175
اللهم اجعلنا من خدام الحسين عليه السلام المخلصين
العليله
ياحيرتي مابين الضعون
ابچي لهلنه وهم يبچون
ابعيني دمع حمامه
گالو مع السلامه وهم يبچون
ابكثر مايمهم بجيت النوك عثرت بالدمع
ومثل ضلع الزهره كسّر باب الموادع ظلع
علتي وفراگ أهلنه اثنينهن نار وشمع
ساكتين اگبالي كلهم بس بچيهم ينسمع
يعيوني صحت النوم مكروه
باجر تسافر هاي الوجوه
جفني زعل منامه
وكالوا مع السلامه وهمه يبچون
النوك تمشي اگبال عيني واحس كل خطوه ابرمح
ليش ما اخذوها اهلها بحجي الشمات انجرح
هيه التفارك ابوها ايظل عمرها ابلا صبح
اعيوني بعد اعيونه تعمه وشوف بيهن مايصح
راحو هلي وعيوني عالباب
والموت يعني افراك الاحباب
فارگت الابتسامه
وكالو مع السلامه وهمه يبچون
گلب اليفارگ حبيبه ينحسب ليله سنه
بعده خمسه اعوام عمري امشيبه وظهري انحنه
الناس تمشي المِنه ومكه وفارگت مكه ومِنه
صحت ليش ابقه غريبه مو ابنيتكم أنه
فارگني گلبي وعالضعن طاف
هيه العليلة اشلون تنعاف
وضل الدمع علامه
وكالو مع السلامه وهمه يبچون
سافرن كلهن خواتي ظَلْ يگلبي اهنا غريب
من زغر سني ابفرحتي ما إلي قسمه ونصيب
العتب ضميته ابدمعتي العتب شيودي شيجيب
والحبايب كلها راحت راح اضل ابلا حبيب
عبدالله ناغاني وبچه اهواي
ودموعه گالت امشي وياي
بس ماخلص كلامه
وكالو مع السلامه وهمه يبچون
عج غبار الظعن يرسم صور وانه امحيره
صوره بيها گمر طايح هذا سبع الگنطره
وصوره بيها شمس تنزف هذا ابويه ومنحره
وشفت نجمه بناگه تبچي هذي عمتي اميسره
واسمعلي صيحه وسكت كل صوت
اختچ رقيه بالسبي تموت
المارجعوا ابسلامه
كالو مع السلامه وهمه يبچون
خادم الحسين ( عليه السلام)
كرار حسين الكربلائي
( ابو كميل )
دعم مؤسسة منبريون الحسينية
#افضل قناة للنعي
/channel/+P0VV4bLqtzuKdcQS
#للاشتراك بالدعم @ahmed_alziwar0
موشح
يا هلا بشهر الينزل دمعتي
يا محرم صدري حن اللطمتي
****
عبرتي وآهاتي هسه اتگابلن
مرن اشهور وعيوني ما بچن
يا هلا ابأيام زينب والظعن
امحضر الهن يا محرم شهگتي
****
بگد نهر عباس بعيوني دمع
زينب امصيبتها لا ما تنجرع
يوم عاشر سمعت انرض الضلع
ويه زينب ارد اعلي ونتي
****
يا محرم من تجي انعوف الصبر
ما نظمها الآه عمدن ننكسر
بيك زينب يا شهر سحگت جمر
ويه لوعتها حلتلي صرختي
****
يا شهر بيك انه افتهمه الالم
من تجي تلفحني جمرات الخيم
روحي تفزع للبراري اويه الحرم
الزينب وتلتها تصفن نظرتي
****
ما يسكن جرحي لا دمعه ولطم
يا محرم بيك زينب تنهضم
بت علي الكرار وسفه تنشتم
امدللة عباس الها حسرتي
****
بغربه والحرمه تدور الها حمه
زينب اتعاين لهلها امهشمه
چني بيها اتصيح يمه فاطمه
لحگي يم حسين جارت دنيتي
****
يا شهر جرح العقيله مو سهل
دارت الدنيا وخذتها اعله الهزل
والشمر ياويلي چتفها بحبل
تنظرب وتصيح چا وين اخوتي
****
الشاعر اياد الديراوي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي
انه ام البنين آنه
انه ام البنين آنه .
انه العزبت لحسين .... اربع زلم يفدونه
ولو عندي بعد أكثر ... كلهم فدوه لعيونه
الكَاع الما تشيل حسين ... يمد عباس اله امتونه
اشاوس زلم بالشدات .... محد ينخطف لونه
هذا الهوه يا مولاي ..... ما دامو يشمونه
أمن واطمأن وارتاح .... روحك يمهم مكنونه
آنه ام البنين آنه
انه ام البنين آنه
##############
كلشي يروح الك فدوه ..... كل اهلي وأعز ناسي
وكل هذا واحس اقصور .... وانه انطيته عباسي
على الدنيا العفه بعدك ..... المن أشهك انفاسي
غيرك يا ابو السجاد ....... محد يفهم احساسي
افرح لو جنت بالطف ..... ريت أعله الرمح راسي
عدل من الله طبعك جان ... بس جان الوكت قاسي
آنه ام البنين آنه
آنه ام البنين آنه
#############
الخيل اتمنى سحكَتني ..... ولا تلمس ابد صدرك
ما كفاه فقط قتلك ...... صار يمثل بنحرك
الوكت لازم يماشيكم ..... ابد ما لازم يغدرك
باجر يندم العاداك ..... والما رايد ينصرك
حته الخاتم ما سلم ..... منهم كَصو خنصرك
يا مولاي يا مولاي ..... من عمري على عمرك
انه ام البنين آنه
آنه ام البنين آنه
##############
من شبت خيمكم نار .... محد فزع يحميهن
انه تمنيت اصيرن ماي .... من حركوهن اعليهن
زينب تلتفت تندار ..... بلكي حسين يلفيهن
وجفوف الكفل عباس ... ع المشرعة مكطعيهن
يحادي الضعن انه ارجاك ... كلمة لا تحاجيهن
بس بمتوني خل السوط .... ذني الحرم خليهن
انه ام البنين آنه
انه ام البنين آنه
##############
من ع القبله خلوني ..... ذكرت حسين وخيامه
انه ابيتي متوفيه ..... وهو مكسرة أعظامه
كل الجسد بيه طعنات ... تشوفه تلاحظ اسهامه
من نحره اويلي عليه .... واصل دمه لجدامه
ما ينّسه وبكل عام ..... تبقه ترفرف اعلامه
عمر من دون ذكر حسين ... ما ينرادن أيامه
آنه ام البنين آنه
آنه ام البنين آنه
ـــــــــــــــــــــــــــــــــــــــــــ
الشاعر خالد صالح الديواني
لمولاي ابا الفضل العباس "ع"
هو طايح مدري آنه
الراية دلتني بمكانه
من الصدمة ما اشوفة .. گطعو عيني بچفوفة
_____________
ايدي بحاجبي امن ابعيد اباوعلة
طاح اعله الركب واهتزت القبلة
التطيح اخوانه زينب ينحدب ظِلّة
وبس للحوك خوية اتحدّب اتدلة
طاح اخوي وايدي طاحت
عِشرة حلوة بذبحة راحت
بوجهي الواني مخطوفة .. گطعو عيني بچفوفة
—————-
لجثتة شلون اروحن والله ما ادري
ماتت رجلي وايدي وتيهت فكري
اوصل يمة فشلة صاعد بمهري
كون اوصلّه طايح كل خرز ظهري
بحرگه رحت اركض لجثتة
الّه يعدل لو شبگتة
الفاگد ركضتة زحوفة .. گطعو عيني بچفوفة
——————
تره اليفگد اخو يوصل لخوه حافي
ولو يبچي الشريعة بعينة مو كافي
صحت عباس صيحة اتركّض الغافي
صحت ما فتح عينه انفتحن اشفافي
خوية عباس الحگ النة
طيّحت وصلة امن اهلنة
اظهور اخيامي مكشوفة .. گطعو عيني بچفوفة
—————
لگيتة امگّطع اتگطّع الما يگطع
السهم يا خوية شلّة ارموشة ما يرفع
السهم خاف امن اشلعة وعينه بي تطلع
ذبح ولدي و اخوتي النهر ما يشبع
محاول اشگد يوصل اختة
لازم الجربة برگبتة
الهامة الحلوة مخسوفة … گطعو عيني بچفوفة
—————-
ابو عيون الچبيرة الچنها فيروزة
من دم السهم فصينة مچزوزة
الريشة براسة هسة برمل مركوزة
موش الرگبة حتى الخوذة محزوزة
الچفة مطبوع اعله حظني
هسه بذراعه يكظني
چفوفي بدمة مچتوفة … گطعو عيني بچفوفة
—————-
اجيتچ چني قوس يسحلن اجدامي
ظهري اتطشر امن اتطشر احزامي
يرينب مشرعتهم شربت احلامي
تره العباس طلعت روحه گدامي
يگلي خليني بمكاني
هي من عدها وعماني
وكل اعصابي متلوفة .. گطعو عيني بچفوفة
———————
علي هادي الخزعلي
دعم مؤسسة منبريون الحسينية
#افضل قناة للنعي
/channel/+P0VV4bLqtzuKdcQS
#للاشتراك بالدعم @ahmed_alziwar0
يا ليل الهجر كونك تمر بيه
انه الضحيت الك الف وسبعميه
..........
