك
وماكو مثلها امصيبتك
أمنيتي هايه بالعمر
اتمنه اموت ابحظرتك
مولاي مولاي: ياحسين
****
كلشي قدمة لله حته طفلك اليرظع
مولاي واهل بيتك كبالك صرعه تتكطع
الدينك كلشي ظحيته ويامحنه البعد افجع
زينب تنسبي اخلافك
لديار الغرب تطلع
جم طفله ذوبهه العطش
ذاك السبي ابليل اهدعش
وراسك يرفونه ابرمح
وجسمك على الغبره انفرش
مولاي مولاي ياحسين
****
كلمات سيد حمزه الاعرجي
عـودة زينب للوطن يمحمد
بلايه زلم رد الظعن يمحمد
گوم أختك أتلگاهه
بس العليل أوياهه
يمحمد
*
زينب إجت لرض الوطن تتعثر ابمشيتهه
متكبعه بالهم والحزن ماتنوصف حالتهه
يمحمد اتلگه الظعن رد خالي من اخوتهه
الجانت أميره امدلله ردت تهل دمعتهه
اتلگاهه زينب بالدرب يمحمد
ردت اوملجومة گلب يمحمد
ظيم الدهر راواهه
بس العليل أوياهه
*
ياجرح شحجي ياألم جروح العقيله اهوايه
گافلها طاح اعله النهر وطاحت ابگتره الرايه
عباس مايرجع بعد اليروي العطاشه ابمايه
وزينب بگت تتنطره يرجع انطاها احجايه
كل ظنها يرجع للخيم يمحمد
وبجوده يرويها الحرم يمحمد
راح وبعـد ماجاهـه
بـس العليل أوياهـه
*
ياريت جنت ابكربله وتشوف حال الأطفال
يمحمد بهذا الوضع عطشانه ظلت ياحال
حسين رد محني الظهر من طاح اخو الگفال
شافته زينب من رجع والدمع منهه همال
ابياحاله اخوهـه اتلگته يمحمد
محني الظهر من شافته يمحمد
راح الاخـو نـاداهـه
بس العليل أوياهـه
شحجيلك اصار اوجره يمحمد ابطف كربله
من هجمة خيول العده وحسين ظل محد اله
عطشان أبواليمه بگه وعطشانه كل العايله
وعبدالله ظامي ينذبح صوبه ابسهمه حرمله
مارحمو ابحال الطفل يمحمد
بـيد ابـواليمه ينجـتل يمحمد
شمعه السهم طفاهه
بـس العلـيل أويـاهه
****
راح ابواليمه اومارجع يمحمد بهذا السفر
مذبوح ظل ابكربله ولي گطع رأسه الشمر
وجسام طفوا شمعته واتحنه من دم النحر
واليشبه طاها المصطفى جثته عالغبره وذر
هجموا فرد هجمـه الزلم يمحمد
واعله الحرم حرگو خيم يمحمد
صوط العده اتولاهه
بـس العليل أوياهه
****
زينب خذوهه اميسره مسبيه لرض الگوفه
يمحمد الديرة غـرب اوفوك الهزل مجتوفه
والشام مامثله جرح ريتك وظعها اتشوفه
جم شامت الينشد اجه وين ابخدر معروفه
تتشمت الناس الاجت يمحمد
فرحانه گلهـا اتفرجت يمحمد
شلون الدهر خلاهه
بس العليل أوياهه
****
گلمات
سيد حـمـزه الأعرجي
هوسات
الحمد لله وصل عـاشور وحاظر بأول أيامه
وبالموكب اصيح حسين واطبر هامتي ابقامه
اريد الزهره تقبلني وتحسبني اويه خدامه
اوخادم لحسين ايسموني
سيد حمزه الاعرجي
يـامظلوم حسين يـامظلوم
يـامظلوم حسين يـامظلوم
--------------؛؛؛؛----------------
زيـنب تنادي حـايـره ظلـت بـلاوالـي
من طاح اخوهه عالثره والمهر رد خالي
يصهل تعنه للخيم وابصوت ظل عالي
عـباله بالـخيمه زلـم تـفزع على الغالي
يـامظلوم حسين يـامظلوم
------------------؛؛؛؛------------------
گلبي أنخمش من عاينت لمن شفت مهره
متعـني لينه للـخـيم مـن الـدمـه حــمره
يصهل يحشم بالـزلم رايـدهـه اتـنـصـره
مايدري ظلينه حرم منهو الذي أيحضره
يـامظلوم حسين يـامظلوم
----------------؛؛؛؛؛؛؛----------------
دارن عليه من كل گتر ويلطمن اعله الراس
يامهر كلي ظل عدل لو ذبحته الارجاس
منهواليرد عنه العده وشبيهه هاي الناس
ياريته ابوفاظل عدل يتعنه ليه عباس
يـامظلوم حسين يـامظلوم
---------------؛؛؛؛؛؛؛؛---------------
يامهر أرحم حالـتي عـن حال ابـواليمه
حاجيني طاح ابياگتر أرد اعـتني يـمه
