الناشر احمد الفاطمي

13 June 2025 17:53

68 حميده بنت مسلم سلام الله عليهما

يتمها الدهر وامست حزينه
گلبها اموجر ودايم ونينه
هظيمه. هظيمه. هظيمه.
________________________

الچانت ويه والدها اتدلل
گلبها اتصوب او بل هم تعلعل
متنها من چثير الون تهدل
راح الچان غاطيها ابحنينه
________________________

ابوها الراح للكوفان ما رد
من يوم المشه كل حيلها انهد
ازيد بچت من يعگوب ازيد
اعله مسلم ضلت ابنيته رهينه
________________________

تنعاه الصبح بل ليل تنعه
حنينه او للگلب والله تشلعه
تگول الله وكبر ردت اودعه
واشم صدره وابوس اثنين ادينه
________________________

بالكوفه تجندل ما اجاها
ولا يدري ابنعاويها او بچاها
حماها او راح من عدها حماها
برض كوفان اويلي امگطعينه
________________________

برض كوفان وليه الناس يولوه
بحجار واعصي وارماح يرموه
ميت وابحبلهم حيف جروه
ابنص اسواگهم ضل ساحلينه
________________________

يعين الله حميده راح ابوها
عليه يحچون الها او عذبوها
يخبروها اعله جثته جرجروها
امن الدم والترب ما غاسلينه
________________________

تنوح او يمها ابو السجاد ينعه
تهل دمعه واهو ايسل دمعه
ذاب يا حميده اتگول شمعه
يتيمه اهو سبيه اويه الضعينه
________________________

ابو فاطمة الطائي

الناشر احمد الفاطمي

13 June 2025 17:53

66 العليله عليها السلام

يا دار المـا بيهـا انفـاسـك چيـف اسكنـهــا .. يا حسين
اوروحي المتعوده اعله اعيونك شيسكّنها .. يا حسين
يا يوم اتكحلها اعيوني .. بدروبك راح ايدفنوني
______________________________________

يهل ماشي الصحاري الطف أبأمل كل خطوه يتبدد
مثل غيمه ابعدت عني بعد هيهات ما تنرد
ابكل خطوه اويه ممشاكم شيبه ابراسي تتجدد
بچيت الحد ضعف شوفي او بعد لدروبي ماوچد

نسّانـي افراگـك كل علـه او ذيـچ الآمـي .. يا حسين
بس اغيابك ضل يوجعني فتت اعظامي .. ياحسين
عحزو جيراني ايداووني .. بدروبك راح ايدفنوني
______________________________________

اشوكت واترد على ابنيتك يبو اجروحي أشكثر أنطر ؟
انه العابر صبر أيوب صبري او چا بعد شصبر
اوعلي دموعي گضن واصبح جفن عيني دماء أيدر
اتعبت بويه .سگمني الهم اريد الحالتي تنظر

قسما بالزهره او محسنها او ذيچ اللوعه .. ياحسين
لو يعگوب ايشاهد حالي يحني اضلوعه .. ياحسين
ماعرفوني الي شافوني .. بدروبك راح ايدفنوني
______________________________________

وحگ عينك يماي العين بعد ما بيه حيل ابچي
او لون اندل طريجك زين اجيلك زحف واتوچي
وابجيها حرم واطفال عن حالي امن اريد احچي
واضل وياك حد ما موت واگل لخيولهم دُبچي

خل الخيل اترض اضلوعي. ختـ گطعني .. ياحسين
لموت اهون من ضيم افراگ المشيبني .. ياحسين
يمنسيني أسمي او لوني .... بدروبك راح ايدفنوني
______________________________________

لا مكتوب ولا طارش او بيكم ما دريت اشصار
الطف مدري اشعمل بيكم أشو گلبي اشتعل بل نار
واحساسي يگلي احسين ضامي ابكربلا محتار
جروحه الف او تسعميه ومتوسد رملها الحار

لا عباس اليمك حاضر. لا ضل ناصر ... ياحسين
اتتادي يا جاسم يل اكبر ابكسرة خاطر .. ياحسين
ريت اتگومون اتشوفوني. .. بدروبك راح ايدفنوني
______________________________________
يچني أنظر على الرامي يصوب چبدك او يفرح
واصد حاقد حجر بيديه فتحه ابجبهتك يفتح
واشوفنك من اترافس او دمك عل ارض يسفح
او شمر گاعد على صدرك اومن مگفه بده يذبح

ايحز ابنحرك چني انظرله وانظر عينك .. ياحسين
اوچن زينب مذهوله او تسمع صوت اونينك .. ياحسين
نادت تركوه او ذبحوني .. بدروبك راح ايدفنوني
______________________________________

اضنها هاي هيه اوياك واضن احساسي بامچانه
ما دامك بطيت أهواي يعني اتيمت آنه
يعني اعله الهزل زينب راحت لابنه مرجانه
او رقيه اتموت بل شامات . او رمله او ليلى حيرانه

هاذه الي چان امخوفني من هل سفره .. ياحسين
اتموت انت وما تاخذ روحي وابقه ابحسره .. ياحسين
ألمن ألمن خليتوني .. بدروبك راح ايدفنوني
______________________________________

ابو فاطمة الطائي

الناشر احمد الفاطمي

13 June 2025 17:53

64 العليله عليها السلام

گلبي من حدر ضعنكم لا صحه او لا يستچن
او ليل اليمرني مِسهِده ما غفه اسويعه الجفن
حسين بويه حسين بوبه
_________________________________

اتعاتب چم دوب بنتك والعتب ما ينسمع
فوگ علتي النوب جفني ورّماه سيل الدمع
من مشيت او لسه آنه احترگ مثل الشمع
جاعده ابدربك واتاني ليلي وانهاري أون
حسين بويه. حسين بوبه
_________________________________

أحسين بويه اشلون بيه گلبي ما ضل بي صبر
ضلعي محني او شاب راسي بأول اسنين العمر
تدري من اگعد وحيده ابداركم وكت العصر
چن احس ارماح گشره تطعن اصفاحي طعن
حسين بويه. حسين بوبه
_________________________________

حيل يراد ابغيابك وآنه كل حيلي گضه
والله ضاگ اعليه عگبك كل وسيع ابهل فضا
حتى موت الله ابغيابك گتلي اخذني ما رضه
لا تجي انت واشوفك او لا الموت اعليه حن
حسين بويه. حسين بوبه
_________________________________

يمته يرتاحن عيوني او يلفي طارش كربلا
يمته مو مرن عليه المرن أيوب أو هله
اوخل يمر اهواي واكثر بس غيابك مَحمله
الساعه التمر وانت مبعد تسحن ابروحي سحن
حسين بويه. حسين بوبه
_________________________________

حالي يحسين ابغيابك الله لَيشوفه البشر
اهموم وآلآم او مناحه ايفسّرن حتى الصخر
يل سكنت الغاضريه وآنه مالي مُستقر
هم يجي يوم واشوفك وانزع اثياب الحزن
حسين بويه حسين بوبه
_______________________________

هم يجي يوم او أشوفك واترس عيوني ضوه
او يرد عبدالله او رقيه او نگعد امگابل سوه
آنسه آنه أيام علتي وانت تنسه نينوه
اتصير هاي الدار حنه عگب ما چانت سجن
حسين بويه حسين بوبه
_________________________________

اتعود بيك الدار تزهر او روحي اتخضر ورد
مثل ميت روحه طلعت لاچن ابغفله ترد
بس يبويه اضنون عندي مردن اگليبي مرد
چني أسمع صوت ناعي ينعه صدر المنطحن
حسين بويه حسين بوبه
_________________________________

آخ يضنوني تگلي احسين عطشان انچتل
او زينب الوادم سبوها يعني مامش كل امل
يعني هسه انتي يتيمه لا عمام او لا أهل
أبچي من يرحم من دمعتچ خل عيونچ ينعمن
حسين بويه. حسين بوبه
_________________________________

ابو فاطمة الطائي

الناشر احمد الفاطمي

13 June 2025 17:53

62 القاسم عليه السلام

گومن هلهلن له يل فواطم
أجانه أمحنه عريس الهواشم
______________________

لا شارب أُمّيه او لا تهنه
او من حنه العجنته ما تحنه
عِمت عيني وگع چن طير جنه
أوليدي اليا حلاته او ماكو منه

ويلي امغيره ارسومه الصوارم
گومن هلهلن له يل فواطم
______________________

گومن يل فواطم خل نجعده
او خل انشوف يا جرح المِضهده
ابدموع العين خلني أضمده
مو بل گاع خل ابحضني اوسده

مو مالت ترايب خده ناعم
گومن هلهلن له يل فواطم
______________________

گومن يل فواطم خلنه ننعه
كل وحده اعله جاسم تضوي شمعه
راح اوليدي يا يمه اشيرجعه
أعاتب والعتب ما ضن يسمعه

ابسابع نومه هل مدلول نايم
گومن هلهلن له يل فواطم
______________________

نايم ما دره ابحيلي تهدم
عيني ما تهل دمعه تهل دم
اعليمن هل حلو طوله ايتخذم
او زهاب العرس والفرحه تولم

اوهل صار الزفافك كلشي والم
گومن هلهلن له يل فواطم
______________________

يتعب ارباي يعيوني او سهرها
رمله ابغيبتك محني ظهرها
الرايدتك ذخر تالي عمرها
اتمنه الليله تتوسد گبرها