آنه الوالده ودمعي دمه يسفح
خذت مني الاحبهم ليش مايصلح
شباب بياذنب ياليل تتذبح
جيف تحب علي حامي الحميه
...........
ياليل اعله هونك لا تمر واتروح
شباب اتذبحت مو واحد المذبوح
لو ناوي تروح وياك اخذها الروح
عكب سبايكر شلها بعد بيه
............
ما بيه وبعد ماضل دمع ياليل
عكب الي مشوا بيمن اشد الحيل
لضل انحب وانوح وما ابطل الويل
على الراحوا حلم تبطل نواعيه
..........
شباب بعز عمرهم للوطن ضحيت
ومن دمهم تراب المكبره حنيت
الف وسبعميه للنجف زفيت
وعرس جاسم عرسهم صار يوميه
...............
يوميه يمرنه الموت وانشوفه
وعلى الساتر نجي حفاي وانطوفه
وحك الضحه لجل حسين بجفوفه
تضل لاخر نفس صرختنه شيعيه
...........
يا ليل الهجر لو خلصت الانفاس
يشد عزمه الحشد وبراية العباس
صبح عدها الشهادة للفخر مقياس
وتضل اديار اهلنه دوم محميه
...........
خادم خدمة الحسين
الشاعر الخادم محمد الموالي
شمخ مسلم واعتله
شيخ وابن المرجله
ابروحه تلگه كربله
انهُ مسلم سفير
*******************************
اشگد محطات المتاعب.....بيها مسلم حيرته
كتبت اشگد القبائل........تدري نهجه وسيرته
اتوجهت ثگل الرسائل.....كلها تطلب بيعته
واحنه نعرفهه الحقيقه.....ليش رادت جيته
حضرت اتلبي الحشود
صارت اگباله الوفود
وقعت بصمه الشهود
انهُ مسلم سفير
******************،*************
الحبر يشهد عليهم ....ذوله من صنف الغدر
حرّفو معنى العداله...... عدهم أنواع الكفر
أقبل اشكد رددوها.....وياهم اتشوف الشمر
بالمذله اشكثر عاشوا....خسروا ابطول العمر
كلها خانت بالوعد
الكوفه ماعدهه عهد
حتى طاغيهم شهد
انهُ مسلم سفير
*******************************
باعوا الدين ابدراهم........ذوله اصحاب الحقد
مسلم وشاف النماذج........بعد ما يگدر يرد
كلها باعت دين طه.......اوجوهم صلفه يصد
نزلت ادموعه ويسولف.....ما طلع منهم فرد
اوجوهم صلفه صفت
بس مذله استسلمت
من بني هنده احتوت
انهُ مسلم سفير
******************************
كلها من اصل السقيفه.....شفنه ناس امزوره
اگلوبنهم تنبض خباثه....والبغض ضد حيدره
ليش خانت بالسفاره......نكرت اشگد محضره
بايعت چف الرذاله.......عالحقد الزمو سره
خسرت ادروب النجاة
بايعت چف الطغاة
اتحيط من اربع جهات
انهُ مسلم سفير
*******************************
انكشف ادروب الخيانه.......طبع من ام الجمل
من بني سفيان واضح....رجعت اتمجد هبل
مسلم وسيفه خذاهم.....مثل حيدر لو حمل
اتشيم ومعروف كشخه....ايلوگ بعيونه الزعل
باعت اشلون الضمير
الظالم ايصير الأمير
مسلم ابعينه يدير
انهُ مسلم سفير
*******************************
ياغريب الكوفه حسره ....مشهد البيعه حزين
خانت اوعود الرساله....عنده ذي عرش مكين
طوعه معروفه تسنده......ناصره الحق المبين
چنه اخر نظره منه......لاتجي ابدمعه حسين
شاف انواع الشقاق
تحچي وجهين النفاق
ابتله اشكد العراق
انهُ مسلم سفير
*******************************
تمت بعون الله تعالى الشاعر_يوسف_الفتلاوي
محررررم 1447 هـ ( أم البنين )
ناثرة اورود الرجعتك ناثرة اورود
واسمع الناعي يگلي إحسين ميعود
ذبلت اورودي وراك . إمن انگطع عني هواك
ناثرة اورود . ناثرة اورود
واگفة ابابي وبديه اورود وانثر عالگاع
هسه ترجعلي أگول وبعد لا ماكو اوداع
إبني ماناسيني اصيحن والتعب بيه ماضاع
مهجتي وسباح گلبي سافر ورد ابساع
يمتى اگول إمن الفرح . ياهلا ياهلا
إبني راجع شفته من . كربله كربله
بيده عبدالله الطفل . شايله شايله
رجعوا ولازم نرد . عايله عايله
امناطره ايام وليالي امناطره ايام
وخيب الناعي ضنوني وكل الاحلام
ماتت انجومي ابسماك . إمن انگطع عني هواك
ناثرة اورود
_____
واگفة او أسمع مُنادي ايصيح بدموع إحسين
وركضت ملهوفة اسأله إنته منهو ومنين
اسمعتك ابإسم الأحبه اتصيح مره ومرتين
لو تعرف اخباره گلي اشصار من عنده او وين
اشگد على موده اتعبت .. من رحل من رحل
اوياه أمشي اتوسلت .. ماقبل ماقبل
انچان تعرفلك خبر .. بالحصل بالحصل
گلي آنه الرجعته .. عندي امل عندي امل
امگابله ادروب المدينة امگابله ادروب
إمن الصبح يوميه اتاني اللحد الغروب
يچوي بنفاسي نداك . إمن انگطع عني هواك
ناثرة اورود
_____
أحچي والناعي دموعه اتطيح منه ابلا راي
گتله خبرني يناعي وگْلي محبوبچ جاي
شفته مد ايده اعله شاطي وگال ياجاري الماي
تدري بالعباس طاح وماخذاك المولاي
عظم الله اجرچ ترى .. بالگمر بالگمر
طاح ضامي ابلا زند .. عالنهر عالنهر
ظهر الحسين انحنه .. وانكسر وانكسر
راح يركضله او وگع .. من نظر من نظر
حايره اصفيت ابخبركم حايره اصفيت
من سمعت اخبار اخوك اجروح صبيت
راح عباسي دواك . إمن انگطع عني هواك
ناثرة اورود
_____
عن حبيبي إحسين أسأل گتله مو عالعباس
گلي مو لاروح ضلت بيه لا تجري انفاس
صاح يمّ عباس إبنچ عالوطية ابلا راس
نايم ابحر الشموس وجسمه بالخيل انداس
لاتتانينه بعد .. مايرد مايرد
ولاتطشيله دمع .. لاورد لاورد
اتعودي وصبري بعد .. عالفگد عالفگد
إقري ليه القل هو .. والحمد والحمد
طايحه ابقيت ابمكاني طايحه ابقيت
من سمعت اهناك يبني اعظام ضليت
ريت بالخذني خذاك . إمن انگطع عني هواك
ناثرة اورود
_____
گال يم الشاطي إبنچ منذبح بس عطشان
ماروه وجروحه تلچم بيها ذيچ التربان
ويلي من ذبحوه طلعن من خيامه النسوان
هاي لتقبله وتشمه وذيچ دورتله امچان
گوم صاحله الخيم .. جَمرَت جمرَت
گوم عيلتنه ترى .. اتطشرَت اتطشرَت
هاي خيل الجثتك .. گربَت گربَت
الناس جسمك بالحجر .. شمرَت شمرَت
لاطمه اخدود اعله فگدك لاطمه اخدود
حين گال الناعي راسه ابرمح موجود
چم سهم أعرف إجاك . إمن انگطع عني هواك
ناثرة اورود
____
أيست والناعي هدني وآنه اتانيك اشهور
كل هلچ راحوا يگلي ابيوم إسمه عاشور
آنه أول وحدة رسمت بالدمع خمس اگبور
أغفه فوگ اتراب گبرك وانتحب كلما زور
أگبور أرسم بالدمع .. من احن من احن
عايفه اولادي والك .. دوم اون دوم اون
أول ام آنه انحنت .. عالإبن عالإبن
ابعيد طحت وبالغرب .. تندفن تندفن
ذابله اعليك ابحسرتي ذابله اعليك
گالوا السلاب عافك ما امغطيك
حاسه اترابك غطاك . إمن انگطع عني هواك
ناثرة اورود
حيدر الحلفي
دعم مؤسسة منبريون الحسينية
#افضل قناة للنعي
/channel/+P0VV4bLqtzuKdcQS
#للاشتراك بالدعم @ahmed_alziwar0
الرباب وعبد الله الرضيع (يوليدي)
يوليدي يوليدي
منذبح يوليدي
***
منـــــــــــذبح يوليدي ليش رحت من ايدي