أبن أمي ظل فوك الترب أبياوضع جسمه
عطشان وابحر الشمس ينزف بگه دمه
يـامظلوم حسين يـامظلوم
-----------------؛؛؛؛؛----------------
يامهر طـاح ابيا كتر لـيه خـلي أتـعنـه
عطشان ماي أمنين أجيب اوحته أشربنه
لو نايم أبـحر الشمس والگلبي أظمنـه
منهو اليساعدني عليه للخيمه أجيبنه
يـامظلوم حسين يـامظلوم
------------------؛؛؛؛؛؛؛-----------------
واصلت الحره اوشافته تجري دمه العبره
كاعد على صدره الشمر وايگطع أبنحره
ياناس هذا أبن النبي منهو الذي أينصره
لمصيبته حـته السمه ظلت عليه حـمره
يـامظلوم حسين يـامظلوم
-----------------؛؛؛؛؛؛؛؛--------------
يـم ابواليمـه تـنـتحب زيـنب الـمظلومه
بالحومه وابحرالشمس وامسلبه هدومه
ماظل بعد عدهه ولي فوك الثره نـومه
كلمن ذبيح أبمصرعه أوتجاره أدمومه
يـامظلوم حسين يـامظلوم
--------------؛؛؛؛؛؛؛--------------
گلمات
سيد حـمـزه الاعرجي
نزال +
يبوفاضل يخو زينب
يبوفاضل يخو زينب
****
وينك يبوفاظل ينور اعـيوني
محتاره وحدي والعده يولوني
جيتك يخويه وشوف حال امتوني
ترضاهه بالسوط العده يظربوني
ياخويه وينك من فدوه العينك
دهـري دولبني أبگطعة جفينك
بـغـيابـك أتـعذب
يبوفاضل يخو زينب
**
ويـن الـوعد يابالفضل جاويـنه
ماعدنـه والي خويـه ويحامينه
انته الكلت يابو الوفه أترد لينه
وسكنه تـنادي مـارجـع والـيـنه
صاحت أسكينه وينـه والـينه
عـمـه يـازيـنب مـارجع لـينه
والجـيتك أتـراقـب
يبوفاضل يخو زينب
**
أطفال ظلت تنـتظر عطشانه
تأخر علينـه والـعطش اذانـه
مارد علينـه أوننـتظر خلانـه
تأخر يعمه عمي شو ماجانه
بالخيمه اتاني جم طفله اتعاني
تنادي عطشانه وعـمي ماجاني
تـنـشدني وأتـعاتب
يبوفاضل يخو زينب
****
ماتـدري طـايح عـالنهـر والـيهه
وجفوفه فوك المشرعه مكطعيهه
وسهـم الـرزيـه عـيـنـه أمطفيهه
هـيهات يـرجـع للـخـيم اعـليـهه
گـطعوا جـفيـنـه ومطفيه عينـه
والجربه طاحت بگطعة أديـنـه
وابــدمــه أتـخـظب
يبوفاضل يخو زينب
*
حسين وحده اوضل يدير ابعينه
لانـاصـر اليـمـه بـقــه وايـعـيـنـه
اخـلاف عـيـنـه منهوا اليحامينه
ياخويه كوم اوشوف حال البينه
محتاره ابغـربه يالگافل صعبه
ظلت اعـيوني الجيتك تـتربه
مـحـتاره يـالـغايـب
يبوفاضل يخو زينب
****
زيـنب أنه اختك ياكمر جاجيني
اخـلاف عـينك عـدمن أتـخليني
ياخويـه كـوم وللـوطن وديـني
خاف العده عگبك تره تسبيني
خلافك يسبوني يانـور اعيوني
عدوانك باجر ولـيه يـولـوني
واخلافك اتــسـلـب
يبوفاضل يخو زينب
***
گلمات سيد حـمزه الاعـرجي
نزال
ناذره اسنيني واربع ابنيني
فدوه الك يبن الزجيه ياحسين
****
ياحسين انته الاعز من روحي اليه
واربـع ابنيني فـداك ابــن الزجيه
مقصره لو انطي لك عـمري هديه
شلون ماشـوفـك بـعد تبعد عليه
رايـد تسافر كلبي ظل حاير
غيبتك صعبه عليه ياحسين
***
تموت روحي لو رحت عنهه وتهاجر
وكلبي شيصبـره اذا عـنـه تسافر
ميته ريت ولا اشوفن يجي باجر
بروحتك ماتـنشف عليك النواظر
صعبه من دونك فـدوه لعيونك
مااعوفك مو بـديـه ياحسين
***
اربـع اولادي الك فـدوه انذرتهم
ربي وافقني وعلى مودك جبتهم
عـشره خدامك يـبواليمه ردتهم
ذوله خدامك يـبواليمه اربعتهم
اغله ماعندي يابعد والدي
انته اعز من روحي ليه ياحسين
****
سافرت عني يغالي ودمعي سجاب
بروحتك كلبي لچمني ولسه ماطاب
يعينه الله اليفكد امن عيونه الاحباب
أحسب الجـيتهم اوعيني على الباب
ساهره اعيوني لمته تلفوني
ادعي ربي ابكل مسيه ياحسين
