532
يا نفسُ من بعدِ الحُسينِ هُوني 💔 @alikk1998 🙏 خادمكم
#السلام_على_كريم_المعصومين
#السلام_على_عصمة_المتقين
يا مَن جمالك شادهْ الْحور
يا حَسَن يل إحسانك ينور
رحمة وهداية للمْضيْعين
يا نجم ساطع يبن البدور
•
بالعرش ظلّك نوره وضّاح
المشكاة امّك وانتَ مصباح
ٱتْعَلْم الملائك على التسبيح
ويا عصمة الْمُتَّقي لو طاح
•
فاقت حكمتك حد الأزمان
تنطي الخضر وانطيت لُقمان
مو بس بشر تنطيها مولاي
انت كريم الإنس والجآن
•
بيك السمه انرفعت والهموم
والخير باسمك نازل اليوم
ما لَك وصف يــَ اوسع من الكُون
واللي يوصفك إلّا معصوم
#الخادم_علي_خيري_العبادي
السبت 14 رمضان المبارك 1443
/channel/AliAliAlabady
#يا_صاحب_الزمان
#يا_ملجأ_العاصين
#يا_منور_القلوب
يمتى نفسي تظهر بمظهر انيق
لجلك وحبك يدلّيها الطريق
وين هيه شگد بعيده وانت وين
شگد قريب گليبك الها شگد شفيق
شكد قست لمّن مشت بين الظلام
وبقى يجذب بيها نورك الرقيق
تعْمه لو ما شافِتَك ليها رقيب
يمتى تبصر؟ كافي غفله خل تفيق !
يمتى تطَهّر بفيضك يا مَعين
يمتى تتعطّر بذكراك العتيق
وبلذيذ اسمك تصح لذّتها كون
مو بزخرف دنيا وبزينه و بريق
وتنتبهلك والينسّيها الوصال
لخاطرك تهجره لو اقرب صديق
انت والدها وصويحبها الحِنين
انت امها البّرة والأخ الشقيق
لا شريك وياك واليعشگ يغار
يا مُحب للماله محبوب ورفيق
باب فطرتها إفتحه بالدموع
يمفتاح الرب، وسد باب الحريق
كون مو بالشِدة بس تتنخه بيك
حبل وصلك شِدّه بيها شَد وثيق
يمتى يولد بيها جرحك للمشيب
وبهمومك تصفن وهمها عميق
تحظه بيك شلون؟ يمتى؟ مدري وين
تصبر ابلزمت جمرتك؟ ما تطيق؟
ادعي تثبت على دينك ما تزيغ
نفسي امّارة واخاف اصبح غريق
يامه غرگت وانت تنفخ بيها روح
وترد مكسورتلك تريد الشهيق
ريت تصبح مطمئنة باليقين
وتدخل بواسع رحمتك من تضيق
هيه محسوبه عليك، اتفشّل، آخ -
شلون بيها، وهيه اصلًا ما تليق
يمتى نفسي تظهر بمظهر يليق
#الخادم_علي_خيري_العبادي
/channel/AliAliAlabady
علويه ومتعلمه بس اعله الستر
محتاره شتسوي وبخيمها النار
وتشاهد نسوتها يدوسن عالجمر
والحرمه التبقه بلايه ولي تحتار
وتشوف وتشوف، زلمها عالثره
شتصير شتصير، وتتحمل الجره
ياناس ياناس، شيّبت هل مره
و اتعذّبت ..
بصعدت التل اتعذبت
شافت اخوها وشيبت وضلت تگول
يبن امي ان كنت عدل
ادركنا وادرك چم طفل من الخيول
طشرو هلك بالبر
يآبو علي الأكبر
••
المستوره مو هينه تمشي للأسر
جبروها وبالگوّه صعدت اعله النوگ
الما عدها لا كافل لا چتف لا ظهر
تتمايل عالهزله وطببوها السوگ
تنشاف تنشاف، وشافت بشر غرب
بنهار بنهار، طلعت لچن غصب
واتبات واتبات، مسبيه بالدرب
واتلوعَت ..
ليل السبي ما ينحچي
تتلاوه ويّاا بالبچي وتنعى الحسين
بان بملامحها الكسر
وشمس الصحاري البل ظهر چوّه الجبين
يا سادة الغيره
زينبكم ايسيره
••
بنت حيدر واخوتها سادات الخلق
تاليها يماشيها الأصله ما معروف
ويهضمها ويشتمها الماله شيمه وخُلق
ومن صوته ومن سوطه راوداها الخوف
واتخاف واتخاف، لو عتّو الحبل
واتصيح واتصيح، وينك يبو الفضل
عباس عباس، طحنه بعدو نذل
الحگ متت ..
درب اليسر فت المهج
وظهري احس بيه انعوج وگليبي ذاب
ياهيه مثلي بهل عمر
تحمل رزايا هل كثر وتشبع عذاب
زادت على فاطم
زينب يهل وادم
••
المتغرّب عن أهله يتمنى الگبر
والگبره بالغربه أمنياته تموت
والعاشت إلْموت بكل لحظه تمر
لا هيه عدله ولا تستحق تابوت
وتموت وتموت، من تذكر الگمر
والروح والروح، عافتها عالنهر
وتريد وتريد، اخوه لهل سفر
وما ضل شهم ..