بعدك ابعمــر الورد عبد الله يبني
ياحلـــــــــم لاتــــذبل واشــــــــــفت يمدلل
عايف امك بالعذاب وهذا حزني
تاذيني تاذيني
نومتك تاذيني
***
يالعشـــــــــت بآمالي لاتعذب حــــــــالي
وآنه امك يالعــــزيز اشلون اعوفك
منطــــــــرح جدامي نحرك ايصب دامي
صعبه اصدلك ييمـه اشلون اشوفك
يالغالي يالغالي
يالولد يالغالي
***
ليش بعـــــدك غافي يالصحــــتلك كافي
راح اموتن يالعفتني مالــــي راحه
شاب رمش اجفوني عميه احس اعيوني
والكلب بعدك يون تنــزف جراحه
يعيوني يعيوني
شيبت يعيوني
***
رد عليــه اسنيني ظلمه كلشي بعيني
ياضوه الدنيه من اشوفك تجلي همي
ياهـــواي ابريتي انته شــــمعة بيتي
وآنه يمك اســــــــتراحن وانته يمي
واسنيني واسنيني
عمري الك واسنيني
***
ليش باكــــو عمرك وانحرم من عطرك
اتردلي روحي يالولد عطرك اشمه
يبني لتضل ضــامي هاك اخـــــــذ ايامي
افتح اعيونك انادي اكعــــــد ييمه
ياروحي ياروحي
منجرح ياروحي
***
ليش صفره اشفافك والعطش ماعــــــافك
منين اجيب اميه الك يوليدي تروى
سكته ليش انفاسك وماتحـــــــرك راسك
فكلي عينـــك لاتغمض يبني فدوه
حاجيني حاجيني
فدوه الك حاجيني
***
ابو علي الركابي
(( #اتخيل_ابالك )) #محرم_الحرام
……………………………………………………………
اتخيّل ابالك عينك أتشوف
اوليدك تفرهد بين السيوف
تسمع اصياحه •• كثرت جراحه
بين السيوف
……………………………………………………………
مو اي شاب اوليدك هذا . من يوسف احلى ابمرات
ايصير ابعطر الورد الجوري . الريح المر ابخده وفات
ابهاي اوصافه ويطلب طلبه
رايد ماي اتفطر گلبه
وما عندك كل ماي اتشربه • اظل محتار
ابهاي الحاله شراح اتسوي
ولسان ابنك يابس يچوي
وهو المثل البدر اليضوي • ليل انهار
تذبح يچلمة بويه عطشان
مثل التحطه ابوسط نيران
يعتلي انياحه •• كثرت جراحه
بين السيوف
…………………………………………………………
اكبالك خيل او وادم كثره . ما تخلص ولحد الشوف
وارماح الموت المرفوعه . وتلمع من ابعيد اسيوف
كل هاي اليرعب طاريها
وانت اتودي اوليدك ليها
فوك ابنك روح اموديها • و گلب وعين
الوالد يبني اقصور الراحه
لبنه و يسكن تحت اجناحه
بس مو لسيوف الذبّاحه • مثل حسين
يعني انت ميت گبل لتموت
حتى ابلسانك ميت الصوت
متشوف راحه •• كثرت جراحه
بين السيوف
……………………………………………………………
اتخيل اصعب لحظه ابعمرك . اخر شوفه الأبنك هاي
رايح للموت ابرجلينه . بس بيه لهفه الشرب الماي
واتشبگه وتبقه اتشم نحره
اتحاضنتو وطحتو اعل الغبره
ابنك ما متهني ابعمره •• و راح يروح
شدگله و تدريه ما يرجع
و تحاجيه بلسان المدمع
تدريه راح ايصر أمگطع •• كله جروح
من أگفه ونهارك صبح ليل
وي الولد هم رايح الحيل
لازم اصفاحه •• كثرت جراحه
بين السيوف
……………………………………………………………
والريح الجابتلك صوته . يا بويه الحگ لبنك صاح
يا بويه الحك صرت ابوليه .ضرب اسيوف وطعن ارماح
سمعيته والله الي ايعينك
تيّهت اشمالك و ايمينك
ماتن رجليك و جفينك •• وتعمه العين
اثلث مرات اتطيح ابگاعك
گلبك طالع من اضلاعك
صوت ابنك يدوي ابسماعك •• بويه حسين
ابهل الصوت ظهرك صار نصين
وشيّبن حتى احواجب العين
تلحگ ارماحه •• كثرت جراحه
بين السيوف
……………………………………………………………
وصليته و ريتك ما شفته . امخلص ما ظل بس اوصال
نص جسمه الخيل اموذرته . ونص مدفون ابوسط ارمال
ماكو امچان وحتى اشبگه
بس ارماح اعليه امدنگه
واسيوف امگطعته ابحرگه •• ودمه يفور
وين الضحكه او وين ارسومك
متروسه الگاع امن ادمومك
ماهن امن الطعن اهدومك •• يالمنحور
روحك اشگالت من اجه الموت
طعنات موتك موش بسكوت
عيونك شِباحه •• كثرت جراحه
بين السيوف
……………………………………………………………
سبحه ومن الخيط انگطعت .وضايع من عدها الشاهود
هيج ابنك عالگاع امطشر . بيه صاح الچاتل فرهود
اتخيّل بيدك لم اتلمه
واتغسل بدموعك جسمه
السيف او واصل حتى العظمه •• يا ويلاه
مالك طاقه اشيل اوليدك
تمشي امحنب تصفج بيدك
مو دمعه اتهل دم اوريدك •• تصرخ آه
شتحاچي ام الولد شدكول
اتشوفه ابحصيره الولد مشيول
ياهو الي ناحه •• كثرت جراحه
بين السيوف
……………………………………………………………
✍️ ( سيد خضر الزاملي )
@HxzEU1
#قناه_نشر_القصائد_المنبريه
(#قلت_حيلتي)
صاح الحـسين ابألــم
من فگد راعي الشيم
هسه قلّت حيــــلتي
ظلمه صارت دنيــتي
ــــــــــــــــــــــــــــــــــــــــــــــــــ
احسين طب للخيمه يحبي وطيّح ابجفه العمد
گلها اخبرج يالعقيله ضل اخوج ابلا سند
طاح اخوي احزام ضهري وبيمن اتحزم بعد
شفته نايم عالوطيه وحيلي يا زينب ركد
عفته يم المشرعه/ والجفوف مگطّعه
طاح اخوي وهيبتي
ظلمه صارت دنيتي
ــــــــــــــــــــــــــــــــــــــــــــــــــ
ونّت الحره اعله اخوها وحشمت يا كافلي
اختك انه الدللتني لو رحت وليه انولي
ياهو ليحامي العقيله وياهو يحرس محملي
تنهضم روحي ابغايبك ويتشمت عاذلي
ترضه زينب تنهضم/ وحدي اضل بين الزلم
ياهو يحضر شــدتي
ضلمه صارت دنيتي
ــــــــــــــــــــــــــــــــــــــــــــــــــ
احسين گابل زينب اخته وگلها طاحت خيمتي
راح ابو فاظل يخويه وضلمه صارت دنيتي
ودعيته اعله الشريعه وداعه فتت مهجتي
گلي سلمني اعله اخيتي والها وصل كلمتي
گلها منج يعتذر/ كافلج يم الخدر
فدوه لجلج هامتي
ضلمه صارت دنيتي
ــــــــــــــــــــــــــــــــــــــــــــــــــ
شبجِت العشره العقيله ودمع المعاتب نزل
نادت ابصوت المواجع ولحزن بان وثگل
ترضه يا عباس اضلن لا كفيل ولا اهل
ونته مقياس الاخوّه وينضرب بيك المثل
انهض ورد للخيم / يله يا راعي العلم
خويه ورحم حالتي
ضلمه صارت دنيتي
ــــــــــــــــــــــــــــــــــــــــــــــــــ
احسين ناده ابصوت توّه ضهري حدب ونكسر
ما شفت يا خويه دربي من لگيتك عالنهر
روحي ذابت يا عضيدي وگلبي احسنّه انفطر
حيره حيرني زماني وخيّب اضنوني الدهر
راحت ايام السعد/ودري ما شوفك بعد
حيره بعدك حيرتي
ضلمه صارت دنيتي
ــــــــــــــــــــــــــــــــــــــــــــــــــ
طلعت الحره وتدور عن اخوها ومصـرعه
وصلت و شافت گمرها اموسد اعله المشرعه
بالسهم مصيوبه عينه والزنود مگطّعه
موذّره ومطّشره جثته وعالرمال اموزعه
اتمدّدت يم جثّـته / يا كفيلي اتنخّته
اگعد احرس خيمتي
ضلمه صارت دنيتي
✍️ علي كاظم المنصوري
اهدي ثوابها الى روح والدتي
/channel/aliQ0Q
وصيتي ويالضعن خواتك هالمشن
اذكرنك علي بيوم المنيه
امانه زينب وعندك وصيه
يعباس يعباس يعباس يعباس
............................................
