492
🌟 الشــاعــر رحــيــم الـــصــالــحـــي 🌟 بكربله مسبيه ايه زينب تكول الروايه كل ما هوه جديد من قصائد حسينيه للشاعر رحـــيم الصــالحي. ولجيميع المناسبات المعرف الخاص 👈 @Rpqdb رابط القناه. 👈 @AliRR134
في حق الحسين. ع
ياخيل عله صدره لاتسحكنه
عزيز الزهره هذا ما تعرفنه
---------------
خليني اسوي بهدمي افياي
تعبان ويدور شربت الماي
ياهو الي يريحه يكعده وياي
نايم عل تراب ويجذب الونه
-------------------
مره امسح ابدمه مره احاجيه
مره بطرف هدمي كمت اغطيه
اثاري اصواب جبده مثر اعليه
اتمدد وياه بصدره اشمنه
-----------------
طاح وياه حيلي كله من طاح
كعدته اخيي شويه يرتاح
كاضي منل تعب من كثر الرماح
صدره بالحوافر لاتهشمنه
-----------------
حاجيني صحت يبن امي يحسين
شنهو اليوجعك ياكرت العين
دليني اشد اجروحك. منين
كل طعنه عله جسمك فوكه الطعنه
--------------------
بصدرك ليش كامت تسحك الخيل
من جروح جسمك دمك يسيل
ياخويه بمصابك مابقه حيل
اتمدد وياه بصدره اشمنه
------------------
الخادم
رحيم الصالحي
في حق عيد الغدير
اليوم عيد الله الجبير
حيدر اتنصب امير
بعيد الغديد
---------------------
فرحه ولائيه. وكلوب شيعيه
بمحبتك وولايتك يابو الحسن حيدر
ياخذني ليك الشوك. للغالي المعشوك
احله اسم ضل مبتسم قالع حصن خيبر
وبروحي وحساسي. انته اعز ناسي
انته الهوه ونته اادوه ياطيب المعشر
ياكلب بالك تحير
حيدر اتنصب امير
بعيد الغدير
--------------------
ياشوك دليني. لنجف وديني
وبحضرته وبجنته ارد اشتم وروده
رفرفت ليه الروح. من عطره هيل يفوح
بولايته كل شيعته ياناس محسوده
النبي اليوم اختار. نصب علي الكرار
حيدر علي صار الولي والبيعه مشهوده
كلبي ابحبك اسير
حيدر اتنصب امير
بعيد الغدير
--------------------
من زغري حبيتك. وي روحي ألكيتك
يابو الحسن انته الوطن غالي وتظل غالي
شايل بروحي احساس. مالك وصف بناس
غيره وعزم انته الشهم يالساكن ابالي
يلظارب ابسيفين. يلطاعن ابرمحين
مثل الجبل شامخ تضل عالي عله كل عالي
بالحشر بيه نستجير
حيدر اتنصب امير
بعيد الغدير
----------------------
وتمر علينه ايام. عيد وفرح وحلام
يافرحتي ويابهجتي بعياد والينه
بماي الذهب مكتوب. حير علي محبوب
ارض وسمه لحامي الحمه نبعث تهانينه
بدمي والشريان. انته اعز انسان
روحي الك وتئملك بشده تحمينه
عيني للبابك تدير
حيدر اتنصب امير
بعيد الغدير
-----------------------
الخادم
رحيم
الصتاحي
في حق الامام الكاظم. ع
واه ويلاه يمسموم واه ويلاه
واه ويلاه يمسموم واه ويلاه
---------------
تجري العيون يمسجون عليك اتصب دمع
ماكو اخبار يمحتار. تون ماتنسمع
تكضي حسرات وعبرات مثل حال الشمع
حسره اكلوب. يمحجوب الك حدر الضلع
الله رافع شانك. والصبر عنوانك
واه ويلاه يمسموم واه ويلاه
واه ويلاه يمسموم واه ويلاه
-----------------
بين حيطان. وعدوان. كظه كل العمر
تمر اليام. والالم دليلك بيه جمر
عشت مهموم يمضلوم خلص حتى الصبر
بسجن هارون. يمحزون ولاشفت الفجر
تكضي ليلك عابد. وبصلاتك ساجد
واه ويلاه يمسموم واه ويلاه
واه ويلاه يمسوم واه ويلاه
-----------------
يبن الطياب. الك باب نطوف بحضرتك
نعتني ليك. نواسيك كصدنه زيارتك
احنه كل عام. وخدام رفعنه رايتك
باب المراد وبغداد. بجت لمصيبتك
مثل يوم العاشر. وبمصابك حاير
واه ويلاه يمسموم واه ويلاه
واه ويلاه يمسموم واه ويلاه
------------------
ولجسر بيك. بجه عليك. لطم وي الخدم
نعشك انشال. والحبال. اثره عله الجدم
صاحت الناس. والنفاس. يصب دمع الندم
ونته مطروح. والجروح. نعاين بيها دم
صاح ناعي امصابك نفجع كلب احبابك
واه ويلاه يمسموم واه ويلاه
واه ويلاه يمسموم واه ويلاه
-----------------
واليشيعون. يلطمون عله مصابك حزن
الشيعه. شالوك. وخلوك. متن يم المتن
تبجي العيون. والجفون يصب دم الجفن
متت محروم. يمظلوم الك ناسك تحن
الملتقه يم بابك نجي نزور اعتابك
واه ويلاه يمسوم واه ويلاه
واه ويلاه يمسموم واه ويلاه
------------------
الخادم
رحيم الصالحي
في حق الامام الصادق. ع
بدمع عيني كتبت اسمك
الف هنياله اليخدمك
بنيت بعلمك الدين
مشيت بنهج الحسين
ياجعفر الصادق
-----------------
اضل انعاك بدموعي. مصابك صار موضوعي
ادكن حيل بضلوعي. بقه بكلبي جرح
يمحيي الدين والسنه. فضلك سولفو عنه
اطوف بكبرك اتمنه. مثل شمس الصبح
مدارس بالعلم وتصير الك ساس
يبحر الكرم انته وعدنه مقياس
يالصادق بفضلك تحجي الناس
اشوفنك صرح عالي
اسمك ساكن ابالي
خالد بين السنين
مشيت نهج الحسين
ياجفر الصادق
-------------------
الك اهل العلم تشهد. فضلك ابد ماينعد
طول الزمن تتخلد. يبن حيدر علي
دين الباري طبقته. بمدارس علم ترجمته