چا ألمن أضل يمه يجاسم
گومن هلهلن له يل فواطم
______________________
چا ألمن أضل واشباقي ليّه
بس انت او رحت من بين اديه
يا عطر الحسن وامه الزچيه
جسمك صار للطف واهليه

اويلي امن الزمان اشبي ضمايم
گومن هلهلن له يل فواطم
______________________

ابو فاطمة الطائي

الناشر احمد الفاطمي

13 June 2025 17:53

60. للاكبر عليه السلام

يا علي الاكبر گلبي اتفسر
گلبي اتفسر يا علي الاكبر
________________________

يمه يا سباح گلبي گلبي بل نار ايغلي
يمه وين ارسوم وجهك صدگ هاذه انت علي !!
رحت مني اطوير جنه شو وذر جابوك ألي
كربلا اشتطلبني يمه او خلت ادموعي اتهلي

يا علي الاكبر جسمك اتوذر
گلبي اتفسر يا علي الاكبر
________________________

كربلا اشتطلبني يبني اوخذت منّ عندي الضنه
مِسعده چنت ابوجودك عايشه اسنيني ابهنه
چنت أگولن عندي الاكبر كلشي ماريدن أنه
هوّه نور اعيوني هوّه والعوافي والمنى

يا علي الاكبر حلمي اتبعثر
گلبي اتفسر يا علي الاكبر
________________________

هوّه نور عيوني تالي نور عيني ابلا ضوه
بل شمس نايم يويلي او خده بل گاع انچوه
الأحله من يوسف ضحكته مات ضامي او ماروه
ابمنحره التراب يسفي او دمه تارس نينوه

ياعلي الاكبر نحرك امطبر
گلبي اتفسر يا علي الاكبر
________________________

ابمنحره التربان تسفي نايم ابنص العده
وآل أميه اطبول دگت علي مات امعيده
روحي يبني اشلون تصبر اشلون اضلن هايده
وآنه أم مشلوع گلبي للوحيد فاجده

ياعلي الاكبر بيمن اتصبر
گلبي اتفسر يا علي الاكبر
________________________

آنه أم مشلوع گلبي تعب وامداره او ربه
ياعلي مو تدري عمرك ساعه ساعه احسبه
تالي هل طف شاد حيله او عله گلبي ايعذبه
عاف كلشي او جاي ليه تعب عمري ايسلبه

يا علي الاكبر هل دمع دم در
گلبي اتفسر يا علي الاكبر
________________________
عاف كلشي او خذك مني ريت ماخذ مهجتي
چا ييمه اشضال عندي او شنهو ضل ابدنيتي
وين الله او هسه اموت او گبل دفنك دفنتي
او تخلص اسنيني مثل ما ابعيني خلصت دمعتي

يا علي الاكبر حالي اتمرمر
گلبي اتفسر يا علي الاكبر
________________________

ابو فاطمة الطائي

الناشر احمد الفاطمي

13 June 2025 17:53

58 للقاسم عليه السلام

وحگ حسرات الحسين ماضل ماي بالعين
جاسم يا هوى الله خذاك امن امك البين
____________________________________

ألى ملچ الخذاه من بين الضلوع او يعرج للسمه بي
رسالة عتب مكتوبه امن الدموع يدري بيها ربي
تدري من خذيته اوياه مشلوع كل سباح گلبي
طفت شمعة حياته او كل الاشموع اضلم صار دربي

اقبضت روحين مو روح ضلت بس الاجروح
عيشتهن على الآه خذاك امن امك البين
____________________________________

يملج الموت سولفلي اعله جسام بانفاسه الاخيره
ساكت لو يون من گد الالام واجروحه الچثيره
اعله وجه احسين ينظر لو للخيام هل ناظر يديره
مدري اشچانت أمنيته يجسام امن اتلاگه ابمصيره

يموت اترأفت بيه ؟؟ تراهو البين گاضيه
وحيد ابولية اعداه خذاك امن امك البين
____________________________________

يملچ الموت ما شرّبته چف ماي من گبل المنيه
گبل ميروح چان ايسولف اوياي وادموعه جريه
يگلي من العطش متوجره احشاي يمه او لا أميه ؟؟
كتلني من مشه او يتلفت اهواي لاچني اشبديه

ذابل غصنه من راح شفته ايرفرف او طاح
مثل الطير ويلاه. خذاك امن امك البين
____________________________________

تبدد كل حلم راسمته بل عين. او تعب اسنيني ضايع
يا حضرة الموت احساب السنين هل مگلوب طالع
چنت احسب ابعرسه انحني الايدين وانزين الشوارع
اشموع او ياس وورود او رياحين البيهن گلبي قانع

تالي ذيچ الاخدود. الچانت مثل الاورود
متحنيات بدماه خذاك امن امك البين
____________________________________

يملچ الموت مثل اوليدي ما صاح زفته الصوارم
ما طشو املبس طشو ارماح ويلي ابگلب جاسم
هوسات او هلاهل ماكو واصياح ولا لمة فواطم
اهنا رامي وگف واهناك ذباح چا وين الهواشم

يملچ الموت وانت حاله اشلون شفته
يا رسمه الحلو تاه خذاك امن امك البين
____________________________________

يملچ الموت گل لوليدي وياك ما حسبت بامك
تعيش ابيا نسم رمله بلياك وانت الي تشمك
احرگت روحي ييمه ابنار فرگاك چن حرگة اخيمك
لا بيه اموت او لاني انساك. او ليخلوني يمك

يملچ الموت داويه. او شربت ماي انطيه
اوسلامي لا لتنساه خذاك امن امك البين
____________________________________

ابو فاطمة الطائي

الناشر احمد الفاطمي

13 June 2025 17:53

56. الخدمه الشريفه

يل خِذت عگلي او دليلي يا شريچي بالنَفس
والله احبك والله احبك والله احبك انت بَس
_______________________________

بالحواس الخمسه احبك بل مشاعر بل نبض
احسين هيه اشبيها غيرك شي حلو هاي الارض
كلشي بيها على روحي من عرضته ينرفض
احسين غيرك ماتريده اليوم باچر والامس
_______________________________

الما يحبك يبو سكنه عگله بي الف خلل
ما عرف طعم العذوبه مشربه بس المُهل
يا جلال الله او جماله البيك مسحوره المِلل
الحمد لله ان فؤادي يشعر اوياك ابـ أَنََس
_______________________________

حبك او هاي الخدامه هيه فخري والشرف
مجلسك والدمعه عندي تسوه أهلي والسلف
چني سلطان او مقدس يوم بل مجلس اگف
راسي يوصل للثريه او ثوبي بالعز انترس

_______________________________

الدين والقرآن انت والاصول او كل فرع
ما يتم توحيد ربي الا اجريلك دمع
والعقائد كلها تكمل يوم الطم عل ضلع
يامن الجنات كلها من ضيائك تقتبس
_______________________________

أحسين أحبك مو احچايه بل لسان او عابره
لا وحگ حسرات زينب والزچيه الطاهره
جلدي او لحمي او دمي . گلبي . عيني الناظره
كلهن ايحبنك انت عشگ بالفطره انغمس
_______________________________

آنه عاشگ آنه خادم آنه كل عمري الك
أوياك ما أمشي اويه غيرك أي يربان الفلك
شغل ويه الناس مالي گلبي لدروبك سلك
بل أمن بل راحه بل حب هل گلب وياك حس
_______________________________

مجلسك يومن اجي له والله احس روحي ترد
او چني ريشه في مهب الريح يوم الابتعد
احسين الزمني بدينك لزمة الحر للعبد
حطني بحسينيه اخدم خلي نيتي ابلا دنس
_______________________________

خلني اخدم بل مجالس راحتي ابهاذه العمل
اشويه ابچي اشويه انعه أشويه ارد المستهل
او كون وآنه ماي أوزع روحي ياخذها الاجل
وابمحرم موتي أريده هاذه منك ألتمس

_______________________________

أبو فاطمة الطائي

الناشر احمد الفاطمي

13 June 2025 17:53

54 مسلم بن عقيل

ياحي الله اجه الحيد
اليحسبها الحرب عيد
___________________

من عدهم خَذه الحيف
دِخِيل الله اشهل سيف
عطلها القوانين
المتى . والاين . والكيف

يمين اتشوفه وايسار
جمعهن ليل وانهار
الكوفه صاحت الغوث
ما تعرف شني الصار

مادرو هاذه السيف أَم المحشر؟؟
مادرو هاذه السيف أَم المحشر؟؟
______________________

ليفوگ ارتفع راح
يهوه چن جبل طاح
يطحن بالزلم گام
جمله يقبض ارواح

سكته او ماسمع صوت
رهبه او موزمه او موت
گام اتطيح الابطال
لو من يمهم نوه ايفوت

سيفه ايچوي الغيوم من يدناله ؟؟
سيفه ايچوي الغيوم من يدناله ؟؟
________________________

زلمه او ما أله أشباه
او بي اكبر عقل تاه
واحد لاكن اهواي
وين اتروح تلگاه

اهنا. واهناك واهناك
اشويه او غار مناك
مادرو يجي امنين
هاذه اوينه . لا ذاك

چن مارد سليمان فرهم بيده
چن مارد سليمان فرهم بيده
______________________

اهو تربات الافحول
عنه اشما ردت گول
هيبة جم نبي بي
حير كل الاعقول

شديدا حيل ذو باس
مسلم بيش ينقاس
عوزه اشويه وايصير
راعي الجود عباس

اول زلمه واحسين. بي متحزم
اول زلمه واحسين. بي متحزم
_________________________

آيه امن السمه جاي
مثله كون اكو اهواي
چا مامات الحسين
بالطف چا شرب ماي

مسلم وفه الاحگوگ
عنده احسين معشوگ
صانع لجله آيات
شگ احلوگ واحلوگ

تبچي اجيال واجيال خله الكوفه
تبچي اجيال واجيال خله الكوفه
________________________