شيصبّره الذبحو هله
والماله حامي بالفله جائز يموت
والدرب يجرح چم اذن
حچي الشماته شگد خشن لمّن يفوت
من رجعت لحيهم
ما سمعت الحيهم
#الخادم_علي_خيري_العبادي
الثلاثاء 13 رجب الأصب // 1443 هـ
/channel/AliAliAlabady
متى يا قَلْبُ تُوقِفُكَ الرزايَا
وتُحرِقُكَ بأَروِقَةِ الخِباءِ
مَشَتْ مولاتُكَ عَطشىٰ بقَفْرٍ
يُقَلِّبُ ضَعنَها حـَـرُّ الهواءِ
فهٰذيْ أُخْتُ أقمارِ الفيافي
وتَلْفَحُ نُورَها شَمْسُ السَّماءِ
فوا لهفي بظُهْرٍ أظْهَرُوها
و ظَهْرُ النَّاقةِ دونَ الوِطاءِ
تجلَّى هـَمُّها دمعًا حَنينًا
فهَمْهَمْتِ العِجافُ بالبُكاءِ
جِبالُ الدَّمعِ بُركانٌ تفورُ
بداخلِها و لا تُطفى بماءِ
تُرى كم يَحمِلُ الصَّبرُ الجميلُ
فيَذبُلُ يَذبَلُ مِن ذا الْبلاءِ
لها لــُبٌّ تُجَمِّعُهُ بِــصَمْتٍ
فيُكسَرُ عِندَ إعوالِ النِّساءِ
عشيرَتُها قضَو صرعى بذِبحٍ
عظيمٍ فاقَ ذبحَ الأنبياءِ
تُكابِرُ والسِبا فيها تلظَّى
ومُهْجتُها تُفَتُّ بــكربلاءِ
جريحةُ غُربَةٍ وخُطاها نزفٌ
و جَهرًا تَعثُرُ لا بالخَفاءِ
وتُؤخَذُ عَنوةً مِن غيرِ وآلٍ
بأُمِّي وَ أَبي أُمَّ العَناءِ
#الخادم_علي_خيري_العبادي
/channel/AliAliAlabady
«عزيزٌ عليَّ أن أُجابَ دونَك وأُناغىٰ»
اليِعزّك مُفترض دونك يناغي الـ آه
•••
منو يناغي جروحك يا طريد الآل
وما ينساك لحظه وبالگلب تنشال
منو يحبك صدگ بالفعل مو باقوال
منو ايحس بيك ويحس البُعد كتّال
احنه ابعاد، وآحدنا التها ابدنياه
••
ياهو بحالتك يتأمل بحسرات
ياهو ينام وابخده أثر دمعات
ما فكّرنا بيك اشلون وين اتبات
كثر ما عايفينك صرنه چن اموات
وتعدَل روحه باسمك شكو واحد تاه
••
على أسمك منو يغفه ويصبّح بيك
وإيجدد عهد ويّاك من يدعيك
إليعرفك إمام المفترض يرضيك
بحيث شويه من اهمومك اينسيّك
مو فوگ اللي بيك إيچمّلك ويلاه
••
وين احنه، وشجانا حتى هيچ نصير
مو خبره بقضيتك، خبره بالتقصير
بسُوالفنا، بغربتك، حيره بيش اتحير
كسرنا اگليبك وما نِهِم بالتجبير
و رغم هذا تداوي ٱفئدة خلقِ الله
••
واحد وي الآخر نحچي احنه هواي
چا وانته منو ايْسامرك يا مولاي
منو يعينك ويبچي يا مَعين الماي
وايعز عالبچه خذلان ناسك هاي
و ينحز خاطره لخاطر ألم مولاه
••
لخاطر ثار ألله إظهر وجيب الثار
يا فلّاق هام الشرك والكفّار
بيت الحمد خله يشع بالفقار
لحدمن تبقى مخنوگ وعيونك نار
و نهار وليل تندب آه يا جداه
#الخادم_علي_خيري_العبادي
1443هــ / 26 ربيع 2 الخميس
/channel/AliAliAlabady
محّد رحمنه بكربله
خويه حسين
رَكضو خواتك بالفله
خويه حسين
وردنه نجيلك والشمر
بسوطه عرض عالعايله
وشسوي للخيول
اذا منعت هواك
عجاجه وچن اشوف
بحوافرها دماك
ودريت انّك طريح وجاستك خيل
اجيت اشهگ واطيح
وركضت وگمت اصيح
شنو نفع الحياة
وبعد روحي ذبيح
والعطشان صعبه يجرع الويل
يبن امي وابوي
محبوبي واخوي
••
بدونك ولا متعلمه
خويه حسين
ولا ضل اخو لا ضل حمه
خويه حسين
بسوگ وقصر بين الزلم
ذريّة امنا فاطمة
مشينه اعله الجروح
وعلى ايدينه حبال
وسمعنه اشكد كلام
يلوّع بالدلال
وعلواه فقط چلمة خارجيات
عدونه مو غيور
شتم آل الرسول
وشمت بينا ويريد
لچم روح البتول
وهذا الحچي غير السوط والفات
يبن امي وابوي
محبوبي واخوي
••
يبن امي ما بيه بعد
خويه حسين
بالغربه ينراد السند
خويه حسين
وبالخفيه ابچي والدمع
عالخد كتب خويه مدد
المثل حالي تموت
وانه عشت بعذاب
حرت بيمن احير
وانه عندي مصاب
وبس ابچي اعذّب گلب الأطفال
وعيوني ما تنام
بخرابه مستحيل
غريبه وضيمي شام
وبقيت بلا كفيل
وصرت آنه كفيله لضيم العيال
يبن امي وابوي
محبوبي واخوي
••
حادي الضعن قاسي الگلب
خويه حسين
واشگد هظمنه بالدرب
خويه حسين
والينسبي لا بُدَّ أن
لو ينصدم لو ينرعب
نصدم جرحي بنحور
اصبَغَت لون الرماح
ومِنْ الْهزله اطيح
لَوَن اي راس طاح
واخاف الراس يوصل جوّه الجْمال
الرعب يعني بنات
تشوف الشام عيد
ويضربوهن حجار
او بيديهن حديد
وبالگوّه يشگفن والدمه سال
يبن امي وابوي
محبوبي واخوي
#الخادم_علي_خيري_العبادي
1443 هـ / 7 صفر المشاية المقدسة
/channel/AliAliAlabady
غيره وشيم ، سَيْد الخَدَم حبيب
يا سيدي ، الأسدي المُهيب
••
استاذُ عابسَ في الجُنونِ وعالِمٌ
تلميذُ حيدرةٍ و شِبلٌ في الوغى
تُعطي دُروساً عِندَ اخذِكَ رُوحِهِم
ولزئرِكَ الأسديَّ الطفُّ صغى
صاعد عله ، روس المله خطيب
يا سيدي ، الأسدي المهيب
••
يا من بإخلاصِكَ حيّرتَ الورى
واحتارتِ الألبابُ في اسرارِكَ
سِرُ التفرُدِ في ضريحِكَ آيةٌ
تفسيرُها عند الذي بجوارِكَ
اسمك لغز ، حُب وحرز عجيب
يا سيدي ، الأسدي المهيب
••
تِيجَانُ مَمْلَكَةِ القُلُوبِ تَطأطأت
عِشْقاً لِخُصلَةِ شَيْبِكَ المُتَعاليا
وسِجِلَّ نـبْضِ العاشِقينَ ملكتَهُ
خُذ يا فَقيهَ الحُبِّ قَلبي البَاليا
شيخ العشگ ، انت الصدگ طبيب
يا سيدي ، الأسدي المهيب
••
مَن ذَا يُجاريكَ بصُحبَتِكَ وأنتْ
أفنيتَ عُمرَكَ خادماً أهلَ اليقين
يا أكبرَ الأصحابِ مِنزلةً وَ سِنْ
لكِنَّكَ تتصاغرُ قُربَ الحُسين
دينك أدب ، حائز لقب أديب
يا سيدي ، الأسدي المهيب
••
أفدي حبيباً رتَّلَ الثقلينِ، بلْ
هوَ يحفَظُ القُرآنَ كي يبقى الإبا
و أرادَ ان يحفَظَ آياتَ الخِبا
ضحّى وأضحى رأسُهُ عِندَ السِبا
فَــيْ للخدر ، رغم الستر غريب
يا سيدي ، الأسدي المهيب
#الخادم_علي_خيري_العبادي
2021/8/12 الخميس
/channel/AliAliAlabady
بگلب الخادم فطرته ومولاك اليخلّي نور
لا تتفلسف يگلبي هوّه انته كلّك قصور
فهوَ أعلمْ بما في نفوسِنا والصُدور
وآسي الزهراء
سلّم شعورك الها وانحب ويّاها
اكسر كيانك عالكسر مُهجت طاها
وگلّه جروحك بالضماير معناها
يحسين بضمايرنا ..