الجميع الناس وصلته. ابد ماتنجلي
كل احروف اسمك ذهب نطليها
ويجي يوم البقيع ونرد نبنيها
ومجالس عله مصابك احنه نحيها
الله منزلك ايه
ترفرف بسمه رايه
صار اسمك عناوين
مشيت بنهج الحسين
ياجعفر الصادق
-----------------
الك كل الفضل يرجع. ذهب يالصادق وتلمع
نورك بالسمه يصدع. ينهر منل العلم
انته الخير والرحمه. عله شفاف المحب بسمه
عطرك باقي انشنه. ثرت ضد الضلم
خذت من نور جدك والكرامات
ومتروسه الكتب عنك روايات
يالصادق بفضلك تحجي ايات
بساتين العلم تكبر
يوجه الصبح من ينطر
ينوماس المحبين
مشيت بنج الحسين
ياجعفر الصادق
------------------
يقران النبي ودينه. علمك يزهي اعلينه
مصابك حيل ماذينه. خذت مني الفكر
اعمه الما يشوفك زين. يمرجنه وعمود الدين
نموت بدرك وماشين. يشع منك عطر
يبو الكاضم جرح بلروح ماذيني
عله مصابك حزين ودمعتي بعيني
العمر ماي وتبده وضاعت اسنيني
المصايب بيه من تلتم
اضل بحسرتي اتئلم
كبر وياي الونين
مشيت بدرب الحسين
ياجعفر الصادق
-----------------
الخادم
رحيم الصالحي
في حق السيده زينب. ع
كل شهكه اكولن طلعت الروح
وحس حتئ الهوه بالغربه مذبوح
بكلبي نار الخيام
وانه بغربت الشام. من بعدكم
------------------
اتاني الموت كل لحضه. وكولن بلكي ارتاح
يلجمني جرح كلبي. وشوفن يمي ذباح
اليعاشر ناس مو ناسه. سلوته تصير النياح
ونه الضليت محتاره. اصفك راح بلراح
ترد ايام حزني لو جه عاشور
مثل الطير صرت اجناحه مكسور
تمر عليه اليام
وانه بغربت الشام من بعدكم
-------------------
كفيلي عفته عل شاطي. عفت وياه احلامي
ويبرالي الشمر ياحيف. متني منل ضرب دامي
بضعوني تسير النوك. وتحسرعله ايامي
محتاره بنسه ورضعان. رماح وروس جدامي
اعاين راس اخوي وكلبي محروك
ويحدي الحادي بينه وتمشي النوك
يمي تنوح اليتام
وانه بغربت الشام. من بعدكم
--------------------
شفت حسين عل تربان. كبالي ويجذب الونه
ظامي من العطش لهفان. عشر اخيول داسنه
كمت اتعثر عله الكاع. صحت ياخيل ارحمنه
لكيته مدد وتعبان. شبكته وكمت اشمنه
شفت خنصر ابجفه لنه مبتور
ودمه منل النحر عاينته يفور
جسمه مصوب اسهام
وانه بغربت الشام. من بعدكم
--------------------
حركوها الخيم بالنار. اركض وين محتاره
انطي الوجه مدري وين. اخوي انكطعت اخباره
ياهو ألي يرد الخيل. علينه هجمت الغاره
لاخوي الكمر موجود. كنه نلوذ بكتاره
ركضنه للشريعه الراعي الجود
لو عباس حاضر يمنه موجود
بعمود امصوب الهام
وانه بغربت الشام. من بعدكم
-------------------
ركضنه ونعثر منل الخوف وخيل العده حاطتنه
مابيهم رحم ضلام. ياهو الكام. يشتمنه
اصبر بالحرم ضليت الشمر ياوسفه يشتمنه
ضلينه حرم وطفال. جيفن والي ماعدنه
كل صرخت طفل من رهبت الخيل
ونه المحتاره وحدي ومابقه حيل
اخوي عله النهر نام
وانه بغربت الشام. من بعدكم
------------------
الخادم
رحيم الصالحي
مولد الامام المهدي. ع
هله. هله. هله. هله
بميلاده فرحت كربله
-----------------
هايم ودلالي يدك. كلبين لا مانفترك
يخذني بجناحه العشك. لمحبوبي
اليوم اطير منل الفرح. عقلي انشغل بيه وسرح
وجهك مثل طرت صبح. بدروبي
لجروحي حسيتك دوه. انته الي مثل الهوه
لعيوني يالمهدي ضوه. مشروبي
يالخذت من عندي العقل. امتاني اهلالك يهل
منك الساني مايمل. مكتوبي
هله. هله. هله هله
بميلاده فرحت كربله
------------------
طشيت بدروبك ورد. كلبي القائك مستعد
من غيبتك يمته ترد. يالغالي
حبي الك ماينوصف. ياخير يالكلك ترف
شكد شايل احساس وعطف. بدلالي
اشتاك يالمهدي واحن. حنت الطير عله الغصن ومتاني ايامك يجن. يالوالي
ياماي يرويني وعذب. اسمك لكيته بالكلب
نسمت اعذيبي من تهب. تحلالي
هله. هله. هله. هله
بميلاده فرحت كربله
------------------
محروس من عين الحسد. مولود هل الليله نولد
ويطيرن اطيور السعد. بجناحه
عجنت الزهره حنته. ومريم العذره شالته
وبخده تضحك شمته. مرتاحه
نوره زها علينه وبان. بخمصطعش من شعبان
طشينه ورد وريحان. فواحه
حنه وصواني والشمع. كافي حزن كافي دمع
صوت الفرح ضل ينسمع. بفراحه
هله. هله. هله. هله
بميلاده فرحت كربله
---------------------
متانين يومك يابدر. يالرايتك رايت نصر
كل محب يضل يفتخر. بعلومك
ماينحجب نور الشمس. يالحاضر وانته ولامس
ندري احنه يالمهدي ونحس. بهمومك
بنص عيني ضميتك حلم. ومتاني يومك ياشم
يالدولتك دولت سلم. بقدومك
اليومك احسب ونتضر. ماضل بعد عندي صبر
مشغول كلبي والفكر. برسومك
هله. هله. هله. هله
بميلاده فرحت كربله
---------------------
كل جمعه اتاني طلتك. طالت علينه غيبتك
لهفانه كله شيعتك. يالغايب
يمته تجي يبن الحسن. تخلصنه من هاي الفتن
ثارات الك ماينسن. ونراقب
يامرحبه وميت هله. نشوفك تطوف ابكربله