مرسول امن الحسين
او خيّال الميادين
تحطه اعله الجرح طاب
مسلم كحلة العين

معدن داحي الباب
اي وامحير الالباب
خالد ذچره لليوم
او باقي اليوم الاحساب

صفره اتصير الاوجوه لو مر أسمه
صفره اتصير الاوجوه لو مر أسمه

__________________________

ابو فاطمة الطائي

الناشر احمد الفاطمي

13 June 2025 17:53

52. الاكبر عليه السلام

دنياي والمآي ذبحني اتلث مرات
مِن راح مِن طاح من گالو الاكبر مات
اعليه اباوع مِن ينازع گمت انازع
من گالو الاكبر مات
______________

بس عجاج او ركضه ينظر كربلا انگلبت عله ابنه
او يسمع امصايح سلفهم خل نگطعه اهنا ندفنه
او لن ابو الاكبر تغير لونه والونّ اليونّه
صارت أنفاسه أتگطع چن رماح او صوبنه

أيشوف السيوف اتطفر دم او أشلاء
أصياح وارماح او دگ اطبول الاعداء
أمة الشر شي تبشر شي تكبر
من گالو الاكبر مات
______________

كربلا انترست شماته او بل حُسين الكل تشفّه
او بيًن أحسين انكساره او دمعه ضل علخد يذرفه
هرول اعله اوليده لاچن حيل ماعنده او يسعفه
وصل يمه او كلّه يرجف ويل گلبي چنه سعفه

ألفاه او يلگاه ماكتر السالم بي
مذبوح واجروح من راسه الحد رجلي
جسمه بل بر قد تبعثر اشگد تحسر
من گالو الاكبر مات
______________

ينظر اوليده او تحسر ليش هيچي الله او لحد
خضب الشيبه ابدموعه عل ترب وياه تمدد
روحه طلعت من يشمه او فوگ خده ايخلي الخد
ايعاتبه ايگله يبويه امنين لي عگبك محمد

شماه حاچاه يبني تگعد لو اموت
بيديه ايهز بي وما ضل ابگلبه ابتوت
گلبه طاير حيله خاير حيره حاير
من گالو الاكبر مات
______________

آنه ابوك الما له غيرك بويه يا سباح گلبي
يبني چا بعدك عليمن بويه هاي اعيوني تربي
ثاري لسيوف المنايه اتعب او أحسب وأربي
علي بويه اعيوني راحن گوم دليني اعله دربي

أوحيد يا حيد ليش اتخليني اليوم
واسيوف واصفوف متحزمه اعليه الگوم
شو عفتني وحدي يبني عالي وني
من گالو الاكبر مات
______________

بويه معتازك يل اكبر طايح ابشده واربدك
بويه راح ايحز وريدي نفسه سيف الحز وريدك
موش وكت النوم دگعد اخذ من دمي الوريدك
الخاطري والخاطر أمك يالله گوم انطيني ايدك

انخاك ابلياك ارجع لخيامي اشلون
اهناك تتناك ليلى ابگلب المسحون
شرد أگلها يا أملها ايحين اجلها
من گالو الاكبر مات
______________

تقبل اتضل نايم انت والشمر يذبحني ضامي
يبني ترضه اخيول اميه تسحگ اضلوعي او عظامي
يبني شو گوم الخواتك راحن ايوجن خيامي
امك او أختك يروحن للسبي واني ابقه دامي

بس عود واردود احفظ خدر النسوان
مو خاف تنشاف خيّاتك بالديوان
ما يجاوب او عل ترايب لونه شاحب
من گالو الاكبر مات
______________

ابو فاطمة الطائي

الناشر احمد الفاطمي

13 June 2025 17:53

50. الحسين عليه السلام

حملناك هويه
عرفناك قضيه
هويناك سويه ... ياحسين
_______

لولاك الله والله منعبده
او لانعرف التكبيره والسجده
الدين دمك ساگي اهروشه
يل جدّه منه او هو من جدّه

انت الحمد والقدر انت السور كلها
انت الصحف والكتب من ربي نزلها
انت عدن والعدن ما تسوه من دونك
سورة عشگ خدمتك يومية ارتلها

للعيون ضواها
للگلوب هواها
للارواح دواها ... ياحسين
_______

اهواك انت انت لا غيرك
يلي العوالم عايشه ابخيرك
وين الگه مثلك باسط اچفوفه
بس الله يعرف شنهي تفسيرك

ليك الوجه وَجهت يا وِجهت آمالي
او ليك العمر فوّضت ياسيدي الغالي
ناصيَـتي او مهجتي دلالي وانظاري
يابو علي الحضرتك من هسه للتالي

يساكن دليلي
يخلي او خليلي
افرشتـ لك شليلي ... ياحسين
_______

فارش شليلي او فاتح أيديني
يل عودتني اهوايه تنطيني
هل مره جيتك عازتي عازه
عاشور هاذه اهواي بچيني

عندي طمع اعترف من اطلب ابكثره
وانت الذي ماتِهم من تنطي للفقره
جاي او ردت بالخدم بيدك تسجلني
رايد دموع او حزن رايد الف عبره

تزود دمعتي
حسرتي او عبرتي
اتقبل خدمتي ... ياحسين
_______
يامن خدمتك عز بلا ذله
والطاخ راسه اوياك يتعله
انت اتعرفني اشبيه ما بيّه
غيرك ابد انطيني ما گله

أمد أدي بس الك وانت الي تترسها
خل دمعتي بس الك والغيرك احبسها
منهو الذي يسوه أن ابچيله لو لحضه
غيرك يل امصيبتك لحروفي تخرسها

يمكسور يضامي
يمذبوح يدامي
اويلاه أمامي ... ياحسين
_______

امصابك غميج او لوعتك كلفه
أطوال السنين او هيه ما تشفه
أكبر هظيمه الما أله أمروه
لسه او بعد ضل بيك يتشفّه

ضلعك طحن ينطحن والشامت اتبسم
من يستمع للكسر ينظر عل امخيم
چن يگل للحرم ها هم تسمعنه ؟
رايد يرى زينبك گدامه تتألم
يصد وايتباها
والخدور لگاها
تصاعد بچاها ... ياحسين
_______

رغم السنين او طولت المده
الشامت هذاك انجاوبه انرده
انت ابجهنم انت واسيادك
او باقي الحسين او معتلي السِدّه

باقي او بقت هيبته عل عالم اتسيد
مثل السما مرتفع لا ما يحده حد
املاك او بشر لا تُعد تتسابق البابه
ومن السما خدمته مثل الرزق تنعد

رغم عل يضدنه
الحسين عشگنه
هويناه او يحبنه. ... ياحسين
_______

ابو فاطمة الطائي

الناشر احمد الفاطمي

13 June 2025 17:53

48 السيده رقيه عليها السلام

لارض الطف رسالة وِد
لحسين العلي مِبعد
أقريها اوبلكت الله يرد زينب يا زينب
________________________________

بدموع العين كتبت لحسين
أمًا بعدو يا غالي
ابگلب محروگ سلام او شوگ
من ارقيه الى الوالي

عذرا للطف ما جيتك وازاني الموت
يابويه أشگد تانيتك وانحب بسكوت
حد ما غمضت اعيوني وما منك صوت

زينب عمه أقريها
يم الوالد انعيها
وگولي اشبيها ما بيها زينب يا زينب
________________________________

اخذيله الروح واخذيله اجروح
من گبري الى گبره

سلميلي اعليه اترابه شميه
آخ أشگد احب عطره

گليله ابنيتك رادت اتزورك يحسين
واترش گبرك بميه من ماي العين
لاچن الشام أيموت للمشتاگين

گليله اشكثر تانت
حتى ابساعة الماتت
بابا بابا الك صاحت زينب يا زينب
________________________________

عباتي هاچ او تراچي اوياچ
گليله هذن ضلن

ضلن تذكار من ذيج النار
والباقي تره انهبن

الما جت اتزورك دزت ترچيه انذور
نذرتها ابيوم الگالو نسبي لخدور
گالت ياربي موتني ابطلعت عاشور

شلي ابعمري وايامي
واحسين انذبح ضامي
لا . وامشي مع الشامي زينب يا زينب
________________________________

لمن تِصلين گبر الحسين
او نويتي ازياره يازينب

يعمه افداچ نيابه اوياچ
أذكري گلبي المتعب

كتبي اعله الگبر بنتك گاتلها الشوگ
يامن صدرك ابحافر اصبح مسحوگ
گلب ارقيه ضل لجلك يسعر محروگ

تتحسر يوالدها
والدمعه اتحفر خدها
يمك محد ايردها. زينب يا زينب
________________________________

من اتسمعين حسرات احسين
كفي امن النعي كفي

لان ياذيه حچي التحچيه
هو ابحزنه متكفي

لتگليله بيه اشصار من ضربوني ابخدي
من چتفو ادي بحبال من سبو علي جدي
لتگليله محروگات اجدامي والجرح يدي

أحنين ميحمل شكوى
يامن عمري اله فدوه
يسوه هل تعب يسوه زينب يا زينب
________________________________