••
يايها الذي آمن بجروح الحُسين
ابچيله وحاول اتعرف امامك اشويه زين
وابقى ابخدمت حبيبك وفّيله واعتبره دين
انطانا اهواي
للذبح غيرت اكبره بحُب ينطيها
ومولاتي ليلى اتحن اله ويكفي البيها
والشوگ ناره بالدليل شيطفيها
نار بدليلي تسعر ..
••
حورٌ مستورةٌ سابقاً معاً في الخيام
غفله وكلشي احترگ والنجت تلگاها شام
واچم حرمه تسلّب وليها واغطاه سهام
وسلبو الاطفال
حتى اللي ما كمّل سنه سلبوله الروح
شمعت ضوه عيون الرباب اشهوره اجروح
تلوليله يمه دهري ذبني بين النوح
دهري ذبني ..
••
كلٌ يعمل على شاكلت جروحه بصفاء
واللي يصفيها نيته يجيله رزق البكاء
والخدّه اتلبس ابدمعه، سيّده ابلا رداء
ضل حدر الخيل
ابن الزچيه عالترب واتسيل ادماه
وشافته اخته منذبح وذبحتها الـ آه
شبچت العشره وصيحت خويه ويلاه
شبچت العشره امن الخطر ..
#الخادم_علي_خيري_العبادي
2021/8/8 الاحد
/channel/AliAliAlabady
بِــنَفسِي وآبـائي نُفوسـاً أبيَّــةً
يُجَرِّعُهـا كـأْسَ المنيـَّـةِ مُتـرَفُ
تُطَـلُّ بأسيـافِ الضـلالِ دِماؤُهم
وتُلغى وصايا اللهُ فيهِم وتُحـذَفُ
وَهُمْ خيـرُ مَن تحتَ السمـاءِ بأسـرِهِم
وأكرمُ مَن فـوقَ السماءِ وأشرفُ
ولْد الزهره انوار
بس الناس عميان
تجازي النور بالنار
وتخنگ حچي القُرآن
بالطف بيّن شصار
صار العطش نيران
يلهب والهوى حار
وطلع بالنِفس دخان
والحرب مو مالت ضمه
والسمه ادموم امغيمّه
جره، الْغيم من شاف الجره
جره، اُلحي والجماد اعله الثره
جره ..
كلشي بهل وجود ، وكاتب عالخدود
واويلاه .. يا عيالَ الله
••••
فللهِ مِن خَطْبٍ لهُ كُلُّ مُهجةٍ
يَحِقُّ من الوجْدِ المُبَرِّحِ تتلَفُ
لِتُلقِ الجيادُ السابِقاتُ عِنانَها
فليسَ لها بعدَ الحُسينِ مُصرِّفُ
ألا قُـلْ لأبنـاءِ السبيلِ ألا اقنُطـوا
فقد مـاتَ مَن يحنُو عليكُم ويعطِفُ
رحلْ اليزرع احساس
بگلوب الحيارى
رغم ابفگد عباس
مات ابــ انكساره
ومات احسين يا ناس
لان شاف اهل داره
صارو بيد الارجاس
ومو بيده قراره
بسيفه توچّه وما گدر
يگوم ويطيح وجرحه دَر
نزف، چي سلبو اسكينه الغُرب
نزف، حد ما يبس هرش الگلب
نزف ..
بالهيمه وحيد ، واميّه يريد
واويلاه .. يا عيالَ الله
••••
بِـنَفسي النِّسـاءُ الفاطميـاتُ أصـبحت
من الأسرِ يستَرئــِفنَ مَن ليسَ يرأَفُ
لقد قَطَّـعَ الأكبـادَ حُزنـاً مُصابُهـا
وقد غادرَ الاحشاءَ تهفو وترجُفُ
إذا رأتِ الأطفـالَ شُــعثاً وجوهُهـا
وألوانُها مِن دَهشةِ الرُّزءِ تُخطَفُ
لون اوجوه مخطوف
يلاگي الموت كلساع
منو بي حيل وايشوف
دم اهله على الگاع
وجسم ضل ضيمه مكشوف
و يعاني بكسر الاضلاع
ويراود هل خدر خوف
لان مذبوحه الاسباع
حگّه اليعيش ابهل الم
احلامه تتفسر خيم
ذبل، حتى الستر وي الحرگ
ذبل، چم گلب بس ورّد عشگ
ذبل ..
عبد الله الرضيع ، بيد امه صريع
واويلاه .. يا عيالَ الله
••••
ومـَن مُبلِـغُ الزهــراءَ أنَّ بناتَهــا
عليها الرزايا والمصائِبُ عُكَّفُ
تطوفُ بهـا الأعـداءُ فـي كـُلِّ بلدَةٍ
فمِن بَلَدٍ اضحت لآخَرِ تُقذَفُ
تعالى الأسى واسـتعبَرتْ ومِن العـِدى
حِذاراً دُموعَ المُقلتينِ تُكفكِفُ
من الحومه للشام
سِگن الدروب دمعات
خِفن بالگوّه الآلام
عليهن عين شمات
هاي الدنيا ايام
وعمرهن خلص لوعات
وحده اتلمّ الأيتام
وتشاهد چم طفل مات
وچم وحده ماتت بالدرب
والتمشي لازم تنضرب
مشن، غصبن عليهن بالشمس
مشن، وما يحملن هذا الطقس
مشن ..