الغايب اجه ونستقبله. يالصاحب
تلكانه كلنه بخدمتك. وتلتم الشيعه برايتك
دولت محمد دولتك. ونحارب
هله. هله. هله. هله
بميلاده فرحت كربله
-------------------
الخادم
رحيم الصالحي
هوسات للمهدي. ع
متاني ونتضر وبكلبي النيران
عشت قصت غرام وبلعشك ولهان
كلت باجر يجي بخمصطعش شعبان
وحضرت الشمع حنيت اله البيبان
وحسب ساعات الميلاده
----------------
شفت نورك بزغ ضحكت انجوم الليل
ؤدلال المضايف يفوح منه الهيل
يااجمل حلم واضح بلا تئويل
ويافرحت الزهره وبيك شدت حيل
والزهره بجيتك فرحانه
----------------
الليله افراح عدنه ونلبس احله هدوم
وندعي ألله ونبيه النعمه هاي ادوم
شفنه هلال وجهك بالسمه مرسوم
افرح ياكلب ونسي يعيني النوم
ونبعث اشواك المهدينه
----------------
الخادم
رحيم الصالحي
في حق السيده زينب. ع
زينب بلغرب محظره تابوت
كل لحضه التمر متانيه الموت
اليموت بعازت اعزازه
ياهو يشيل الجنازه. يزينب
------------------
اليموت وماهم اهله الناس تفزعله
كلها تكول خلي نجفنه. ونغسله
بس زينب نعشه ياهو اليشيله
بديرت غرب ضلت ماكو كل حيله
تمنت كون يمها يجي عباس
كبل ماتنكطع من عده النفاس
اخوها وعازته عازه
ياهو يشيل الجنازه. يزينب
--------------------
وين اخوانه وين الخدر راح
مانسمع بواجي ماكو اصياح
اليمشي ويه النعش شامت وذباح
المثل زينب يناس بموته يرتاح
ماتت بت علي وشالته المتون
وهل الشام ياوسفه اليشيعون
صبره شلون يتجازه
ياهو يشيل الجنازه. يزينب
--------------------
يهل زينب لختكم ليش متفزعون
شالو نعش زينب غربه اليسشعون
من عادت الميت كل هله يحضرون
الشام بعيد عنكم خاف ماتدرون
انصبو فاتحه للماتت بعيد
فوك التل كبره زينب تريد
اليموت بغربه يتوازه
ياهو يشيل الجنازه. يزينب
--------------------
يحفار الكبر بالله الكبر وسعه
والميت بكبره يلجم. ضلعه
كضت كل عمره تحترك شمعه
والمفجوع كلبه يضل يصب دمعه
يحفرون بكبره وادم اغراب
رادت كون اخوها يهيل التراب
بفكده حسين يتعازه
ياهو يشيل الجنازه. يزينب
--------------------
اليموت بين غربه دمعته بخده
بكبرة ام المصايب طايحه بشده
شيفيد العتب والراح شي رده
راح العمر مني طاح وتبده
كضه عمرج يزينب كله لوعات
مثل الزهره امج عشتي حسرات
صبرج كل مجد حازه
ياهو يشيل الجنازه. يزينب
-------------------
الخادم
رحيم الصالحي
في حق الزهراء. ع
وكف وعماته من راسه ذباهه
كعد يم الكبر حيدر وحاجاهه
حبيبت كلبي حاجيني
فديتك عمري وسنيني. يزهراء
--------------------
ضاعت احلام العمر. وجرعت كاس الصبر
بس حريمه المحب من يدفن حبيبه
هل زمن طبعه غريب. يصعب افراك الحبيب
شلون بلمجروح لو عافه طبيبه
ايام عشناهه سوه. بدنيتي هيه الضوه
اليحفر ابيده الكبر يكثر نحيبه
بعيني كلشي شفته مات. وياهه عندي ذكريات
بروحي ضلت تستعر نار المصيبه
تمدد يم كبرهه وصبن ادموعه
ويدري الحسره حيدر يمه مسموعه
جروح البيج تاذيني
فديتك عمري وسنيني. يزهراء
---------------------
امشي وتعثر وطيح. ياحبيبت كلبي اصيح
رحتي عني وانه ضليت بحسرتي
بعد ماضل بيه حيل. منحني وحملي ثجيل
راحت الزهراء مني يا غربتي
بضلعي بسمارج احس. كمت اجر كوه النفس
وبرحيلج جم ضلع بيه كسرتي
صحت ياموت الخذاج. كون اموت انه وراج
غفل يم الحسن مني تفرهديتي
علي تسولف ادموعه من يحاجيه
لو بيده بحياته الزهره يفديه
اموت وياج خليني
فديتج عمري وسنيني. يزهراء
-----------------------
روحي تنزفلج حنين. تطشرت مني السنين
مات بستان الورد بعد شيرده
صورتج بعيوني دوم. اعد بليل النجوم
الينكسر كلبه يضل دمعه عله خده
امشي كمت بلاشعور. الدنيه بيه تلف تدور
الماي شيلمه اذا طاح وتبده
هسه من دونج غريب. هل زمن طبعه عجيب
والله صعبه عله البشر لو حفر لحده
علي ضلت ابروحه تستعر ناره
ما ينطيه كلبه يرجع الداره
سهام الهجر ترميني
فديتج عمري وسنيني. يزهراء
---------------------
اشم بتراب الكبر. مابقه عندي صبر
راحت احلامي العشته ويه الزجيه
ياحبيبت كلبي وين. علي بفراكج حزين
احجي بطرواج كل صبح ومسيه
وسفه غطاج التراب. صرتي بعيوني سراب
والكبر انه حفرته بذني اديه
رجعي البيتج تعاي. شوفت اعيونج دواي
انه عشت بهل الزمن اعضم رزيه
كلت هانت عليج شلون عشرتنه
ام الحسن راحت وسفه عافتنه
يبعد كليبي عذريني
فديتج عمري وسنيني. يزهراء
------------------------
ستعجل الموت وخذاج. البيت خالي من ضواج
عفتي زينب حايره بهاي المصايب
ضلت ابدارج تنوح. حايره وبيه الجروح
شافت بهل الزمن يالزهره العجايب
جرحج ابكلبي حبير. صرت بفراكج اسير
مو سهل ياناس عافوني الحبايب
بكلبي مزروع الحنان. انتي الحب والامان
بعد المن اشتكي همي وعاتب
يريت الصاب ضلعج صوب اضلوعي
الحرك بابج يزهره طفه شموعي