ابخرابة شام گلب معتام
تتلاهب تضل ناره

انحرم مولاي شراب الماي
وانا المحرومه الزياره

خيرني الدهر مابين اصبر والصبر علگم
لو دنيا بلايه احسين واخلص عمري ابماتم
گليله اشتريت الموت لنه امن الهجر ارحم

نامت بالگبر خاطر
ما تتذكر الحافر
او لا تبقه ابأمل باچر زينب يا زينب
________________________________

ابو فاطمة الطائي

الناشر احمد الفاطمي

13 June 2025 17:53

46. العباس عليه السلام

راح أخوي الچنت اشوفنه وطن
راح عامود الخيم حامي الضعن
يا أبا الفضل يا أبا الفضل
_________________________

حايره او بهمومي صرت امگبعه
راح كفالي او دليلي گطعه
عل شريعه اوصال جسمه اموزعه
وآنه ما أندل طريق المشرعه

اشلون اوصله واگله اعله المحن
راح عامود الخيم حامي الضعن
يا أبا الفضل يا أبا الفضل
_________________________

أشلون اوصل والنهر بيد الغرب
وآنه عامي اعيوني دخّان او ترب
خيل واسيوف او عساكر بالدرب
رحم ما عدهم ولا عدهم گلب

أشلون بيه مو طِحن گلبي انطَحن
راح عامود الخيم حامي الضعن
يا أبا الفضل يا أبا الفضل
_________________________
ارد الوذن بيه من شر العِده
ارد اگله الناس بينه امفرهده
ارد اگله ايگوم وايشوف اشسده
نار . وايتام ابرماد اموسده

هجن النسوان بالبر فرفحن
راح عامود الخيم حامي الضعن
يا أبا الفضل يا أبا الفضل
_________________________

الميت امن اصياحنه فز او گعد
يبو فاضل يمته تلفي اشگد بعد
نار وجّاها علينه ابن سعد
چم يتيم امن الذعر گلبه جمد

أشكثر علويات بسمك صيحن
راح عامود الخيم حامي الضعن
يا أبا الفضل يا أبا الفضل
_________________________

انت بس ما طحت يا راعي العلم
ركضت الصوبين كلها عل خيم
واحد اينادي الحرم وين الحرم
وين زينب أضربوها ابلا رحم
او مدري چم سوط العليه اتگطعن
راح عامود الخيم حامي الضعن
يا أبا الفضل يا أبا الفضل
_________________________

أمشي واتعثر واطيح اعله الوجه
مدري يا عباس لاوين اتجه
آخ من شفت الشمر ليه اجه
روحي ما بين الجوانح لايجه

صحت بالنسوان للهيمه اطلعن
راح عامود الخيم حامي الضعن
يا أبا الفضل يا أبا الفضل
_________________________

هجن النسوان بالحر والشمس
او هنه عطشانات من اول امس
او ضل وراهن يركض بسوطه الرجس
لا رحم عنده ولا بيهن يحس

لحد والله اجلود منها اتشلعن
راح عامود الخيم حامي الضعن
يا أبا الفضل يا أبا الفضل
_________________________
ابو فاطمة الطائي

الناشر احمد الفاطمي

13 June 2025 17:53

44 العليله عليها السلام

وين الذي متروس گلبه احروره
يمشي لبوي احسين هسه ايزوره
يلگاه بالطف ذابلات اشفافه
ايگله العليله ابغيبتك مكسوره

________

مامش ابهل ليله
طارش اليمشيله
ايشوف ابوي احسين شنهي اخباره

عني ليش اتعطل
هل سفر شو طول
ما دره الدلال تسعر ناره

ويه كل اغروب گلبب ايذوب تطلع روحي
گمت اصب دمعات والدمعات من اجروحي

وين الذي متروس گلبه احروره
يمشي لبوي احسين هسه ايزوره
يلگاه بالطف ذابلات اشفافه
ايگله العليله ابغيبتك مكسوره

_________
ما اريد أيامي
بيها بس آلآمي
عمر مابيه والدي ماريده

امعلعله او مهجوره
امصوبه او مكسوره
المثلي كل طب يا خلگ ميفيده

گلبي يصبح زين بس حسين يمسح فوگه
يمته هل وجنات ليله اتبات ما محروگه

وين الذي متروس گلبه احروره
يمشي لبوي احسين هسه ايزوره
يلگاه بالطف ذابلات اشفافه
ايگله العليله ابغيبتك مكسوره

________

الليل من يلفيني
چم حلم ياذيني
چني أشوف الماي يهدم داري

يجري چنه احيايه
منترس بدمايه
او يمه اشوف حسين ميت عاري

واگعد امن النوم بيه اهموم تترس ديره
همي چن يعگوب گلبي ايلوب من هالحيره

وين الذي متروس گلبه احروره
يمشي لبوي احسين هسه ايزوره
يلگاه بالطف ذابلات اشفافه
ايگله العليله ابغيبتك مكسوره

________

علتي تآذيني
والحلم صك عيني
المن اشكي الضيم واشكي البيه

والدي ما هوّه
والنفس بل گوه
من يجيب احسين وايحن ليه

من يگله الضيم مثل الغيم صب اعليها
بنته شبعت موت اصلا صوت ماضل بيها

وين الذي متروس گلبه احروره
يمشي لبوي احسين هسه ايزوره
يلگاه بالطف ذابلات اشفافه
ايگله العليله ابغيبتك مكسوره

________

طارش ابمكتوبي
رايده المحبوبي
خل يگله الموت دگ بيباني

موش من هالعله
العله تنعد سهله
آنه چاتلني هجر ولياني

افراگه طعن ارماح وسط اصفاح جسمي الخاوي
وني چن محموم وابكل يوم يصبح داوي

وين الذي متروس گلبه احروره
يمشي لبوي احسين هسه ايزوره
يلگاه بالطف ذابلات اشفافه
ايگله العليله ابغيبتك مكسوره

________
كربلا أشتاليها
يا عتب يكفيها
ليش دهرتني دهيره اعليمن

ابيا طلب تطلبني
كل مسه تكتلني
جرحتني اجروح لا ما يطيبن

احسين عني ابعيد وادري ايزيد ماله امروه
احسين خافن مات والخيمات بالطف تهوه

وين الذي متروس گلبه احروره
يمشي لبوي احسين هسه ايزوره
يلگاه بالطف ذابلات اشفافه
ايگله العليله ابغيبتك مكسوره

________

ابو فاطمة الطائي

الناشر احمد الفاطمي

13 June 2025 17:53

42. العباس عليه السلام

گمر وجهك أمان أو خزرتك موت
گمر مايعلى صوتك بالحرب صوت
للغيره محور للهيبه مصدر
____________________________

من يوم انخلق هل عالم
والباري نفخ روح آدم
ما شفنه بشر كالكافل
قَدر في هيئة ابنادم

اختزلها الغيره في راسه
جمال الكون باحساسه
شجاعه او معرفه او هيبه
جمر فنه الذي جاسه

والباري منّ الاوصاف قد كمله
الوفه تسعه او تسعين بالميه اله
جل الي سواه والزينب انطاه

الخوّه بس بل عباس متجسّده
المثل يوسف لحسين حگ يحسده
جل الي سواه والزينب انطاه

نهر يجري مراجل ما أله احدود
نهر وافروعه هنه الرايه والجود
ما منه اكبر للهيبه مصدر
____________________________

صوره من علي ابتكوينه
من غِيره انخلق مو طينه
مصدر للحياة اعيونه
اوچم موت انكتب من عينه

عنّه كربلا من تحچي
مدري تبتسم لو تبچي
حيره بالعباس حيره
من عنده إله جت تشچي

ما لا تطيقه العقول هو أفعله
المستحيل أله ايصير يا مسهله
اذا يغضب اتشوف ضلام اعله الاطفوف

إله الملعب او ويل لي زاحمه
لون للسمه ايطير هم يلزمه
اذا يغضب اتشوف ضلام اعله الاطفوف

قهر شبّعهم قهر شبّعهم أذلال
قهر نعم عباس هاذه مخزي الابطال
من عالم الذر للهيبه مصدر
____________________________

عنده امن السمه وكاله
منطي للخدر كفاله
هو الزينب الدگ صدره
منو مثلي وفي ابمقاله

كفو ياهو الذي يغلبه
واهو الما ثنّه بالضربه
يتعب الدنيا ما يتعب
سلام الله على گلبه

من حشمتّه ام عون ضل ينتفض
بيمينه ما هز السيف هز الارض
عيونه جدحت نار أذن كلشي ينهار

ليضل نهر لتضل خيل لتضل زلم
الموت يعني مكتوب وامره حتم
عيونه جدحت نار اذن كلشي ينهار

زعل عباس اشيضل للدنيا معنى ؟
زعل السبعين الف معناها تفنى
وابصوته زمجر للهيبه مصدر
____________________________

الشمر و العدد والعده
واذا جن او أنس عنده
گدام الگمر تتزلزل
عباس او زعل شيرده !!

يا سبعين الف يا ميه
لو كل الكره الارضيه
توگف عل نهر تلزمه
والله تنفني ابصبحيه

أخو زينب او گال للشط أصل
او كلمه متصير اثنين چنها جبل
او يفنكم تگدرون كلمتي تكسرون

على روس الابطال يمشي ابعزم
نزل للشاطي او گال وين الزلم
يفنكم تگدرون كلمتي تكسرون

رعب الجيش والشط رعب متروس
رعب رجفت اجسام او ترجف انفوس
ضل كلشي مصفر للهيبه مصدر
____________________________

أبن حيدر علي الأنزع
يخوف الخوف من يفزع
جيش احسين بس هو
وابكل كربلاء اتوزع.