نسوان الدلال ، وبيديهن حبال
واويلاه .. يا عيالَ الله
[ الابيات الفصيح للسيد حيدر الحلي ]
#الخادم_علي_خيري_العبادي
2021/7/11 الاحد
/channel/AliAliAlabady
اخ الضمه ، يبّس عذوبة الأصوات
اخ الضمه ، من ورآ چم سيّد مات
اخ الضمه ، شمسوي بالعلويات
ماتن اُوروُد الحُسين
والذبل بيهن ذبل
وما بقه عدهن مُعين
و رجعن بلايه اهل
و يا قساوة الدرب ، عالمنكسر گلبه
والأشد ماكو عرف ، ويلچم حچي الغربه
••
اخ الغرب ، يا ريت ماتو يا ريت
اخ الغرب ، ما تفتهم سر البيت
اخ الغرب ، فضحو عيال اهل البيت
طشروهم بالفلاة
والبقه عايش نزح
واللي سلبوله الحياة
على حُب علي انذبح
واليحب ينطي ضريبه والثمن روحه
والفهم حُب كربله يتلذذ ابنوحه
••
اخ الشمس ، وين الذي يردها بساع
اخ الشمس ، تچوي والجروح اوساع
اخ الشمس ، والگمر طايح عالگاع
ودم ايادي بالطفوف
نزفن امروّه و رون
ابتعدن هواي الچفوف
وعالجرح قُربه هون
راحن لأم الحسن ، هنيال روحتهن
والعمود البالخيم ، طاح اوي طيحتهن
•••
اخ الحرگ ، للنده صاير چتال
اخ الحرگ ، سولته يكتل اطفال
اخ الحرگ ، ويطيّح اخيام الآل
نار خيمه ونار باب
والضلع خضّر سبي
وسوط فوگ اطهر حجاب
و انهضم لون العبي
والستر فوگ الهزل ، والحادي مايرحم
لَحد ما وصلو الشام اشچم جرح ورّم
••
اخ السبي ، عالشرف شيّخ اوغاد
اخ السبي ، واسبل دموع السجاد
اخ السبي ، اقرح جفون الأسياد
والفجع ابنَ شبيب
هيّه ذلْ عزيزنا
كون من عدها اشيب
وتنذبح عندي الــ أنا
يا انا ومحبوبي ما ضل بي عضو سالم
يمتى يآخذني مصابه وانحسب خادم
#الخادم_علي_خيري_العبادي
2021/6/27 الاحد
/channel/AliAliAlabady
من تربتك منخلق جسمي
ومن دماك إتكوّن دمّي
صرت احسّن آنه مو آنه
يل صرت بس انتَ كل همّي ، حُسين
همّي رضاك
يا مولاي
عبدك اجاك
ماله راي
لاذ بحماك
وخاضع جاي
ليحبّك تتغيّر حياته
وتتأدّب چلماته وصفاته
مولاي يبن الزهرا دخيلك
••
يا سفينه تمشي ما ترسي
انت اولى بيّه من نفسي
سِر نجاتي لو سِرت بيّه
انت نون وطاحت ابـ حسي ، حُسين
اسمك حياة
يل عطشان
تنطيه فرات
الذبلان
واسرع نجاة
للغرگان
يا مُنجي رجوايَ رحمتك
نجّيني واحييني بخدمتك
مولاي يبن الزهرا دخيلك
••
اشكرك يل مُنعم ابعمري
وكُلّما اشكر وجب شكري
افتقرلك يا سبب رزقي
طايع أمرك يا ولي أمري ، حُسين
أمري بديك
يا مذبوح
هيّمني بيك
وحطلي جروح
عاشت عليك
هاي الروح
اجمل حُب يتفسر مدامع
والأجمل چي يحمل مواجع
مولاي يبن الزهرا دخيلك
••
بيك اُنسي ودمعتي الترعش
يا أنيسَ كُلِّ مستوحش
هاربٌ منكَ الى لُطفِك
يللي ذكرك للگلب مُنعش ، حُسين
اقرب حبيب
للأرواح
اوّل طبيب
ينطي اجراح
تبقى تريب
وانه مرتاح
يا وسفه عالغبره حبيبي
متلوّع بجروحه طبيبي
مولاي يبن الزهرا دخيلك
••
بَختي بيك ولايذ ابَختك
الگلب فرّغَه لمحبتك
ما شفت غيرك حوه جرحي
يل مصابي صار من شفتك ، حُسين
ذبلن شفاك
ثلث تيام
دمعي لگاك
بيك اسهام
طاح وبچاك
وشاف اخيام
بخيامك چم شوغه وعبايه
محترگه واطفالك ضحايا
مولاي يبن الزهرا دخيلك
#الخادم_علي_خيري_العبادي
2021/6/22 الثلاثاء
/channel/AliAliAlabady
✨ نور الزمان ✨
🎤 اداء : ملا حسن السوداني
🎙️ الذاكر : عباس ماجد
🎪 هيئة دار الزهراء (ع)
❤️ اللهم عجل لوليك الفرج 🙏
https://youtu.be/z6nKnb45ZkY
• موضوع القصيدة / لسان حال مولاتي السيدة زينب (صلوات الله عليها) وهي تصف حالة ساداتي الإمام الحسن وسيد الشهداء وأبي الفضل العباس (صلوات الله عليهم أجمعين) بعدما رجعوا من دفن المولى أمير المؤمنين (صلوات الله عليه وآله) كأني بها بابي وامي وهي تقول :
•••
دفنو أمير المؤمنين
اولاد فاطم بالونين
و رجعو بچي وامدنگين
وبيهم تراب امن ابو تُراب
كل خطوه يمشوها بجرح
إختنگو ابموت الصبح
لصدورهم بي تنشرح
كاسر ظهرهم فراگه عذاب
ومابقه عدهم سند محّد الهم
لا ابو ولا ام بعد راحو كلهم
بس بقت ام البنين التكفلهم
حسن ، يا خويه يا عباس
حسين ، يا خويه رفعو الراس
•••
نظراتهم بيها شرار
مدمعها نار و كلها ثار
وبيّن عليهم الإنكسار
و واحد على الثاني گام يميل
اليفگد أبو يعيش ابقهر
ويموت اذا عالي القدَر
وفگدو أبو و سيد البشر
هوْ علي كيف بشر مستحيل
كلفه دفنوه الذي يحيي الموتى
كلها حنّت لحنانه و مروته
انضج اله و بارواحنا نسمع صوته
اندفَن ، وبينه حفر آلآم
علي ، مو يم زچيته اينام
•••
فحلّة بني هاشم تنوح
وغربتهم اتحل الجروح
و الدنيا مرّه، بلايه روح
راح البدونه الحياة جحيم
لمْ يُمتثَل أمر النبي
لمّا قضى نحبه الوِلي
إنولوا ذريته وَلي
لـ اهل الله ما ضل گلب رحيم
ابو الرحمة الواسعة سافر لله
وبالعوالم تنتقل لجله اشچم آه
العرش والجوّاه صاحو واويلاه
غضب ، لمصيبته الجبار
اجه ، يگلبها للكرار
•••
كُلُّ مَنْ عَلَيْها فان
ويبقى الحسن وحسين آمان
وعباسي بچفوفه الحنان
تچوّني بس همه بيش انتچو
إِذَا السَّماءُ انْفَطَرَتْ
يعنيْ لحيدر طبرّت
وتمطر لو انها اتذكّرت
شمسينها والگمر بچو
تنحني الهامات مفروض الليله
واللي بالحُب غارگ ايطلّع ويله
ولجل ابو العباس خل ينهد حيله
اجو ، خواني من الضيم
نرسم ، جوه الحواجب غيم
•••
احساسهم ينزف غرام
ردولي حفّاي الجدام
إثلث ائمة اتزت إمام
ما صارت و هل مصاب عجيب
انحيلين وامصابه ضخم
بوجوهم حيره ولطم
لاگوني وازداد الهضم
واتلاگو اوي الفواطم ثغيب
وبيتنه اتحوّل مناحات وغندب
والملائك نزلت اتواسي وتنحب
مات ابو الأيتام واتيتمت زينب
صبح ، عيد الفطر عاشور
لان ، صبّحنه بين اگبور
#الخادم_علي_خيري_العبادي
2021/4/30 الجمعة
/channel/AliAliAlabady
#يا_بقية_الله
[ اين باب الله الذي منه يؤتى ]
يمشروع السمه ويا باب رب الگاع
باب الروح ما شرّعته لــ أقدامك
ضميري الخاطئ و(حِطَّةٌ) ساجد گال
تِرف عينه ابهوها، وهُوَت أعلامك
ترجّيتك عفو، سامح عبد غلطان
ما فاهم مقام الخدمة بايامك
اذا شيخ الأئمة كل حياته يگول
(لو ادركته اخدمه)، شثگل خدّامك؟
..