نار الهجر تجويني
فديتج عمري وسنيني. يزهراء
------------------------
الخادم
رحيم الصالحي
في حق الامام الحسن العسكري
يم بابك اجت روحي
شايل بيدي اجروحي
لكيت بنص دليلي جرحك اشكبره
يالمسموم جبدك برض سامره
--------------------
ياحجت الله عله الرض. ولناس رحمه ونعمه
نورك زهه مثل الشمس. والما يشوفك اعمه
بلعلم حاربت الضلم. والجاهل انته تعلمه
كلشي تخلد ونكتب. ودرب. الهدايه ترسمه
مصابك عايش ويانه
مثل عاشور وحزانه
راحت روحي مني طوف بالحضره
يالمسموم جبدك برض سامره
--------------------
دمعك يسولف حالتك. وزمن قاسي وغدار
وجف الحقد مارحمتك. من عندك تريد الثار
اجروح كامت تلجم. وبسجن لنك محتار
يومك مثل يوم الذبح. والبين بيكم يختار
اليريد يروح عن ناسه
يودع باخر. انفاسه
دمع اعيونه يجري وبلكلب حسره
يلمسموم جبدك برض سامره
-----------------------
وحشه سمانه وضلمت. بصوت المنايه صاحت
ونجوم من فكدك طفت. بلكاع خرت طاحت
كلشي تغير من رحت. وكل الكواكب ناحت
والفرحه خلتنه ومشت. يلحسن عنه راحت
نشوف الدنيه مختنكه
كامت تبجي. بحركه
حتئ اليل يخجل من يطر فجره
يلمسموم جبدك برض سامره
---------------------
نواسي بدمعنه المنتضر. الله يساعد كلبه
من رحت زادت محنته. بهجرك تفطر كلبه
خليته بلهم. والحزن. والدنيه حسره وغربه
زغير بعده عله الهضم. ويام كلش صعبه
دموع الفركه بعيونه
امام وحجه يدرونه
بنفاسه لاخيره المهدي يحضره
يلمسموم جبدك ربرض سامره
----------------------
مرفوعه رايات الحزن. للحسن ننصب ماتم
ولمهدي ويانه حضر. عله مصيبتك يتئلم
بسامره خل نلطم سوه. ومن ثورته نتعلم
والما يشارك بلعزه. تالي شكثر. يتندم
رفعنه بكل كتر رايه
الك. بس تحله القرايه
من عندك خذينه سيدي العبره
يلمسموم جبدك برض سامره
---------------------
الخادم
رحيم الصالحي
https://youtube.com/watch?v=S162YNHJqA8&feature=share
Читать полностью…
في حق حب الحسين. ع
ياقابل الحر اقبلني .
بدفتر خدامك سجلني
مارايد لاجاه وسمعه
رايد بس ترزقني الدمعه
يااباعبد لله
---------------
ياحسين. سيدي ملهوف اجيت ابابك
ياحسين. خاطر اشتم من عبير اترابك
ياحسين. طول عمري مانسيت امصابك
ياحسين. روحي شمعه وذوباهه غيابك
بس انته حسين التفهمني
ماعندي غيرك صدكني
وبجاه المضلومه البضعه
رايد بس ترزقني الدمعه
يااباعبد لله
-----------------
ياحبيبي. حسين تستاهل تصبلك عيني
ياحبيبي. وبخدمتك. خلصته اسنيني
ياحبيبي. عله مصابك ماابطل اونيني
ياحبيبي. جرح عاشورك بقه ياذيني
يحسين مغركتني افضالك
ما جازيك شما اقرالك
والخادم من يبجي اتسمعه
رايد بس ترزقني الدمعه
يااباعبدلله
-------------------
ياامامي شلتك بروحي يبو اليمه قضيه
ياامامي وللخدم مولاي صرت الهم هويه
ياامامي كعبه صارت. كربله. والغاضريه
ياامامي بكل وكت يحسين ننصبلك عزيه
شايل اسم حسين الخادم
يتباهه يضل بين الوادم
واليخلص وياك ترفعه
رايد بس ترزقني الدمعه
يااباعبدلله
--------------------
ياطبيبي. سيدي لجروحي انته ألهن دوه
ياطبيبي. حسين بين انفاسي احسنك هوه
ياطبيبي. عشت وي الحزن بغيابك. سوه
ياطبيبي. من عرفتك شفت بعيوني الضوه
كل الناس تسولف عني
مجنون وحبك جنني
ذابت روحي مثل الشمعه
رايد بس ترزقني. الدمعه
يااباعبدلله
--------------------
ياغريب. جبدك تفطر حسين منل ضمه
ياغريب. تنادي وينج يمه لحكي فاطمه
ياغريب. ضلوعك منل خيل ليش مهشمه
ياغريب. فاض نحرك سيدي وينزف دمه
ملهوفه الناس من تزورك
تتبرك يحسين. ابنورك
متعنيلك رايح اسعه
رايد بس ترزقني الدمعه
يااباعدلله
---------------------
الخادم
رحيم الصالحي
في حق زينب ع
دارت سنه ونفس الحزن ضال
بالغربه انه وهل الهلال
بلوعت الشام وغربتي
ردت عليه. محنتي
بالغربه انه وهل الهلال
----------------
مرت عله مصابي سنه. وجنه امس بحساسي
شافت اعيوني جم نحر. من عنده شيب راسي
وبكربله كلهم سوه. ذبحو اهلي. وناسي
شماله قسه وياي الزمن. من عندي اخذ عباسي
وجروح بيه ضلت اكبار
كلمن يشاهد حالي يحتار
والونه صارت سلوتي
ردت عليه. محنتي
بالغربه انه وهل الهلال
-----------------
من كربله ضلت صور. بعيوني. متفاركني
بنار المخيم. احترم. والصوط ورم متني
مره اركض الصوب النهر. وغارت الخيل تردني
ورجع وردن لحرم. ودمعت الحيره بجفني
وحسين شفته بعيني مذبوح
فوك الترب. ياناس مطروح
محتارح انه بعيلتي
ردت عليه. محنتي
بالغربه انه وهل الهلال
-----------------
حافي ركضت عله الجمر. والنار تلهب بيه
يمي خواتي. اجمعن. علويه. يم. علويه
والعلم طاح عله النهر. يمه نذبح، راعيه
لا خيم ضلت للحرم. لا والي يفزع ليه
محتركه يدي بلهب نيران
ومنين ماصديت عدوان
المن اسولف حالتي.