أوصفه ابيش ما أدري
أيا ليت الحچي او شعري
يبلغ عشر معشاره
ولا ابلغ مدى عمري

محد يعرف العباس أو يفهمه
ماعدا أبوه الكرار أو فاطمه
سر وابخصاله معنى الكفاله

متطهر من الارجاس صافي النبع
عباس الله سواه طب للضلع
سر وابخصاله معنى الكفاله

فخر دارين بسمه يفخر الدين
فخر عباس لنه باب الحسين
اي بسمه نفخر للهيبه مصدر
____________________________

ابو فاطمة الطائي

الناشر احمد الفاطمي

12 June 2025 07:43

كرامك لجدتك فاطمة ياصاحب الزمان نسألك الدعاء سيدي

بالحقيقة أني مو خوش أدمي
ما أستاهل لكن كرامة لفاطمة
وإذا مو أنت تسوينا خوش أوادم منو يسوينا
يا رحمة الله الواسعة سيدي دخيلك 🙏

الناشر احمد الفاطمي

13 June 2025 17:53

67 زينب تندب ابوها

يـل امطلع يونس انت مـن بطن حوته عدل
احضر احضر شوف زينب هل يجروها ابحبل
__________________________________

أهنا يحلال الشدايد يا فرج كل معضله
علي يل نجيت يونس بيدك او رد الهله
احضر الـزينب تراهـا بـل حبال امعلعله
سبي للكوفه خذوها والدمع دم ايهمل

__________________________________

گوم يا حامي الدخيل الزينب الشبعت قهر
امن الطفوف او نايبتها والحوافر والنهر
انوب للكوفه خذوها تمشي محنية ظهر
والشمر سوطه يحيدر يوجع او ما ينحمل

__________________________________

علي عل هزل اجتك گوم يا بو الموزمه
بل شمس يومين تمشي والمتون امورمه
الوجه متگشر يويلي والاجدام اتخر دمه
الحادي ماكو ابگلبه رحمه رجس ملعون او نذل
__________________________________

أمخدره او علويه زينب وينها او وين السبي
عگب عباس ابو فاضل يحدي بيها الاجنبي
عن عيون الناس ما مش كل ستر بس العبي
اتفزع او مامش گرايب والگلب ضل مشتعل
__________________________________

حيره يا حيرتها زينب المن اتدير النظر
اتفزع او كلمن تفزعه لا تعنه لا حضر
لا علي الاكبر اجاها لا نهض الها الگمر
او فوگ الاثمانين كلها تنتحب طفله او طفل
__________________________________

حرم وايتامه او ثواكل بيها لاذو واحتمو
من سياط انذال اميه غير زينب ما لگو
تنضرب هيه بدلهم تبچي لو همه بچو
والبچه يگصدله ضالم اگبالها ايسحله سحل
__________________________________

علي يابو حسين هينه لو على هاذه او تگف
النوب يردوها سبيه الديره ما بيها شرف
الشام زينبكم تطبله اشلون يا ليث النجف
زحمه للديوان تدخل هاي لا ما تنقبل

__________________________________

ابو فاطمة الطائي

الناشر احمد الفاطمي

13 June 2025 17:53

65 زينب والحسين

يراحة بالي هم ايعود زماني او ارجع اوياكم
او نتسامر ظويل الليل واغفه ابصوت نجواكم
حسين آه حسين آه حسين آه حسين آه
__________________________________

يبو اسكينه اطلعت روحي دسيّرو اعليه لو ليله
يبن أمي اتعبت والله او بشر ما عندي اشكيله
لحد يمته أضل وحدي غريبه او حسرتي اطويله
لحد يمته ابغرب ابقه او حمل ما واحد ايشيله

شسوي الروحي گلي اشلون ما تهجع بلياكم
لا بيدي واموت اهنا ولا بيها اتعناكم
حسين آه حسين آه حسين آه حسين آه
__________________________________

يهل ساكن وسط عيني أَتدري أشبيه ما بيه ؟
يريت اترد واسولفلك سوالف توجع أشويه
سوالف حرمه مهيوبه لچن أخذوها مسبيه
عگب وجه الگمر تالي يچتفوها بني ميه

الحبل واصل عظم ايدي واهل ادموعي وانخاكم
يهل لمروّه الحگوبي واضن صوتي تعداكم
حسين آه حسين آه حسين آه حسين آه
__________________________________
عله اختك لو حلم سيّر حلم يحسين مو اكثر
علي لحگ گبل ماموت من هاذه السبي الاگشر
تعال او عينّي اعله الضيم بعد يا خويه ما اگدر
يضربوني واسولف بيك يضحكون او انا اتحسر

حسرات اعله خدري الراح حسرات اعله فرگاكم
يبو السجاد اضل چم دوب امشي ابرفجة اعداكم

حسين آه حسين آه حسين آه حسين آه
__________________________________

كل يوم او اگول البوم أشوفه ابغفوة احلامي
واحلف عيني بل زهراء هل ليله فقط نامي
يم راسي احط لك ماي. اخافنك تجي ضامي
او يطر گلبي الصبح لو طر واضل انعه ابجفن دامي

امش دمعي واتاني الليل ارد اردود اتناكم
اگول الما أمس جاني بلكي الليله الگاكم
حسين آه حسين آه حسين آه حسين آه
__________________________________

تعال او ما أزيد اعتاب عهد ما شوّفك امتوني
ولا شوّفك أثر چويه لمن رادو يحرگوني
اعله كل اجروحي لا تنظر بس انظر عله اعيوني
او شوف اشبيهن امن الشوگ الغيّر شوفتي او لوني

او خل نتسامر آنه اوياك يل حلوه حچاياكم
يهل ما ينشبع منها هل گعده ابثنايكم
حسين آه حسين آه حسين آه حسين آه
__________________________________

أذا ما ناوي اتمر طيف دز طارش واخذ روحي
اخذني الكربلا او خلها جروحك تشبگ اجروحي
او گبر عل تله احفرولي خل ارتاح من نوحي
واغفه او محد ايگلي گومي او للقصر روحي

لا ديوان لاكو اسياط لا تنسوني وانساكم
هيه امنيتي يل عطشان ابگبري ايرفرف الواكم
حسين آه حسين آه حسين آه حسين آه
__________________________________

ابو فاطمة الطائي

الناشر احمد الفاطمي

13 June 2025 17:53

63. زينب تشتكي للعباس

أجيت الكربلا جيّت أميرات
أنام او أكعد أعيوني قريرات
_______________________

جيت الكربله او كفالي عباس
مثل جيت أميره او رافعه الراس
ما واحد نظر طولي من الناس
لا شفت الهظم لا يمي حسرات
_______________________

تسعتـ ـيام من عاشور وآنه
عزيزه امدلله او ليه مچانه
تارسني الگمر عطفه او حنانه
يحرس خيمتي وابابي ايبات
_______________________

حد مصباح عاشر لني وحدي
لا ضل الگمر لا خيمه عندي
چن صب المطر دمعي اعله خدي
رايح خدري واضعوني سليبات
_______________________

حشمت اشكثر ما همه أخوتي
گد ما صيحت مبحوح صوتي
من الله دعيت ايحين موتي
ما أحمل بعد لوعه او رزيات
_______________________

نساء او آل أميه اتهد علينه
حرگوها الخيم وليه انولينه
او على العباس انادي وينه وينه
شمعطله عليه ابيا كتر مات
_______________________

مذعوره ركضت آنه او رقيه
واشاجف سوطهم باثنين اديه
يا عباس خويه اگطعت بيه
أول تالي ما ترحملي دمعات
_______________________

نشدت الناس گالو عل شريعه
عينه امصوبه اچفوفه گطيعه
دخيلك ياعلي من هل فجيعه
يعني اويه الشمر نمشي اسيرات
_______________________

يعني كل خدر ميضل أليه
أجيت امدلله او ارجع سبيه
من صيواني اطب ديوان أميه
هظيمه يا گمر والله حرامات
_______________________

ابو فاطمة الطائي

الناشر احمد الفاطمي

13 June 2025 17:53

61. عبدالله الرضيع

يفيّ الصيف يبرودة عذب چنّه
يعبدالله بعد بيش آنه اتهنه
_________________________

يا سلوة حياتي او لذة اسنيني
ياعگلي . يگلبي . يانظر عيني
سويها لوجه الله او ناغيني
فك عينك . تململ . ون فرد ونه
_________________________

بعد مابيك تتنفس يروح امك
أما تدري انه اتنفسك واشتمك
اعيشن چيف وانت امضرج ابدمك
يهل راح امن اديه او أيست منه
_________________________

يهل راح امن اديه مغلج اعيونه
او خلاني ابشفير الموت مرهونه
لا ميته او گبر ليه يحفرونه
ولا عدله . أو أليه بالعمر ضِنّه
_________________________

مالي بالعمر ضِنّه ولا رجوه
يعبدالله الحياه من دونك اشتسوه
من ايدي رحت عطشان تتلوه
او جابوك او رسوم الحلوه ما هنه
_________________________