****
لن ابن حذلم سمعته باالمدينه
يصيح مات حسين وخوانه وبنينه
راح ريحانـة رسـول الله نبينه
غدرته الكوفه وسف راح امن ادينه
يابعد روحي مابطل نوحي
ريت وافتني المنيه ياحسين
***
كلمات سيد حمزه الاعرجي
ياشهــر الاحــزان ماكلك هله
بيك اذكر امصاب عملة كربله
بيك اخوتي عافوني
لسـه الـدمع بعـيوني
ياشهر الاحزان
*
انه زينـب ياشهـر جنك نسيت
بيك جم مــره يلهـلال أنسبيت
احبابي ماجو وانته اشوفنك اجيت
انتظرهـم لسـه أخـوانـي بگيت
اعيوني عـالباب ظليت انتظر
جايمته الاحباب وعـليـه تـمر
ماظن بعد يلفوني
لسه الدمع بعيوني
ياشهر الاحزان
*
ياشهـر ياريـت ماشـوفـك أبــد
من المصايـب بيك دلالي انمرد
شحجي عنك ياشهر وصعب بعد
بيك ذبـحوا حتـه طفل البلمهد
حته الطفل راح منك مـاسلم
عبدالله ذبحوه ابزغره ابسهم
وابمنحره فجعوني
لسه الدمع بعيوني
ياشهر الاحزان
*
بيك ياشهـر الحزن راح الخدر
من وكع حـسين من فوك المهر
بعيني شفته من يحز نحره الشمر
ريت هل ساعـه ولا طال العمر
بعيونـي شفته نـايـم عـاالترب
موبيدي عفتـه بعدوني غصب
عنه غصب بعدوني
لسـه الدمع بعيوني
ياشهر الاحزان
ياشهـر شـيفيـد اوياك العـتـاب
انه زينب بيك صرت ام المصاب
امن المصايب ياشهر كل راسي شاب
امكطعه بالحومه من شفت الركاب
تالـيها ياحـيف امـشي امـيسره
مجتوفه بحبال الجنت امخدره
زينب انه ايعرفوني
لسه الدمع بعيوني
ياشهرالاحزان
ادري مايقبل گفيلي اعله الجرالي
من سبوني مادره ولاشاف حالي
الچان مايرضـه أبـد يـطلع خيالي
من سبوني ياشهر مـاعندي والي
راح الـگـفلني وطاحت رايته
گطعوا يساره وگـطعوا يمنته
راح الگفلهه اظعوني
لسه الدمع بعيوني
ياشهر الاحزان
*
ريـت ميته ياشهر ويـه اخـوتي
ولابكيت الوحدي واتهل دمعتي
خواني راحو وانـه اظل أبونتي
ياشهـر ياحـيره تشبـه حـيرتـي
مشتاكه ظليت الاخواني اشكثر
من دون الاحباب مـاريده العمر
راحو وانـه خلوني
لسه الدمع بعيوني
ياشهر الاحزان
***
كلمات سيد حمزه الاعرجي
(مولاتي العليله ع)
راحو احبابي كلهم سـويه
وانه بمصابي شفت المنيه
راحو ماظـن يـردون
راحو وبحالتي شلون
****
فاركت احبابي ليش ابلحضه وحده
وعمري احسه من مشو ماي اوتبده
على احبابي ياخلك ياهـو الانشده
وراح ويه اهلي اخويه الجنه ورده
راحو اخواني وكلهن خواتي
دهري راواني ظيم ابحياتي
حالي أيبچي العيون
راحو وبحالتي شلون
****
عميه ريت اعيوني من سافر ضعنهم
ولا اشوفن أهلي راحو عن واطنهم
شاب راسي وحيل اذاني فكدهم
ادعي ربي بكل مسيه ليه ردهم
نـاري بظلوعي ظلت سـريه
تهمل ادموعي صبح ومسيه
داري عنها يشيلون
راحو وبحالتي شلون
****
راحو اهلي وبالظعن كلهم سويه
راح عبدالله اومشت اختي رقيه
على حالي أهلي بچو كلهم عليه
راحو اوخلوني بدموعي الرزيه
توسلت بيهم بس ماخذوني
گمت اناديهم لمن جـفـوني
تـاني ريض بالضعون
راحو وبحالتي شلون
****
بعد ماتسوه الحياة ابدون الاحباب
صعبه والله الدنيه عنه الاهله غياب
وانـه يوميه اناطـر دكـت الباب
جرحي والله من مشو ليهسه ماطاب
دمعي بعيوني مـافـارك الـعين
وحدي خلوني عني مشو وين
نـاري تـسعر بالجفون
راحو وبحالتي شلون
****
وين ماأمشي اشـوفن ذكره الهم
البيت خالي وبي اشوفن بس ذكرهم
بكل مسيه ابعيني يتحول رسمهم
وين عني هسه مااسمع خبرهم
أدعي يوميه يرجعون الاحباب
وانتظر جـيه وعـيوني عـالباب
ويلي ماظن الي يجون
راحو وبحالـتي شلـون
****
كلمات سيد حمزه الاعرجي
انه العليله
راحو هلي وخلوني
بس دمعتي بعيوني