ردت عليه. محنتي
بالغربه انه وهل الهلال
------------------
من ركبونه عله الهزل. وروس اخوتي جدامي
بعيوني اصدن لنحر. تسعر بروحي الامي
ضليت اباري بلضعن وجم طفل يصرخ ضامي
حادي الضعن بينه حده. محتاره اصد ليتامي
درب السبي حيرني بعيد
ونه الجروح ابروح اريد
بحسره صحت ياهضمتي
ردت. عليه. محنتي
بالغربه انه وهل الهلال
-------------------
من يجي اليل وحشته. تخنك ابروحي الحسره
اسمع رقيه من تون. وبجروحي تلهب. جمره
طفله وجسمه ازرك صفه. وجرح ابذنه شكبره
شافت ابوهه بلحلم. وبلطشت شبكت نحره
ماتت رقيه وطلعت الروح
تعاين ابوهه حسين مذبوح
وبعيني ضاكت دنيتي
ردت عليه. محنتي
بالغربه انه وهل الهلال
-------------------
الخادم
رحيم الصالحي
في حق الخدمه
متانينه يهل اهلال عاشور
صدري للطم لحسين منذور
-----------------
هل شهر الدمع. كنه ننجمع. اندك عله ظلع. ويانه البتول
وتشوف الخدم. تنصبله الخيم. ودموع وندم. ونواسي الرسول
بكل بيت العزاء. عدنه كربلاء عاشور العطاء . ماندري شنكول
نتمنه المواكب تخدم اشهور
صدري للطم لحسين منذور
-----------------
بكل شارع مصاب. ونوزع الثواب. وكيار وشباب. تنعه مصيبتك
وعلنه الحداد. علكنه السواد. وبكل البلاد . تلطم شيعتك
الخادم مايحير ظل كدره جبير. يسمونه الامير. هيبت خدمتك
ونظل عل عهد حد كطع النحور
صدري للطم لحسين منذور
----------------
نحسبلك ايام. ياشهر الحرام عله مصاب الامام. اقرايه ولطم
للمجلس اروح. ولمصابك انوح . تلجمني الجروح . من كثر الهظم
محروك الكلب. ودموعي تصب. ولموقف صعب. بعاشورك اهم
ماننسه مصابك طول الدهور
صدري للطم لحسين منذور
----------------
عبدك بين اديك. بروحي انه اشتريك. دليني عليك. يااغله حبيب
خادم للحسين . بعمري وسنين. وبكلبي الحزين. لجروحي طبيب
جبتني منل عدم. حسبتني ويه الخدم . يارايه وعلم. ليخدمك مايخيب
وسمك سجليته بين الصطور
صدري للطم لحسين منذور
---------------
زينب والحرم. بلا رايه وعلم. حركوهه الخيم. من بعد الكمر
هاي ام الخدر. راحت لليسر. وجروح شكثر. تمشي عله الجمر
وطفالك تصيح . والكافل ذبيح . وحسين الطريح . ماريد العمر
وجف حسين خنصر منه مبتور
صدري للطم لحسين منذور
----------------
الخادم
رحيم الصالحي
في حق شهر محرم الحرم
واه ويلاه يامضلوم
---------------
زينب من يهل عاشور. تتذكر مصيبته
ضلت حايره بشام. ياويلي عله غربته
لاخوان يمه اليوم. حال الضيم حالته
عسنك لاتهل يهلال. ترد اردود ونته
واه ويلا يامضلوم
-----------------
يشهر الحزن بيك حسين. مذبوح وعله الغبره
عشره خيول فوكه ادوس. ظامي هشمو صدره
ضل مرمي عله التربان. حزو خنصره ونحره
اعاين جسمه ياهل الناس. اشوف الطبره عل طبره
واه ويلاه يامضلوم
--------------------
اخوتي اذبحو ياحيف. وبس العده جدامي
حركوها الخيم بالنار. فرت حايره ايتامي
اركض عل جمر ضليت وتجوي النار بجدامي
يم صوب النهر رديت. ولكيت الكمر دامي
واه ويلاه يامضلوم
------------------
اموتن من يجيني اليل. اشوف اكبالي اخواني
وذكر مصاب حسين. تهيج عليه احزاني
عفتهم نومه عل تربان. زماني شلون عاباني
تمنيت الاجل والموت. حدر الترب غطاني
واه ويلاه يامضلوم
-------------------
يهلال الحزن يهلال. اون ودمعتي بعيني
غريبه وحدي برض الشام. ولاواحد يواسيني
بس ايتام يمي تنوح. والحسره تذيني
اصيحن وين راحو وين. اهل الغيره ناسيني
واه ويلا يامضلوم
---------------------
الخادم
رحيم الصالحي
في حق المهدي. ع
ياصاحب الزمان
----------------
يوميه انتضر وبعيني الدمعه
واترقب ضهورك ليله الجمعه
كل جمعه التجي اعلك الك شمعه
ودعي الباري بلجي يعجل الطلعه
تانينه . طالت يمهدي غيبتك
رد لينه . بشام زينب عمتك
حنينه. متانين يمته طلعتك
تدرينه. تلكانه كنه بخدمتك
تاكل بينه كامت هاي السنين
وين انته يمهدي بيا كتر وين
ياصاحب الزمان
-----------------
المتاني حبيبه يرجع يشوفه
تضل روحه بغيابه دوم ملهوفه
يردد بسمه يبقه ويحجي بحروفه
وكولن لو رجع محبوبي ماعوفه
يلغايب. طال انتضارك والبعد
ونراقب. يايوم يلمهدي ترد
ونعاتب. ساعات نحسبلك نعد
يلصاحب. متانين يومك نستعد
ضلم هذا الزمن يالمهدي خوان
من بعدك عرفنه شكثر عدوان
ياصاحب الزمان
--------------------
مشه بيه العمر والشيب اخذ راسي
ويجيني الموت غفله ويكطع انفاسي
اخافن مااشوفك يااعز ناسي
ادري انته. قريب يكلي احساسي
دليني. اتعنه امشيلك زحف
تدريني. ماعندي غيرك ياترف
وسنيني. رايتك ياساعه ترف
تاذيني. وجروحي تنزف ماتجف
مقصر يابوصالح عندي اذنوب
بس الخدمه عنه ابد ماتوب
ياصاحب الزمان
-------------------
يمهدي بجاه زينب عمتك الحره
نحلفك بالزجيه الطاهره الزهره
ارجع خل تشوفك عيني لو مره
ناسك يابو صالح تدري منتضره
وجروحك. تنزف يمهدي منل ظلم
وبروحك نار المصايب والهظم
يانوحك. من تسمع ابطاري الشتم
وتلوحك. نيران من حرك الخيم