يعبدالله عليه ضاعن ارسومك
اشوفن دم رگبتك تارس اهدومك
والمثلث يويلي الگاص بلعومك
شده فكري او صرت ماعرف اوخرنه
_________________________

شده فكري المثلث بيك شمخلي
هو الصوبك شيريد متگلي
هو الصوباك ايصوم وايصلي ؟
هم عنده گلب هم يعرف امحنه
_________________________

گلبه اشگاله من صوب ابسهمه
يريت اعيونه هاي الساعه تعمه
اسلبك من عندي يمه سلبت النعمه
او ضليت ابحزن ما ينعرف عنه
_________________________

ابو فاطمة الطائي

الناشر احمد الفاطمي

13 June 2025 17:53

59 ليوم عاشوراء

وينك ياعلي وينك ياعلي
________________________

وينك ياعلي أيها المذخور حرزا للبلاء
أسمع ما يلي ذا حسينا بكروب وبلاء
دلاله ايغلي منعوه يرتوي شربة ماء

دارت بي عدوانه
او مثل الغيم احزانه
روحه اتلوج او مامش
ويلاده او خوانه

يا علي داروه بسيوف او نبال
اجروحه كثره يوصلن حد الخيال
بعد ما يقوى يويلي اعله القتال
اينازع او عينه تصد اعله الخيم

وينك ياعلي وينك ياعلي
________________________

حماي الحمه أن في الطف عذاب ومرار
مهجة فاطمه عند قوم جارهم لا يستجار
تبچيله السمه يا أمير الحرب جرد ذو الفقار

يا صاحب كل شده
احسينك بالطف وحده
اموسد فوگ الغبره
والطعنات ابچبده

عل رمال الحاره اموسد تراه
مات حيله من كثر دمه الجراه
طايح او كل ساع يتلفت وراه
أيريد ناصر والبقن بس الحرم

وينك ياعلي وينك ياعلي
________________________

قالع خيبره ليت عيناك تراه اذ هوى
شفته امفطره يتلّضى في سعير نينوى
ابگطعة منحره ظهر سكان السماوات التوى

سكان البل سبعه
ضجت گامت تنعه
نزلت راد اتشوفه
لن تسمع طگ ضلعه

على صدره شافت الشمر اللعين
بيده خنجر يطعن ابنحر الحسين
على وجهه اگلبه وايحز الوتين
گامت الاملاك تبچي من الالم

وينك ياعلي وينك ياعلي
________________________

يابو المرجله قطعوا النحر أمام المحصنات
شمر او حرمله ما رعوا في الله أم او بنات
گلبو كربله قصدوهن بخيل جامحات

نيران او خياله
ما راعو لعياله
سلبوهن ياحيدر
نسوانه او اطفاله

هامن اعله اوجوهن صوب القفار
غير العبي ما بعد عدهن ستار
آخ يا مولاي من ذاك النهار
عاشر الاگشر نهار الكله هم

وينك ياعلي وينك ياعلي
________________________

شحچيلك ألم ان جرح الطف باق لا يزول
نيران او خيم وجراح ودماء وذهول
اطفال وحرم تنظر المولى مراحا للخيول

من الخوف اتعننه
ايحاميهن رادنه
لن اخيولن عشره
بالحومه ايگلبنه

بل حوافر شافن أشلاء الذبيح
وحده گامت تلطم او وحده تصيح
ميت او محد يعوفك تستريح
احسين هاذه انت صدگ ؟ لو ذا وهم

وينك ياعلي وينك ياعلي
________________________

ابو فاطمة الطائي

الناشر احمد الفاطمي

13 June 2025 17:53

57 مسلم بن عقيل

هاذه كشخة عمامه هاذه مسلم
_______________

أسد من الغوالب هاذه مسلم
نهر يجري مناقب هاذه مسلم
كفو وكت الحرايب هاذه مسلم
يدوس اعله الشوارب هاذه مسلم

هو واحد لچن سيفه تارس الكوفه ترس
يوم سل السيف غاضب. غيمت حتى الشمس

هاذه كشخة عمامه هاذه مسلم
________________

عله الوادم تريس هاذه مسلم
الحرب بيها ايتونس هاذه مسلم
ضحك والكل تعبس هاذه مسلم
او علي فنه التنفس هاذه مسلم

چنه جذوه من جهنم يصهر الوادم صهر
يوم سل السيف مسلم شافو انجوم الظهر

هاذه كشخة عمامه هاذه مسلم
_________________________
شبيه العمه حيدر هاذه مسلم
عله الكوفه ايتبختر هاذه مسلم
ترك سيفه ايتخير هاذه مسلم
بطلهم صاير اصفر هاذه مسلم

بي شجاعه بي مهاره بي ملامح من علي
الجيش ضل بس ايتهامس اليوم بلوه نبتلي

هاذه كشخة عمامه هاذه مسلم
__________________

سليل اشرف سلاله هاذه مسلم
اجه ايبلغ رساله هاذه مسلم
لچن رادو نزاله هاذه مسلم
او اخذ منهم مناله هاذه مسلم

بلغ الهم هل امانه بلغ ابگول او فعل
ماجت الكوفه امامه او جدمه ثابت ما يزل

هاذه كشخة عمامه. هاذه مسلم
________________

عشيره ابسد عشيره هاذه مسلم
بِهم سوه دهيره هاذه مسلم
أبد مامش نظيره هاذه مسلم
عجيب اشعنده غيره هاذه مسلم

جيش واخيول او عساكر كلشي گدامه انفنه
العجايب سبعه چانن هو صار الثامنه

هاذه كشخة عمامه هاذه مسلم
________________

اتباچه او هو باسم هاذه مسلم
فلا اتفسد الطلاسم هاذه مسلم
الظهرهم هو قاصم هاذه مسلم
عمر ما الله قاسم هاذه مسلم

عيشه ما مقسومه الهم. غير مسلم گابلو
صوچهم گابلو مسلم غير مسلم ما لگو!!!!

هاذه كشخة عمامه هاذه مسلم
_________________

ابو فاطمة الطائي

الناشر احمد الفاطمي

13 June 2025 17:53

55 ليلة الدفن

يا دفان اخوتي ارجوك مر بيه
سولفلي على المتروس حنيه
______________________

يا دفان اخوتي اشمالها اعيونك
اشوف امن البواچي منخطف لونك
دفن احسين هاذه امهدل امتونك
سولفلي تراها الروح مچويه
______________________

يا دفان ابو السجاد شعلومه
غسلته ابدمع لو راح بدمومه
بعدهي ريحة الزهراء بهدومه
ارسومه اتغيرت لو هيه هيه
______________________

يگلها والدمع يتفايض ابخده
يا حيره الحرتها امن احفرت لحده
اوسده اشلون ابوي اوراس ما عنده
مرمرني ابدفنته او موت ايديه
______________________

يا عمه لگيت اضلوعه ما هنه
على آثار الحوافر صرت أجمعنه
مثل خرز السِبح لحسين المنه
واصبع من ادينه ضايع اعليه
______________________

لمن ردت اشيله او بل دفن ابدي
أو صاله حيرني او گطعن چبدي
اشيلن هاي توگع هاي من عندي
ما ضل عندي راي او لابگت نيه
______________________

لملمته ابحصيره تالي ما تالي
بلا غسل او چفن واريته الوالي
بس بخّيت نحره ابدمعي اليلالي
عسنه يبرد او يرتاحله اشويه
______________________

يعمه والگمر ريتچ تشوفينه
دفنته الوحده ما هنه چفينه
يون نحره او سمعته يذكر اسكينه
چنه يعتذر منها اعله الميه
______________________

كافي امروتك گالتله يا عمه
خليت الگلب يتعصر ابهمه
يريت آوياه متت واتوسدت يمه
چا شلي بحياتي او آنه مسبيه
______________________

ابو فاطمة الطائي

الناشر احمد الفاطمي

13 June 2025 17:53

53. السيده زينب

ويلي وويلاه ويلي وويلاه

وينكم يهل الحميه ويلي وويلاه
گومو زينبكم سبيه ويلي وويلاه
دم مدامعها جريه ويلي وويلاه
اتحشم او محد حماها ويلي وويلاه

عالو بيها يهل الغيره
عالو بيها يهل الغيره
________________

ليش عفتوها يهلها ويلي وويلاه
امحيره او مايل حملها ويلي وويلاه
القهر والهم كتلها ويلي وويلاه
السوط والدگ ورماها ويلي وويلاه

لا يل ساده گومو الزينب
لا يل ساده گومو الزينب
__________________

بالشمس جابوها والحر ويلي وويلاه
والخگ كلها اتفكر ويلي وويلاه
امچتفيها الله واكبر ويلي وويلاه
والحبل زود بچاها ويلي وويلاه

ضل امچانه للموت ازرگ
ضل امچانه للموت ازرگ
_____________________

لا ابن أم باجي عدها ويلي وويلاه
او ينظر الدمعه اعله خدها ويلي وويلاه
لا ابو لا جاها جدها ويلي وويلاه
اتفزع او محد اجاها ويلي وويلاه

من الساده ما واحد هد
من الساده ما واحد هد
_____________________

وين عباس الكفلها ويلي وويلاه
يرخي الحبال او يفلها ويلي وويلاه
او يمسح الدمعه التهلها ويلي وويلاه
او يفگس اعيون السباها ويلي وويلاه

يل عباس اتريدك زينب
يل عباس اتريدك زينب
___________________

محد ألها او تشتكيله ويلي وويلاه
او محد ايرد المعيله ويلي وويلاه
لوعوها. او عل هزيله ويلي وويلاه
الشمات احجاره رماها ويلي وويلاه