رحت يالماكو بالروح ابغلاتك
وحيد وماكو الايشابه صفاتك
عند اهل الوفه معروفه ذاتك
مشيت وراحن ابضعنك خواتك
بمانك حملن خواتك هالمشن
مشه وي الضعن خدر الزچيه
امانه زينب وعندك وصيه
يعباس يعباس يعباس يعباس
............................................
مشيتو وضلمه بالفرگه المدينه
وعلينه موحشه الدار وحزينه
صحنه اعله الضعن وشگد بجينه
اولا واحد الدار اعلينه عينه
يسمعنه و بچن خواتك هالمشن
بچت عين العقيله وتصد ليه
امانه زينب و عندك وصيه
يعباس يعباس يعباس يعباس
............................................
الرايح للخطر شنهي اليرده
وبعد للملگه ما تانيت مده
سفركم يابو فاضل والله شده
حسين ايأمن وعباسه عنده
وبناته ايأمنن خواتك هالمشن
وتأمن زينبك بالغاضريه
امانه زينب وعندك وصيه
يعباس يعباس يعباس يعباس
............................................
اوصيتي ابكربله زينبك امانه
خدرهه ايرف مثل رفة لوانه
خدر زينب وسط كلبك مچانه
يمن دون اخوته انميزه ابحنانه
صيرلهن وطن خواتك هالمشن
علي يعرف ابجفينك وفيه
امانه زينب وعندك وصيه
يعباس يعباس يعباس يعباس
............................................
ييمه اعليك تعبي وسهر ليلي
وهمي الفرگتك تارس شليلي
بالطف كونك اتبرد دليلي
اعلوم الزود من عندك تجيلي
يشيمن لو لفن خواتك هالمشن
وتدري الفرگتك ميتات اديه
امانه زينب وعندك وصيه
يعباس يعباس يعباس يعباس
...........................................
كلشي يهون وتهون المصايب
بس لازينب اعليكم تعاتب
غريبه الطف ييمه ولاگرايب
اذن خدر العقيله اعليك واجب
يفيهه امن الزمن خواتك هالمشن
العفيفه ابموتتك تصبح سبيه
امانه زينب وعندك وصيه
يعباس يعباس يعباس يعباس
خادم اهل البيت علي الزرگاني
سافر ولا تهتم
عالغربه اتعلم
تستاهل دموعي
يالعطشت زمزم
مودعه الذكريات
من دون البنات
...
فدوه لهالدموع لا تحني الضلوع
تفهم حچي النار من تبچي الشموع
من گتلي ارحل لونك تبدل
وشفتك يغالي گدامي تذبل
يعيون العليله تروح خلهن يعمن عيوني
اشلونچ من يسألوني شحچي بفگدك اشلوني
لا تستغرب من تروح بعدك ميته يلگوني
ماخذ ضعن روحي
وآنه ابقه بجروحي
ودموعك تگلي
سميني مذبوحي
حلم اسنيني مات
من دون البنات
...
الدنيه بصراحه ما بيها راحه
وآنه اقره بعدك طور المناحه
كلمة رحيلي تهدملي حيلي
بچف البواچي ينيمني ليلي
آنه ودمعتي والليل نترافگ بعد عينك
الگاع اترسها بغيابك بيمته ترجع اوينك
ضميت العتب بالشيب عن لا اسمع ونينك
وعيونك تگلي
يا فاطمه ظلي
شتامرني بالخدمه
سافر يبعد اهلي
بدموعي ابات
من دون البنات
...
شيخ المدينه تروح بضعينه
ويا بويه تدري ابنيتك حنينه
حلم الطفوله بدمعي اگوله
مودع يغالي بالله ورسوله
گلت مودع الله وياك وانه الهم يظل وياي
بس طيفك يظل بعدك بين عيوني رايح جاي
ما ادري شعجب يحسين يلچم روحي طاري الماي
وبأربع سنيني
ما فارِگ ونيني
راح اكبر بفگدك
ومشيبه تلگيني
تهظمني الحياة
من دون البنات
...
ايامي ضاعن ودموعي طاحن
اخذت حياتي كلمة وداعاً
تودعني المن وعيوني يعمن
خليني مره لعطرك اشمن
ليل الما اشوفك بي مثل المكبره مو ليل
صدرك حصتي هاليوم اشتمه ويردلي الحيل
للطف باچر من تروح بويه يصير حصة الخيل
من تنطفي شموعي
ما تنشف دموعي
ضلعك يهشمونه
وتتهشم اضلوعي
ارسومي ذابلات
من دون البنات
...
غراب المنيه يوصل اليه
يسولفلي عنك بالغاضريه
ويگلي ذبحوه ويگلي سلبوه
ويگلي سحگوه وعالغبره خلوه
ريت السلبك يحسين من گبلك يسلبني
ذباحك يماي العين كون بسيفه يذبحني
واصرخ عيف ابوي وهاك روحي ولا تيتمني
اتخيل ابالي
زينب بلا والي
وتنادي يا عباس
شافو تره خيالي
عمي اعله الفرات
من دون البنات
...