شكثر ياحجه الله الك ثارات
متانينك تجي ونشوف رايات
ياصاحب الزمان
--------------------
الخادم
رحيم الصالحي
في حق العليه المظلومه. ع
كاعده وسارح خيالي وصافنه
ليش ابوي حسين راح وعافنه
بويه عمري وياك اخذته
دموعي تحجي وانه سكته
بويه يحسين
---------------------
يجرن اعيوني بغيابك والمدامع وشلن
خذتو روحي من مشيتو والمحامك كوطرن
شلون عافني خواتي ادري مني يستحن
راح اضل بالدار وحدي والمصايب روحن
وين الاكي الي يجيب اخباركم
عفتو ابنيه عليله ابداركم
كلبي بغيابك جرحته
دموعي تحجي وانه سكته
بويه يحسين
--------------------
خلص باجر وجه باجر وانه اتاني ونتضر
من تمر المغربيه ينعصر كلبي عصر
الينتضر محبوبه يرجع ينجوي بنار الهجر
وانه يوميه اناطر مابقه عندي صبر
كبال عيني دوم اشوف ارسومكم
كمت اشمن عطر من اهدومكم
كاس هجرانك جرعته
دموعي يحجن وانه سكته
بويه يحسين
--------------------
البيت وحشه من بعدكم ضلمه ومابيه ضوه
بويه مخنوكه بغيابك كمت احس ماكو ضوه
فرفحت روحي تريدك انته لجروحي دوه
يالغيابك دوهناني بناركم كلبي انجوه
كون اصيرن طير اطيرن ليكم
عن مصابي وهمي ارد احجيلكم
النوم بعيوني ذبحته
دموعي تحجي وانه سكته
بويه يحسين
-------------------
اتخر عليه ظعنكم مارجع من كربله
ماينام الليل يسهر كلمن يفار هله
المرض هد حيلي يويه وانه طفله معلعله
عني انكطعت اخبارك والندامع هامله
الليل اخلصنه اعد بنجومه
ياكل ابروحي المرض مالومه
واليتم توني عرفته
دموعي تحجي وانه سكته
بويه يحسين
-------------------
ايست منك يغالي ماترد من سفرتك
ادعي من الله يبويه يحرسك انته وعيلتك
كربله بيه مصايب عني يمكن شغلتك
راح اموت ومااشوفك يالجبير محنتك
جني بديره غريبه وضايعه
ماتلمني الكاع هاي الواسعه
حتئ نجم الضهر شفته
دموعي تحجي وانه سكته
بويه يحسين
---------------------
الخادم
رحيم الصالحي
مولد حق الامام العاس. ع
شعبان اجانه وجايب اعياده
بيه نولد مولود. للساده
عباس ابو الغيره
------------------
زهه بنوره وكبر. بدر شع الكمر
حله بعين الدهر يااجمل حبيب
خجل منه النجم. بسمانه مبتسم
ابو فاضل شهم. يااجمل حبيب
عباس تارس كربله من عطره ويشع بيه
تزهي بساتين الورد والزينب ارد اهديهه
والدنيه تضحك مستحه وبنورك تضويه
شوكه تصير بعين حساده
بيه نولد مولود للساده
عباس ابو الغيره
--------------------
علي بيه ابتشر. اخو زينب فخر
كسر عين الدهر. يانبض الكلب
ابد ماله مثال. بدر ليلت كمال
نجمع بيه الجمال. يانبض الكلب
فرحانه املاك السمه شافت هلالك عالي
وياخذني بجناحه العشك وداني لجمل غالي
وسمك كتبته بالكلب خطيته ابدلالي
بالرابع بشعبان ميعاده
بيه نولد مولود للساده
عباس ابو الغيره
---------------------
ربه بحضن الوفه. حمل اجمل صفه
شكثر بيه عاطفه. سبع الكنطره
ترضعه ام البنين. عطف منه وحنين
كبر بين السنين. سبع الكنطره
عباس انته بكربله بيدك تشيل الرايه
ضعن الحرم يابو الفضل كفاله وحمايه
عندك وصيه من علي بسيفك تدك الثايه
والناس تحجي كله بمجاده
بيه نولد مولود للساده
عباس ابو الغيره
------------------
يماي انته وعذب. ينوماس الكلب
اصفه منل الذهب. ياتاج الوفه
صرت مثل الضوه اشمك ياهوه
حرز روحي ودوه. ياتاج الوفه
متاني ميلادك يجي وحسب وعد ايامي
وبروحي تكبر ياخلك مثل الزهور احلامي
عطشان ولكيتك نهر ارويني وانه الضامي
كل محب منك ياخذ امراده
بيه نولد مولود للساده
عباس ابو الغيره
---------------------
شكثر شايل عزم. يصكار الزلم
ابو الغيره وشهم. ياحامي الضعن
يليث ال بلحرب. تحط بيهم رعب
غضب سيفك يصب. ياحامي الضعن
انته يسكاي الحرم وبجودك اترويهم
حملات حيدر حملتك وبسيفك تبجيهم
سبحه العساجر والزلم مثل الخرز طش بيهم
وارث ابوه وعمه وجداده
بيه انولد مولود للساده
عباس البو الغيره
--------------------
الخادم
رحيم الصالحي
مولد الامام المهدي
مريم العذره والزجيه
بميلادك حضرن سويه
-------------------
من نولد راعي العهد بيام شعبان
الدنيه كله نورت والكون فرخان
الزهره حضرت فاطمه وحنت البيبان
ومريم العذره شالته والكلب لهفان
جابن الك احله هديه
بميلادك حضرن سويه
--------------------
حنه بصواني والشمع وعياد وفراح
جابن اله كماط ومهد وورود قداح
من وجه يشع الضوه ياناس مصباح
بكتاره يتناثر عطر المهدي فواح
شاع الخبر بين البريه
بميلادك حضرن سويه
-----------------------
جبريل هنه فاطمه من شاف مهده
وتزهي بساتين الورد ورده عله ورده
بالسمه نوره ضل يشع من نور خده
والخير كله بجيتك فاض وتبده
والكون الك ياخذ تحيه
بميلادك حضرن سويه
--------------------
لبست الدنيه بجيتك ثوب احله من ثوب
عيد وفرح يبن الحسن ياغله محبوب
نحتفل جينه بمولدك ياعشك الكلوب
حنه وشمع يضوي الك ونور الدروب
ياامل كل الجعفريه
بميلادك حضرن سويه
-------------------
الليله فرحان الموالي وناسي الحزان