وايسب بيها وايسب حيدر
وايسب بيها وايسب حيدر
____________________

الوادم اعليها تگاطف ويلي وويلاه
اوهيه مچتوفه اشتشاگف ويلي وويلاه
الگلب والريج ناشف ويلي وويلاه
الشام يابلوه بلاها ويلي وويلاه

يٱخذ منها ثارات أحد
يآخذ منها ثارات احد
__________________

ابو فاطمة الطائي

الناشر احمد الفاطمي

13 June 2025 17:53

51. القاسم عليه السلام

حنه او شمع فرحه او دمع
عريس عمره اربعـ ـطعش عام
متروس جسمه ارماح واسهام
حنه او شمع حنه او شمع
______________________

مشدوه بالي او ما ركد والدمع من دم ساجم
مطرور گلبي اشما يمر طاري المعدل جاسم
ريحانه من غصن النبي جذوة جمر من هاشم
گالتله رمله أبكربلا يمه زهابك والم

سيف اودرع فوگ الضلع
والحوفه يبني بين الاصفوف
فوگك تطش ارماح واسيوف
حنه او شمع حنه او شمع
______________________

ما أنسى لوعة أمه من جاسم برز للحومه
يابس گلبها امن الذعر واتعاين اعله ارسومه
تدعي يرب ابفاطمه خل يومي يسبق يومه
مابيه أشوفن ضنوتي متحني من ادمومه

خل انطعن خل اندفن
بس ردلي جاسم كلشي مابيه
ياربي آنه ابروحي افديه
حنه او شمع حنه او شمع
______________________

خيل او عجاج او مذبحه ضاعت عليها اخباره
متكاثر اعليه الطعن الشيب گلبها اصياره
گامت تحوم اعله الخيم ما تدري شنهي الچاره
جسام ما تسمعله حس والگلب وجر ناره

أتخر عَلَي لا ياعلي
أسمع دفوف او ضحك واصياح
جسام بس لا منچتل طاح
حنه او شمع حنه او شمع
______________________

أشويه او تشوف احسين اجه شايل ولد بمتونه
لا چنه شو گوه أيحچي والدمع ترس اعيونه
ملهوفه رمله اتلگته مولاي أبني أشلونه
گللها يا رمله الولد مات او تغير لونه

مي ما شرب جاسم تعب
ذبحوه من الجاري محروم
او يا ثوب عرسه املطخ ادموم
حنه او شمع حنه او شمع
______________________

يا حالها ايبچي الصخر اوحيدها رايح منها
امجابلته واتنازع غدت للسمه واصل ونها
جسام يل ردت ذخر ليش امك اتوهدنها
چا ألمن امجهزه العرس والحنه ليش اعجنها

يمه اشگلت. لمن متت
أمك عفتها يا ضوه العين
متگلي بعد اتجه وين
حنه او شمع حنه او شمع
______________________

بس افتح اعيونك الي يمه رحتلك فدوه
اعصرلك اعيوني عذب واشرب لحدما تروه
يا يمه أرحم شيبتي ظهري عليك اتلوه
اشيطلبني يا طف كربلا وابروحي هيچي سوه

ضاع العمر. مات الصبر
يا ريت موتي ايحين هل ساع
او نتوسد آنه اوياك بل گاع
حنه او شمع حنه او شمع
______________________

ابو فاطمة الطائي

الناشر احمد الفاطمي

13 June 2025 17:53

49 الانصار

نادتهم كربلا هلا بيكم ياهلا
______________________

هلا بوجوه الفَلحه
ليقدرون المُلحه
انتم بالطف نفحه
من الله امنزله هلا بيكم ياهلا

أنصار أبن الزهره
نار او تسعر كَبره
خلوها الطف حمره
او زلزال امزلزله هلا بيكم ياهلا

واحدهم چن آيه
نزلو المسنايه
اشويه بس اهوايه
بل غيره او مرجله هلا بيكم ياهلا

چن نار الحراگه
يوم الصار املاگه
انشال الطف من راگه
او رجو رج ابهله هلا بيكم ياهلا

بن ظاهر دايسهم
ثوب الذل لبسهم
امن الخوف اميبسهم
قادتهم معوله هلا بيكم ياهلا

وابن القين اتشوفه
علو الغيم اچفوفه
ابصولاته المعروفه
خلاها امجندله هلا بيكم ياهلا

او عابس عنه اشنحچي
خل العسكر يبچي
الكل شارد يشچي
بيه الجيش ابتله هلا بيكم ياهلا

او سيف الحر ايلالي
ينحر وين العالي
الآف او ميبالي
وايگول اگليّله هلا بيكم ياهلا

شذكر منهم شنسه
الموت الهم ونسه
تخسى اعداهم تخسه
ذوله اهل المنزله هلا بيكم ياهلا

كحلة عين الناظر
كشخة يوم العاشر
ما يوصفهم شاعر
مهما عنهم ملى هلا بيكم ياهلا

____________________

ابو فاطمة الطائي

الناشر احمد الفاطمي

13 June 2025 17:53

47 مسلم بن عقيل

طوعه تحشمه والدمع يتلاله بل عين
گالتله اريدنك ترد حملات ابو احسين
_____________________________

مسلم بلا ناصر وگف بس يمه طوعه
اتهلهل تحشمه او بلگلب من عدها لوعه
اتشوفه وحيد او هل فزع جايب جموعه
تتمنه عباس ايحضر اويه الهاشميين
_____________________________

أو لن مسلم ايگلها .أفا . اتهلين الدموع !!
وآنه الي رباني علي صگار الجموع
راسج يطوعه لا يطخ خل يبقه مرفوع
والله لخلي هل جثث بالكوفه صوبين

_____________________________

گالتله نعمين او كفو منك يمهيوب
أدريك ليث القسوره متهاب الحروب
يمه اعله دمعي لتعتب اعتب عل اگلوب
من شفتك اوحيد وانا دلالي نصين
_____________________________

گاللها گلبچ لا يهم هاذه اني فرّاس
واليوم اجيم الواقعه واحشرها هالناس
حسره أخلي اعله الزلم جرات الانفاس
واگلبها يمنه ابميسره وانتي تشوفين

_____________________________

سل صارمه او ليهم طلع چن جية السيل
نار او شرر ما بنجرع خله الظهر ليل
الكوفه أبأسرها متحچي بس تسمع اعويل
عدلين ضلت هالزلم ماندري ميتين
_____________________________

مرتفع سيفه او لو هوه تتزلزل الگاع
صياد يلگطهم لگط يتخير اسباع
هاذه البقه ابلا هامته او هاذه بلا اذراع
يردون مشراد او لچن ماعرفو امنين

_____________________________

مسلم يمسلم شوصفه للكوفه من غار
خيبر يچنها اوليها طب حيدر الكرار
من نار سيفه اتسفرت راحت الى النار
او مسلم عدل خالد بقه مهيوب دارين
_____________________________

ابو فاطمة الطائي

الناشر احمد الفاطمي

13 June 2025 17:53

45. للامام الحسين عليه

احسين يبن امي دخيلك لا تون
امنين اجيب الماي جف حتى الجفن
لا لا تون لا لا تون
_______________________

احسين يبن امي ونينك بطّله
احسين بچيت السماوات العلا
امنين اجيب الماي هيه كربلا
خير لو بيها تريّس حرمله

الصخر لو حن حرمله هم ما يحن
امنين اجيب الماي جف حتى الجفن
لا لا تون لا لا تون
_______________________

گطعت گلبي يمهجة فاطمه
طايح ابحر الشمس تشكي الضمه
هيه غير اعيوني تجري امغيمه
لچن يبن امي تهل بس الدمه

اوشوفي اضلم تشبه الليل اليجن
امنين اجيب الماي جف حتى الجفن
لا لا تون لا لا تون
_______________________

امنين اجيب الماي واروي مهجتك
يمن ريت اسنيني فدوه الدمعتك
تدري اشسوت ابگلبي ونّتك
شيبت روحي او گلبي اوداعتك

مات حيلي والگلب هل منسحن
امنين اجيب الماي جف حتى الجفن
لا لا تون لا لا تون
_______________________

أحنه بس أيتام مفجوعه او حرم
يا هو احشمه او محد ابگلبه رحم
والي اگله أميه يرميك ابسهم
يا ألم ازيد بعد من هل الم

ريت گلبي تطحنه العشره طحن
امنين اجيب الماي جف حتى الجفن
لا لا تون لا لا تون
_______________________

ماي ماكو ابكربلا بس الرماح
لا تون يحسين موت او استراح
موت مو ماضل مكان الهل جراح
ارتاح خويه او خلي اعليه النياح

او خلي اعليه السبي او باجي المحن
امنين اجيب الماي جف حتى الجفن
لا لا تون لا لا تون
_______________________

گوه تتنفس اشوفك يا نفل
شني الشاغل بالك ابهاذه الشكل
خايف اعلينه يچتفونه ابحبل
اتخاف يسبينه او يلوعنه النذل

لا تفكر اهواي بــالله نستعن
امنين اجيب الماي جف حتى الجفن
لا لا تون لا لا تون
_______________________

ابو فاطمة الطائي

الناشر احمد الفاطمي

13 June 2025 17:53

43 أم البنين عليها السلام

لمّن ضـعـنهـم للسفـر راد ايروح
أم الگمر ضلّت جسد مابي روح
ويلي على أم الاربعه
_________________