خادم الحسين ( عليه السلام)
كرار حسين الكربلائي
( ابو كميل )
دعم مؤسسة منبريون الحسينية
#افضل قناة للنعي
/channel/+P0VV4bLqtzuKdcQS
#للاشتراك بالدعم @ahmed_alziwar0
قصيدة ( اول مره ) تروي حال الامام الحسين عند شهادة أخيه ابي الفضل عليهما السلام
اول مــره حسين انظــرله بمشيه يميل
وشمس العاشر چنها بعينه صارت ليل
رد حســين ولازم ظـهره
مرسومه بنظراته الكسره
بمشيه يميل
****
حيره منين اسولف وابدي بأحزاني
يــوم اتوادعــوا للمــوت خــوانـــي
هــوو للگـــاع واحـد شابگ الثاني
بســاعتها تغّـَيـر شكلــي والــوانــي
اول مـــره بعمــري انظــر هيــچ اوداع
انظر لحسين شلون اهوى فوگ الگاع
وخانگته يــا حيف العبره
مرسومه بنظراته الكسره
بمشيه يميل
****
ودعني ومشــه ودلالي راح ويـاه
احس حسين كل خطوة جدم ينعاه
يا ريت النهــر كله انگطع مجـراه
لان خلّــه بـدليــل حســين اخ وآه
عطشان حسينك انظــرله مــو للماي
چنــه ينــادي بيــك اتــروه ظل وياي
محتاره انظر لابن الـزهره
مرسومه بنظراته الكسره
بمشيه يميل
*
عطشان اعلى اخيّــه وگلبــه يتلــوه
واجتــه مــن الشريعــه چلمة الخوه
مــن طوله اشوفه حسين من اهوى
تعنّـه المشــرعـــه ودلالـــه يتچـوه
ينظرله حسين ابدمعــاته بـــلايا زنــود
وبكتره الرايه وچفينه لصــدره الجــود
بــدلالـــه تتــلاهب جــمره
مرسومه بنظراته الكسره
بمشيه يميل
*
تعنه المشرعـــه ومتغشي بأحــزانه
صگر چنه وكسيره بهيمه جنحـانه
نظــر عبـــاس طاحـت يمّه ذرعانه
روحــي بطيحتك مـــا تروه عطشان
يا عباس اگعــد يا خويــه شلون الحال
تنتظــرك زينـــب والخـدّر والاطــفــال
خلينـــي نـــاداه بحســـره
مرسومه بعيونه الكسره
بمشيه يميل
****
راد يشيــل اخيَّــه وگــلّــه خلــينـي
بأحضــانك امــوتن يـا نظـــر عيني
ضمايه اطفــال بأخيـــامك تتانيني
اوصّله اشلون وآنه بكتري چفيني
خليني اعلى الشاطي موذر يا مولاي
ريحانت دلالك تنطــر منـــي المـــاي
بلغ سكنــه گوطر عمره
مرسومه بعيونه الكسره
بمشيه يميل
*
رجع منْ الشريعه حســين بالگوه
اصدنله واگــولن هــوه مــو هـوه
وصل للخيمه حيــره ينادي وبلوه
چنه يگــول راحــت خويه المروه
رد حســين وانظــر طــوله ظــل يمــيل
يا زينب عالشاطي بحسره عفت الحيل
لا يمنه يــا خويه ويسره
مرسومه بعيونه الكسره
بمشيه يميل
**
الشاعر
موسى البديري
يحسين اصحابك وفايه
ــــــــــــــــــــ ــــــــــــــــــــ
من اصبيهم حد شايبهم
ركضو بعدك مانادبهم
لزمو لم عون اشواربهم
وشدو يم عباس الرايه
ــــــــــــــــــــ ــــــــــــــــــــ
يمهم يوگف حد الصحبه
بين الرايد شيبه يخضبه
وبين الهايم عگله وگلبه
للموت اصحابك شرايه
ــــــــــــــــــــ ــــــــــــــــــــ
شجعان ومنك هيبتهم
ومن عباس اخذو غيرتهم
لاووها اجيوش اللاگتهم
ودگو بالميدان الثايه
ــــــــــــــــــــ ــــــــــــــــــــ
بين اللي بحبــك جنيته
والعايف عرسه وبجيته
والطايح واعليك اوصيته
والصاح حسين انت الغايه
ــــــــــــــــــــ ــــــــــــــــــــ
يتسابگ شاب اويه الشايب
حتى الشد بعصابه الحاجب
محد يوگفله امن يحــــارب
وايحير اسهام الرمايه
ــــــــــــــــــــ ــــــــــــــــــــ
نصروك ومارادو جنــــــــــه
واحدهم من تنشد عنـــــــه
مو مره يموت الف اتمنـــــه
يگولون امقصرين اهوايه
ــــــــــــــــــــ ــــــــــــــــــــ
عمرو ابن جناده المامثله
فاگد والد بأول حمــــــله
رديته وروح امه اتگــــله
فرحانه بدمه امحنايه
ــــــــــــــــــــ ــــــــــــــــــــ
ياهنياله الجون الاســـــود
بالطف مسك وعنبر يشهد
وخدك خليته اوياه عالخد
ماكو اعظم واشرف من هايه
ــــــــــــــــــــ ــــــــــــــــــــ
واحد جنهم مااعددهـــم
حبك يحسين اموحدهم
الله اويه اخلودك خلدهم
انصار وليك امسمايه
ــــــــــــــــــــ ــــــــــــــــــــ
بجوك اشگد لمن نزفــــــو
صرعه وتشهد ليهم وفـــو
من سمعوك اتحشم زحفو
صحبة موقف موش احجايه
ــــــــــــــــــــ ــــــــــــــــــــ
علي محسن الزيادي
الاكبر روحي فداه
كومي يالليله وانصبي الفاتحه
جثة اوليدج هذيج الطايحه
والولد راح..الولد راح
ــــــــــــــــــــــــــــــــــــــ
راح الاكبر صار وي الموته
بعد مانسمع ترافة صوته
العينه تلمع والرمش ياقوته
اشويه وايجيبولج تابوته
يالترف اجفونج أمن البارحه
جثة اوليدج هذيج الطايحه
والولد راح..الولد راح
ــــــــــــــــــــــــــــــــــــــ
صاحلي ادركي ورحت للحومه
اركض واوكع فجعني بيومه
العثره سهله المشكله بالكومه
ياهو الايوديني اشم اهدومه
العطش والحر يليله الذابحه
جثة اوليدج هذيج الطايحه
والولد راح. الولد راح
ــــــــــــــــــــــــــــــــــــــ
ردته اشبگه وغمضاهه اعيونه
ابنج الثاني نبي ايسمونه
دم وريده نازل اعله امتونه
اشحال كلبج لمن ايدفنونه
وهيه عالشبان حلوه النايحه
چثة اوليدچ هذيچ الطايحه
والولد راح..الولد راح
ــــــــــــــــــــــــــــــــــــــ
كمت انادي وتسمع الخياله
اشويه من الدوس ارحمي بحاله
آنه اسحكيني يخيل ابداله
گبل أبنه المات ياهنياله
بيه ضلن ذكرياته الجارحه
چثة اوليدچ هذيچ الطايحه
والولد راح..الولد راح
ــــــــــــــــــــــــــــــــــــــ
راح تعبج يالتعبتي اهوايه
كسرو أمن الجنه أحله امرايه
كومي وي عماته سوي اقرايه
راح ألمه أمن الرمل بالرايه
ياهو الانماسي بعد ونصابحه
چثة اوليدچ هذيچ الطايحه
والولد راح..الولد راح
ــــــــــــــــــــــــــــــــــــــ
راح الاكبر راح ابنّه الغالي
هالولد كسرة ضهر خلالي
كمت أعثر بالهوه وبخيالي
تيهت دربي ومنو اليبرالي
الماي زاعلته وبعد ماصالحه
جثة اوليدج هذيج الطايحه
والولد راح..الولد راح
محمد الجماسي
#اللهم_عجل_لوليك_الفرج
لسان حال السيده زينب( ع)
(#جلجل_الليل)
جِلجِل الليل عليّ وانه مره
وين اروحن بگيت محيره
ــــــــــــــــــــــــــــــــــــــــــــــــــ
حرمه ضليت غريبه ابلا ولي
بكربلا اليوم گضو كلهم هلي
صحت وينك يبويه يا علي
اليله برجاك يقــالع خيبره
جلجل الليل عليّ وانه مره
ــــــــــــــــــــــــــــــــــــــــــــــــــ
ام لليتام صرت مو للـــــــخدر
عگب اخوتي يسب بيه الشمر
بالصواوين دوت نار الكــــفر
لا بگت خيمه عندي ولا ذره
جلجل اللـيل عليّ وانه مره
ــــــــــــــــــــــــــــــــــــــــــــــــــ
المن اشكي وســــولف يا جـــرح
راس الحسين يلوح اعله الرمح