دلّيني اعله (ميمك) حتى ابدي وياك
هداية روحي باسمك وابمراعاتك
سيّرني ابصراطك جدم گلبي ارچيچ
ثبّتني ابخدمتك واعله طاعاتك
محبتك تختلف (يا صاحب الوجدان)
مصحوبه بأمل وتماشي لوعاتك
سوّيني مؤدّب حتى ما أذيّك
وعين الأدب لو جاريت دمعاتك
خلص عمري اتاني (الفجر) بس بلسان
افعالي ليالي و ردت شمعاتك
أعرفك من زمان وما عرفتك زين
(ميّت بالجهل) واحيتني نشعاتك
رجّعني الفطرتي وصوغني بيمناك
ويسّر (رجعتي) امن تقوم ساعاتك
#الخادم_علي_خيري_العبادي
/channel/AliAliAlabady
هل من مُدَّكِر شاف
انشق القمر نصفين
وضج الكون من طاح
عمود السمه والدين .. علي
•••
طاح اعله الوجه وامخضّب بدمّه
بمحرابه ويشدّ بجرحه ليلچمه
وصارت لحيته حمره وتأذّه الشيب
حَر الصواب مدري السّم بقه يألمه
و ذبلت شجرة النور
و دم حيدر سگاها
تغيّر لونه و اِصْفَر
و ردّلها ضواها .. علي
•
الحسن وحسين سمعو حادث المقتل
فزعو والدمع لخدودهم بلّل
وا ويلاه يبونه صاحو بحسرات
ليت الموت اعدمنا الحياة وحَل
اليتامى تروح لاوين
و اُهم عندك أمانه
شتسوه الدنيا دونك
يَــ لُطف الله وحنانه .. علي
•
بحظنه الحسن خلّه راسه ويشدّه
ويمسح دم ابوه بس النزف بعده
والتهضم علي تشوفه الخلگ مطروح
ورغم وضعه يصد لله ويوحده
وله عنده ابــ إلٰها
وكلمْته تبقى مسلك
لو أدخلتني النار
أگل للبيها احبك .. علي
•
جلوسًا صلى راحت قوّته الترهب
و راد يگوم ما بي حيل ابو زينب
صدگ ماتنعقل بس صدگ هذا الصار
گلهم احملوني لمنزلي نذهب
القالع خيبر شلون
روحه تثگل اعليه
چا إشگد نزف گول
واشكد جرحه ماذيه .. علي
•
الحسن سنّده لصدره وعصّباه حسين
والعباس لازم ايد من ليدين
وينادون وا سيداه وا مولاه
ننطي اوجوهنا بويه خلافك وين
حِمْلو من مُصلّاه
لعد بيته بمدامع
تشيّع واهوَ عايش
بصْريخ ومواجع .. علي
•
من وصلو لبيته گال نزلوني
الحسن گله لِمَ ؟ خلّك عله متوني
گله يا بُني زينب وراء الباب
وأخاف اتطيح لو شافتني حملوني
شافته اعله هل حال
ونادت يل مجبلين
هذا الشايلينه
اوياكم گولو امنين .. علي
{ ونّـــت ونـــادت يـالـمجبلين
هـالـشــايـليـنـه ويــاكـم مـنـــيـــن
أسـمـع هـضل وصـياح صـوبين
خــوفي إنچتــل عودي يـطيبين
لـمّـن سـمـعها الـحسن وحـسين
صـاحـوا يـزينب زيـدي الـونين
أبــوچ انـطـبر والـراس نـصّين
صـاحـت و هـملـت دمـعة الـعين
عگبك يبويه اوجوهنه وين }
#الخادم_علي_خيري_العبادي
الأحد المصادف 8 من شهر رمضان المبارك // 1443 هــ
/channel/AliAliAlabady
يَــ أجمل ساجد وعابد
يل إمعلّم المخلوقات
وامْدلّيها عالواحد
النجم والشجر سمعن باسمك وسجدن
لذلك شكو واحد ما خذاك اسوة
وما جاسه لهب حبك اوي الخالق
يخلّص عمره وي معبوده لو غرگان لو بارد
يبن الخيرتين ادخيل
انت التصلح الفاسد
الطغت نفسه وظلمها لا يضل باعد
ولا من رحمتك شارد
خ يرجع يأدبّها بحچي احساسك
بحچي گلبك وي الباري
خ يشوف الإله بعين گلبه ويحس بانفاسك
يما تتوصف انفاسك
بكثر ذكرك .. كثر شكرك
ما تتوصف انفاسك
يَـ اروع شاكر وحامد
غشيم اليستلذ بسوالف الدنيا
وعاف الطمئنينة وهو ما داري
ثاري اللي يحب، لذّته من ينجاب اسم محبوبه بالطاري
ثاري الدين لو ما انت ما بي روح
لو ما رواياتك جا صبح جامد
بمناجاتك الدين اتشعشع بحُب وصبح راشد
زبورك دلّه المتيهين
زبورك ملجأ العاصين
لو ما كتاب الله چا صلح قرآن
زبورك دوه للوجدان
وانت دوه للكلشي رغم علتك
يبن حُبنا الچبير، شگد الك عطشان
شكد أتمنى ابچي بحظرتك لهفان
العبد ما عنده بس مولاه
وحلاته لو خضع اباب رحمت سيده وگاعد
گبرك سيدي غصّة بصدر كل سيد وماجد
يا وسفه لحد الآن وي الگاع
يا انتَ الذي البطحاء تعرف وطئتك قائد
دخيلك حتى وانت بالگبر زاهد
#السلام_على_مولانا_السجاد
#الخادم_علي_خيري_العبادي
/channel/AliAliAlabady
يـَمَن اسمك
للسمه وللگاع أمان
ابيا نُويّة مِستقر ؟
عندك مكان ؟
بجبل رضوى ؟
بذي طوى ؟
عفت الجبال ؟
وين انتَ ؟
ماكو عنك اي بيان !
بالمطر والبرد والحَر انت وين ؟
شلون حالك وانتَ مجروح الكيان !
وين بيتك ؟
عايش اويامن ؟
وحيد ؟!
الْخضِر يصلَح أنيسك ؟
بيْ حنان ؟
يا أنيس لكل گلب
وانتَ غريب !
بلايه صاحب وانتَ صاحب الزمان
يا أهم من كل مُهم
ليتَ الكلام واهتمام الخَلق بيك
انسٌ وجان
ارزقني اعرفك
غايتي وكلشي بديك
ٱلجَهل حقّك
ما يشم ريح الجِنان
يا شمس
والغيم اعمال العباد
يا هوىٰ
چا ليش يردون الدُخان
چا منو الْطارِدَك حتى اسمك طريد
كون كل الكون يعتبرك ضمان
ماكو ضمآن وألك ذبلان موت
بْحيث گلبه صاير
من الحُب رَيان
يمتى نوْرِدها المناهل
باشتياق
يمتى ننظرلك
يبو عيون الحِسَان
يمتى تخزرهم أعداءك
بانتقام
عينه طلعت الْعدو
وتدريهْ جبان
شوكت يطلعله زئير ابن الإسود
اليخطف ارواح الزلم
قبل الطعان
احيي الدنيا بطلعتك
يا مُميت
الْغيوم الْكِدها اوجر العنان
بانتظارك
صار كلشي بلايه روح
التصبّر والشريعة والأذان
ليمتى احيرن بيك
يا سر الحياة
سيدي متىٰ أمَا آن الأوآن ؟!