طلعت او يرجف گلبها امدوهنه او حيرانه
وگفت اگبال ابو اليمه او چلّبت بردانه
يا بعد حيلي تگله خل أروح اوياكم
خاف من وِلِدي ايتصوب آنه أسد امچانه

ألزملي سيف او أرتجز بين الناس
عباس راعبكم وانا أم عباس
بالرايه اروح امگبعه

ويلي على أم الاربعه
_________________

اتسولف او مستحيه منه ما تصد لعيونه
اتگله بس اربع نطيتك واربعه أشويونه
كون من عباس عندي عشره الك أنطيهم
او كلمن اليوصل خيمكم شاربه يلوونه

لاچن العندي اربعه موش اهواي
اعذرني لوما شربو طفلك ماي
ادروب الشريعه امگطعه

ويلي على أم الاربعه
_________________

صدت العباس أبنها والحزن بأنفاسها
گبل ما تحچيله كلمه باس ايديها او راسها
گلها لتوصيني يمه وآنه ابن كرارها
ذاك الطوال الشوارب يوم خيبر داسها

انچانهم سبعين الف وايزيدون
عباس آنه المن خزرتي ايطيحون
جفنچ امسحي مدمعه

ويلي على أم الاربعه
_________________

قدمت سيفه او جربته او حضرت له الرايه
او گامت اتوح الحنينه او سوت الها اقرايه
بعد ما ماشين عنها او چنها گامت اتنازع
أشلون لو جاها خبرهم فوگ المسنايه

اشلون لو سمعت شمر حز الروس
اوفوگ صدر حسينها خيل اتدوس
او ذيج الضلوع اموزعه
ويلي على أم الاربعه
_________________

انوب يم زينب تعنت اوچبت يم بابها
والدمع يشرح المها او ياعظيم اصوابها
زينب اوصيچ اعله زينب ما أوصي ابغيرها
من توج نار الحرايب من يعج اترابها

اوصيـچ يمـه او بل گلب امنيّات
وياچن أمشي واخدم الـ علويات
مكتوب اضل املوعه
ويلي على أم الاربعه
_________________

ودعوها او غيشه راحو واگعدت تنعاهم
من دمع عيناها اويلي رشت ابمگفاهم
نوم ما شافت عگبهم لا تعرف الراحه
مثل غرگان او يفرفح هل شكل تتناهم

لاچن وسافه هل سفر طول حيل
ما طر فجرهم والعمر خلص ليل
ويلاه يليل الفاجعه
ويلي على أم الاربعه
_________________

ابو فاطمة الطائي

الناشر احمد الفاطمي

13 June 2025 17:53

41 العاشر الوداع

ويلاه من هاي المصيبه ويلاه
ويلاه يوداع الغريبه ويلاه
_______________________________________

أتوادعو عين او دمع او دمع اليگع گلي اشيرجعه
أموادعهم ايگطع الگلب يهمس غده او زينب تسمعه
كل چلمه حسّتها رمح اتبچ الگلب حدما تشلعه
رادت تسمعه ابلا دمع او سال الدمع مهما تمنعه

ويلاه هل ليله كئيبه ويلاه
ويلاه يوداع الغريبه ويلاه
_______________________________________

مصباح باچر من يطر خلي الصبر عندچ وسيله
باچر تشوفين اشكثر هم او هظم اي يل عقيله
باچر عطش باچر ذبح باچر مصايبچن ثجيله
باچر يحرگون الخيم او ياحسرتچ تصبح طويله

ويلاه واضعونچ سليبه ويلاه
ويلاه يوداع الغريبه ويلاه
_______________________________________

طالت على رسومه النظر واتحسرت او چنها تگله
يحسين فتيت الگلب او خل افترض كل هاذي سهله
بس گلي نتفارگ صدگ تدري الهجر مگدر احمله
امن اتعوفني ساعه اختنگ حتى النفس يصبح مذله

ويلاه يا گلبي او لهيبه ويلاه
ويلاه يوداع الغريبه ويلاه
_______________________________________

خل اعطش اوخل احترگ خل انضرب خل عيني تعمه
ميهمني كل هاذه الالم خويه الگلب بس انت همه
انت العذب انت الدوه يا خيمتي الضعني تلمه
يل بيك ريحة فاطمه من تبتعد حيلي تعدمه

ويلاه تنهبني نهيبه ويلاه
ويلاه يوداع الغريبه ويلاه
_______________________________________

من كل رزايا كربلا هاذه المسه أعظم رزيه
من جفن زينب هل دمع اتوجر گلب والد رقيه
مرن على باله صور فوگ الهزل زينب سبيه
يحدونها وين النذل وين الذي مابي حميه

ويلاه وتعالى نحيبه ويلاه
ويلاه يوداع الغريبه ويلاه
_______________________________________

العيون ضلت شابحه كل واحد الـ واحد يناظر
چنه يراها امگيده او حادي الضعن بيها يسافر
او چنها تراه اعله الثره صدره انمرد جوه الحوافر
او جرح الموادع ما گضه او لن يبتدي صبحك يعاشر

ويلاه اشهل ليله الرهيبه ويلاه
ويلاه يوداع الغريبه ويلاه
_______________________________________

ابو فاطمة الطائي

الناشر احمد الفاطمي

12 June 2025 07:36

#گعدية ليلة#مسلم بن عقيل ع


رشح بلكي اتفوز  يامسلم
بلكي اصوات اتحوز  يامسلم
اعلن نفسك للترشيح  وحنه بعالي الصوت انصيح  يامسلم

~~
گوم وعلنهه يمسلم دام ربع الله چثيره
ونكتب ابقائمتك احنه هبو لحسين وسفيره
بعد تنسه السطح اصلآ توكف ابضهرك عشيره

بس رشح او شوف الجمع
ايلزمونك او ماضن تگع
بس احنه عُباد الربع   حاول فلوسك وفيره

انطي فلوس اهواي  تضمنه
مسلم بس ابهاي   تضمنه
ومن اسطوحك لا مطيح  وحنه بعالي الصوت انصيح  يامسلم

~~

كله هذا الجمع لجلك مايجي ابنادم يفرِق
استقبلوا المُنقذ ننادي وكلنه نفس الجمله ننطق
وما نخالف شورك ابدآ بس شرط كونك تورق

كثر يمسلم بالصرف
وعزل هدايانه ابضرف
اشما تنطي اكثر تنعرف. وبكيفك اتغرب وتشرق

نفتر نبقه اوياك  ونثقف
ننظم تحت الواك  ونثقف
ونسابگ وياك الريح   وحنه بعالي الصوت انصيح  يامسلم

~~~~

نكتب اشعار اعله زودك ونشتري مهوال بارع
انهوس انضل اعله مودك بالدبچ نهدم شوارع
نوصل ال اهل الرذيله ونوصل ال اهل الجوامع

ليهك ايمان الفرد
عاگول صافح والورد
عن المبادئ ابتعد    لو ردتلك عَرِش لامع

زيناتك متفيد   طلگهه
منصب كون اتريد طلگهه
خليهن بس للتصريح   وحنه بعالي الصوت انصيح  يامسلم

~~~

عوف دين الله اعله صفحه وبلغ ابيا منصب احنه
او گوم وزعنه الكراسي او ما تمرك بعد مِحنه
او ماستر كارد اللواگه انگوم من هسه نشحنه

وزع مناصبنه ابعجل
غيرك تره ابنادم وصل
قسمهه لا وحدك تضل   اوذم ينگلب ذاكَ مدحنه

قسمهه ابيمناك  هالكعكه
الضامن ماننساك   هالكعكه
انبلغك لجل التوضيح  وحنه بعالي الصوت انصيح  يامسلم
~~~~


ناس فقره بكلشي تقنع انته بس سولف تصدگ
طفي بيمينك لهبهه او ارجع ابيسراك احرگ
اشبگ ابضاهرهه طه وبالخافايه ايزيد اشبگ

استخدم اسلوب المكر
صوبينهم خاطر تجر
اميال تعبر مو شبر   وبوجهه الباب تطبگ

ومن اتفوز الناس   طردهه
وطگهم راس ابراس  طردهه
ملگاهم فوضى اوتجريح  وحنه بعالي الصوت انصيح  يامسلم
~~~~

عوف درب حسين تُقتل وحنه اول من يقتلك
وبعد قتلك مانتركك نرجع ابحافر نسحگك
لو حچيت ابمنهج الحق تِنبذ محد يتبعك

چَذِب علينه انمجدك
عاملنه بالحق نذبحك
انخونك او نسبي هَلك    للكوفه يامسلم نرجعك


انعيد الكوفه اعليك  ونخونك
او نرجع هم نرميك   ونخونك
فعلآ هذا او مو تلميح   وحنه بعالي الصوت انصيح  يامسلم

~~
نعبد الدينار صرنه يا سفير حسين ارجع
والحكم بس للحرامي واليتبعه ايقوده مطمع
والنضيف الگال أقاوم يصعد وبالجيفه يرتع

ارسل كتابك للسبط
گله ابأرضهم لاتحط
وادم سياستهم خمط    القبلة الدينار تركع

اكتب گل ل حسين   چذابه
وبس السان الدين   چذابه
ليغرك صوم او تسبيح   وحنه بعالي الصوت انصيح  يامسلم


#فلاح نجم
تمت ولله الحمد
#محرم 2025
الفاتحه لروح الشهيد عبد الله نجم