جسمه عالگاع سليب ومنـــطرح
صاير اوصال وضايع خنصره
جــــلجل الليل عليّ وانه مره
ـــــــــــــــــــــــــــــــــــــــــــــــــ
يا مصيبة كفيلي ومصـرعه
طايح إلگيته فوگ المشرعه
بعينه مصيوب وديه امگطّعه
گتله معذور يسبع الگنطره
جلجل الليل عليّ وانه مره
ــــــــــــــــــــــــــــــــــــــــــــــــــ
طاح الاكبر شبيه المــــــــصطفى
بأرض الطفوف خمد نوره وطفه
فوگ التراب هوى و نام وغــفى
شفافه منّ العطش متفطره
جلجل الليل عليّ وانه مره
ــــــــــــــــــــــــــــــــــــــــــــــــــ
منّ الخيام بدر جِنه طلــــع
راح للحومه جاسم ما رجع
ومبصابه گلب عمته انفجع
روحي ضلت عليه امرمره
جلجل الليل عليّ وانه مره
ــــــــــــــــــــــــــــــــــــــــــــــــــ
حتى عبدالله منهم ما سلم
عمره ست اشهر بنبله نفطم
بيد الحسين گطع نحره السهم
بيه الجروح جثيره موجره
جلجل الليل عليّ وانه مره
✍️علي كاظم المنصوري
اهدي ثوابها الى روح والدتي
طب مسلم وعلومه
كشخت حتى الحومه
طوعه اتنادي اصگرها
كف ردنك واعبرها
*******************************
نفاها وطب عليهه.......ابو طاهر يجيها
علي چنه بخزرته...خطف يخطف عليها
دوت بسمه المعاره......مثل حيدر فقاره
هلا ابمسلم انادي.. بعزم وانت احتويها
خبر عاجل...بده ايقاتل....وسامه وهيبته
غضب يلهب.منواليگرب.حسامه وضربته
حتى الجيش اتكتر
فارس طبهم حيدر
هز ايده وينظرها
كف ردنك واعبرها
******************************
برز والكل رعبهه........غدر رادت حربهه
حلف والكوفه بيده....يبچيهه وشطبهه
هتف وين الغياره.....يذل قصر الاماره
غيور وگدها نازل...فخور ابسيفه طبهه
وصل حدهه....كلف ردها....ترفرف رايته
مثل حيدر ....قلع خيبر......اشاهد يمنته
چفه الموت اطلابه
مسلم كلها اتهابه
بيدك حيل اسطرها
كف ردنك واعبرها
******************************
غشيم الحده جابه....تصير الكوفه غابه
وصل فارس بدرها...منو اليوصلهه بابه
علن مسلم قراره...... نجاة ابكل جواره
مصير الدنيا بيده.....صدر بيهم حسابه
يصف صفهه..علن طفهه..عساكر وصلته
اخذ حيفه...يحز سيفه.......يجرها ابقوته
كلها اتنادي ادخيلك
عجل واخذ بحيلك
بكيفك لو تشطرها
كف ردنك واعبرها
*******************************
بديت اروي المقاتل..نزل چنه ابو فاضل
هتف يوم القيامة....عليهم صيته واصل
مثل عمه بسطرته.....غضب ماخذ شمرته
تموت اهل الكتايب...خبر بالحومه عاجل
زعل غاضب...بني طالب...مناقب سيرته
علي چنه........رسم فنه.....تموت بخزرته
عاد اعليهم خيبر
جيش الكوفه اتحير
بيدك بس اشمرها
كف ردنك واعبرها
*******************************
برز بيده المنايا ....يوزع بس ضحايا
زعل والكوفه تحسب.عدد جيش الرزايا
غضب وبچفه صارم...منو اليگدر يقاوم
بني هاشم بساله.......فرض عالامه رايه
بده يشلهم.....تره يذلهم.....تشاهد وگفته
صعب چفه...حرت وصفه...بيانه ونظرته
طاحت كلها ابكتره
فشلت يمه الكثره
فزع الكوفه وطرها
كف ردنك واعبرها
*******************************
علن سيف انتقامه.....اظن يوم القيامه
عمر گال ارجعوهم......فلا بيهم سلامه
بده الاشعث دروبه.....يدور بس هروبه
يريد الكثره ناده.....تره مسلم شهامه
مشه اعليهم...ذبح بيهم....فقاره وشمرته
الشرد يعثر...چثث بالبر....تشوفه بغيرته
ها مسلم عد عينك
عاشت والله ايمينك
اشما تكثر طشرها
كف ردنك واعبرها
*******************************
#تمت بعون الله تعالى
#خادمكم...... يوسف الفتلاوي
#محرم_الحرام
من طلع ضعن الاحبهم طلع نوحي
ومن مدينة جسمي طالع ضعن روحي
—————-
راسي اشتعل شيب ووجع .. والرية نار بجمرة
منها ادركت هذا النجم .. شيب اعله راس الگمرة
طلعت اعيوني من الوجه .. من طلع ضعن الزهرة
والفارگ اوجوه الضوه .. اصورهم توذر عمرة
گمت اتلمس اعيوني بوراهم
اظن ماخذهن الحادي الخذاهم
كون اتعيني اجدامي اعله الاركاض
چا يلگوني امچلبة ابگفاهم
حزن يعگوب انتقلي وطاح موحي
ومن مدينة جسمي طالع ضعن روحي
———————-
امحظرة العباية امن العصر .. والنبض ركضة شارد
والعنده سفرة من الصبح .. ما يغفة وايظل گاعد
احسب دقايق للفجر .. والگلب كلش بارد
كلساع اگوم احسب هلي .. بالنوگ ناقص واحد
شو بزّاني گلبي وعدت الاحساب
بعد ناگة نقص من نوگ الاحباب
گلت عبد الله يمكن وامة باقين
لان بعده رضيع ايخنگة الاتراب
طلع ظني مو محلة يا جروحي
ومن مدينة جسمي طالع ضعن روحي
————————-
ابنية وعليلة ابلايه اهل.. فوگاها وحشة وغربة
البي ذني كلهن يا خلگ.. تلگون جمرة ابگلبة
ابنادم اذا جاسه الهظم .. ايحط وجهه بين اركبّة
الراحو هله وظل وحّدة .. حيطان بيته اتشربة
يومية اطلع واسگي بأثرهم
بلكي ايخضر ويرجع عمرهم
الشجرة الچانت بنص بيت الاحسين
يبست مثلي من ضاگت سفرهم
يا سفرهم من مشو دمّر طموحي
من مدينة جسمي طالع ضعن روحي
——————-
كون الوجع جوه الگلب.. نندله من اجروحة
بس اليفارگ وجه ابو .. ابروحه الوجع شيلوحة
من سافرو عشت الذبح .. بس آنه ما مذبوحة
هوّ اليصبّح ع الهجر .. المغرب يطّلع روحة
آنه الصبحت عالدوه العندي
وايدي امعلگة بحيطان خدي
صليت الصبح وي ضعن الاحسين
وصليت الظهر بس انه وحدي
من كثر ما دمعت غوش وضوحي
من مدينة جسمي طالع ضعن روحي
———————-
مابيه حيل الحگ هلي .. هذا العمر ما اريدة
المشيول من بيته الهوة .. شم النِفس شيفيدة
لاچمني گلبي امن السفر ..واللچمة مو تعويدة
گالولي اليطب كربلة ...… يرجع رگبته بإيدة
جاي اسمع اكسور اضلوع يا ناس
اسم الله حسين بويه اسم الله عباس
اليطب لكربله مرتب يگولون
يرد امترب وچف ايده عالراس
گلبي صيّح فاطمة لكربله روحي
من مدينة جسمي طالع ضعن روحي
———————-
ارد انسبي اويه التنسبي.. و ارد اعثر اويه التعثر
واتمنى اغمض عمتي .. امن اتشوف حز المنحر
واضلوع الم امن الرمل .. والگه اليضيعن بالبر
والخيمة اطفّيها بإدي .. و اصرخ ب الله واكبر
واركض للرمح واتعثر اهواي
و اصعّد بيدي كون لشفته الماي
واطلّع چم طفل من حدر الاخيول
صح كلش عليله الله وياي
وبمعاول كربله انهدمت صروحي
من مدينة جسمي طالع ضعن روحي
——————
علي هادي الخزعلي
محرم العباس
ها خويه متت ... لو بعدك عدل
بس لا غمضت ... لا يابالفضل
خويه خويه
،،،،،،،،،،،،،،،،،،،،،،،،،،،،،،،،،،،،،،،،،
ياضهر حسين وطوله وعينه ويمناه
خليته اليوم الوحده ولازلمه اوياه
يالرايح تدري بموتك تكسر مگفاه
رسومه نشربت بالحومه الجان شمحلاه
مبين عليه الضيم وانه ابخيامي
الكسرتني ياعباس عالشاطي ضامي