والشيعه كله بجيتك فتحت البيبان
طيور السعد غنت الك مابين الغصان
كلب الزجيه بمولدك هل الليله فرحان
ونهني حماي الحميه
بميلادك فرحن سويه
---------------------
الخادم
رحيم الصالحي
في حق السيده زينب. ع
يازينب. يازينب
ارسملج خيم بدموعي محتركات
وشوف كبالي صوره مسلبه ايات
وبصدرج يزينب حسره ولاهات
مات الضوه بعينج من كفيلج مات
عيشيني بعاشورج حسره والم
وبكلبي تحركني نار الخيم
كل يوم يمر بيه يخلص ندم
ولكيت بدلالي نابت سهم
يازينب. يازينب
-----------------
تمر اسنين بيه والزمان يدور
وعيش انه بمصابي وحسره وعاشور
صرتي بديره غربه والضهر مكسور
عفتي ابكربله ابن امج. المنحور
يجرحني بدلالي طاري السبي
عل هزل ركبوها بنت النبي
تمشين بلا كافل وي اجنبي
والخدر يازينب بطرك العبي
يازينب. يازينب
-------------------
درب الشام يازينب قصص مره
عكب عباس وي ضعنج شمر يبره
يسمونج سبيه ونتي. الحره
وراس حسين اخيج عل رمح يبره
من عندج يازينب راح الخدر
وحسين بنضراته يكلج صبر
مهضومه وحرانه بدرب اليسر
عل شاطي ويه الرايه عفتي العمر
يازينب. يازينب
-----------------------
كل دمعت يتيمه تصيح. ياعمه
وحسره من رقيه جرحج تلجمه
تريد حسين ابوهه تشبكه وتشمه
وبلسانج يزينب تعثر الجلمه
تحسين بكل خطوه لجمت جرح
والشامت نضراته سيف. وذبح
بعيونج يازينب مات. الصبح
بجروحج شماتج ذرو ملح
يازينب. يازينب
----------------------
يحادي الضعن بينه من نطب للشام
خلي الروس كدام الضعن كدام
هاي الناس شمات وعده وضلام
غدر بينه الزمان وغدرت اليام
وجروحي عله الراحو تنزف دمه
وطفال بلا والي تصيح الضمه
بت حيدر عرفني وبت فاطمه
وعيوني من الحسره بيهن عمه
يازينب. يازينب
------------------
الخادم
رحيم الصالحي
في حق الزهراء. ع
كعدنه كعدت اوداع. ورسمنه نعش عل كاع
عباره عليه خطينه. نموت ويبقه ماضينه
حبيبين
-----------------
نخاف من باجر يجينه. بيه مصاب وحسره
الفركه ماتنحمل تكتل. من تروح. الزهره
سولفينه هموم عدنه. وجرح بينه شكبره
الكعد وي محبوبه ساعه. هذا حضه شكبره
باجر ندري افراك. بين ثنين عشاك
كلمن دمعته بعينه. نموت ويبقه ماضينه
حبيبين
------------------
كلمن اصوابه بدليله. والزمن مايرحم
الينكسر كلبه ويه ضلعه. بحسرته يتئلم
الماي لو مني تبده. ادري بيه مايلتم
ياحسافه سنيني راحت. ومحب عايش بلهم
بكيفه الزمن يختار. ياخذ شمعه الدار
ذبحت اجمل ليالينه. نموت ويبقه ماضينه
حبيبين
--------------------
عيون محبوبي اصدهن وبيهن هموم وحجي
ثنينه نبجي سويه. وما نبطل منل بجي
حيل مالومه الزجيه. من ظلعه تنتجي
باجر يسافر حبيبي. يروح عني ومايجي
يضل البيت خالي. مني يروح غالي
تروح اجمل امانينه. نموت ويبقه ماضينه
حبيبين
-----------------
بزينب توصي الزجيه. وبلحسين وبلحسن
ذوله همه اعزاز كلبي. ولهم اظلوعي انحنن
ياعلي عينك عليهم. منل مصايب لو لفن
انته امهم ونته ابوهم. وانه ايامي انتهن
برحيلي انته محتار. ولدك كلهم ازغار
سهام الفركه ترمينه. نموت ويبقه ماضينه
حبيبين
----------------------
كامت بحسره تلي. لو متت غسني
بليل ياحيدر اريدك. بلكبر ادفني
انه اوصيك بوصيه ابد لتفاركني
الموت ارحملي يزهره. لو رحلتي عني
احس بكلبي مفطور. وفتر مثل ناعور
نار الهجر تجوينه. نموت ويبقه ماضينه
حبيبين
--------------------
الخادم
رحيم الصالحي
@
في حق الزهراء. ع
هواي الج مشتاكه يم العافيه
يم سوالف كله خير ودافيه
ياحنينه البيت خالي
وضلمت بيه اليالي. يمه يمه
-------------------
جان بيتج يزهي من نورج يحره
من اطب الغرفتج يايمه. حضره
صوت قرانج اسمعه ابذني يقره
توكف عله الباب ناس هواي فقره
روحي تخشع من اشوفنج تصلين
وتجري ادموعج ييمه ونتي تدعين
لكربله ياخذني بالي
وضلمت بيه اليالي. يمه يمه
--------------------
منين ماعاين ألاكي الج تذكار
يمه عطرج دوم اشمه تارس الدار
رحتي بس خليتي بيه جرح بسمار
وضلت ابروحي يزهره تستعر نار
عمري خمس اسنين من عفتيني
يمه تدرين الهجر ياذيني
رجعي يحبيبه تعالي
وضلمت بيه اليالي. يمه يمه
---------------------
ماينام اليل كلمن فارك. امه
لئن عن اعيونه غاب اختفه نجمه
كل حنان الدنيه بيج وحله نسمه
اسمج ابروحي حرز يلزهره اضمه
ضلن ادموع الحزن بعيوني
من انوحن وبجي لتلوموني
يكتل افراك الغوالي
وضلمت بيه اليالي. يمه يمه
---------------------
كلشي راح وياج يومن رحتي عني
بس بقه دمع الحزن تارسلي جفني
رجعي الدارج ييمه عليه حني
والعصر ضلعج يزهره هم عصرني
اليش ياموت الخذته ماخذتني
زغيره انه ومي راحت فاركتني
دمعتي بعيني تلالي
وضلمت بيه اليالي. يمه يمه
-------------------
يمه بسمار البصدرج صاب ضلعي
نار بيه وحترك ويذوب شمعي
رحمي بحالي تعالي شوفي وضعي
دمه كام يسيل بعدج يجري دمعي
كامت اسهام الهجر ترميني
يمه فدوه ارجوج لتعوفيني
والحجر ناح وبجالي
وضلمت بيه اليالي. يمه يمه