#الخادم_علي_خيري_العبادي
الأحد 14 جمادي 1 // 1443 هــ
/channel/AliAliAlabady
#فقد_طال_الصدى
فارغ و طال الصدى بگاعه الفؤاد
وماكو غيرك يربط اگلوب العباد
يا حبل ألله، اليعوفك صوچ اديه
والگِصد منْهَلك ترويه بالوِداد
••
ما يَعَرف الذوق اليعوف الكمال
انْعمه احساسه اليعتبر غيرك جمال
حتى يوزرسيف خاضعلك هُيام
يوسف الزهره انتَ واحمد بالخصال
••
الما لگاك ابروحه ما حَبّك اكيد
والينول الحُب صبح مثلك شريد
يا ملاذ التايه وحُبّك دِليل
وفقط ليوالي جراحاتك سعيد
••
يمتى يتذلل ويبچي اللي عصاك
سهم ذنبه وتنزف انتَ وما رعاك
كون من باب الوفه ايرد الجميل
ابطاعتك يجتهد والغاية رضاك
••
الماسِك بدينه وفتن دنياه شِدَاد
صبَح كالخارط على شَوك القَتاد
الصبر مفتاح الفرج بالإنتظار
وانت باب ألله ولكُل قوم هاد
••
الْعُرَف أمرك ينطِره و ميّت عليك
ويبقى متلهّف مِته ايقبّل اديك
و لُو ظهرت اتزيد نار الشوگ بيهْ
ولَوْ حبواً عالثلج لازم يجيك
••
الدنيا مو دار الخُلد، دار الفناء
والبصير الشاف بس نورك بقاء
الْمُدن دونك تموت امن الظلام
والظلم بيدك يرد رحمة وضياء
{ السَّلامُ عَلَيْكَ يا نُورَ اللهِ الَّذي يَهْتَدي بِهِ الْمُهْتَدُونَ وَيُفَرَّجُ بِهِ عَنِ الْمُؤْمِنينَ }
#الخادم_علي_خيري_العبادي
1443 هــ / 3 جمادى 1 الاربعاء
/channel/AliAliAlabady
عَزيزٌ عليَّ أنْ ارىٰ الخلْقَ ولا تُرى ..
ليش العزيز ايعز على العين !
وتشتاگله وما تدري بي وين
وتبچيله وحدك، ماكو ليعين
الْــ علَه گلبك تحْصَلَه منين ؟
الــ كُون بندبته يبچي مرتين؛
مرّه لغربته ومرّه لحسين.
يالطالب ابدم المطاعين
اگلبها حمره و رجّع الدَّين ؟
واحرگهم بنار الصواوين
لخاطر الباب وثار الجِنين
علّمهم الحگ ينوخذ زين
لحدمن تضل تنزف و لاوين ؟
إشگد بقالك سنة، سنتين ؟
رف راية اهلك وانشر الدِّين
يبن الأطايب والميامين
ليتَ الشِّعر وين انتَ ما وين ؟!
وليتَ الگلب لعيونك ايلين
وابروحي ريت اتعيش كل حِين
و لو حال بيني وبينك البين
ما اريدن ابقى مع الميتين
ٱمن الگبر فدوه اخرجني يــَحْنين
#الخادم_علي_خيري_العبادي
/channel/AliAliAlabady
اذا شِئتَ النجاةَ فزُر حُسينا
لكي تلقى الإلهَ قريرَ عينِ
فانَّ النارَ ليسَ تَمَسُ جِسماً
عليهِ غُبارَ زوارُ الحُسينِ
تراب المشايه سِر
نجاة وحُب و ستر
وجماله من ينثر، على الزاير
الوجوه الغيّرها حَر
مُحال اتروح لسقر
اليجي بذنوبه طهر، ويرد طاهر
طهارة النَفِس
بحرارة الشمس
والگلبه بي جمر
بممشه الخدر يحس
•••
جُفونٌ لا تَمَلُّ مِن الهُمولِ
وجِسمٌ لا يُفَكُّ من النُحولِ
وقلبٌ لا يُفيقُ من الرزايا
لتذكارِ القتيلِ ابنِ القتيلِ
وانه امشي واذكر هله
ومصابه ابطف كربله
و ركض اشرف عايله،ومشي الهيمه
اليتعبه الحب الصدگ
عليه اثار العشگ
نحيل وما يفترگ، اوي اهل ضيمه
لتغرّبو هله
تهضمهْ الهلا
ولو شاهد الدلال
يبچي لــ إمدلله
•••
وبُعدي عن مزارِ ثراكَ أضنى
فؤادي لا مُفارقةُ الخليلِ
وكيفَ يَلذُ بعدكَ طيبُ عيشٍ
لأربابِ البصائرِ والعقولِ
البُعد لا مو بالدرب
الدرب يختصره الگلب
لونّه بي يسري حُب، ومشه بصوبه
الحبيبه عاش الألم
ملذّة دنياه وهم
وسليب الراحه ويهم، بِــمَسْلوبَه
ريحانة الضوه
سلبوه بِــنَينَوى
وذابل على الرمل
ويلسعهْ الهوه
•••
الا مَن يدَّعي الإيمانَ فابذِلْ
حنيناً باختِراقٍ واكتئابِ
و عَزِّ المرتضى في السبطِ واذرف
من الأجفانِ دمعاً ذا انسكابِ
المواساة بلا دمع
طعم ما بيها ونفع
اليحب واجب ينفجع، اعله ليحبه
حبيب الزهره انشمر
اعله وجها من المهر
وسهام ورمح انكسر، بوسط كلبه
السيد على المله
وليت عدو انوله
متبدي ابن علي
ونسوانه بالفله
°° الأبيات الفصيح :
لشاعر اهل البيت المرحوم ابي الحسن الخُليعي الحلي (رض)
#الخادم_علي_خيري_العبادي
1443 هـ / 6 صفر المشاية المقدسة
/channel/AliAliAlabady
ابا الفضل .. قمرُ الحُسين
••
بِيَمِيْنِكَ سِرُّ الْفَضْلِ
وَيَسَارُكَ تَنْبَعُ نَبْضَا
فَحَيَاتي بَينَ يَدَيكَ
وَالْمَوتُ بِعِشْقِكَ حَضَّا
مَن عاشَ وفاءَكَ حتماً لا يخون
مِن بَعدِ ظِمائِكَ النفسُ تهون
ابا الفضل .. قمرُ الحُسين
•••
أَسِّرني بِرَحمَةِ جُرحِك
الْعَبدُ مُنَاهُ الرَّحمة
أُشدُدني بِحَبْلِ وصَالِك
زِدني غَرَامَاً في الْخِدمة
انتَ وِصالٌ، دونكَ اذهبُ لــ أين
بِكَ يبدأُ مَن طَلبَ جَمالَ الحُسين
ابا الفضل .. قمرُ الحُسين
•••
بِحِمَاكَ الْخَلْقُ تَلُوذُ
أَنْتَ ابنُ أَمِينِ الْخَالِق
تَهْمِسُ في الْكونِ أَمَاناً
يا صَوتَ اللهِ النَاطِق
وتجَلَّت فيكَ صِفاتُ ٱسمِ العَظيم