ضلت خيم عدنان مابيها حامي
بعدك تشيل النوگ اعضم أسامي
هجرك يالأخو ... لا ماينحمل
بس لا غمضت ... لا يابالفضل
خويه خويه
،،،،،،،،،،،،،،،،،،،،،،،،،،،،،،،،،،،،،،،،
لوعت فگدك ياخويه اتلگاها امنين
عباس وداعت زينب كسريت حسين
موشيب يخضر بيه لا خويه سنين
لا من ماي الجبته النه لا من جفين
جيتك ركض عباس بس فكري حاير
والعمره بالتسعين يسبگني صاير
بالگوه اشيل الروح بالگوه اكابر
بينك حرت مابين خيمه وعساكر
صاير بالركض ... يسبگني النمل
بس لا غمضت ... لا يابالفضل
خويه خويه
،،،،،،،،،،،،،،،،،،،،،،،،،،،،،،،،،،،،،،،،
جيتك للشاطي محدب وجروحي هواي
اعثر واندب محتاجك عباس اوياي
أبگد ما ام عبد الله محتاجه الماي
اسگيني بعطف الخوه وانته السگاي
دورتك ابلا روح واعرف بعيده
مثل اليدور ابليل گبر اليريده
تخنگني جلمه شلون بيت ابقصيده
من اسمع العباس مگطوعه ايده
بفراگك صدگ ... ينطش الشمل
بس لا غمضت ... لا يابالفضل
خويه خويه
،،،،،،،،،،،،،،،،،،،،،،،،،،،،،،،،،،،،،،،،
حاجيني ولم الخوه الضيعها الليل
انه حسين الخليته من يمشي يميل
تعرف لو عفته الوادم بخيامه تعيل
تنباگ هدومه وتسحگ بضلوعه الخيل
باجر تجيني الخيل تخنگلي ريتي
وتقبلها يا عباس تسحگ ثنيتي
يذبحوني من مگفاي وانه بمنيتي
بسيف الشمر تنشاف شيبت لحيتي
موتي وموتتك ... مونفس الشكل
بس لا غمضت ... لا يابالفضل
خويه خويه
،،،،،،،،،،،،،،،،،،،،،،،،،،،،،،،،،،،،،،،،
عباس وداعت عينك خلصنه الموت
ضلت روحي بنسواني المابيهن صوت
بالطف التطلع روحه هاگد مبخوت
اهون من ضيم الهزله صار التابوت
ابهاذ الكسر ياشيخ من يا عشيره
تفرهد مضيفه وشاف أخته اسيره
عاري وتلجمه ابنار شمس الضهيره
ومن گاعه ماينشال اله ابحصيره
نسوان البخت ... شالاها الهزل
بس لا غمضت ... لا يابالفضل
خويه خويه
العبد ابوفايز الرافضي
الفاتحه على روح والدي
((#بس_هالليله )) . #محرم_الحرام
……………………………………………………………
بس هالليله .. النه اويه اوجوه السادات
بس هالليله .. و باجر هيمه ابلا خيمات
باجر صعبه .. وحشه و غربه
و أتيهن يا علويات
……………………………………………………………
باچر والينه امن المگفه . وبهيده اينحره الذباح
يظل بس راس ايصد اعلينه . ومعلياته الفوگ ارماح
عباس يروح وما يرجع
يم الشاطي ايظل امگطع
من يشوف الجود اتصوب . روحه اتسيل ابحسره وتطلع
باجر يصبح جسم الاكبر
فرهود اعل الكاع امطشر
باجر جاسم يرجع النه . شابع طعنات امن العسكر
خل كل وحده .. اتودع واليها ابدمعات
خل كل وحده .. تدعي اظل هاي النجمات
صُبح الكُربه . وحشه و غربه
و أتيهن يا علويات
……………………………………………………………
لو رد الميمون اعلينه . ابلايه حسين ويصهل حيل
ايريد ايگلچن ذيج اياها . راح اتهد نيران و خيل
باجر والسجاد ايگلچن
شردن وبهذا البر هيمن
مامش گعده ومامش ممشه . يا خيّاتي ويعني اتركضن
ابخمسين وهم اركض آنه
مو خوف ولاچن حيرانه
ابقه اعل التل يم ابن امي . لو يم اخيام السعرانه
أكبر حيره .. منا خيل ادوس حسين
أكبر حيره .. و اطفال وتصرخ لاوين
شتمه و ضربه . وحشه و غربه
و أتيهن يا علويات
……………………………………………………………
الخيمات السووها الساده . النه و چنها اقصور أكبار
همّه اسيوف التذبح بيهم . و هنه التذبح بيهن نار
لو نار اگتربت شفتنها
كل خيمه ابسرعه اتركنها
لو حرگوهن وانتن جوه . وحدتچن ما تطلع منها
اتسحگن لو شوج ولو جمره
و رجليچن من الدم حمره
ولو ما شفتني آنا احذاجن . صيحن وينج يمنه الزهره
إلچن تفزع .. بس امحنبه امن البسمار
إلچن تفزع .. هم ترجع تتچوه ابنار
هم متعذبه . وحشه و غربه
و أتيهن يا علويات
……………………………………………………………
حسين امدللچن گل عمره . ومن الكافل محميات
باجر سوط اعليچن يفتر . بعبيجن يرسم طبعات
الذابح عبدالله امن اوريده
سهله ومن تطّاول ايده
سوط الضربوا بيه الزهره . شمر اعليجن راح ايعيده
عمه اسكينه و عمه ارقيه
من چفوفي و چلبن بيه
عمه وحدر اعباتي اطبن . وخلن ضرب السوط اعليه
انا أتحمل .. بس انتن يا عمه شلون
آنا أتحمل .. خل ايشل من عندي امتون
سوط اللهبه . وحشه و غربه
و أتيهن يا علويات
……………………………………………………………
يضوَن بدرين ابهل الليله . آل امحمد والاصحاب
ليلة باجر ظلمه و حارس . لو چتّال ولو سلّاب
طول الليل انظل بالهيمه
مكشوفين ومامش خيمه
هالاطفال و شبه أگلاده . ابخوف وحولي الكل ملتمه
اطفال وعل العز معتاده
ابلا فرشه اتبات و لـوساده
يهتز عرش الباري امن يصد . جوعانين ايتام الساده
كسرة خاطر .. شافوا ماي الهم جابوه
كسرة خاطر .. عگب حسين ولا شربوه
اتفطر گلبه . وحشه و غربه
و أتيهن يا علويات
……………………………………………………………
و الاصعب بعده امتانينه . من الضيم انشوف اشكال
خشنه اظل تحفر بيديجن . من هسه امحضرين احبال
هزله النوگ وهل تنطرنه
واهنانه اصير اكبر محنه
اجفوف وظلت برض الحومه . ماكو ولا چف ايصعّدنه
حسبنها وياهم ماهيه
بعد انسن جلمة علويه
ذبحاها الشمر اويه الكافل . و بدلها ابچلمة مسبيه
فوگ الناگه .. وانودّعهم من ابعيد
فوگ الناگه .. امودّينه انگلهم ليزيد
الشام و دربه . وحشه وغربه
و أتيهن يا علويات
……………………………………………………………
✍️ ( سيد خضر الزاملي )
مقدمه ام البنين عليها السلام
شلتك بعيني ضوه. روحي وغله امن الهوى
انت لجروحي دوه. يا حُسين
٠٠٠٠٠٠٠٠٠٠٠٠٠٠٠٠٠٠٠
آنه ام البنين امك يضي عيني
حسين حسين يبني وشمعة سنيني
عني تريد تبعد ليش حاچيني
خاف البين يحجب بينك وبيني
يبني يا نبض الگلب. تدري بفراگك صعب
گلبي من هسه نچوه. يا حُسين
٠٠٠٠٠٠٠٠٠٠٠٠٠٠٠٠٠٠٠
ما اكدر اودعك يا اعز ولدي
غيرك يا حُسين بدنيتي شعندي
وين بهالهواشم والظعن تحدي
خوفي امن الزمن من ينگلب ضدي
آه من غدر الزمن. عيوني من هسه بچن
يعني ناوي لنينوه. يا حُسين
٠٠٠٠٠٠٠٠٠٠٠٠٠٠٠٠٠٠٠٠
يبني وياك أخذهم اربع اولادي
فدوه لشوفتك يبن النبي الهادي
بيهم ارد حقّق عهدي ومجادي
أهل البيت انتم قاده وسيادي
آنه الكم خــادمـه. ولدي فدوه لفاطمه
گلبي بس حبك حوه يا حُسين
٠٠٠٠٠٠٠٠٠٠٠٠٠٠٠٠٠٠٠٠٠٠
فديتك بالبنين الاربعه وضحّيت
سالم من عدوّك ترجع تمنّيت
ابچي اباب دارك ونتظر ظليت
لا بيّن خبر منك ولا ردّيت
ما بچيت عله الگمر. دمعي لغيابك نهر
يجري ماي ودم سوه. يا حُسين
٠٠٠٠٠٠٠٠٠٠٠٠٠٠٠٠٠٠٠٠٠٠٠٠
صحت يحسين يبني طالت السفره
لن بشر ابن حذلم يصرخ بعبره
حسين بكربله ضامي انگطع نحره
بخيول آل أمية كسّروا صدره
ينزف بصدره الجرح. وراسه مرفوع برمح
الطم وظهري انطوه. يا حُسين
سيد زيد الفحام
محرم ١٤٤٧هـ
_______________________________________&
توهن طابن عمه اجتافي