-----------------------
الخادم
رحيم الصالحي
في حق السيده زينب، ع
زينب نعشه من تشيلونه
جرح ابمتنه لا تلجمونه
---------------
يلي تشيلون النعش بهداي وياهه
بيهه جرح من كربله مالوم اذاهه
شكد مصايب، هل زمن ياناس راواهه
كافله عباس الشهم بالغربه، خلاهه
وسعو كبره من تحفرونه
جرح ابمتنه لا تلجمونه
-----------------
ياهو المثله بهل الزمن ماتنكضي احزانه
ناس الغرب عكب الهل يمشون دفانه
جاوينه اخوهه خل يجي عباس، ماجانه
ماتت سبيه ام الصبر بالشام حزنانه
كلمن يموت اهله يحضرونه
جرح ابمتنه لا تلجمونه
------------------
ياهو اليروح الكربله ويخبر العباس
ماتت اختكم ياوسافه انكطعت النفاس
الماعده وليان واهل تتفنه هاي الناس
وشلون ترضه ياكمر ياراعي، النوماس
صاحب حميه ومايلاكونه
جرح ابمتنه لا تلجمونه
------------------
نار المصايب ماطفت لموت ماتبرد
ماجوره دمعات الحزن من تجري فوك الخد
شمانعد نكبات الزمن ياناس ،ما تنعد
كلمن خدم زينب تره بالخدمه يتخلد
دوم عله زينب تجري ،اعيونه
جرح ابمتنه لا تلجمونه
-------------------
وبروحي منصوب العزه ومصيبتج بيه
ادري انتي رحتي ميسره لشام مسبيه
نبض الكلب يم الصبر جن عزه ولطميه
عاشور يبقه للئبد وقرايه يوميه
ماتم عزه بسمج ينصبونه
جرح ابمتنه لا تلجمونه
--------------------
الخادم
رحيم الصالحي
https://youtube.com/watch?v=S162YNHJqA8&feature=share
Читать полностью…
في حق مشايه الحسين. ع
حياكم الله الزوار حياكم
المهدي مشايه طلع وياكم
-----------------
حياكم الله ماتعبتو شيلو الرايه
المهدي وياكم طلع لحسين مشايه
تنتضرك الخدام من اطب الولايه
يصيحون عدنه تفضل ارتاح
منك يزاير كل تعب راح
طول الدرب ماينكطع ممشاكم
المهدي مشايه طلع وياكم
------------------
ابيوتنه مفتوحه الك ارتاح وتفضل
احنه الخدم ونته الملك امر وتدللل
والعاشك ابحبوبه لازم يرضه ويقبل
شايب وكف ويه اليعزبون
ميت هله بيكم يصيحون
كل سنه احنه وكل عام نتناكم
المهدي مشايه طلع وياكم
------------------
متعني كاصد كربله الزينب تواسيه
تسبيح هايه وجر كل خطوات تمشيه
ايام حلوه منل العمر بالخدمه. تكضيه
وحسين خله بعكلك اجنون
ناس شكثر منك. يغارون
لمن تطب خدام تتلكاكم
المهدي مشايه طلع وياكم
-----------------
كل صعب يسهل لو مشيتو وكلشي يهون
تلكه المواكب حاضره وتلكه. اليخدمون
واحدهم يكلك هله. وتسيل. العيون
هذا التعب يازاير يروح
درب الحسين يطيب الجروح
والزهره تفرح لو كثر ممشاكم
المهدي مشايه طلع. وياكم
----------------
لمن. تطب الكربله زينب. تحيك
من فوك تل الزينبي تسمع بواجيك
مشاي اجيت ومعتني وانه افتخر بيك
سلم عله العباس وجفوفه
ولحسين امشي تعنه وطوفه
يحفضكم الله الزوار يرعاكم
المهدي مشايه طلع. وياكم
-------------------
الخادم
رحيم الصالحي
في حق السيده زينب. ع
يازينب ابشري بهاي البشاره
طب اله ابو فاضل راعي الشاره
-------------
طب وجنه جيش ابكامله من طب
حتل الحومه كلهه وسيفه المجرب
من عدهم يخلي الكاع دم تشرب
ابو الكلفات اخيج، فارس، امجرب
زلزال ويشك بلكاع بتاره
--------------
صياد ونزل يستنكي. بصيده
ناوي الجيش كله بكامله يبيده
طشره الكتايب والحرب عيده
مثل سبحه ويفره بكيفه ابيده
من حملاته خله الكوم محتاره
---------------
سبع الكنطره العباس كفالج
يجيب الماي لازم يسكي اعيالج
مابيهم شجاع اليصل. يدنالج
شتريدين كولي كلشي. يجرالج
اليوم ابكربله تسمعين بخباره
----------------
شايل رايته وترفرف ابجفه
ابو الكلفات كله الوادم تعرفه
لو طب الحرب نحتار شنوصفه
تشهد كربله ويشهد اله طفه
يريد اليوم منهم ياخذ ابثاره
----------------
فوك الشاطي طاحن منه اجفوفه
وزينب من بعيد تعاين اتشوفه
بلجن يرد ليهه الحره. ملهوفه
عليه الجيش دار وفزعت اصفوفه
وطاحت رايت العباس بكتاره
----------------
الخادم
رحيم الصالحي
في حق الحسين. ع
يحسين الشعائر. تحيهه المنابر
---------------
يضل بكل وكت يحسين عاشور
ويجدد عزانه بطول الدهور
نقدملك الرواح ونفدي النحور
الك يحله لطمنه فوك. الصدور
وبدم المناحر. تحيهه المنابر
--------------
هويتي سجلت خادم للحسين
وسولفله قضيتي بدمعت العين
تحسدنه العواذل جيه. موالين
نضل ابدرب ابو السحاد ماشين
صيحات الحناجر. تحيهه المنابر
-----------------
لبست منل اازغر ثوب الخدامه
والخادم تعرفه من. كلامه
عله درب حسين اتمنه. الختامه
هايم. كلبي. بحبه. وغرامه
ساكن بالضماير. تحيهه المنابر
------------------
كلشي بهل زمن. واضح نعرفه
وبو السجاد ماكو مثل وصفه
اصفه منل الذهب بهواي اصفه
يبو حجايات خلوه وروح ترفه
ياماضي ويحاضر. تحيهه المنابر
------------------
الك يحسين ماتم دوم. منصوب
موجوده محبتك بين الكلوب
روحي عليك ضلت شمعه وتذوب
لكيت اسمك عله الدلال. مكتوب
وتهل النواضر. تحيهه المنابر
-------------------
الخادم
رحيم الصالحي