و الــ بسمِ اللهِ الرَّحمنِ الرَحيم
ابا الفضل .. قمرُ الحُسين
•••
اللَّيلُ طَغَى بِكِياني
وَضَمِيرُ الْحُزْنِ تَوَقَّد
لا يَسْطَعُ فِيَّه ثَاني
إِلَّا قَمَرِيْ الْأَوْحَد
يا مَن تُسقيَ ليلَ الأرواحِ يقين
و أنارت كفّاكَ الأكوانَ حنين
ابا الفضل .. قمرُ الحُسين
•••
فَلْسَفَةُ الْحُبِّ بِعَيْنِك
مِفْتَاحُ الْقَلْبِ بِبَابِك
عَانَقَتْ الرُّوحُ هَواكَ
والدَّمْعُ هَوى بِمُصَابِك
لولاك لَمَا صارَ بِـعينَيَّ طُفوف
وجعلت فؤاديَ بالأحزانِ شَغوف
ابا الفضل .. قمرُ الحُسين
•••
بِٱسمِكَ شَجَني يَتَوَسَّل
فيكَ وإِليكَ الغاية
وَلِكيْ أَختِمُ أَوْرادِي
رَتَّلْتُ حُرُوفَكَ آية
عينٌ باءٌ الفٌ سينُ السِقاء
قُلْ هوَ عينُ الزَّهراءِ وتجري ماء
ابا الفضل .. قمرُ الحُسين
#الخادم_علي_خيري_العبادي
2021/8/11 الأربعاء
/channel/AliAliAlabady
🎶 شاعريتي
🎤 ملا حسن السوداني
🎙️ الذاكر عباس ماجد
✍️ علي خيري العبادي
🎪 هيئة دار الزهراء (ع)
✨ اللهم عجل لوليك الفرج ✨
https://youtu.be/f0zllhvwOOA
• معاناة مولاتنا ام البنين (ص) بعد رحيل وفراق مولانا سيد الشهداء (ص) لسان حالها :
گمت احنن، والدمع شهود
وأدري ما يعود، احسيني ليه اردود
ليت شعري، يرجع الحبيب
وما يضل غريب، حتى جرحي يطيب
وگّف گلبي ..
لمّن مشه بضعونه
يصهل غده ميمونه، حسيته مدموم
وعاف ابنيته ..
وي الهظم والعلّه
وصرنه سوه نتسلّه، بدموع الهموم
••••
وحشه داره، فقدت الامان
وينحب المكان، اليقرا بي قُرآن
لسّه صوته، بيّه لا يزال
باقي بالخيال، ويسمَعه الدلّال
چان يسولف ..
الي شنو ليصيبه
واعرف شكو لبگليبه، بس هسّه مخنوگ
المن يحچي ..
همّه ومصابه وهضمه
وهوّه بقه بلا امّه، والجرح مفتوگ
••••
عيني رفّت، والوكت ظلام
يمكن ابني نام، وآنه اعيش احلام
هسه وينه، بيا فله يبات
وترعب الفلاة، وعنده ابنيات
عدهن كافل ..
نوره غِطه ويحميهن
وباچر شمس تعميهن، ويحتاجن افياي
ويطلع ظلهن ..
نسوت علي يا وسفه
بين الغرب والكلفه، من غير حمّاي
••••
روحي يَمّه، والجسم بعيد
يعني ما اهيد، وشوگي ضل ايزيد
خفت ابني ، يبقه وحدّه
وابين العده، وتنمرد چبده
شلون اتحمّل ..
من ينكسر احساسه
ويضل بله عباسه، وعالگاع الأصحاب
ويشوف اهله ..
ضيم العطش ماذيهم
وصاحو على ساگيهم، وما سمعو اجواب
••••
قاسي هجره، شگد مضت شهور
والگلب صبور، وهل اجه عاشور
يمتى اشوفه، كافي انتظار
گاعده اعله نار، وماكو عنه اخبار
يا قاروره ..
شصار بترابچ جرحوه ؟
بس لا حبيبي ذبحوه، ودمّه سگه الگاع
عطشان ابني ..
بان العطش من الدم
بغربه نزف واتألم، وما جاله فزّاع
#الخادم_علي_خيري_العبادي
2021/7/2 الاحد
/channel/AliAliAlabady
مِن حكايات الوداع
الچنها طف من گد المها
البيها عنوان وتراتيل الضياع
وسِر نغمها .. گد المها
البدت منها رحلت آهآت الغرام
هل حكايه بالمدينه
صارت ابّين الحزينه ، العليله والإمام
آه بنته ..
حيّرت نيّت ابوها وعلعلته
آه بنته ، عذّبته ..
شلون يبدي وياها موضوع الفُراق
شلون راح يگلها رايح للعراق
ماله حيل ..
ماله حيل ايشوف دمعتها وهضمها
وماله حيل ايعوفها ومتعوّد اهوه
لصدره يوميه يضمها
وهيّه هم متعوّده تبقى بحنانه
يعينها الله لو بقى خالي مكانه
عالعموم، وعالهموم اتعنّه الها
وگوّه يمشي
وبيّنت اوّل جروحه
وگام يحچي ويّه روحه ...
والله حيره يا حُسين
شلون ابدي
شلون اگلها وما اريدن تبچي گطره
ادموعها قصة عذابي
يعني تشعل بيه جمره
شلون بيه .. والله حيره
راح اتوازه بمحنتي ، شلون بيه
شلون تتحمل چلمتي
اشلون اگلها
وما اريد اكسر خواطرها واروح
شلون اقنّع روحي خاطر
تقتنع هيه واضل اگدر اگلها راح اروح ...
راح اروح
ها يبتي ها شمعتي راح اروح
راح اسافر للجروح
للجروح وللدموم
وللرياح وللسموم
وانتي شمعه ورايدچ تبقين تضوين المدينه ودار ابوچ
وحگ حبنا، ما اريدن علْتچ اتزيد واعذبچ
ما اريدنّچ تشوفين العذاب
بويه آنه چي حِنين
ما أريدچ بالسفر تتعذبين
وأدري فرگتنه طويله
لچن تگصر بالـ أنين
و أدري مو هيّن فگدنه
لچن اهون من اشوفچ بالسفر تتلوعين
وداعت ادموعچ ترى آنه اعله مودچ ..
انتي ترضيها اذا صرتي ابمكاني
اتلوّعين الأغله من روحچ بديچ
راح اروحن، بويه صُبري
واعتمد بويه عليچ، يا شمعتي
بويه فدوه لا تذبحيني بنظرتچ
آنه آحبچ
انتي تربات الگلب وام الدلال
بس اريدچ للثگال، يا شمعتي
راح اروح
وبعد ما يلتم شملنا
مو بدينا
هذا متحتّم علينا
بويه رايح ..
وادري بالغربه تُموّت
بس شسوّي
احنه گظيّنها غربه
هيه هاي الدنيا غربه
اتعودّي بويه عليها، ادري صعبه
الغربه صعبه ..