حاجي الحادي نوكف كافي
ماصدكت السوط ايهدني ومنه ارتاح
شماله الحادي ويانه اتواتب كله صياح
حاجي الحادي — حاجي الحادي
————
توهه من السياط ارتاحت متوني
وتوهه من البواجي نشفت عيوني
كلت ارتاح ملو ما يضربوني
شمسويه واجو بحبال جتفوني
فوگ الناكه ودمعت عيني
لا عم لا والد يحميني
هزله الناكه ومحد يوكف لحد طاح
شماله الحادي ويانه اتواتب كله صياح
حاجي الحادي — حاجي الحادي
—————
اديني امحرگه وجدامي مجويه
واذاني تصب دمه مبيوگه ترجيه
فوك الضيم هذا وامشي مسبيه
والتهضمني ابوي يباوع اعليه
مريت بصفه وعاتبته
شلون المثلك ضيع بنته
جنه يكلي اعتابج اقوه من الذباح
شماله الحادي ويانه تواتب كله صياح
حاجي الحادي — حاجي الحادي
——————
من عفتو الخيم يحسين حرگوها
والماطالعه من الباب شافوها
وترجيتي التحب البسهه باگوها
والتشرد يبويه بخيل لحگوها
صاحو فرهود اعله اخيامك
وشكد ضاعو من ايتامك
اليشرد يسلم واليبقه من السوط انلاح
شماله الحادي ويانه تواتب كله صياح
حاجي الحادي. حاجي الحادي
————-
راح امشي بدرب بي يستحي الزلمه
شرايك وانه علويه وبنت نعمه
دعيت الله بدمعتي يسمع الجلمه
اهل الشام كلهه من النظر تعمه
خاطر لو طبينه بشارع
محد يتصفح ويباوع
ياهو اليفزع وانتم بس روس اعله ارماح
شماله الحادي ويانه اتواتب كله اصياح
حاجي الحادي. حاجي الحادي
——————-
الخادم موسى البطلي
عالثره شالع كلبهن
عالرمح شالع كلبهن
بناتي بناتي
٠٠٠٠ ٠٠ ٠٠٠٠
يمهن منذبح لو عنهن بعيد
اكول السالفه ياوادم اتهون
يحز راسي الشمر جدام الخيام
وزينب وي بناتي يشبحن عيون
ياحيرة خدرهن والظهر ذاك
الشمس والسوط ركضتهن علمتون
تارس الهيمه البناتي ذكريات
وين ماراحن صوري مطشرات
هناه توادعنه وحجينه بطاري موت
بعد ماكو بكربلاه يم دللات
موش الهن ركظ هاي الهيمه
ذني لوطلعن تموت الخيمه
بناتي بناتي
٠٠٠٠ ٠٠ ٠٠٠٠
صاحو للخيم ايسي من الحسين
الماعنده اخو مذبوح مذبوح
انه الكاسر گلبهن بين الخيول
مامرتاح حته بطلعة الروح
من شافني حدر الخيل مسحوگ
بكبر گاع الطفوف نترسن اجروح
شبعتهن كربله بنياتي خوف
بصدر ابوهن لو حوافر لوسيوف
من رحت حركو خيمهن من وراي
عيونهن ياضيم بالمغرب تشوف
كلها ردت وانه رديت برمح
شلون تغفه اليمهه ابوهه منذبح
٠٠٠٠ ٠٠ ٠٠٠٠
ينامن ليلهن ويغمضن اشلون
اذا جمر الخيم طافي بجدمهن
تهضمني شكثر جلمت سبيات
ياهو الشافهن للشام گلهن
من حرگت كلبهن جني اركاظ
وانه الماخوذ وميسر مثلهن
راس ابوهن عالرمح وشلونهن
مذوبلات من البواجي عيونهن
الليل هين اه ياضيم النهار
عله الهزل غربه الي رجبونهن
عمده يم الجثه مرو بالضعن
فوگ لو عتهن بعد يتلوعن
بناتي بناتي
٠٠٠٠ ٠٠ ٠٠٠٠
يادرب السبي ليطلع الروح
راسي عله رمح ويعاين الهن
الصرت جدامهن ايتصبرن بيش
وراهن لوصرت اشلع گلبهن
انجان عله الرمح هالسالفه اتهون
جابو ماي وأكثر روعتهن
جابن الماي واجن يتراكضن
بويه اشرب ضامي جبدك صيحن
عالي راسك والرمح والحر جواك
عفنه صدرك بالثكيلات انطحن
عالرمح راسي يرامونه بحجر
ظيم شبعانات ويشبعن قهر
بناتي بناتي
٠٠٠٠٠٠٠٠٠٠٠٠٠٠٠
وراهن ضيم مامشيوف عد ناس
الخرايب والقصر وطبت السوگ
الله يعينهن عالشام والشام
اذا وصلت سبايه محمله النوگ
تتفرج عليهن ناس شمات
ينشف المستحه دمهن بالعروك
ليش وبكل يوم ازودهن جروح
الخرابه والطشت ياخذله روح
اه ياوگفتهن بمجلس يزيد
اعله شفافي عصته لمن تلوح
الشام قصره روع ايات النبي
والمجالس موش الهن والسبي
بناتي بناتي
٠٠٠٠ ٠٠ ٠٠٠٠
خادم اهل البيت ع
فلاح طالب الماجدي
#جديد_محرم_الحرام_١٤٤٧هـ✍️
@HxzEU1
#قناه_نشر_القصائد_المنبريه ✍️
#نعي
شديتوا الضعون وكوريتو
شحال الدار لو عنها بطيتو
حزينه تنوح عنها ما دريتو
متعوده عليكم يالمشيتو
يهل البيت يالكلكم محنه
تفاركنه وبعد شيلم شملنه
تون الدار چم ونة اعله ونه
شيردة العزيز الراح منه
غريبه الدار لو شالوا اهلها
شالو ما بعد طارش وصلها
بعدهم بس حزن والون نزلها
خلاف اهل الوفة يثگل حملها
(ابو ذية)
مشيتوا ما بعد واحد لها عاد
الدار . وما بعد اخضر لها عاد
الفرح من رحتوا بضعينة لها عاد
ويمر بيها الحزن صبح ومسية
اسالكم الدعاء رائد الاسدي
#اللهم_عجل_لوليك_الفرج
#قصيدة_للامام_الجواد_ع
صاحب ولاية و معصــــوم
و لزينبّك تجـــري ادمــــوم
عايش نحر فوگ الرمح
و ابكربـــلائك منــــذبح
غريب وآ جواداه
ـــــــــــــــــــــــــــــــــــــــــــــــــــ
دمعك على خدودك غَفل يتلامع ابليــل الهضم
فرض الصبح يدخل بعد ما ينتهي فرض اللطم
نيّة صلاة احزانك و حرگ الخيم نَفس الطعم
تكبيرة احرامك جَرح سوط و نِزَل حَدر العظم
ابدمعة عيــــــونك تسبيـــح
يا عمة كل ركــــعة تصيـــح
تسبل جرح فوگ الجرح
و ابكربـــلائك منـــــذبح
غريب وآ جواداه
ـــــــــــــــــــــــــــــــــــــــــــــــــــ
نار العطش من تلتهب تفتح جرح ما ينـدمل
عينك تصب العلگـــمي لو تسمع ابشهگة طفل
رمح النحر بيـك أنزّرَع و ابصدرك مخضّر نبل
ماي الگلب سال وترَس جربة حلم راعي الفضل
تتعـــــــثَّر ابطــــاري ثنين
خنصر قَطــــــيع و چفين
دمعك و لا بَطَّل يسح
و ابكــــربلائك منذبح
غريب. وآ جواده
ـــــــــــــــــــــــــــــــــــــــــــــــــــ
جمر الخيم تستشعره و تمشي على اطراف الجدِم
كل لحظة دخان و حرگ طارف عِبي ابگلبك تشِم
صورة هضم چف و علم دمع الجفـــــن بي ينرسِم
و الــــف و تسعــمية جـــرح يلتمّن ابيقـضة و حلِم
مثــل الخيــم نــــــار تفــــــور
يومك جــــــرح مــــن عاشــور
جسمك ذبل فوگ السطح
و ابكربــــــلائك منـــــذبح
غريب وآ. جواداه
ـــــــــــــــــــــــــــــــــــــــــــــــــــ
لكعبة خلودك قافلة بانفاسك اتمـاشي الظـــعَن
حزنك چوه لب الگلب جمراته ما يــوم انطفن
عايش غريب و دمعتك للعايلة تـــــــرسم وطن
دمعة اعله دمعة تنچفي حَد ما دمـوعك وشلن
مجمـــورة ليلية اتبــــات
روحـــك عله العلـــويات
بالونة جرحك ينفتح
و ابكربــلائك منذبح
غريب. وآ. جواداه
ـــــــــــــــــــــــــــــــــــــــــــــــــــ
من الهضم طولك وگع جثــــة ابميادين القهر
تتأمّل ابطف كربلة و تتمنّى گطعـــولك نحر
شما تنظر ابوجه السمة و ابعينك ايلوح الگمر
صوب الشريعة ترتمي و ادموعك ايفيضن نهر
ابجنح العطش بالاحســاس
توصـــــــل مقـــام العــباس
و اعله الجرح ينصب ملح
رايد تواســي المنـــــــذبح
غريب وآ جواده
ـــــــــــــــــــــــــــــــــــــــــــــــــــ
الحمدلله
#علي_حسين_الكناني