يلّه بويه
آنه رايح
بالسلامه
وبالدموع
#الخادم_علي_خيري_العبادي
2021/6/24 الخميس
/channel/AliAliAlabady
• المولىٰ سيد الشهداء (ص) لخدّامه :
يخادم بالگبر لتخاف انا جيك
تناجيني چنت، لازم اناجيك
ومن كل هول بالبرزخ انجيّك
اخلصه اللي خلص دمعه اليه
#الخادم_علي_خيري_العبادي
/channel/AliAliAlabady
#٨شوال_هدم_قبور_البقيع
#عدو_لمن_عاداكم
الىٰ البَعيد ..
زنيم اصله و كلامه جهل بالتوحيد
لذلك وجها ما بي نور للإيمان
يشوف الحق لچن اعور بصيره و راي
و احقاد السقيفه غطّت الوجدان
انعمه فكره بضلاله و صار كالأنعام
و لبّس نفسه ثوب الظلم و الطغيان
عِناداً ترك درب ألله بنفاق اصحاب
و ينتقد الشرك بس شارك الشيطان
ما عايش مودّة ذوي القُربى بيوم
حگها الروح لو ماتت بهيچ انسان
التها بتجويد صوته و عاف صوت الدين
و ما عنده عمق بسوالف الرحمٰن
و حتى بالمَثَل ما يفتهم الحمار
(البيوت اسرار) ما يفهمها ياهو الچان
و اهل البيت اعلم بيهن امن الجار
و من باب المدينة تدخل الخطّار
و بير اسرارهم يختلف عالآبار
الينهل من عذب تطفح بوجها انوار
الينهل من اُجاج ايضل عمر عطشان
وشيفيد الحچي وي اللي گلبه احجار
و اكو حجارة بگلبها تقدّست جثمان
لذلك من عرف عند الجماد احساس
بحقد هدّم وسائل ربنا ابن سفيان
و يضل روح الأمل بيهن عقيده وثار
و غصبن عالنواصب ينبنن تيجان
#الخادم_علي_خيري_العبادي
2021/5/18 الثلاثاء
/channel/AliAliAlabady
يا بشر يوصف عِظم شأنها
ورحمة الله الواسعه ابنها
هيَ فاطمة وكفى
°°°°
طاعتها مفروضه على الجن والإنس
والكائانات ابحبها طهرَت والنَفِس
وابفَضَا اللاهوت اٌهيه اكبر من شمس
جوهرة خالقها ..
صاغاها من عين ذاته
وانطاها اجمل صفاته، وضل يجلها
وابسماء المعنَى ..
بيها تباهى اعله خلقه
وخلاها ميزان حقّه، ويرضه الها
ولذلك كثر ما يحبها
بساق عرشه من الأزل كتبها
هيَ فاطمة وكفى
••
كوكبٌ دُرِّي نورها غذّه القطب
من عالم الظل وهج في روح الگلب
نورٌ على نورٍ تجلى منهُ حُب
والقرون الاولى ..
دارت على معرفتها
وحارت لَوَن وصفتها، وكلها عجزت
بيها شفنه الخالق ..
والمقامات العظيمه
والفيوضات الرحيمه، الها رمزت
خيرها ليلة قدر لليدرك
العروة الوثقى بفضلها نمسك
هيَ فاطمة وكفى
••
موجودة قبل ادم باسلاف الدهر
حورية في غامض علم رب البشر
بحر النبوة وكل نبي بيها اقر
سيدة كل زلمه ..
ما عدا ابوها وبعلها
ونسل الإمامه ابنسلها، والنبوّه
بس علي كُفؤها ..
من آدم وفمن دونه
محد يحطها بعيونه، فقط هوّه
حجة الله اعله الحجج واميره
والله يعلم اشكثر چبيره
هيَ فاطمة وكفى
••
لولاها ما مخلوق ابوها ولا علي
وتنعدم افلاك الوجود وتنجلي
علّة خلقنا ابخلق فاطم تعتلي
عالبشر سلطانه ..
صارت مَثَل بالتكامل
وقمة اصبحت بالتفاضل، وكلها هيبه
سنخ للقدسيه ..
وكوثر الإله وسبيله
وعدها صراطه ودَليله، وعلم غيبه
حوَت اسرار السمه بگلبها
وابهداوه عالارض تصبها
هيَ فاطمة وكفى
••
اُم عالم الإمكان امي وجنتّي
تُفاحةُ الفِردوسِ والخُلدِ التي
گلها ابوها انتي امي وبضعتي
ام ابيها وروحه ..
وعايش على سر عطرها
وينسر اذا شي يسرها، والها يغضب
شحال لو شايفها ..
مثل الخيال ونحيله
وجبر الضلع ماله حِيله، لو تصوّب
بابها باب الله يل طبگته
ابليس ضل صافن لَمَن حرگته
هيَ فاطمة وكفى
#الخادم_علي_خيري_العبادي
@AliAliAlabady
الاربعاء 2020/12/30
لمولاي السجّاد ص
الشام الشام الشام وكربلاء
•••
يا غربتي
صار الأخو اغله امنياتي
كلها بلاوي ذكرياتي
إگبالي ينچتفن خواتي
يا هضمتي
أحقر بشر بحباله شدني
واتعثّر ومحّد سندني
يا ليتَ امي لم تلدني
والعالم اتشوف
دمنه بالچفوف
جرحتنه الحبال
وبينه العدو ايطوف
••
حيره نوحي
إلكربله لو چي سبونه
لو چي بقينه بلايه عونه
وتاليها يا وسفه ولونه
يا جروحي
واگليبي ذبحو يمّا اهله
وكلساعه ادفن بيدي طفله
واشچم عزيز الشاف ذله
واشگد شفت ويل
من هجمت الخيل
وبالبيده فريت
وما عندي كل حيل
••
آه يعمري
خلصّته بس نوح وبواچي
ما تگظي عالطف المحاچي
وطاح الحچي ابسلب التراچي
آه يصبري
آنه عليل وياذي حالي
عالهزله شيصعّد عيالي
وضل عالترب كافل دلالي
بس ضل بلا هام
و راسه مشه ايام
فوگ الرمح ضال
وبعيونه السهام
••
بالخرايب
نبچي لچن ضحكو علينه
واحدنه ما يمسحها عينه
صعبه لأن امگيدينه
وعالترايب
نگعد وأُهم نامو بالقصور
ومن گد تعبنه باهت النور
وحشه وگلبنه يغفه مكسور
ايگعدونه بصياح
وچم سوط ننلاح
وابچعب السيوف
وننطگ بالرماح
••
ابلا عشيره
طبيّنه للشام ابجرحنه
وي الضوّه رادو فضحنه
ولچمونه لاكن إنذبحنه
ماكو غيره
ايفرحون اذا علويه طاحت
ايطبلون اذا علويه ناحت
ايشتمون اذا علويه صاحت
شتمو الكرار
و رامونه بحجار
كلها علينه
ضليت محتار
#الخادم_علي_خيري_العبادي
/channel/AliAliAlabady
٢٠٢٠/٩/٥ السبت